Ubutyebi Obuxabiseke Kunene Bokwabelana Nabanye
NGOKUBALISWA NGUGLORIA MALASPINA
Xa unxweme lwaseSicily lwasithelayo, mna nomyeni wam saqalisa ukucinga ngendawo esasisiya kuyo, isiqithi saseMalta esikwiMeditera. Elinjani lona ukuchwayitisa ithemba! Njengoko inqanawa yayinqumla ulwandle, sacinga ngamava ompostile uPawulos eMalta ebudeni benkulungwane yokuqala.—IZENZO 28:1-10.
YAYINGUNYAKA we-1953, ibe iMalta ngelo xesha yayingekawamkeli ngokusemthethweni umsebenzi wokushumayela wamaNgqina kaYehova. Kunyaka owandulelayo, saphumelela kwiSikolo seBhayibhile seWatchtower saseGiliyadi yaye safumana isabelo sokuya eItali. Emva kwexesha elifutshane sifunda isiTaliyane, sasingxamele ukubona oko kwakusilindele eMalta.
Kwenzeka njani ukuba mna, ibhinqa eliselula, ndibe ngumvangeli wasemazweni? Makhe ndikucacisele.
Umzekelo Kamama Okhuthazayo
Ngowe-1926, xa intsapho yakowethu yayihlala eFort Frances, eOntario, eKhanada, umama wamkela incwadana ethi Millions Now Living Will Never Die kuMfundi weBhayibhile (njengoko amaNgqina kaYehova ayesaziwa njalo ngelo xesha). Wayifunda ngomdla omkhulu, waza kwangaloo veki inye waya kwisifundo seBhayibhile seqela, kusetyenziswa iphephancwadi iWatch Tower. Umama wayengumfundi weBhayibhile onenzondelelo, ibe wasamkela isigidimi esingoBukumkani bukaThixo njengobutyebi awayebufuna. (Mateyu 6:33; 13:44) Phezu kwako nje ukuchaswa ngokunogonyamelo nguBawo, yaye nangona wayenamantombazana amathathu amancinane awayemele awanyamekele, wakumela oko wayekufunda.
Ukholo lukamama olungaxengaxengiyo ebudeni beminyaka engama-20 eyalandelayo lwandigcina mna noodadewethu ababini abadala, uThelma noViola, sicinga ngethemba elimangalisayo lobomi obungunaphakade kwihlabathi elitsha lobulungisa. (2 Petros 3:13) Wajamelana neemvavanyo ezininzi ezinzima, kodwa asizange sikuthandabuze ukulunga kwekhondo awalithabathayo.
Ngowe-1931, xa ndandineminyaka elishumi kuphela, safudukela kwifama ekumantla eMinnesota, eU.S.A. Apho sasinganxulumani rhoqo namaNgqina kaYehova kodwa uMama wayesoloko esifundisa iBhayibhile. Inkonzo yakhe yokuzinikela njengecolporteur, okanye umlungiseleli wexesha elizeleyo, yandikhuthazela ukuba ndifune ukumthelela kuloo msebenzi. Ngowe-1938 mna noodadewethu ababini safuzisela uzahlulelo lwethu kuYehova ngokubhaptizwa kwindibano eyayiseDuluth, eMinnesota.
Emva kokuba ndiphumelele kwisikolo semfundo ephakamileyo ngowe-1938, uMama wandikhuthaza ukuba ndithabathe izifundo zoshishino ukuze ndikwazi ukuzixhasa njengovulindlela (igama elitsha lecolporteur). Oku kwangqineka kulicebiso elihle, ngokukodwa ekubeni uBawo wagqiba kwelokuba asishiye size sizibonele.
Ukwabelana Nabanye Ngobutyebi Bethu Ixesha Elizeleyo
Ekugqibeleni ndafudukela eKhalifoniya, ndaza ngowe-1947, ndaqalisa kumsebenzi wobuvulindlela eSan Francisco. Ngoxa ndandinenxaxheba kumsebenzi wangaphambi kwendibano silungiselela iNdibano “Yolwando LweeNtlanga Zonke” eLos Angeles, ndadibana noFrancis Malaspina. Usukelo lwethu olufanayo lomsebenzi wobuvangeli basemazweni lwakhokelela kwisiqalo solwalamano lothando. Satshata ngowe-1949.
NgoSeptemba 1951, mna noFrancis samenyelwa kwiklasi ye-18 eGiliyadi. Ngosuku lothweso-zidanga, ngoFebruwari 10, 1952, emva kweenyanga ezintlanu zokuqeqeshwa ngenyameko, amazwe esasiza kuthunyelwa kuwo abizwa ngokulandelelana kwawo ngumongameli wesikolo, uNathan H. Knorr. Xa wathi, “EItali, nguMzalwana noDade Malaspina,” saqalisa ukucinga ngohambo!
