IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w95 1/1 iphe. 24-26
  • “Emlonyeni Weentsana”

No video available for this selection.

Sorry, there was an error loading the video.

  • “Emlonyeni Weentsana”
  • IMboniselo Evakalisa UBukumkani BukaYehova—1995
  • Imixholwana
  • Ihambo Entle Inikela Ubungqina
  • AmaNgqina Aselula Aphumelelayo
  • Inkalipho Yabaselula Inikela Ubungqina Obuhle
IMboniselo Evakalisa UBukumkani BukaYehova—1995
w95 1/1 iphe. 24-26

“Emlonyeni Weentsana”

XA USAMUWELI wayeyinkwenkwe eselula, wayimela ngokuqinileyo imigaqo elungileyo phezu kwabo nje ubungendawo boonyana boMbingeleli Omkhulu uEli. (1 Samuweli 2:22; 3:1) Ngemihla kaElisha, umthinjwa omncinane ongumSirayeli wanikela ubungqina obukhuthazayo kwinkosazana. (2 Kumkani 5:2-4) Xa uYesu wayeneminyaka eli-12 ubudala, wathetha ngokungafihlisi kubafundisi bakwaSirayeli, ebabuza imibuzo enikela neempendulo ezamangalisa ababebukele. (Luka 2:46-48) Ukutyhubela imbali uYehova uye wakhonzwa ngokunyaniseka ngabanquli bakhe abaselula.

Ngaba namhlanje abantu abaselula babonisa loo moya ufanayo wokunyaniseka? Ewe, benjenjalo! Iingxelo ezisuka kwiiofisi zamasebe zeWatch Tower Society zibonisa ukuba ulutsha oluninzi gqitha olukholwayo ‘luzinikela ngeentliziyo’ kwinkonzo kaYehova. (INdumiso 110:3) Imiphumo emihle yemizamo yalo ikhuthaza onke amaKristu, aselula namadala, ‘ekubeni angethi mandla ekwenzeni okulungileyo.’—Galati 6:9.

Umzekelo omhle ngoka-Ayumi, intombazana encinane yaseJapan eyaba ngumvakalisi ineminyaka emithandathu ubudala yaza yakwenza usukelo lwayo ukunikela ubungqina kuye nabani oseklasini yayo. Yafumana imvume yokubeka iqela leempapasho kwithala leencwadi eliseklasini, ilungiselela ukuba ikwazi ukuphendula nawuphi na umbuzo onokubuzwa ngabo ifunda nabo esikolweni. Phantse bonke eyayifunda nabo eklasini kuquka nomfundisi-ntsapho baye bazazi ezo mpapasho. Ebudeni beminyaka yakhe emithandathu ekwisikolo sabaqalayo, uAyumi walungiselela ukuba kuqhutywe izifundo zeBhayibhile ezili-13. Wabhaptizwa ngoxa wayekwibanga lesibini, yaye omnye wabahlobo bakhe awayefundisisa naye wabhaptizwa ekwibanga lesine. Ukongezelela, unina noodade besi sifundo seBhayibhile nabo bafundisisa baza babhaptizwa.

Ihambo Entle Inikela Ubungqina

Umpostile uPetros wathi: “Ihambo yenu mayibe ntle phakathi kweentlanga,” yaye amaKristu aselula ngokuzimisela ayawamkela lo myalelo. (1 Petros 2:12) Ngokomphumo, ihambo yawo entle ngokufuthi inikela ubungqina obuhle. Kwilizwe laseAfrika iCameroon, indoda ethile yeza okwesihlandlo sesibini kwintlanganiso yebandla yamaNgqina kaYehova yaye kwenzeka ukuba ihlale ecaleni kwentombazana ethile eselula. Xa isithethi samema abaphulaphuli ukuba bakhangele isicatshulwa esithile eBhayibhileni, le ndoda yaphawula ukuba le ntombazana iselula yayifumana ngokukhawuleza le ndinyana eBhayibhileni yayo yaza ngenyameko yalandela ngoxa kufundwa. Isimo sayo sengqondo sayichukumisa kakhulu le ndoda kangangokuba ekuqukunjelweni kwentlanganiso, yaya kwisithethi yaza yathi: “Le ntombazana iselula indenze ndafuna ukufundisisa iBhayibhile kunye nani.”

