UYehova—UThixo Wenjongo
“Inyaniso, njengoko ndicinge ngako, koba njalo; njengoko [“ndigqibe,” NW] ngako, koma ngolo hlobo.”—ISAYA 14:24.
1, 2. Bathini abaninzi ngenjongo yobomi?
KUZO zonke iindawo abantu bayabuza: “Iyintoni injongo yobomi?” Inkokeli yezobupolitika yelinye ilizwe laseNtshona yathi: “Abantu abaninzi kunanini na ngaphambili bayabuza, ‘Singoobani na? Iyintoni injongo yethu?’” Xa elinye iphephandaba labuza abantu abaselula ngokuba iyintoni na injongo yobomi, abaninzi babephendula ngolu hlobo: “Kukwenza konke okunqwenelwa yintliziyo yakho.” “Kukunandipha lonke ixesha onalo kangangoko.” “Kukuphila ubomi obonwabisa kangangoko.” “Kukuba nabantwana, wonwabe uze ufe.” Abaninzi babevakalelwa kukuba obu bomi kuphela kwabo. Akukho namnye owathetha ngenjongo yexesha elide yobomi emhlabeni.
2 Omnye umphengululi ongumConfucius wathi: “Eyona njongo yobomi ifumaneka kubomi obuqhelekileyo bobuntu esibuphilayo.” Ngokutsho kwale mbono, abantu baya kuqhubeka bezalwa, batsale nzima iminyaka engama-70 okanye engama-80, bandule ke bafe baze bathi shwaka ngonaphakade. Esinye isazinzulu ngendaleko sathi: “Sisenokuba sifuna impendulo ‘ephakamileyo’—kodwa ayikho.” Kwaba bantu bakholelwa kwindaleko, ubomi bungumzabalazo wokuphumelela kwesona sinamandla, ophelela ekufeni. Iimbono ezinjalo aziniki themba ngobomi.
3, 4. Iimeko ezikhoyo ehlabathini ziyichaphazela njani indlela abaninzi ababujonga ngayo ubomi?
3 Abaninzi bayathandabuza ukuba ubomi bunayo injongo xa bebona ubomi babantu buzaliswe ziinkxwaleko ezininzi kangaka. Kweli xesha lethu, laxa umntu kusithiwa ufeze okona kona kwezorhwebo nakwezenzululwazi, abantu abamalunga newaka lezigidi ehlabathini lonke bagula ngokungaginyisi mathe okanye abondlekanga. Nyaka ngamnye izigidi zabantwana ziyafa ngenxa yoonobangela abanjalo. Ukongezelela, kule nkulungwane yama-20 abantu abaye bafa ngenxa yeemfazwe baphindeke kane kubantu abafa kumakhulu amane eminyaka angaphambilana bedibene. Ulwaphulo-mthetho, ugonyamelo, ukusetyenziswa kakubi kweziyobisi, ukuqhekeka kweentsapho, uGawulayo nezinye izifo ezidluliselwa ngesini—uludwe lwezinto ezingathandekiyo luyanda. Iinkokeli zehlabathi azinazicombululo kwezi ngxaki.
4 Ngenxa yezi meko, omnye umntu wavakalisa oko abaninzi bakukholelwayo: “Ubomi abunanjongo. Ukuba kwenzeka zonke ezi zinto zimbi, makube ke ubomi abubalulekanga.” Enye indoda esele ikhulile yathi: “Bendizibuza isizathu sokuba ndibe lapha phantse bonke ubomi bam. Ukuba ikho injongo, andisenaxesha layo.” Ngoko ngenxa yokuba abantu abaninzi bengasazi isizathu sokuba uThixo avumele ukubandezeleka, iimeko ezinxunguphalisayo zehlabathi zibabangela bangabi nathemba lokwenyaniso ngekamva.
