Umgwebo KaYehova Kubafundisi Bobuxoki
“Kubaprofeti baseYerusalem ndibone into ebanga amanwele: ukukrexeza, nokuhamba ebuxokini . . . Bonke bephela banjengeSodom kum, nabemi bakhona banjengeGomora.”—YEREMIYA 23:14.
1. Kutheni lowo udlulisela imfundiso yobuthixo ethabatha imbopheleleko enzima gqitha?
NABANI na odlulisela imfundiso yobuthixo uthabatha imbopheleleko enzima gqitha. UYakobi 3:1 uyalumkisa: “Musani ukuba ngabafundisi abaninzi, bazalwana bam, nisazi nje ukuba siya kwamkela olona lukhulu ugwebo.” Ewe, abafundisi beLizwi likaThixo banembopheleleko enzulu ngakumbi yokunikela ingxelo eyamkelekileyo kunokuba kunjalo ngamaKristu ngokubanzi. Oku kuya kuthetha ntoni kwabo bazingqina bengabafundisi bobuxoki? Makhe siqwalasele imeko yomhla kaYeremiya. Siya kubona indlela eyakufuzisela ngayo kwangaphambili oku kwenzekayo namhlanje.
2, 3. Nguwuphi umgwebo uYehova awawudlulisela ngoYeremiya ngokubhekisele kubafundisi bobuxoki baseYerusalem?
2 Ngowama-647 B.C.E., unyaka we-13 wokulawula kukaKumkani uYosiya, uYeremiya wathunywa ukuba abe ngumprofeti kaYehova. UYehova wayenesikhalazo ngakuYuda, ngoko wathuma uYeremiya ukuba aye kusivakalisa. Abaprofeti okanye abafundisi bobuxoki baseYerusalem, babesenza ‘izinto ezibanga amanwele’ emehlweni kaThixo. Ububi babo babubukhulu kangangokuba uThixo wayifanisa iYerusalem nelakwaYuda neSodom neGomora. UYeremiya isahluko 23 uyasixelela ngoku. Yer 23 Indinyana 14 ithi:
3 “Kubaprofeti baseYerusalem ndibone into ebanga amanwele: ukukrexeza, nokuhamba ebuxokini, bomeleze izandla zabenzi bobubi, kungabuyi mntu ebubini bakhe. Bonke bephela banjengeSodom kum, nabemi bakhona banjengeGomora.”
4. Umzekelo ombi wokuziphatha wabafundisi baseYerusalem ufana njani noko kuqhubekayo kwiNgqobhoko namhlanje?
4 Ewe, aba baprofeti, okanye abafundisi, babemisela umzekelo ombi gqitha wokuziphatha yaye, ngenxa yoko, babekhuthaza abantu ukuba benze okufanayo. Khawukhangele iimeko kwiNgqobhoko namhlanje! Ngaba azifani nezo zomhla kaYeremiya? Namhlanje abefundisi bavumela abakrexezi namafanasini aqhubeke engabefundisi bade bawavumele aqhube neenkonzo zecawa. Ngaba kuyamangalisa ke ngoko ukuba amalungu amaninzi abhalisiweyo eecawa nawo eziphethe kakubi?
5. Kutheni imeko yokuziphatha kakubi kweNgqobhoko imbi ngakumbi kunaleyo yaseSodom naseGomora?
5 UYehova wafanisa abemi baseYerusalem nabo baseSodom naseGomora. Kodwa imeko yokuziphatha okubi kweNgqobhoko imbi ngakumbi kunaleyo yaseSodom naseGomora. Ewe, ilisikizi ngakumbi emehlweni kaYehova. Abafundisi bayo bayibetha ngoyaba imigaqo yamaKristu yokuziphatha. Yaye oku kukhuthaza imeko-bume eziintloni yemilinganiselo yokuziphatha equka lonke uhlobo lwemigibe echuliweyo yokwenza okubi. Le ndlela yokuziphatha ixhaphake kangangokuba ububi namhlanje bugqalwa njengento eqhelekileyo.
