Ngaba Wenza Ukuthanda KukaThixo?

KUBULUNGISELELI bawo bendlu ngendlu, amaNgqina kaYehova amabini adibana nomfundisi weCawa yase-Episcopal. Wayebonakala eyindoda enobuhlobo, enentshebe, emalunga neminyaka engama-60 ubudala, enxibe isikipa esibhalwe igama lecawa yakhe. Ngaphandle kwekhefu, wathi: “Akwaba amalungu ecawa yethu ebenenzondelelo njengani ekusasazeni iLizwi, kodwa ndiza kunicela ukuba ningaphindi nityelele apha ekhayeni lam.”

Ewe, baninzi abantu abawuthandayo umsebenzi wamaNgqina kaYehova nabawancomayo ngenzondelelo nehlombe analo. Kodwa abanamdla kwaphela koko amaNgqina akwenzayo, yaye bengazimiselanga nokuwenza bona lo msebenzi. Noko ke, le meko ibonakala iziphikisa ayintsha. UYesu wayiphawula ngomhla wakhe, yaye wayibethelela le ngongoma ngomzekeliso ohlokoz’ ingcinga.

“Nithini na ke nina? Umntu wayenabantwana ababini; weza kowokuqala wathi, Mntwana wam, yiya kusebenza namhla esidiliyeni sam. Waphendula ke yena wathi, Andiyi; ke wabuya wazohlwaya, waya. Weza nakowesibini, wathetha kwangokunjalo. Waphendula ke yena wathi, Ndiyaya, nkosi; akaya. Nguwuphi na kwabo bobabini owenza ukuthanda kukayise?”—Mateyu 21:28-31.

Impendulo izicacele. Njengesihlwele esasiphulaphule uYesu, sinokuphendula sithi, “Ngowokuqala.” Kodwa xa siwujonga nzulu lo mbandela, ngalo mzekeliso, uYesu wayetsalela ingqalelo yethu kwelokuba ukwenza oko uyise wayekufuna kwakukokona kubalulekileyo. Nangona unyana wokuqala wathi akafuni kuya, waya waza wanconywa ngenxa yoko. Ukwenza uhlobo olulungileyo lomsebenzi nako kukwabaluleke ngokufanayo. Unyana wokuqala wakwenza oku ngokusebenza esidiliyeni sikayise; akazange aphume aye kusebenza kwesakhe isidiliya.

Oku kunayiphi intsingiselo kuthi? UThixo ulindele ntoni kubanquli bakhe namhlanje? Yintoni esinokuyifunda kubomi bukaYesu eya kusinceda senze ukuthanda kukaYise? Le mibuzo ibalulekile, yaye ukufumana iimpendulo ezichanileyo kuyo kuya kuthetha ukuba siya kufumana intlalo-ntle ngonaphakade, ngenxa yokuba “owenza ukuthanda kukaThixo uhleli ngonaphakade.”—1 Yohane 2:17; Efese 5:17.

Kuyintoni “Ukuthanda KukaThixo”?

Isibizo esithi “ukuthanda” sivela izihlandlo ezingama-80 kwiComprehensive Concordance of the New World Translation of the Holy Scriptures. Izihlandlo ezimalunga nama-60 kwezi (okanye izihlandlo ezimalunga nama-75 ekhulwini) sisetyenziswa xa kuthethwa ngokuthanda kukaThixo. Amabinzana afana nelithi “ukuthanda kukaThixo,” nelithi “ukuthanda kukaBawo” avela ngaphezu kwezihlandlo ezingama-20. Ngokusuka koku sinokubona ukuba ukuthanda kukaThixo kufanele kube yeyona nto ibalulekileyo kuthi. Ukwenza ukuthanda kukaThixo kufanele kube yeyona nto siyixhalabeleyo ebomini bethu.

Isibizo sesiNgesi esithi “ukuthanda” sithetha ‘ukulangazelela, ukunqwenela, ukuzimisela, into ethile elangazelelwayo, ngokukodwa leyo ikhethwa okanye azimisele kuyo uthile onegunya okanye amandla.’ Ngoko ke, uYehova, iGunya eliPhakamileyo, unokuthile akuthandayo, akulangazelelayo okanye azimisele kuko. Kuyintoni? IZibhalo zisixelela ukuba ngokuyinxenye “ukuthanda [kukaThixo] kukuba bonke abantu basindiswe baze bafikelele kulwazi oluchanileyo lwenyaniso.” (1 Timoti 2:4, NW) UYesu Kristu namaKristu okuqala basebenza ngomphefumlo uphela ukuze banikele olu lwazi luchanileyo kwabanye.—Mateyu 9:35; IZenzo 5:42; Filipi 2:19, 22.

