Abalusi Kunye Nezimvu Phantsi Kolawulo Lobuthixo
“Umgwebi wethu nguYehova, ummisi-mthetho wethu nguYehova, ukumkani wethu nguYehova; uya kusisindisa yena.”—ISAYA 33:22.
1. Kutheni kunokuthiwa amaKristu enkulungwane yokuqala namaKristu anamhlanje alawulwa ngokobuthixo?
ULAWULO lobuthixo luthetha ukulawulwa nguThixo. Luquka ukwamkela igunya likaYehova nokuthobela ukhokelo nemiyalelo yakhe kwizigqibo ezibalulekileyo nezingabalulekanga kangako esizenzayo ebomini. Ibandla lenkulungwane yokuqala lalilawulwa ngokobuthixo ngokwenene. Ngelo xesha amaKristu ngokunyanisekileyo ayenokuthi: “Umgwebi wethu nguYehova, ummisi-mthetho wethu nguYehova, ukumkani wethu nguYehova.” (Isaya 33:22) Ikhokelwa yintsalela ethanjisiweyo, namhlanje intlangano kaYehova uThixo ngokufanayo ilawulwa ngokobuthixo ngokwenene.
Namhlanje Siphantsi Kolawulo Lobuthixo Ngaziphi Iindlela?
2. Yiyiphi enye indlela amaNgqina kaYehova azithoba ngayo kulawulo lukaYehova?
2 Kutheni sisithi intlangano kaYehova yasemhlabeni ilawulwa ngokobuthixo? Kungenxa yokuba abo bakuyo bazithoba ngokwenyaniso kulawulo lukaYehova. Yaye balandela ukhokelo lukaYesu Kristu, lowo uYehova ambeke etroneni njengoKumkani. Ngokomzekelo, kweli xesha lesiphelo, uMlawuli Wobuthixo Omkhulu udlulisela lo myalelo kuYesu: “Lifake irhengqa lakho, uvune; ngokuba lifikile kuwe ilixa lokuvuna; ngokuba ukudla komhlaba kuvuthiwe.” (ISityhilelo 14:15) UYesu uyathobela aze aqalise ukuvuna emhlabeni. AmaKristu ayamxhasa uKumkani wawo kulo msebenzi mkhulu ngokushumayela iindaba ezilungileyo nangokwenza abafundi ngenzondelelo. (Mateyu 28:19; Marko 13:10; IZenzo 1:8) Ngokwenjenjalo, kwakhona asebenza noYehova, uMlawuli Wobuthixo Omkhulu.—1 Korinte 3:9.
3. AmaKristu azithoba njani kulawulo lobuthixo kwimibandela yokuziphatha?
3 Kwakhona, ngehambo yawo amaKristu ayazithoba kulawulo lukaThixo. UYesu wathi: “Lowo uyenzayo inyaniso uyeza elukhanyisweni, ukuze imisebenzi yakhe ibonakalaliswe; ngokuba isetyenzelwe kuThixo.” (Yohane 3:21) Namhlanje, kukho iimpikiswano ezingapheliyo ngemilinganiselo yokuziphatha, kodwa ezo mpikiswano azikho phakathi kwamaKristu. Akugqala ikukuziphatha okubi oko uYehova athi kukuziphatha okubi, ibe akuphepha ngokungathi sisifo esibulalayo! Kwakhona anyamekela iintsapho zawo, athobela abazali bawo, kwaye ahlala ewathobela amagunya ongamileyo. (Efese 5:3-5, 22-33; 6:1-4; 1 Timoti 5:8; Tito 3:1) Ngaloo ndlela, izinto azenza ngokuvisisana nolawulo lobuthixo, ngokuvisisana nokuthanda kukaThixo.
4. Sisiphi isimo sengqondo esiphosakeleyo esabonakaliswa nguAdam noEva noSawule, yaye amaKristu asibonisa njani isimo sengqondo esahlukileyo?