‘Ukuhamba Ebuxokini’
6. Wathini uYeremiya ngobubi babaprofeti baseYerusalem?
6 Phawula oko kuthethwa yindinyana 14 ngabaprofeti baseYerusalem. ‘Babehamba ebuxokini.’ Yaye inxalenye yokugqibela yendinyana 15 ithi: “Kubaprofeti baseYerusalem kuphuma okungendawo, kuye kulo lonke ilizwe.” Yandule Yer 23 indinyana 16 yongezelele: “Utsho uYehova wemikhosi ukuthi, Musani ukuwaphulaphula amazwi abaprofeti abaniprofetelayo; banenzela into engento, bathetha umbono wentliziyo yabo, ongaphumiyo emlonyeni kaYehova.”
7, 8. Kutheni abefundisi beNgqobhoko befana nabaprofeti bobuxoki baseYerusalem, yaye oku kubachaphazele njani abahambi becawa?
7 Njengabaprofeti bobuxoki baseYerusalem, abefundisi beNgqobhoko nabo bahamba ebuxokini, besasaza iimfundiso zabawexuki, iimfundiso ezingekhoyo eLizwini likaThixo. Ziziphi ezinye zezi mfundiso zobuxoki? Kukungafi komphefumlo, uBathathu Emnye, intlambululo-miphefumlo nesihogo somlilo sokuthuthumbisa abantu ngonaphakade. Kwakhona babonwaya iindlebe abo babaphulaphulayo ngokushumayela oko abantu bafuna ukukuva. Babhibhidla amazinyo besithi iNgqobhoko ayijamelananga nentlekele ngokuba iseluxolweni noThixo. Kodwa abefundisi bathetha “umbono wentliziyo yabo.” Bubuxoki obo. Abo bakholelwa kubuxoki obunjalo basezwa ityhefu ngokomoya. Bayakhohliswa ukuze batshatyalaliswe!
8 Khawuqwalasele oko kuthethwa nguYehova ngaba bafundisi bobuxoki kwindinyana 21: “Andibathumanga abaprofeti abo, kugidime bona; andithethanga kubo, kanti kuprofete bona.” Ngoko namhlanje, abefundisi abathunywanga nguThixo, bengafundisi neenyaniso zakhe. Oku kube nawuphi umphumo? Abahambi becawa abayazi ngokothusayo iBhayibhile ngenxa yokuba abefundisi babo babondla ngeentanda-bulumko zehlabathi.
9, 10. (a) Babenamaphupha aluhlobo luni abafundisi bobuxoki baseYerusalem? (b) Abefundisi beNgqobhoko baye bafundisa “amaphupha abuxoki” ngokufanayo njani?
9 Ukongezelela, abefundisi namhlanje babhengeza amathemba obuxoki. Phawula Yer 23 indinyana 25: “Ndikuvile abakuthethayo abaprofeti, abaprofeta ubuxoki egameni lam, besithi, Ndiphuphile, ndiphuphile.” Anjani loo maphupha abo? Yer 23 Indinyana 32 iyasixelela: “Yabonani, ndichasene nabaprofeti abaprofeta amaphupha abuxoki, utsho uYehova, bawalawule, babalahlekise abantu bam ngobuxoki babo, nangokugasa kwabo, endingabawiselanga mthetho, abangabancediyo nokubanceda aba bantu: utsho uYehova.”
10 Ngawaphi amaphupha, okanye amathemba obuxoki, abefundisi abaye bawafundisa? Kaloku, ngalawo okuba ekuphela kwethemba loluntu loxolo nonqabiseko namhlanje ziZizwe Ezimanyeneyo. Kwiminyaka yakutshanje baye bathi iZizwe Ezimanyeneyo ‘lithemba lokugqibela lemvisiswano noxolo,’ “uthunywashe ophambili woxolo nokusesikweni,” “elona themba liphambili loxolo lwehlabathi.” Enjani yona inkohliso! Ekuphela kwethemba loluntu buBukumkani bukaThixo. Kodwa abefundisi abashumayeli baze bafundise inyaniso ngaloo rhulumente wasezulwini, owawungumxholo ophambili awayeshumayela ngawo uYesu.
