Kuya Kubakho Uvuko Lwamalungisa
“Ndinethemba kuThixo, . . . ukuba kuza kubakho uvuko lwabafileyo, lwamalungisa kwanolwabangemalungisa.”—IZENZO 24:15.
1. Yiyiphi imeko uluntu obelujamelene nayo kususela oko uAdam noEva bawela esonweni?
“YONKE into esiyifumanayo isandla sakho ukuba siyenze, yenze ngamandla akho; ngokuba akukho kwenza, nakucinga, nakwazi, nakulumka kwelabafileyo, apho uya khona wena.” (INtshumayeli 9:10) Ngala mazwi ambalwa nakhethwe kakuhle, uKumkani uSolomon osisilumko uchaza imeko isizukulwana ngasinye soluntu esiye sajamelana nayo kususela oko abazali bethu bokuqala, uAdam noEva, bawela esonweni. Ekugqibeleni ukufa, kungakhethi, kuye kwanqunqel’ egoqweni bonke abantu—izityebi namahlwempu, ookumkani nabantu abaqhelekileyo, abanokholo nabangenalukholo. Liyinyaniso elokuba ukufa kuye “kwalawula [njengokumkani, NW].”—Roma 5:17.
2. Kutheni abathile abathembekileyo besenokuba baye badimazeka ebudeni beli xesha lesiphelo?
2 Phezu kwayo nje inkqubela yakutshanje kwinzululwazi yezonyango, ukufa kusalawula njengokumkani nanamhlanje. Nangona oko kungamangalisi, bambi basenokuba baye badimazeka ngandlel’ ithile xa ekugqibeleni beye bajamelana nolu tshaba kudala lukho. Kutheni? Kaloku, emva phayaa ngeminyaka yee-1920, iWatch Tower Society yayivakalisa isigidimi esithi “Izigidi eziphilayo ngoku azisayi kuze zife.” Ngoobani ababeya kuba zezi zigidi? ‘Zizimvu’ ekuthethwa ngazo kumazwi kaYesu angezimvu neebhokhwe. (Mateyu 25:31-46) Aba banjengezimvu kwakuprofetwe ukuba babeya kubakho ngexesha lesiphelo, ibe ithemba labo laliya kuba bubomi obungunaphakade kumhlaba oyiparadisi. Ekuhambeni kwexesha, abantu bakaThixo bayiqonda ngakumbi indima yezi “zimvu” kwiinjongo zikaYehova. Kwaqondwa ukuba aba bantu bathobelayo babeya kwahlulwa ‘kwiibhokhwe’ ezingoontamo-lukhuni, yaye emva kokutshatyalaliswa kweebhokhwe, izimvu zaziya kuwudla ilifa ummandla wasemhlabeni woBukumkani olungiselelwe zona.
Ukuhlanganisa Abanjengezimvu
3. Abantu bakaThixo bebegxininisa kuwuphi umsebenzi ukususela ngowe-1935?
3 Ukususela ngowe-1935, ‘umkhonzi othembekileyo’ ebegxininisa ekufuneni aba banjengezimvu nasekubangeniseni kwintlangano kaYehova. (Mateyu 24:45; Yohane 10:16) La maKristu afundisekayo aye aqonda ukuba uYesu ngoku uyalawula kuBukumkani bukaYehova basezulwini ibe lisondela ngokukhawuleza ixesha lesiphelo sale nkqubo ingendawo yezinto nokufika kwehlabathi elitsha ekuya kubakho ubulungisa kulo. (2 Petros 3:13; ISityhilelo 12:10) Kwelo hlabathi litsha, amazwi avuyisayo akuIsaya aya kuzaliseka: “Iya kuginya ukufa kuphele.”—Isaya 25:8.
4. Nangona ngokunyaniseka benethemba lokubona ulongamo lukaYehova luthethelelwa eArmagedon, kwenzeke ntoni kwabaninzi bezinye izimvu?
