Oko Sikufundayo Kwimimangaliso KaYesu

“KUTHE ngomhla wesithathu, kwabakho umsitho eKana yelaseGalili . . . Wamenyelwa ke noYesu kwanabafundi bakhe emsithweni lowo. Kuthe ke, bakuphelelwa yiwayini, wathi unina kaYesu kuye, Abanawayini.” Esi siganeko savula ithuba lokuba uYesu enze ummangaliso wakhe wokuqala.—Yohane 2:1-3.

Ngaba ingxaki enjalo yayingabalulekanga, okanye incinane gqitha, ukuba ingaziswa engqalelweni kaYesu? Omnye umphengululi weBhayibhile uyacacisa: “Ukubonakalisa ububele kwakuyinto ebaluleke kakhulu eMpuma . . . Ukubonakalisa ububele ngokwenene, ngokukodwa kumsitho womtshato, kwakufuna ukuba yonke into ibekho ngokuyintabalala. Ukuba ukudla neziselo [kwakuphele] ebudeni bomsitho womtshato, intsapho neso sibini siselula sasiya kuhlala sihlazekile ngenxa yoko.”

Ngoko ke uYesu wenza okuthile. Wabona “imiphanda yamatye imithandathu, ngokwentlambululo yamaYuda.” AmaYuda ayeqhelene nesithethe sokuhlamba ngaphambi kwezidlo, ngoko kwakufuneka amanzi amaninzi ukuze kunyanyekelwe iimfuno zabo babekho. UYesu wayalela abo babelungiselela iindwendwe esithi: “Yizaliseni imiphanda ngamanzi.” UYesu wayengeyiyo “injoli,” kodwa wathetha ngokuthe ngqo nangokunegunya. Ingxelo ithi: “Ke kaloku, yakuweva injoli amanzi abenziwe iwayini.”—Yohane 2:6-9; Marko 7:3.

Kusenokubonakala kumangalisa ukuba ummangaliso kaYesu wokuqala wenzeke kwisiganeko esiqheleke njengomtshato, kodwa esi siganeko sityhila lukhulu ngoYesu. Wayeyindoda engatshatanga, yaye kwizihlandlo ezithile emva koko waxubusha nabafundi bakhe ngeengenelo zokungatshati. (Mateyu 19:12) Noko ke, ubukho bakhe kumsitho womtshato babonisa ukuba wayengekho nxamnye nomtshato kwaphela. Wayelungelelene, elixhasa ilungiselelo lomtshato; wayelijonga njengento ebekekekileyo emehlweni kaThixo.—Thelekisa amaHebhere 13:4.

UYesu wayengengomntu ungqongqo gqitha nongakufuniyo ukonwaba njengoko kamva amagqala ecawa amenza umntu owayenjalo. Ngokucacileyo wayekunandipha ukuba kunye nabantu yaye engakuchasanga ukuzonwabisa. (Thelekisa uLuka 5:29.) Ngaloo ndlela oko wakwenzayo kumisela abalandeli bakhe umzekelo. UYesu wabonisa ukuba babengafanele babe lusizi okanye badakumbe ngokungeyomfuneko—ngokungathi ukuba lilungisa kwakuthetha ukungonwabi. Ngokwahlukileyo, kamva amaKristu ayalelwa oku: “Vuyani eNkosini amaxesha onke.” (Filipi 4:4) Namhlanje amaKristu akuphaphele ukugcina ukuzihlaziya kukwimilinganiselo efanelekileyo. Afumana uvuyo ngokukhonza uThixo, kodwa elandela umzekelo kaYesu, maxa wambi afumana ixesha lokonwaba kunye kwimekobume yobuhlobo.

Kwakhona phawula indlela anenceba ngayo uYesu. Wayenganyanzelekanga ukuba enze ummangaliso. Kwakungekho siprofeto sibhekisele koku esasifanele sizalisekiswe. Ngokucacileyo, uYesu wayechukunyiswe yinkxalabo kanina nemeko elusizi yesibini esasitshata. Wayeyikhathalele indlela ababevakalelwa ngayo yaye wayefuna bangaphoxeki. Ngaba oko akukwenzi ube nentembelo engakumbi yokuba uKristu unomdla wokwenene kuwe—kwanakwiingxaki zakho zemihla ngemihla?—Thelekisa amaHebhere 4:14-16.

