Liphoseni KuYehova Lonke Ixhala Lenu
“Zithobeni . . . ngaphantsi kwesandla esinamandla sikaThixo, ukuze aniphakamise ngexesha elifanelekileyo. Lonke ixhala lenu liphoseni phezu kwakhe, ngokuba yena enikhathalele.”—1 PETROS 5:6, 7.
1. Ixhala linokusichaphazela njani, yaye oku kunokuzekeliswa njani?
AMAXHALA anokubuchaphazela ngamandla ubomi bethu. Anokufaniswa nokurharhaza okuthi maxa wambi kuphazamise ingoma emnandi kunomathotholo. Ukuba amaza kanomathotholo akaphazamiseki, kunokuphulaphulwa iingoma ezimyoli ezinokubangela ubani abe seluxolweni. Noko ke, ingxolo esisithukuthezi yokurharhaza inokwenza neyona ngoma imnandi ingavakali kakuhle, ibangele umsindo nokucaphuka. Amaxhala anokuba nemiphumo efanayo kuxolo lwethu. Anokusisinda kangangokuba singakwazi ukunikela ingqalelo kwimicimbi ebalulekileyo. Eneneni, “isithukuthezi [“ixhala,” NW] esisentliziyweni yendoda siyenza igobe.”—IMizekeliso 12:25.
2. Wathini uYesu Kristu “ngamaxhala obu bomi”?
2 UYesu Kristu wathetha ngengozi yokuphazanyiswa kukuxhalaba ngokugqithisileyo. Kwisiprofeto sakhe esingemihla yokugqibela, wabongoza: “Zilumkeleni ke, hleze zisindwe iintliziyo zenu kukuzingxala, nakukunxila, nangamaxhala obu bomi, ize loo mini inifikele ngebhaqo. Kuba iya kubazela njengomgibe bonke abahleliyo phezu kwehlabathi lonke. Phaphani ngoko, amaxesha onke nikhunga, ukuze kuthiwe nikufanele ukuzisaba zonke ezo zinto ziza kuhla, nokumiswa phambi koNyana woMntu.” (Luka 21:34-36) Kanye njengokuba ukuzingxala ngokudla nokusela kakhulu kunokuyidodobalisa ingqondo, ngokufanayo ke ‘namaxhala obu bomi’ anokubangela iingqondo zethu zingabi nambono ufanelekileyo, ize imiphumo ibe yintlekele.
Oko Likuko Ixhala
3. Lichazwa njani “ixhala,” yaye ziziphi ezinye zezinto ezilibangelayo?
3 “Ixhala” lichazwa ngokuthi “imo yokungazinzi engqondweni, yokungabi nakonwaba ngenxa yoloyiko okanye yengcinga ethath’ ibeka ngokungathi kwenzeke okungakholisi bani.” “Yinkxalabo okanye umdla obangelwa luloyiko” kwakunye “nonxunguphalo noloyiko olungaqhelekanga nolunamandla ngokufuthi olubonakala kwizinto ezenzeka emzimbeni (njengokubila, uxinezeleko, nokubetha ngamandla kwentliziyo), ngokuthandabuza ubunyaniso nokuba siya kuba njani na isisongelo eso, nangokuthandabuza kukabani amandla akhe okuhlangabezana naso.” (Webster’s Ninth New Collegiate Dictionary) Ngoko ixhala linokuba yingxaki entsonkothileyo. Phakathi kwezinto ezininzi ezilibangelayo kukugula, ukwaluphala, ukoyika ulwaphulo-mthetho, ukuphelelwa ngumsebenzi nokuxhalabela intlalo-ntle yentsapho kabani.
4. (a) Yintoni ekufuneka siyikhumbule ngabantu namaxhala abo? (b) Ukuba sinexhala, yintoni enokwenziwa?