4 Ekubeni isiphelo seli hlabathi likaSathana sisemnyango, amaKristu anjengezimvu angakuvuyela gqitha ukuphila de ulongamo lukaYehova luthethelelwe ebudeni bembandezelo eza kufikela iBhabhiloni Enkulu nalo lonke ihlabathi likaSathana. (ISityhilelo 19:1-3, 19-21) Kwamaninzi, akukhange kube njalo. Amaninzi ebenethemba lokuba phakathi ‘kwezigidi’ ezingayi kuze zife aye afa. Wambi aye angabafeli-nkolo benyaniso ezintolongweni nakwiinkampu zoxinaniso okanye aye abulawa ngabantu bonqulo abanenzondelelo yempambano. Amanye aye afa kwiingozi okanye aye abulawa ngoonobangela ekufane kuthiwe ngabokwemvelo—ukugula nokwaluphala. (INdumiso 90:9, 10; INtshumayeli 9:11) Licacile elokuba angakumbi aseza kufa ngaphambi kokuba isiphelo sifike. Abanjalo baya kukubona njani ukuzaliseka kwedinga lehlabathi elitsha ekuya kubakho ubulungisa kulo?
Ithemba Lovuko
5, 6. Likamva elinjani elilindele abo banethemba lasemhlabeni abafa ngaphambi kweArmagedon?
5 Umpostile uPawulos wanikela impendulo xa wayethetha phambi kwerhuluneli yomRoma uFelikis. Njengoko kubhalwe kwiZenzo 24:15, ngenkalipho uPawulos wathi: “Ndinethemba kuThixo, . . . ukuba kuza kubakho uvuko lwabafileyo, lwamalungisa kwanolwabangemalungisa.” Ithemba lovuko lisenza sikhaliphe naxa sijamelene neemeko ezinzima. Ngenxa yelo themba, abazalwana bethu abathandekayo abathi bagule baze baqonde ukuba baza kufa abadimazeki ngokugqithiseleyo. Nokuba kwenzeka ntoni na, bayazi ukuba baya kuwufumana umvuzo wokuthembeka. Ngenxa yethemba lovuko, abazalwana noodade wethu abanenkalipho abajamelene nokubulawa ngabo basitshutshisayo bayazi ukuba nokuba sekutheni na abo babatshutshisayo abayi koyisa. (Mateyu 10:28) Xa kusifa othile ebandleni, siba buhlungu kukulahlekelwa nguloo mntu. Kwangaxeshanye, ukuba ungowezinye izimvu, siyavuya kuba umntu esikholwa naye eye wangqineka ethembekile kwada kwasekugqibeleni yaye ngoku uphumle, eqinisekile ngekamva kwihlabathi elitsha likaThixo.—1 Tesalonika 4:13.
6 Ewe, ithemba lovuko yinkalo ebalulekileyo yokholo lwethu. Noko ke, kutheni ukukholelwa kwethu kuvuko kuqine kangaka, ibe ngoobani abanelo themba?
7. Luyintoni uvuko, ibe ziziphi ezinye zezibhalo ezibonisa ukuqiniseka kwalo?
7 Igama lesiGrike elithetha “uvuko” ngu-a·naʹsta·sis, ngokoqobo othetha “ukuphakama.” Ngokusisiseko libhekisela ekuvukeni kwabafileyo. Okubangel’ umdla kukuba igama lokoqobo elithi “uvuko” alikho kwiZibhalo zesiHebhere, kodwa ithemba lovuko kuyathethwa ngalo apho. Ngokomzekelo, silibona kumazwi awathethwa nguYobhi xa wayebandezelekile: “Akwaba ubungandigushayo kwelabafileyo, . . . undimisele umda, undikhumbule ke!” (Yobhi 14:13) Ngokufanayo, kuHoseya 13:14, siyafunda: “Ndiya kubakhulula esandleni selabafileyo, ndiya kubahlawulela ndibakhulule ekufeni. Ziphi na iindyikitya zakho, kufa? Iphi na imbubhiso yakho, ngcwaba?” Kweyoku-1 kwabaseKorinte 15:55, umpostile uPawulos wacaphula la mazwi waza wabonisa ukuba ukoyiswa kokufa okwaprofetwayo kuphunyezwa ngovuko. (Kambe ke, kweso sibhalo uPawulos wayethetha ngovuko lwasezulwini.)
Abakholwayo ‘Bavakaliswa Bengamalungisa’
8, 9. (a) Abantu abangafezekanga banokuqukwa njani kuvuko lwamalungisa? (b) Lisekelwe kwintoni ithemba lethu lobomi obungayi kupheliswa kukufa?
8 Kumazwi awawathetha kuFelikis, akwisiqendu 5, uPawulos wathi kwakuya kubakho uvuko lwamalungisa nolwabangemalungisa. Ngoobani amalungisa aya kuvuswa? Kaloku, akukho mntu ulilungisa ngemvelo. Sonke sizalwa singaboni, yaye siyona bonke ubomi bethu—nto leyo esenza sifanelwe kukufa ngenxa yamatyala amabini. (Roma 5:12; 6:23) Noko ke, eBhayibhileni sifumana ibinzana elithi ‘ukuvakaliswa ulilungisa.’ (Roma 3:28, NW) Oku kubhekisela ebantwini abaye, nangona bengafezekanga, baxolelwa izono zabo nguYehova.