Ngoobani abenza ukuthanda kukaThixo namhlanje? Phakathi kwabantu abaphantse babe ngamawaka amabini ezigidi abathi bangabalandeli bakaYesu Kristu, bangaphi abafana nonyana wokuqala kumzekeliso kaYesu, owaphumayo waya kwenza ukuthanda kukayise? Impendulo akunzima ukuyifumana. Abo balandela ngokunyanisekileyo emanyathelweni kaYesu Kristu bamele benze umsebenzi awayethe baya kuwenza: “Kumele ukuthi ke ukuqala kuvakaliswe iindaba ezilungileyo ezi kuzo zonke iintlanga.” (Marko 13:10) AmaNgqina kaYehova, angaphezu kwezigidi ezine ezinesiqingatha emhlabeni wonke, ashumayela iindaba ezilungileyo zoBukumkani bukaThixo aze afundise abanye ngenkuthalo, ebalathisela kuBukumkani njengobukuphela kwethemba loluntu loxolo nonqabiseko. Ngaba unesabelo ngokupheleleyo ekwenzeni oku kuthanda kukaThixo? Ngaba ushumayela iindaba ezilungileyo zoBukumkani njengokuba uYesu wenzayo?—IZenzo 10:42; Hebhere 10:7.

Ukuvuyiswa Kukwenza Ukuthanda KukaThixo

Ngoxa kuvuyisa ukufunda ukuba kuyintoni na ukuthanda kukaBawo, kuvuyisa ngakumbi ukufundisa abanye ukuthanda kukaThixo. UYesu wayevuyiswa kukufundisa abantu ngoYise. Kwakufana nokudla kuye. (Yohane 4:34) Nathi siya kunandipha ulonwabo lokwenyaniso ukuba senza njengokuba uYesu wenzayo, oko kukuthi, sishumayele size sifundise izinto awazifundisayo, izinto awayezifumene kuYise. (Mateyu 28:19, 20) Njengokuba uYesu wathembisayo, “ukuba niyazazi ezi zinto, ninoyolo ukuba nithi nizenze.”—Yohane 13:17.

Ngokomzekelo: Umama obesandul’ ukubuyela kubulungiseleli bobuvulindlela bexesha elizeleyo uthe: “Kuyachulumancisa ukubona ubuso balowo ufundisisa naye iBhayibhile butyhileka njengokuba iinyaniso zeBhayibhile ezahlukahlukeneyo zichukumisa intliziyo yakhe! Kundivuyisa ngokwenene ukubona umntu endimfundelayo ebhala sonke isibhalo ngaphambi kwesifundo aze abhale amanqaku ebudeni besifundo ukuze aphendule nayiphi na imibuzo yempinda kamva.” Esinye sezifundo zakhe zeBhayibhile sasikhe sadibana nenyaniso xa sasikwishumi elivisayo. Ngoku sakuba sitshatile yaye sixhalatyiswe ziingxaki ezithile zobuqu, sasinqwenela ukufumana amaNgqina. Hayi indlela esavuya ngayo xa lo dade unguvulindlela wasifumanayo! Eli bhinqa liselula lachwayita gqitha sakuqaliswa kwakhona isifundo salo seBhayibhile.

Ukulondoloza Uvuyo Lokwenza Ukuthanda KukaThixo

UKumkani uDavide wakwaSirayeli mandulo ngomnye owayefuna ukwenza ukuthanda kukaThixo kubo bonke ubomi bakhe. Phezu kwazo nje iinzima neengcinezelo ezininzi ezazimfikela, waphefumlelwa ukuba athi: “Ukwenza okulikholo kuwe [ukuthanda kwakho, NW], Thixo wam, ndikunanzile; nomyalelo wakho usezibilinini zam ngaphakathi.” (INdumiso 40:8) Ukwenza ukuthanda kukaYehova kwakusemphefumlweni kaDavide, kwakukuye ngaphakathi. Oko kwakuyimfihlelo yovuyo lwakhe olungapheliyo ekukhonzeni uYehova. Ukwenza ukuthanda kukaThixo kwakungebobunzima kuDavide. Kunoko, kwakumvuyisa, kwakusuka entliziyweni yakhe. Kubo bonke ubomi bakhe, wayezabalazela ukwenza okusemandleni akhe ukukhonza uThixo wakhe, uYehova, nangona maxa wambi wayesona yaye eneentsilelo.