Kwiiveki ezimbalwa kamva, sakhwela inqanawa eNew York saza sahamba kangangeentsuku ezilishumi ukuya eGenoa, eItali. UGiovanni DeCecca noMax Larson, abasebenzi bekomkhulu laseBrooklyn, babelapho ezibukweni beze kuthi ndlela-ntle kuthi. EGenoa samkelwa ngabavangeli basemazweni ababeqhelene nemithetho entsonkothileyo yokungena kweli lizwe.
Sichukunyiswe yiyo yonke into eyayisingqongile, sakhwela uloliwe oya eBologna. Sasicinga ukuba siza kufikela kwisixeko esasonakaliswe ziibhombu zeMfazwe Yehlabathi II. Kodwa kwakusekho izinto ezininzi ezinomtsalane, njengevumba elimnandi lekofu eyomisiweyo yaza yagcadwa elalizalisa umoya wakusasa nevumba lezinongo leesosi ezibalaseleyo zilungiselelwa iintlobo ezininzi zepasta.
Ukuzalisekisa Usukelo
Saqalisa kubulungiseleli sinentshumayelo ecengceleziweyo, yaye sasiyinikela de isigidimi samkelwe okanye ucango luvalwe. Umnqweno wokuvakalisa izimvo zethu wasishukumisela ukuba silufundisise ngenyameko ulwimi. Emva kweenyanga ezine, sabelwa kwikhaya elitsha labavangeli basemazweni eNaples.
Esi sixeko sikhulu sibalasele ngeendawo zaso ezibukekayo. Sayinandipha inkonzo yethu apho, kodwa emva kwezinye iinyanga ezine, umyeni wam wabelwa kumsebenzi wesiphaluka, okanye wokuhambahamba, etyelela amabandla ukusuka eRome ukuya eSicily. Ekuhambeni kwexesha, kwakhona satyelela iMalta neLibya kuMantla eAfrika.
Ukuhamba ngololiwe ukusuka eNaples ukuya eSicily ebudeni baloo minyaka kwakuluvavanyo lonyamezelo ngokwasemzimbeni. Sasikhwela uloliwe ozele wema ngeembambo size sime kwindlela exineneyo phakathi kwezihlalo, maxa wambi kangangeeyure ezintandathu ukuya kwezisibhozo. Noko ke, oko kwakusinika ithuba elihle lokuhlolisisa abo babesingqongile. Izihlandlo ezininzi ibhotile enkulu yozenzele wewayini yayiba sisihlalo somnini wayo, owayesithi maxa wambi asele iwayini ekuyo ukuqabula unxano lwakhe ebudeni bohambo olude. Abo bakhweleyo abanobuhlobo babesoloko besabelana nathi ngesonka nesoseji yabo enongiweyo, isenzo esihle sokubuk’ iindwendwe, nesifudumez’ intliziyo esasisixabisa.
ESicily sasisamkelwa ngabahlobo ababethwala iisutikheyisi zethu ukunyuka intaba kangangeeyure ezintathu ezinesiqingatha ukuya kwibandla elisencotsheni. Ukwamkelwa ngokufudumeleyo ngabazalwana bethu abangamaKristu kwakusenza sikulibale ukudinwa kwethu. Maxa wambi sasikhwela iimeyile ezinemilenze eyomeleleyo, kodwa sasingaze sijonge ezantsi apho kwakunokuthi ukuphambuka nje kanye kwemeyile kusibangele siyokuwa ezantsi. Ukuyimela ngokuqinileyo kwabazalwana bethu inyaniso yeBhayibhile phezu kwabo nje ubunzima ababekubo kwasomeleza, yaye uthando ababelubonisa kuthi lwasenza sanombulelo ngokuba kunye nabo.
IMalta NeLibya
Sizaliswe ziinkumbulo zabazalwana bethu baseSicily, sahamba ngenqanawa ukuya eMalta. Umpostile uPawulos wafumana abantu abanobubele apho, yaye nathi sabafumana. Isaqhwithi eSt. Paul’s Bay sasenza sayiqonda ingozi iinqanawa ezincinane ezazijamelana nayo ngenkulungwane yokuqala. (IZenzo 27:39–28:10) Ukanti sasimele siye naseLibya. Sasiza kuhamba njani kweli lizwe laseAfrika apho umsebenzi wethu wawuvaliwe?
Kwakhona apho sadibana nezithethe ezahluke ngokupheleleyo. Imibono nezandi zesixeko saseTripoli zayitsala ingqalelo yam njengoko sasihamba sityhubela kwizitrato ezineentsika zommandla ophakathi edolophini. Amadoda ayesebenzisa impahla eyalukwe ngoboya benkamela ukuzikhusela kubushushu obuqatseleyo beNtlango iSahara emini nasebudeni bobusuku obupholileyo. Safunda ukuyiqonda nokuyihlonela indlela abantu abazilungelelanisa ngayo neemeko zemozulu kwindawo abahlala kuyo.