4 Ngokucacileyo, ixhala liyahlukahlukana, kanye njengokuba kukho iimeko ezahlukahlukeneyo ezinokulibangela. Abantu abasabeli ngendlela efanayo bonke kwimeko ethile. Ngenxa yoko, kufuneka siqonde ukuba kwanokuba into ethile ayisikhathazi, isenokuba ngunobangela wexhala elingathethekiyo kwabanye esinqula nabo uYehova. Kunokwenziwa ntoni ukuba ixhala lifikelela kwinqanaba lokuba singakwazi ukunikela ingqalelo kwiinyaniso ezivisisanayo nezimnandi zeLizwi likaThixo? Kuthekani ukuba siba nexhala kangangokuba singakwazi ukunikela ingqalelo kwimbambano yolongamo lukaYehova nengqibelelo yamaKristu? Sisenokungakwazi ukuziguqula iimeko zethu. Kunoko, kufuneka sikhangele iingongoma zeZibhalo eziya kusinceda sihlangabezane namaxhala angeyomfuneko abangelwa ngamahlandinyuka obomi.
Uncedo Luyafumaneka
5. Sinokwenza njani ngokuvisisana neNdumiso 55:22?
5 Xa amaKristu efuna uncedo lokomoya ibe esindwa ngamaxhala, anokuthuthuzelwa liLizwi likaThixo. Linikela ukhokelo olunokuthenjwa yaye lisinika iziqinisekiso ezininzi zokuba asisedwa njengabakhonzi bakaYehova abanyanisekileyo. Ngokomzekelo, umdumisi uDavide wavuma le ngoma: “Umthwalo wakho wulahlele kuYehova; yena wokuzimasa; akayi kuliyekela ilungisa lishukunyiswe naphakade.” (INdumiso 55:22) Sinokwenza njani ngokuvisisana nala mazwi? Ngokuphosela onke amaxhala, izinto ezisikhathazayo, uloyiko nokuphoxeka kwethu kuBawo wethu wasezulwini onothando. Oku kuya kusinceda sizive sinqabisekile yaye sinoxolo lwentliziyo.
6. Ngokutsho kwabaseFilipi 4:6, 7, umthandazo unokusenzela ntoni?
6 Ukuthandaza rhoqo ngokusuka entliziyweni kubalulekile ukuba siza kulahlela umthwalo wethu, kuquka lonke ixhala lethu, kuYehova. Oku kuya kusenza sibe noxolo lwangaphakathi, kuba umpostile uPawulos wabhala: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.” (Filipi 4:6, 7) “Uxolo lukaThixo” olungenakuthelekiswa nanto luxolo lwengqondo olungaqhelekanga olunanditshwa ngabakhonzi bakaYehova abazahluleleyo kwanakwezona meko zilingayo. Lubangelwa lulwalamano lwethu olusenyongweni noThixo. Njengoko sithandazela umoya oyingcwele size siwuvumele usiphembelele, asikhululwa kuzo zonke iingxaki zobomi, kodwa sinandipha isiqhamo somoya esiluxolo. (Luka 11:13; Galati 5:22, 23) Ixhala alisoyisi, kuba siyazi ukuba uYehova ubenza ‘bahlale bekholosile’ bonke abantu bakhe abathembekileyo ibe akayi kuvumela nantoni na ibenzakalise ngonaphakade.—INdumiso 4:8.
7. Yiyiphi indima yabadala abangamaKristu ekusincedeni sihlangabezane nexhala?
7 Sekunjalo, kuthekani ukuba sihlala sinexhala, nangona sicamngca ngeZibhalo yaye sizingisa emthandazweni? (Roma 12:12) Abadala abamiselweyo ebandleni bakwalilungiselelo likaYehova lokusinceda ngokomoya. Banokusithuthuzela baze basincedise ngokusebenzisa iLizwi likaThixo nangokuthandaza nathi nangokusithandazela. (Yakobi 5:13-16) Umpostile uPetros wabongoza abanye abadala ukuba bawaluse umhlambi kaThixo ngokuzithandela, ngentumekelelo, nangendlela engumzekelo. (1 Petros 5:1-4) La madoda acinga ngezilangazelelo zethu ibe afuna ukuba luncedo. Kakade ke, ukuze singenelwe ngokupheleleyo kuncedo lwabadala nokuze siqhube kakuhle ngokomoya ebandleni, sonke kufuneka sisebenzise isiluleko sikaPetros: “Nina manci, wathobeleni amadoda amakhulu. Thobelanani nonke ke, ninxibe ukuthobeka kwentliziyo; ngokuba uThixo uyabachasa abanekratshi, abababale ke abazithobileyo.”—1 Petros 5:5.
