Ngaba Inyaniso Engonqulo Inokufumaneka?

ENYE indoda yaseSweden kwidolophu eneyunivesithi yaseUppsala eyayinomdla wokwazi ngezinto zokomoya yagqiba ekubeni ifundisise ngeenkolelo zeenkonzo ezahlukahlukeneyo ezikwidolophu yayo, yada yaya nakwiindawo zazo zonqulo. Yayiphulaphula njengoko abefundisi bazo beshumayela, ize idlan’ indlebe namarhamente athile. Yaphawula ukuba ngamaNgqina kaYehova kuphela awayebonakala eyisekile kukuba ‘ayeyifumene inyaniso.’ Icinga ngeengcamango zonqulo ezahlukahlukeneyo, yazibuza isizathu sokuba amaNgqina atsho njalo.

Ngaba wena ucinga ukuba inokufumaneka inyaniso ngokuphathelele unqulo? Ngaba kunokude kuqondwe noko kusenokubizwa ngokuba yinyaniso epheleleyo?

Intanda-bulumko Nenyaniso

Abo baye bafunda ngentanda-bulumko baye banembono yokuba uluntu alunakuyifumana inyaniso epheleleyo. Usenokuba uyazi ukuba intanda-bulumko ichazwa ‘njengenzululwazi ezama ukucacisa imvelaphi yezinto ezikhoyo nobomi.’ Nangona, eneneni ingafane iyicacise ngokubhekele phaya. Kwincwadi ethi Filosofins Historia (Imbali Yentanda-bulumko), umbhali waseSweden uAlf Ahlberg wabhala: “Imibuzo emininzi yentanda-bulumko ayinakuphenduleka ngokuthe ngqo kwaphela. . . . Abantu abaninzi banembono yokuba yonke imibuzo engezinto abangakwazi kuziqonda [ephathelele imvelaphi yezinto] ingaphantsi kolu . . . didi.”

Ngenxa yoko, abo baye bazama ukufumana impendulo kwimibuzo ebalulekileyo engobomi kwintanda-bulumko ngokufuthi baye banganeliseki okanye babandezeleke ekugqibeleni. Kwincwadi yakhe ethi Tankelinjer och trosformer (Iindlela Zokucinga Neenkolelo Zonqulo), umbhali waseSweden uGunnar Aspelin wathi: “Ekuphela kwento esiyibonayo kukuba umdla enawo indalo kubantu awusawodluli enawo kwibhabhathane nengcongconi . . . Asinamandla, asinawo konke konke, xa sijamelene namandla endalo asebenzisanayo kummandla wendalo ongasentla kwanakwihlabathi lethu. Le yimbono abanayo abanye ngobomi nebivela ngokufuthi kuncwadi olubhaliweyo ngasekupheleni kwenkulungwane ekuthe kuyo abantu baba nethemba lenkqubela yaye baphupha ngekamva elilunge ngakumbi.”

Ngaba Ukutyhilelwa Ngenyaniso Kuyafuneka?

Kucacile ukuba imigudu yomntu eyedwa yokufumana inyaniso ngobomi ayiphumelelanga, yaye akubonakali ngathi iya kuze iphumelele. Ngoko, kusengqiqweni ukugqiba ngelithi kufuneka uhlobo oluthile lwesityhilelo esivela kuThixo. Oko abaninzi bakubiza ngokuba yincwadi yendalo kunikela isityhilelo esithile. Kwanokuba akunikeli nkcukacha zicacileyo ngemvelaphi yobomi, kubonisa ukuba kukho indlela eyanelisa ngakumbi yokuchaza ubomi kunengcaciso engezinto zokwenyama. Ingca ekhula ibheke phezulu eneneni ithobela imithetho eyahlukileyo kuleyo elawula imfumba yamatye kumhadi odilikayo. Izinto eziphilayo endalweni zikhula zize zizilungelelanise ngendlela eyahlukileyo kuleyo yezinto ezingaphiliyo. Ngaloo ndlela, umfundi odumileyo womthetho nonqulo kwakufanelekile ukuba agqibe ngelithi: “Kwasekudalweni kwehlabathi, iindawo [zikaThixo] ezibe zingenakubonwa zibonwa kakuhle, ziqondeke, ngezinto ezenziweyo.”—Roma 1:20.

Kodwa ukuze sifumanise ukuba ngubani na obangela oku kukhula noku kuzilungelelanisa kwazo, sifanele sifumane isityhilelo esingakumbi. Ngaba asifanele silindele ukuba sibekho isityhilelo esinjalo? Ngaba bekungayi kuba sengqiqweni ukulindela ukuba Lowo ubangele kwakho ubomi emhlabeni azityhile kwizidalwa zakhe?

