Ukukhonza Neyona Ntlangano Inenkqubela
NGOKUBALISWA NGUROBERT HATZFELD
Namhlanje abantu abaninzi basebenzisa iremote control ukuvula umabonwakude ukuze babukele iindaba zangokuhlwa zinemifanekiso enemibala ngemibala, bengafane bakujonge njengento engaqhelekanga oko. Ukanti, kubonakala ngathi bekuyizolo oku xa ndandiyinkwenkwe eneminyaka eli-12 ubudala emangaliswe kukubukela umfanekiso wendoda omkhulu ngokungaqhelekanga kumboniso oshukumayo, yaye le ndoda yayithetha!
USENOKUCINGA ukuba, ezi asizondaba zibaluleke kangako. Kodwa kwakubonakala kungummangaliso osexesheni ngokwenene kum emva phayaa ngowe-1915, ngemihla yamandulo yemifanekiso eshukumayo ethe cwaka nenombala omnyama nomhlophe kuphela. Indoda endilisekileyo eneendevu yabonakala embonisweni yaza yathi: “IPhoto-Drama of Creation iboniswa yi-I.B.S.A., uMbutho waBafundi beBhayibhile Bezizwe Ngezizwe.” Kwiiyure ezimbini ezalandelayo, sabona ukutyhileka kwebali leBhayibhile. Isigidimi sayo esingokweZibhalo sasicacile yaye sihlaziya. Ukanti, kwakungumfanekiso oshukumayo, oxutywe neeslides ezinemibala-bala, nentetho ehambisana nawo eyayithimba ngokwenene ingqalelo yam.
Andizange ndikuqonde oku emva phayaa, kodwa umdla wam wobutsha ngobu bugcisa buphawulekayo wawusisiqalo somsebenzi wobomi bam bonke neyona ntlangano inenkqubela emhlabeni.
Imihla Yamandulo
Ngowe-1891 utata wayesuka eDillenburg, eJamani, esiya kummandla ohlala amaJamani eAllegheny, ePennsylvania, eUnited States. Kamva wadibana nentombazana ephuma kwintsapho yamaJamani apho, baza batshata. Ndazalwa ngoJulayi 7, 1903, ndaza ndakhuliswa ndithetha isiJamani nesiNgesi. Kanye ngaphambi kokuqalisa kweMfazwe Yehlabathi I ngowe-1914, ubhubhani wesifo sephepha wabulala abazali bam bobabini waza wandishiya ndiyinkedama. Ubawomkhulu wabulawa sistroke malunga nelo xesha.
Udadobawo, uMinna Boemer ngobubele wandithabathela entsatsheni yakhe. Wathi: “Ndinabantwana abahlanu. Ndisenokuba naye nongakumbi.” Nangona ndandibakhumbula abazali bam, uDadobawo uMinna wandenza ndaziva ndisekhaya.
Udadobawo wayenexesha elide elilungu leBandla laseAllegheny laBafundi beBhayibhile (njengoko amaNgqina kaYehova ayebizwa ngolo hlobo ngaloo mihla). Ngaphambi kowe-1909, uMzalwan’ uC. T. Russell, owayengumongameli weWatch Tower Society ngoko, naye wayesiya kwelo bandla. UDadobawo uMinna wayesiya nam kwiintlanganiso. Nangona intsapho yethu yayingenzi mgudu unyanisekileyo wokufundisisa okanye wokushumayela emva phayaa, nantoni na esasiyiva kwiintlanganiso, sasisabelana ngayo ngokungacwangciswanga nabantu esasibazi.
Kwakusebudeni beli thuba ‘iPhoto-Drama’ eyandishiya ndingawuvali umlomo. Ekubeni ndandityekele kwimisebenzi efuna ubuchule bezandla, ubuchule bokufota obutsha nobokuvelisa isandi nomfanekiso ngexesha elinye baba nomtsalane kum, njengoko yenjenjalo nemifanekiso eyenza izinto ezithabatha ixesha elide zikhawuleze. Ukubukela ukudubula kweentyatyambo kwakuchulumancisa!
