Ngoobani Abalandela Ukhanyiselo Lwehlabathi?
“Ninjengezikhanyiso ehlabathini.”—FILIPI 2:15.
1. Ithini iBhayibhile ngezikhanyiso zenkohliso zonqulo?
NGOKUCACILEYO iBhayibhile ichaza uYesu ‘njengokukhanya okukhulu,’ “ukhanyiselo lwehlabathi.” (Isaya 9:2; Yohane 8:12) Sekunjalo, ngokwentelekiso bambalwa gqitha abamlandelayo xa wayesemhlabeni. Inkoliso yakhetha ukulandela abo babekukukhanya kobuxoki, abo enyanisweni babengabathwali bobumnyama. ILizwi likaThixo lithi ngaba: “Abo banjalo ngabapostile ababuxoki, ngabasebenzi abakhohlisayo, bezimilisa okwabapostile bakaKristu. Ke akummangaliso oko, kuba noSathana ngokwakhe uzimilisa okwesithunywa sokukhanya. Akunto inkulu ke ngoko, ukuba abalungiseleli bakhe bazimilise okwabalungiseleli bobulungisa; abasiphelo siya kuba ngokwemisebenzi yabo.”—2 Korinte 11:13-15.
2. Yintoni uYesu awathi yayiya kuba sisiseko sokugweba abantu?
2 Ngaloo ndlela, asingabo bonke abantu abakufunayo ukukhanya, nakubeni kumangalisa. UYesu wathi: “Ke kaloku, umgwebo nguwo lo, ukuba ukhanyiso lufikile ehlabathini, baza abantu bathanda ubumnyama ngaphezu kokhanyiso; kuba imisebenzi yabo ingendawo. Kuba bonke abenza okubi, bayaluthiya ukhanyiso, bangezi elukhanyisweni, ukuze imisebenzi yabo ingohlwaywa.”—Yohane 3:19, 20.
Abathandi Bobumnyama
3, 4. Iinkokeli zonqulo zomhla kaYesu zabonisa njani ukuba zazingafuni ukulandela ukukhanya?
3 Qwalasela indlela okwenzeka ngayo oko xa uYesu wayesemhlabeni. UThixo wayenike uYesu amandla okwenza imimangaliso evuyisayo njengendlela yokuqinisekisa ukuba wayenguMesiya. Ngokomzekelo, ngomhla weSabatha, wabuyisela ukubona kwindoda eyayizalwe iyimfama. Esinjani sona isenzo senceba! Hayi indlela eyayinombulelo ngayo loo ndoda! Okokuqala ebomini bayo yayinokubona! Noko ke, zasabela njani iinkokeli zonqulo? UYohane 9:16 uyasixelela: “Babesithi ngoko abathile bakubaFarisi [ngoYesu], Lo mntu asingowakwaThixo, ngokuba isabatha akayigcini.” Hayi indlela ezazinobugwenxa ngayo iintliziyo zabo! Kwakuphiliswe umntu ngokungummangaliso, kodwa kunokuvuyisana nendoda ngaphambili eyayiyimfama nokumothulel’ umnqwazi umphilisi lowo, zambek’ ityala uYesu! Ngokwenjenjalo, ngokungathandabuzekiyo zona nxamnye nembonakaliso ecacileyo yomoya oyingcwele kaThixo, nto leyo esisono esingaxolelekiyo.—Mateyu 12:31, 32.
4 Kamva, xa abo bahanahanisi babuza loo ndoda eyayiyimfama ngoYesu, loo ndoda yathi: “Nasi apha isimanga, ukuthi nina ningazi apho [uYesu] avela khona; ukanti uwavulile amehlo am. Siyazi ke ukuba uThixo akabeva aboni; kodwa ukuba umntu uthi amhlonele uThixo, akwenze ukuthanda kwakhe, uyamva lowo. Kwasephakadeni akuzanga kuviwe ukuba umntu wakha wavula amehlo ozelwe eyimfama. Ukuba lo [Yesu] ebengenguye owakwaThixo, ebengenakwenza nto.” Zasabela njani iinkokeli zonqulo? “[Zaphendula zathi] kuye, Wena wazalelwa ezonweni kanye; ufundisa thina na wena? [Zamkhuphela] ngaphandle.” Hayi indlela ezazingenaluvelwano ngayo! Zazineentliziyo ezilukhuni. Ngoko uYesu wazixelela ukuba nangona zazibona ngamehlo azo enyama, zazimfamekile ngokomoya.—Yohane 9:30-41.