5. Kutheni iinkonzo zeli hlabathi zisongezelela ekudidekeni okukhoyo ngenjongo yobomi?
5 Kwaneenkokeli zonqulo zahlulelene, yaye aziqinisekanga, ngenjongo yobomi. Owayesakuba yintloko yabefundisi eSt. Paul’s Cathedral eLondon wathi: “Ubomi bam bonke bendizabalazela ukufumana injongo yokuphila. . . . Andiphumelelanga.” Liyinyaniso elokuba, abefundisi abaninzi bafundisa ukuba xa abantu besifa abalungileyo baya ezulwini baze ababi baye esihogweni somlilo ngonaphakade. Kodwa ngokwale mbono apha emhlabeni abantu basaya kuqhubeka bephila ubomi obubuhlungu. Yaye ukuba injongo kaThixo yayikukuba abantu baphile ezulwini, kutheni engazange abadale babe zizidalwa zasezulwini zisuka nje, njengokuba wenzayo kwizithunywa zezulu, yaye ngaloo ndlela abasindise abantu kuko konke oku kubandezeleka? Ngoko ukudideka ngenjongo yobomi emhlabeni okanye ukungavumi ukukholelwa ukuba bunayo injongo kuyinto eqhelekileyo.
UThixo Wenjongo
6, 7. IBhayibhile isixelela ntoni ngoMongami Wendalo Iphela?
6 Ukanti, eyona ncwadi isasazwe ngokubanzi embalini, iBhayibhile eNgcwele, isixelela ukuba uYehova, uMongami wendalo iphela, nguThixo wenjongo. Isibonisa ukuba unenjongo yexesha elide, enyanisweni, engunaphakade, ngoluntu emhlabeni. Yaye xa uYehova enenjongo ethile, iya kuzaliseka ngokuqinisekileyo. Kanye njengokuba imvula ibangela ukuba imbewu intshule, uthi uThixo, “liya kuba njalo ilizwi lam eliphuma emlonyeni wam; aliyi kubuyela kum lilambatha, lingakwenzanga endikuthandayo, lingakuphumelelisanga oko ndilithumela kuko.” (Isaya 55:10, 11) Konke athe uYehova uya kukufeza “koma ngolo hlobo.”—Isaya 14:24.
7 Thina bantu sinokuba nentembelo ngokupheleleyo yokuba uSomandla uya kuwagcina amadinga akhe, kuba uThixo ‘akanakuxoka.’ (Tito 1:2; Hebhere 6:18) Xa esixelela ukuba uya kwenza okuthile, ilizwi lakhe lisisiqinisekiso sokuba kuya kwenzeka. Kuyafana nokuba sekwenzekile. Uthi: “NdinguThixo, akukho wumbi; ndinguThixo, akukho namnye unjengam; ukuxelayo kwasekuqaleni okungasemva, nakwabamandulo okungekenzeki, ndisithi, [“Oko ndigqibe kuko kuya,” NW] kuma, ndikwenze konke ukuthanda kwam . . . nditshilo, ewe, ndiya kukufeza; ndiyilile, ewe, ndiya kukwenza.”—Isaya 46:9-11.
8. Ngaba abo ngokunyanisekileyo bafuna ukumazi uThixo banokumfumana?
8 Ngaphezu koko, uYehova ‘akangi kungatshabalala nabani; unga bonke bangasinga enguqukweni.’ (2 Petros 3:9) Ngenxa yesi sizathu, akafuni kubekho namnye ongamaziyo. Umprofeti ogama linguAzariya wathi: “Ukuba nithe namquqela [uThixo], nomfumana; ukuba nithe namshiya wonishiya nani.” (2 Kronike 15:1, 2) Ngenxa yoko, abo ngokunyanisekileyo bafuna ukumazi uThixo neenjongo zakhe ngokuqinisekileyo banokumazi ukuba benza umgudu wokumfuna.
9, 10. (a) Liliphi ilungiselelo elenzelwe abo bafuna ukumazi uThixo? (b) Ukuphengulula iLizwi likaThixo kusinceda senze ntoni?