Ngamathub’ athile, uvuyo lwethu lusenokuhla. Sisenokudinwa okanye sityhafe. Mhlawumbi sinomvandedwa, isazela sethu sisikhathaza ngesenzo esiphosakeleyo esithile esasenza kudala. Ngokufuthi, iimvakalelo ezinjalo sinokuzoyisa ngofundisiso olunzulu lweLizwi likaThixo. Sinokuzimisela ukubhala umthetho kaThixo “ezibilinini” zethu, njengokuba wenzayo uDavide. Ukuba sizama ukwenza ukuthanda kukaThixo ngomphefumlo uphela, oko kukuthi, kangangoko sinako, uya kusivuza ngokufanelekileyo ngenxa yokuba uthembekile.—Efese 6:6; Hebhere 6:10-12; 1 Petros 4:19.

Okubangel’ umdla kukuba kumaHebhere 10:5-7, umpostile uPawulos wacaphula amazwi kaDavide akwiNdumiso 40:6-8 waza wawasebenzisa kuYesu Kristu. Ngokwenjenjalo, uPawulos wayebonisa indlela uYesu awayesondele ngayo kuYise. Igama lesiHebhere eliguqulelwe ngokuthi “ukuthanda” linengcamango ‘yokuyoliswa, ukunqwenela, inkoliseko, okanye okuvuyisayo.’ Ngoko ke, INdumiso 40:8 (NW) isenokufundeka ngolu hlobo ngokuphathelele uKristu: “Ukwenza okukuvuyisayo, Thixo wam, kuyandiyolisa.”a UYesu wayefuna ukwenza oko kuvuyisa uYise. UYesu wayedlulela ngaphaya kokwenza oko wayekuthunyiwe. Wayesenza oko kwakuthandwa nguYise, ibe wayekunandipha ukukwenza.

Bonke ubomi bukaYesu babusekelwe ekufundiseni abanye oko kukuko ukuthanda kukaThixo noko bamele bakwenze ukuze bazuze intsikelelo kaThixo. Wayengumshumayeli wexesha elizeleyo nomfundisi yaye wayevuyiswa kunene kukwenza loo msebenzi. Ngoko ke ngokucacileyo okukhona sisenza umsebenzi kaYehova, kokukhona siya kufumana uvuyo olungakumbi. Ngaba nawe unokukhonza ixesha elizeleyo kumsebenzi wokushumayela ukuze uvuyo lwakho luphuphume?

Okunye okuluncedo ekulondolozeni uvuyo ekwenzeni ukuthanda kukaThixo kukuhlala sikhangele kwikamva. Oko koko uYesu wakwenzayo. “Ngenxa yovuyo olwalubekwe phambi kwakhe, wawunyamezela [“umthi wentuthumbo,” NW], elidelile ihlazo.” Kuye, olo vuyo yayikukuzingqina ethembekile kuThixo ukusa ekupheleni aze ke azuze umvuzo wokuba ngukumkani ngakwesokunene sikaYise.—Hebhere 12:2.

Khawuluthelekelele nje uvuyo abaya kulufumana kwixesha elizayo abo baqhubekayo besenza ukuthanda kukaThixo. Baya kukubona ukutshatyalaliswa kwabo bathe gqolo besenza ukuthanda kwabo kokuzingca kwanaxa oku kubangela ukubandezeleka kwabo bazabalazela ukwenza ukuthanda kukaThixo. (2 Tesalonika 1:7, 8) Khawucinge ngovuyo lwabathandekayo abavusiweyo lokuzuza ithuba lokufunda nokwenza ukuthanda kukaThixo. Okanye khawucinge ngenjongo kaThixo yokubuyisela lo mhlaba ekubeni yiParadisi. Yaye ekugqibeleni, khawuthelekelele inkululeko eya kuba ngumphumo wokutshatyalaliswa ngokupheleleyo kukaSathana, umchasi wokuthanda kukaYehova.

Ewe, ukwenza ukuthanda kukaThixo namhlanje kunokuzisa uvuyo olukhulu ngoku nolonwabo olungapheliyo kwikamva. Kungakhathaliseki ukuba injani na intsabelo esiyifumanayo kumsebenzi wokushumayela, masixelise umzekelo kaYesu ekuvuyisweni kukwenza ukuthanda kukaYise.

[Umbhalo osemazantsi]