5, 6. Yintoni iinkokeli zonqulo zenkulungwane yokuqala ezayenzayo eyabonisa ukuba zazibuthanda ubumnyama?
5 Isibakala sokuba aba bahanahanisi bonqulo babesona umoya kaThixo sibonwa ngokucacileyo kwesinye isihlandlo, xa uYesu wavusa uLazaro kwelabafileyo. Ngenxa yaloo mmangaliso, abaninzi kubantu abaqhelekileyo bakholwa kuYesu. Noko ke, phawula oko iinkokeli zonqulo zakwenzayo. “Bahlanganisa ngoko ababingeleli abakhulu nabaFarisi intlanganiso yamatyala, bathi, Senza ntoni na? Ngokuba lo mntu wenza imiqondiso emininzi. Ukuba sithe samyeka ngokunje, bonke baya kukholwa kuye; athi ke amaRoma eze, athimbe indawo yethu, kwanohlanga lwethu.” (Yohane 11:47, 48) Zazixhalabele izikhundla nodumo lwazo. Zazifuna ukukholisa amaRoma nokuba sekumnyam’ entla, kunokukholisa uThixo. Ngoko, zenza ntoni? “Kususela kuloo mini ngoko [zabhunga] ukuba [zimbulale uYesu].”—Yohane 11:53.
6 Ngaba kwakuphelele apho? Akunjalo. Ezakwenzayo ngokulandelayo kubonisa indlela ezazibuthanda ngazo ubumnyama: “Ke kaloku ababingeleli abakhulu babhunga ukuze bambulale noLazaro; ngokuba ngenxa yakhe abaninzi bamaYuda bemka, bakholwa kuye uYesu.” (Yohane 12:10, 11) Obunjani bona ukungakholeleki ubungendawo! Nangona zakwenza konke oku ukuze zikhusele izikhundla zazo, yintoni eyenzekayo? Kanye kweso sizukulwana, zavukela amaRoma, awazijikelayo ngowama-70 C.E. aza ayithabathela kuwo indawo yazo, uhlanga lwazo kunye nobomi bazo!—Isaya 5:20; Luka 19:41-44.
Uvelwano LukaYesu
7. Kutheni abathandi benyaniso babethontelana ukuya kuYesu?
7 Ngoko nakwixesha lethu, asingabo bonke abafuna ukhanyiselo lokomoya. Kodwa abo bayithandayo inyaniso bayafuna ukuza ekukhanyeni. Bafuna uThixo njengoMongami wabo, yaye ngolangazelelo baphethukela kuYesu, uThixo awamthuma ukuba achaze oko ukukhanya kukuko, baze bamlandele. Oko koko abantu abathobekileyo bakwenzayo xa uYesu wayesemhlabeni. Bathontelana ukuya kuye. KwanabaFarisi banyanzeleka ukuba bakuvume oko. Bakhalaza besithi: “Ulandelwa lilizwe lonke.” (Yohane 12:19) Abantu ababumvu babemthanda uYesu kuba wayahluke ngokupheleleyo kwezo nkokeli zonqulo zizingcayo, ezazikhohlakele nezazilambele igunya uYesu awathi ngazo: “Babopha imithwalo enzima, esindayo, bayibeke emagxeni abantu, babe ke bona bengathandi kuyishukumisa nangomnwe lo wabo. Yonke imisebenzi yabo ke bayenza ngokunga bangabonwa ngabantu.”—Mateyu 23:4, 5.