9 Kodwa bamele bamfune phi? Abo bamfuna ngokwenyaniso uThixo, ubalungiselele iLizwi lakhe, iBhayibhile. Ngomoya wakhe oyingcwele, amandla akhe asebenzayo awawasebenzisa ekudaleni indalo, uThixo walathisa amadoda athembekileyo ukuba abhale oko simele sikwazi ngeenjongo zakhe. Ngokomzekelo, ngokuphathelele isiprofeto seBhayibhile, umpostile uPetros wathi: “Akukhanga kubekho siprofeto ngokuthanda komntu; bathi abantu abangcwele bakaThixo bathetha beqhutywa nguMoya oyiNgcwele.” (2 Petros 1:21) Ngokufanayo, umpostile uPawulos wathi: “Sonke isibhalo, siphefumlelwe nguThixo nje, sikwancedela ukufundisa, ukohlwaya, ukululeka, ukuqeqesha okusebulungiseni, ukuze umntu kaThixo afaneleke [ngokuzeleyo, NW], exhobele [ngokupheleleyo, NW] wonke umsebenzi olungileyo.”—2 Timoti 3:16, 17; 1 Tesalonika 2:13.
10 Phawula ukuba iLizwi likaThixo lisinceda ‘sifaneleke ngokuzeleyo, sixhobe ngokupheleleyo,’ kungekhona ngokungaphelelanga. Limnceda ubani aqiniseke ngokuba ungubani uThixo, ziyintoni iinjongo zakhe, nokuba ufuna ntoni kubakhonzi bakhe. Simele sikulindele oku kwincwadi eyilwe nguThixo. Yaye yiyo kuphela umthombo esinokulufuna kuwo ulwazi oluchanileyo lukaThixo. (IMizekeliso 2:1-5; Yohane 17:3) Ngokwenjenjalo, asiyi ‘kuba ziintsana, silatyuzwa, siphetshethwa ngumoya wonke wemfundiso, ngokunyanga kwabantu, ngobuqhetseba obusemaqhingeni olahlekiso.’ (Efese 4:13, 14) Umdumisi wavakalisa imbono efanelekileyo: “Lisisibane seenyawo zam ilizwi lakho [likaThixo], likukukhanya emendweni wam.”—INdumiso 119:105.
Zityhilwa Ngokuqhubekayo
11. UYehova uzityhile njani iinjongo zakhe kuluntu?
11 Kwasekuqaliseni kwembali yentsapho yabantu, uYehova wazityhila iinjongo zakhe ngalo mhlaba nangabantu abakuwo. (Genesis 1:26-30) Kodwa xa abazali bethu bokuqala balugatyayo ulongamo lukaThixo, uluntu lwawela ebumnyameni ngokomoya nasekufeni. (Roma 5:12) Sekunjalo, uYehova wayesazi ukuba kwakuya kubakho abo babeya kufuna ukumkhonza. Ngoko ke, ukutyhubela iinkulungwane, uye wazityhila ngokuqhubekayo iinjongo zakhe kubakhonzi bakhe abathembekileyo. Abanye babo wanxibelelana nabo yayinguEnoki (Genesis 5:24; Yuda 14, 15), uNowa (Genesis 6:9, 13), uAbraham (Genesis 12:1-3), noMoses (Eksodus 31:18; 34:27, 28). Umprofeti kaThixo uAmosi wabhala: “Ayikhe yenze into iNkosi uYehova, ingathanga iluhlakaze ucweyo lwayo kubakhonzi bayo abaprofeti.”—Amosi 3:7; Daniyeli 2:27, 28.