8, 9. Inokusithuthuzela njani eyoku-1 kaPetros 5:6-11?
8 UPetros wongezelela: “Zithobeni ngoko ngaphantsi kwesandla esinamandla sikaThixo, ukuze aniphakamise ngexesha elifanelekileyo. Lonke ixhala lenu liphoseni phezu kwakhe, ngokuba yena enikhathalele. Yibani nobungcathu, phaphani; ngokuba ummangaleli wenu, uMtyholi, uhamba njengengonyama egqumayo, efuna ubani angamginyayo; mchaseni lowo, nizimasekile elukholweni, nisazi ukuba kwaezo ntlungu ziyenzeka kubo abazalwana benu abasehlabathini. Ke kaloku uThixo walo lonke ubabalo, owasibizelayo eluzukweni lwakhe olungunaphakade, sikuKristu Yesu, wanga angathi ngokwakhe, nakuba nive ubunzima umzuzwana, anilungise nigqibelele, anizimase, anomeleze, anisekele. Kuye makubekho uzuko namandla, kuse emaphakadeni asemaphakadeni. Amen.”—1 Petros 5:6-11.
9 Hayi indlela okuthuthuzela ngayo ukuqonda ukuba ‘lonke ixhala lethu sinokuliphosa kuThixo, kuba esikhathalele’! Yaye ukuba ezinye izinto ezisixhalabisayo ngamalinge kaMtyholi okutshabalalisa ulwalamano lwethu noYehova ngokusitshutshisa nangezinye iimbandezelo, ngaba akuvuyisi ukwazi ukuba izinto ziya kubahambela kakuhle abagcini bengqibelelo? Ewe, emva kokuba sive ubunzima umzuzwana, uThixo walo lonke ubabalo uya kusilungisa sigqibelele aze asizimase asomeleze.
10. Eyoku-1 kaPetros 5:6, 7 ibhekisela kweziphi iimpawu ezintathu ezinokusinceda sithothise ixhala?
10 Eyoku-1 kaPetros 5:6, 7 ibhekisela kwiimpawu ezintathu ezinokusinceda sihlangabezane nexhala. Olunye kukuzithoba, okanye “ukuthobeka kwentliziyo.” 1Pe 5 Indinyana 6 ephetha ngamazwi athi “ngexesha elifanelekileyo,” ibonisa imfuneko yomonde. 1Pe 5 Indinyana 7 ibonisa ukuba ngentembelo sinokuphosela kuThixo lonke ixhala lethu ‘kuba esikhathalele,’ yaye loo mazwi akhuthaza ukukholosa ngoYehova ngokupheleleyo. Ngoko makhe sibone indlela ukuthobeka, umonde, nokukholosa ngokupheleleyo ngoThixo okunokusinceda ngayo sithothise ixhala.