8. Ngokwahlukileyo kubahanahanisi bonqulo, sisiphi isimo sengqondo uYesu awayenaso?
8 Ngokwahlukileyo koku, phawula isimo sengqondo sovelwano sikaYesu: “Wathi, akuzibona izihlwele, wasikwa yimfesane zizo, ngokuba zibe zityhafile, zichithakele ngokwezimvu ezingenamalusi.” (Mateyu 9:36) Wenza ntoni ke ngako oko? Wathi kwabo babexhatshazwe yinkqubo kaSathana: “Yizani kum nonke nina nibulalekayo, nisindwayo ngumthwalo, ndoninika ukuphumla. Thabathani idyokhwe yam niyithwale, nifunde kum; ngokuba ndinobulali, ndithobekile ngentliziyo; noyifumanela ukuphumla imiphefumlo yenu. Kuba idyokhwe yam imnandi, nomthwalo wam ulula.” (Mateyu 11:28-30) UYesu wenza oko kwaxelwa kwangaphambili ngaye kuIsaya 61:1, 2, ofundeka ngolu hlobo: “UYehova [undithambisele] ukuba ndishumayeze abalulamileyo iindaba ezilungileyo. Undithume ukubopha abantliziyo zaphukileyo, ukumemeza inkululeko kwabathinjiweyo, ukuvulwa kwamehlo kwabakhonkxiweyo; ukumemeza umnyaka wetarhu likaYehova, nomhla wempindezelo yoThixo wethu; ukuthuthuzela bonke abanesijwili.”
Ukuhlanganisa Abathwali Bokukhanya
9. Ziziphi iziganeko ezibalulekileyo ezenzekayo ngowe-1914?
9 Emva kokunyukela kwakhe ezulwini, uYesu kwafuneka ukuba alinde de kufike ixesha lokuba uThixo amnike amandla oBukumkani. Wayeya kwandula ke ukwahlula “izimvu” “ezibhokhweni.” (Mateyu 25:31-33; INdumiso 110:1, 2) Elo xesha lafika xa “imihla yokugqibela” yaqalisayo ngowe-1914. (2 Timoti 3:1-5) UYesu, ebekwe esihlalweni njengoKumkani woBukumkani bukaThixo basemazulwini, waqalisa ukuhlanganisela kwisandla sakhe sokunene senkoliseko abo babefuna ukulandela ukukhanya. Emva kweMfazwe Yehlabathi I, loo msebenzi wokuhlanganisa waqhubeka ngesantya esandayo.
10. Nguwuphi umbuzo onokubuzwa ngabo uYesu abasebenzisayo kumsebenzi wokuhlanganisa?
10 Phantsi kokhokelo lukaKristu Yesu, umsebenzi wokuhlanganisa uye wavuzwa ngempumelelo enkulu. Akuzange embalini kubekho abantu abaninzi kangaka abavela kuzo zonke iintlanga abamanyeneyo kunye kunqulo lokwenyaniso olukhanyiselweyo. Yaye ngoobani namhlanje abalandela ukukhanya okuvela kuThixo nakuKristu? Ngoobani abenza oko amaFilipi 2:15 akutshoyo, ‘ukubonakala njengezikhanyiso ehlabathini,’ abamema abanye ukuba ‘bazokuthabatha amanzi obomi ngesisa’?—ISityhilelo 22:17.