4 UAdam noEva baphulukana neParadisi ngenxa yokuba babefuna ukuzenzela izigqibo zabo ngoko kulungileyo nokubi. UYesu wayefuna okwahluke ngokupheleleyo koko. Wathi: “Andifuni kuthanda kwam, ndifuna ukuthanda kukaBawo owandithumayo.” NamaKristu afuna okufanayo. (Yohane 5:30; Luka 22:42; Roma 12:2; Hebhere 10:7) USawule, ukumkani wokuqala wakwaSirayeli, wayemthobela uYehova—kodwa ngokuyinxenye kuphela. Ngenxa yoku walahlwa. USamuweli wamxelela oku: “Ukuphulaphula [“ukuthobela,” NW] kulungile ngaphezu kombingelelo, nokubaza iindlebe kulungile ngaphezu kwamanqatha eenkunzi zeegusha.” (1 Samuweli 15:22) Ngaba kukwenza izinto ngokuvisisana nolawulo lobuthixo ukulandela ukuthanda kukaYehova ukusa kumlinganiselo othile, mhlawumbi ngokubakho rhoqo kumsebenzi wokushumayela okanye ezintlanganisweni, sandule ke silalanise kwimibandela yokuziphatha okanye ngezinye iindlela? Ngokuqinisekileyo akunjalo! Sizabalazela ‘ukwenza ukuthanda kukaThixo ngokwasemphefumlweni.’ (Efese 6:6; 1 Petros 4:1, 2) Ngokungafaniyo noSawule, siluthobela ngokupheleleyo ulawulo lukaThixo.
Ulawulo Lobuthixo Namhlanje
5, 6. UYehova uqhubana njani noluntu namhlanje, yaye ukusebenzisana neli lungiselelo kuphumela kwintoni?
5 Mandulo, uYehova wayelawula yaye etyhila iinyaniso ngokusebenzisa abantu, njengabaprofeti, ookumkani, nabapostile. Namhlanje, akusenjalo; akukho baprofeti okanye bapostile baphefumlelweyo. Kunoko, uYesu wathi ebudeni bobukho bakhe njengokumkani, wayeya kuvelisa iqumrhu elithembekileyo labalandeli, ‘umkhonzi othembekileyo noqondayo,’ yaye wayeya kummisela phezu kwayo yonke impahla yakhe. (Mateyu 24:45-47; Isaya 43:10) Ngowe-1919 loo mkhonzi waqondwa njengentsalela yamaKristu athanjisiweyo. Ukususela ngoko, emelwa liQumrhu Elilawulayo lamaNgqina kaYehova, ebelelona jelo liphambili lolawulo lobuthixo emhlabeni. Kulo lonke ihlabathi, iQumrhu Elilawulayo limelwa ziiKomiti zamaSebe, abaveleli abahambahambayo, nabadala bamabandla.
6 Ukusebenzisana nentlangano yolawulo lobuthixo yindlela ebalulekileyo yokuzithoba kulawulo lobuthixo. Intsebenziswano enjalo yenza kubekho umanyano nolungelelwano ehlabathini lonke ‘kuso sonke isizalwana.’ (1 Petros 2:17) Yaye, oku kuyamkholisa uYehova, ‘ongengoThixo wesiphithiphithi, ongowoxolo.’—1 Korinte 14:33.
Abadala Kulawulo Lobuthixo
7. Kutheni kunokuthiwa abadala abangamaKristu bamiselwa ngokolawulo lobuthixo?
7 Onke amadoda amakhulu amiselweyo, enokuba akwesiphi na isikhundla segunya, aneemfaneleko ezandlalwe eBhayibhileni zokufanelekela umsebenzi wokuba ngumveleli, okanye indoda enkulu. (1 Timoti 3:1-7; Tito 1:5-9) Kwakhona, amazwi kaPawulos awawathetha kubadala base-Efese asebenza kubo bonke abadala: “Zilumkeleni ngoko, nawo wonke umhlambi, athe uMoya oyiNgcwele wanimisa ukuba ngabaveleli bawo, ukuba nilaluse ibandla likaThixo.” (IZenzo 20:28) Ewe, abadala bamiselwa ngomoya oyingcwele, ovela kuYehova uThixo. (Yohane 14:26) Bamiselwa ngokolawulo lobuthixo. Ngaphezu koko, balusa umhlambi kaThixo. Lo mhlambi ngokaYehova, asingowabadala. Ulawulwa ngokobuthixo.