9 Eli binzana lisetyenziswa ngokukhethekileyo kumaKristu athanjisiweyo, anethemba lasezulwini. KumaRoma 5:1, (NW) umpostile uPawulos uthi: “Ngoku ekubeni sivakaliswe singamalungisa ngenxa yokholo, masinandiphe uxolo noThixo ngayo iNkosi yethu uYesu Kristu.” Onke amaKristu athanjisiweyo avakaliswa engamalungisa ngenxa yokholo. Ukholo kwintoni? Njengoko uPawulos echaza ngokweenkcukacha kwincwadi yabaseRoma, ukholo kuYesu Kristu. (Roma 10:4, 9, 10) UYesu wafa engumntu ofezekileyo waza emva koko wavuswa kwelabafileyo waza wanyukela ezulwini ukuze anikele ngexabiso lobomi bakhe njengomntu ngenxa yethu. (Hebhere 7:26, 27; 9:11, 12) Xa uYehova walamkelayo elo dini, eneneni, uYesu waluthenga uhlanga lwabantu ebukhobokeni besono nokufa. Abo banokholo kweli lungiselelo bangenelwa ngokwenene kulo. (1 Korinte 15:45) Ngenxa yalo amadoda nabafazi abathembekileyo banethemba lokudla ilifa ubomi obungayi kupheliswa lutshaba oluneengcwangu, ukufa.—Yohane 3:16.
10, 11. (a) AmaKristu athanjisiweyo athembekileyo alindelwe luvuko olunjani? (b) Abanquli bangaphambi kwexesha lobuKristu babenethemba laluphi uvuko?
10 Ngenxa yedini lentlawulelo likaYesu, abathanjiswa abathembekileyo, abavakaliswa bengamalungisa, banethemba eliqinisekileyo lokuvuswa njengezidalwa zomoya ezingafiyo, njengoYesu. (ISityhilelo 2:10) Uvuko lwabo lukhankanywe kwiSityhilelo 20:6, esithi: “Unoyolo, ungcwele, lowo unesabelo eluvukweni lokuqala; ukufa kwesibini akunagunya kubo abanjalo; baya kusuka babe ngababingeleli bakaThixo nabakaKristu, babe ngookumkani kunye naye iminyaka eliwaka.” Olu luvuko lwasezulwini. Noko ke, phawula ukuba iBhayibhile ilubiza ngokuthi ‘luvuko lokuqala,’ okubonisa ukuba lulandelwa lolunye.
11 KumaHebhere isahluko 11, uPawulos wabhekisela kuludwe lwabakhonzi bakaThixo ababephila ngaphambi kwexesha lobuKristu ababonakalisa ukholo olomeleleyo kuYehova uThixo. Nabo aba babenokholo kuvuko. Kwindinyana 35 yeso sahluko, uPawulos uthetha ngokuvuswa kwabantu ngokungummangaliso okwenzeka ebudeni bembali kaSirayeli, esithi: “Abafazi babazuza abafileyo babo bevukile; abanye ke batyakatywa, bengalwamkelanga ukhululo, ukuze bazuzane nolona luvuko lululo.” Loo mangqina athembekileyo amandulo ayenokulindela uvuko olulunge ngakumbi kunolo lwalubandakanya, ngokomzekelo, uEliya noElisha. (1 Kumkani 17:17-22; 2 Kumkani 4:32-37; 13:20, 21) Wona ayenethemba lokuvukela kwihlabathi apho abakhonzi bakaThixo babengayi kuthuthunjiswa ngenxa yokholo lwabo, ihlabathi apho abafazi babengayi kulahlekelwa ngabathandekayo babo ekufeni. Ewe, ayelindele ukuvuka kwabafileyo evukela kwihlabathi elitsha nathi esinethemba lalo. (Isaya 65:17-25) UYehova wayengawatyhilelanga okuninzi ngeli hlabathi litsha njengokuba enzile kuthi. Sekunjalo, ayesazi ukuba liyeza, yaye ayefuna ukuphila kulo.