12. UYesu wazikhanyisa ngakumbi njani iinjongo zikaThixo?
12 Xa uNyana kaThixo, uYesu Kristu, wa-yelapha emhlabeni malunga neminyaka engama-4 000 emva kwemvukelo yase-Eden, kwatyhilwa iinkcukacha ezininzi ngakumbi ngeenjongo zikaYehova. Oku kwakunjalo ngokukodwa ngenjongo kaThixo yokumisela uBukumkani basezulwini ukuba bulawule emhlabeni. (Daniyeli 2:44) UYesu wenza obo Bukumkani bangumxholo wemfundiso yakhe. (Mateyu 4:17; 6:10) Yena nabafundi bakhe bafundisa ukuba phantsi kobo Bukumkani, injongo kaThixo yantlandlolo ngalo mhlaba nangoluntu iya kuzaliseka. Umhlaba uya kuguqulelwa ekubeni yiparadisi ehlala abantu abafezekileyo, abaya kuphila ngonaphakade. (INdumiso 37:29; Mateyu 5:5; Luka 23:43; 2 Petros 3:13; ISityhilelo 21:4) Ngaphezu koko, uYesu nabafundi bakhe babonisa oko kuya kwenzeka kwelo hlabathi litsha ngemimangaliso uThixo awabanika amandla okuyenza.—Mateyu 10:1, 8; 15:30, 31; Yohane 11:25-44.
13. Ngokuphathelele iinkqubano zikaThixo nabantu, yiyiphi inguqulelo eyenzekayo ngePentekoste yowama-33 C.E.?
13 NgePentekoste yowama-33 C.E., kwiintsuku ezingama-50 emva kokuvuka kukaYesu, umoya kaThixo wathululwa kwibandla labalandeli bakaKristu. Lathabatha indawo yamaSirayeli angathembekanga njengabantu bakaYehova bomnqophiso. (Mateyu 21:43; 27:51; IZenzo 2:1-4) Ukuthululwa komoya oyingcwele ngeso sihlandlo kwakububungqina bokuba, ukususela ngoko, uThixo wayeya kutyhila iinyaniso ezingeenjongo zakhe ngalo thunywashe mtsha. (Efese 3:10) Ebudeni benkulungwane yokuqala yeXesha Eliqhelekileyo, kwasekwa intlangano yebandla lamaKristu.—1 Korinte 12:27-31; Efese 4:11, 12.
14. Abo bafuna inyaniso banokulibona njani ibandla lamaKristu okwenyaniso?
14 Namhlanje, abo bafuna inyaniso banokulibona ibandla lamaKristu okwenyaniso ngokusoloko libonakalisa olona phawu lukaThixo lubalaseleyo, uthando. (1 Yohane 4:8, 16) Ngokwenene, uthando lobuzalwana luphawu olufanisa amaKristu okwenyaniso. UYesu wathi: “Ngayo le nto baya kwazi bonke, ukuba ningabafundi bam, ukuba nithe nathandana.” “Nguwo lo umthetho wam, wokuba nithandane, njengoko ndanithandayo nina.” (Yohane 13:35; 15:12) Yaye uYesu wabakhumbuza oku abaphulaphuli bakhe: “Nizizihlobo zam nina, ukuba nithi nikwenze konke endinimisela khona mna.” (Yohane 15:14) Ngoko abakhonzi bakaThixo bokwenyaniso ngabo baphila ngokuvisisana nomthetho wothando. Abapheleli nje ngokuthetha ngalo, kuba “ukholo, ingekho imisebenzi, lufile.”—Yakobi 2:26.
Ukukhanyiselwa
15. Abakhonzi bakaThixo banokuqiniseka ngantoni?
15 UYesu waxela kwangaphambili ukuba ekuhambeni kwexesha, ibandla lamaKristu okwenyaniso laliya kukhanyiselwa ngakumbi nangakumbi ngeenjongo zikaThixo. Wabathembisa oku abalandeli bakhe: “UMthetheleli, uMoya oyiNgcwele, aya kumthuma uBawo egameni lam, yena uya kunifundisa zonke izinto.” (Yohane 14:26) Kwakhona uYesu wathi: “Niyabona, mna ndinani yonke imihla, kude kube sekuphelisweni kwephakade eli.” (Mateyu 28:20) Ngaloo ndlela, ukukhanyiselwa ngenyaniso engoThixo neenjongo zakhe kuyanda phakathi kwabakhonzi bakaThixo. Ewe, “umendo wamalungisa unjengokukhanya komso, okuya kuba mhlophe ngokuba mhlophe, kude kube semini enkulu.”—IMizekeliso 4:18.
