Indlela AmaKristu Ahlangabezana Ngayo Nogculelo Lwasesidlangalaleni

UVAKALELWA njani xa ubani ekugculela okanye esasaza ubuxoki ngawe? Ngokwemvelo uba buhlungu gqitha. AmaNgqina kaYehova aba namava phantse anjalo nanini na esiba ngamaxhoba enkcazelo engachananga negqwethekileyo yejelo leendaba. Kodwa njengoko uYesu watshoyo kuMateyu 5:11, 12, asenaso isizathu sokuba novuyo.

Ngokomzekelo, enye impapasho yamaKatolika eJamani yathi “Ngqina ngalinye linyanzelekile ukuba linikele phakathi kwe-17 nama-28 ekhulwini engeniso yalo kwikomkhulu leli hlelo.” Noko ke, amaNgqina kaYehova akalilo ihlelo, kwaye umsebenzi wawo uwonke uxhaswa yiminikelo yokuzithandela. Abafundi abaninzi balahlekiswa yile nkcazelo ibubuxoki, nto leyo amaNgqina kaYehova ayifumanisa ibuhlungu. Kodwa afanele asabele njani amaKristu okwenyaniso xa egculelwa kwijelo leendaba?

Umzekelo Ofanele Ulandelwe NgamaKristu

KuMateyu isahluko 23 ichazwa ngokucacileyo indlela uYesu azichasa ngayo iintshaba zakhe zonqulo ngenxa yohanahaniso lwazo namaqhinga. Ngaba oku kuwamisela umzekelo amaKristu anamhlanje ngendlela yokuqhubana nabagxeki? Akunjalo. UNyana kaThixo wazichasa iintshaba zakhe zonqulo ngenxa yegunya elahlukileyo kunye nengqiqo awayenayo, ekwenza oko ukuze kungenelwe isihlwele esasimphulaphule.

UMateyu 15:1-11 ubalisa ukuba uYesu wagxekwa ngenxa yabafundi bakhe ekwakusithiwa baphule isithethe samaYuda. Wasabela njani uYesu? Waba ngqongqo akayekelela. Ngezihlandlo ezithile, uYesu wasukuzana ngokuphandle nabo babemgxeka, ephikisa iimbono zabo ezingachananga. Xa sithetha ngokuphandle, amaKristu namhlanje akenzi nto iphosakeleyo ngokuzama ukulungisa ukuqondwa kakubi komsebenzi okanye iimfundiso zawo, ezama ukucacisa imeko ngezibakala nangendlela yokuqiqisa. Akwenza oku ukuze ancede abantu abanyanisekileyo baqonde ukuba amaNgqina kaYehova agxekwa kungekho sizathu nto leyo ekukungcikiva.

Kodwa khawuphawule indlela uYesu asabela ngayo kamsinya emva koko xa abafundi bakhe bathi: “Uyazi na ukuba abaFarisi bathe bakuliva elo lizwi bakhubeka?” Aba baFarisi “bakhubeka”—abazange bacaphuke nje kuphela kodwa baba ziintshaba ezingaguqukiyo ezachaswa nguYesu. Ngenxa yoko waphendula wathi: “Bayekeni; ngabakhokeli beemfama abakwaziimfama.” Ukuqhubeka exoxa nabachasi abanentiyo ngolo hlobo kwakungenakunceda nto, kwakungeyongenelo nakubani na, yaye kwakunokukhokelela kuphela kwimpikiswano engenamiphumo. (Mateyu 7:6; 15:12-14; thelekisa nesama-27:11-14.) Iimpendulo ezanikelwa nguYesu zibonisa ukuba “ukuthi cwaka kunexesha lako, ukuthetha kunexesha lako.”—INtshumayeli 3:7.

AmaNgqina kaYehova akalindelanga ukuba wonke ubani athethe kakuhle ngawo. Ayawakhumbula amazwi kaYesu athi: “Yeha nina, xa bathetha kakuhle ngani bonke abantu! Kuba ooyise babo babesenjenjalo kubaprofeti ababuxoki.” (Luka 6:26) Umongameli wokuqala weWatch Tower Society, uC. T. Russell, wakha wabuzwa ukuba kutheni engazikhuseli nje xa egculelwa. Waphendula wathi: “Ukuba uza kuhamba ukhaba zonke iingqeqe ezikukhonkothayo, akusayi kufika apho uya khona.”

Ngoko asifanele sivumele iintetho zabo bazimisele ukusichasa zisiphazamise ekukhonzeni kwethu uThixo. (INdumiso 119:69) Masinikele ingqalelo kumsebenzi wamaKristu okwenyaniso, oko kukuthi, ukuhambisa ivangeli. Ngokuzenzekelayo, siya kuba namathuba okuphendula imibuzo nokucacisa injongo yomsebenzi wethu, njengoqhubela ubani ekuziphatheni kakuhle nokumfundisa ngeLizwi likaThixo.—Mateyu 24:14; 28:19, 20.

