Isizathu Sokuba Kufuneka Uye Kwiintlanganiso ZamaKristu
KANGANGEENYANGA, uRosario, ohlala eMzantsi Merika, wayekunandipha ukufundisisa iBhayibhile noElizabeth. URosario wavuyiswa kukufunda ngoBukumkani bukaThixo nendlela obuya kuzizisa ngayo iimeko zeParadisi emhlabeni. Sekunjalo, nanini na uElizabeth emmemela kwiintlanganiso eHolweni yoBukumkani, wayekhaba ngaw’ omane. Wayenoluvo lokuba wayenokuyifundisisa ekhaya iBhayibhile aze enze oko ikuthethayo, ngaphandle kokuya kwiintlanganiso zebandla. Ngaba nawe uye wazibuza enoba iintlanganiso zamaKristu ziyingenelo yokwenene na kuwe? Kutheni uThixo elungiselela ukuba abantu bakhe bahlanganisane?
Ekubeni amaKristu enkulungwane yokuqala ayehluke gqitha kubantu ababewangqongile, kwakubalulekile ukuba anxulumane nabantu abalungileyo ukuze asinde. Umpostile uPawulos wabhalela elinye ibandla lamaKristu enkulungwane yokuqala wenjenje: ‘Niye naba ngabangenakusoleka, abangenabuqhinga esazulwini sesizukulwana esigoso, esigwenxa; enithi phakathi kwabo nibonakale ninjengezikhanyiso ehlabathi.’ (Filipi 2:15) Ngokukhethekileyo amaKristu ayesiva ubunzima kwelakwaYuda, yaye uPawulos wawabhalela oku: “Kanjalo masinyamekelane, ukuba silolane [“sikhuthazane,” NW] eluthandweni nasemisebenzini emihle; singakuhilizeli ukuhlanganisana kwethu, njengesiko labanye. Masivuselelane kube kokukhona, niyibona nje ukuba imini leyo iyasondela.” (Hebhere 10:24, 25) Kungayiphi indlela esithi silolane ngayo eluthandweni nasemisebenzini emihle ngokuhlanganisana?
Indlela ‘Alolana’ Ngayo AmaKristu
Igama lesiGrike elisetyenziswe nguPawulos neliguqulelwe ngokuthi ‘ukukhuthaza’ ngokuchanileyo lithetha “ukulolwa.” Umzekeliso weBhayibhile ucacisa indlela ‘alolana’ ngayo amaKristu ngokuthi: “Isinyinthi silola isinyithi, indoda ilola ubuso bowayo.” (IMizekeliso 27:17; INtshumayeli 10:10) Sifana nezixhobo ezifuna ukulolwa ngokuthe rhoqo. Ekubeni ukubonakalisa uthando ngoYehova nokwenza izigqibo ezisekelwe kukholo lwethu kuthetha ukuba ngowahlukileyo ehlabathini, ngokuzingisileyo sifanele sithabathe ikhondo elahlukileyo, ngokungathi kunjalo, kwabaninzi.
Umgudu ozingisileyo wokuba ngabahlukileyo unokuyenza buthuntu inzondelelo esinayo yokwenza imisebenzi emihle. Kodwa xa sikunye nabanye abathanda uYehova, siyalolana—sikhuthazana eluthandweni nasemisebenzini emihle. Kwelinye icala, xa sisodwa, sityekela ekucingeleni iziqu zethu ngokugqithiseleyo. Ukuziphatha okubi, ukuzingca, okanye iingcamango ezibubudenge zisenokungenelela ezingqondweni zethu. “Ozahlulayo ufuna umnqweno wakhe; into yonke ezimasayo uyayivungamela.” (IMizekeliso 18:1) Kungeso sizathu uPawulos wabhalela ibandla elikwisixeko saseTesalonika oku: “Thuthuzelanani, nakhane, kwanjengokuba nisenjenjalo.”—1 Tesalonika 5:11.
Nangona uRosario wayezifunde zonke iimfundiso ezisisiseko zeBhayibhile, sekunjalo wayengekazimiseli ukunxulumana nebandla. Ngoko, engenandlela yimbi yokumnceda, uElizabeth wayeka ukumtyelela. Kwiinyanga ezimbalwa kamva, umveleli ohambahambayo watyelela uRosario waza wambuza oku: “Nokuba ilungu ngalinye lentsapho linokufumana ukutya okunik’ impilo ngokuya kwivenkile yokutyela, yintoni aya kulahlekelwa yiyo onke amalungu ngokungatyi kunye ekhaya?” URosario waphendula: “Aya kulahlekelwa lulwalamano lwentsapho.” Wayifumana ingongoma waza waqalisa ukuya ngokuthe rhoqo kwiintlanganiso. Wafumanisa kuyingenelo gqitha ukuya kwiintlanganiso kangangokuba ukususela ngoko ebesiya phantse kuzo zonke iintlanganiso.