11. Yiyiphi imeko yeNgqobhoko ngokuphathelele ukukhanya kokomoya?
11 Ngaba iNgqobhoko iyakwenza oko? INgqobhoko, neenkonzo zayo ezingavisisaniyo, ngokuqinisekileyo ayibonakali njengesikhanyiso. Enyanisweni, abefundisi bafana neenkokeli zonqulo zomhla kaYesu. Ababonakalisi ukukhanya kokwenyaniso okuvela kuThixo noKristu. Kwiminyaka engamashumi amathathu anesithathu eyadlulayo, iphephancwadi iTheology Today lathi: “Kulusizi ukuthi kumelwe kuvunywe ukuba oko kukhanya akubonakali tu eCaweni. . . . ICawa iye yazimisela ukufana ngakumbi nangakumbi nebutho lasekuhlaleni eliyingqongileyo. Ayilokhanyiso lwehlabathi kunoko ibonakalisa ukukhanya okusehlabathini.” Yaye imeko yeNgqobhoko imbi ngokude kwangakumbi namhlanje. Le nto ibizwa ngokuba kukukhanya ekubonakalisayo okuvela ehlabathini ngokwenene bubumnyama kuba koko kuphela uSathana nehlabathi lakhe abakunikelayo. Akukho ukukhanya kwenyaniso okuvela kwiinkonzo zeNgqobhoko ezixabanayo nezizezehlabathi ngokupheleleyo.
12. Ngoobani namhlanje ababumba intlangano yabathwali bokukhanya bokwenyaniso?
12 Namhlanje ngentembelo kunokuthiwa umbutho wehlabathi elitsha wamaNgqina kaYehova uyintlangano yokwenyaniso ethwele ukukhanya. Ngokumanyeneyo, onke amalungu awo—amadoda, amabhinqa nabaselula ngokufanayo—akhanyisela lonke uluntu ngokukhanya kwawo okuvela kuYehova noKristu. Kunyaka ophelileyo, phantse kumabandla angama-70 000 amaNgqina kaYehova ehlabathini jikelele, abathwali bokukhanya abangaphezu kwezigidi ezine babeshumayela ngenkuthalo bexelela abanye ngoThixo nangamadinga akhe. Kwaye nyaka ngamnye ngoku, sibona ukuhlanganiswa ngomlinganiselo omkhulu nokuqhubekayo kwabantu nabo abafuna ukukhanyiselwa ngokomoya. Amakhulu amawaka ayabhaptizwa emva kokufundisisa iBhayibhile nokuyazi ngokuchanileyo inyaniso. Enyanisweni, uThixo ‘unga bangasindiswa bonke abantu, bafikelele ekuyazini inyaniso.’—1 Timoti 2:4.
13. Ukukhanya okuvela kuYehova sinokukuthelekisa nantoni?
13 Sisenokukuthelekisa ukukhanyiselwa okuvela kuYehova namhlanje noko kwenzeka xa abantu bakaThixo bamaxesha amandulo babeshiya iYiputa: “UYehova wahamba phambi kwabo ngomqulu welifu emini, ebakhokela ngendlela; ngomqulu womlilo ebusuku, ebakhanyisela, ukuze bahambe imini nobusuku.” (Eksodus 13:21, 22) Ilifu emini nomlilo ebusuku zazinikela ukhokelo olunokuthenjwa oluvela kuThixo. Zazinokuthenjwa njengelanga uThixo awalidalayo ukuze lisikhanyisele emini. Ngoko, kwakhona sinokuthembela kuYehova ukuba aqhubeke abakhanyisele endleleni ngokomoya abo bafuna inyaniso kule mihla yokugqibela emibi. IMizekeliso 4:18 iyasiqinisekisa: “Umendo wamalungisa unjengokukhanya komso, okuya kuba mhlophe ngokuba mhlophe, kude kube semini enkulu.”
