“Tyisa Emlonyeni, Kungekhona Ezinyaweni”
Ukuhlolisisa Amasiko Okungcwaba AseAfrika
“AKABANGCWABI abantu bawo abafileyo!” Kuqhelekile ukuba abantu bathethe oku ngamaNgqina kaYehova eNtshona Afrika. Sekunjalo, kuyaziwa ukuba amaNgqina ayabangcwaba abantu bawo abafileyo.
Kutheni abantu besithi amaNgqina kaYehova akabangcwabi abantu bawo abafileyo? Batsho ngenxa yokuba amaNgqina akawagcini amasiko amaninzi athandwayo okungcwaba asekuhlaleni.
Amasiko Aqhelekileyo Okungcwaba
UAliu uhlala kwilali encinane ekuMbindi Nigeria. Xa kwakufe unina, waxelela izalamane zakhe ngokufa kwakhe waza wenza amalungiselelo okuba kunikelwe intetho yeZibhalo ekhayeni lakhe. Le ntetho yanikelwa ngumdala webandla lasekuhlaleni lamaNgqina kaYehova, yalathisela ingqalelo kwimeko yabafi nakwithemba elithuthuzelayo lovuko ekuthethwa ngalo eBhayibhileni. Emva kwaloo ntetho, unina ka-Aliu wangcwatywa.
Izalamane zazijwaqeka ngumsindo. Kuzo umngcwabo awuphelelanga kungakhange kubekho umlindo, ngokuqhelekileyo obakho kubusuku basemva kokufa komntu. Kwibutho lakuloAliu umlindo uba sisihlandlo sokubhiyoza, kungekhona ukuzila. Isidumbu siyahlanjwa, sivathiswe ngezimhlophe, size silaliswe ebhedini. Abafelweyo bamema iimvumi, bathenge iibhokisi zotywala nemiphanda yotywala obenziwe ngencindi ephuma kumthi wesundu, baze benze ilungiselelo lokuba kubingelelwe ngenkomo okanye ngebhokhwe. Zandule ke izalamane nabahlobo baze kucula, bangqungqe baze basele de kube ngonyezi.
Ebudeni bale mibhiyozo, kubekwa ukutya ezinyaweni zesidumbu. Inxalenye yeenwele, iinzipho zeminwe nezeenzwane zalo mntu ufileyo ziyasikwa zize zigcinwe ukwenzela “umngcwabo wesibini.” Ubakho emva kweentsuku, iiveki, okanye iminyaka kamva.
Kusuku lwasemva komlindo, isidumbu siyangcwatywa, nangona amatheko omngcwabo eqhubeka kangangeveki okanye nangaphezulu. Kamva, kwenziwa umngcwabo wesibini. Ezaa nwele, neenzipho zeminwe nezeenzwane zisongelwa ngelaphu elimhlophe, elibotshelelwe kwiplanga eliziimitha ezisisi-1,5 ukuya kwezisisi-1,8. Ngoxa kuculwa yaye kungqungqwa, eli planga lisiwa emangcwabeni lize lingcwatywe kufuphi nomntu lowo limela yena. Kwakhona, kuculwa kakhulu, kuselwe kuze kutyiwe. Xa kuqukunjelwa izinto ezenziwa emngcwabeni, kudutyulwa phezulu kube kanye.
Ekubeni uAliu engazange avumele nanye kwezi zinto, wabekw’ ityala ngokungabi nantlonelo ngabafi okanye ngamasiko abonisa ukubahlonela. Kodwa kwakutheni ukuze uAliu, oliNgqina likaYehova, angavumi ukwenza ngokuvisisana neli siko? Kungenxa yokuba wayengenakuzamkela iimbono zonqulo la masiko asekelwe kulo.
Iinkolelo Eziqhelekileyo EAfrika
Kulo lonke elaseAfrika, abantu bakholelwa ukuba bonke abantu bavela kummandla womoya yaye baya kubuyela kwakuwo. AmaYoruba aseNigeria athi: “Singabahambayo kulo mhlaba, ikhaya lisezulwini.” Yaye amaIgbo athi: “Wonke umntu oza kweli hlabathi kuya kufuneka abuyele ezulwini, lingakhathaliseki ixesha alihleliyo emhlabeni.”
Khawucinge ngamasiko akhankanywe ngaphambilana. Injongo yomlindo kukuthi ndlela ntle kumoya. Isinxibo esimhlophe sigqalwa njengesinxibo esifanelekileyo sommandla womoya. Ukubeka ukutya ezinyaweni kunxulunyaniswa nembono yokuba isidumbu sitya ngemilenze yaye simele sondliwe ukuze singalambi kuhambo lwaso olusinge kwilizwe leminyanya.
