UKuzahlulela—Kubani?

“Yonke into ayithethileyo uYehova soyenza siyive.”—EKSODUS 24:7.

1, 2. (a) Bazinikele kwintoni abanye abantu? (b) Ngaba ngabo bangamalungu eenkonzo ezithile kuphela abazinikelayo?

NGOFEBRUWARI 1945, abaqhubi beenqwelo-moya zokulwa ezaziwa ngokuba ziiZero-fighter baseJapan bebutho elaziwa ngokuba ziiYatabe Flying Corps babehlanganisene kwiholo ethile. Ngamnye kubo wanikwa iphetshana awayeza kubhala kulo enokuba wayeya kuzinikela kusini na ukuba abe lilungu lomkhosi ohlaselayo obizwa ngokuba yikamikaze. Elinye ijoni elalilapho ngelo xesha lithi: “Ndandicinga ukuba kwakulubizo lwam ukuba ndizinikele xa uhlanga lwam lwalujongene nentlekele. Ndiqhutywa ziimvakalelo ukuba ndizenze ndifumaneke, ndazinikela kolo thumo.” Laqeqeshelwa ukuqhuba nokusebenzisa iOhka (isiphekepheke senqwelo-moya awayefela kuso umqhubi) aze ayintlithe kwinqanawa yokulwa yotshaba. Noko ke, imfazwe yaphela engekalifumani ithuba lokwenjenjalo aze ngaloo ndlela afele ilizwe lakhe nomlawuli wakhe. Xa iJapan yoyiswayo emfazweni, ukholo lwakhe kumlawuli lwaphela.

² Ngaxa lithile, abaninzi eJapan babezinikele kumlawuli wabo, ababekholelwa ukuba unguthixo ophilayo. Kwamanye amazwe, bekukho ibe zisekho izinto abantu abazinikele kuzo. Izigidi zizinikele kuMariya, kuBhuda, okanye kwezinye izinto ezingokobuthixo—ngokufuthi ezimelwa zizithixo. Bephenjelelwa ziintshumayelo ezichukumisayo, abathile bagalela imali yabo abayisebenzele nzima ezingxoweni zabo bashumayela kumabonwakude kumgudu wokuxhasa ngentliziyo iphela ofanayo nokuzinikela. Emva kwemfazwe, abantu baseJapan ababephoxekile bafuna enye into ababenokubunikela kuyo ubomi babo. Kwabathile, umsebenzi wasivala eso sikhewu. Enoba baseMpuma okanye baseNtshona, abaninzi bazinikela ekuziqwebeleni ubutyebi. Abantu abaselula basekela ubomi babo kwiimvumi abathi baxelise indlela eziphila ngayo. Abaninzi namhlanje banqula iziqu zabo, bazinikele kwiminqweno yabo. (Filipi 3:19; 2 Timoti 3:2) Kodwa ngaba ngokwenene ezo zinto okanye abo bantu bafanelwe kukuba umntu azinikele kubo ngomphefumlo uphela?

3. Ezinye zezinto abantu abazinikela kuzo zingqineke zingenaxabiso njani?

³ Xa kuthethwa inyaniso, ngokufuthi abanquli bezithixo bayaphoxeka. Ukuzinikela kwizithixo kuphumela kukatyo xa abanquli bazo beqonda ukuba izithixo zabo ekuphela kwento eziyiyo “zizenzo zezandla zabantu.” (INdumiso 115:4) Xa kubhencwa amanyundululu enziwa ngabashumayeli ababalaseleyo, abantu abanyanisekileyo baziva bephoxekile. Xa ezoqoqosho “ezazibonakala zincumisa” zawohlokayo, abasebenzi baphazamiseka engqondweni xa bafumanisa ukuba babekuluhlu lwabo baza kudendwa. Ukudodobala kwezoqoqosho kutshanje kubagqebhe olungophiyo abanquli bakaMammon (ubutyebi). Amatyala enziwe ngethemba lokufumana ingeniso eninzi aba luxanduva kungekho themba lakuba angahlawuleka. (Mateyu 6:24, umbhalo osemazantsi weNW) Xa amaqhawe omculo werock nabanye ababalaseleyo kwezolonwabo abanqulwayo besifa okanye baphelelwe, abanquli babo bashiywa kwesinomhlwa. Yaye abo bebehamba ngekhondo lokuzanelisa ngokufuthi bavuna iziqhamo ezikrakra.—Galati 6:7.