8. Ngokuqhelekileyo ziziphi iimbopheleleko zabadala namhlanje?
8 Kwincwadi yakhe awayibhalela abase-Efese, umpostile uPawulos wandlala iimbopheleleko eziqhelekileyo zabadala, wathi: “Wabapha abanye ukuba babe ngabapostile, abanye babe ngabaprofeti, abanye babe ngabashumayeli beendaba ezilungileyo, abanye babe ngabalusi nabafundisi, ukuze abangcwele basulungekiselwe umsebenzi wolungiselelo, ukwakhiwa ke komzimba kaKristu.” (Efese 4:11, 12) Kwakungasekho bapostile nabaprofeti emva kokuba uzelwe ‘umzimba kaKristu.’ (Thelekisa eyoku-1 kwabaseKorinte 13:8.) Kodwa abadala basaxakekile beshumayela iindaba ezilungileyo, besalusa, yaye befundisa.—2 Timoti 4:2; Tito 1:9.
9. Abadala bafanele bazilungiselele njani ukumela ukuthanda kukaThixo ebandleni?
9 Ekubeni ulawulo lobuthixo luthetha ukulawulwa nguThixo, abadala abaphumelelayo bakwazi kakuhle ukuthanda kukaThixo. UYoshuwa wayalelwa ukuba afunde uMthetho imihla ngemihla. Nabadala kufuneka bafundisise baze bahlolisise iZibhalo rhoqo baze balwazi kakuhle uncwadi lweBhayibhile olupapashwe ngumkhonzi othembekileyo noqondayo. (2 Timoti 3:14, 15) Oku kuquka iphephancwadi IMboniselo noVukani! nezinye iimpapasho ezibonisa indlela esebenza ngayo imigaqo yeBhayibhile kwiimeko ezithile.a Noko ke, ngoxa kubalulekile ukuba umdala alwazi aze alulandele ukhokelo olupapashwe kuncwadi lweWatch Tower Society, kwakhona kufuneka ayazi kakuhle imigaqo yeZibhalo olusekelwe kuyo ukhokelo olo. Uya kwandula ke akwazi ukusebenzisa ukhokelo lweZibhalo ngokuqonda nangothantamiso.—Thelekisa uMika 6:8.
Ukukhonza Ngomoya WobuKristu
10. Sisiphi isimo sengqondo esibi abadala abafanele basilumkele, yaye njani?
10 Malunga nonyaka wama-55 C.E., umpostile uPawulos wabhala incwadi yakhe yokuqala eya kwibandla laseKorinte. Enye yeengxaki awazisingathayo yayinxulumene namadoda athile awayefuna ukubalasela ebandleni. UPawulos wabhala: “Senihluthi, senizizityebi, nalawula ningenathi; akwaba ke kambe beningabalawuli, ukuze nathi silawule kunye nani.” (1 Korinte 4:8) Ngenkulungwane yokuqala yeXesha Eliqhelekileyo, onke amaKristu ayenethemba lokulawula njengookumkani nababingeleli ezulwini kunye noYesu. (ISityhilelo 20:4, 6) Noko ke, licacile elokuba, bambi eKorinte babelibala ukuba apha emhlabeni abakho ookumkani phantsi kolawulo lobuthixo lwamaKristu. Kunokwenza izinto njengookumkani beli hlabathi, abalusi abangamaKristu bahlakulela ukuthobeka, uphawu olumkholisayo uYehova.—INdumiso 138:6; Luka 22:25-27.
11. (a) Yiyiphi eminye yemizekelo ebalaseleyo yokuthobeka? (b) Abadala nawo onke amanye amaKristu afanele abe nayiphi imbono ngeziqu zawo?