Ukuva abanye abantu bevakalisa ukholo kwizinto ezifana nezo ukholelwa kuzo kuyakhuthaza ibe kunjalo naxa ubona indlela ukholo olunjalo olubuguqule ngayo ubomi babo. UPawulos wayekwazi oku ngokusuka kumava akhe obuqu, yaye ebhalela ibandla laseRoma wathi: “Kuba ndilangazelela ukunibona, ukuze ndinabele sibabalo sithile sisesomoya, ukuze nizimaseke; oko ke kukuze ndivuseleleke nam phakathi kwenu, ngalo ukholo olukuthi sobabini, ngolwenu kwanangolwam.” (Roma 1:11, 12) Enyanisweni, kwakuyiminyaka emininzi ngaphambi kokuba uPawulos atyelele eRoma, yaye xa wayayo, wayenjengombanjwa ezandleni zamaRoma. Kodwa xa wabona abazalwana ababehambe malunga neekhilomitha ezingama-60 besuka kwisixeko saseRoma beze kumhlangabeza, ‘uPawulos wabulela kuThixo, womelezeka.’—IZenzo 28:15.
Ukufumana Ukutya Kokomoya Ngamaxesha Anomngcipheko
Ngoxa wayeseluvalelweni endlwini eRoma, uPawulos wabhalela amaHebhere ukuba angakuhilizeli ukuhlanganisana kunye. Kubalulekile kuthi ukongezelela kwakhe la mazwi: “Kube kokukhona, niyibona nje ukuba imini leyo iyasondela.” (Hebhere 10:25) Ngokuthe rhoqo amaNgqina kaYehova aye acaciselwa ngokusuka kwiziBhalo ukuba unyaka we-1914 waphawula ukuqalisa kwexesha lesiphelo selihlabathi nokuba ‘imini yomgwebo nentshabalalo yabantu abangahloneli Thixo’ isondele. (2 Petros 3:7) Ngokutsho kwencwadi yeBhayibhile yeSityhilelo, xa uMtyholi wagxothwa ezulwini ekuqaliseni kwexesha lesiphelo, waba nomsindo omkhulu waza ‘waya kulwa nabaseleyo abo bayigcinayo imithetho kaThixo, abanobungqina bukaYesu Kristu.’ (ISityhielelo 12:7-17) Ngoko ke, kunzima ngakumbi ukugcina imithetho kaThixo kule mihla; kufuneka sihlanganisane namakholwa akunye nathi ngokuthe rhoqo. Iintlanganiso ziya kusinceda someleze ukholo lwethu nothando lwethu ngoThixo ukuze sixhathise iintlaselo zikaMtyholi.
Uthando ngoThixo kwanokholo azifani nezakhiwo ezihlala zihleli zakuba nje zakhiwe. Kunoko, zifana nezinto eziphilileyo ezikhula ngokuthe ngcembe ukuba zondliwa ngokuthe rhoqo kodwa ezibunayo zize zife zakungondliwa. Kungeso sizathu uYehova elungiselela ukutya kokomoya ngokuthe rhoqo ukuze omeleze abantu bakhe. Sonke sifuna ukutya okunjalo, kodwa sinokukufumana phi ngaphandle kwentlangano kaThixo nakwiintlanganiso ezilungiselelwa yiyo? Akukho ndawo yimbi.—Duteronomi 32:2; Mateyu 4:4; 5:3.
