Imibuzo Evela Kubafundi
Iingenelo zenkonzo kaKristu Yesu njengombingeleli omkhulu, ezikhankanywe kumaHebhere 4:15, 16, zisebenza njani ‘kwezinye izimvu’ ngoku?
Nangona indima kaYesu njengoMbingeleli Omkhulu inentsingiselo ngokuyintloko kwabo aya kuba nabo ezulwini, amaKristu anamathemba asemhlabeni ayangenelwa kwanangoku kwinkonzo kaYesu njengombingeleli.
Ukususela kuAdam, abantu bebesoloko benoxanduva lwesono. Siyabandezeleka ngenxa yokungafezeki esakuzuz’ ilifa, njengokuba kwakunjalo kumaSirayeli. Ayebhenela kubabingeleli abakhulu nakubabingeleli abangaphantsi abaninzi, ababenikela imibingelelo ngenxa yezono zabo kwanangenxa yezabantu. Ekuhambeni kwexesha, uYesu wathanjiswa njengombingeleli “ngokohlobo lukaMelkitsedeke.” Emva kokuvuswa kwakhe, uYesu wema phambi koYehova ukuze anikele ngexabiso ledini lakhe lomntu ofezekileyo.—INdumiso 110:1, 4.
Kuthetha ntoni oku kuthi namhlanje? Kwincwadi yakhe eya kumaHebhere, uPawulos waxubusha ngenkonzo kaYesu njengoMbingeleli Omkhulu. KumaHebhere 5:1, sifunda oku: “Wonke umbingeleli omkhulu, engovele ebantwini nje, umiselwa abantu ezintweni ezilunge kuThixo, ukuze asondeze iminikelo kwanamadini ngenxa yezono.” Emva koko, kwindinyana 5 neyesi-6, uPawulos wabonisa ukuba uYesu waba ngumbingeleli omkhulu, nto leyo enokusenza singenelwe.
Njani? UPawulos wabhala: “Nakuba ebenguNyana, wafunda ukululama ngobunzima awabuvayo; waza, egqibelele, waba yimbangi yosindiso olungunaphakade kubo bonke abamlulamelayo.” (Hebhere 5:8, 9) Ekuqaleni, loo ndinyana isenokusenza sicinge ngendlela esiya kungenelwa ngayo kwihlabathi elitsha, xa abo banyanisekileyo kuThixo nakuYesu beya kuba bekhululwe esonweni yaye beya kufumana ubomi obungunaphakade. Elo lithemba eliqinisekileyo, elisekelwe kwixabiso elikhululayo ledini likaYesu nakwinkonzo yakhe njengoMbingeleli Omkhulu.
Noko ke, eneneni sisenokungenelwa kwanangoku kwindima okanye kwinkonzo yakhe njengoMbingeleli Omkhulu. Phawula oko kuthethwa kumaHebhere 4:15, 16: “Asinambingeleli mkhulu ungenako ukuvelana nezilwelwe zethu; ke, sinowahendwayo ngeento zonke, ngokokufana nathi, engenasono. Masisondele ke ngoko sinokungafihlisi kuyo itrone yobabalo, ukuze samkeliswe inceba, sifumane ubabalo lokusiza ngexesha elililo.” Liya kuba nini ‘ixesha elililo’? Lixa sifuna inceba nobabalo. Ngenxa yokuba singafezekanga, sonke sifanele sibe nayo ngoku le ntswelo.
AmaHebhere 4:15, 16 avelisa ingongoma yokuba noYesu—ongumbingeleli ezulwini ngoku—wakha wangumntu, ngoko unokulubonakalisa uvelwano. Kubani? Kuthi. Nini? Ngoku. Xa wayengumntu, uYesu waba namava oxinezeleko neengcinezelo abaziqhelileyo abantu. Ngezinye izihlandlo, uYesu wayelamba yaye anxanwe. Yaye nangona wayefezekile, wayedinwa. Oko kumele kusikhuthaze. Ngoba? Ngenxa yokuba uYesu unamava obuqu okudinwa kokwemvelo, uyayiqonda indlela esivakalelwa ngayo ngokufuthi. Kwakhona, khumbula ukuba kwafuneka uYesu ajamelane neempikiswano ezibangelwa ngumona phakathi kwabapostile bakhe. (Marko 9:33-37; Luka 22:24) Ewe, wayekhe aphoxeke. Ngaba oko akufanele kusenze sibe nentembelo yokuba uyaqonda xa siphoxekile, sidimazekile? Ngokuqinisekileyo.