Inzondelelo yobulumko yabazalwana yasifundisa lukhulu ngokwayama ngamandla kuYehova nokulandela imiyalelo yabo banolwazi ngakumbi ngokushumayela phantsi kweemeko ezinjalo. Abazalwana bethu abangamaKristu babengabeentlanga ezininzi; ukanti babesebenza ngemvisiswano kwinkonzo yabo kuYehova.
Isabelo Esitsha
Ngenxa yokuchaswa komsebenzi wethu wokushumayela, kwafuneka siyishiye i-Itali, kodwa sasamkela ngovuyo isabelo esitsha sokushumayela eBrazil ngowe-1957. Mna noFrancis sazilungelelanisa nobomi namasiko, yaye emva kweenyanga ezisibhozo, uFrancis wamenyelwa kumsebenzi wesiphaluka. Sasihamba ngodula-dula, ngenqwelo-moya, nangeenyawo. Ukuhambahamba kweli lizwe likhulu nelihle, kwakufana nokufundiswa inzululwazi ngokuma komhlaba.
Isiphaluka sokuqala esasikuso sasiquka amabandla alishumi kwisixeko saseSão Paulo, ndawonye needolophana ezilishumi ngaphakathi nezigudle ummandla wonxweme ongezantsi welizwana iSão Paulo. Kwakungekho mabandla kwezo dolophu ngelo xesha. Sasifuna indawo yokuhlala, yaye emva kokuba siyifumene, sasisiya kwindlu ngendlu nesigidimi soBukumkani. Kwakhona sasishiya izimemo ezazimemela abantu baye kumboniso wenye yemifanekiso eshukumayo eyayifundisa yeWatch Tower Society.
Ukukhwela udula-dula nemifanekiso eshukumayo, umatshini wemifanekiso eshukumayo, itransformer, iifayile, uncwadi, izimemo nesixhobo sokubeka isitampu sendawo ozakuboniswa kuyo umfanekiso oshukumayo kwizimemo kwakungeyondlwan’ iyanetha. Ngokwentelekiso, isutikheyisi yethu encinane yeempahla yayingenkulwanga. Umatshini wemifanekiso eshukumayo sasimele siwusingathe ukuze ungangcangcazeli uze waphuke phakathi njengoko sasihamba kwiindlela ezimbi.
Emva kokufuna indawo yokubonisa umfanekiso oshukumayo, sasisiya kwindlu ngendlu size sishiye izimemo zomboniso womfanekiso oshukumayo. Maxa wambi sasifumana imvume yokubonisa umfanekiso oshukumayo kwivenkile yokudlela okanye ehotele. Ngamanye amaxesha sasisolula ishiti phakathi kwezibonda ezibini ngaphandle. Abaphulaphuli abanoxabiso, abaninzi kubo ababengazange bawubone umfanekiso oshukumayo, babesima baze baphulaphule ngenyameko njengoko uFrancis wayefunda inkcazelo. Emva koko, sasihambisa uncwadi lweBhayibhile.
Ukuze sifikelele kwiilali, sasihamba ngodula-dula. Yimbi imilambo yayingenabhulorho, ngoko udula-dula wayebekwa kwisihlenga esikhulu size sihambe emanzini ukuya kwelinye icala. Sasicetyiswa ukuba sehle kudula-dula, yaye ukuba sasibona udula-dula etyibilika etshona emlanjeni, sasimele sitsibe kwelinye icala lesihlenga ukuze siphephe ukurhaxwa. Okuvuyisayo kukuba asizange sitshonelwe ngudula-dula emlanjeni—oko kwakulithamsanqa, ngokukodwa ekubeni lo mlambo wawudume ngokuba nentlanzi ipiranha etya inyama!
Emva kokuya kwindibano yezizwe ngezizwe eyayiseNew York ngowe-1958, sabuyela eBrazil, apho kungekudala emva koko sabuyela kumsebenzi wokuhambahamba. Isithili sethu sasiphela kumda waseUruguay emazantsi, eParaguay entshona, kwilizwana lasePernambuco emantla, noLwandlekazi lweAtlantiki kwicala elikwimpuma yeBrazil.
Indawo Yabantu Abaneqhenqa
Phakathi kwiminyaka yee-1960, samkela isimemo sokuya kubonisa omnye wemifanekiso eshukumayo yoMbutho kwindawo yabantu abaneqhenqa. Ndimele ndivume ukuba ndandisoyika noko. Sasinolwazi oluncinane ngeqhenqa, ngaphandle koko sasikufunde eBhayibhileni. Ekungeneni kwethu enkomponi, eyayipeyintwe ngombala omhlophe, salathiselwa kwiholo enkulu. Kwakukho icandelo elahlulwe phakathi ngentambo ukwenzela thina nezixhobo zethu.
