Imfundiso Eluncedo Kumaxesha Ethu Anomngcipheko
“Kwazi oku, ukuba ngemihla yokugqibela kuya kufika amaxesha anomngcipheko [ekunzima ukuhlangabezana nawo, NW]. . . . Abantu abangendawo noosiyazi, kukhona baya kuhambela phambili ebubini, belahlekisa, belahlekiswa.”—2 TIMOTI 3:1, 13.
1, 2. Kutheni sifanele sibe nomdla ekubeni ziziphi iimfundiso esizilandelayo?
NGABA uyancedwa, okanye ngaba uyenzakaliswa? Ngaba iingxaki zakho ziyaconjululwa, okanye zenziwa zixake ngakumbi? Yintoni? Ziimfundiso. Ewe, iimfundiso zinokubuchaphazela kakhulu ubomi bakho, zibuphucule okanye zibonakalise.
2 Oonjingalwazi abathathu abasaqhubeka nezifundo zabo kutshanje benze uhlolisiso ngalo mbandela baza babhala oko bakufumanisileyo kwiJournal for the Scientific Study of Religion. Kuyavunywa ukuba, basenokuba bebengalwenzi kuwe okanye kwintsapho yakho olu hlolisiso. Kodwa, oko bakufumanisileyo kubonisa ukuba ngokuqinisekileyo kukho unxibelelwano phakathi kweemfundiso nokuphumelela okanye ukoyisakala komntu, ekuhlangabezaneni namaxesha ethu anomngcipheko. Kwinqaku elilandelayo, siya kukuphawula oko bakufumanisileyo.
3, 4. Bubuphi ubungqina obuthile bokuba siphila kumaxesha anomngcipheko?
3 Noko ke, okokuqala khawuqwalasele lo mbuzo: Ngaba uyavuma ukuba siphila kumaxesha ekunzima ukuhlangabezana nawo? Ukuba kunjalo, ngoko ngokuqinisekileyo unokubona ukuba ubungqina bubonisa ukuba ngawo la “amaxesha anomngcipheko [ekunzima ukuhlangabezana nawo, NW].” (2 Timoti 3:1-5) Abantu bachaphazeleka ngeendlela ezahlukahlukeneyo. Ngokomzekelo, mhlawumbi kukho amazwe owaziyo sithetha nje ekukho izixholoxholo kuwo njengoko amaqela ahlukeneyo esilwela ulawulo lwezobupolitika. Kwezinye iindawo, abantu bayabulawa ngenxa yokwahlukana ngonqulo okanye ngohlanga. Asingomajoni kuphela enzakalayo. Khawucinge ngabafazi namantombazana amaninzi aye aphathwa ngenkohlakalo okanye abantu abalupheleyo abangafumani kutya, izinto zokubafudumeza kunye nekhusi. Abaninzi kakhulu babandezeleka ngokumanyumnyezi, nto leyo ebangela ukuba kubekho iimbacu ezininzi kakhulu, nezinye iinkxwaleko ezihlobene nezo.
4 Kwakhona kula maxesha ethu kukho iingxaki zezoqoqosho, nto leyo ebangela ukuvalwa kwemizi-mveliso, ukungaqeshwa kwabantu, ukulahlekelwa ngamalungelo kabani nomhlala-phantsi, ukuhla kwexabiso lemali, nokufumana ukutya okuncinane okanye ukutya izihlandlo ezimbalwa. Ngaba unokongeza ezinye kwezi ngxaki? Mhlawumbi unako. Ezinye izigidi ehlabathini jikelele ziyabandezeleka ngenxa yokunqongophala kokudla nezifo. Umele ukuba ukhe wayibona imifanekiso ehambis’ umzimba yabantu baseMpuma Afrika ebonisa amadoda, amabhinqa nabantwana abanqinileyo. Izigidi kumazwe aseAsia zibandezeleka ngendlela efanayo.
5, 6. Kutheni kusenokuthiwa kwanezifo ziyinxalenye enkulu yala maxesha ethu anomngcipheko?