16. Ukukhanyiselwa kwethu ngokomoya kusixelela ntoni ngokuba sindawoni kwiinjongo zikaThixo?
16 Namhlanje, oko kukhanya kokomoya kuqaqambile kunanini na ngaphambili, kuba siphila kwixesha laxa iziprofeto ezininzi zeBhayibhile zizaliseka okanye sele ziza kuzaliseka. Ezi zibonisa ukuba siphila ‘kwimihla yokugqibela’ yale nkqubo ingendawo yezinto. Eli lixesha elibizwa ngokuthi ‘kukupheliswa kwephakade eli’; liya kulandelwa lihlabathi likaThixo elitsha. (2 Timoti 3:1-5, 13; Mateyu 24:3-13) Njengoko uDaniyeli waxela kwangaphambili, uBukumkani bukaThixo basemazulwini kungekudala “buya kuzicola buzigqibe zonke ezo zikumkani [ezikhoyo ngoku], bona bume ngonaphakade.”—Daniyeli 2:44.
17, 18. Ziziphi iziprofeto ezizukileyo ezizalisekayo ngoku?
17 Phakathi kweziprofeto ezizalisekayo ngoku seso sibhalwe kwindinyana 14 kuMateyu isahluko 24. Apho uYesu wathi: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” Emhlabeni wonke, izigidi zamaNgqina kaYehova zenza loo msebenzi wokushumayela ngoBukumkani. Yaye amakhulu amawaka abantu ayazithelela nyaka ngamnye. Oku kuvisisana nesiprofeto sikaIsaya 2:2, 3, esithi “ekupheleni kwemihla” yeli hlabathi lingendawo, abantu abaphuma kwiintlanga ezininzi baya kuza kunqulo lukaYehova lokwenyaniso, yaye ‘uya kubayalela iindlela zakhe, bahambe ngomendo wakhe.’
18 Aba basebatsha bayathontelana ukuza kunqulo lukaYehova “njengelifu,” njengoko kwaxelwa kwangaphambili kuIsaya isahluko 60, indinyana 8. Isa 60 Indinyana 22 iyongezelela: “Omncinanana uya kuba liwaka, noweyeleyo abe luhlanga olunamandla. Mna, Yehova ndiya kukukhawulezisa oko ngexesha lako oko.” Ubungqina bubonisa ukuba sikwelo xesha kanye. Yaye abasebatsha banokuqiniseka ukuba ngokunxulumana namaNgqina kaYehova, balifumene ibandla lamaKristu okwenyaniso.
19. Kutheni sisithi abasebatsha abanxulumana namaNgqina kaYehova beza kwibandla lamaKristu okwenyaniso?
19 Kutheni sikutsho ngokuqiniseka nje oku? Kungenxa yokuba aba basebatsha, kunye nezigidi ezisele zikwintlangano kaYehova, baye bahlulela ubomi babo kuThixo yaye benza ukuthanda kwakhe. Oku kuquka ukuphila ngokuvisisana nomthetho kaThixo wothando. Njengobunye bobungqina boku, la maKristu aye ‘awakhanda amakrele awo aba ngamakhuba, nezikhali zawo zaba zizitshetshe zeediliya. yaye akasayi kuphinda afunde ukulwa.’ (Isaya 2:4) Onke amaNgqina kaYehova ehlabathini lonke akwenzile oku ngenxa yokuba anothando. Oku kuthetha ukuba akanakusebenzisa izixhobo zemfazwe omnye komnye okanye kuye nabani na. Koku ahlukile—ngokungafaniyo neenkonzo zeli hlabathi. (Yohane 13:34, 35; 1 Yohane 3:10-12, 15) Akabandakanyeki kubuzwe obubangela iiyantlukwano, kuba abubuzalwana bomhlaba wonke obuqiniswe ngothando, “intambo yogqibelelo.”—Kolose 3:14; Mateyu 23:8; 1 Yohane 4:20, 21.