Indlela Ukuthobeka Okunokunceda Ngayo
11. Ukuthobeka kunokusinceda njani sihlangabezane nexhala?
11 Ukuba sithobekile, siya kuvuma ukuba iingcinga zikaThixo ziphakame kakhulu kunezethu. (Isaya 55:8, 9) Ukuthobeka kusinceda siqonde ukuba iingqondo zethu zisikelwe umda xa zithelekiswa nembono kaYehova ephangaleleyo. Ubona izinto esingaziqondiyo, njengokuba kwabonakala kwimeko yendoda elilungisa uYobhi. (Yobhi 1:7-12; 2:1-6) Ngokuzithoba “ngaphantsi kwesandla esinamandla sikaThixo,” sivuma ukuba thina siphantsi xa sithelekiswa noMongami oPhakamileyo. Oku ke, kusinceda sihlangabezane neemeko azivumelayo. Iintliziyo zethu zisenokulangazelela ukukhululwa ngokukhawuleza, kodwa ekubeni iimpawu zikaYehova zilungelelene ngokugqibeleleyo, wazi kakuhle ukuba umele asincede nini yaye njani. Ngoko, njengabantwana abancinane, ngokuthobeka masibambelele kwisandla sikaYehova esinamandla, sinentembelo yokuba uya kusinceda sihlangabezane namaxhala ethu.—Isaya 41:8-13.
12. Sinokuhlangabezana njani nokuxhalela unqabiseko lwezinto eziphathekayo ukuba ngokuthobeka sisebenzisa amazwi akumaHebhere 13:5?
12 Ukuthobeka kuquka ukukulungela ukusebenzisa isiluleko esivela eLizwini likaThixo, ngokufuthi esinokulithothisa ixhala. Ngokomzekelo, ukuba ixhala lethu libangelwa kukubandakanyeka kakhulu ekusukeleni izinto eziphathekayo, kusengakuhle siqwalasele isiluleko sikaPawulos: “Isimilo senu masibe sesingathandi mali, yanelani zizinto eninazo; kuba etshilo [uThixo] ukuthi, Andiyi kukha ndikuyekele; wabuya wathi, Andiyi kukha ndikushiye.” (Hebhere 13:5) Ngokusebenzisa isiluleko esinjalo ngokuthobeka, abaninzi bazikhulule kumaxhala amaninzi okunqabiseka ngezinto eziphathekayo. Ngoxa iimeko zabo zemali zisenokuba aziphucukanga, imali asinto iphambili kwiingcinga zabo ize ibenzakalise ngokomoya.
Indima Yomonde
13, 14. (a) Ngokubhekisele kunyamezelo ngomonde, indoda egama linguYobhi yamisela wuphi umzekelo? (b) Ukulindela kuYehova ngomonde kunokusenzela ntoni?
13 Ibinzana elithi “ngexesha elifanelekileyo” kweyoku-1 kaPetros 5:6 libonisa imfuneko yokunyamezela ngomonde. Maxa wambi ingxaki izingisa ixesha elide, yaye oko kusenokulikhulisa ixhala. Ngokukodwa ke xa kunjalo kufuneka sishiyele imicimbi ezandleni zikaYehova. Umfundi uYakobi wabhala: “Sithi, banoyolo abo banyamezelayo. Unyamezelo lukaYobhi naluva, nesigqibo seNkosi nasibona, ngokuba iNkosi inemfesane enkulu, inenceba.” (Yakobi 5:11) UYobhi walahlekelwa ngokwezoqoqosho, wafelwa ngabantwana abalishumi, wafunyanwa sisifo esinyanyekayo, ibe wagwetywa phosakeleyo ngabathuthuzeli bobuxoki. Noko ke umlinganiselo othile wexhala ubuya kuba ngoqhelekileyo ngaphantsi kweemeko ezinjalo.
14 Nokuba imeko yayiyintoni na, uYobhi waba ngumzekelo wokunyamezela ngomonde. Ukuba ukholo lwethu luvavanywa ngokuqatha, kusenokufuneka silindele ukukhululeka, njengokuba wenzayo. Kodwa uThixo wamnceda, ekugqibeleni emkhulula uYobhi ekubandezelekeni kwakhe yaye embuyekeza ngokuyintabalala. (Yobhi 42:10-17) Ukulindela kuYehova ngomonde kukhulisa unyamezelo lwethu yaye kutyhila ubunzulu bokuzinikela kwethu kuye.—Yakobi 1:2-4.
