Ukuzimisela Ukukhonza UYehova!

“AKUZUKUYA kushumayela!” “Abantu bakho mabangatyeleli apha!” Abafazi abaninzi abangamaKristu baxelelwa la mazwi kunye namanye afanayo ngamadoda abo achasayo. Kodwa xa la madoda esebenza emkhosini, abafazi bawo bajamelana nocelomngeni olukhethekileyo kukholo lwabo. (Isaya 2:4; Yohane 17:16) Ngoko, abafazi abanjalo bamaKristu bakwazi njani ukuhlala bomelele ngokomoya baze babe ngabakhutheleyo kwinkonzo yoBukumkani?

Ukuthembeka kuYehova uThixo kunye nozimiselo lobuqu luyabanceda bangethi amandla. UYvonne, ongumfazi wejoni uyachaza: “Ndicinga ukuba kwakungenxa yokuzimisela kwam ngokupheleleyo. Ndandisazi ukuba kumele ukuba zazikho iindlela zokuyiphepha inkcaso yomyeni wam.” Ngokwenene, zazikho.

Omnye umfazi ongumKristu, otshate negosa lasemkhosini, ubalisa indlela ukuzimisela kwakhe okubenza bube lula ngayo ubomi bomyeni wakhe. Uyachaza: “Ucwangciso lwam ulwazi ngokungathi lolwakhe, yaye abantu basemkhosini bayakuxabisa oko.” Sekunjalo, ukukhonza kwakhe uYehova ngokuqhubekayo akuyondlwan’ iyanetha.

Ukoyisa Ukuba Lilolo

Ngokufuthi abafazi abanamadoda asemkhosini bajamelana nocelomngeni lokuxelelwa sekusele nje iintsuku ezimbalwa ngaphambi kokuba bafuduke ukuba baza kupheleka abayeni babo ukuya kusebenza kwindawo ekude nekhaya. Ngoko, xa uhlaliswe kwindawo ongayiqhelanga kuba lula ukuziva ulikheswa. Kodwa akumele kube njalo. Abo bakhonza uYehova banokuthile okubancedayo. Yintoni leyo? Ngokutsho kompostile ongumKristu uPetros, ‘lulo lonke umanyano lwabazalwana.’ (NW) Ngoku ezizigidi, amaNgqina kaYehova kumazwe angama-231 asebenza njengentsapho enkulu yamaKristu, ‘isizalwana.’ Akho phantse kuyo yonke indawo.—1 Petros 2:17.

USusan, ngequbuliso kwafuneka awushiye ummandla womzi wakhe, wafika kwiziko lomkhosi womoya apho umyeni wakhe wayabelwe ukuya kusebenza khona. Esemtsha enjalo elukholweni yaye ephantsi kwengcinezelo yomyeni wakhe ongakholwayo yokuba ayeke ukuba nesabelo kubulungiseleli bamaKristu, uyabalisa: “Ndingalibazisanga ndaya kwiintlanganiso zasekuhlaleni, yaye apho ndakwazi ukuhlala ndize ndincokole nabanye oodade. Enyanisweni ndinokuthi yaba lolu nxulumano olwandibangela ukuba ndiqhubeke.”

Maxa wambi ukuba lilolo kubangela udandatheko. Sekunjalo, iindaba ezilungileyo zibenza bazive bekhuthazekile. UGlenys, udade waseNgilani owapheleka umyeni wakhe xa wayethunyelwa phesheya, uyabalisa: “Ndathi xa kanye ndandidandatheke ngokwenene, ndingalindelanga, ndabhalelwa ngumntu othile endandimazi kwiminyaka eyadlulayo ndisesemkhosini endixelela ukuba wayesandul’ ukubhaptizwa njengomnye wamaNgqina kaYehova. Oko kwandikhuthaza kanye ngexesha elifanelekileyo.”

UJane, owahamba nomyeni wakhe ukuya eKenya, wafumanisa ukuba iintlanganiso zamaKristu zangqineka ziluncedo, nangona zaziqhutywa ngeelwimi awayengazazi. Uyachaza: “Ndandisazi ukuba le yindawo uYehova awayefuna ndibe kuyo. Ndandikunye nabazalwana bam, yaye babenjengeyeza kum. Bandamkela, ibe ndandivakalelwa ngathi siyintsapho.”

