Oko Sifanele Sikwenze Ukubonakalisa Ukuba Siyazithoba KuThixo
“Mthobeleni (“zithobeni,” NW) ngoko uThixo.”—YAKOBI 4:7.
1. Yintoni enokuthethwa ngohlobo loThixo esimnqulayo?
UYEHOVA unguThixo omangalisa ngokwenene! Akanakufaniswa namntu, akanakulinganiswa namntu, akanakuthelekiswa namntu, ukhethekile ngeendlela ezininzi! UngOsenyangweni, uMongami Wendalo Iphela, likuye lonke igunya lokwenyaniso. Ususela ephakadeni ase ephakadeni, unobuqaqawuli kangangokuba akukho mntu unokumbona aze sekunjalo aphile. (Eksodus 33:20; Roma 16:26) Unobulumko namandla angenasiphelo, okusesikweni kwakhe kugqibelele, yaye uluthando lumntwisiwe. UnguMdali wethu, uMgwebi wethu, uMniki-mthetho wethu, yaye unguKumkani wethu. Sonke isipho esilungileyo naso sonke isipho esigqibeleleyo sivela kuye.—INdumiso 100:3; Isaya 33:22; Yakobi 1:17.
2. Ukuzithoba kuThixo kubandakanya ntoni?
2 Ngenxa yazo zonke ezi zibakala, asinakulithandabuza elokuba sithi esifanele sizithobe kuye. Kodwa oku kubandakanya ntoni kuthi? Kubandakanya izinto eziliqela. Ekubeni singenakumbona uYehova uThixo, ukuzithoba kuye kubandakanya ukuphulaphula ilizwi lesazela esiqeqeshiweyo, ukusebenzisana nentlangano kaThixo yasemhlabeni, ukuthobela amagunya asekuhlaleni nokuhlonela umgaqo wobuntloko kwisangqa sentsapho.
Ukulondoloza Isazela Esilungileyo
3. Ukuze sihlale sinesazela esilungileyo, ziziphi izithintelo ekufuneka sizithobele?
3 Ukuze sisoloko sinesazela esilungileyo, sifanele sithobele oko kungenakunyanzeliswa—nto leyo ethetha ukuthi, imithetho okanye imigaqo abantu abangenakuyinyanzelisa. Ngokomzekelo, umthetho weshumi kwiMithetho Elishumi, owanikelwa ngokuchasene nokubawa, wawungenakunyanzeliswa ngamagunya angabantu. Kakade ke, oku kuhambisana nesibakala sokuba iMithetho Elishumi yayivela kuThixo, kuba kwakungekho qumrhu labantu elalinokumisela imithetho engenakunyanzeliswa ngesohlwayo xa isophulwa. Ngalo mthetho, uYehova uThixo wenza ukuba umSirayeli ngamnye azilinde ngokwakhe—ukuba wayefuna ukuba nesazela esilungileyo. (Eksodus 20:17) Ngokufanayo, phakathi kwemisebenzi yenyama ebiya kumenza ubani angabudli ilifa uBukumkani bukaThixo “ngumona” ‘nokubawa’—ezo zinto abagwebi abangabantu abangenakubeka izohlwayo ngenxa yazo. (Galati 5:19-21) Kodwa ukuze sibe nesazela esilungileyo, sifanele siziphephe ezi zinto.
4. Ukuze sihlale sinesazela esilungileyo, yiyiphi imigaqo yeBhayibhile esifanele siphile ngayo?
4 Ewe, sifanele siphile ngemigaqo yeBhayibhile. Loo migaqo inokushwankathelwa ngemithetho emibini uYesu Kristu awayivakalisa xa wayephendula umbuzo ophathelele owona mthetho mkhulu kwimithetho kaMoses. “Uze uyithande iNkosi uThixo wakho ngentliziyo yakho iphela, nangomphefumlo wakho uphela nangengqondo yakho iphela. . . . Uze umthande ummelwane wakho ngoko uzithanda ngako.” (Mateyu 22:36-40) Ukuzekelisa oko kubandakanyekileyo kowesibini kule mithetho ngamazwi kaYesu abhalwe kuMateyu 7:12: “Zonke izinto ngoko enisukuba ninga bangazenza abantu kuni, yenzani ezikwanjalo nani kubo; kuba oko kungumthetho nabaprofeti.”