UYesu waphakamisa umbuzo onokusinceda sibone indlela alondla ngayo ibandla lamaKristu. Wabuza: “Ngubani na ke loo mkhonzi uthembekileyo, uqondayo, eyathi inkosi yakhe yammisa phezu kwabendlu yayo, ukuze abanike ukudla ngexesha elifanelekileyo? Unoyolo loo mkhonzi, iya kuthi yakufika inkosi yakhe imfumane esenjenjalo.” (Mateyu 24:45, 46) Ngubani owamiselwa nguYesu ngenkulungwane yokuqala ukuze ondle abalandeli bakhe, yaye ngubani awamfumana ebondla ngokuthembekileyo ekubuyeni kwakhe esemandleni oBukumkani? Ngokucacileyo, akakho umntu ophile ukutyhubela zonke ezo nkulungwane. Ubungqina balatha kumkhonzi njengebandla lamaKristu athanjiswe ngomoya, njengokuba uhlanga lwakwaSirayeli lwalungumkhonzi kaThixo ngamaxesha angaphambi kobuKristu. (Isaya 43:10) Ewe, uYesu usilungiselela ukutya kokomoya ngelo qumrhu lazwenibanzi lamaKristu athanjiswe ngomoya, namhlanje elidlulisela ukutya kokomoya ngamabandla asekuhlaleni amaNgqina kaYehova.
Ilungiselelo likaYesu lokudlulisela ukutya kokomoya lachazwa ngokubhekele phaya ngumpostile uPawulos xa wathi: “Enyuke waya enyangweni, wathimba intimbo, wabapha izipho abantu. . . . Wabapha abanye ukuba babe ngabapostile, abanye babe ngabaprofeti, abanye babe ngabashumayeli beendaba ezilungileyo, abanye babe ngabalusi nabafundisi, ukuze abangcwele basulungekiselwe umsebenzi wolungiselelo, ukwakhiwa ke komzimba kaKristu; side thina sonke sifike kubo ubunye benkolo, nobokumazi okuzeleyo uNyana kaThixo, ebudodeni obupheleleyo, emlinganisweni wobukhulu bokuzala kukaKristu.”—Efese 4:8, 11-13.
Ngokuyintloko kwakusemabandleni asekuhlaleni—kwiintlanganiso—apho ezi “zipho zabantu” zazibakha khona abazalwana. Ngokomzekelo, kwa-Antiyokwe, “ooYuda noSilas, kuba bengabaprofeti nabo, babathuthuzela abazalwana ngokuthetha okukhulu, babomeleza.” (IZenzo 15:32) Namhlanje iintetho ezinikelwa ngamadoda afanelekayo ngokomoya ngokufanayo ziya kulondla ukholo lwethu ukuze lungabuni okanye lungabi namisebenzi.
Lisenokuba yinyaniso elokuba siye senza inkqubela entle ngenxa yoncedo lobuqu lwelungu lebandla kwanaxa sisenokuba asikaqalisi ukuya kwiintlanganiso okwangoku. IBhayibhile ithi kukho ixesha laxa ‘uswele umntu wokukufundisa iziqalelo zokuqala zezihlabo zikaThixo; usuke ube ngofanele ukusezwa amasi, ungabi ngofanele ukudla okuqinileyo.’ (Hebhere 5:12) Kodwa ubani akanakuhlala ekumgangatho wokusezwa amasi ngonaphakade. Iintlanganiso zamaKristu zinikela ucwangciso oluqhubekayo lwemfundo yeBhayibhile olwenzelwe ukuba ubani ahlale enothando ngoThixo nokholo oluphilileyo yaye zinikela uncedo olusebenzisekayo lokusebenzisa “lonke icebo likaThixo.” (IZenzo 20:27) Oku kungaphezu “kwamasi.” Ngokubhekele phaya iBhayibhile ithi: “Kokwabakhulileyo ke ukudla okuqinileyo, abo bathi, ngenxa yobugcisa, babe nezimvo eziqheliselwe ukucalula okuhle kwanokubi.” (Hebhere 5:14) Kwiintlanganiso kufundwa imibandela emininzi esenokungabi yinxalenye yombandela osisiseko wemfundo yeBhayibhile efundwa ekhaya, njengokufundisiswa kwendinyana nganye yeziprofeto ezibalulekileyo zeBhayibhile kwaneengxubusho ezenziwa ngokucokisekileyo ngendlela esinokumxelisa ngayo uThixo kubomi bethu.
Amazwi KaYehova Akhumbuzayo—Anjengelizwi Elisemva Kwakho
Ngoncedo lwezo zifundo zebandla, ngokuthe rhoqo uYehova usikhumbuza ngohlobo lwabantu esifanele sibe lulo. Loo mazwi asikhumbuzayo abalulekile. Ngaphandle kwawo ngokulula sityekela ekubeni ngabazingcayo, abanekratshi, nababawayo. Amazwi eZibhalo akhumbuzayo aya kusinceda sibe nolwalamano oluhle nabanye abantu kunye noThixo ngokwakhe. Umbhali weNdumiso 119:59 wavuma esithi, “Ndazicingela iindlela zam, ndazibuyisela iinyawo zam ezingqinisweni zakho.”