Uvuko Lwasemhlabeni
12. Ngaba abantu abathembekileyo bangaphambi kwexesha lobuKristu babevakaliswe bengamalungisa? Cacisa.
12 Ngaba sifanele sicinge ngokuvuka kwala madoda nabafazi ababethembekile bangaphambi kwexesha lobuKristu kwelo hlabathi litsha njengenxalenye yokuvuswa kwamalungisa? Ngokuqinisekileyo kunjalo, kuba iBhayibhile ibhekisela kubo njengamalungisa. Ngokomzekelo, umfundi uYakobi ukhankanya indoda nomfazi bamandulo abavakaliswa bengamalungisa. Loo ndoda yayinguAbraham, ukhokho wohlanga lwamaHebhere. Sifunda oku ngaye: “Wakholwa ke uAbraham nguye uThixo; kwaza oko kwabalelwa ebulungiseni kuye, wabizwa ngokuba sisihlobo sikaThixo.” Loo mfazi nguRahabhi, owayengengomSirayeli owabonakalisa ukholo kuYehova. ‘Wavakaliswa elilungisa’ waza waba yinxalenye yohlanga lwamaHebhere. (Yakobi 2:23-25, thelekisa iNW.) Ngaloo ndlela, amadoda nabafazi bamandulo ababenokholo olomeleleyo kuYehova nakumadinga akhe baza bahlala bethembekile kwada kwasekufeni uYehova wabavakalisa bengamalungisa ngenxa yokholo lwabo, yaye ngokungathandabuzekiyo baya kubakho ‘eluvukweni lwamalungisa.’
13, 14. (a) Sazi njani ukuba amaKristu anethemba lasemhlabeni anokuvakaliswa engamalungisa? (b) Oku kuthetha ntoni kuwo?
13 Noko ke, kuthekani ngabantu abanjengezimvu namhlanje, abo banethemba lasemhlabeni abazahlulela kuYehova nabathi bafe ebudeni beli xesha lesiphelo? Ngaba baya kubakho eluvukweni lwamalungisa? Kubonakala njalo. Umpostile uYohane embonweni wabona isihlwele esikhulu sabathembekileyo abanjalo. Phawula indlela abachaza ngayo: “Ndabona, naso isihlwele esikhulu, ebekungekho namnye unako ukusibala, siphuma kuzo zonke iintlanga, nezizwe, nabantu, neelwimi, simi phambi kwetrone naphambi kweMvana, bethiwe wambu ngeengubo ezinde ezimhlophe, benamasundu ezandleni zabo, bedanduluka ngezwi elikhulu, besithi: Usindiso kuye uThixo wethu, lowo uhleli phezu kwetrone, nakuyo iMvana!”—ISityhilelo 7:9, 10.
14 Phawula ukuba aba balulamileyo baqiniseke ngokupheleleyo ngosindiso lwabo, ibe bathi baya kusindiswa nguYehova noYesu, ‘iMvana.’ Ngaphezu koko, bami phambi koYehova naphambi kweMvana, bonke bevethe ezimhlophe. Kutheni bevethe ezimhlophe? Isidalwa sasezulwini simxelela oku uYohane: “Bazihlamba iingubo zabo ezinde, bazenza mhlophe egazini leMvana.” (ISityhilelo 7:14) EBhayibhileni, umbala omhlophe ufuzisela ubunyulu, ubulungisa. (INdumiso 51:7; Daniyeli 12:10; ISityhilelo 19:8) Isibakala sokuba isihlwele esikhulu sibonwa sinxibe iingubo ezimhlophe sithetha ukuba uYehova usigqala njengamalungisa. Kwenzeka njani oko? Kungenxa yokuba siye, ngokungathi kunjalo, sazihlamba iingubo zaso egazini leMvana. Sibonisa ukholo kwigazi elaphalalayo likaYesu Kristu ibe ngenxa yoko sivakaliswa singamalungisa njengabahlobo bakaThixo abanethemba lokusinda kwimbandezelo enkulu. Ngenxa yoko, nawuphi na umKristu othembekileyo nozahluleleyo ngoku oyinxalenye ‘yesihlwele esikhulu’ ofa ngaphambi kwembandezelo enkulu unokuqiniseka ukuba uya kubakho eluvukweni lwamalungisa.