5. Sinokululondoloza njani ulwalamano oluhle noYehova uThixo?
5 Sifanele senze oko sikwazi kulungile sikuphephe ukwenza oko sikwaziyo ukuba kuphosakele, enoba abanye bayasibona okanye abasiboni. Oku kunjalo kwanokuba asiyi kohlwaywa ngenxa yokuba singakwenzi oko besifanele sikwenze okanye senze oko besifanele singakwenzi. Oku kuthetha ukulondoloza ulwalamano oluhle noBawo wethu wasezulwini, sikhumbula isilumkiso sompostile uPawulos esivakaliswe kumaHebhere 4:13: “Akukho sidalwa singabonakaliyo emehlweni akhe; izinto zonke ke zize, zityhilekile, emehlweni alowo esinokuthanani naye.” Ukuzingisa ekwenzweni okulungileyo kuya kusinceda sikwazi ukulwa namaqhinga kaMtyholi, sixhathise iingcinezelo zehlabathi, size silwele ukoyisa utyekelo lokuzingca.—Thelekisa amaEfese 6:11.
Ukuzithoba Kwintlangano KaThixo
6. Ngawaphi amajelo onxibelelwano uYehova awayewasebenzisa ngamaxesha angaphambi kobuKristu?
6 UYehova uThixo akayekelanga kuthi ngokupheleleyo ukuba sizenzele izigqibo ngokwethu ngendlela esifanele siyisebenzise ngayo imigaqo yeBhayibhile ekuphileni kwethu. Ukususela ekuqaleni kwembali yomntu, uThixo ebesebenzisa abantu njengejelo lonxibelelwano. Ngaloo ndlela, uAdam wayesisithethi sikaThixo kuEva. Umyalelo wesiqhamo esalelweyo wanikelwa kuAdam ngaphambi kokudalwa kukaEva, ngoko uAdam ufanele ukuba wayemxelele uEva oko uThixo akufunayo kuye. (Genesis 2:16-23) UNowa wayengumprofeti kaThixo kwintsapho yakhe nakwihlabathi langaphambi komkhukula. (Genesis 6:13; 2 Petros 2:5) UAbraham wayesisithethi sikaThixo kwintsapho yakhe. (Genesis 18:19) Umprofeti kaThixo nejelo lonxibelelwano kuhlanga lwakwaSirayeli yayinguMoses. (Eksodus 3:15, 16; 19:3, 7) Emva kwakhe, ukuhla ukuza kuthi ga kumhla kaYohane uMbhaptizi, uThixo wasebenzisa abaprofeti, ababingeleli nookumkani abaninzi ukunxibelelana nabantu bakhe.
7, 8. (a) Akuba efikile uMesiya, ngubani owasetyenziswa njengesithethi sikaThixo? (b) Yintoni amaNgqina kaYehova afanele ayenze ukuze abe abonakalisa ukuzithoba kuThixo?
7 Akuba efikile uMesiya, uYesu Kristu, uThixo wasebenzisa yena nabapostile bakhe belo xesha ukuze babe ngabathetheli Bakhe. Kamva, abalandeli bakaYesu Kristu abangabathanjiswa abathembekileyo babeza kukhonza ‘njengomkhonzi othembekileyo noqondayo’ ekudluliseleni kubantu bakaYehova indlela yokusebenzisa imigaqo yeBhayibhile ebomini babo. Ukuzithoba kuThixo kwakuthetha ukwamkela isixhobo uYehova uThixo awayesisebenzisa.—Mateyu 24:45-47; Efese 4:11-14.
8 Izibakala zibonisa ukuba namhlanje ‘umkhonzi othembekileyo noqondayo’ unxulumene namaNgqina kaYehova yaye umelwa liQumrhu Elilawulayo lala maNgqina. Lona elo qumrhu, limisela abaveleli kwizikhundla ezahlukahlukeneyo—njengabadala nabameli abahambahambayo—ukwalathisa umsebenzi wasekuhlaleni. Ngqina ngalinye elizahluleleyo lifanele lithobele aba baveleli ukuze libe liyazithoba kuThixo ngokuvisisana namaHebhere 13:17: “Bathambeleni abakhokeli benu nibathobele; kuba bona abalali, ngenxa yemiphefumlo yenu ngokwabaya kuphendula, ukuze bakwenze oko bevuyile, bengancwini; kuba anisizakali kuko oko.”
Ukwamkela Uqeqesho
9. Ngokufuthi ukuzithoba kuThixo kubandakanya ntoni?
9 Ngokufuthi ukuzithoba kuThixo kungumbandela wokwamkela uqeqesho kwabo bakhonza njengabaveleli. Ukuba asisoloko siziqeqesha ngokwethu xa kuyimfuneko, kusenokufuneka silulekwe size siqeqeshwe ngabo banamava negunya lokwenjenjalo, njengabadala bebandla esikulo. Ukwamkela uqeqesho olunjalo likhondo lobulumko.—IMizekeliso 12:15; 19:20.