IBhayibhile ithi iseso sityhilelo. Kweli phephancwadi ngokufuthi sinikele izizathu zokuba silamkele elo, yaye abantu abaninzi abaqiqayo baye benjenjalo. Iphawuleka ngokwenene into yokuba abantu ababebhala iBhayibhile babezimisele ukulenza licace elokuba babengabhali izinto eziphuma kubo. Ngaphezu kwezihlandlo ezingama-300, sibafumana abaprofeti beBhayibhile besebenzisa amabinzana anjengathi, “Utsho uYehova ukuthi.” (Isaya 37:33; Yeremiya 2:2; Nahum 1:12) Usenokuba uyazi ukuba amadoda nabafazi ababhala iincwadi okanye amanqaku ngokuqhelekileyo bakuthanda ngokwenene ukubhala amagama abo kwiincwadi zabo. Ukanti, abo babhala iBhayibhile abazange bazibalaselise; maxa wambi kunzima ukuqonda ukuba ngubani owabhala iinxalenye ezithile zeBhayibhile.

Enye inkalo yeBhayibhile osenokufumanisa ukuba ibalulekile kukuvisisana kwayo. Oku kuphawuleka ngokwenene, ekubeni iincwadi ezingama-66 eziyila iBhayibhile zabhalwa kwithuba leminyaka engaphezu kwe-1 600. Masithi ubuye kwindlu yogcino-zincwadi kawonke wonke waza wakhetha iincwadi zonqulo ezingama-66 ezabhalwa kwithuba leenkulungwane ezili-16. Uze emva koko uzihlanganise ezo ncwadi zibe ngumqulu omnye. Ngaba ubuya kulindela ukuba loo mqulu ube nomxholo omnye nesigidimi esivisisanayo? Nakanye. Oko bekuya kufuna wenze ummangaliso. Khawucinge ngoku: Iincwadi zeBhayibhile zinomxholo omnye, yaye ziyangqinelana. Oku kubonisa ukuba kumele ukuba kukho umntu omnye owayiyilayo, okanye umbhali, owanika imiyalelo ngoko ababhali beBhayibhile babemele bakubhale.

Noko ke, uya kufumana inkalo engqina ngaphezu kwayo yonke into ukuba iBhayibhile inemvelaphi yobuthixo. Iziprofeto—inkcazelo ebhalwe kwangaphambili ngoko kuya kwenzeka kwikamva. YiBhayibhile kuphela enamabinzana anjengathi, “Kuya kuthi ngaloo mini” nathi “Kuya kuthi ekupheleni kwemihla.” (Isaya 2:2; 11:10, 11; 23:15; Hezekile 38:18; Hoseya 2:21-23; Zekariya 13:2-4) Kumakhulukhulu eminyaka ngaphambi kobukho bukaYesu Kristu emhlabeni, iziprofeto ezikwiZibhalo zesiHebhere zanikela iinkcukacha ngobomi bakhe—ukususela ekuzalweni ukusa ekufeni kwakhe. Asikho esinye isigqibo esisengqiqweni ekunokufikelelwa kuso ngaphezu kweso sokuba iBhayibhile ngumthombo wenyaniso engobomi. UYesu uyakuqinisekisa oku ngamazwi athi: “Ilizwi lakho liyinyaniso.”—Yohane 17:17.

Unqulo Nenyaniso

Kwanabaninzi abathi banokholo eBhayibhileni bakholelwa ukuba inyaniso epheleleyo ayinakufumaneka. Umfundisi waseUnited States uJohn S. Spong wagqabaza: “Simele . . . siyeke ukucinga ukuba sithi sodwa abanenyaniso yaye abanye bamele bamkele imbono yethu size siqonde ukuba inyaniso epheleleyo ayinakufunyanwa mntu.” Umbhali ongumRoma Katolika, uChristopher Derrick, unikela esinye isizathu sokuba neembono ezahlukileyo ngokuphathelele ukufumana inyaniso: “Xa ukhankanya nje ‘inyaniso’ yonqulo oko kwenza ngathi uthi unolwazi . . . Unikela ingcamango yokuba omnye umntu usenokuba akachananga; yaye oko akufuneki kwaphela.”

Noko ke, njengomntu oqiqayo, uya kuba wenza kakuhle ukucinga ngeminye imibuzo ephathelele oku. Ukuba inyaniso ibingenakufumaneka, kwakutheni ukuze uYesu Kristu athi: “Naniya kuyazi inyaniso, yaye inyaniso iya kunikhulula”? Yaye kwakutheni ukuze omnye wabapostile bakaYesu athi ukuthanda kukaThixo kukuba “bangasindiswa bonke abantu bafikelele ekuyazini inyaniso”? Kutheni igama “inyaniso” linxityelelaniswa nokholo ngaphezu kwezihlandlo ezilikhulu kwiZibhalo zamaKristu zesiGrike? Ewe, kutheni kunjalo nje, ukuba inyaniso ayinakufumaneka?—Yohane 8:32; 1 Timoti 2:3, 4.