11. (a) Abafundisi bobuxoki baseYerusalem baba nayiphi impembelelo embi kwigama likaThixo? (b) Ngokwahlukileyo kudidi lukaYeremiya, abafundisi bonqulo lobuxoki namhlanje benze ntoni ngegama likaThixo?
11 Yer 23 Indinyana 27 isixelela okungakumbi. “Bacinga ngokubalibazisa na abantu bam, balilibale igama lam ngamaphupha abo, abawalawulayo elowo kummelwane wakhe, njengoko ooyise balilibalayo igama lam ngoBhahali?” Abaprofeti bobuxoki baseYerusalem babangela ukuba abantu balilibale igama likaThixo. Ngaba abafundisi bonqulo lobuxoki namhlanje abenzanga okufanayo? Benze okubi ngakumbi, bayalifihla igama likaThixo, uYehova. Bafundisa ukuba akuyomfuneko ukulisebenzisa, ibe bayalisusa kwiinguqulelo zabo zeBhayibhile. Bamchasa ngamandla nabani na ofundisa abantu ukuba igama likaThixo nguYehova. Kodwa udidi lukaYeremiya, intsalela yamaKristu athanjiswe ngomoya, kunye namaqabane alo, lwenze kanye njengokuba uYesu wenzayo. Lufundise izigidi ngegama likaThixo.—Yohane 17:6.
Ukubhenca Ukubekek’ Ityala Kwabo
12. (a) Kutheni abafundisi bonqulo lobuxoki benetyala legazi elikhulu? (b) Abefundisi babe nayiphi indima kwiimfazwe ezimbini zehlabathi?
12 Udidi lukaYeremiya luye ngokuphindaphindiweyo lwababhenca abefundisi njengabafundisi bobuxoki abakhokelela imihlambi yabo kwindlela ebanzi esa entshabalalweni. Ewe, intsalela iye yasicacisa isizathu sokuba abo baphuphi bafanelwe ngumgwebo oqatha kaYehova. Ngokomzekelo, ngokufuthi abakhonzi bakaYehova baye babhekisela kwiSityhilelo 18:24, esithi kwiBhabhiloni Enkulu kuye kwafunyanwa igazi labo “bonke abasikiweyo emhlabeni.” Cinga ngazo zonke iimfazwe eziye zaliwa ngenxa yokungavisisani ngokonqulo. Hayi ukuba likhulu kwalo ityala legazi labafundisi bobuxoki bonqulo! Iimfundiso zabo ziye zabangela iiyantlukwano zaza zayandisa intiyo kwabo beenkolo nezizwe ezahlukahlukeneyo. Ngokuphathelele iMfazwe Yehlabathi I, incwadi ethi Preachers Present Arms ithi: “Iiclerc [abefundisi] zenza le mfazwe yaba yenentsingiselo enamandla ngokomoya zaza zayiphembelela. . . . Ngaloo ndlela icawa yaba ngumtya nethunga nemfazwe.” Kwakunjalo nangeMfazwe Yehlabathi II. Abefundisi bawaxhasa ngokupheleleyo amazwe alwayo baza bayisikelela imikhosi yawo. Kuye kwaqalisa iimfazwe zehlabathi ezimbini kwiNgqobhoko apho amalungu onqulo olunye aye abulalana. Iingxwabangxwaba zasekuhlaleni nezonqulo kwiNgqobhoko zisaqhubeka zibangela ukuphalala kwegazi elininzi kude kube namhlanje. Hayi indlela ombi ngayo umphumo obangelwa ziimfundiso zabo zobuxoki!