EMzantsi Afrika kukho isikolo apho abafundi abangama-25 bengabantwana bamaNgqina kaYehova. Ihambo yabo entle iwenze aduma kakuhle amaNgqina kaYehova. Omnye umfundisi-ntsapho wazityand’ igila kumzali othile oliNgqina esithi akazi ukuba amaNgqina aphumelela njani ekuqeqesheni abantwana bawo kakuhle kangaka, ingakumbi ekubeni icawa yakhe ingqineke ingakwazi ukubanceda abaselula. Umfundisi-ntsapho omtsha waza kuncedisa kwesi sikolo yaye ngokukhawuleza waphawula ihambo entle yabantwana bamaNgqina. Wabuza enye yamakhwenkwe angamaNgqina ngoko afanele akwenze ukuze abe ngomnye wamaNgqina kaYehova. Yamcacisela ukuba ufanele abe nesifundo seBhayibhile, yaye yacwangcisela ukuba abazali bayo balandele lo mntu unomdla.

ECosta Rica, uRigoberto wabona intlantsi yenyaniso xa ababini awayefunda nabo eklasini basebenzisa iBhayibhile ukuphendula imibuzo ngoBathathu Emnye, umphefumlo, kunye nesihogo somlilo. Oko bakuthethayo kwaba nempembelelo entle kuye kungekuphela nje kuba benobuchule bokusebenzisa iZibhalo kodwa kwakhona ngenxa yehambo yabo ebalaseleyo eyayahluke kakhulu kuleyo wayeyibone kwiicawa zeNgqobhoko. Phezu kwayo nje inkcaso yentsapho yakokwabo, uRigoberto wenza inkqubela entle kakhulu kwisifundo sakhe seBhayibhile.

ESpeyin amaNgqina kaYehova amabini—omnye wawo oneminyaka esithoba ubudala—atyelela indoda egama linguOnofre. Ngoxa ubukhulu becala kwakuthetha iNgqina eselikhulile, eli Ngqina liselula lalandela ngokufunda iZibhalo yaye lacaphula izicatshulwa ezithile zeBhayibhile ngokusuka kwinkumbulo. UOnofre wayechukumisekile. Wagqiba ekubeni naye ufuna ukufundisisa iBhayibhile kule ndawo loo nkwenkwe iselula yayifunde kuyo ukusebenzisa iZibhalo kakuhle kangaka. Ngenxa yoko, ngentsasa elandelayo yangeCawa, waya kwiHolo yoBukumkani. Kwakumele alinde phandle kude kube ngenjikalanga, xa amaNgqina ayesiza kwiintlanganiso zawo. Ukususela ngoko, wenza inkqubela entle yaye kutshanje ufuzisele uzahlulelo lwakhe ngokubhaptizwa emanzini.

AmaNgqina Aselula Aphumelelayo

Ewe, uYehova usebenzisa abaselula nabadala ukufikelela abantliziyo zithobekileyo. Oko kwabonwa ngakumbi kumava asuka eHungary. Apho, umongikazi othile wasesibhedlele waphawula ukuba nanini na kufika iindwendwe ezize kubona intombazana ethile egulayo eneminyaka elishumi ubudala, zazidla ngokuyiphathela umbandela othile wokufunda kunye nento etyiwayo. Enomdla, wazibuza ngento enokufundwa yile ntombazana iselula yaye wafumanisa ukuba yayiyiBhayibhile. Lo mongikazi wathetha nayo waza kamva wathi: “Kwangesihlandlo sokuqala, ngenene yayindifundisa.” Xa le ntombazana iselula yaphuma esibhedlele, yamema lo mongikazi ukuba aye endibanweni, kodwa umongikazi walandula. Noko ke, kamva, wavuma ukuya kwiNdibano yeSithili ‘YeNtetho Enyulu.’ Kungekudala emva koko, waqalisa ukufundisisa iBhayibhile, yaye kwisithuba sonyaka kamva wabhaptizwa—konke oku kungumphumo wentombazana encinane esebenzisa ixesha layo isesibhedlele ukuze ifunde uncwadi lweBhayibhile.

