Ubuhle Bokuba Yingwevu
HAYI indlela ebekuya kuchwayitisa ngayo ukuthetha namadoda nabafazi abathembekileyo bamandulo! Khawube nomfanekiso-ngqondweni wakho uthetha namadoda anjengoNowa, uAbraham, uMoses, noYohane uMbhaptizi, kunye namabhinqa anjengoSara, uRahabhi, uRute noDebora! Ngaba ubungayi kuvuya kukubeva bebalisa iingxelo zokuzibonela zeziganeko ezibalaseleyo ezenzeka mandulo?
Nanamhlanje, ngaba ubungayi kukuvuyela ukuva abantu abakhulileyo abathembekileyo besabelana nawe ngamava angendlela bona nabanye abaye bayigcina ngayo ingqibelelo kuThixo phantsi kwezilingo, eziquka ukuvalwa komsebenzi, ukubethwa, nokuvalelwa ezintolongweni ngenxa yobulungisa? Ngokuqinisekileyo ubuya kwenjenjalo! Uthando lwethu ngoThixo nentlonelo yethu ngabo ibiya kukhula njengoko besixelela ngeemvakalelo zabo yaye ingakumbi ngokuyixabisa kwabo ngokusuk’ entliziyweni inyameko enothando kaYehova.
Phakathi kwabantu bakaThixo, amadoda nabafazi abakhulileyo abathembekileyo bebesoloko behlonelwa ngenxa yamava, ulwazi, nobulumko abanabo. Enyanisweni, lo myalelo ulandelayo wawuqukiwe eMthethweni owanikelwa nguThixo kumaSirayeli: “Suka ume ebusweni bengwevu, ububeke ubuso bexhego, umoyike uThixo wakho: ndinguYehova.” (Levitikus 19:32) Igama lesiHebhere elithetha ubudala okanye ubuxhego livela kwingcambu ethetha “ukuba nezimvi” yaye kwakhona liguqulelwa ngokuthi ‘ukuba yingwevu.’ Ngoko kwakulindeleke ukuba amaSirayeli asukume ukubonisa intlonelo kumntu omkhulu, ekwenza oko ngoloyiko lokuhlonela uThixo.
Ngaba eso simo sengqondo sentlonelo sikho namhlanje? Ngokomzekelo, ngaba ngobubele abantu abaselula bayabavulela abantu abakhulileyo iingcango? Ngaba ngokuqhelekileyo ulutsha okanye abantu abakhulu abaselula bayamncamela umntu okhulileyo indawo kwisinyusi (elevator) esizeleyo? Okanye ngaba ngokuqhelekileyo abantu abaselula bayabancamela abantu abakhulileyo izihlalo zabo kuduladula okanye kuloliwe ozele ngabantu? Ukusilela ukwenza ezo zinto kuye kwaphawulwa kwanaphakathi kwamaKristu.
Noko ke, ukuze abe akholisa uYehova uThixo, amaKristu amele enze ngokuvisisana nembono yakhe aze akuphephe ukucinga, intetho, nokwenza njengabo ‘bazithandayo, abangeva bazali, abangabuleliyo, nabangenakuthanda kulunga.’ (2 Timoti 3:1-5) Ngoko, lithini iLizwi likaThixo xa linxulumanisa ubutsha nokuba yingwevu?
Amandla Obutsha
IBhayibhile iyawaqonda amandla obutsha kunye neengenelo zawo, xa isithi: “Isihombo samadodana ngamandla awo.” (IMizekeliso 20:29) KuSirayeli wamandulo abaLevi abaselula babewasebenzisela etempileni amandla abo, ngokufuthi kwimisebenzi emininzi enzima. Namhlanje, umsebenzi omninzi kwimizi-mveliso, kumakhaya aseBheteli nakwimisebenzi yokwakha yeWatch Tower Society wenziwa ngamadoda namabhinqa aselula anikele ngamandla nobuchule bawo ekuhambiseleni phambili izilangazelelo zoBukumkani. (Mateyu 6:33) Ngenxa yoko banandipha amalungelo amahle enkonzweni kaThixo.
Umzekeliso osandul’ ukucatshulwa uqukumbela ngamazwi athi, “ubuhle bamadoda amakhulu zizimvi.” Xa kudityaniswe amandla obutsha kunye namava nobulumko bobudala, kuyileka umanyano olomelele gqitha.