Ekubeni kumphanda ngamnye ‘kwakungena iibhate ezimbini nantathu’ zamanzi, uYesu wenza iwayini eninzi ngommangaliso wakhe—mhlawumbi iilitha ezingama-390! (Yohane 2:6) Kwakutheni ukuze enze isixa esikhulu kangako? UYesu wayengakhuthazi ubunxila, obugwetywayo nguThixo. (Efese 5:18) Kunoko, wayebonakalisa isisa esifana nesikaThixo. Ekubeni iwayini yayisisiselo esiqhelekileyo, eseleyo yayinokusetyenziswa nakwezinye izihlandlo.—Thelekisa uMateyu 14:14-20; 15:32-37.

AmaKristu okuqala axelisa umzekelo kaYesu wokubonakalisa isisa. (Thelekisa IZenzo 4:34, 35.) Yaye ngokufanayo namhlanje abantu bakaYehova bakhuthazwa ‘ukupha.’ (Luka 6:38) Noko ke, ummangaliso kaYesu wokuqala ukwanentsingiselo engokwesiprofeto. Walatha kwixesha elizayo xa uThixo eya kubonakalisa isisa ngokulungiselela “isidlo sezinto ezityebileyo . . , isidlo sewayini egcinwe ngeentsipho,” eyiphelisa ngokupheleleyo indlala.—Isaya 25:6.

Noko ke, kuthekani ngemimangaliso yokuphilisa emininzi eyenziwa nguYesu? Sinokufunda ntoni kuyo?

Ukwenza Okulungileyo NgeSabatha

“Vuka, uthabathe ukhuko lwakho, uhambe.” UYesu wathetha la mazwi kwindoda eyayigula iminyaka engama-38. Ingxelo yeVangeli iyaqhubeka: “Usuke kwaoko waphila umntu, waluthabatha ukhuko lwakhe, wahamba.” Okumangalisayo kukuba, asingabo bonke abavuyiswayo sesi siganeko. Ingxelo ithi: “Ayemtshutshisa uYesu amaYuda, . . . ngokuba wayesenza ezo zinto ngesabatha.”—Yohane 5:1-9, 16.

Injongo yeSabatha yayikukuba ibe lusuku lokuphumla nelokonwaba kumntu wonke. (Eksodus 20:8-11) Noko ke, ngomhla kaYesu yayenziwe yantsonkotha ngendlela ecinezelayo ngemithetho emiswe ngabantu. Umphengululi uAlfred Edersheim wabhala esithi kwiinxalenye ezinde zeTalmud ezithetha ngomthetho weSabatha, “imithetho ixutyushwa ngokunzulu ngokungathi ibaluleke gqitha elunqulweni, ekunokuba nzima ukuba ubani angacinga ukuba umntu osezingqondweni unokuyilandela ngokunyanisekileyo.” (The Life and Times of Jesus the Messiah) Oorabhi bayenza imibandela yokufa nokuphila imithetho engabalulekanga nengenasizinzi eyayilawula phantse zonke iinkalo zobomi bomYuda—ngokufuthi ingakhathalelwa ngokungenamfesane indlela abavakalelwa ngayo abantu. Omnye umthetho weSabatha wawuyalela oku: “Ukuba isakhiwo sidilika phezu komntu yaye akuqinisekwanga enoba ulapho okanye akunjalo, okanye enoba uyaphila okanye ufile, okanye enoba ungoweentlanga okanye ngumSirayeli, basenokuwasusa amabhodlo phezu kwakhe. Ukuba bamfumana ephila basenokuqhubeka bewasusa phezu kwakhe; kodwa ukuba ufile, bamele bamyeke.”—Tractate Yoma 8:7, The Mishnah, iguqulelwe nguHerbert Danby.

UYesu wayijonga njani imithetho engekho ngqiqweni ngolo hlobo? Xa wagxekwa ngokuphilisa ngeSabatha, wathi: “UBawo uyasebenza kude kube ngoku, nam ndiyasebenza.” (Yohane 5:17) UYesu wayengenzi msebenzi wengqesho ukuze abe sisityebi. Kunoko, wayesenza ukuthanda kukaThixo. Kanye njengokuba abaLevi babevumelekile ukuba baqhubeke nenkonzo yabo engcwele ngeSabatha, uYesu wayevumelekile ukuba enze imisebenzi awayeyinikwe nguThixo njengoMesiya engawophuli uMthetho kaThixo.—Mateyu 12:5.