Ukukholosa NgoYehova
15. Kutheni sifanele sikholose ngoYehova ngokupheleleyo?
15 UPetros wabongoza amanye amakholwa ukuba ‘lonke ixhala lawo aliphosele kuThixo ngokuba ewakhathalele.’ (1 Petros 5:7) Ngoko sinako yaye sifanele sikholose ngoYehova ngokupheleleyo. IMizekeliso 3:5, 6 ithi: “Kholosa ngoYehova ngentliziyo yakho yonke, ungayami okwakho ukuqonda. Uze umazi yena ezindleleni zakho zonke; wowulungelelanisa umendo wakho.” Ngenxa yamava exesha elidluleyo, bambi abanamaxhala bakufumanisa kunzima ukuthemba abanye abantu. Kodwa sinezizathu ezivakalayo zokukholosa ngoMdali wethu, uMthombo noMxhasi wobomi. Kwanokuba asiyithembi indlela esiya kusabela ngayo kumbandela othile, ngalo lonke ixesha sinokuthembela ngoYehova ukuba uya kusikhulula kwiinkxwaleko zethu.—INdumiso 34:18, 19; 36:9; 56:3, 4.
16. Wathini uYesu Kristu ngokuxhalela izinto eziphathekayo?
16 Ukukholosa ngoThixo kuquka ukuthobela uNyana wakhe, uYesu Kristu, owafundisa oko wayekufunde kuYise. (Yohane 7:16) UYesu wabongoza abafundi bakhe ukuba ‘baziqwebele ubutyebi emazulwini’ ngokukhonza uYehova. Kodwa kuthekani ngeentswelo zokuphathekayo eziquka ukutya, impahla, nekhusi? UYesu waluleka wathi: ‘Musani ukuba naxhala.’ Wabonisa ukuba uThixo uyazondla iintaka. Uzambathisa kakuhle iintyatyambo. Ngaba abakhonzi bakaThixo abangabantu abaxabisekanga ngaphezu kwezi zinto? Kakade baxabisekile. Ngenxa yoko, uYesu wabongoza: “Funani ke tanci ubukumkani bukaThixo nobulungisa bakhe, zaye zonke ezo zinto ziya kongezelelwa kuni.” UYesu wahlabela mgama: “Ngoko musani ukuxhalela ingomso; kuba ingomso liya kuxhalela okwalo.” (Mateyu 6:20, 25-34) Ewe, siyakufuna ukutya, isiselo, izinto zokunxiba, nekhusi, kodwa ukuba sikholosa ngoYehova, asiyi kuzixhalabela ngokungeyomfuneko ezi zinto.
17. Sinokuyizekelisa njani imfuneko yokufuna uBukumkani kuqala?
17 Ukuba sifuna uBukumkani tanci, simele sikholose ngoThixo size sigcine izinto ezibalulekileyo kwindawo yokuqala ebomini bethu. Umntu ontywilayo ongenazo izixhobo zokuphefumla ngaphantsi kwamanzi usenokuntywila efuna iimbatyisi ezineeperile ngaphakathi. Le yindlela ayilungiselela ngayo intsapho yakhe. Yinto ebalulekileyo, ngokwenene! Kodwa yintoni ebaluleke ngakumbi? Ngumoya! Umele amane evela ngaphezu kwamanzi ukuze azalise imiphunga yakhe. Umoya yeyona nto ibalulekileyo. Ngokufanayo, kusenokufuneka ngandlel’ ithile sibandakanyeke kule nkqubo yezinto ukuze sifumane izinto eziyimfuneko ebomini. Noko ke, izinto zokomoya zimele zibe kwindawo yokuqala kuba ubomi beentsapho zethu buxhomekeke kwezi zinto. Ukuze siphephe ukuzixhalela ngokungeyomfuneko iintswelo zokuphathekayo, simele sikholose ngoThixo ngokupheleleyo. Ngaphezu koko, ‘ukuhlala siphuphuma umsebenzi weNkosi’ kusenokuba luncedo ekuthothiseni ixhala kuba “uvuyo lukaYehova” ligwiba lethu.—1 Korinte 15:58; Nehemiya 8:10.