11 Ngaba ukuthobeka bubuthathaka? Akunjalo konke konke! UYehova uchazwa njengothobekileyo. (INdumiso 18:35) Ookumkani bakwaSirayeli babekhokela imikhosi ukuya edabini yaye belawula olo hlanga ngaphantsi kukaYehova. Ukanti, ngamnye kwakufuneka alumke “ingaphakami intliziyo yakhe phezu kwabazalwana bakhe.” (Duteronomi 17:20) UYesu ovusiweyo unguKumkani wasezulwini. Noko ke, ngoxa wayelapha emhlabeni, wahlamba iinyawo zabafundi bakhe. Okunjani kona ukuthobeka! Yaye ebonisa ukuba wayefuna abapostile bakhe bathobeke ngokufanayo, wathi: “Ukuba ndizihlambile iinyawo zenu mna, ndiyiNkosi, ndinguMfundisi, nani nifanele ukuhlambana iinyawo.” (Yohane 13:14; Filipi 2:5-8) Lonke uzuko nendumiso zifanele ziye kuYehova, kungekhona nakuye nawuphi na umntu. (ISityhilelo 4:11) Enoba angabadala okanye akangabo, onke amaKristu afanele azicingele ngokuvisisana nala mazwi kaYesu: “Singabakhonzi abangancedi lutho; ngokuba sanele ukwenza oko besimelwe kukuthi sikwenze.” (Luka 17:10) Nayiphi na enye imbono ichasene nolawulo lobuthixo.
12. Kutheni uthando luluphawu olubalulekileyo lokuba abadala abangamaKristu baluhlakulele?
12 Ndawonye nokuthobeka, abadala abangamaKristu bahlakulela uthando. Umpostile uYohane wabonisa ukubaluleka kothando xa wathi: “Lowo ungenaluthando akazanga amazi uThixo, ngokuba uThixo uluthando.” (1 Yohane 4:8) Abantu abangenaluthando bachasene nolawulo lobuthixo. Abamazi uYehova. Ngokuphathelele uNyana kaThixo, iBhayibhile ithi: “UYesu . . . ebathandile abakhe abasehlabathini, wabathanda kwada kwasekupheleni.” (Yohane 13:1) Ethetha namadoda ali-11 awayeza kuba kwiqumrhu elilawulayo kwibandla lamaKristu, uYesu wathi: “Nguwo lo umthetho wam, wokuba nithandane.” (Yohane 15:12) Uthando luphawu olwahlula ubuKristu bokwenyaniso. Lutsala abantliziyo zaphukileyo, abancwinayo, nabathinjiweyo ngokomoya abalangazelela inkululeko. (Isaya 61:1, 2; Yohane 13:35) Abadala bafanele babe ngumzekelo ekulubonakaliseni.
13. Nangona iingxaki zisenokuba nzima namhlanje, umdala unokuba yimpembelelo yokulungileyo njani kuzo zonke iimeko?
13 Namhlanje, ngokufuthi abadala baye bacelwe ukuba bancede kwiingxaki ezinzima. Iingxaki zomtshato zisenokuba nzulu zize zihlale zikho ixesha elide. Abantu abaselula baneengxaki abantu abakhulu abasenokukufumanisa kunzima ukuziqonda. Ngokufuthi kunzima ukubona ukuphazamiseka kweemvakalelo. Umdala ojamelene nezinto ezinjalo usenokungaqiniseki ngoko amele akwenze. Kodwa unokuqiniseka ukuba ukuba ukholosa ngobulumko bukaYehova ngokuthi athandaze, ukuba uyaphanda eBhayibhileni nakwinkcazelo epapashwe ngumkhonzi othembekileyo noqondayo, yaye ukuba uqhubana ngokuthobeka nangothando nezimvu, uya kuba yimpembelelo yokulungileyo nakweyona meko inzima.
14, 15. Ngawaphi amanye amazwi abonisa ukuba uYehova ubasikelele ngabadala abaninzi abalungileyo abantu bakhe?
14 UYehova uyisikelele ngokutyebileyo intlangano yakhe ‘ngezipho kubantu.’ (Efese 4:8) Ngamaxesha athile, iWatch Tower Society ifumana iileta ezikhuthazayo ezingqinela uthando oluboniswa ngabadala abathobekileyo abazalusa ngothantamiso izimvu zikaThixo. Ngokomzekelo, omnye umdala webandla ubhala oku: “Ndicinga ukuba olu lolona tyelelo lomveleli wesiphaluka luye lwandichaphazela okanye lolona lungalibalekiyo ebandleni. Umveleli wesiphaluka wandinceda ndabona ukubaluleka kokuba nesimo sengqondo esikhuthazayo xa uqhubana nabazalwana, ngokugxininisa ekubancomeni.”