Saba buhlungu kukufa kukaMzalwan’ uRussell ngowe-1916. Ekubeni sasihlala kanye eAllegheny, saya kumngcwabo wakhe eCarnegie Hall. Le yayiyiholo apho uMzalwan’ uRussell waba nengxoxo noE. L. Eaton ngowe-1903. Ndandiye ndeva amabali ngalo mfundisi wecawa iMethodist Episcopal owacel’ umngeni uC. T. Russell kwingxoxo yeentsuku ezintandathu, enethemba lokuhlazisa uphengululo lweBhayibhile lukaMzalwan’ uRussell. Kunoko, kwathiwa, uRussell ‘wavulela umbhobho wamanzi esihogweni.’ USara Kaelin, umlungiseleli wexesha elizeleyo wasePittsburgh owaziwayo, wayemazi ngokobuqu uRussell nenkosikazi yakhe. Emngcwabeni wabona uMaria Russell ebeka iintyatyambo kwibhokisi yomngcwabo zinephetshana elibhalwe oku, “Kumyeni Wam Othandekayo.” Nangona wayehlukene naye kwiminyaka engaphambilana, uMaria wayesamjonga njengomyeni wakhe.
Njengoko iminyaka yayihamba, ndaba namathuba amaninzi okufumana ubuchule bomsebenzi wezandla owaba luncedo kumsebenzi wam wexesha elizayo. Umalume owayendigcinile wayengumakhi. Ebudeni beeholide zam zesikolo, wayendivumela ndisebenze nabasebenzi bakhe bombane, sifakela umbane kwizindlu ezinkulu ezindala ebezikade zisebenzisa igesi. Ngowe-1918 abafundi kwisikolo sethu benza isixhobo sonxibelelwano sikanomathotholo. Sasidibana ngeengokuhlwa ukuze sifundisise nokuze senze amalingelo okusetyenziswa kombane nemagnethi. Ngowe-1926 mna nomhlobo wam sagqiba ekubeni sizabalazele ukuzalisekisa umnqweno endandinawo ngoxa ndandiyinkwenkwe—ukusebenza kwiinqanawa nokukhenketha ihlabathi. Sabhalisa kwisikolo sabantu abasebenza ngonxibelelwano lukanomathotholo iRadio Corporation of America.
Ubomi Obutsha EBheteli
Isikolo sikanomathotholo esasisiya kuso sasikwisiXeko saseNew York, ngoko ndandiwela umlambo ukuya eBrooklyn ukuze ndiye kwiintlanganiso zaBafundi beBhayibhile, ezaziqhutyelwa kwiholo eqeshwayo iMasonic Temple endala. Emva phayaa, kwakukho ibandla elinye kuphela kuwo wonke ummandla wesixeko esikhulu saseNew York. Xa abazalwana abasuka eBheteli (ikhaya lekomkhulu lentsapho yaBafundi beBhayibhile) bafumanisa ukuba ndandifundela ukufumana iphepha-mvume lezorhwebo likanomathotholo, bathi: “Yintoni ekwenza ufune ukuya elwandle? Sineziko likanomathotholo kanye apha yaye sifuna umntu wokusebenza kulo.” Bandibizela eofisini kudliwano-ndlebe. Ndandingazi nto ngeBheteli ngaphandle kokuba yayilikomkhulu laBafundi beBhayibhile.
Abazalwana badlan’ indlebe nam baza bancomela ukuba ndifunde ndide ndigqibe, ndifumane iphepha-mvume, ndandule ndize eBheteli. Xa ndaphumelelayo, kunokuba ndikhwele inqanawa eya embindini wolwandle, ndapakisha iimpahla zam ezazingekho ninzi ndaza ndakhwela uloliwe ohamba ngaphantsi komhlaba osinge eBheteli. Nangona ndandizahlulele kuYehova yaye ndineminyaka ndinenxaxheba kumsebenzi wokushumayela, ndandingekabhaptizwa kwada kwangoDisemba 1926, ndineeveki ezimbini ndifikile eBheteli. Yayingento ingaqhelekanga leyo ngelo xesha.
IBheteli yayixinene ngezo mini, inamalungu ali-150. Sasihlala singamadoda amane kwigumbi ngalinye. Ndaqhelana ngokukhawuleza nenkoliso yawo, ekubeni sonke sasisitya, sisebenza yaye silala kwisakhiwo esinye, yaye ngokuqinisekileyo, sonke sasisiya kwekuphela kwebandla elikwisiXeko saseNew York. IKhaya laseBheteli elitsha lagqitywa ngowe-1927 e-124 Columbia Heights, yaye sakwazi ukuhlala ngababini kwigumbi ngalinye.