4. Yintoni eqhubela abantu ekubeni bazinikele kwizinto ezingenaxabiso?

⁴ Yintoni eqhubela abantu ekubeni bazinikele kwizinto ezililize ezinjalo? Ubukhulu becala, ngumoya wehlabathi elilawulwa nguSathana uMtyholi. (Efese 2:2, 3) Impembelelo yalo moya ibonakala ngeendlela ezahlukahlukeneyo. Umntu usenokulawulwa sisithethe sentsapho esisuka kookhokho bakhe. Imfundo nendlela umntu akhule ngayo isenokuyichaphazela kakhulu indlela acinga ngayo. Imekobume kwindawo ezisebenza kuyo isenokutyhalela ii-“corporate warriors [abazinikele ngokugqithiseleyo kwinkampani]” ekubeni zisebenze ngokugqithiseleyo nto leyo esenokuba yingozi ekuphileni kwazo. Isimo sengqondo sehlabathi sokuthanda izinto eziphathekayo sikhuthaza umoya wokufuna okungakumbi. Iintliziyo zabaninzi ziyonakaliswa, zibaqhubela ekubeni bazinikele kwiminqweno yabo yokuzingca. Bayasilela ukuhlolisisa enoba ezi zinto zilufanele na uzinikelo olunjalo.

Uhlanga Oluzahluleleyo

5. Kukuphi ukuzahlulela kuYehova okwenziwa ngaphezu kweminyaka engama-3 500 eyadlulayo?

⁵ Ngaphezu kweminyaka engama-3 500 eyadlulayo, olunye uhlanga lwabantu lwafumana into exabiseke kakhulu olwalunokuzinikela kuyo. Lwazahlulela kuThixo ongumongami, uYehova. Njengeqela, uhlanga lwakwaSirayeli lwazahlulela kuThixo kwintlango yeSinayi.

6. Lalibaluleke njani igama likaThixo kumaSirayeli?

⁶ Yintoni eyaqhubela amaSirayeli ekubeni enze oku? Xa ayesebukhobokeni eYiputa, uYehova wathuma uMoses ukuba awakhokelele enkululekweni. UMoses wabuza ukuba wayefanele amchaze njani uThixo awayethunywe nguye, ibe uThixo wazityhila ‘njengondinguye endinguye.’ Wayalela uMoses ukuba athi koonyana bakaSirayeli: “Undinguye undithumile kuni.” (Eksodus 3:13, 14) Eli binzana libonisa ukuba uYehova uba yiloo nto ifunekayo ukuze kuphunyezwe iinjongo zakhe. Wayeya kuzityhila enguMphumezi wamadinga ngendlela oomawokhulu bamaSirayeli abangazange bayibona.—Eksodus 6:2, 3.

7, 8. Bubuphi ubungqina amaSirayeli ayenabo bokuba uYehova wayenguThixo afanele azahlulele kuye?

⁷ AmaSirayeli akubona ukubethwa kwelizwe laseYiputa nabantu balo ngeZibetho Ezilishumi. (INdumiso 78:44-51) Kwandula ke, abantu ekusenokwenzeka ukuba babengaphezu kwezigidi ezithathu kuwo, kuquka abafazi nabantwana, babopha imithwalo yabo baza balishiya ilizwe lakwaGoshen ngobusuku obunye, nto leyo iyodwa nje eyayisisenzo esimangalisayo. (Eksodus 12:37, 38) Kwandula ke, kuLwandle Olubomvu, uYehova wazityhila ‘eyindoda elwayo’ xa wasindisa abantu bakhe kwimikhosi kaFaro ngokwahlukanisa ulwandle ukuze amaSirayeli adlule aze kamva aluvale ukuze amaYiputa awayewalandela arhaxwe. Ngenxa yoko, “asibona amaSirayeli isandla esikhulu asibonakalalisileyo uYehova kumaYiputa. Bamoyika abantu uYehova, bakholwa nguYehova.”—Eksodus 14:31; 15:3; INdumiso 136:10-15.