UAna Ruth, e-El Salvador, wayekunyaka wakhe wesibini kwisikolo semfundo yamabanga aphakamileyo. Wayenomkhwa wokushiya uncwadi lweBhayibhile phezu kwedesika yakhe ukuze abanye balufunde ukuba babefuna. Ephawula ukuba olu ncwadi lwalunyamalala luze lubonakale emva kwexesha elithile, uAna Ruth wafumanisa ukuba omnye ofunda naye esikolweni, uEvelyn, wayelufunda. Emva kwexesha elithile, uEvelyn wasamkela isifundo waza waqalisa ukuya kwiintlanganiso zebandla. Ekugqibeleni, wabhaptizwa, yaye ngoku ukhonza njengovulindlela ongumncedani othe ngxi. UAna Ruth nguvulindlela othe ngxi.

EPanama udade othile waqalisa isifundo nomfazi othile onomyeni owaqalisa ukuyichasa inyaniso kangangokuba isifundo saphantse saphela. Noko ke, ngokuthe ngcembe saguquka isimo sengqondo sale ndoda. Emva kwexesha elithile kamva, umkhuluwa wayo, oliNgqina, wayicela ukuba ize kumfakela isixhobo sokulumkisa xa kuqhekezwa endlwini yakhe. Ngoxa ifakela esi sixhobo, umtshana wayo oneminyaka esithoba ubudala wafika ekhaya ekhangeleka edakumbe kakhulu. Yambuza ukuba konakele phi, yaye wathi, yena nodadewabo omkhulu bebeye kuqhuba isifundo seBhayibhile kodwa bafika engekho ekhayeni lakhe loo mntu, ngoko akazange akwazi ukumenzela nto uYehova ngolo suku. Uninalume wathi: “Kutheni ungashumayeli kum nje? Ngoko ke uya kumenzela okuthile uYehova.” Lo mtshana wayo wabaleka enemincili ukuya kuphuthuma iBhayibhile yakhe, yaye isifundo seBhayibhile saqaliswa.

Unina (umlanyakazi wale ndoda) wayephulaphule. Wayecinga ukuba yonke le nto ngumdlalo nje, kodwa ngalo lonke ixesha le ndoda isiya endlwini yakhe, yayicela umtshana wayo ukuba ayiqhubele isifundo seBhayibhile. Xa unina wabona ukuba umlanya wakhe wayezimisele yaye enemibuzo ethile enzima, wagqiba ekubeni asiqhube ngokwakhe isifundo ikho nentombi yakhe. Le ndoda yaqalisa ukufunda kabini ngeveki yaye yenza inkqubela ngokukhawuleza. Ekugqibeleni, yafikelela kwinqanaba lokuba izahlulele yaye yabhaptizwa kwindibano enye nomfazi wayo—ngoncedo lwesimo sengqondo esihle somtshana wayo oselula.

Inkalipho Yabaselula Inikela Ubungqina Obuhle

IBhayibhile ithi: “Yomelela, ikhaliphe intliziyo yakho, uthembele kuYehova.” (INdumiso 27:14) La mazwi asebenza kubo bonke abakhonzi bakaThixo, yaye abaselula kunye nabakhulu bawasebenzisile ebudeni bonyaka odluleyo. EOstreliya, xa intombazana ethile eneminyaka emihlanu ubudala yaqalisa kwisikolo esitsha, unina waya kumfundisi-ntsapho eyokucacisa oko amaNgqina kaYehova akukholelwayo. Lo mfundisi-ntsapho wathi: “Sele ndikwazi oko nikukholelwayo. Intombi yakho indicacisele konke.” Le ntombazana iselula ayizange yoyike ukubonana nomfundisi-ntsapho wayo iyodwa ukuze imcacisele ngokholo lwayo.