Ukubonakalisa Ukukhanya KoBukumkani
14. Ifanele ibe yintoni injongo eyintloko yabathwali bokukhanya?
14 Ngoxa uYehova enguMthombo wokukhanyiselwa, noKristu enguMbonakalisi Oyintloko woko kukhanya, abalandeli bakaYesu nabo bafanele bakubonakalise. Wathi ngabo: “Nina nilukhanyiselo lwehlabathi. . . . Malukhanye ngokunjalo ukhanyiselo lwenu phambi kwabantu; ukuze bayibone imisebenzi yenu emihle, bamzukise uYihlo osemazulwini.” (Mateyu 5:14, 16) Yaye wawuyintoni umxholo oyintloko wolu khanyiselo abalandeli bakhe ababeza kulukhanyisa phambi koluntu? Babeza kufundisa ntoni kule ncopho yembali yehlabathi? UYesu akazange athi abafundi bakhe babeya kushumayela inkqubo yolawulo-melo, yobuzwilakhe, ukumanyaniswa kweeCawa noRhulumente, okanye naziphi na ezinye iingcamango zehlabathi. Kunoko, kuMateyu 24:14 waxela kwangaphambili ukuba phezu kwayo nje intshutshiso yehlabathi, “ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga kwandule ke ukufika ukuphela.” Ngenxa yoko, abathwali bokukhanya namhlanje baxelela abanye ngoBukumkani bukaThixo, obuya kuphelisa ihlabathi likaSathana buze bungenise ihlabathi elitsha lobulungisa.—1 Petros 2:9.
15. Abo bafuna ukukhanya baya kuguqukela enini?
15 Abo bathanda ukukhanya abayi kuphazanyiswa koko kuthethwa leli hlabathi nalusukelo lwalo. Kungekudala konke oko likuthethayo neenjongo zalo ziya kuthi shwaka, ekubeni eli hlabathi lisondela kwisiphelo salo. Kunoko, abathandi bobulungisa baya kufuna ukuguqukela kwiindaba ezilungileyo ezivakaliswa ngabo bakhanyisa ukukhanya koBukumkani bukaThixo kwiimbombo ezikude zomhlaba. Aba ngabo baxelwa kwangaphambili kwiSityhilelo 7:9, 10, esithi: “Ndabona, naso isihlwele esikhulu, ebekungekho namnye unako ukusibala, siphuma kuzo zonke iintlanga, nezizwe, nabantu, neelwimi, simi phambi kwetrone naphambi kweMvana [uKristu] . . . Bedanduluka ngezwi elikhulu, besithi: Usindiso kuye uThixo wethu, lowo uhleli phezu kwetrone, nakuyo iMvana.” ISi 7 Indinyana 14 ithi: “Aba ngabaphumayo embandezelweni enkulu.” Ewe, bayasinda kwisiphelo seli hlabathi ukungena kwihlabathi elitsha elingenasiphelo phantsi koBukumkani bukaThixo.
Ihlabathi Elitsha Elikhanyiselweyo
16. Yintoni eya kwenzeka kwihlabathi likaSathana ngembandezelo enkulu?
16 Ihlabathi elitsha liya kuzaliswa kukukhanya okuqaqambileyo kwenyaniso. Enyanisweni, qwalasela oko imeko eya kuba kuko emva kokuba uThixo ephelise le nkqubo yezinto. USathana, iidemon nenkqubo yakhe yezobupolitika, yezorhwebo neyonqulo ziya kube zingekho—zonke! Nabo bonke oothunywashe bakaSathana benkohliso baya kube bengasekho. Ngaloo ndlela, emva kwembandezelo enkulu, akusayi kuphinda kushicilelwe nokuba libe linye iphephandaba, iphephancwadi, incwadi, incwadana okanye iphetshana elixhasa eli hlabathi lingendawo. Akuyi kubakho zimpembelelo zonakalisayo ezisasazwa kumaziko ehlabathi kamabonwakude okanye unomathotholo. Yonke imeko-bume enobuhlungu yehlabathi likaSathana iya kutshayelwa kuthi tu ngesihlandlo nje esinye esikhulu!—Mateyu 24:21; ISityhilelo 7:14; 16:14-16; 19:11-21.
17, 18. Unokuyichaza njani imeko-bume yokomoya emva kokuphela kwehlabathi likaSathana?
17 Esinjani sona isiqabu okuya kuba siso oko! Ukususela ngolo suku ukusa phambili, kuphela iya kuba kukukhanya kokomoya okuphilisayo nokukhuthazayo okuvela kuYehova noBukumkani bakhe okuya kuphembelela uluntu. UIsaya 54:13 uxela oku kwangaphambili: “Bonke abantwana bakho baya kuba ngabafundi bakaYehova, lube lukhulu uxolo lwabantwana bakho.” Xa uThixo elawula kuwo wonke umhlaba, idinga lakhe kukuba, njengoko uIsaya 26:9 esitsho, “baya kufunda ubulungisa abemi belimiweyo.”