⁸ Ngokungathi ayesafuna ubungqina boko kwakumelwa ligama likaThixo, amaSirayeli amkhalazela uYehova nommeli wakhe uMoses ngokunqongophala kokutya namanzi. UYehova wathumela izagwityi, wanisa imana, waza wabangela iliwa lampompoza amanzi eMeribha. (Eksodus 16:2-5, 12-15, 31; 17:2-7) Kwakhona uYehova wawahlangula amaSirayeli xa ayehlaselwa ngama-Amaleki. (Eksodus 17:8-13) AmaSirayeli ayengenakukukhanyela oko uYehova kamva wakuthetha kuMoses: “UYehova, uYehova, uThixo onemfesane, onobabalo, ozeka kade umsindo, omninzi ngenceba nenyaniso, olondolozela amawaka inceba, oxolela ubugwenxa, nokreqo, nesono.” (Eksodus 34:6, 7) Ngokwenene, uYehova wazingqina ekufanele ukuba abantu bazinikele kuye.

9. Kwakutheni ukuze uYehova anike amaSirayeli ithuba lokuvakalisa ukuzahlulela kwawo ekumkhonzeni, ibe asabela njani?

⁹ Nangona amaSirayeli ayengabantu bakaYehova ngenxa yokuba wayewathenge eYiputa, njengoThixo onobubele nonenceba, wawanika ithuba lokubonisa umnqweno wokumkhonza ngokuzithandela. (Duteronomi 7:7, 8; 30:15-20) Kwakhona wamisela imiqathango yomnqophiso wakhe namaSirayeli. (Eksodus 19:3-8; 20:1–23:33) Xa uMoses wayichazayo le miqathango, amaSirayeli athi: “Yonke into ayithethileyo uYehova soyenza siyive.” (Eksodus 24:3-7) Ngokuzithandela, aba luhlanga oluzahlulele kwiNkosi enguMongami uYehova.

Uxabiso Lukhokelela Kuzahlulelo

10. Ukuzahlulela kwethu kuYehova kufanele kusekelwe kwintoni?

¹⁰ UYehova, uMdali, usafanelwe kukuba sizinikele kuye ngomphefumlo uphela. (Malaki 3:6; Mateyu 22:37; ISityhilelo 4:11) Noko ke, ukuzahlulela kwethu akufanele kubangelwe kukuba sifane sikholwe, ziimvakalelo zentabatheko, okanye kukucengwa ngabanye—nangabazali. Kumele kusekelwe kulwazi oluchanileyo lwenyaniso ngoYehova naluxabiso ngoko uYehova asenzele kona. (Roma 10:2; Kolose 1:9, 10; 1 Timoti 2:4) Kanye njengokuba uYehova wanika amaSirayeli ithuba lokuvakalisa uzahlulelo lwawo ngokuzithandela, ngoko usinika ithuba lokuzahlulela ngokuzithandela nokukubonakalisa ekuhleni oko kuzahlulela.—1 Petros 3:21.