Eneneni, uYesu akazange abonise ukuba inyaniso inokufumaneka kuphela kodwa wabonisa ukuba kufuneka siyifumane ukuba unqulo lwethu luza kwamkeleka kuThixo. Xa intokazi engumSamariya yayibuza ukuba luluphi unqulo oluyinyaniso—lunqulo olwaluqheliselwa ngamaYuda eYerusalem okanye lolo lwaluqheliselwa ngamaSamariya kwiNtaba iGerizim—uYesu akazange ayiphendule ngokuthi inyaniso ayinakufumaneka. Kunoko, wathi: “Abanquli abayinyaniso baya kumnqula uBawo ngoMoya nangenyaniso; kuba uBawo ufuna abanjalo ukumnqula. UThixo unguMoya; abo ke bamnqulayo bamelwe kukumnqula ngoMoya nangenyaniso.” (Akekeliswe sithi.)—Yohane 4:23, 24.

Abantu abaninzi bathi, ‘IBhayibhile inokucaciswa ngeendlela ezininzi, ngoko ubani akanakuqiniseka kwaphela ngoko kuyinyaniso.’ Kodwa eneneni ngaba iBhayibhile ibhalwe ngendlela engacacanga kangangokuba akunakuqiniseka ngendlela emele iqondwe ngayo? Kuyavunywa ukuba, kusenokuba nzima ukusiqonda isigama seziprofeto namabinzana athile afuziselayo. Ngokomzekelo, uThixo waxelela umprofeti uDaniyeli ukuba incwadi yakhe, enesigama seziprofeto kakhulu, yayingayi kuqondwa ngokupheleleyo kude “kube lixesha lokuphela.” (Daniyeli 12:9) Yaye kucacile ukuba imizekeliso namabinzana athile afuziselayo afanele acaciswe.

Noko ke, kucacile ukuba iBhayibhile iyangqala kwiimfundiso nemilinganiselo yokuziphatha yamaKristu esisiseko, eyimfuneko ekunquleni uThixo ngenyaniso. Ibangela kungabi yimfuneko ukuyicacisa ngeendlela eziphikisanayo. Kwincwadi eya kwabase-Efese, kuthiwa ukholo lwamaKristu “lunye,” okubonisa ukuba kwakungamele kubekho iintlobo ezininzi zokholo. (Efese 4:4-6) Mhlawumbi usenokuzibuza, ‘Ukuba iBhayibhile ayinakucaciswa ngokufanelekileyo ngeendlela ezininzi ezahlukahlukeneyo, kutheni kukho iimvaba “zobuKristu” ezininzi nezahluke kangaka?’ Siyayifumana impendulo ukuba sikhangela emva kwixesha elingephi emva kokufa kwabapostile bakaYesu kwaza kwavela uwexuko kwibandla lamaKristu okwenyaniso.

‘Ingqolowa Nomdiza’

UYesu waluxela kusengaphambili olu wexuko kumzekeliso wakhe wengqolowa nomdiza. UYesu wachaza ukuba “ingqolowa” imela amaKristu okwenyaniso; “umdiza” umela amaKristu obuxoki, okanye awexukileyo. UYesu wathi, “Xa baleleyo abantu . . . utshaba” lwaluya kuhlwayela umdiza kwintsimi yengqolowa. Oku kuhlwayela kwaqalisa emva kokufa kwabapostile. Lo mzekeliso ubonisa ukuba oku kubhidaniswa kwamaKristu okwenyaniso nawobuxoki kwakuya kuqhubeka de kufike ‘ukupheliswa kwephakade eli.’ Ngaloo ndlela, ukutyhubela iinkulungwane, ebengabonwa kakuhle amaKristu okwenyaniso ngenxa yokuba abona bantu bebebaninzi kwintsimi yonqulo ibingabo bebengamaKristu ngegama. Noko ke, “ekuphelisweni kweli phakade,” izinto zaziya kuguquka. “UNyana woMntu” wayeya “kuthuma izithunywa zakhe” ukuba zahlule amaKristu obuxoki kumaKristu okwenyaniso. Oku kwakuthetha ukuba ngoko kwakuya kuba lula ukulibona ibandla lamaKristu, likumgangatho elalikuwo kwixesha labapostile.—Mateyu 13:24-30, 36-43.