Kwakhona ngowe-1927 kwavulwa umzi-mveliso omtsha e-117 Adams Street. Ndancedisa ekufuduseni izixhobo ezazikumzi-mveliso omdala e-55 Concord Street. Ukongezelela kwizixhobo zikanomathotholo, kumzi-mveliso kwakukho izinyusi, oomatshini bokushicilela, oomatshini bokuhlamba iimpahla, izibasi zeoli—nantoni na eyayineengcingo, ndandisebenza ngayo.
Noko ke, iBheteli yayingengomzi-mveliso nje kuphela. Incwadi nganye, iphecana ngalinye, iphephancwadi ngalinye, laliveliswa sisihlwele sabakhonzi abathobekileyo nabasebenza ngokuzimisela. Usukelo lwabo lwalungekuko ukuzenzela igama ehlabathini. Kunoko, kuphela babefuna ukwenza umsebenzi weNkosi—yaye wawumninzi!
Unxulumano Nomzalwana URutherford
Ndangenelwa kakhulu lilungelo lokusebenza noJoseph F. Rutherford, umongameli wesibini woMbutho. Wayeyindoda eyakhekileyo, engaphezulu kwe-1,8 leemitha ubude, engatyebanga, kodwa enomzimba. Inkoliso yabazalwana baseBheteli abaselula babemoyika de bamazi kakuhle. Wayesoloko efundisisa, elungiselela imibandela ebhaliweyo.
UMzalwan’ uRutherford wayelirharha. Kwintsapho yaseBheteli kwakukho oodade ababini abakhulileyo ababelapho ukususela ngexesha likaMzalwan’ uRussell. Babengakuthandi ukuhleka yaye bekholelwa ukuba kwakungafanelekanga ukuhleka ngokuvakalayo kwanokuba into ethile yayihlekisa. Maxa wambi ngesidlo sasemini uMzalwan’ uRutherford wayebalisa ibali elalidla ngokuhlekwa ngumntu wonke, nto leyo eyayibacaphukisa aba dade babini. Noko ke, kwakhona ngokufuthi wayekhokela iingxubusho zeBhayibhile ezakhayo zexesha lesidlo.
UMzalwan’ uRutherford wayekwazi kakuhle ukupheka yaye ekuvuyela ukubalungiselela izidlo abahlobo. Ngesinye isihlandlo abapheki baseBheteli baqhekeza athile kumathambo eenkuku ngoxa babezinqunqa. Wenza imitsi ukuya kwigumbi lokuphekela waza wababonisa indlela efanelekileyo yokunqunqa inkuku. Wayengakuthandi ukutya okuneengceba zamathambo!
Ndandisoloko ndikunye noMzalwan’ uRutherford kwiimeko ezingacwangciswanga, njengakwisikhululo sethu sikanomathotholo, iWBBR, okanye kwigumbi lakhe lokufundela eStaten Island. Wayeyindoda enobubele ngokwenene yaye ekwenza oko wayekuthetha. Wayengalindeli nantoni na kwabanye awayengenako ukuyenza yena. Ngokungafaniyo nabantu abongamelayo kuninzi lwamanye amahlelo onqulo, uMzalwan’ uRutherford wayeneempawu zokomoya nezehambo entle. Wayephilela uBukumkani bukaYehova ngokucacileyo.
Amaxesha Anzima Ngokwemali
Emva kweminyaka embalwa ndifikile eBheteli, kwabakho ukuDodobala Kwezoqoqosho Okukhulu ehlabathini. Urhwebo lwawohloka, ngokukwanjalo nangamaxabiso ezinto zokuphila. Imisebenzi yayinqabile, yaye iminikelo imincinane. IBheteli yayiqhutywa ngemali yeminikelo, yaye uYehova wayesoloko eqinisekisa ukuba kwakukho eyaneleyo ukunyamekela umsebenzi. Asizange singabi nakutya, nangona kwakusenokungabi koko kwakunqwenelwa ngumntu ngamnye. Sasiphila ngokunoqoqosho kangangoko kwakunokwenzeka, yaye abazalwana ababengekho phakathi eBheteli babesinceda kangangoko babenako.
Ngowe-1932, uMzalwan’ uRobert Martin, umveleli othembekileyo womzi-mveliso wethu, wafa. UNathan Knorr owayeneminyaka engama-27 ubudala wamiselwa endaweni yakhe. Wayengumfana onobuchule ngokwenene. Andikhumbuli kukho nabani owaba nobunzima bokumamkela njengomveleli womzi-mveliso. Abanye abazalwana abathembekileyo, phakathi kwabo kukho uJohn Kurzen, uGeorge Kelly, uDoug Galbraith, uRalph Leffler noEd Becker—bonke bengabasebenzi abathandekayo ababekunye nam—banikela ngobuchule nangobugcisa babo ngeentliziyo ezivumayo kwinkonzo yoBukumkani.—Thelekisa iEksodus 35:34, 35.
