Imibuzo Evela Kubafundi

Ngaba uYohane owabhaptiza uYesu ufanele abizwe ngokuba ngu-“Yohane umBhaptizi” (“John the Baptist,” NW) okanye “uYohane umbhaptizi” (“John the Baptizer,” NW)?

Omabini la magama achanile yaye ayaxhaswa yiBhayibhile.

UYohane wayeza ‘kulungisela iNkosi abantu abalungisiweyo’ nto leyo awayenza ‘ngokuvakalisa ubhaptizo lwenguquko ukuze kuxolelwe izono.’ (Luka 1:17; 3:3) Umpostile uMateyu wabhala: “UYohane umBhaptizi weza wamemeza entlango yelakwaYuda, esithi: ‘Guqukani, kuba uBukumkani bamazulu busondele.’ . . . Babephuma oko besiya kuye abaseYerusalem, nabelakwaYuda bonke . . . yaye abantu babebhaptizwa nguye eYordan apho, bezixela izono zabo.”—Mateyu 3:1-6, NW.

Phawula ukuba uMateyu umchaza uYohane ‘njengomBhaptizi.’ Ngokucacileyo uMateyu, owayenikela ingxelo yakhe kumaYuda, umele ukuba wayesazi ukuba amaYuda ayemazi ukuba ungubani “umBhaptizi.” Wasebenzisa igama elithi “umBhaptizi” njengefani. UYesu kwanabafundi bakhe babesebenzisa igama elithi “uYohane umBhaptizi,” njengoko izicaka zikaHerode zazimbiza njalo.a—Mateyu 11:11, 12; 14:2; 16:14.

Ngokufanayo umfundi uMarko usebenzisa igama elithi “umBhaptizi.” (Marko 6:25; 8:28, NW) Kodwa xa echaza uYohane, uMarko umbiza ngokuba ‘nguYohane umbhaptizi.’ (Marko 1:4) IsiGrike esisetyenziswe kuMarko 1:4 sahluke kancinane kwesezinye iindinyana. Kwakhona uMarko 1:4 uguqulelwe ngokuthi “lowo ubhaptizayo.” UMarko wayebalaselisa oko kwakusenziwa nguYohane; wayebhaptiza, engumbhaptizi.

Noko ke, akubonakali ukuba simele sahlule phakathi kwezi ndlela zimbini abizwa ngazo uYohane. KuMarko 6:24, 25, (NW) sifunda oku ngoSalome: “Ephumile ke wathi kunina: ‘Ndicele ntoni na?’ Wathi: ‘Intloko kaYohane umbhaptizi.’ Engaphozisanga maseko waya kukumkani waza wacela, esithi: ‘Ndithanda ukuba undinike kaloku nje ngesitya intloko kaYohane umBhaptizi.’” La magama mabini ayesetyenziswa ngendlela efanayo.

Kusenokwenzeka ukuba bambi igama elithi “umBhaptizi” baliqonda ngokwenkcazelo yesibini yesichazi-magama: “Ilungu okanye umlandeli wevangeli yehlelo lamaProtestanti omiselwe ziinkokeli zebandla nobhaptiza ngokuntywilisela abakholwayo kuphela.” Ngokuqinisekileyo kwakungenjalo ngoYohane.

Ngenxa yoko, omabini la magama “uYohane umBhaptizi” “noYohane umbhaptizi” achanile ibe afanelekile.

[Umbhalo osemazantsi]