5 Sonke sivile ngezifo ezoyikekayo ezandayo ngoku. NgoJanuwari 25, 1993, iThe New York Times yathi: “Ubhubhani onguGawulayo ogqugqisa kuMbindi nakuMzantsi Merika uqhubeka esanda ukodlula elaseUnited States, ezibalula phakathi kokuziphatha okubi ngokwesini, ukunganyaniseki nokuzikhusela ngeendlela ezingaqinisekanga okukhoyo . . . Kakhulu wanda ngenxa yokwasulelana okuya kuxhaphaka phakathi . . . kwamabhinqa.” Ngo-Oktobha 1992, iU.S.News & World Report yathi: “Bekukwiminyaka nje engamashumi amabini edluleyo awathi ugqirha wesizwe kwelaseUnited States, esothulel’ umnqwazi olona loyiso lwakha lwabonwa kwezempilo, wenza isaziso sokuba yayilixesha ‘lokungazixhalabisi ngezifo ezasulelayo.’” Kuthekani ngoku? “Izibhedlele kwakhona zizele ngamaxhoba ezifo ebekucingwa ukuba zoyisiwe. . . . Iintsholongwane zisebenzisa iindlela zobuqhinga ngakumbi ezibandakanya iiseli zemfuza nezizenza zinkqenkqeze ngaphambi kwemichiza emitsha yokulwa nazo. . . . ‘Singena kwixesha elitsha lezifo ezasulelayo.’”
6 Nanku omnye umzekelo, iNewsweek kaJanuwari 11, 1993, yanikela le ngxelo: “Ngoku isifo seengcongconi sasulela abantu abamalunga nezigidi ezingama-270 nyaka ngamnye, sibulala abazizigidi ezi-2 . . . yaye ubuncinane sibangela ukuba abantu abali-100 lezigidi bagulele ukufa. . . . Kwangaxeshanye, esi sifo siya singanyangeki ngokunganyangeki ngamayeza awayekwazi ukusinyanga ngaphambili. . . . Kungekudala ezinye iintlobo zaso ziza kuba zezinganyangekiyo.” Loo nto ikwenza ugubhe kukoyika.
7. Abaninzi namhlanje basabela njani kula maxesha anzima?
7 Usenokuba uye waphawula ukuba kula maxesha anomngcipheko ekunzima ukuhlangabezana nawo, abaninzi bafuna uncedo lokucombulula iingxaki zabo. Khawucinge ngabo babhenela ezincwadini ezithetha ngokuhlangabezana noxinezeleko okanye nesifo esithile esitsha. Abanye bawafuna ngamehlo amnyama amacebiso ngemitshato engaphumeleliyo, ngokunyamekela abantwana, ngeengxaki zotywala okanye zeziyobisi, okanye ngendlela yokulungelelanisa oko kufunekayo emsebenzini wabo neengcinezelo ezisekhaya. Ewe, balufuna ngokwenene uncedo! Ngaba ulwisana nengxaki yobuqu okanye unenye yeengxaki ezibangelwe yimfazwe, indlala, okanye yintlekele? Kwanokuba ingxaki ethile ecinezelayo ibonakala ingenakucombululeka, unesizathu sokubuza ukuba, ‘Kutheni sifikelele kwixesha elinje ukuba nomngcipheko?’
8. Kutheni sifanele siguqukele eBhayibhileni ukuze sifumane ukuqonda nokhokelo?
8 Ngaphambi kokuba sihlangabezane ngokuphumelelayo nala maxesha anomngcipheko ngolu hlobo size sifumane ulwaneliseko ebomini ngoku nakwixesha elizayo, sifanele sazi isizathu sokuba siphila kuwo. Ngokucacileyo, eso sisizathu sokuba ngamnye kuthi anikele ingqalelo eBhayibhileni. Kutheni sisalatha eBhayibhileni? Kungenxa yokuba yiyo kuphela equlethe iziprofeto nembali echanileyo eyabhalwa kwangaphambili, ebonisa izizathu zokubandezeleka kwethu, isichazele ukuba siphi na kumsinga wexesha, noko lisifumbathele kona ikamva.
Ukufunda Kwimbali
9, 10. Isiprofeto sikaYesu esikuMateyu isahluko 24 sazaliseka njani ngenkulungwane yokuqala?
9 IMboniselo kaFebruwari 15, 1994, isihlolisise kakuhle gqitha isiprofeto sikaYesu esiphawulekayo esikuMateyu isahluko 24. Ukuba uvula iBhayibhile yakho kweso sahluko, unokubona kwindinyana 3 ukuba abapostile bakaYesu babuza umqondiso wobukho bakhe kwixesha elizayo nowokupheliswa kwale nkqubo yezinto. Wandula ke, kwindinyana 5 ukusa kweye-14, uYesu waxela kwangaphambili ukuba kwakuya kubakho ooKristu bobuxoki, iimfazwe, ukunqongophala kokudla, ukutshutshiswa kwamaKristu, ukuchas’ umthetho, nokushumayela ngokubanzi ngoBukumkani bukaThixo.