Qhubekani Niliphosa KuYehova Lonke Ixhala Lenu
18. Bubuphi ubungqina obukhoyo bokuba ukuphosela lonke ixhala lethu kuYehova kunokusinceda ngokwenene?
18 Ukuze sihlale sitsolise ingqalelo yethu kwizinto zokomoya, simele siqhubeke siliphosa kuYehova lonke ixhala lethu. Masihlale sikhumbula ukuba ubakhathalela ngokwenene abakhonzi bakhe. Ngokomzekelo: Ngenxa yokuba indoda yakhe yayingathembekanga kuye, omnye umfazi ongumKristu wayexhalabe kakhulu kangangokuba wayengakwazi kulala. (Thelekisa INdumiso 119:28.) Noko ke, ezingubeni wayephosela lonke ixhala lakhe kuYehova. Wayedla ngokuphalazela imbilini yakhe kuThixo, emxelela ngentlungu yena neentwazana zakhe ezimbini ababekuyo. Emva kokuba ethandaze ngokunyaniseka ecela uncedo, ngalo lonke ixesha wayeye akwazi ukulala, kuba wayenethemba lokuba uYehova uya kumnyamekela yena nabantwana bakhe. Lo mfazi wayewuqhawule ngokuseZibhalweni umtshato wakhe ngoku utshate nomdala yaye bonwabile.
19, 20. (a) Ziziphi ezinye zeendlela esinokuhlangabezana ngazo nexhala? (b) Sifanele siqhubeke sisenza ntoni ngalo lonke ixhala lethu?
19 Njengabantu bakaYehova, sineendlela ezahlukahlukeneyo zokuhlangabezana nexhala. Ukusebenzisa iLizwi likaThixo kuluncedo ngokukhethekileyo. Sinokudla okutyebileyo kokomoya uThixo akulungiselela ‘ngomkhonzi othembekileyo noqondayo,’ kuquka amanqaku aluncedo nahlaziyayo apapashwa kwiMboniselo noVukani! (Mateyu 24:45-47) Sinoncedo lomoya oyingcwele kaThixo. Ngokuthandaza rhoqo nangokunyaniseka singenelwa kakhulu. Abadala abangamaKristu abamiselweyo bakulungele ukunikela uncedo lokomoya nentuthuzelo.
20 Ukuthobeka kwethu nokuba nomonde kuyingenelo kakhulu ekuqhubaneni namaxhala anokusifikela. Ukukholosa ngoYehova ngokupheleleyo kubaluleke ngokukhethekileyo, kuba ukholo lwethu luyakheka njengokuba sifumana uncedo nolwalathiso lwakhe. Lona ke, ukholo kuThixo lunokusigcina singakhathazeki ngokungeyomfuneko. (Yohane 14:1) Ukholo lusishukumisela ekubeni sifune tanci uBukumkani size siqhubeke sixakekile emsebenzini ovuyisayo weNkosi, onokusinceda sihlangabezane nexhala. Umsebenzi onjalo usenza sizive sinqabisekile phakathi kwabo baya kuvumela uThixo iindumiso ngonaphakade. (INdumiso 104:33) Ngoko ke masiqhubeke siliphosela kuYehova lonke ixhala lethu.
Ubuya Kuphendula Uthini?
◻ Linokuchazwa njani ixhala?
◻ Ziziphi ezinye zeendlela esinokuhlangabezana ngazo nexhala?
◻ Ukuthobeka nomonde kunokusinceda njani sithomalalise ixhala?
◻ Ekuhlangabezaneni nexhala, kutheni kubalulekile ukukholosa ngoYehova ngokupheleleyo?
◻ Kutheni sifanele siqhubeke silahlela lonke ixhala lethu kuYehova?
[Umfanekiso okwiphepha 24]
Ngaba uyasazi isizathu sokuba uYesu athi, ‘Musani ukuba naxhala’?