10. Yiyiphi imbopheleleko abanayo abo banikela uqeqesho?
10 Ngokucacileyo, abadala abanikela uqeqesho nabo bafanele babe yimizekelo yokuzithoba kuThixo. Njani? Ngokutsho kwamaGalati 6:1, bafanele bangabi nendlela nje entle yokunikela isiluleko kodwa bakwafanele babe yimizekelo: “Bazalwana, ukuba umntu uthe waqutyulwa nokuqutyulwa sisiphoso esithile, nina bangaboMoya, mlulekeni onjalo ninomoya wobulali; uzilumkela ukuba ungahendwa nawe.” Ngamany’ amazwi, isiluleko somdala sifanele sihambisane nomzekelo awumiselayo. Oku kuvisisana nesiluleko esinikelwa kweyesi-2 kuTimoti 2:24, 25 nakuTito 1:9. Ewe, abo banikela isohlwayo okanye balungisa okuthile bafanele balumke gqitha ukuba bangaze babe ngqwabalala. Bafanele ngamaxesha onke babe nobulali, babe nobubele, kwaye sekunjalo babambelele ngokuqinileyo kwimigaqo ekwiLizwi likaThixo. Bafanele baphulaphule bengakhethi cala, bebahlaziya abo babulalekayo nabasindwa yimithwalo.—Thelekisa uMateyu 11:28-30.
Ukuzithoba Kumagunya Awongamileyo
11. Yintoni efunekayo kumaKristu ngokuphathelele ulwalamano lwawo namagunya asekuhlaleni?
11 Kwakhona sifanele sithobele amagunya awongamileyo ukuze sibe siyazithoba kuThixo. KumaRoma 13:1 siyalulekwa: “Yonke imiphefumlo mayiwalulamele amagunya awongamileyo. Kuba akukho gunya lingelilo elivela kuThixo; amagunya ke akhoyo amiswe nguThixo.” Phakathi kwezinye izinto, la mazwi afuna ukuba sithobele imithetho yendlela kwaye sikuphaphele ukuhlawula iirhafu neminikelo, njengokuba umpostile uPawulos wabonisa kumaRoma 13:7.
12. Ukuzithoba kwethu kuKesare kulinganiselwe ngayiphi ingqiqo?
12 Ngokucacileyo, ukuzithoba okunjalo kuKesare kufanele kube kokulinganiselweyo. Sifanele ngamaxesha onke sikhumbule umgaqo uYesu Kristu awathetha ngawo, njengoko ubhalwe kuMateyu 22:21: “Nikelani kaloku izinto zikaKesare kuKesare, neento zikaThixo kuThixo.” Umbhalo osemazantsi kumaRoma 13:1 kwiOxford NIV [New International Version] Scofield Study Bible uthi: “Oku akuthethi ukuba ubani ufanele athobele imithetho ekhuthaza ukuziphatha okubi okanye echasene nobuKristu. Kwiimeko ezinjalo kuyimbopheleleko kabani ukuthobela uThixo kunabantu (IZenzo 5:29; thelekisa uDaniyeli 3:16-18; 6:10 neendinyana ezilandelayo).”
Ukuzithoba KuThixo Kwisangqa Sentsapho
13. Yintoni amalungu entsapho afanele ayenze ukuze abe abonakalisa ukuzithoba kuThixo?
13 Kwisangqa sentsapho, indoda nobawo uyintloko. Oku kuthetha ukuba abafazi bafanele bathobele isiluleko esinikelwe kumaEfese 5:22, 23: “Nina bafazi, walulameleni awenu amadoda, ngokokululamela iNkosi; ngokuba indoda le iyintloko yomfazi njengokuba naye uKristu eyintloko yebandla eli.”a Xa kufikelelwa kwindima yabantwana, bona abazibekeli eyabo imithetho kodwa bazithoba kuThixo ngokuthobela uyise nonina, njengokuba uPawulos echaza kumaEfese 6:1-3: “Nina bantwana, baveni abazali benu ngokwabaseNkosini; kuba oko kububulungisa. Beka uyihlo nonyoko; wona lowo ngumthetho wokuqala onedinga; ukuze kulunge kuwe, ube nexesha elide emhlabeni.”