Iziprofeto zikaIsaya noMika zaxela kwangaphambili ukuba kwakuya kuphinda kuhlanganiswe abanquli bokwenyaniso “ekupheleni kwemihla.” UIsaya uthi: “Kuya kuthi ekupheleni kwemihla, intaba yendlu kaYehova ivelele ezincotsheni zazo iintaba, izongamele iinduli, zibe ngumsinga ukuya kuyo zonke iintlanga. Kuya kuhamba izizwe ezininzi, zithi, Yizani, sinyuke siye entabeni kaYehova, endlwini kaThixo kaYakobi; asiyalele iindlela zakhe, sihambe ngomendo wakhe.” Ukuhlolisisa izibakala kubonisa ukuba isiprofeto sikaIsaya siyazaliseka kwixesha lethu.—Isaya 2:2, 3; Mika 4:1-3.

Noko ke, ibandla lamaKristu alikhuli ngenxa yomgudu womntu. UYesu waxela kusengaphambili ukuba wayeya “kuthuma izithunywa zakhe” ukuba zenze umsebenzi wokuhlanganisa. Kwakhona wabonisa ukuba oko kwakuya kuphumeza injongo ekhethekileyo kakhulu: “Aya kwandula ke amalungisa ukubengezela njengelanga ebukumkanini boYise wawo.” (Mateyu 13:43) Oku kubonisa ukuba ibandla lamaKristu laliya kwenza umsebenzi wokukhanyisa, okanye wokufundisa ehlabathini lonke.

AmaNgqina kaYehova ayayibona inzaliseko yezi ziprofeto kumsebenzi wokufundisa awenzayo kumazwe angama-232 namhlanje. Ngokuthelekisa iinkolelo, imilinganiselo yehambo nolungelelwano lwamaNgqina neBhayibhile, abantu abanyanisekileyo banokubona ngokucacileyo ukuba zivisisana nezo zebandla lamaKristu lenkulungwane yokuqala. AmaNgqina athetha ngokholo lwawo ‘njengenyaniso’ kodwa kungengenxa yokuzikhukhumalisa okuthile kobuqu. Kunoko, enjenjalo kuba elifundisise ngokunzulu iLizwi likaThixo, iBhayibhile, yaye elandela lona njengekuphela kwento yokulinganisa umgangatho olumele lube kuwo unqulo.

AmaKristu okuqala ayebhekisela kukholo lwawo ‘njengenyaniso.’ (1 Timoti 3:15; 2 Petros 2:2; 2 Yohane 1) Oko kwakuyinyaniso kuwo kumele kube yinyaniso nakuthi namhlanje. AmaNgqina kaYehova amema bonke abantu ukuba bazibonele ngokwabo oko ngokufundisisa iBhayibhile. Sithemba ukuba ngokwenjenjalo uya kufumana uvuyo olungabangelwa nje kuphela kukufumana inkonzo ezidlulayo ezinye kodwa olubangelwa kukufumana inyaniso!

[Ibhokisi ekwiphepha 5]

EZINYE IINTANDA-BULUMKO EZINXAMNYE NENYANISO

YEZINTO ZOKWENENE: Ingcamango yokuba zonke iimbono ezingokonqulo zibubuvuvu obungenakuchazwa nokuba injongo yentanda-bulumko kukumanyanisa iinzululwazi zokwenene zibe yimbumba.

YOKUNGABI NATHEMBA NGEZINTO EZIPHILAYO: Abameli bayo babephenjelelwe kakhulu zizinto ezimbi ezenzeka kwiMfazwe yeHlabathi II yaye ngoko baba nembono emfiliba ngobomi. Igxininisa ekuhlolisiseni usizi aba kulo umntu xa ejamelene nokufa nobomi obungenantsingiselo. UJean-Paul Sartre obhala ngobukho bezinto wathi ekubeni kungekho Thixo, umntu ulahlwe kwesinomhlwa yaye uphila kummandla wendalo ongenanceba konke konke.

YENTANDABUZO: Ibalaselisa ukuba ukuhlolisisa imicimbi nokusebenzisa ingqiqo akunakuze kusenze sibe nolwazi—nayiphi na inyaniso—lokwenene nolufanayo ngezinto ezikhoyo.

YOKUSEBENZA KWEENKOLELO: Ikholelwa kwelokuba izinto esizikholelwayo ziba zezixabiseke ngokwenene xa ziluncedo kwizinto ezinqwenelwa ngabantu, ezinjengokuphucula imfundo, ukuziphatha nezobupolitika. Ayikuboni kwaphela ukuxabiseka kwenyaniso.

[Inkcazelo Ngomfanekiso okwiphepha 2]

Page 3: Second from left: Courtesy of The British Museum; Right: Sung Kyun Kwan University, Seoul, Korea