Ukusebenza Ngonomathotholo
Intlangano yethu yayizinikele ngokupheleleyo ekusasazeni iindaba ezilungileyo nangaziphi na iindlela ezazifumaneka. Ihlabathi liphela kwakufuneka lazile ngoBukumkani, kodwa sasingamawaka ambalwa kuphela. Ubugcisa bukanomathotholo babusakhasa emva kweMfazwe Yehlabathi I. Noko ke, abazalwana abanokuqonda bavakalelwa kukuba le ndlela yonxibelelwano yayikoko uYehova wayekulungiselele ngelo xesha. Ngoko ngowe-1923 baqalisa ukwakha iziko likanomathotholo iWBBR eStaten Island, eyenye yeedolophu ezintlanu ezizimeleyo kwisiXeko saseNew York.
Maxa wambi ndandiba kuphela komntu osebenzayo kwiziko lethu. Ndandihlala apho eStaten Island kodwa ndandiye ndithabathe uhambo lweeyure ezintathu ngephenyane ndize ndikhwele uloliwe ukuya kumzi-mveliso eBrooklyn ukuze ndenze umsebenzi wombane nokulungisa oomatshini. Ukuze senze iziko lethu libe nako konke okuyimfuneko ngokusisiseko, safakela umatshini omkhulu wokuvelisa umbane osebenza ngedizili. Kwakhona eStaten Island sasinequla lethu lamanzi nesitiya esasixhasa abantu abambalwa ababesebenza apho, kuquka nentsapho yaseBheteli eBrooklyn.
Iimbopheleleko zokusebenza ngonomathotholo zalinciphisa ixesha lam lokuya kwiintlanganiso nakwinkonzo yasentsimini, kwada kwafumaneka uncedo olungakumbi kamva. Lalingekho kwaphela ixesha lokuzihlaziya okanye lokuthabatha uhambo ngeempela-veki ngaphandle kweholide yethu yonyaka. Omnye umntu othile wakha wandibuza: “Ngaba akuzange ucinge ngokuyishiya iBheteli, ngenxa yocwangciso olulucelomngeni owawunalo?” Ngokunyanisekileyo, kwafuneka ndithi: “Hayi.” Bekulilungelo novuyo ukuphila nokusebenza kunye nabazalwana noodade abaninzi abazinikeleyo. Yaye kwakusoloko kukho umsebenzi ekufanele wenziwe, umsebenzi omtsha wokwenziwa.
Sasibhala size sisasaze imidlalo kanomathotholo echukumisayo. Ekubeni zazingekho iikhasethi ezirekhodiweyo ezinezandi, kwafuneka siyile ezethu iindlela zokuzenza. Senza umatshini owawunokuphinda uvelise isandi sempepho epholileyo okanye sesaqhwithi esivunduzayo. Isandi sokubethanisa ikhokhonathi eyahlulwe kubini kwiplanga eligqunywe ngelaphu kwakuyila ukungqisha kweempuphu zehashe kwisitrato esakhiwe ngamatye. Umdlalo ngamnye wawunomphumo obalaseleyo. Yaye abantu babeyiphulaphula. Ngaloo mihla yeziphazamiso ezingephi, abantu abaninzi babehlala baze banikele ingqalelo.
Ngeminyaka yee-1920 nasebutsheni beyee-1930, uMbutho wenza into engazange ibonwe koonomathotholo, ngokudibanisa elona nani likhulu lamaziko kucwangciso olunye. Ngaloo ndlela iindaba zoBukumkani zafikelela kwizigidi ehlabathini lonke.
Igramafoni
Phakathi kwiminyaka yee-1930 nasebutsheni beyee-1940, sayila saza senza oomatshini abazizidlali-macwecwe, iigramafoni, nezinye izixhobo zesandisi-lizwi. Ngokusebenzisa umatshini okhethekileyo osika izinto ezingqukuva, sasika amacwecwe aziziseko kwiidisc zekhaphela. Emva koko sasihlola ngenyamekokazi icwecwe ngalinye elisisiseko ngokusebenzisa isibonakhulu ukuze siqiniseke ukuba lalingenasiphako. Ukuba kwakukho naziphi na iziphako, kwakufuneka kuphindwe kurekhodwe kuze kuphindwe kusikwe amacwecwe aziziseko. Emva koko sasiye sithumele amacwecwe ekhaphela aziziseko kumzi-mveliso wokurekhoda, owawusenza amacwecwe egramafoni nawomatshini wokudlala amacwecwe.