Njengoko sisiya ngokuthe rhoqo kwiintlanganiso zamaKristu, sibona ukusebenza kwesiprofeto sikaYehova asidlulisele ngoIsaya, esithi: “Angabi sazimela uMyali wakho Ozukileyo, amehlo akho esambona uMyali wakho Ozukileyo; iindlebe zakho zive ilizwi ngasemva kwakho, lisithi, Nantsi indlela; hambani ngayo.” UYehova ukhangela inkqubela esiyenzayo aze asiluleke ngothando ukuba sithabatha ikhondo eliphosakeleyo. (Isaya 30:20, 21, NW; Galati 6:1) Yaye usinika uncedo olude lwangakumbi kunolu.
Ukwamkela Umoya Oyingcwele Ofumaneka Ngebandla
Ngokuya rhoqo kwiintlanganiso zamaKristu namaNgqina kaYehova, somelezwa ngumoya oyingcwele kaThixo, ophumla phezu kwabantu bakhe. (1 Petros 4:14) Ngaphezu koko, abaveleli abangamaKristu ebandleni bamiselwe ngomoya oyingcwele. (IZenzo 20:28) La mandla asebenzayo avela kuThixo anempembelelo enamandla kumKristu. IBhayibhile ithi: “Ke sona esomoya isiqhamo luthando, uvuyo, uxolo, ukuzeka kade umsindo, ububele, ukulunga, intembeko, ubulali, ukuzeyisa.” (Galati 5:22, 23) Umoya oyingcwele, osebenza ngentlangano kaThixo, kwakhona uya kusinceda sikwazi ngokupheleleyo oko uYehova akugcinele abo bamthandayo. Emva kokucacisa ukuba abantu abadumileyo bale nkqubo yezinto abanakuziqonda iinjongo zikaThixo, uPawulos wabhala oku: “UThixo wazityhila kuthi ke ngomoya wakhe.”—1 Korinte 2:8-10.
Ngaphandle kokutya kokomoya okomelez’ ukholo, ibandla linikela uqeqesho kwabo banqwenela ukuba nesabelo kumsebenzi oyintloko webandla. Nguwuphi loo msebenzi?
Uqeqesho Olunikelwa Libandla
Ibandla lamaKristu alingombutho wentlalo apho abantu bavuyela nje ukuzonwabisa mhlawumbi bakhuthazane ukuba baphile ubomi obulunge ngakumbi. UYesu wathuma ibandla ukuba lise iindaba ezilungileyo zoBukumkani kwabo basebumnyameni bokomoya. (IZenzo 1:8; 1 Petros 2:9) Ukususela kumhla elasekwa ngawo, ngePentekoste yowama-33 C.E., laba yintlangano yabashumayeli. (IZenzo 2:4) Ngaba wawukhe wanamava okuzama ukuxelela uthile ngeenjongo zikaYehova kodwa wasilela ukumeyisela enyanisweni? Iintlanganiso zebandla zinikela uqeqesho kubuchule bokufundisa. Ngokufunda imizekelo eseBhayibhileni, sifunda indlela yokuvelisa isiseko sengxoxo esinokuqiqa nomntu ngaso, indlela yokusebenzisa iZibhalo njengesiseko sengxubusho esengqiqweni, nendlela yokuqiqisa abanye ngokusebenzisa imibuzo nemizekeliso. Ubuchule obunjalo bunokukwenza ube novuyo olungathethekiyo lokunceda omnye umntu abe nolwazi ngenyaniso yeBhayibhile.
Kweli hlabathi lidlakazwa kukungabikho kwemvisiswano, kwanokuziphatha okubi, ibandla lamaKristu ligwiba eliqinisekileyo lokomoya. Nakubeni libunjwe ngabantu abangafezekanga, liyindawo yokuzimela enoxolo nothando. Ngoko ke, yiya ngokuthe rhoqo kuzo zonke iintlanganiso zalo uze uzibonele ngokwakho inyaniso yamazwi omdumisi athi: “Yabonani, ukuba kuhle, ukuba mnandi, ukuthi abazalwana bahlale bemxhelo mnye! . . . ngokuba uYehova wayimisela khona apho intsikelelo, ubomi, kude kuse ephakadeni.”—INdumiso 133:1, 3.