UJane ngomnye wabaninzi abakwezi meko owafumana izalamane zokomoya awayengazi nokuba unazo!—Marko 10:29, 30.

Ukuma Uqinile Nakubeni Uchaswa

UYesu walumkisa: “Ningabi ndize kungenisa uxolo emhlabeni; andize kungenisa luxolo, ndize kungenisa ikrele.” (Mateyu 10:34) Wayethetha ukuthini? Kwanasentsatsheni, apho bekuya kulindeleka ukuba kubekho uxolo, “ikrele lisenokuphoswa ngequbuliso,” watsho njalo uA. T. Robertson kwincwadi ethi Word Pictures in the New Testament. UYesu wathi, “Zaye iintshaba zomntu ziya kuba ngabendlu yakhe.” (Mateyu 10:36) Hayi indlela angqineka eyinyaniso ngayo la mazwi xa iqabane lomtshato liyichasa inyaniso!

Xa uDiane waqalisa ukufundisisa iBhayibhile namaNgqina kaYehova, umyeni wakhe, oligosa lomkhosi womoya, akazange akuthande ngokwenene oko. Oku kwaba nawuphi umphumo kumtshato wabo? UDiane uthi: “Kwaba ngathi kufakwa isitena somkhenkce phakathi kwethu. Sasonwabile emtshatweni wethu. Ngephanyazo sasifana nje nabantu abahlala endlwini enye kuphela.” Ngoko, wahlangabezana njani nale meko? “Inzondelelo nokuzimisela ngokobuqu kubaluleke ngokwenene, kunye noncedo lukaYehova nomoya wakhe.” UDiane wawuthabathel’ entliziyweni umzekelo oseBhayibhileni womprofeti uDaniyeli.

Xa wayesekuthinjweni eBhabhiloni waza wanikwa ukutya okwakungamkelekanga kumkhonzi kaThixo, uDaniyeli ‘wagqiba [“wazimisela,” NW] entliziyweni yakhe, ukuba angazingcolisi ngokudla kokumkani.’ Ewe, uDaniyeli wenza isigqibo esisengqiqweni. Wagqiba entliziyweni yakhe ukuba angazingcolisi ngokutya oko kutya. Ngoko enjani yona inkalipho awayibonakalisayo njengoko ‘wayecela kumthetheli-mathenwa ukuba angazingcolisi’! Waba yintoni umphumo? UYehova wamsikelela ngenxa yokuzimisela kwakhe.—Daniyeli 1:8, 9, 17.

Ngokufanayo namhlanje umyeni ochasayo usenokuma ngelithi umfazi wakhe makayeke ukuya kwiintlanganiso zebandla. Ufanele asabele njani? UJane wazifumanisa ekule meko. Uyachaza: “Ndandingasokuze ndiyekelele kwingcinezelo. Ndandisazi ukuba ndandingenakulalanisa. Kwakufuneka ndibonise indlela ezibaluleke ngayo iintlanganiso kum.” UYehova wamsikelela ngokuma kwakhe okuqinileyo njengoko wayeqhubeka esiya kwiintlanganiso.

UGlenys uyabalisa: “Umyeni wam wazama ukundiyekisa ukuya kwiintlanganiso, kodwa leyo ayizange ibe yinto yexesha elide. Ndaqhubeka ndisiya. Xa ndibuyela ekhaya, maxa wambi wayendibetha, yaye maxa wambi ndandifika esisimumu.” Sekunjalo, wanyamezela, ethandaza ngokuphindaphindiweyo. Kwakhona, abadala ababini bebandla babethandaza naye rhoqo, nto leyo eyamkhuthaza kakhulu ukuba aqhubeke esiya kwiintlanganiso.—Yakobi 5:13-15; 1 Petros 2:23.