Ngaba Ufanele Uphendule Xa Ugxekwa?

UYesu wathi ngabalandeli bakhe: “Ngokuba ningengabehlabathi . . . Ngenxa yoko linithiyile ihlabathi.” (Yohane 15:19) Iingxelo ezininzi zamaphephandaba ezizisa ugculelo kumaNgqina kaYehova ziyimbonakaliso yale ntiyo, ibe azimele zikhathalelwe. Noko ke, ngamanye amaxesha ijelo leendaba lisenokunikela ngenkcazelo ebonisa ukungawaqondi amaNgqina okanye egqwetha ize izichaze kakubi izibakala ezithile. Abanye abacholacholi beendaba basenokufuna inkcazelo kwimithombo engafanelekanga. Enoba asiyisi so le nkcazelo ibubuxoki yejelo leendaba okanye sikhusela inyaniso ngeendlela ezifanelekileyo kuxhomekeke kwiimeko, kumphembeleli woku kugxekwa, nakusukelo lwakhe.

Maxa wambi izibakala zisenokulungiswa ngeleta ebhalwe kakuhle eya kumhleli ukuba ipapashwe yonke loo leta. Kodwa ileta enjalo isenokwenza kanye okuchasene nenjongo yayo. Njani? Oba buxoki bokuqala busenokuba ngundaba-mlonyeni, okanye abachasi basenokuba banikwe ithuba elongezelelekileyo lokusasaza ubuxoki okanye izityholo. Kwiimeko ezininzi kububulumko ukuwuyekela kubadala ababandakanyekileyo lo mcimbi weleta eya kumhleli. Ukuba ingxelo engentle yejelo leendaba yenza umonakalo, iofisi yesebe leWatch Tower Society inokuwazisa onke amabandla akwelo lizwe ngezibakala, ibenza bakwazi bonke abavakalisi ukunikela ingcaciso eyanelisayo kwabo babuzayo.

Ngaba kuyimfuneko ukuba ubandakanyeke kwizityholo ezigqwetheke ngolo hlobo? Isiluleko sikaYesu esithi “bayekeni,” ningabakhathaleli, ngokucacileyo sisebenza kolu didi lweentshaba. AmaKristu anyanisekileyo anezizathu ezisekelwe eBhayibhileni zokubaphepha abawexuki neembono zabo. (1 Korinte 5:11-13; Tito 3:10, 11; 1 Yohane 2:19; 2 Yohane 10, 11) Ukuba ubani ngokunyanisekileyo unomdla wokwazi enoba ukugxekwa kwamaNgqina kusekelwe kwinyaniso okanye kubuxoki, ulwazi lwakho olunzulu ludla ngokwanela ukunikela impendulo.—Bona IMboniselo kaMatshi 15, 1986, iphepha 13 nele-14.

Ukuba ujamelene nenkcazelo egqwethekileyo yamaphephandaba, thobela isiluleko esikwiMizekeliso 14:15 esithi: “Isiyatha sikholwa ngamazwi onke; onobuqili uyakuqonda ukunyathela kwakhe.” ESwitzerland abantu abaninzi bacaphuka xa ingxelo yamaphephandaba eyayichukumisa yachaza ngentombazana eselula eliNgqina eyafayo ngenxa yokuba izalamane zayo zingazange zivumele abasebenzi bezamayeza ukuba bayitofele igazi. Noko ke ngaba oko kwakunjalo ngokwenene? Nakanye. Lo mguli wala ukutofelwa igazi ngenxa yonqulo lwakhe, kodwa walamkela olunye uncedo lwezamayeza olungasebenzisi gazi. Oku ngekwakuqaliswe ngaphandle kokulibazisa ibe ngokunokwenzeka ngekwakubusindisile ubomi bakhe. Noko ke, isibhedlele salibazisa ngokungeyomfuneko de akwabikho nto inokwenziwa ukunceda. Ingxelo yamaphephandaba ayizange izikhankanye ezi zibakala.

Ngenxa yoko, khawuthelekise ngenyameko ubunyaniso obukwezo ngxelo. Sinokucacisa kwabo babuzayo ukuba abadala basekuhlaleni bayazinyamekela iimeko ezinjalo ngendlela enothando yaye ngokungqinelana nokhokelo olusekelwe eBhayibhileni. Ukunamathela kwimigaqo xa siphendula kuyasithintela ekufikeleleni kwizigqibo ngokungxama.—IMizekeliso 18:13.