11. Ukufundisisa kwethu iBhayibhile kutyhile ntoni ngoYehova?

¹¹ Ngokufundisisa iBhayibhile, uThixo siye samazi njengomntu. ILizwi lakhe lisinceda siqonde iimpawu zakhe njengoko zibonakala kwindalo. (INdumiso 19:1-4) Sinokubona kwiLizwi lakhe ukuba akangoBathathu Emnye oyimfihlelo ongenakuqondwa. Akoyiswa ezimfazweni ibe ngaloo ndlela akufuneki ayeke ukuba nguThixo. (Eksodus 15:11; 1 Korinte 8:5, 6; ISityhilelo 11:17, 18) Ngenxa yokuba ewazalisekisile amadinga akhe, sikhunjuzwa ngoko igama lakhe elihle, uYehova, likumelayo. UnguLowo uneeNjongo Ezizukileyo. (Genesis 2:4, umbhalo osemazantsi weNW; INdumiso 83:18; Isaya 46:9-11) Ngokufundisisa iBhayibhile, siyazi ngokucacileyo indlela athembeke nanokuthenjwa ngayo.—Duteronomi 7:9; INdumiso 19:7, 9; 111:7.

12. (a) Yintoni esitsalela kuYehova? (b) Amava okwenene abhalwe eBhayibhileni amshukumisela njani ubani ekubeni afune ukukhonza uYehova? (c) Uvakalelwa njani ngokukhonza uYehova?

¹² Eyona nto isitsalela kuYehova ngokukhethekileyo bubuntu bakhe bothando. IBhayibhile ibonisa indlela anothando, axolela nanenceba ngayo xa eqhubana nabantu. Cinga ngendlela awamenza waphumelela ngayo uYobhi emva kokuba uYobhi ngokuthembeka egcine ingqibelelo yakhe. Oko kwenzeka kuYobhi kubalaselisa ukuba “iNkosi inemfesane enkulu, inenceba.” (Yakobi 5:11; Yobhi 42:12-17) Cinga ngendlela uYehova awaqhubana ngayo noDavide xa wakrexezayo waza wabulala. Ewe, uYehova ukulungele ukuxolela kwanezono ezinzulu xa umoni esondela kuye ‘ngentliziyo eyaphukileyo, etyumkileyo.’ (INdumiso 51:3-11, 17) Cinga ngendlela uYehova awaqhubana ngayo noSawule waseTarso, ekuqaleni owayezimisele ekutshutshiseni abantu bakaThixo. Le mizekelo ibalaselisa inceba kaThixo nokukulungela kwakhe ngobubele ukusebenzisa abaguqukayo. (1 Korinte 15:9; 1 Timoti 1:15, 16) UPawulos wayevakalelwa kukuba wayenokuncama nobomi bakhe ngenxa yokukhonza lo Thixo unothando. (Roma 14:8) Ngaba uvakalelwa ngendlela efanayo?

13. Kukuphi ukubonakaliswa kothando olukhulu nguYehova okuqhubela abantu abantliziyo zifanelekileyo ekubeni bazahlulele kuye?

¹³ AmaSirayeli, uYehova wawasindisa kubukhoboka baseYiputa, yaye ulungiselele indlela yokusisindisa ebukhobokeni besono nokufa—idini lentlawulelo likaYesu Kristu. (Yohane 3:16) UPawulos uthi: “UThixo uqondakalisa okwakhe ukusithanda ngokuthi, sakubon’ ukuba sisengaboni, uKristu asifele.” (Roma 5:8) Eli lungiselelo lothando liqhubela abantu abantliziyo zifanelekileyo ekubeni bazahlulele kuYehova ngoYesu Kristu. “Kuba lusifingile nje uthando lukaKristu, sigqibe kwelokuthi, ukuba ufele bonke emnye, ngoko bafile bonke abo; wabafela ke bonke, ukuze abo badla ubomi bangabi sazidlela ubomi, babudlele owafayo wavuka ngenxa yabo.”—2 Korinte 5:14, 15; Roma 8:35-39.