Ngamanye amathuba abaphathi bomyeni basenokumnyanzelela ukuba amdimaze umfazi wakhe ekushumayeleni iindaba ezilungileyo. UDiane wafumanisa ukuba kwakufuneka amcacisele umyeni wakhe ngezinto ezazisiza kuqala kuye. Wathi: “Ndandikulungele ukujamelana nemiphumo yokuqhubeka kwam nokushumayela.” Hayi indlela okufana ngayo ukuma kwakhe nokwabapostile! (IZenzo 4:29, 31) Sekunjalo, wayeshumayela ngobulumko. Uyabalisa: “Ndandidla ngokwenza imbutho kuziwe kuphungwa ikofu yaye wonke umntu ozileyo ndandimnika incwadi ethi INyaniso.”—Mateyu 10:16; 24:14.

Ukuthobela Ngaphandle Kokulalanisa

Nangona bebandezeleka ngenxa yokucinezeleka emtshatweni, abafazi abangamaKristu bakhangele kwikamva yaye bathembele ngoYehova. Oku kuyabanceda bahlale belungelelene. Bayabaxhasa abayeni babo kangangoko banako bengalalanisi kukholo lwabo. Ngokwenjenjalo, balandela eli cebiso liphefumlelweyo likaPetros: “Nina bafazi, wathobeleni awenu amadoda.” (1 Petros 3:1) KwiThe Amplified New Testament, lo myalelo walo mpostile ufundeka ngolu hlobo: “Zithobeni ngokwabo bangaphantsi nabaxhomekeke kuwo, yaye nizinikele kuwo.” Khawuphawule indlela uJane awalilandela ngayo eli cebiso. Uyacacisa: “Umyeni wam wandixelela ukuba oko ndandifuna ukukwenza akumele kuphazamisane nomsebenzi wakhe. Ngoko ndazama ukufumana iindlela endandinokumnceda ngazo.”

Ngaloo ndlela bambi abafazi abangamaKristu baye bavuma ukuya kumatheko okuzonwabisa abamenywe kuwo abayeni babo. Kodwa sekunjalo bazimisele ukuba bangaze balalanise kukholo lwabo. Kwathabatha ixesha ngoJane ukuthetha ngoku nomyeni wakhe. Wamcacisela ngobubele ukuba wayenomdla wokuya kodwa wayengafuni ukuba ukubakho kwakhe kumenzele iintloni. “Ndandisazi ukuba ngokuqhelekileyo bonke abakhoyo kwakulindeleke ukuba baphakame baze benze itoast [ukungqubanisa iiglasi]. Ndandifunde ukuba kumele kunqulwe uYehova kuphela, yaye ukwenza itoast kwakungaphezulu lee kunokubonisa nje intlonelo. Umyeni wam wayiqonda indlela enokuba nzima ngayo le meko, ngoko ngokulula nje wathi: ‘Sukuya!’ Ndamthobela.”

Kwelinye icala, uGlenys wayempheleka umyeni wakhe xa wayesiya kwitheko elinjalo, kodwa wakhangela amagosa ahleli entla etafileni. Xa wayewabona ukuba alungiselela ukwenza itoast, wazimela waya kwindlu yangasese! Ewe, aba bafazi bazenza bhetyebhetye kodwa abazange balalanise.

‘Ukuzuzeka Lingekho Ilizwi’

UYvonne waqiqa ngelithi: “Ukuba ndiyaphucula kubuchule endinabo njengomfazi, umyeni wam uya kubona ukuba inyaniso iyandiguqula.” Ngoko wasifunda wasiphindaphinda isahluko esikwincwadi ethi Ubomi Bentsapho esithi “Umfazi Othandwa Kunene.”a “Ndanikela ingqalelo ekhethekileyo kumbandela ophantsi komxholwana othi ‘Abantu Abalilayo, Nabakhalaza Ngokuzingisileyo’! Kodwa ndafumanisa ukuba okukhona ndizama ukuthetha nomyeni wam, kokukhona izinto zazisiya zisiba mbi.” Noko ke, ekugqibeleni waphumelela ekuncedeni umyeni wakhe akhonze uYehova. Njani? Ngokusebenzisa umgaqo obhalwe kweyoku-1 kaPetros 3:1, othi amadoda ‘anokuzuzeka lingekho ilizwi.’