13. UYeremiya 23:22 ubonisa njani ukuba abefundisi beNgqobhoko abanalwalamano noYehova?
13 Nceda uphawule uYeremiya isahluko 23, indinyana 22: “Ukuba bebemi elucweyweni lwam, bange bevakalise amazwi am kubantu bam, bababuyisa endleleni yabo embi, nasebubini beentlondi zabo.” Ukuba abaprofeti bonqulo beNgqobhoko bebemi elucweyweni lukaYehova, kulwalamano olusenyongweni naye njengomkhonzi othembekileyo noqondayo, nabo ngebephila ngemigaqo kaThixo. Nabo ngebevakalisa amazwi kaThixo kubantu beNgqobhoko. Kunoko, abafundisi bobuxoki banamhlanje baye benza abalandeli babo baphuphutheka emva koTshaba lukaThixo, uSathana uMtyholi.
14. Babhencwa ngamandla njani abefundisi beNgqobhoko ngowe-1958?
14 Udidi lukaYeremiya luye lwababhenca ngamandla abefundisi. Ngokomzekelo, kwiNdibano Yezizwe Ngezizwe YamaNgqina KaYehova Yokuthanda KukaThixo eyayingowe-1958 kwisiXeko saseNew York, usekela-mongameli weWatch Tower Society wavakalisa amazwi awayesithi ngokuyinxenye: “Ngaphandle kokugwegweleza okanye ukuthandabuza sithi unobangela walo lonke olu lwaphulo-mthetho, ukuqaqadeka, intiyo, ingcinezelo, ikhethe, . . . nalo mbhodamo lunqulo oluphosakeleyo, unqulo lobuxoki; oluphenjelelwa lutshaba lomntu olungabonakaliyo, uSathana uMtyholi. Abona bantu babekek’ ityala ngemeko yehlabathi ngabafundisi neenkokeli zonqulo; yaye abona babekek’ ityala kwaba ngabefundisi beNgqobhoko. . . . Emva kwayo yonke le minyaka ukususela ngeMfazwe Yehlabathi I, imeko yeNgqobhoko phambi koThixo ifana naleyo yoSirayeli womhla kaYeremiya. Ewe, iNgqobhoko ijamelene nentshabalalo eyoyikeka nebhubhisa ngaphezu kwaleyo uYeremiya awayibona isenzeka kwiYerusalem.”
Ukugwetywa Kwabafundisi Bobuxoki
15. Ziziphi iziprofeto zoxolo abaye bazenza abefundisi? Ngaba ziya kuzaliseka?
15 Phezu kwaso nje esi silumkiso, baye basabela njani abefundisi ukususela ngoko? Kunjengokuba Yer 23 indinyana 17 isitsho: “Bamana ukuthi kwabandigibayo, UYehova uthethile, niya kuba noxolo; nakubo bonke abahambayo ngobungqola beentliziyo zabo bathi, Aniyi kuhlelwa bubi.” Ngaba oku kuyinyaniso? Akunjalo! UYehova uya kububhenca ubuxoki bezi ziprofeto zabefundisi. Akayi kukuzalisekisa oko bakuthethayo egameni lakhe. Noko ke, isiqinisekiso sobuxoki sabefundisi sokuba baseluxolweni noThixo siyinkohliso egqithiseleyo!
16. (a) Injani imeko-bume yokuziphatha yeli hlabathi, yaye ngoobani ababekek’ ityala ngayo? (b) Udidi lukaYeremiya lwenza ntoni ngeembono zokuziphatha kakubi zeli hlabathi?
