Abathandekayo Bakho Abafileyo—Ngaba Uya Kubabona Kwakhona?
UJOHN wafelwa ngunina eneminyaka esithoba kuphela. Kamva, wakhumbula oko kwenzeka kumzi wabangcwabi: “Ndamzobela umfanekiso ndaza ndambhalela imigcana embalwa ndimcela ukuba asilinde ezulwini sonke. Ndayinika uTata ukuba ayifake ebhokisini awayefakwe kuyo, yaye nangona wayefile, ndithanda ukuzixelela ukuba wawufumana umyalezo wam wokugqibela.”—How It Feels When a Parent Dies, nguJill Krementz.
Alithandabuzeki elokuba uJohn wayemthanda ngokwenene unina. Emva kokuba echaze iimpawu zakhe ezintle, wathi: “Mhlawumbi kungenxa nje yokuba andifuni kukhumbula izinto ezimbi, kodwa akukho nto imbi ndinokuyicinga ngaye. Wayelelona nenekazi lihle endakha ndalibona kubomi bam bonke.”
NjengoJohn, abaninzi bakhumbula izinto ezintle ngabafileyo babo abathandekayo yaye bayavuma ukuba banqwenela ukubabona kwakhona. UEdith, unyana wakhe oneminyaka engama-26 owabulawa ngumhlaza, wathi: “Ndinendawana yokukholelwa ukuba unyana wam uyaphila ndaweni ithile kodwa andazi ukuba phi. Ngaba ndiya kumbona kwakhona? Andazi kodwa ndinethemba lokuba ndiya kumbona.”
Ngokuqinisekileyo, uMdali woluntu onothando uyawuqonda lo mnqweno uqhelekileyo abantu abanawo. Kungeso sizathu le nto athembise ukuba kuza ilixa apho izigidi ziya kuba kunye nabafileyo bazo abathandekayo kwakhona. Izihlandlo ezininzi iLizwi likaThixo libhekisela kwesi sithembiso sovuko lwabafileyo oluza kubakho.—Isaya 26:19; Daniyeli 12:2, 13; Hoseya 13:14; Yohane 5:28, 29; ISityhilelo 20:12, 13.
Ngoobani Abavuselwa Ezulwini?
Makhe siqwalasele ithemba likaJohn lokuba unina othandekayo umlindile ezulwini. Abantu abaninzi abangabahambi becawa baneli themba okanye le nkolelo. Bezama ukuxhasa iingcamango ezinjalo, abefundisi noonontlalo-ntle abathile baye bagqwetha imibhalo yeBhayibhile.
Ngokomzekelo, kwincwadi yayo ethi On Children and Death enye ingcali ekuncedeni abo baphantsi kwelifu elimnyama, uGqr. Elisabeth Kübler-Ross yathi: “Ukufa kuthetha ukuba kuphela silahla umzimba wethu njengokuba besisenokulahla idyasi yethu egugileyo, okanye sisuke kwelinye igumbi siye kwelinye. KwiNtshumayeli, 12:7, sifunda oku: ‘Lungekabuyeli emhlabeni uthuli, njengoko belunjalo, umoya ubuyele kuThixo owawunikayo.’ UYesu wathi: ‘Ndiyemka ndiya kunilungisela indawo; ukuze apho ndikhona mna, nibe khona nani.’ Ibe ethetha nesela elalisemnqamlezweni wathi: ‘Namhlanje uya kuba nam eparadisi.’”
Ngaba le mibhalo ingasentla ngokwenene ithetha ukuba abafileyo bethu abathandekayo ngoku bayaphila yaye basilinde ezulwini? Makhe siyiqwalasele ngenyameko ngakumbi le mibhalo, siqale ngeNtshumayeli 12:7. Ngokucacileyo, indoda esisilumko eyabhala loo mazwi yayingafuni kuphikisa oko yayisele ikuthethe kwakule ncwadi inye yeBhayibhile: “Abadla ubomi bayazi ukuba baya kufa; ke bona abafileyo abazi lutho.” (INtshumayeli 9:5) Wayethetha ngokufa koluntu ngokubanzi. Ngaba kusengqiqweni ukukholelwa ukuba bonke abantu abazibanga bengakholelwa kuThixo nezaphuli-mthetho eziqaqadekileyo zabuyela kuThixo ekufeni kwazo? Nakanye. Phofu ke, oko akunakutshiwo nangomnye wethu, enokuba sizigqala njengabalungileyo okanye ababi. Ekubeni kungekho namnye kuthi owayekhe wakunye noThixo ezulwini, kunokutshiwo njani ukuba sibuyela kuye?
