Ngaba Uya Kumdumisa UYehova?
“NJENGOKO linjalo igama lakho, Thixo, lunjalo udumiso lwakho, kwesa eziphelweni zehlabathi.” La ngamazwi engoma ebuprofeti yoonyana bakaKora. (INdumiso 48:10) Namhlanje, ikwayara enamandla yamaNgqina kaYehova azizigidi idumisa uThixo yaye yazisa igama lakhe ngokushumayela iindaba ezilungileyo zoBukumkani bakhe. Ngokwenza oku kumazwe angama-232 neziqithi zolwandle nangeelwimi ezingaphezu kwama-300, afikelela ngokoqobo “eziphelweni zehlabathi.”
Yintoni le iqhuba abantu abaneemvelaphi ezahlukahlukeneyo ngokwenkcubeko, intlalo, nolwimi badumise uYehova? Umbulelo abanawo ngolwazi oluchanileyo lweLizwi likaThixo, iBhayibhile, sisizathu esiyintloko. Inyaniso engokomoya iye yabakhulula kwiinkolo nakwiinkolelo zonqulo ezikhobokisayo ezinjengentuthumbo kanaphakade. (Yohane 8:32) Kwakhona inyaniso ibanceda baxabise iimpawu zikaThixo ezimangalisayo, ezinjengothando lwakhe, amandla, ubulumko, nokuba sesikweni okuxutywe nenceba. Ukuqonda isizathu sokunikela kukaThixo ngoNyana wakhe ekuphela kwamzeleyo, uYesu Kristu, njengedini lentlawulelo loluntu kushukumisela abantu abathe tye ukuba badumise yaye bakhonze uYehova.
Ngokutsho kwencwadi yeBhayibhile yeSityhilelo, ikwayara yasezulwini idanduluka isithi: “Ufanele, Nkosi, ukwamkela uzuko, nembeko, namandla; ngokuba inguwe owadala zonke izinto, nangenxa yokuthanda kwakho zikho, zadalelwa oko.” (ISityhilelo 4:11) Indumiso enjalo asingomphumo wemvakalelo nje yokuziva ubophelelekile. Kunoko, ibangelwa yintlonelo enzulu ngoYehova.
Dumisa UThixo Ngokuvakalisa Iindaba Ezilungileyo
Ekudumiseni uYehova, umntu uxelisa umzekelo obalaseleyo kaYesu Kristu, umdumisi oyintloko kaThixo. Ukulandela emanyathelweni kaYesu kuquka ukuba nenxaxheba kumsebenzi wokushumayela iindaba ezilungileyo zoBukumkani bukaThixo. (Mateyu 4:17, 23; 24:14) Lo msebenzi wokushumayela uye wangowona mgudu mkhulu wenziweyo wokudumisa uYehova ehlabathini lonke.
Lo msebenzi wokushumayela ubaluleke ngakumbi kangangokuba iBhayibhile ngokucacileyo iwunxulumanisa nosindiso. AmaRoma 10:13-15 afundeka ngolu hlobo: “Bonke abasukuba belinqula igama leNkosi bosindiswa. Bothini na ke ukumnqula lowo bangakholwanga kuye? Bothini na ke ukukholwa kulowo bangamvanga? Bothini na ke ukuva, kungekho mshumayeli? Bothini na ke ukushumayela, bengathunywanga? Njengokuba kubhaliwe kwathiwa, Hayi, ukuba zintle kwazo iinyawo zabashumayela iindaba ezilungileyo zoxolo, zabashumayela iindaba ezilungileyo zezinto ezilungileyo!”
Kunyaka ophelileyo kuphela, amaNgqina kaYehova achithe iiyure ezingaphezu kwewaka lezigidi kumsebenzi wokushumayela. Yaye enjani yona imiphumo ukuba mihle ebangelwe ngulo msebenzi wokudumisa uThixo! Amanye anokuba ngama-314 000 athelele le kwayara yabadumisi ngokufuzisela uzahlulelo lwawo kuYehova ngokubhaptizwa emanzini.