Esinye isiganeko esichukumisayo endisikhumbula kakuhle yayiyintetho kaMzalwan’ uRutherford ngowe-1933 eyayinomxholo othi “Umphumo Wonyaka Ongcwele Kuxolo Nempumelelo.” Upopu wayevakalise loo nyaka ‘njengonyaka ongcwele,’ yaye ngosasazo lukanomathotholo nolwegramafoni, sakubhenca oko saza sabonisa ukuba akukho nto injalo yayiza kwenzeka. Njengoko kwaba njalo, uHitler waqalisa ukulawula ngaloo nyaka exhaswa yiCawa yamaKatolika, ngoko nawaphi na amathemba oxolo athi shwaka.
EUnited States, intlangano yeCatholic Action yasekwa ukuze iphumeze oko kwakufunwa yicawa. Yabeka amadoda ayo kwizikhundla eziphezulu zabahleli bamaphephandaba, abamaphephancwadi nakubapapashi beencwadi abaphambili. Yagxuphuleka kwiipolitiki yaza yasongela ngokukwaya naliphi na iziko elalineentetho zethu zeBhayibhile. AmaNgqina amaninzi ahlaselwa ngamaqela eCatholic Action, ngokukodwa kwiNew Jersey ekufutshane. Kwakunzima ngezo mini!
Umsebenzi Ovuyisayo Entsimini
Phakathi kwiminyaka yee-1950, izintlu ezandayo zabavakalisi boBukumkani zazifikelela abantu abangakumbi kanye kwiminyango yamakhaya abo. Oku kwangqineka kuphumelela ngakumbi kunonomathotholo ekuncedeni abantu ngabanye baqonde inyaniso yeBhayibhile. Ngoko ngowe-1957 kwagqitywa ekubeni ithengiswe iWBBR buze ubuncwane namandla ethu ajoliswe kumsebenzi wobuvangeli basemazweni owandayo kwamanye amazwe.
Ngowe-1955, ndabelwa kwiBandla laseBedford eBrooklyn, apho ndandiqhuba iSifundo seMboniselo ngokuthe rhoqo. Kwakhona uMbutho wandithuma njengesithethi esihambahambayo emantla eNew York, ePennsylvania, eConnecticut naseNew Jersey. Xa ndabelwa kwiBandla laseBedford, ndazixelela oku, ‘Ndingaphezu kweminyaka engama-50 ubudala. Kuya kulunga ngakumbi ukuba ndibe nenxaxheba kangangoko ndinako kwinkonzo yasentsimini ngoku. Kamva ndisenokuba nesinqe ndize ndingayinandiphi kangako.’
Emva kokusebenza yonke loo minyaka ekusasazeni imbewu yoBukumkani ngokusebenzisa ubugcisa bukanomathotholo, ndakufumanisa kuyolisa ngokwenene ukutyala nokunkcenkceshela iimbewu zenyaniso yeBhayibhile ngokuthe ngqo ebantwini. Ndakuvuyela ngokwenene ukusebenza nebandla. Abazalwana abahlukahlukeneyo babendamkela, bendenza ndizive ndisekhaya ngokupheleleyo. Bambi kwabo bantwana ababebancinane, abakhulileyo ngoku, basandibiza ngokuthi tatomkhulu. Kangangeminyaka engama-30 saba nexesha elimnandi kubulungiseleli basentsimini, kwada ukukhathazwa yimilenze naziinyawo kwandenza andakwazi ukunyuka amanqwanqwa okanye ukuhamba ngololiwe ohamba ngaphantsi komhlaba. Ngowe-1985, ndatshintshela kwiBandla laseBrooklyn Heights, elidibanela kanye eBheteli.