Ngoko, wayethetha ukuthini umbhali weBhayibhile xa esithi ekufeni, ‘umoya ubuyela kuThixo’? Xa wayesebenzisa igama lesiHebhere eliguqulelwe ngokuthi “umoya,” wayengathethi ngento ethile engaqhelekanga eyahlula umntu komnye. Kunoko, kwiNtshumayeli 3:19, kwalo mbhali weBhayibhile uphefumlelweyo uthi “mnye umoya kubo bonke” abantu nezilwanyana. Kuyabonakala ukuba wayethetha ukuba “umoya” ngamandla okuphila akwiiseli ezibumba imizimba yokwenyama yabantu nezilwanyana. Lo moya asizange siwufumane ngokuthe ngqo kuThixo. Wadluliselwa kuthi ngabazali bethu abangabantu xa sasikhawulwa saza sazalwa kamva. Ngokubhekele phaya, lo moya awuhambi emoyeni ngokoqobo uze ubuyele kuThixo xa umntu esifa. Ibinzana elithi, ‘umoya ubuyele kuThixo owawunikayo,’ sisafobe esithetha ukuba ithemba lekamva lomntu ofileyo ngoku lixhomekeke kuThixo. Kuxhomekeke kuye ukugqiba kwelokuba ngubani na aya kumkhumbula aze ekugqibeleni amvuse. Khawuphawule indlela iBhayibhile ekubonisa ngokucace ngayo oku kwiNdumiso 104:29, 30.
UYehova uThixo unenjongo yokuba inani elilinganiselweyo labalandeli abathembekileyo bakaKristu, elili-144 000 kuphela xa liphelele, liya kuvuselwa kubomi basezulwini njengoonyana bakaThixo bomoya. (ISityhilelo 14:1, 3) Aba babumba urhulumente wasezulwini kunye noKristu ukuze kusikelelwe uluntu olusemhlabeni.
Abokuqala ukuva ngako oku yayingabapostile bakaYesu abathembekileyo, awabaxelela oku: “Endlwini kaBawo zininzi iindawo zokuhlala; ukuba bekungenjalo ngendanixelelayo. Ndiyemka, ndiya kunilungisela indawo; ukuba ke ndimkile ndaya kunilungisela indawo, ndiya kubuya ndize, ndinamkelele kum ngokwam; ukuze apho ndikhona mna, nibe khona nani.” (Yohane 14:2, 3) Abo bapostile namanye amaKristu okuqala bafa yaye kwafuneka balinde ekufeni bengekho zingqondweni de uYesu afike eze kubavuza ngokubavusela ezulwini. Kungenxa yoko sifunda ukuba umfeli-nkolo wokuqala ongumKristu, uStefano, “walala ubuthongo.”—IZenzo 7:60; 1 Tesalonika 4:13.
Ukuvuselwa Kubomi Basemhlabeni
Kodwa kuthekani ngesithembiso sikaYesu kwisaphuli-mthetho esafela ecaleni kwakhe? NjengamaYuda amaninzi awayephila ngelo xesha, le ndoda yayikholelwa ukuba uThixo wayeya kuthumela uMesiya owayeya kumisela ubukumkani aze abuyisele uxolo nonqabiseko kuhlanga lwakwaYuda emhlabeni. (Thelekisa eyoku-1 yooKumkani 4:20-25 noLuka 19:11; 24:21 neZenzo 1:6.) Ngaphezu koko, lo menzi bubi wabonisa ukuba wayekholwa ukuba uYesu wayenguLowo wayenyulwe nguThixo ukuba abe nguKumkani. Kodwa, ngeso sihlandlo, ukufa kukaYesu njengomntu onetyala okwakusele kusondele kwenza oku kwabonakala kungenakwenzeka. Kungeso sizathu le nto uYesu waqinisekisa eso saphuli-mthetho ngokutshayelela isithembiso Sakhe ngala mazwi: “Inene ndithi kuwe namhlanje, uya kuba nam eParadisi.”—Luka 23:42, 43, NW.