Kwakhona ukuphilisa kukaYesu ngomhla weSabatha kwababhenca ababhali abangamaYuda nabaFarisi ‘njengabangamalungisa ngokukhulu’—bengqongqo yaye indlela ababecinga ngayo ingalungelelananga. (INtshumayeli 7:16) Ngokuqinisekileyo, yayingekokuthanda kukaThixo ukuba izenzo ezilungileyo zipheleliselwe kwiintsuku ezithile zeveki; kwakhona uThixo wayengenanjongo yokuba iSabatha ibe ngumthetho ongeyongenelo kwabo babeyilandela. UYesu wathi kuMarko 2:27: “Isabatha le yabakho ngenxa yomntu, asingumntu owabakhoyo ngenxa yesabatha.” UYesu wayethanda abantu, kungekhona imithetho engqongqo.

Ngaloo ndlela kuhle ukuba indlela amaKristu anamhlanje acinga ngayo ingabi ngqongqo okanye ityekele kwimithetho ngokugqithiseleyo. Abo basegunyeni ebandleni bayakuphepha ukuthwalisa abanye imithetho nemigaqo emininzi emiswe ngabantu. Umzekelo kaYesu ukwasikhuthaza ukuba sikhangele amathuba okwenza okulungileyo. Ngokomzekelo, umKristu akanakuze aqiqe ngelithi uya kushumayela ngeenyaniso zeBhayibhile xa ekubulungiseleli bendlu ngendlu okanye xa enikela intetho eqongeni kuphela. Umpostile uPetros uthi, umKristu ufanele ‘ahlale ekulungele ukuziphendulela kumntu wonke obuzayo kuye ilizwi, ngalo ithemba elingaphakathi kuye.’ (1 Petros 3:15, akekeliswe sithi.) Ukwenza okulungileyo akumiselwanga xesha.

Isifundo Ngemfesane

Omnye ummangaliso obalaseleyo ubhalwe kuLuka 7:11-17. Ngokutsho kwale ngxelo, uYesu “waya emzini ekuthiwa yiNayin. Kwaye kuhamba naye iqela labafundi bakhe, nendimbane enkulu.” Nanamhlanje, asabonakala amangcwaba akumzantsi-mpuma wedolophana yaseNein kwiArab yanamhlanje. “Akusondela esangweni lomzi lowo,” wahlangabezana nesiphithi-phithi. “Kwabonakala kuthwalelwa phandle umntu ofileyo, ekuphela konyana ozalwa ngunina; waye yena engumhlolokazi. Yaye nendimbane elingeneyo yomzi inaye.” UH. B. Tristram wathi ukususela kumaxesha amandulo “indlela yokuqhuba umngcwabo ayikaguquki,” wongezelela ngelithi: “Ndikhe ndababona abafazi behamba ngaphambi kwethala, bekhokelwe ngabafazi abahlawulwayo ukuze benze isijwili emngcwabeni. Bathwala izandla entloko, bazixhwith’ iinwele, bebonakalisa intlungu ngendlela echukumisayo, baze badanduluke bebiza igama lomfi.”—Eastern Customs in Bible Lands.

Kuloo mbhodamo wentsholo unjalo kwakuhamba umhlolokazi eyayibonakala nakwinkangeleko yakhe intlungu yokufelwa awayekuyo. Ekubeni wayesele ephulukene nendoda yakhe, wayemgqala unyana wakhe, ngokutsho kombhali uHerbert Lockyer, ‘njengentsika ebudaleni bakhe, nentuthuzelo kubulolo bakhe—umxhasi nentsika yekhaya. Ngokuphulukana nokuphela konyana wakhe, intsika yokugqibela yayitshatyalalisiwe.’ (All the Miracles of the Bible) Wasabela njani uYesu? Ngamazwi obuciko uLuka uthi, “ithe ke iNkosi yakumbona, yasikwa yimfesane ngenxa yakhe, yathi kuye, Musa ukulila.” Ibinzana elithi “yasikwa yimfesane” lithatyathwe kwigama lesiGrike ngokoqobo elithetha “amathumbu.” Lithetha “ukuchukumiseka ngaphakathi.” (Vine’s Expository Dictionary of Old and New Testament Words) Ewe, uYesu wachukumiseka ngokunzulu.