Singakuzekelisa ngolu hlobo oku: Umntu oselula ofundela ukuba ngumchweli ocelwe ukuba afakele amacandelo athile amaplanga kuloo nto yenziwayo ufuna ukuphumeza esi sabelo ngamandla akhe obutsha. Umchweli okhulileyo, nonamava angakumbi uphawula ukuba phezu kwawo nje amandla lo mncedisi wakhe uselula anawo ubethelela isikhonkwane izihlandlo eziliqela ngaphambi kokuba singene eplangeni. Lo msebénzi ukhulileyo ucebisa lo mfana ukuba ihamile ayibambele ekupheleni kwesiphatho, kunokuyibambela ngasentlokweni yayo. Oku kwenza ukuba lo mntu uselula akwazi ukuzibethelela ngamandla angakumbi izikhonkwane, ukuze onge ixesha namandla.
Ngokufanayo, ibhinqa eliselula, nelinamandla lisenokufunda emva kokwenza iimpazamo ezininzi ukuba imichako ethile iya konakala ukuba ayihlanjwa ngokwemiyalelo. Noko ke, ibhinqa elinamava, liyakwazi ukubaluleka kokuzinika ixesha lokulungelelanisa impahla lize ezithile lingazidibanisi nezinye xa lizihlamba. Kwakhona lifundile ukuba linokukuphepha ukolula impahla ngokuthi nje liyisonge kakuhle ngoko nangoko emva kokuyothula elucingweni lokwaneka okanye emva kokuyikhupha kumatshini wokomisa impahla.
Ukufunda kubantu abanamava kunokwenza ubomi bube lula ngakumbi. Sekunjalo, kukho ixesha apho kwanomntu onamava angakumbi engasenako ukwenza imisebenzi ethile ebekwazi ukuyenza ngokulula kwiminyaka embalwa ngaphambili. Omnye umbhali ngokufanelekileyo wathi: “Hayi indlela ebekuya kuba kuhle ngayo ukuba abaselula bebenolwazi baze abakhulileyo babe namandla.” Kodwa hayi indlela ekukuhle ngayo xa abantu abakhulu bewaqonda amandla abaselula baze ngomonde babelane nabo ngamava abawazuze kwiminyaka emininzi—luze lona ulutsha ngokuzithoba luwamkele loo macebiso! Ngale ndlela, omabini la maqela obudala ayangenelwa.
Ukuzuza Ubuhle
Ubudala nje bubodwa abanele. Umfana oselula uElihu wathi: “Ukulumka akunabakhulu, ukuqonda okufaneleyo akunamadoda makhulu odwa.” (Yobhi 32:9; INtshumayeli 4:13) Ukuze axatyiswe ngokwenene kuba eyingwevu, umntu okhulileyo ufanele abe wenze okungakumbi ebomini bakhe kunokuthi ngobuvila achithele iintsuku zakhe ekubukeleni umabonwakude, aye emidlalweni, okanye ngandlel’ ithile abe nexesha nje elimnandi. Yaye kwanakwiminyaka yobudala, kuyimfuneko ukuba abakhulileyo baqhubeke befunda.
Bambi abantu baqhayisa ngokwenza izinto ngendlela ethandwa ngabo, okanye bathi: “Kufundwa ngamava.” Kanti, iLizwi likaThixo liluleka ngolu hlobo: “Ukuze eve osisilumko, aqokele afunde, oqondayo azuze amacebo obulumko.” (IMizekeliso 1:5; thelekisa eyoku-1 kwabaseKorinte 10:11.) Akusoloko kufundwa ngamava, kuba sinokufunda kwiimpazamo ezenziwa ngabanye singakhange side senze iimpazamo ezifanayo. Ngaphezu koko, bekuya kufuneka umKristu akhumbule ukuba “isithsaba sokuhomba zizimvi, sifunyanwa endleleni yobulungisa.” (IMizekeliso 16:31) Ubomi abuchithele ekukhonzeni uYehova ngokuthembekileyo buhle ngokwembono yakhe yaye ukufanele ukuhlonelwa ngabanye njengomzekelo omhle. Kambe ke, ukufunda ngoThixo nokuzuza amava “endleleni yobulungisa” kunokuqalisa kwasebutsheni yaye kufanele kuqhubeke ngokungapheliyo.—Roma 11:33, 34.
Oku kunokuzekeliswa ngamava abandakanya inkwenkwe yaseSweden eneminyaka esixhenxe ubudala. Yabuza umveleli weSikolo Sobulungiseleli Sobuthixo enoba yayinokubhalisa kusini na esikolweni. Umveleli wayibuza oku, “Kutheni ubuza ngolo hlobo nje?” Ephendula, lo uselula wathi: “Umntu akanakuhlala nje ubomi bakhe bonke kungekho nto ayenzayo!” (INtshumayeli 12:1) Onjani wona ukufaneleka umzekelo kwabaselula nakwabakhulileyo ngokufanayo!