14. Yintoni efanele yenziwe ziintloko-ntsapho ukuze zibe zibonakalisa ukuzithoba kuThixo?
14 Kakade ke, kuba lula ngabafazi nabantwana ukubonakalisa ukuzithoba kuThixo xa amadoda noobawo bebonakalisa ukuzithoba kuThixo. Bakwenza oku ngokusebenzisa ubuntloko babo ngokuvumelana nemigaqo yeBhayibhile, njengaleyo ifumaneka kumaEfese 5:28, 29 nakwesesi-6:4 ethi: “Ngoko amelwe amadoda ukubathanda abawo abafazi, njengokuba beyimizimba yawo. Lowo umthandayo umkakhe, uyazithanda; kuba akukho namnye wakha wayithiya eyakhe inyama; usuka ayondle, ayigcine, njengokuba nayo iNkosi ilenjenjalo ibandla.” “Nina boyise, musani ubacaphukisa abantwana benu; bondleleni ekuqeqesheni nasekululekeni kweNkosi.”
Uncedo Ekubonakaliseni Ukuzithoba KuThixo
15. Ziziphi iziqhamo zomoya eziya kusinceda sibonakalise ukuzithoba kuThixo?
15 Yintoni eya kusinceda ukuze sibonakalise ukuzithoba kuThixo kwezi nkalo zahlukahlukeneyo? Eyokuqala, luthando lokungazingci—uthando ngoYehova uThixo nangabo basongamelayo. Sixelelwa oku kweyoku-1 kaYohane 5:3: “Kuba ukumthanda uThixo kuko ukuthi, siyigcine imithetho yakhe; ayinzima ke imithetho yakhe.” UYesu wavakalisa ingongoma efanayo kuYohane 14:15: “Ukuba niyandithanda, yigcineni imithetho yam.” Enyanisweni, uthando—esona siqhamo somoya sokuqala—luya kusinceda sibe noxabiso ngako konke uYehova asenzele kona yaye ngaloo ndlela luya kusinceda sibonakalise ukuzithoba kuye.—Galati 5:22.
16. Ukoyika uThixo kunceda njani ekuzithobeni kuThixo?
16 Eyesibini, ukoyika uThixo. Ukoyika ukungamkholisi uYehova uThixo kuya kusinceda kuba “ukoyika uYehova kukuthiya into embi.” (IMizekeliso 8:13) Alithandabuzeki elokuba, ukoyika ukungamkholisi uYehova kuya kusenza singalalanisi ngenxa yokoyika abantu. Kwakhona kuya kusinceda sithobele imiyalelo kaThixo enoba ziziphi iingxaki ezifanele zoyiswe. Ngapha koko, kuya kusenza singanikezeli kwizihendo okanye kutyekelo lokwenza okubi. IZibhalo zibonisa ukuba yayikukoyika uYehova okwabangela ukuba uAbraham azame ukunikela ngonyana wakhe amthandayo uIsake njengedini, yaye yayikukoyika ukungamkholisi uYehova okwabangela ukuba uYosefu akuxhathise ukurhwetyeshelwa ekuziphatheni okubi ngumfazi kaPotifare.—Genesis 22:12; 39:9.
17. Ukholo lunayiphi indima ekubonakaliseni ukuzithoba kwethu kuThixo?
17 Uncedo lwesithathu kukuba nokholo kuYehova uThixo. Ukholo luya kusenza sikwazi ukuthobela isiluleko esikwiMizekeliso 3:5, 6: “Kholosa ngoYehova ngentliziyo yakho, ungayami okwakho ukuqonda. Uze umazi yena ezindleleni zakho zonke; wowulungelelanisa umendo wakho.” Ngokukhethekileyo ukholo luya kusinceda xa kubonakala ngathi siva ubunzima ngokungekho sikweni okanye siphathwa ngendlela enekhethe ngenxa yohlanga lwethu okanye ubuzwe okanye ngenxa yokungqubana kobuntu ngandlel’ ithile. Bambi kwakhona basenokuvakalelwa kukuba baye batyeshelwa ngokungafanelekanga kuba benganconyelwanga ukuba bakhonze njengabadala okanye izicaka zolungiselelo. Ukuba sinokholo, siya kulindela kuYehova ukuba ayilungise imicimbi ngexesha elifanelekileyo. Okwangoku kusenokufuneka sihlakulele umoya wokunyamezela ngomonde.—IZililo 3:26.
18. Luluphi uncedo lwesine ekubonakaliseni ukuzithoba kuThixo?
18 Uncedo lwesine kukuthobeka. Umntu othobekileyo akakufumanisi kunzima ukubonakalisa ukuzithoba kuThixo kuba ‘ngokuthobeka kwentliziyo omnye umbalela ekuthini omnye nguyena wongamileyo kunaye.’ Umntu othobekileyo ukulungele ukuziphatha ‘njengomncinane.’ (Filipi 2:2-4; Luka 9:48) Kodwa umntu onekratshi ukuthiyile ukuzithoba yaye kuyamcaphukisa. Kuye kwathiwa umntu onjalo unokukhetha ukwenzakaliswa kukunconywa kunokuba ancedwe kukugxekwa.