Kunokwenzeka ukuba unina kaYesu wayesele engumhlolokazi, ngoko mhlawumbi wayeyazi kakuhle intlungu yokufelwa xa waphulukana noyise owamkhulisayo, uYosefu. (Thelekisa uYohane 19:25-27.) Akuzange kufuneke ukuba lo mhlolokazi ambongoze uYesu. Phezu kwaso nje isibakala sokuba phantsi koMthetho kaMoses ukuchukumisa isidumbu kwakumenza inqambi ubani, engalibazisanga ‘wafika walichukumisa ithala.’ (Numeri 19:11) Ngamandla akhe angummangaliso, uYesu wayenokususa kwaintsusa yobunqambi! ‘Wathi, Ndodana, ndithi kuwe, Vuka. Wavuka wahlala umfi lowo, waza ke wathetha. Wamnikela ke kunina.’

Esinjani sona ukuchukumisa isifundo ngemfesane! AmaKristu akafanele axelise isimo sengqondo esandileyo ebudeni bale “mihla yokugqibela” sokungabi naluthando nenceba. (2 Timoti 3:1-5) Ngokwahlukileyo koko, eyoku-1 kaPetros 3:8 iyabongoza: “Elokugqiba, cingani nto-nye nonke, velanani, thandanani njengabazalwana, yibani nemfesane kakhulu.” Xa umhlobo wethu esifa okanye egulela ukufa, asinakumvusa ekufeni okanye simphilise. Kodwa sinokubanceda ngokoqobo size sibathuthuzele, mhlawumbi ngokutyelela nangokulila kunye nabo.—Roma 12:15.

Kwakhona lo mmangaliso kaYesu ukhwankqisayo wokuvusa umntu ofileyo walatha kwixesha elizayo—ixesha “abaya kuthi ngalo bonke abasemangcwabeni balive ilizwi lakhe; baphume ke”! (Yohane 5:28, 29) Emhlabeni wonke, abafelweyo baya kuba namava obuqu emfesane kaYesu xa oomama, ootata, abantwana, nezihlobo ezafayo zibuya engcwabeni!

Oko Sikufunda Kwimimangaliso

Ngoko, licacile elokuba imimangaliso kaYesu yayingabonakalisi nje amandla angummangaliso kuphela. Yayizukisa uThixo, imisela umzekelo amaKristu abongozwa ukuba ‘azukise uThixo.’ (Roma 15:6) Yayikhuthaza ukwenziwa kobulungisa, ukubonakalisa isisa, nokubonakalisa imfesane. Okubaluleke ngakumbi, yayibonisa imisebenzi yamandla eya kwenziwa ebudeni boLawulo lukaKristu lweMinyaka Eliwaka.

Ngoxa wayesemhlabeni, uYesu wenza imisebenzi yakhe yamandla kummandla womhlaba omncinane. (Mateyu 15:24) NjengoKumkani ozukisiweyo, igunya lakhe liya kunatyiselwa emhlabeni wonke! (INdumiso 72:8) Emva phayaa, abo wayebaphilisile nabo wayebavuse ekufeni ngokungummangaliso ekugqibeleni bafa. Ngaphantsi kobukumkani bakhe basezulwini, isono nokufa ziya kupheliswa ngokupheleleyo, zivulela indlela ubomi obungunaphakade. (Roma 6:23; ISityhilelo 21:3, 4) Ewe, imimangaliso kaYesu yalatha kwikamva elizukileyo. AmaNgqina kaYehova ancede izigidi ukuba zibe nethemba eliqinisekileyo lokulifumana. Logama lingekafiki elo xesha, elinjani lona ukumangalisa ithemba esilinikwa yimimangaliso kaYesu Kristu ngoko kuza kwenzeka kungekudala!

[Umfanekiso okwiphepha 7]

UYesu uguqula amanzi abe yiwayini