Kanti, yintoni enokuthethwa ngabazizi-12 288 917 ababekho kwisikhumbuzo sokufa kukaKristu sowe-1994? Phakathi kwabo kwakukho abangaphezu kwezi-7 000 000 okwelo thuba ababengekamdumisi uYehova njengabashumayeli beendaba ezilungileyo. Kodwa ubukho babo kwesi siganeko sibalulekileyo ekugqibeleni bunokuphumela ekongezelelweni kwezigidi ezingakumbi kule kwayara yabadumisi. Yintoni enokwenziwa ukunceda aba banomdla babe ngabadumisi bakaYehova?
Uncedo Olufumanekayo
Abantu abaninzi abanomdla basenokuba nomnqweno wokudumisa uYehova kodwa bavakalelwe kukuba abanakukwazi ukufikelela oko kufunekayo. Benza kakuhle ukukhumbula amazwi omdumisi athi: “Ndiwaphakamisele ezintabeni na amehlo am? Luya kuvela phi na uncedo lwam? Uncedo lwam luvela kuYehova, uMenzi wezulu nehlabathi.” (INdumiso 121:1, 2) Kuyacaca ukuba umdumisi wawaphakamisela ezintabeni zaseYerusalem amehlo akhe apho kwakukho itempile kaYehova nesihlalo sasemhlabeni sorhulumente wobuthixo. Ngokusuka koku sinokuqukumbela ngokufanelekileyo sithi uncedo olufunekayo ukudumisa uThixo nokuvakalisa isigidimi soBukumkani lufumaneka kuphela kuYehova nentlangano yakhe.—INdumiso 3:4; Daniyeli 6:10.
Namhlanje, abo banqwenela ukudumisa uYehova banokulindela uncedo lothando olusuka kwintlangano yakhe yasemhlabeni. Ngokomzekelo, amaNgqina kaYehova anikela uncedo ngokuqhubela abantu abanomdla izifundo zeBhayibhile zamakhaya zesisa. Le nkqubo yemfundo iquka okungakumbi kunokufunda nje iimfundiso ezisisiseko zeBhayibhile. Inceda umfundi ukuba akhe uxabiso ngoko akufundayo nangentlangano esetyenziswa nguYehova.
Ngokuvisisana noku, iNgqina eliqhuba isifundo seBhayibhile lizama ukuqinisekisa ukuba iinyaniso ezisandul’ ukufunyanwa azifikeleli ingqondo nje kuphela kodwa zifikelela nentliziyo. Yaye lowo ufundisayo akafanele abe madolw’ anzima ukubonisa umfundi indlela ayisebenzisa ngayo uYehova intlangano Yakhe ukufeza injongo Yakhe emhlabeni. Incwadana enemifanekiso ethi AmaNgqina KaYehova—Enza Ukuthanda KukaThixo Ngokumanyeneyo Zwenibanzi neteyipu yevideo ethi Jehovah’s Witnesses—The Organization Behind the Name ngokufuthi ziye zangqineka ziluncedo ukuphumeza oku.
Kwakhona iintlanganiso zamaKristu zinendima enkulu ekuncedeni abo banokuba ngabadumisi bakaYehova. Sisaqalwa nje isifundo seBhayibhile, umfundi usenokucelwa ukuba aye kwiintlanganiso zamaKristu. Ekuhambeni kwexesha, uya kufunda ukubaluleka kokubakho rhoqo nokuba nenxaxheba kuzo zonke iintlanganiso zebandla. (Hebhere 10:24, 25) Abaveleli banokunikela uncedo oluxabiseke kunene kwabo bakholwa nabo nakwabo banokuba ngabadumisi bakaYehova ngokulungiselela iintlanganiso ezakhayo neziluncedo ngokomoya.