10 Imbali ibonisa ukuba ezo zinto zenzeka ebudeni bokupheliswa kwenkqubo yezinto yamaYuda. Ukuba wawuphila ngoko, ngaba lawo ngewayengazange abe ngamaxesha anzima? Noko ke, kwakuseza kufika incopho, imbandezelo eyayingazange ibekho eYerusalem nakwinkqubo yamaYuda. Kwindinyana 15 siqalisa ukufunda ngoko kwenzekayo xa amaRoma ahlasela iYerusalem ngowama-66 C.E. Ezo ziganeko zafikelela incopho kwimbandezelo uYesu awayethethe ngayo kwindinyana 21—ukutshatyalaliswa kweYerusalem ngowama-70 C.E., eyona mbandezelo imbi yakha yehlela eso sixeko. Sekunjalo, uyazi ukuba imbali ayizange iphele ngoko, yaye noYesu akazange athi yayiya kwenjenjalo. Kwindinyana 23 kuse kweyama-28, wabonisa ukuba emva kwembandezelo yowama-70 C.E., kwakuya kwenzeka ezinye izinto.
11. Ukuzaliseka kukaMateyu isahluko 24 ngenkulungwane yokuqala kuhlobene njani nomhla wethu?
11 Abathile namhlanje basenokutyekela ekungazisini so ezo zinto zenzeka ngaphambili besithi ‘sizithini ke thina ezo zinto?’ Ukwenjenjalo bekuya kuba yimpazamo. Ukuzaliseka kweziprofeto ngelo xesha kubalulekile gqitha. Ngoba? Kaloku, iimfazwe, iindlala, iinyikima zomhlaba, iindyikitya zokufa nentshutshiso ezazikho ebudeni bokupheliswa kwenkqubo yamaYuda zaziya kuphinda zibe nenzaliseko enkudlwana emva kokuphela ‘kwamaxesha amisiweyo eentlanga’ ngowe-1914. (Luka 21:24) Abaninzi abaphilayo ngoku bazibonela ngawabo amehlo iMfazwe Yehlabathi I xa kwakuqalisa le nzaliseko yanamhlanje. Kodwa kwanokuba wazalwa emva kowe-1914, uye wasibona sizaliseka isiprofeto sikaYesu. Iziganeko zale nkulungwane yama-20 zingqina ngokucacileyo ukuba ngoku siphila ekuphelisweni kwale nkqubo ikhoyo ingendawo.
12. Ngokutsho kukaYesu, yintoni esisenokulindela ukuyibona?
12 Oku kuthetha ukuba ‘imbandezelo’ ekuthethwa ngayo kuMateyu 24:29 isengaphambili. Iya kuquka imiqondiso engaqhelekanga eyenzeka kummandla wesibhakabhaka esisenokungakwazi nokuyithelekelela. Indinyana 30 ibonisa ukuba abantu baya kwandula babone umqondiso owahlukileyo—ongqina ukuba intshabalalo isemnyango. Ngokutsho kwengxelo efanayo ekuLuka 21:25-28, ngelo xesha lizayo, ‘abantu baya kufa kukoyika nakukulindela izinto ezilizelayo elimiweyo.’ Ingxelo kaLuka ikwathi amaKristu aya kwandula aziphakamise iintloko zawo kuba inkululeko yawo iya kuba isondele gqitha.
13. Ziziphi iingongoma ezimbini eziphambili esifanele siziqwalasele?
13 Usenokuthi, ‘Ndiyakuqonda konke oko, kodwa bendicinga ukuba imbambano kukuba ndinokuwaqonda ndize ndihlangabezane njani namaxesha ethu anzima?’ Unyanisile. Ingongoma yethu yokuqala kukubona ezona ngxaki ziphambili size sibone indlela esinokuziphepha ngayo. Ingongoma yesibini ihambisana nayo, kukubona indlela iimfundiso zeZibhalo ezinokusinceda ngayo sinandiphe ubomi obulunge ngakumbi ngoku. Ngokuphathelele oku, khawuvule iBhayibhile yakho kweyesi-2 kuTimoti isahluko 3, uze ubone indlela amazwi ompostile uPawulos anokukunceda ngayo uhlangabezane namaxesha anzima.