Ngaphezu koko, abantu ngokubanzi bakholelwa ukuba xa umoya uphuma emzimbeni, uhlala nabo baphilayo yaye awubuyeli kwiminyanya de ukhululwe ngokupheleleyo xa kwenziwe umngcwabo wesibini. Ngaphandle kokuba kungcwatywe okwesibini, abantu boyika ukuba umoya uza kuqumba uze uzise isibetho sokugula nokufa kwabo baphilayo. Injongo yokudubula “kukuthumela umoya” ezulwini.
Nangona amasiko omngcwabo esahluka kakhulu ngokweendawo zaseAfrika, ngokuqhelekileyo imbono esisiseko yeyokuba ekufeni komzimba umoya uhlala uphila. Injongo esisiseko yale mibhiyozo kukunceda umoya ukuba usabele “kubizo lokugoduka.”
Ezi nkolelo nezi zinto zenziwayo ziye zakhuthazwa yimfundiso yeNgqobhoko yokungafi komphefumlo womntu nokuhlonela kwayo “iingcwele.” Umzekelo ophawulekayo ngulowo wamagqabaza omfundisi wasemkhosini waseSwazini owathi uYesu wayengezanga kuphelisa iinkolelo zezithethe, kodwa wayezokuzizalisekisa okanye wayeze kuziqinisekisa. Ekubeni ngokuqhelekileyo ingabefundisi abatsal’ iintambo kwiinkonzo zomngcwabo, abantu abaninzi bacinga ukuba iBhayibhile iyazixhasa iinkolelo eziqhelekileyo kwanamasiko abo.
Oko Kuthethwa YiBhayibhile
Ngaba iBhayibhile iyazixhasa ezi nkolelo? Ngokuphathelele imeko yabafi, INtshumayeli 3:20 ithi: “Zonke ezo nto [abantu kwanezilwanyana] ziya ndaweni-nye; zonke ezo nto zavela eluthulini, zonke ezo nto zibuyela eluthulini.” Ngokubhekele phaya iZibhalo zithi: “Ngokuba abadla ubomi bayazi ukuba baya kufa; ke bona abafileyo abazi lutho, . . . Seluphelile kade uthando lwabo, nentiyo yabo, nekhwele labo; . . . akukho kwenza, nakucinga, nakwazi, nakulumka kwelabafileyo, apho uya khona wena.”—INtshumayeli 9:5, 6, 10.
Ezi kunye nezinye izibhalo zenza kucace ukuba abafileyo abanakusibona okanye basive okanye basincede okanye basenzakalise. Ngaba oku akuvisisani noko uye wakuphawula? Usenokuba wazi ndoda ithile efileyo ebisisityebi nebinamandla eye intsapho yayo yabandezeleka emva kokuba ifile ngoxa iwenze onke amatheko esiko lomngcwabo. Ukuba loo ndoda iyaphila kummandla womoya, kutheni ingayincedi nje intsapho yayo? Ayinakukwenza oko kuba okuthethwa yiBhayibhile kuyinyaniso—ngokwenene abafi abaphili, ‘akukho nto banokuyenza ekufeni,’ yaye ke ngoko aku-kho mntu banokukwazi ukumnceda.—Isaya 26:14.
UNyana kaThixo, uYesu Kristu, wayesazi ukuba oku kuyinyaniso. Khawucinge ngoko kwenzeka emva kokufa kukaLazaro. IBhayibhile ithi: “Athi [uYesu] kubo [abafundi bakhe], ULazaro, umhlobo wethu, ulele; ndiyaya ukuba ndimvuse. Bathi ngoko abafundi bakhe, Nkosi, ukuba ulele, wosinda. Ke yena uYesu ubethetha ukufa kwakhe.”—Yohane 11:11-13.
Phawula ukuba uYesu ufanisa ukufa nokulala, ukuphumla. Ekufikeni kwakhe eBhetani, wathuthuzela oodade boLazaro uMariya noMarta. Eqhutywa yimfesane, uYesu walila. Sekunjalo, akazange athethe okanye enze nantoni na ebonisa ukuba umoya kaLazaro wawusaphila okanye wawufuna uncedo ukuze ufike kwilizwe lezinyanya zakhe. Kunoko, uYesu wenza oko wayethe wayeya kukwenza. Wamvusa uLazaro kubuthongo bokufa. Oku kwanikela ubungqina bokuba ekugqibeleni uThixo wayeya kusebenzisa uYesu ekuvuseni bonke abo bakumangcwaba enkumbulo.—Yohane 11:17-44; 5:28, 29.