15 Omnye udade ekwakufuneka aye kwisibhedlele esikude ukuze anyangwe ubhala oku: “Hayi indlela okwakukhuthaza ngayo ukudibana nomdala ngobo busuku bokuqala buxhalabisayo kwisibhedlele esikude kangaka nekhaya! Lo mdala kunye nabanye abazalwana bachitha ixesha elininzi kunye nam. Kwanabantu behlabathi ababeyazi imeko endandikuyo babevakalelwa kukuba ndandingenakusinda ngaphandle kokuthuthuzelwa, ukunyanyekelwa, nokuthandazelwa ngabo bazalwana banothando nabazinikeleyo.” Omnye udade ubhala oku: “Namhlanje ndisadla amazimba kuba iqumrhu labadala ngomonde landinceda kumlo wam nokudimazeka okukhulu. . . . Omnye umzalwana nodade babengazi ukuba mabathini na. . . . Kodwa okwandichukumisa kakhulu kukuba nangona babengayazi eyona ngxaki ndandikuyo, bandinyamekela ngothando.”
16. UPetros ubaluleka ngelithini abadala?
16 Ewe, abadala abaninzi basebenzisa esi siluleko sompostile uPetros: “Waluseni umhlambi kaThixo ophakathi kwenu, niwuvelela, kungengakunyanzelwa, makube ngokokuzithandela; kungengenxa yenzuzo embi, makube ngokuthumekelela; kungabi njengabazigagamelayo izahlulo zawo, yibani yimizekelo kumhlambi.” (1 Petros 5:1-3) Hayi indlela abayintsikelelo ngayo abadala abanjalo abaphantsi kolawulo lobuthixo!
Izimvu Kulawulo Lobuthixo
17. Khawukhankanye ezinye zeempawu onke amalungu ebandla afanele azihlakulele.
17 Noko ke, asingobadala kuphela abaphantsi kolawulo lobuthixo. Ukuba abalusi kufuneka bathobele ulawulo lobuthixo, ngoko nezimvu kufuneka zenjenjalo. Ngaziphi iindlela? Kaloku, le migaqo ekhokela abalusi ifanele isebenze nakwizimvu. Onke amaKristu, kungekhona abadala kuphela, amele athobeke ukuba aza kufumana intsikelelo kaYehova. (Yakobi 4:6) Onke amele ahlakulele uthando kuba ngaphandle kwalo uYehova akakholiswa yimibingelelo yethu. (1 Korinte 13:1-3) Yaye sonke, kungekhona abadala kuphela, sifanele ‘sizaliswe kukukwazi kakuhle ukuthanda [kukaYehova] sinokulumka nokuqonda konke okukokomoya.’—Kolose 1:9.
18. (a) Kutheni ulwazi olungendelanga lwenyaniso lunganele? (b) Sinokuzaliswa njani sonke lulwazi oluchanileyo?
18 Abaselula nabakhulileyo ngokufanayo basoloko bejamelene nezigqibo ezinzima njengoko bezama ukuhlala bethembekile phezu kwako nje ukuphila kwihlabathi likaSathana. Iindlela zokunxiba, umculo, imifanekiso eshukumayo, noncwadi lwehlabathi zilucelomngeni kubumoya babathile. Ulwazi olungendelanga lwenyaniso alwanele ukusinceda sihlale silungelelene. Ukuze siqiniseke ukuba siya kuhlala sithembekile, sifanele sizaliswe lulwazi oluchanileyo. Sifanele sibe nokuqonda nobulumko esinokubufumana kuphela eLizwini likaThixo. (IMizekeliso 2:1-5) Oku kuthetha ukuhlakulela imikhwa emihle yokufundisisa, ukucamngca nokusebenzisa oko sikufundayo. (INdumiso 1:1-3; ISityhilelo 1:3) UPawulos wayebhalela onke amaKristu, kungekuphela nje abadala, xa wathi: “Kokwabakhulileyo ke ukudla okuqinileyo, abo bathi, ngenxa yobugcisa, babe nezimvo eziqheliselwe ukucalula okuhle kwanokubi.”—Hebhere 5:14.
Abalusi Basebenza Kunye Nezimvu
19, 20. Babongozwa njani bonke ukuba basebenzisane nabadala, yaye ngasiphi isizathu?