Isiprofeto Esithetha Ngala Maxesha Ethu
14. Kutheni sinokukholelwa ukuba sinokungenelwa ngokuqwalasela eyesi-2 kuTimoti 3:1-5?
14 UThixo waphefumlela uPawulos ukuba abhalele umKristu onyanisekileyo uTimoti isiluleko esihle kakhulu esamnceda waphila ubomi obuphumelelayo nobonwabisa ngakumbi. Inxalenye yoko kwabhalwa nguPawulos yayiza kusebenza ngokuyintloko kumhla wethu. Kwanokuba uvakalelwa kukuba uwazi kakuhle, wafunde ngenyameko amazwi esiprofeto akweyesi-2 kuTimoti 3:1-5, (NW). UPawulos wabhala: “Ke kwazi oku, ukuba ngemihla yokugqibela kuya kufika amaxesha anomngcipheko ekunzima ukuhlangabezana nawo. Kuba abantu baya kuba ngabazithandayo, abathandi bemali, abazidlayo, abazikhukhumalisayo, abanyelisi, abangathobeli abazali, abangenambulelo, abanganyanisekanga, abangenawo umsa wemvelo, abangayifuni kwaphela imvisiswano, abahlebi, abangenakuzeyisa, iindlobongela, abangathandi kulunga, abangcatshi, abaneentloko ezilukhuni, abathiwe lwale likratshi, abathandi beziyolo kunokuba bathande uThixo, benokumila kokuhlonela uThixo ukanti bayawakhanyela amandla ako.”
15. Kutheni eyesi-2 kuTimoti 3:1 ifanele ibe yeyomdla ngokukhethekileyo kuthi ngoku?
15 Phawula ke, ukuba kudweliswe izinto ezili-19. Ngaphambi kokuba sizihlolisise size singenelwe kuzo, khawunqumame okomzuzwana ukuze usiphonononge sonke esi siprofeto. Khawuphos’ iliso kwindinyana 1. UPawulos waxela kwangaphambili wathi: “Ngemihla yokugqibela kuya kufika amaxesha anomngcipheko ekunzima ukuhlangabezana nawo.” Yiyiphi le “mihla yokugqibela”? Mininzi imihla yokugqibela eye yakho, njengemihla yokugqibela yePompeii yamandulo okanye imihla yokugqibela yokumkani okanye intsapho ethile yasebukhosini. KwaneBhayibhile ikhankanya imihla yokugqibela emininzi, njengemihla yokugqibela yenkqubo yamaYuda. (IZenzo 2:16, 17) Noko ke, uYesu, wandlala isiseko esisinceda siqonde ukuba ‘imihla yokugqibela’ awayethetha ngayo uPawulos yayibhekisela kwixesha lethu.
16. Umzekeliso wengqolowa nomdiza waxela kwangaphambili yiphi imeko ngeli xesha lethu?
16 UYesu wakuchaza oko ngomzekeliso wengqolowa nomdiza. Ezi zinto zatyalwa entsimini zaza zayekwa ukuba zikhule. Wathi ingqolowa nomdiza zimela abantu—amaKristu okwenyaniso nawobuxoki. Lo mzekeliso siwukhankanya kuba ubonisa ukuba kuya kudlula ithuba elide ngaphambi kokupheliswa kwayo yonke le nkqubo ingendawo. Xa eso siphelo sifika, kukho nto ithile eya kuba yande gqitha. Yintoni ke leyo? Luwexuko, okanye ukuphambuka kubuKristu bokwenyaniso, nto leyo eya kuphumela kwisivuno esikhulu sobungendawo. Ezinye iziprofeto zeBhayibhile ziyangqina ukuba oku kwakuya kwenzeka ebudeni bemihla yokugqibela yenkqubo engendawo. Sikuloo mihla sithetha nje, ekuphelisweni kwale nkqubo yezinto.—Mateyu 13:24-30, 36-43.