19. Nguwuphi umzekelo omhle wokuthobeka owabonakaliswa ngowayesakuba ngumongameli weWatch Tower Society?
19 Umzekelo omhle wokuthobeka nowokuzithoba kuThixo wakha wabonakaliswa nguJoseph Rutherford, umongameli wesibini weWatch Tower Bible and Tract Society. Xa uHitler wawuvalayo umsebenzi wamaNgqina kaYehova eJamani, abazalwana babhala baza bambuza ngento ababefanele bayenze ngenxa yokuvalwa kweentlanganiso zabo nomsebenzi wabo wokushumayela. Wakukhankanya oku kwintsapho yaseBheteli waza wavuma ngokuphandle ukuba wayengazi ukuba makabaxelele ntoni abazalwana baseJamani, ingakumbi ngenxa yesigwebo esiqatha esibandakanyekileyo. Wathi ukuba kukho nabani na oyaziyo into anokubaxelela yona angakuvuyela ukuyiva. Onjani wona umoya wokuthobeka!b
Iingenelo Zokubonakalisa Ukuzithoba KuThixo
20. Ziziphi iintsikelelo ezizuzwa ngenxa yokubonakalisa ukuzithoba kuThixo?
20 Noko ke kusenokubuzwa, Ziziphi iingenelo ezikhoyo ekubonakaliseni ukuzithoba kuThixo? Enyanisweni, zona zininzi. Siyasinda kumaxhala nakunxunguphalo oluzuzwa ngabo bangoozimele-geqe. Siba nolwalamano olulungileyo noYehova uThixo. Siba nolwalamano oluhle nabazalwana bethu abangamaKristu. Ngokungakumbi, ngokuziphatha ngokuvumelana nomthetho, siphepha ukuba neengxaki ezingeyomfuneko namagunya asekuhlaleni. Kwakhona siba nobomi obonwabisayo bentsapho njengamadoda nabafazi, njengabazali nabantwana. Ngaphezu koko, ngokuhlala sizithoba kuThixo, senza ngokuvumelana nesiluleko esinikelwe kwiMizekeliso 27:11 esithi: “Yiba nobulumko, nyana wam, uyivuyise intliziyo yam; ukuze ndimphendule ngezwi ondingcikivayo.”
[Imibhalo esemazantsi]
a Omnye umlungiseleli onguvulindlela wancoma ukuthobela nokuxhasa ngokunothando komfazi wakhe uvulindlela ongatshatanga. Lo vulindlela ungatshatanga wacinga ukuba umhlobo wakhe wayefanele ukuba uthethe okuthile nangezinye iimpawu zomfazi wakhe. Kodwa kwiminyaka ethile kamva, xa lo vulindlela naye watshatayo, wafumanisa indlela okubaluleke ngayo ukuba umfazi axhase ngokunothando ukuze kubekho ulonwabo emtshatweni.
b Emva kokuthandaza izihlandlo ezininzi nokufundisisa iLizwi likaThixo, uJoseph Rutherford wayibona ngokucacileyo indlela afanele abaphendule ngayo abazalwana baseJamani. Yayingenguye awayefanele abaxelele oko bafanele bakwenze okanye bangakwenzi. BabeneLizwi likaThixo elalifanele libaxelele ngokucacileyo oko babefanele bakwenze ngokuphathelele ukuhlanganisana ndawonye nokunikela ubungqina. Ngoko abazalwana baseJamani bawuqhuba umsebenzi ngokufihlakeleyo kodwa baqhubeka bewuthobela umyalelo kaYehova wokuhlanganisana ndawonye nokunikela ubungqina ngegama lakhe nangoBukumkani bakhe.
Imibuzo Yempinda
◻ Ngawaphi amadoda uThixo awayewasebenzisa njengejelo lakhe lonxibelelwano, yaye abakhonzi bakhe babefanele bawajonge njani?
◻ Ukuzithoba kuThixo kusebenza kweziphi iindidi zolwalamano?
◻ Ziziphi iimpawu eziya kusinceda sibonakalise ukuzithoba kuThixo?
◻ Ziziphi iintsikelelo eziba ngumphumo wokuzithoba kuThixo?
[Umfanekiso okwiphepha 16]
UThixo wasebenzisa ulungelelwaniso lwetempile yaseYerusalem ukwazisa abantu bakhe ngokuthanda kwakhe
[Imifanekiso ekwiphepha 18]
Iinkalo esinokubonakalisa kuzo ukuzithoba kuThixo