Njengoko intlangano kaYehova isanda kakhulu, ndaba nelungelo lokuyibona ngokobuqu intsikelelo yakhe kwimimandla ekude njengoko ndandisiya kwiindibano zamaNgqina kaYehova ezinkulu kumazwe akude. Ngapha koko ndiye ndakwazi ukulikhenketha lonke ihlabathi! Ukususela ngeminyaka yee-1950, abathile kuthi bakhonza eBheteli bakwazi ukubona iLondon, iParis, iRome, iNuremberg neCopenhagen. Sasihamba ngeenqwelo-moya ezazikade zisetyenziswa emfazweni, ngephenyane nangololiwe. Kakade ke, olu hambo lwalubukeka, kodwa eyona mibono yayichukumisa yayizizihlwele zabazalwana abanobubele ababesamkela. Amashumi eminyaka emva koko ezisa olunye uhambo oluya eMpuma naseNtshona Yurophu, yaye kutshanje eMpuma Yurophu. Iindibano ezimangalisayo zasePoland, eJamani naseCzechoslovakia zazisemagqabini. Hayi indlela eye yakhula ngayo intsapho yethu yobuthixo ukususela oko ndaqalisa ukuba yinxalenye yayo!
Ukhokelo LukaThixo
Oko kwakubonakala ngokungathi ngamanyathelo amancinane athatyathwa yintlangano kamva kwaguqukela ekubeni yimitsi emikhulu. Xa sasiguqukela kwiindlela ezintsha, izixhobo nje zokusinceda senze umsebenzi wokushumayela, ngubani owayenokulubona kwangaphambili olu lwando lungummangaliso? Siye sahambela phambili elukholweni, silandela ukhokelo lukaYehova.
Le ntlangano inenkqubela ayikhange yoyike ukusebenzisa ubugcisa banamhlanje obufumanekayo okanye yenze obayo ukuze inyamekele intsimi yehlabathi lonke. Phakathi kweendlela ezasetyenziselwa ukuhambisela phambili ukuvakaliswa koBukumkani iye yaba kukushumayela kwindlu ngendlu, ukusetyenziswa kokudityaniswa kwamaziko kanomathotholo, ukushumayela ngegramafoni, nelungiselelo lokuqhuba izifundo zeBhayibhile kumakhaya abantu. Ukuvula amaziko ethu okushicilela ngezo mini zamandulo yaye ngoku ukusebenzisa inkqubo yekhompyutha yokwenza umsebenzi ngaphambi kokushicilela ngeelwimi ezininzi akuyonto incinane. ISikolo seBhayibhile seWatchtower saseGiliyadi, iSikolo Sobulungiseleli Sobuthixo, neendibano ezithe rhoqo zonke ziye zanegalelo ekuziseni uzuko kuYehova uThixo noNyana wakhe. Ndiye ndaba nelungelo lokuzibona ngokobuqu nokuba nenxaxheba kuzo zonke ezi ziganeko.
Lindicacele elokuba intlangano kaYehova yasemhlabeni eyalathiswa ngomoya wakhe ifumana ukhokelo ngoko kufanele kwenziwe nangendlela ekufanele kwenziwe ngayo. Intlangano yakhe yendalo iphela, ebonakalayo nengabonakaliyo, isebenza ngokumanyeneyo.
Andizange ndizisole ngokuncama izigqibo zam zobufana zokukhenketha ngenqanawa. Ndandinokuthini, eyona nkqubela ibangel’ umdla nebalaseleyo ehlabathini yenzeka kanye apha ngaphakathi kwintlangano kaYehova! Ngoko uhambo lwam oluya ‘kubizo lwaphezulu’ luye lwazaliswa luvuyo naziintsikelelo ezininzi kunene yaye khange ndizisole.—Filipi 3:13, 14.
Ndisoloko ndibaxelela abantu abaselula ukuba bakhumbule eye-1914—oko kukuthi, INdumiso 19:14, ethi: “Makakholeke amazwi omlomo wam, nezicamango zentliziyo yam, phambi kwakho, Yehova, liwa lam, mkhululi wam.” Sifuna ukumkholisa uYehova kuko konke yaye sithandaza njengoko wenjenjalo uDavide: “Ndazise iindlela zakho, Yehova, ndifundise umendo wakho. Ndinyathelise enyanisweni yakho, undifundise; ngokuba unguThixo ongumsindisi wam; ndithembe wena yonke imihla.” (INdumiso 25:4, 5) Loo mazwi anentsingiselo enzulu. Ukuwakhumbula kunokusinceda sihlale kumendo ofanelekileyo, sihambe ngekhondo elifanelekileyo, silandele intlangano kaYehova enenkqubela.
[Umfanekiso okwiphepha 23]
UMzalwan’ uRutherford wayekuvuyela ukubalungiselela ukutya abahlobo
[Umfanekiso okwiphepha 25]
URobert Hatzfeld ekumaqhosha olawulo kwiziko likanomathotholo iWBBR
[Umfanekiso okwiphepha 26]
Ifoto kaMzalwan’ uHatzfeld yakutshanje