17. Yiyiphi inkcazelo efanayo eyesi-2 kuTimoti 3:1-5 eyinikelayo ngokupheliswa kwale nkqubo yezinto?
17 Ngaba uyayibona intsingiselo yoku? EyesiBini kuTimoti 3:1-5 nayo ngokufanayo isibonisa ukuba ebudeni bokupheliswa kwale nkqubo, okanye kwimihla yokugqibela, amaKristu aya kuba ephila phakathi kobubi obuninzi. UPawulos wayengathi ezi zinto zili-19 zidwelisiweyo ziya kuba yeyona ndlela yokungqina ukuba imihla yokugqibela ifikile. Kunoko, wayesilumkisa ngoko kuya kufuneka sijamelane nako ebudeni bemihla yokugqibela. 2Ti 3 Indinyana 1 ithetha ‘ngamaxesha anomngcipheko ekunzima ukuhlangabezana nawo.’ Elo binzana lisuka kwisiGrike, yaye ngokoqobo lithetha “amaxesha amisiweyo anoburhalarhume.” (Kingdom Interlinear) Ngaba akuvumi ukuba igama elithi ‘uburhalarhume’ likuchaza ngokuchanileyo oko sijamelene nako namhlanje? Ezi ndinyana ziphefumlelweyo zihlabela mgama zize zisinike uncedo oluvela kuThixo lokuqonda oko kwenzekayo kulo mhla wethu.
18. Sifanele sinikele ingqalelo kwintoni xa sifundisisa amazwi kaPawulos esiprofeto?
18 Umdla wethu kwesi siprofeto ufanele usincede siqonde imizekelo elusizi yendlela elinomngcipheko, okanye elinoburhalarhume ngayo ixesha lethu. Khumbula iingongoma zethu ezimbini eziziintloko: (1) ukubona iingxaki ezibangela amaxesha ethu abe nganzima nokubona indlela esinokuziphepha ngayo; (2) ukulandela iimfundiso eziluncedo ngokwenene nezinokusinceda sinandiphe ubomi obulunge ngakumbi. Ngoko, kunokugxininisa kwizinto ezingakhiyo, siza kunikela ingqalelo kwiimfundiso ezinokusinceda thina neentsapho zethu kula maxesha ekunzima ukuhlangabezana nawo.
Vuna Iingenelo Ezityebileyo
19. Bubuphi ubungqina obubonileyo bokuba abantu ngabazithandayo?
19 UPawulos uqalisa uludwe lwakhe ngokuxela kwangaphambili ukuba kwimihla yokugqibela, “abantu baya kuba ngabazithandayo.” (2 Timoti 3:2) Wayethetha ukuthini? Uya kuba uchanile xa usithi ukutyhubel’ imbali bekusoloko kukho amadoda namabhinqa aziphakamisayo, angoohlohlesakhe. Kodwa, ngokungathandabuzekiyo esi siphako sixhaphake ngendlela engaqhelekanga namhlanje. Abaninzi bade bagabadele. Phantse oku kuyinto eyamkelekileyo kwezobupolitika nakwezorhwebo. Amadoda namabhinqa axolele ukuba kuhle ehlayo kunyuke enyukayo xa efuna igunya nodumo. Ngokuqhelekileyo oko kwehla kuze kunyuke kwabanye, kuba abantu abazithandayo abanjalo abayikhathalele indlela ababenzakalisa ngayo abanye abantu. Bayakhawuleza ukumangala ezinkundleni okanye ukuqhatha abanye. Unokusiqonda isizathu sokuba abaninzi bathi esi “sisizukulwana esithi ndim phambili.” Oohlohlesakhe nabantu abazidlayo baninzi kakhulu.
20. Isiluleko seBhayibhile sichasene njani nomoya oxhaphakileyo wokuba ngabazithandayo?
20 Akuyomfuneko ukuba sikhunjuzwe ngamava abuhlungu esiye sawafumana ekuqhubaneni nabantu “abazithandayo.” Sekunjalo liyinyaniso elokuba ngokuyichaza ngokucacileyo le ngxaki, iBhayibhile iyasinceda, kuba isifundisa indlela yokuphepha lo mgibe. Ithi: “Ningenzi nanye into ngokweyelenqe, nangokozuko olulambathayo. Yithini ngokuthobeka kwentliziyo omnye ambalele omnye ekuthini nguyena wongamileyo kunaye. Makangathi elowo axunele kwezakhe izinto zodwa, elowo makaxunele nakwezabanye.” ‘Ningazicingeli ngaphezu koko nimelwe kukuzicingela ngako; zicingeleni ingcinga ephilileyo.’ Elo cebiso lihle lifumaneka kwabaseFilipi 2:3, 4 nakwabaseRoma 12:3.