Kutheni Besahluka?
Ngaba kukho into ephosakeleyo ngokwenza ngokuvisisana namasiko omngcwabo asekelwe kwiinkolelo ezingekho ngokwezibhalo? UAliu nezigidi zamanye amaNgqina kaYehova bakholelwa ukuba ikho. Bayazi ukuba bekuya kuba yinto ephosakeleyo—kukuhanahanisa—ngabo ukuxhasa nasiphi isenzo ngokucacileyo esisekelwe kwiimfundiso zobuxoki nezilahlekisayo. Abafuni ukuba njengababhali nabaFarisi, uYesu awabagwebayo ngenxa yohanahaniso lonqulo.—Mateyu 23:1-36.
Umpostile uPawulos walumkisa lowo wayesebenza naye uTimoti: “UMoya uthi ngo-kucacileyo inxenye iya kumka elukholweni, ngamaxesha asemva, inyamekele oomoya abalahlekisayo, neemfundiso zeedemon; imka nohanahaniso lwabathetha ubuxoki.” (1 Timoti 4:1, 2) Ngaba ingcamango yokuba abantu abafileyo bayaphila kummandla womoya yimfundiso yeedemon?
Kunjalo kanye. USathana uMtyholi, ‘uyise wamaxoki,’ waxelela uEva ukuba wayengasayi kufa, ebonisa ukuba wayeya kuqhubeka ephila esenyameni. (Yohane 8:44; Genesis 3:3, 4) Oko kwakungafani nokuthi umphefumlo ongafiyo uyaphila emva kokufa komzimba. Noko ke, uSathana needemon zakhe bazabalazela ukubatyekisa abantu kwinyaniso yeLizwi likaThixo ngokukhuthaza imbono yokuba kukho ubomi emva kokufa. Ngenxa yokuba ekholelwa koko uThixo akuthethayo eBhayibhileni, amaNgqina kaYehova akananxaxheba kwiimbono nezenzo ezixhasa ubuxoki bukaSathana.—2 Korinte 6:14-18.
Ngokuphepha izenzo zomngcwabo ezingekho ngokwezibhalo, abakhonzi bakaYehova baye abathandwa ngabantu abathile abangenambono zifana nezabo. Wambi amaNgqina aye ahluthwa amafa. Amanye anikw’ uphum’ aphele ziintsapho zawo. Noko ke, njengamaKristu okwenyaniso ayaqonda ukuba ukuzithoba ngokuthembekileyo kuThixo kubangela ukuba ihlabathi liwathiye. Njengabapostile abathembekileyo bakaYesu Kristu, azimisele ‘ukuva uThixo kunokuba eve abantu.’—IZenzo 5:29; Yohane 17:14.
Ngoxa ehlala ebakhumbula abo abathandayo balele ekufeni, amaKristu okwenyaniso azabalazela ukubonakalisa uthando kwabo baphilayo. Ngokomzekelo, ekufeni kukayise uAliu wamfudusela ekhayeni lakhe unina wamondla wamnyamekela ngalo lonke ixesha awayesaphila ngalo. Xa abanye besithi uAliu wayengamthandi unina kuba engazange amngcwabe ngokwesiko eliqhelekileyo, ubaxelela la mazwi bawaqhelileyo: “Ndityise emlonyeni ngaphambi kokuba undityise ezinyaweni.” Ukutyisa emlonyeni, okanye ukunyamekela umntu ngoxa esaphila, kubaluleke ngaphezu kokumtyisa ezinyaweni, isenzo ekuthethwe ngaso ngaphambilana nesinxulumene nomlindo obakho emva kokufa komntu. Enyanisweni, ukutyisa ezinyaweni akuloncedo kwaphela kulowo ufileyo.
UAliu ubuza abo bamngcikivayo oku, ‘Beniya kukhetha okuphi—ukuba intsapho yenu ininyamekele xa naluphele okanye yenze umbhiyozo omkhulu nakuba nifile?’ Inkoliso ikhetha ukuba inyanyekelwe ngoxa isaphila. Kwakhona bayakuxabisa ukwazi ukuba ekufeni kwabo, baya kwenzelwa inkonzo yomngcwabo endilisekileyo esekelwe eBhayibhileni baze bangcwatywe ngendlela enesidima.
Le yinto amaNgqina kaYehova azabalazela ukuyenzela abantu bawo abathandayo. Atyisa emlonyeni kungekhona ezinyaweni.