16 Mhlawumbi engqondweni yakho uthi, ‘Intoni, mna ndikhohliswe ziimfundiso zobuxoki zabefundisi? Unotshe!’ Noko ke, ungaqiniseki kangako! Khumbula ukuba iimfundiso zobuxoki zabefundisi ngokuchuliweyo, ziye zakhuthaza imeko-bume yokuziphatha kakubi ngokugqithiseleyo. Kwiimfundiso zabo zikavula-zibhuqe phantse yonke into yamkelekile, kungakhathaliseki indlela engcole ngayo. Yaye le meko-bume iwohlokileyo yokuziphatha okubi ichaphazela ngamandla zonke iintlobo zokuzonwabisa, imifanekiso eshukumayo, umabonwakude, amaphephancwadi nomculo. Ngoko, simele silumke gqitha, hleze siwele ngaphantsi kwempembelelo yale meko-bume iwohlokileyo nenomtsalane yokuziphatha okubi. Abaselula basenokubanjiswa ziivideo nangumculo othob’ isidima. Khumbula ukuba esi simo sengqondo sikavula-zibhuqe abantu abanaso namhlanje singumphumo ongqalileyo weemfundiso zobuxoki zabefundisi nokusilela kwabo ukuphakamisa imilinganiselo kaThixo yobulungisa. Udidi lukaYeremiya luyazilwa ezi mbono zokuziphatha okubi yaye lunceda abakhonzi bakaYehova babugatye obu bubi bugubungela iNgqobhoko.
17. (a) Ngokutsho kukaYeremiya, nguwuphi umgwebo owawuza kufikela iYerusalem engendawo? (b) Yintoni eza kwenzeka kungekudala kwiNgqobhoko?
17 UYehova, uMgwebi omkhulu, uza kubagweba njani abafundisi bobuxoki beNgqobhoko? Yer 23 Indinyana 19, 20, 39, neyama-40 ziyaphendula: “Yabonani, umoya ovuthuzayo kaYehova, uphume ubushushu, umoya ovuthuzayo osisaqhwithi, uya kuqhwithela entlokweni yabangendawo. Awuyi kubuya umsindo kaYehova, ade awenze, ade ayimise iminkqangiyelo yentliziyo yakhe; . . . Ndiya kunilibala mpela, ndinilahle ebusweni bam nina, nalo mzi ndaninikayo, nina nooyihlo; ndibeke phezu kwenu isingcikivo esingunaphakade, ihlazo elingunaphakade, elingenakulityalwa.” Konke oko kwenzeka kwiYerusalem engendawo nakwitempile yayo, yaye ngoku kungekudala kuza kwenzeka intlekele efanayo nakwiNgqobhoko engendawo!
Ukuvakalisa “Umthwalo KaYehova”
18, 19. Nguwuphi “umthwalo kaYehova” uYeremiya awawuvakalisa kwaYuda, yaye uthetha ntoni?
18 Ngoko, yiyiphi imbopheleleko olunayo udidi lukaYeremiya nezinxulumani zalo? Yer 23 Indinyana 33 (NW) iyasixelela: “Naxa bathe bakubuza aba bantu okanye umprofeti okanye umbingeleli, besithi, ‘Uyintoni na umthwalo kaYehova?’ umele uthi kubo, ‘“Ningumthwalo ngokwenene! Yaye ngokuqinisekileyo ndonilahla,” utsho uYehova.’”
19 Igama lesiHebhere elithetha “umthwalo” lineentsingiselo ezimbini. Lisenokuthetha umgwebo kaThixo oqatha okanye into ethile eqoba uthile ize imbangele adinwe. Apha ibinzana elithi “umthwalo kaYehova” lithetha isiprofeto esinamandla—isigidimi sokuba iYerusalem yayigwetyelwe intshabalalo. Ngaba abantu babekuthanda ukuva amazwi aqatha ngolo hlobo esiprofeto uYeremiya awayewaphindaphinda evela kuYehova? Akunjalo, abantu bamgculela uYeremiya besithi, ‘Sisiphi isiprofeto (umthwalo) onaso ngoku? Siqinisekile ukuba isiprofeto sakho siza kuphinda sibe ngomnye umthwalo oyindinisa!’ Kodwa wabaxelela ntoni uYehova? Wabaxelela oku: “Ningumthwalo ngokwenene! Yaye ngokuqinisekileyo ndonilahla.” Ewe, aba bantu babengumthwalo kuYehova, yaye wayeza kubashenxisa ukuze bangaphinde babe ngumthwalo kuye.