Yintoni onokuyenza, xa udimazekile? Ngaba uPawulos wathi kufuneka ulinde de, kwihlabathi elitsha, uMbingeleli wakho Omkhulu, uYesu, akuncede ube nengqondo nomzimba ofezekileyo? Akunjalo. UPawulos wathi: ‘Sinokwamkeliswa inceba, sifumane ubabalo lokusiza ngexesha elililo,’ yaye oko kukwaquka eli lethu. Ngaphezu koko, xa uYesu wayengumntu, wabandezeleka yaye watsala nzima, ‘ehendwa ngeento zonke.’ (Akekeliswe sithi.) Ngoko xa sijamelana nezinto ezinjalo, ukulungele ukusinceda, ngesizinzi solwazi analo ngoko sityhubela kuko. Ngaba oko akukwenzi utsalelekele kuye?
Ngoku phawula Heb 4 indinyana 16. UPawulos uthi thina—yaye oku kuquka abathanjiswa nabezinye izimvu—sinokusondela kuThixo sinokungafihlisi. (Yohane 10:16) Lo mpostile wayengathethi ukuba xa sithandaza sinokuthetha nantoni na esifuna ukuyithetha, kwanezinto ezibonisa umsindo nokungabi nantlonelo. Kunoko, ngesizinzi sedini likaYesu nendima yakhe njengoMbingeleli Omkhulu, sinokusondela kuThixo phezu kwako nje ukuba singaboni.
Enye indlela esinokungenelwa ngayo kwanangoku kwimisebenzi yoMbingeleli wethu Omkhulu, uYesu Kristu, ibandakanya izono okanye iimpazamo zethu. Ngokuqinisekileyo asilindelanga ukuba uYesu asenze singenelwe ngokuzeleyo kumvuzo wedini lakhe kule nkqubo yezinto. Kwanokuba ebenokwenjenjalo, sekunjalo besingayi kuba nobomi obungunaphakade. Ngaba uyayikhumbula ingxelo ekuLuka 5:18-26, engendoda enedumbe eyangeniswa ngokhuko kumngxuma owawuseluphahleni? UYesu wathi kuyo: “Mntundini, uzixolelwe izono zakho.” Oko kwakungabhekiseli kwizono ezithile ezazikhokelele ekubeni ibe nedumbe. Kumele ukuba kwakubhekisela kwizono zale ndoda ngokubanzi, yaye ukusa kumlinganiselo othile kwakunokubandakanya ukungafezeki kwayo eyakuzuz’ ilifa, okubangela iinkxwaleko.
Ngesizinzi sedini awayeza kulinikela, uYesu wayenokuzisusa izono zale ndoda, njengoko ibhokhwe ka-Azazele yayimka nezono zikaSirayeli ngoMhla Wocamagusho. (Levitikus 16:7-10) Sekunjalo, le ndoda yayinedumbe yayisengumntu. Yayiza kona kwakhona, yaye emva kwexesha yafa, njengoko bamele benjenjalo aboni. (Roma 5:12; 6:23) Oko kwathethwa nguYesu kwakungathethi ukuba le ndoda yafumana ubomi obungunaphakade kwangoko. Kodwa le ndoda yasikelelwa ngomlinganiselo othile wokuxolelwa ngelo xesha.
Ngoku khawucinge ngemeko yethu. Ekubeni singafezekanga, sona mihla le. (Yakobi 3:2) Yintoni esinokuyenza ngaloo nto? Ezulwini sinoMbingeleli Omkhulu onenceba esinokusondela kuYehova ngomthandazo egameni lakhe. Ewe, njengoko uPawulos wabhalayo, sonke ‘sinokusondela sinokungafihlisi kuyo itrone kaThixo yobabalo, ukuze samkeliswe inceba, sifumane ubabalo lokusiza ngexesha elililo.’ Ngoko ke, akuthandabuzeki ukuba bonke abangabezinye izimvu namhlanje bafumana iingenelo ezingummangaliso kwinkonzo ephunyezwa nguKristu njengombingeleli omkhulu, kuquka ukuba nesazela esilungileyo.
Onke amaKristu anethemba lasemhlabeni anokukhangela phambili kwiingenelo ezizuke ngakumbi kwihlabathi elitsha elisemnyango. Ngelo xesha uMbingeleli wethu Omkhulu uya kwenza singenelwe ngokupheleleyo kwidini lakhe, ebangela ukuba isono sixolelwe ngokupheleleyo. Kwakhona uya kusenza singenelwe ngakumbi ngokunyamekela impilo yabantu yokwenyama neyokomoya. Yaye uYesu uya kuyandisa kakhulu imfundo yabantu bakaThixo emhlabeni, ekubeni ukufundisa uMthetho kwakuyimbopheleleko eyintloko yababingeleli kwaSirayeli. (Levitikus 10:8-11; Duteronomi 24:8; 33:8, 10) Ngenxa yoko, ngoxa singenelwa kwinkonzo ephunyezwa nguYesu njengombingeleli ngoku, sisalindelwe kokukhulu!