Igcisa lombane elalisinceda yayingumhlali wale ndawo iminyaka engama-40. Waphulukana nezandla zakhe ngokupheleleyo namanye amalungu omzimba wakhe, nto leyo eyamonakalisa kakubi. Ekuqaleni ndandothukile, kodwa indlela awayechwayita ngayo nobuchule bakhe ekusingatheni umsebenzi wakhe yandenza ndakhululeka. Kungekudala sasincokola ngezinto ezininzi njengoko sasigqibezela amalungiselelo ayimfuneko. Kubantu ababeliwaka ababandezelekileyo nababehlala kweso sakhiwo, kweza abangaphezu kwamakhulu amabini. Njengoko babengena beqhwalela, saphawula amanqanaba amaninzi awahlukahlukeneyo esi sifo babenaso. Hayi indlela awasichukumisa ngayo loo mava ngokweemvakalelo!
Sacinga oko uYesu wakuxelela oneqhenqa owambongoza wathi, “Nkosi, ukuba uyathanda, unako ukundihlambulula.” Echukumisa le ndoda, uYesu wayiqinisekisa, “Ndiyathanda, hlambuluka.” (Mateyu 8:2, 3) Emva kokuphela kocwangciso, uninzi lweza kusibulela ngokuza kwethu, imizimba yabo eyonakalisiweyo yayibubungqina obucacileyo bokubandezeleka okukhulu koluntu. Kamva, amaNgqina asekuhlaleni afundisisa iBhayibhile nababenomdla wokufunda okungakumbi.
Ngowe-1967 sabuyela eUnited States ukuze sinyamekele iingxaki ezinzulu zempilo. Njengoko sasiqhubeka sihlangabezana nazo, kwakhona saba nelungelo lokukhonza kumsebenzi wesiphaluka. Kwiminyaka engama-20 eyalandelayo, ndaba nesabelo kunye noFrancis kumsebenzi wokuhambahamba eUnited States. Ebudeni beli xesha wayekwafundisa kwiSikolo Sobulungiseleli SoBukumkani.
Onjani wona umthombo wokhuthazo kum ukuba nendoda enothando neqabane elithembekileyo elalinyamekela nasiphi na isabelo elalisinikwa! Sobabini saba nelungelo lokwabelana nabanye ngobutyebi benyaniso yeBhayibhile kwiinxalenye zamazwekazi amane.
Ukuzinyaswa Bubutyebi
Emva phayaa ngowe-1950, uMama watshata noDavid Easter, umzalwana othembekileyo owabhaptizwa ngowe-1924. Bakhonza kunye iminyaka emininzi kubulungiseleli bexesha elizeleyo. Noko ke, ebudeni benxalenye yokugqibela yobomi bukaMama, isifo sika-Alzheimer saqalisa ukuzibonakalisa. Wayefuna inyameko enkulu njengoko esi sifo sathi sawadodobalisa amandla akhe okuqiqa. Oodade wethu abanenkxaso noDavid bayithwala le mbopheleleko inzima yokumnyamekela, ekubeni babengafuni sishiye amalungelo ethu akhethekileyo enkonzo yexesha elizeleyo. Umzekelo kaMama wokuthembeka ukuza kuthi ga ekufeni kwakhe ngowe-1987 waba negalelo elikhulu ekusincedeni sicwangcise ikhondo lethu ebomini, yaye ithemba awayelixabisile lomvuzo wasezulwini lasithuthuzela.
Ngowe-1989, ndabona ukuba uFrancis wayengenamandla njengokuba wayenjalo. Sasingaqondi ukuba isnail fever, isifo esaziwayo kwiinxalenye ezininzi zehlabathi, sasimgqiba. Ngowe-1990, olu tshaba lungenalusini lwamoyisa, ndaza ndaphulukana neqabane lam endilithandayo endaba nesabelo kunye nalo enkonzweni kaYehova ngaphezu kwama-40 eminyaka.
Uhlengahlengiso yinxalenye yobomi. Lumbi lulula, olunye lunzima. Kodwa uYehova, uMniki wobutyebi obuxabiseke kunene benyaniso yeBhayibhile, wandizimasa ngentlangano yakhe nangothando nokhuthazo lwentsapho yakowethu. Ndisafumana ulwaneliseko njengoko ndikhangele phambili ekuzalisekeni kwawo onke amadinga kaYehova angasileliyo.
[Umfanekiso okwiphepha 23]
Mna nomyeni wam xa sasingabavangeli basemazweni eItali