19 Ukuqukumbela, simele sitsho ukuba abo basebenzisana nabadala babonakalisa umoya wokuthobela ulawulo lobuthixo ngokwenene. UPawulos wambhalela oku uTimoti: “Amadoda amakhulu, awongamela kakuhle, makabalelwe ekuthini afanelwe yimbeko ephindwe kabini, ngokukodwa lawo abulalekayo elizwini nasemfundisweni.” (1 Timoti 5:17; 1 Petros 5:5, 6) Ukuba ngumdala kulilungelo elimangalisayo, kodwa abadala abaninzi ngamadoda aneentsapho ekufuneka aye emsebenzini wawo wempangelo yonke imihla nanabafazi nabantwana afanele abanyamekele. Ngoxa bekuvuyela ukukhonza, inkonzo yabo iba lula ize ibe nomvuzo ngakumbi xa ibandla libaxhasa, lingabahlabi amadlala ngokugqithiseleyo okanye lifune izinto ngenkani.—Hebhere 13:17.
20 Umpostile uPawulos wathi: “Bakhumbuleleni abakhokeli benu, abalithethayo kuni ilizwi likaThixo; nisingasinga impumelelo yehambo yabo, nixelise bona elukholweni lwabo.” (Hebhere 13:7) Hayi, uPawulos akazange akhuthaze abazalwana ukuba balandele abadala. (1 Korinte 1:12) Ukulandela umntu asikokuthobela ulawulo lobuthixo. Kodwa ngokuqinisekileyo kububulumko ukuxelisa ukholo olungqinelweyo lomdala ophantsi kolawulo lobuthixo okhutheleyo kumsebenzi wokuhambisa ivangeli, obakho rhoqo kwiintlanganiso, noqhubana ngokuthobeka nangothando nebandla.
Ubungqina Bokholo
21. AmaKristu alubonisa njani ukholo olomeleleyo olufana nolukaMoses?
21 Ngokwenene, ubukho bentlangano elawulwa ngokobuthixo kwelona xesha limaxongo kwimbali yoluntu bubungqina bamandla oMlawuli Wobuthixo Omkhulu. (Isaya 2:2-5) Kwakhona bubungqina bokholo lwamadoda, abafazi, nabantwana abaphantse babe zizigidi ezihlanu, abalwisana neengxaki zobomi bemihla ngemihla kodwa abangalibaliyo ukuba uYehova nguMlawuli wabo. Kanye njengoko uMoses othembekileyo “wakrota, wanga uyambona lowo ungenakubonwa,” amaKristu namhlanje anokholo olunjalo ukomelela. (Hebhere 11:27) Anelungelo lokuphila ngaphantsi kolawulo lobuthixo, yaye imihla ngemihla ayambulela uYehova ngenxa yoko. (INdumiso 100:4, 5) Njengoko ephawula amandla kaYehova asindisayo, ayakuvuyela ukuthi: “Umgwebi wethu nguYehova, ummisi-mthetho wethu nguYehova, ukumkani wethu nguYehova; uya kusisindisa yena.”—Isaya 33:22.
[Umbhalo osemazantsi]
a Phakathi kweempapasho ezinjalo kukho incwadi ethi “Zilumkeleni Nina Nawo Wonke Umhlambi,” equlethe ukhokelo lweZibhalo yaye enikwa abaveleli, okanye abadala bamabandla abamiselweyo.
Ibonisa Ntoni IBhayibhile?
◻ AmaKristu azithoba njani kulawulo lobuthixo?
◻ Ulawulo lobuthixo lulungelelaniswa njani namhlanje?
◻ Abadala bafanele bazilungiselele njani ukuzalisa iimbopheleleko zabo?
◻ Ziziphi iimpawu zamaKristu ekubalulekileyo ukuba abadala bazihlakulele baze bazibonakalise?
◻ Kulawulo lobuthixo, luluphi ulwalamano olufanele lubekho phakathi kwezimvu nabalusi?
[Umfanekiso okwiphepha 16]
UAdam noEva balahlekelwa yiParadisi ngenxa yokuba babefuna ukuzenzela ezabo izigqibo ngokulungileyo nokubi
[Umfanekiso okwiphepha 18]
Ukuba umdala uqhubana ngokuthobeka nangothando nezimvu, uya kusoloko eyimpembelelo yokulungileyo