14. Ngaba ukwazi iinkqubano zikaYehova nje kuphela kwanele ukusiqhubela ekubeni sahlulele ubomi bethu kuye? Cacisa.

¹⁴ Sekunjalo, ukwazi ubuntu bukaYehova neenkqubano zakhe nabantu akwanele. Mntu ngamnye umele ahlakulele uxabiso ngoYehova. Kunokwenziwa njani oko? Ngokusebenzisa iLizwi likaThixo ebomini bethu size sizibonele ukuba imigaqo ekulo iyasebenza ngokwenene. (Isaya 48:17) Simele sivakalelwe kukuba uYehova usisindisile kumgxobhozo weli hlabathi lingendawo lilawulwa nguSathana. (Thelekisa eyoku-1 kwabaseKorinte 6:11.) Kumzamo wethu wokwenza okulungileyo, sifunda ukuthembela ngoYehova, ibe siyazibonela ukuba uYehova nguThixo ophilayo, ‘umphulaphuli wemithandazo.’ (INdumiso 62:8; 65:2) Ngokukhawuleza siziva sisondele kakhulu kuye ibe siyakwazi ukuphalaza imbilini yethu kuye. Imvakalelo yobuhlobo yothando ngoYehova iyakhula kuthi. Ngokungathandabuzekiyo oku kuya kusenza sahlulele ubomi bethu kuye.

15. Yintoni eyashukumisela enye indoda, eyayifudula izahlulele emsebenzini wayo, ekubeni ikhonze uYehova?

¹⁵ Abaninzi baye bamazi lo Thixo unothando, uYehova, ibe bahlulele ubomi babo ekumkhonzeni. Ngokomzekelo khawuqwalasele igcisa lombane elalineshishini eliqhuba kakuhle. Kwakukho amaxesha elaliqalisa ukusebenza kusasa lize lisebenze imini yonke nobusuku bayo, libuyele ekhaya ngentsimbi yesihlanu ngentsasa elandelayo. Emva kokuphumla iyure nje enye, laliphuma liye kumsebenzi olandelayo. Likhumbula oku: “Ndandizinikele emsebenzini wam.” Xa umfazi walo waqalisa ukufundisisa iBhayibhile, lamthelela. Lithi: “Bonke oothixo endandibazi ukuza kuthi ga ngelo xesha babelindele ukukhonzwa nje kuphela, bengenzi nto iyingenelo kuthi. Kodwa uYehova wathabatha inyathelo kuqala waza wathumela uNyana wakhe okuphela kwamzeleyo emhlabeni nto leyo eyayiyilahleko enkulu kuye.” (1 Yohane 4:10, 19) Kungaphelanga neenyanga ezilishumi, le ndoda yazahlulela kuYehova. Emva koko, yanikela ingqalelo ekukhonzeni uThixo ophilayo. Yangenela ubulungiseleli bexesha elizeleyo yaza yafuduka yaya kukhonza apho imfuneko yayinkulu khona. Njengabapostile, ‘yashiya iinto zonke yalandela uYesu.’ (Mateyu 19:27) Emva kweenyanga ezimbini, yona nomfazi wayo babizwa baya kukhonza kwisebe leWatch Tower Bible and Tract Society kwilizwe ababehlala kulo, ukuze incedise kumsebenzi wombane. Kangangeminyaka engaphezu kwama-20, ibisebenza kweli sebe, isenza umsebenzi ewuthandayo—ingazenzeli kodwa isenzela uYehova.

Kubonise Ekuhleni Ukuzahlulela Kwakho

16. Ngawaphi amanye amanyathelo ubani ebeya kuwathabatha ekuzahluleleni kuYehova?

¹⁶ Emva kokufundisisa iBhayibhile okwethutyana, abaselula nabadala ngokufanayo baya kuba noxabiso ngoYehova noko abenzele kona. Oku kufanele kubashukumisele ekubeni bazinikele kuThixo. Kusenokwenzeka ukuba ungomnye waba. Unokuzahlulela njani kuYehova? Emva kokufumana ulwazi oluchanileyo eBhayibhileni, ufanele wenze ngokuvisisana nolo lwazi uze ube nokholo kuYehova noYesu Kristu. (Yohane 17:3) Guquka uze ubuye kwihambo yakho yesono yangaphambili. (IZenzo 3:19) Uya kwandula ke ufikelele kwinyathelo lokuzahlulela, ukuvakalise oku ngamazwi andilisekileyo emthandazweni kuYehova. Ngokungathandabuzekiyo uya kuhlala uwukhumbula lo mthandazo, kuba uya kuba sisiqalo solwalamano olutsha noYehova.