Nceda Abantwana Badumise UYehova
Abantwana baphakathi kwenyambalala enokuba ngabavakalisi beendaba ezilungileyo kwixesha elizayo elingekude. Ngokukhethekileyo oobawo banembopheleleko ngokutsho kweBhayibhile yokukhulisela abantwana babo “ekuqeqesheni nasekululekeni kweNkosi.” (Efese 6:4) Xa beqeqeshwe ngokufanelekileyo ngabazali abahlonela uThixo, kwanabantwana abancinane kakhulu banokuhlakulela umnqweno wokudumisa uYehova.
EArgentina enye intombazana encinane yaya ngokuphindaphindiweyo kubadala bebandla kangangeenyanga eziliqela, icela uncedo lwabo ukuze ifaneleke njengomvakalisi woBukumkani. Ekuhambeni kwexesha, abazali bayo nabadala bayivumela ukuba ibe ngumvakalisi ongabhaptizwanga. Sele inikela isigidimi soBukumkani ezindlwini ngokuphumelelayo. Nakubeni le ntombazana incinane ineminyaka emihlanu kuphela ubudala yaye ingakwazi ukufunda, iye yacengceleza iindawo ezifumaneka kuzo izicatshulwa ezithile zeBhayibhile. Emva kokuba isifumene isibhalo, icela umninimzi ukuba asifunde, yandule inikele ingcaciso.
Kucacile ukuba abadala nabazali banokufeza okulunge ngakumbi ngokukhuthaza nangokunceda abo bahambela phambili ekubeni ngabadumisi bakaYehova.—IMizekeliso 3:27.
Ulwalamano Lukanaphakade NoYehova
Kanti, kuthekani ukuba ubunxulumana namaNgqina kaYehova kangangexesha elithile kodwa sekunjalo akukawatheleli kumsebenzi wawo wokushumayela? Kusenokuba yingenelo ukuzibuza le mibuzo ilandelayo, ‘Ngaba ndiyakholelwa ukuba ndiye ndazuza inyaniso yaye uYehova ukuphela koThixo oyinyaniso? Ngaba ndeyisekile kukuba uBukumkani bukaThixo kuphela kwesicombululo kwiingxaki zoluntu? Ngaba ndiye ndalulahla lonke unqulo lobuxoki nezithethe zehlabathi nezenzo ezisisono kuYehova? Ngaba ndinothando olunzulu ngoThixo nangemilinganiselo yakhe yobulungisa?’ (INdumiso 97:10) Ukuba unokuphendula ngokunyanisekileyo uthi ewe kule mibuzo, yintoni ekuthintelayo ekudumiseni uYehova?—Thelekisa IZenzo 8:36.
Ukudumisa uYehova kubandakanya okungaphezu kokushumayela iindaba ezilungileyo. Ukuba uye wangenisa ulwazi oluchanileyo, wanokholo lokwenyaniso, yaye uvumelanisa ubomi bakho nemilinganiselo kaThixo, kufuneka womeleze ulwalamano lwakho lobuqu noThixo. Njani? Ngokwenza uzahlulelo kuye ngomthandazo wandule ke oku ukufuzisele ngokubhaptizwa emanzini. Ubomi obungunaphakade busenokufumaneka. Ngoko ke, sisebenzise ngoku isiluleko sikaYesu esithi: “Ngenani ngesango elimxinwa; ngokuba libanzi isango, iphangalele nendlela, esa entshabalalweni; baninzi ke abangena ngalo. Ngokuba limxinwa isango, icuthene nendlela, esa ebomini; bambalwa ke abalifumanayo.”—Mateyu 7:13, 14.
Ngoxa le nkqubo ikhoyo yezinto isondela esiphelweni sayo esiyintlekele, eli asiloxesha lokuthandabuza. Thabatha amanyathelo ngokukhawuleza okuzuza ulwalamano lukanaphakade noYehova. Eneneni, ngoku lixesha lokuba usabele ngokuvumayo kulo mbuzo, Ngaba uya kumdumisa uYehova?