UAndrea oneminyaka emihlanu ubudala eRomania naye wabonisa inkalipho. Xa unina waphuma kwinkolo yobuOthodoki ukuze abe liNgqina, abamelwane bakhe abazange bavume ukumphulaphula. Ngenye imini kwiSifundo Sencwadi Sebandla, uAndrea weva umveleli wenkonzo egxininisa imfuneko yokuba ubani ashumayele kubamelwane bakhe. Wacingisisa nzulu ngako oku, yaye akufika ekhaya wathi kunina: “Mama, emva kokuba uhambile waya emsebenzini, ndiza kuvuka, ndilungise ingxowa yam enoncwadi njengoko usenza, yaye ndiza kuthandaza kuYehova ukuba andincede ndithethe ngenyaniso nabamelwane.”

Ngosuku olulandelayo uAndrea wenza oko ebekuthembisile. Wandula ke, ngenkalipho, wankqonkqoza kwammelwane. Xa ummelwane weza kuvula, le ntombazana incinane yathi: “Ndiyazi ukuba kususela oko umama wathi waba liNgqina, anisamthandi. Uzamile ukuthetha nani amaxesha amaninzi, kodwa anikhange nifune ukumphulaphula. Oku kuyamkhathaza, kodwa ndifuna nazi ukuba siyanithanda.” Wandula ke uAndrea wahlabela mgama enikela ubungqina obuhle. Ngosuku olunye, wahambisa iincwadi ezintandathu, amaphephancwadi amathandathu, iincwadana ezine, namaphecana amane. Ukususela ngoko, ebesiya rhoqo kwinkonzo yasentsimini.

ERwanda kuye kwafuneka abazalwana bethu babonakalise inkalipho enkulu ngenxa yokruthakruthwano olulapho. Ngesinye isihlandlo intsapho ethile yamaNgqina yafakwa egumbini apho amajoni ayelungiselela ukuyibulalela khona. Le ntsapho yacela imvume yokuthandaza kuqala. Yavunyelwa, yaye yonke ngaphandle kwentombi, uDeborah, yathandazela ngaphakathi. Ngokutsho kwengxelo uDeborah wathandaza ngokuvakalayo wathi: “Yehova, kule veki mna noTata sihambise amaphephancwadi amahlanu. Siza kubuyela njani kwaba bantu ukuze sibafundise inyaniso size sibancede bazuze ubomi? Ngaphezu koko, ndiza kuba nguye njani umvakalisi? Bendifuna ukubhaptizwa ukuze ndikukhonze.” Emva kokuba live oku, elinye ijoni lathi: “Asinakunibulala ngenxa yale ntombazana incinane.” UDeborah waphendula wathi: “Enkosi.” Yaba iyasinda le ntsapho.

Xa uYesu wangena eYerusalem ngendlela ebonakalisa uloyiso ngasekupheleni kobomi bakhe basemhlabeni, wamkelwa zizihlwele ezikhulu, ezonwabileyo. Ezi zihlwele zazibunjwe ngabantwana nangabantu abakhulu. Ngokutsho kwengxelo, amakhwenkwana ‘ayedanduluka etempileni esithi, Hosana kuye unyana kaDavide.’ Xa ababingeleli abakhulu nababhali bakukhalazelayo oku, waphendula uYesu wathi: “Anizanga nikulese na ukuthi, Emlonyeni weentsana nabanyayo ulungiselele udumiso?”—Mateyu 21:15, 16.

Ngaba akuvuyisi ukubona ukuba nanamhlanje amazwi kaYesu aseyinyaniso? “Emlonyeni weentsana nabanyayo”—yaye, sisenokongezelela sithi, kwabakwishumi elivisayo nabafana namantombazana—uYehova ulungiselele udumiso. Ngokwenene, xa kufikelelwa ekukhonzeni uYehova, akukho mlinganiselo wabudala.—Yoweli 2:28, 29.

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share