Uyakhumbula Na?

Ngaba uye wakunandipha ukufunda iinkupho zakutshanje zeMboniselo? Ukuba kunjalo, uya kukufumanisa kubangel’ umdla ukukhumbula oku kulandelayo:

▫ Kwakutheni ukuze iintlola zakwaSirayeli zikhethe ukungena endlwini kaRahabhi ihenyukazi?

Iintlola zakwaSirayeli zaziphila ngokoMthetho kaThixo, ngoko azizange zingene kwindlu kaRahabhi ngeenjongo zokuziphatha okubi. Kusenokuba isizathu sokuya kwazo endlwini yakhe yayikukuba zazingayi kukrokrelwa ngobukho bazo kwindlu yehenyukazi. Indawo eyayakhiwe kuyo indlu yakhe kudonga lwesixeko yayiza kwenza kube lula ukusaba. Kodwa phezu kwako konke, uYehova wazalathisa kumoni owayenentliziyo eyayichukunyiswe ziingxelo ngendlela uThixo aqhubana ngayo namaSirayeli kangangokuba waguquka waza waguqula neendlela zakhe.—12/15, iphepha 24-5.

▫ Umsindo uyichaphazela njani impilo yethu?

Uhlolisiso lubonisa ukuba umsindo ukhupha amadlala abangelwa luxinezeleko. Ukusoloko udubuleka ngumsindo kunokubangela ukungalungelelani phakathi kwecholesterol ekhuselayo neyingozi, kuze kusifake kwingozi yokuba nesifo sentliziyo.—12/15, iphepha 32.

▫ Ngawaphi amacebiso aya kusinceda ukuze sandise ukusasaza kwethu iphephancwadi IMboniselo noVukani!?

Xhalabela IMboniselo noVukani!; isigidimi sakho masibe lula; yiba bhetyebhetye ngokulungiselela iingxubusho ezimbalwa ezimfutshane; zibekele usukelo lobuqu.—1/1, iphepha 24-5.

▫ Kutheni uMoses engumzekelo omhle gqitha wolawulo lobuthixo esifanele siwulandele?

UMoses wayefuna ukhokelo lukaYehova emicimbini. Wayengenamabhongo obuqu, kodwa wayexhalabele uzuko lukaYehova. Wayenokholo olomeleleyo, yaye akazange alibale ukuba uYehova wayengoyena Mlawuli wokwenene wohlanga lwakwaSirayeli.—1/15, iphepha 11.

▫ Ziziphi ezinye iindlela eyoyisa ngazo imfundiso yobuthixo?

Imfundiso yobuthixo yoyisa ngokudlulisela ebantwini bakaYehova ukuyiqonda ngokuqhubekayo inyaniso. Izisa abantu ekukhanyeni kokomoya, yaye ibonisa abalulamileyo indlela yokunqula uThixo “ngomoya nangenyaniso.” (Yohane 4:24) Kwakhona imfundiso yobuthixo yoyisa izilingo nehlabathi elingendawo.—2/1, iphepha 10-12.

▫ Yintoni undoqo wokululeka ngokunempumelelo?

Undoqo yintlonelo efanelekileyo ngomnye umntu nelungelo lakhe lokuphathwa ngendlela enesidima. Ngenxa yoko, umluleki ongumKristu ufanele abe nobubele yaye angagungqi kokulungileyo, kodwa ufanele amambathise isidima lowo amlulekayo.—2/1, iphepha 28.

▫ Kwenzeka njani ukuba iCawa yamaRoma Katolika yamkele uNyuko lukaMariya njengemfundiso?

Ngenkulungwane yokuqala emva kokufa kukaYesu, ingcamango yokuNyukela kukaMariya ezulwini akazange ayicinge nokuyicinga amaKristu. Noko ke, emva kokuba imfundiso kaBathathu Emnye iye yaba yimfundiso yecawa esemthethweni, uMariya wanikwa indima ebaluleke kakhulu ngakumbi. Imfundiso yoNyuko ayizange yamkelwe njengemfundiso de kwangoNovemba 1, 1950, xa uPopu Pius XII wenza esi saziso: “Siyichaza ngokuba yimfundiso etyhilwe nguThixo.”—Munificentissimus Deus.—2/15, iphepha 26-7.

▫ KuYeremiya isahluko 24, iingobozi ezimbini zamakhiwane, amakhiwane alungileyo nalawo ayemabi zazimela ntoni?

Amakhiwane alungileyo ayemela amaYuda awathinjelwa eBhabhiloni kuqala, apho intsalela yayiza kubuyela kwaYuda. Amakhiwane amabi ayemela uKumkani uZedekiya nabo wayenabo ekuvukeleni uKumkani uNebhukadenetsare nangona wayefunge egameni likaThixo. Ngokufanayo, kule mihla kukho intsalela yamaSirayeli okomoya, eye yavelisa isiqhamo esilungileyo ebomini bayo, ngokwahlukileyo kubefundisi beNgqobhoko, abaye bavelisa isiqhamo esibolileyo.—3/1, iphepha 14-16.

▫ Ayengoobani amaQuartodeciman, yaye kutheni ebangela umdla kumaKristu namhlanje?

Emva kwexesha labapostile, kwakukho abathile ababekhumbula iSidlo SeNkosi Sangokuhlwa ngoNisan 14 nyaka ngamnye, belandela inkqubo yabapostile. Babesaziwa ngokuba “ngaboSuku Lweshumi Esinesine,” okanye amaQuartodeciman. Oku kubangela umdla namhlanje, kuba kubonisa ukuba nasemva kokufa kwabapostile, kwakukho abathile ababebambelele kwikhondo elifanelekileyo lokukhumbula ukufa kukaYesu kanye ngonyaka ngoNisan 14.—3/15, iphepha 4-5.

▫ Wayengubani uWilliam Whiston?

Wayengumphengululi okrelekrele wenkulungwane ye-18 eNgilani, isinxulumani esisondeleyo sikaMhlekazi Isaac Newton. UWhiston waguqulela iZibhalo zamaKristu zesiGrike, wayichasa ngokuphandle imfundiso kaBathathu Emnye, yaye wayengumhlohli kwizifundo ngeenkwenkwezi nezemathematika. Kodwa kusenokwenzeka ukuba uWhiston ukhunjulwa ngakumbi ngenguqulelo yakhe yesiNgesi yemibhalo yombhali-mbali womYuda uFlavius Josephus.—3/15, iphepha 26-8.

▫ Wenziwa njani umntu ngokomfanekiselo kaThixo? (Genesis 1:27)

Umntu wenziwa wanamandla okubonakalisa iimpawu zikaThixo ezibalaseleyo zothando, ukuba sesikweni, ubulumko namandla—kwanezinye iimpawu.—4/1, iphepha 25.