Abaninzi Bakhetha Ukungazi
20, 21. Kutheni uninzi lwabantu lusebumnyameni ngokomoya? (2 Korinte 4:4; 1 Yohane 5:19)
20 Ngoxa ukukhanya kokomoya kusiya kuqaqamba phakathi kwabakhonzi bakaThixo, abanye abantu behlabathi baya bengena ngakumbi ebumnyameni bokomoya. Abamazi uYehova bengazazi neenjongo zakhe. Umprofeti kaThixo wachaza eli xesha xa wathi: “Uyabona, ubumnyama buwugubungele umhlaba, isithokothoko sizigubungele izizwe.” (Isaya 60:2) Oku kunjalo ngenxa yokuba abantu ababonakalisi mdla wokwenyaniso wokufuna ukumazi uThixo, yaye ababonakalisi mdla wokwenyaniso wokuzama ukumkholisa. UYesu wathi: “Umgwebo nguwo lo, ukuba ukhanyiso lufikile ehlabathini, baza abantu bathanda ubumnyama ngaphezu kokhanyiso; kuba imisebenzi yabo ingendawo. Kuba bonke abenza okubi, bayaluthiya ukhanyiso, bangezi elukhanyisweni, ukuze imisebenzi yabo ingohlwaywa.”—Yohane 3:19, 20.
21 Abantu abanjalo abanawo umdla wokwenyaniso wokwazi ukuthanda kukaThixo. Kunoko, basekela ubomi babo ekwenzeni ukuthanda kwabo. Ngokutyeshela ukuthanda kukaThixo, bazibeka kwimeko eyingozi, kuba iLizwi lakhe lithi: “Osusa indlebe yakhe ekusiphulaphuleni isiyalo, kwanomthandazo wakhe ulisikizi.” (IMizekeliso 28:9) Baya kujamelana nemiphumo yekhondo abalikhethileyo. Umpostile uPawulos wabhala: “Musani ukulahlekiswa; uThixo yena asingowokuhlekisa. Kuba into athe wahlwayela yona umntu, wovuna kwayona.”—Galati 6:7.
22. Izihlwele zabantu ezifuna ukwazi uThixo zenza ntoni ngoku?
22 Noko ke, kukho izihlwele zabantu ezifunayo ukukwazi ukuthanda kukaThixo, ezimfuna ngokunyanisekileyo, nezitsalelekayo kuye. “Sondelani kuye uThixo, wosondela kuni,” utsho njalo uYakobi 4:8. Ngabo banjalo uYesu wathi: “Lowo uyenzayo inyaniso uyeza elukhanyisweni, ukuze imisebenzi yakhe ibonakalaliswe; ngokuba isetyenzelwe kuThixo.” (Yohane 3:21) Yaye elinjani lona ukumangalisa ikamva uThixo anenjongo yokuba lifunyanwe ngabo bezayo ekukhanyeni! Inqaku lethu elilandelayo liza kuxubusha la mathemba achulumancisayo.
Ubuya Kuphendula Uthini?
◻ Bathini abaninzi ngenjongo yobomi?
◻ UYehova uzityhila njani njengoThixo wenjongo?
◻ Kukuphi ukukhanyiselwa okubalaseleyo okwenzekayo ngenkulungwane yokuqala yeXesha Eliqhelekileyo?
◻ Linokubonwa njani ibandla lamaKristu okwenyaniso namhlanje?