Ukunikel’ imbeko Kwiingwevu
Umkhwa ophazamisayo kwibutho lanamhlanje kukubalaselisa ukomelela okungokwasemzimbeni nokukwazi ukudlala imidlalo ethile baze bajongelwe phantsi abantu abakhulileyo. Sifanele sibe njani isimo sengqondo somKristu ngakwiingwevu ezisebandleni?
Kunokuba siwatyeshele amaKristu akhulileyo, sifanele sinikele ingqalelo kuwo size sichithe ixesha elithile kunye nawo. Ngokomzekelo, kwiintlanganiso zeveki ngeveki eziqhutywa ngamaNgqina kaYehova kwiHolo yoBukumkani, ngaba uyawenza umgudu wokubulisa abakhulileyo? Bakuxabisa ngenene ukubuliswa ngabaselula nangabanye. Yaye hayi indlela abantu abakhulileyo abakuvuyela ngayo ukubakho kwiimbutho zokuzonwabisa zabo bakhonza kunye nabo abakubudala obahlukahlukeneyo! Nangona isibini esiselula esitshatileyo sisenokufuna ukuqhelana nabanye abantu abatshatileyo abakubudala baso, kuya kuba nomvuzo ukuquka abakhulileyo kwezo mbutho zinjalo zolonwabo.—1 Tesalonika 3:12; 5:15.
Hayi indlela ekubaluleke ngayo ukuba nolwazelelelo xa sithetha nabantu abakhulileyo! Xa omnye umzalwana okhulileyo oneminyaka engama-40 esenkonzweni kaYehova wathetha nomnye umdala ngendlela anokusebenziseka ngayo ebandleni, le ndoda iselula yathi: “Kuncinane gqitha onokukwenza.” Okunjani kona ukungabonakalisi bubele ekuthetheni kwakhe! Lo mzalwana ukhulileyo wayenamandla anganeno kunalawo wayenawo ngaphambili, isabelo sakhe kwinkonzo yasentsimini sasinciphile noko, yaye ngokucacileyo amalungelo athile okuvelela ayengaphaya kwamandla anawo; sekunjalo, wayenokuninzi awayenokukwenza. Wayeneminyaka emininzi azuze ngayo ubulumko namava endleleni yobulungisa. Ngenxa yokuba abakhulileyo abanjalo beye bazibhokoxa njengabavakalisi boBukumkani, banyamezela intshutshiso, bathwala imithwalo enzima yeembopheleleko zobuKristu, baza baqeqesha abanye, ngoku abantu bakaThixo bayakuvuyela ukuba sentlanganweni eyomeleleyo exhaswa ngumoya wakhe. Ngoko ke, kwanga singabonisa intlonelo kwaba bakhulileyo sibathabathe njengabaluleki abalumkileyo, abalusi abanothando, nabafundisi abaphumelelayo.
Kwakhona kukho isizathu esilungileyo sokunikela ingqalelo enzulu kumacebiso anikelwa ngabantu abakhulileyo. Ngokomzekelo, umzalwana onamava wacebisa ukuba ucango lweHolo yoBukumkani ethile lungafakwa ngakwicala elingasentshona lesakhiwo. Bexhalabele ngakumbi oko babecinga ukuba kuya kusenza sihle isakhiwo, abazalwana abaselula balibetha ngoyaba icebiso lakhe. Noko ke, kwiminyaka eliqela kamva, kwafuneka ukuba ucango lukhutshwe luze lufakelwe kwenye indawo ngenxa yokuba lwalonakaliswe ngumoya ozingisileyo nemvula eyayivela ngasentshona. Ubulumko obusebenzisekayo obuzuzwe ngamava bawoyisa amabhongo okufuna ubuhle. Ukuba abaselula banikel’ imbeko kwabakhulileyo ngokuphulaphula izimvo nobulumko babo obusebenzisekayo, oku kusenokonga ixesha nemali. Nokuba icebiso lomntu okhulileyo alilandelwa, kunokubonakaliswa imbeko kuye ngokuthi aziswe ukuba icebiso lakhe liye laqwalaselwa, kodwa kuye kwakho ezinye iimeko ezikhokelele ekubeni kwenziwe esinye isigqibo.—Thelekisa IMizekeliso 1:8.