15. Ekubeni kuya kuvuswa abangamalungisa nabangemalungisa, luya kuba yingenelo njani uvuko lwabangamalungisa?
15 Olo vuko luchazwa kwiSityhilelo isahluko 20, indinyana 13, ngala mazwi: “Ulwandle lwabakhupha abafileyo abakulo, kwathi ukufa nelabafileyo kwabakhupha abafileyo abakhona; bagwetywa elowo ngokwemisebenzi yakhe.” Ngaloo ndlela, ebudeni beMini enkulu yoMgwebo kaYehova eliwaka leminyaka, bonke abo abakhumbulayo uThixo baya kuvuswa—abangamalungisa nabangemalungisa. (IZenzo 17:31) Noko ke, hayi indlela ekuya kuba kokulunge ngakumbi ngayo kwabangamalungisa! Bebephila ubomi bokholo kakade. Sele benolwalamano olusenyongweni noYehova nentembelo ekuzalisekeni kweenjongo zakhe. Amangqina angamalungisa awayephila ngaphambi kweXesha lobuKristu aya kuvuka ekufeni elangazelela ukufunda indlela azaliseka ngayo amadinga kaYehova angeMbewu. (1 Petros 1:10-12) Abo bezinye izimvu uYehova abagqala njengamalungisa kumhla wethu baya kuphuma emangcwabeni belangazelela ukubona umhlaba oyiParadisi ababethetha ngawo xa babevakalisa iindaba ezilungileyo kule nkqubo yezinto. Hayi indlela eliya kuvuyisa ngayo elo xesha!
16. Sinokuthini ngovuko oluya kwenzeka ngeMini Yomgwebo lwabo bafa kulo mhla wethu?
16 Ebudeni baloo Mini yoMgwebo eliwaka leminyaka, baya kuvuswa nini kanye abo baye bafa bethembekile kule minyaka yokugqibela yenkqubo yezinto kaSathana? IBhayibhile ayisixeleli. Noko ke, ngaba bekungayi kuba sengqiqweni ukucinga ukuba abo bagqalwa njengamalungisa abafa kumhla wethu baya kuvuswa kuqala baze ngaloo ndlela babe nesabelo kunye nesihlwele esikhulu sabasinde kwiArmagedon kumsebenzi wokwamkela izizukulwana zangaphambili ezivuswa kwabafileyo? Ewe kusengqiqweni ngokwenene!
Ithemba Elithuthuzelayo
17, 18. (a) Ithemba lovuko lithuthuzela njani? (b) Sishukunyiselwa ukuba sivakalise ntoni ngoYehova?
17 Ithemba lovuko liyawomeleza lize liwathuthuzele onke amaKristu namhlanje. Ukuba sihlala sithembekile, akukho sihlo okanye lutshaba lunokusihlutha umvuzo wethu! Ngokomzekelo, kwi-1992 Yearbook of Jehovah’s Witnesses, kwiphepha 177, kukho imifanekiso yamaKristu anenkalipho aseEthiopia awafayo kunokuba alalanise kukholo lwawo. Umbhalo ongezantsi kwayo ufundeka ngolu hlobo: “Abantu esilindele ukubabona eluvukweni.” Elinjani ilungelo ekuya kuba lilo ukwazi aba nabanye abaninzi ababonise ukuthembeka okufanayo bejamelene nokufa!
18 Kuthekani ngabo sibathandayo nabahlobo bethu abathi ngenxa yokwaluphala okanye ukugula bangakwazi ukuphila de kufike imbandezelo enkulu? Ngokuvisisana nethemba lovuko, balindelwe likamva elimangalisayo ukuba bahlala bethembekile. Yaye nathi ukuba ngenkalipho sibonakalisa ukholo kwidini lentlawulelo likaYesu, sinekamva elimangalisayo. Ngoba? Ngenxa yokuba, njengoPawulos, sinethemba ‘eluvukweni lwamalungisa nolwabangemalungisa.’ Ngeentliziyo zethu ziphela, siyambulela uYehova ngeli themba. Ngokuqinisekileyo, lisishukumisela ekubeni siphinde amazwi omdumisi athi: “Balisani ezintlangeni uzuko [lukaThixo], balisani ezizweni zonke imisebenzi yakhe ebalulekileyo; ngokuba mkhulu uYehova, engowokudunyiswa kunene.”—INdumiso 96:3, 4.
Ngaba Ungacacisa?
◻ Ziziphi izibhalo ezinceda ekuqinisekiseni ithemba lethu kuvuko lwasemhlabeni?
◻ AmaKristu avakaliswa engamalungisa ngokusekelwe kwintoni ngoku?
◻ Ithemba lovuko lisinika inkalipho nozimiselo njani?
[Umfanekiso okwiphepha 9]
NjengoPawulos, amaKristu athanjisiweyo anethemba lokuvuselwa ezulwini