21, 22. (a) Bubuphi ubungqina obukhoyo bokuba isiluleko esinjalo sinokuba luncedo namhlanje? (b) Isiluleko sikaThixo sibe nawuphi umphumo kubantu abaqhelekileyo?
21 Uthile usenokuphikisa ngelithi, ‘Oko kuvakala kulungile, kodwa akunakwenzeka.’ Akunjalo, kunokwenzeka ngokwenene. Kunokusebenza, ibe kuyasebenza, kubantu abaqhelekileyo namhlanje. Ngowe-1990 abapapashi beYunivesithi yaseOxford bashicilela incwadi ethi The Social Dimensions of Sectarianism. Isahluko 8 sasinomxholo othi “AmaNgqina KaYehova Kwilizwe LobuKatolika,” yaye sasithetha ngohlolisiso olwenziwa eBelgium. Sifunda oku: “Xa sihlolisisa into etsalela ekubeni liNgqina, ngaphandle kokutsalwa ‘yiNyaniso’ ngokwayo, kwakhona abo babuziweyo maxa wambi baphinda bakhankanye iimpawu ezininzi. . . . Ububele, ubuhlobo, uthando nomanyano zezona mpawu abazikhankanya ngokufuthi, kodwa ukunyaniseka nehambo yobuqu ‘ebonakalisa ukuthobela imigaqo yebhayibhile’ zezinye zeempawu azixabisileyo amaNgqina.”
22 Le nkcazelo sinokuyifanisa nomfanekiso owuthabathe umi kude; kunoko, ukuba ubusebenzise ikhamera ekwaziyo ukwenza into ekude ibonakale ngathi ikufutshane, ubunokubona izinto ngokusondeleyo, amava amaninzi okwenene obomi. La mava ebeya kuquka awamadoda ngaphambili awayezingca, engoozwilakhe, okanye ethiwe lwale likratshi kodwa ngoku anobulali ngakumbi, angabayeni noobawo ababonakalisa uthando nobubele ngakumbi kumaqabane, abantwana bawo nakwabanye abantu. Kwakhona ebeya kuquka awamabhinqa awayengoozwilakhe okanye engenaluvelwano ibe ngoku anceda abanye bafunde indlela yobuKristu bokwenyaniso. Kukho amakhulu amawaka emizekelo enjalo. Khawutsho ke ngoku. Ngaba ubungayi kukufumanisa kulunge ngakumbi ukuba phakathi kwabantu abanjalo kunokuba usoloko uphakathi kwamadoda namabhinqa abeka iziqu zawo phambili? Ngaba oko bekungayi kukwenza kube lula ukuhlangabezana namaxesha ethu anomngcipheko? Ngoko ngaba ukuthobela iimfundiso zeBhayibhile ezinjalo bekungayi kukwenza wonwabe ngakumbi?
23. Kutheni kuya kuba kokufanelekileyo ukunikela ingqalelo ngokubhekele phaya kweyesi-2 kuTimoti 3:2-5?
23 Noko ke, siqwalasele ingongoma yokuqala kuphela kuludwe uPawulos alubhale kweyesi-2 kuTimoti 3:2-5. Kuthekani ngezinye? Ngaba ukuzihlolisisa ngenyameko nazo bekungayi kukunceda uqonde iingxaki eziphambili zeli xesha lethu ukuze uziphephe uze ukwazi ukuqonda ukuba liliphi ikhondo eliya kukuzisela wena nabathandekayo bakho ulonwabo olungakumbi? Inqaku elilandelayo liya kukunceda uphendule loo mibuzo uze uzuze iintsikelelo ezityebileyo.
Iingongoma Emazikhunjulwe
◻ Bubuphi ubungqina obuthile bokuba siphila kumaxesha anomngcipheko?
◻ Kutheni sinokuqiniseka ukuba siphila kwimihla yokugqibela?
◻ Ziziphi iingongoma ezimbini eziphambili esinokuzifumana ngokuhlolisisa eyesi-2 kuTimoti 3:1-5?
◻ Ebudeni beli xesha laxa abaninzi bengabazithandayo, iimfundiso zeBhayibhile zibancede njani abantu bakaYehova?
[Inkcazelo Ngomfanekiso okwiphepha 8]
Photo top left: Andy Hernandez/Sipa Press; photo bottom right: Jose Nicolas/Sipa Press