Inkcazelo Esuka Kumthombo Ofanelekileyo Ibalulekile

Ngenkulungwane yokuqala, abantu basasaza ubuxoki ngoYesu Kristu ukuze bangcolise igama lakhe, bambi besithi ngumngcatshi-mbuso. (Luka 7:34; 23:2; thelekisa uMateyu 22:21.) Kamva, ibandla eliselitsha lamaKristu lajamelana nenkcaso enkulu evela koothunywashe bonqulo nabehlabathi. Ekubeni ‘uThixo esuke wanyula izinto ezibubudenge zehlabathi,’ abaninzi babajongela phantsi abakhonzi bakhe. (1 Korinte 1:22-29) AmaKristu okwenyaniso namhlanje amele alulindele ugculelo, oluluhlobo lwentshutshiso.—Yohane 15:20.

Noko ke, amaNgqina kaYehova ayakuxabisa ukuncokola nomntu ongathabathi cala nobonisa isimo sengqondo esifana nesabathile kwiindwendwe zikaPawulos eRoma, ezathi: “Singa ke singeva kuwe izinto ozicingayo; kuba okunene ngalo elo hlelo kuyazeka kuthi, ukuba lichasiwe ezindaweni zonke.”—IZenzo 28:22.

Bacacisele abantu abanenkcazelo engachananga, ukwenza oko ngobulali. (Roma 12:14; thelekisa neyesi-2 kuTimoti 2:25.) Bameme ukuba bafumane inkcazelo eyiyo ngamaNgqina kaYehova, okuya kubenza bakwazi ukubona ngaphaya kwezityholo zobuxoki. Unokusebenzisa nengcaciso epapashwe yiWatch Tower Society enikela iinkcukacha ngentlangano, imbali yayo, kwaneemfundiso zayo.a Ngesinye isihlandlo uFilipu waphendula uNataniyeli ngokulula wathi: “Yiza ubone.” (Yohane 1:46) Nathi sinokwenza okufanayo. Nabani na onomdla wamkeleke ngokufudumeleyo ukuba atyelele kwiHolo yoBukumkani yasekuhlaleni ukuze azibonele ngokwakhe uhlobo lwabantu alulo amaNgqina kaYehova kunye noko akukholelwayo.

Musa Ukoyikiswa Ngabo Bachasayo

Hayi indlela ekukhuthaza ngayo ukwazi ukuba ugculelo alubathinteli abantu ekubeni ngamaNgqina! Ebudeni benkqubo yengxoxo kamabonwakude eJamani, abawexuki basasaza ubuxoki obuninzi ngamaNgqina. Omnye umbukeli wazigqala izinyeliso zaba bawexuki njengezingenasihlahla ibe washukunyiselwa ekubeni aqalise kwakhona isifundo seBhayibhile namaNgqina. Ewe, maxa wambi ukugculelwa esidlangalaleni kuba nemiphumo emihle!—Thelekisa eyabaseFilipi 1:12, 13.

Umpostile uPawulos wayesazi ukuba bambi babeya kunikela ingqalelo “kumabali obuxoki” kunakwinyaniso. Ngoko ke wabhala oku: “Yiba yingcathu ezintweni zonke, nyamezela ububi, umsebenzi womshumayeli weendaba ezilungileyo wenze, buzalise ubulungiseleli bakho.” (2 Timoti 4:3-5; thelekisa iNW.) Ngoko musa ukuzivumela uphazanyiswe, yaye ‘ungothuswa nantweni-nye’ ziintshaba zakho. (Filipi 1:28) Hlala uzolile yaye unokuzithemba uze ushumayele iindaba ezilungileyo ngovuyo, ibe uya kuhlala uqinile xa ujamelene nogculelo lwasesidlangalaleni. Ewe, khumbula isithembiso sikaYesu esithi: “Ninoyolo nina, xa bathe abantu baningcikiva, banitshutshisa, bathetha zonke izinto ezikhohlakeleyo ngani bexoka, ngenxa yam. Vuyani nigcobe kunene; ngokuba umvuzo wenu mkhulu emazulwini; kuba benjenjalo ukubatshutshisa abaprofeti ababekho phambi kwenu.”—Mateyu 5:11, 12.

[Umbhalo osemazantsi]

[Amagama acatshulweyo akwiphepha 27]

Xa wayejongene neentshaba zakhe, uYesu wabaxelela oku abafundi bakhe: “Bayekeni.” Wayethetha ukuthini?

[Amagama acatshulweyo akwiphepha 29]

“Ninoyolo nina, xa bathe abantu baningcikiva, banitshutshisa, bathetha zonke izinto ezikhohlakeleyo ngani bexoka, ngenxa yam.”—Mateyu 5:11.