Indlela abafazi abangamaKristu abazinyamekela ngayo iintsapho zabo yenza lukhulu ekuncomeleni ubuKristu kwabanye. UDiane uyabalisa: “Ndazama ukwenza inyaniso ibe nomtsalane kangangoko. Xa ndandisiya kwiintlanganiso, umyeni wam wayeziva eyinkomo edla yodwa, ngoko ndandiqiniseka ngokubayala abantwana ukuba baziphathe kakuhle ngokukhethekileyo xa sifika ekhaya. Kwakhona ndandizama ukunikela ingqalelo egqithisileyo kuye xa sibuya.” Ngokuthe ngcembe isimo sengqondo somyeni wakhe saguquka njengoko wayesabela kwingqalelo eyayinikelwa ngobubele yintsapho yakhe.

Nabanye abakhonzi bakaYehova banokunceda. UJane ubalisa ukuba umyeni wakhe wayekunandipha ukuba kunye nabavangeli basemazweni abangamaNgqina awadibana nabo eKenya. “Benza ubuhlobo naye yaye babencokola ngebhola ekhatywayo ibe babenobubele kakhulu. Kwizihlandlo eziliqela, sasimenyelwa izidlo kumakhaya abavangeli basemazweni ahlukahlukeneyo.” Kamva umyeni wakhe wathi: “Ndaqalisa ukulujonga ngendlela eyahluke ngokupheleleyo ukholo lukaJane. Abahlobo bakhe babengabantu abakrelekrele kakhulu ababenokuthetha ngemibandela eyahlukahlukeneyo.” Ngokufanayo, umyeni kaDiane wayiguqula indlela awayeyijonga ngayo inyaniso. Xa wayonakalelwe yinqwelo-mafutha awayeyiqhuba, wahlangulwa liNgqina eliselula. Uthi: “Oko kwandichukumisa ngokwenene.”

Kakade ke, asingawo onke amaqabane omtshato azuzelwa enyanisweni. Kuthiweni ke ngoko? UYehova unikela uncedo ukuze abo bathembekileyo bakwazi ukunyamezela. (1 Korinte 10:13) Khawuqwalasele amazwi akhuthazayo kaGlenys kwabo bakwimeko efana neyakhe: “Ungaze uthandabuze ukuba nguYehova owaseka umtshato yaye ufuna ukuba izibini zihlale kunye. Ngoko kungakhathaliseki oko umyeni asenokukwenza okanye inkcaso osenokuyifumana kwabo bakungqongileyo, uYehova akasokuze akuyekele ushukunyiswe naphakade.” Nangona umyeni wakhe engekamnquli uYehova, isimo sakhe sengqondo ngakuye nasenyanisweni sinyibilikile.

‘Hlwayela Uneenyembezi; Uvune Umemelela’

Enyanisweni, aba bafazi bangamaKristu bazimisele ukumkhonza uYehova. Ukuba ukwimeko efanayo, nawe zimisele ukwenjenjalo. Khumbula isibongozo esithi: “Uze umoyike uYehova uThixo wakho, umkhonze, unamathele kuye.”—Duteronomi 10:20.

Umdumisi uthi: “Ohamba ahambe elila, ephethe intlwayelelo, uyabuya eze ememelela, ethwele izithungu zakhe.” (INdumiso 126:6) Elinye iNgqina liyavuma lisithi, “Uphalaza iinyembezi ezininzi njengoko uzama ukubonisa iqabane lakho inyaniso, uthe cwaka okanye ngamazwi. Kodwa ekugqibeleni uyamemelela kuba enoba aliyamkeli inyaniso, uYehova uyakusikelela ngomgudu owenzayo.”

Bonke abo bamkhonza ngokuthembeka uYehova phezu kwayo nje inkcaso yasekhaya bafanele banconywe ngokwenene. Bafanelwe yinkxaso nothando. Kwanga bangahlala bengalalanisi, bazimisele ukukhonza uYehova!

[Umbhalo osemazantsi]

[Umfanekiso okwiphepha 28]

Ufundisiso olwenziwa ngomthandazo lomeleza uzimiselo lwamaKristu