Iinguqulelo zeBhayibhile ezifaka isiphumlisi phambi kwegama elithi “namhlanje” zibafaka engxakini abantu abafuna ukuqonda amazwi kaYesu. UYesu akazange aye kuyo nayiphi iparadisi kwangolo suku. Kunoko, walala ekufeni iintsuku ezintathu de uThixo wamvusa. Kwanasemva kokufa kukaYesu nokunyukela kwakhe ezulwini, kwafuneka alinde ngasekunene kukaYise de kufike ixesha lokuba alawule uluntu njengoKumkani. (Hebhere 10:12, 13) Kungekudala, ulawulo lukaYesu loBukumkani luya kuzisa isiqabu eluntwini luze luguqulele lo mhlaba uphela ekubeni yiparadisi. (Luka 21:10, 11, 25-31) Uya kwandula ke azalisekise isithembiso sakhe kweso saphuli-mthetho ngokusivusela ebomini emhlabeni. Yaye uYesu uya kuba naloo ndoda ngengqiqo yokuba uya kuyinceda kuzo zonke iimfuno zayo, kuquka nemfuno yokwenza indlela yayo yokuphila ivisisane nemithetho kaThixo yobulungisa.
Uvuko Lwabaninzi
Njengeso saphuli-mthetho saguqukayo, inkoliso yabantu iya kuvukela apha emhlabeni. Oku kuvisisana nenjongo kaThixo yokudala umntu. Indoda nomfazi bokuqala babekwa kumyezo oyiparadisi baza baxelelwa ukuba baweyise umhlaba. Ukuba babemthobele uThixo, ngebabengazange baluphale baze bafe. Ngexesha uThixo alimiseleyo, wonke lo mhlaba wawuya kweyiswa, wenziwe iparadisi yomhlaba wonke nguAdam nenzala yakhe efezekileyo.—Genesis 1:28; 2:8, 9.
Noko ke, ngenxa yokuba uAdam noEva bona ngabom, bazizisela ukufa bo-na nenzala yabo ababeya kuba nayo. (Genesis 2:16, 17; 3:17-19) Kungenxa yoko iBhayibhile isithi: “Isono sangena ngamntu mnye [uAdam] ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.”—Roma 5:12.
Mnye kuphela umntu owazalwa ekhululekile esonweni. YayinguNyana kaThixo ofezekileyo, uYesu Kristu, obomi bakhe basuswa ezulwini badluliselwa esibelekweni sentombi enyulu engumYuda, uMariya. UYesu wahlala engenasono yaye wayengakufanele ukubulawa. Ngaloo ndlela, ukufa kwakhe kulixabiso lokuhlawulela “isono sehlabathi.” (Yohane 1:29; Mateyu 20:28) Kungenxa yoko uYesu wayenokuthi: “Ndim uvuko, ndim ubomi; lowo ukholwayo kum, nokuba ubethe wafa, wodla ubomi.”—Yohane 11:25.
Ngoko, ewe, unokuqiniseka ngethemba lokuba kunye nabafileyo bakho abathandekayo kwakhona, kodwa oku kufuna ukuba ube nokholo kuYesu njengoMhlawuleli wakho uze umthobele njengoKumkani omiselwe nguThixo. Kungekudala uBukumkani bukaThixo buya kubutshayela bonke ububi kulo mhlaba. Bonke abantu abangafuniyo ukuthobela ulawulo lwabo baya kutshatyalaliswa. Noko ke, abalawulwa boBukumkani bukaThixo baya kusinda yaye baya kuxakeka emsebenzini wokuguqulela lo mhlaba ekubeni yiparadisi.—INdumiso 37:10, 11; ISityhilelo 21:3-5.
Ngoko liya kufika ixesha elichwayitisayo lokuqalisa kovuko. Ngaba uya kube ukho ukuze wamkele abafileyo? Konke oku kuxhomekeke koko ukwenzayo ngoku. Bonke abo ngoku bazithoba phantsi kolawulo loBukumkani bukaYehova ngoNyana wakhe, uYesu Kristu balindelwe ziintsikelelo ezimangalisayo.