Ukukhangela Phambili, Kungekhona Emva
Bambi abantu abakhulileyo banale mbono: “Alikho ixesha elifana namaxesha amandulo xa mna nawe sasisebatsha.” Noko ke, kunokuhlala becinga ngamaxesha adluleyo, abantu abakhulileyo banokukhuthazwa ukuba bakhangele phambili kwimini yaxa beya kufumana umvuzo enoba ngowokuphila ezulwini okanye wokuphinda bazuze amandla obutsha phantsi kolawulo loBukumkani bukaThixo. Okwangoku, kufuneka bakuqonde ukusikelwa kwabo umda ngenxa yobudala. Oku kuqonda nokuba nesimo sengqondo esifanelekileyo kubaluleke gqitha xa kubonakala ngathi umntu okhulileyo akasanikwa malungelo enkonzo.
Ngokomzekelo, umzalwana okhulileyo usenokuba ebesetyenziswa rhoqo kucwangciso lwendibano yesithili kwiminyaka edluleyo. Ngoku kukho abadala abaninzi abafanelekayo namadoda amaninzi anobuchule bokufundisa ekunokukhethwa kuwo. Nangona beselula ngentelekiso, bambi kwaba badala abaye bangqineka benenzondelelo nobuchule, banokufundisa kakuhle baze bayale ngobubele, yaye bayakwazi ukubakhuthaza abanye. (1 Tesalonika 5:12, 13; 1 Timoti 5:17) Ngenxa yoko, umzalwana okhulileyo ongasasetyenziswayo kucwangciso lwendibano usenokuziva etyeshelwe yaye usenokungayivuyeli into yokuba la malungelo anikwe abadala abaselula. Sekunjalo, loo mvakelelo iphosakeleyo ebangelwa kukungafezeki kobuntu inokoyiswa. Enyanisweni, bonke ebandleni banokunceda ngokwenza abakhulileyo bazi ukuba bayafunwa, bayathandwa ngenxa yokuthembeka kwabo, nokuba izimvo zabo ziyaxatyiswa.
Kambe ke, umntu okhulileyo kufuneka akhumbule ukuba abanquli akunye nabo bamele banikw’imbeko kanye njengokuba naye ebeya kuthanda ukunikw’imbeko. (Mateyu 7:12; Roma 12:10) Kunokuba bazive belahlwe kwesinomhlwa yaye bengcungcuthekiswa yimbono ephosakeleyo, abakhulileyo bafanele bavuye ngenxa yeminyaka yabo emininzi bekhonza ngokuthembekileyo. Yaye ngokuqinisekileyo, sonke simele sibe nombulelo kuba ngenxa yentsikelelo kaYehova, kukho inani elandayo labaveleli abakufanelekelayo ukwabelana nabanye ngomthwalo nokubambisana ngeembopheleleko zebandla njengoko izihlwele ‘zezinye izimvu’ zithontelana ukuza kwintlangano yamaKristu.—Yohane 10:16; Isaya 60:8, 22; 2 Timoti 2:2.
Ngenxa yeentlungu, impilo enkenenkene, okanye ezinye izizathu, maxa wambi iingwevu zicaphuka msinya. Oku kufuna ukuba amanye amalungu entsapho okanye ebandla asebenzise ukuqonda aze abe novelwano. Kwakhona kufuna ukuba abakhulileyo basebenze nzima ukulondoloza isimo sengqondo esifanelekileyo, bazigcine bebatsha entliziyweni nasengqondweni. Xa umzalwana othile oselula owayehlala gumbini linye nelungu leQumrhu Elilawulayo lamaNgqina kaYehova wayeyishiya iBheteli kwiminyaka ethile eyadlulayo, le ndoda ikhulileyo yacela lo mzalwana ayicebise ngomntu ofanelekileyo owayeza kungena endaweni yakhe waza wavakalisa ukuba yena ubeya kukhetha ukuhlala nomzalwana oselula, noqolileyo oza kumnceda ukuba ahlale emtsha yaye ekhuthele. Lo mzalwana ukhulileyo nongumthanjiswa wayengazimiselanga ukudla umhlala-phantsi okanye athob’ isantya, kuba kwakukho umsebenzi ofanele wenziwe. Onjani ukuba mhle umzekelo wokukhangela phambili nokulondoloza imbono efanelekileyo!
Alithandabuzeki elokuba, “isihombo samadodana ngamandla awo, ubuhle bamadoda amakhulu zizimvi.” Hayi indlela ekukuhle ngayo xa abaselula besebenzisa amandla abo baze abakhulileyo basebenzise ubulumko babo ekusukeleni indlela yobulungisa! AmaKristu akhulileyo naselula ngokufanayo afumana uvuyo olukhulu njengoko ngokumanyeneyo ehambisela phambili unqulo lokwenyaniso lukaYehova uThixo, ‘uNyangelemihla.’—Daniyeli 7:13.
[Umfanekiso okwiphepha 28]
Kuninzi okunokwenziwa ngamaKristu aziingwevu okunokuba yingenelo kwabanye