18 Ngokukhawuleza, yonke imeko-bume engokwasengqondweni nengokomoya iya kuguquka ibe ntle. Umhla nezolo kuya kubakho izinto ezakhayo kunezinto ezidandathekisayo, nezokuziphatha okubi ezisasazekileyo ngoku. Wonk’ ubani oya kuba ephila ngoko uya kufundiswa inyaniso ngoThixo neenjongo zakhe. Ngeyona ngqiqo ipheleleyo, isiprofeto esikuIsaya 11:9 siya kuzaliseka, esithi: “Ilizwe liyakuzala kukwazi uYehova, njengamanzi egubungele ulwandle.”
Kungxamisekile Ukulandela Ukukhanya
19, 20. Kutheni abo bafuna ukulandela ukukhanya befanele baphaphe?
19 Namhlanje, kule minyaka yokugqibela yale nkqubo imbi, kungxamisekile ukulandela ukukhanya kwehlabathi. Yaye sifanele siphaphe, kuba kukho imfazwe enkulu yokusithintela ukuze singahambi ekukhanyeni. Le nkcaso ivela kumagunya obumnyama—uSathana, iidemon zakhe nakwintlangano yakhe yasemhlabeni. Kungoko umpostile uPetros elumkisa esithi: “Yibani nobungcathu, phaphani; ngokuba ummangaleli wenu, uMtyholi, uhamba njengengonyama egqumayo, efuna ubani angamginyayo.”—1 Petros 5:8.
20 USathana uya kubeka yonke imiqobo kwindlela yabo beza ekukhanyeni, kuba ufuna baqhubeke behamba ebumnyameni. Isenokuba yingcinezelo evela kwizalamane okanye kubahlobo bangaphambili abayichasayo inyaniso. Isenokuba ngamathandabuzo ngeBhayibhile ngenxa yokumfanyekiswa kukabani ziimfundiso zonqulo lobuxoki okanye impembelelo yenkohliso yabantu abangakholelwayo kuThixo nabo bangakholelwayo kuYe kuba bengamboni. Isenokuba lutyekelo lukabani lwesono olwenza kube nzima ukuphila ngokweemfuno zikaThixo.
21. Liliphi inyathelo elifanele lithatyathwe ngabo bonke abafuna ukuphila kwihlabathi elitsha likaThixo?
21 Zingakhathaliseki iziphazamiso ezisenokubakho, ngaba ufuna ukunandipha ubomi kwihlabathi elitsha elingenabuhlwempu, ulwaphulo-mthetho, okungekho sikweni nemfazwe? Ngaba ufuna impilo efezekileyo nobomi obungunaphakade kwiparadisi esemhlabeni? Ngoko yamkela uze ulandele uYesu njengokhanyiselo lwehlabathi uze uphulaphule isigidimi sabo ababambelele ngokuqinileyo ‘kwilizwi lobomi’ nabo ‘babonakala njengezikhanyiso ehlabathini.’—Filipi 2:15, 16.
Ubuya Kuphendula Njani?
◻ Iinkokeli zonqulo zibonakalisa njani ukuba zingabathandi bobumnyama?
◻ Sisiphi isimo sengqondo uYesu awayenaso ngabantu?
◻ Ukuhlanganiswa kwabathwali bokukhanya kuye kwaqhubeka njani?
◻ Ziziphi iinguqulelo ezibalulekileyo eziya kwenzeka kungekudala?
◻ Kutheni kungxamisekile ukulandela ukhanyiselo lwehlabathi namhlanje?
[Umfanekiso okwiphepha 14, 15]
AbaFarisi abantliziyo zilukhuni bayigxotha indoda eyavulwa amehlo nguYesu