17. (a) Kutheni abadala behlolisisa imibuzo elungiselelweyo nabasandul’ ukuzahlulela? (b) Liliphi inyathelo elibalulekileyo elifanele lithatyathwe ngokukhawuleza emva kokuzahlulela kukabani, ibe ngayiphi injongo?

¹⁷ Kanye njengokuba uMoses wacacisela amaSirayeli imiqathango yokungena kulwalamano lomnqophiso noYehova, abadala emabandleni amaNgqina kaYehova banceda abo basandul’ ukuzinikela bahlolisise ngenyameko okubandakanyekileyo. Basebenzisa imibuzo elungiselelweyo ukuze baqinisekise ukuba ngamnye uyaziqonda iimfundiso ezisisiseko zeBhayibhile yaye uyakuqonda okubandakanyekileyo ekubeni liNgqina likaYehova. Kwandula ke kube kokufanelekileyo ukuba oku kuzahlulela kubonakaliswe ekuhleni. Ngokuzenzekelayo, umntu osandul’ ukuzahlulela ulangazelela ukwazisa abanye ukuba unolwalamano olulilungelo noYehova. (Thelekisa uYeremiya 9:24.) Oku kwenziwa ngokufanelekileyo ngokubhaptizwa emanzini njengokufuzisela ukuzahlulela. Ukuntywiliselwa emanzini nokuphakanyiswa kufuzisela ukuba umntu uyafa kwikhondo lakhe lobomi langaphambili lokuzingca yaye uvuselwa kwindlela entsha yobomi, yokwenza ukuthanda kukaThixo. Akuyosakramente, kungesiso nesithethe esifana nesamaShinto semisogi ekuthiwa kuso umntu uhlanjululwa ngamanzi.a Kunoko, ubhaptizo luyimbonakaliso yasekuhleni yokuzahlulela okwenziwe ngaphambili ngomthandazo.

18. Kutheni sinokuqiniseka ukuba ukuzahlulela kwethu akuyi kuba lilize?

¹⁸ Esi sihlandlo sindilisekileyo asilibaleki, sikhumbuza umkhonzi omtsha kaThixo ngolwalamano oluhlala luhleli ngoku analo noYehova. Ngokungafaniyo nokuzahlulela umqhubi wenqwelo-moya oyikamikaze awayekwenza kwilizwe lakhe nakumlawuli, ukuzahlulela kuYehova akuyi kuba lilize, kuba unguThixo ongusomandla ngonaphakade okufezayo konke agqibe ukukwenza. Nguye, ibe nguye kuphela, ofanelwe kukuzinikela kwethu ngomphefumlo uphela.—Isaya 55:9-11.

19. Kuza kuxutyushwa ntoni kwinqaku elilandelayo?

¹⁹ Noko ke, kubandakanyeke okungakumbi ekuzahluleleni. Ngokomzekelo, ukuzahlulela kubuchaphazela njani ubomi bethu bemihla ngemihla? Oku kuza kuxutyushwa kwinqaku elilandelayo.

[Umbhalo osemazantsi]

Uyakhumbula Na?

◻ Kutheni ukuzinikela kwabantu behlabathi kuye kuphelele ekuphoxekeni?

◻ Yintoni eyashukumisela amaSirayeli ekubeni azahlulele kuYehova?

◻ Yintoni esishukumisela ekubeni sizahlulele kuYehova namhlanje?

◻ Sizahlulela njani kuThixo?

◻ Kufuzisela ntoni ukubhaptizwa emanzini?

[Umfanekiso okwiphepha 10]

USirayeli uzahlulela kuYehova eSinayi