20. Uyintoni “umthwalo kaYehova” namhlanje?
20 Uyintoni “umthwalo kaYehova” namhlanje? Sisigidimi sesiprofeto esinamandla esivela kwiLizwi likaThixo. Sizaliswe ngumgwebo, sivakalisa intshabalalo esondeleyo yeNgqobhoko. Thina njengabantu bakaYehova, sinembopheleleko enzulu yokuvakalisa lo “mthwalo kaYehova.” Njengoko isiphelo sisondela, sifanele sixelele bonke abantu beNgqobhoko abatenxileyo ukuba ‘bangumthwalo,’ ewe ‘bangumthwalo ngokwenene’ kuYehova uThixo, yaye kungekudala uza kuwuthi xibilili lo “mthwalo” ngokuyishiya iNgqobhoko ukuze yehlelwe yintlekele.
21. (a) Yatshatyalaliselwa ntoni iYerusalem ngowama-607 B.C.E.? (b) Emva kokutshatyalaliswa kweYerusalem, kwenzeka ntoni kubaprofeti bobuxoki nakumprofeti kaYehova wokwenyaniso, nto leyo esiqinisekisa ngantoni namhlanje?
21 Ngomhla kaYeremiya umgwebo kaYehova waphunyezwa xa amaBhabhiloni atshabalalisa iYerusalem ngowama-607 B.C.E. Njengoko kwakuprofetiwe, oko ‘kwakulihlazo yaye kuthob’ isidima’ kuloo maSirayeli ayeqaqadekile nawayengathembekanga. (Yeremiya 23:39, 40) Kwawabonisa ukuba uYehova, awayebonakalise ukungamhloneli izihlandlo ezininzi, ekugqibeleni wayewalahlile ukuze avune imiphumo yobubi bawo. Abaprofeti babo bobuxoki ababezikhukhumalisile bavalwa imilomo ekugqibeleni. Kodwa uYeremiya waqhubeka eprofeta. UYehova akazange amlahle. Ngokuvisisana noku, uYehova akasayi kululahla udidi lukaYeremiya xa isigqibo sakhe esiqatha sikhokelela ekutyunyuzweni kwabefundisi beNgqobhoko nabo babukholelwayo ubuxoki babo.
22. Imigwebo kaYehova iya kuyenza ibe kweyiphi imeko iNgqobhoko?
22 Ewe, ukuba senkangala nokungamiwa kweYerusalem emva kowama-607 B.C.E. yimeko oluya kuba kuyo kanye unqulo lweNgqobhoko emva kokuba luhluthwe ubutyebi balo lwaza lwabhencwa ngokulihlazo. Lo ngumgwebo ofanelekileyo uYehova aye wawuwisa phezu kwabafundisi bobuxoki. Loo mgwebo awuyi kusilela. Kanye njengokuba zonke izigidimi zikaYeremiya ezingamazwi esilumkiso esiphefumlelweyo zazalisekayo kwixesha eladlulayo, ziya kuzaliseka nanamhlanje. Ngoko kwanga singafana noYeremiya. Masisivakalise ngokungenaloyiko isiprofeto esingumthwalo kaYehova ebantwini, ukuze basazi isizathu sokuba bonke abafundisi bonqulo lobuxoki beza kufikelwa ngumgwebo wakhe oqatha wobulungisa!
Imibuzo Yempinda
◻ Yayimbi kangakanani iYerusalem yamandulo ngokwembono kaYehova?
◻ INgqobhoko ‘ihambe ebuxokini’ ngaziphi iindlela?
◻ Ukubekek’ ityala kwabefundisi banamhlanje kuye kwabhencwa njani?
◻ Nguwuphi “umthwalo kaYehova” ovakaliswayo ngoku?
[Umfanekiso okwiphepha 8]
Abaprofeti baseYerusalem benza ‘izinto ezibanga amanwele’
[Umfanekiso okwiphepha 9]
“Bathetha umbono wentliziyo yabo”
[Umfanekiso okwiphepha 10]
IYerusalem etshatyalalisiweyo ibonisa oko kuya kuba sisiphelo seNgqobhoko