Inyaniso Ngezithunywa Zezulu

Ngokuqhelekileyo ukuqhelana nomntu othile kuquka ukufunda okuthile ngentsapho yaloo mntu. Kuyafana nangokwazi uYehova uThixo. Kubandakanyeke okungakumbi kunokufunda nje igama lakhe. Sikwamele sifunde okuthile “ngentsapho” yakhe yasezulwini. (Thelekisa eyabase-Efese 3:14, 15.) IBhayibhile ithi izithunywa zezulu ‘ngoonyana’ bakaThixo. (Yobhi 1:6) Ngenxa yendima yazo ebalulekileyo eBhayibhileni, sifanele sifune ukufunda okungakumbi ngazo ukuze siyiqonde indawo yazo kwinjongo kaThixo.

KUKHO indlela yokuphila entsha eyandayo. Abantu abaninzi abapheleli nje ekuthini bayakholelwa kwizithunywa zezulu; abangakumbi bathi baye banxibelelana nazo ngandlel’ ithile. Xa abemi baseMerika abangama-500 babuzwa lo mbuzo, “Ngaba wakha wanxibelelana nesithunywa sezulu ebomini bakho?” phantse omnye kwabathathu kubo waphendula ngokuthi ewe. Kwakhona liyamangalisa inani lolutsha oluthi luyakholelwa kwizithunywa zezulu—ngokutsho kolunye uhlolisiso olwenziwa eUnited States, lungama-76 ekhulwini lulonke! Ngokucacileyo, abantu banomdla kwizithunywa zezulu. Kodwa le ngcamango yakutshanje ngezithunywa zezulu ichane kangakanani xa ithelekiswa nenyaniso yeBhayibhile?

Ukufihla Indima KaSathana

Xa sithetha ngezithunywa zezulu, asifanele sizilibale izithunywa ezingendawo, izidalwa zasezulwini ethi iBhayibhile zavukela uThixo. Esona siphambili kuzo nguSathana. Incwadi edumileyo ethi Ask Your Angels ithi uSathana “yinxalenye kaThixo” enceda abantu bomeleze ‘izihlunu zabo zokomoya’ ngokubalinga ngalo lonke ixesha. Ababhali bale ncwadi bathi, nangona uSathana “eneenjongo eziqhutywa luthando,” kangangeenkulungwane bekusenziwa impazamo yokumnxibelelanisa nobungendawo. Bongezelela ngelithi uSathana noYesu, “nangona bengasebenzisani ngokupheleleyo, bakwicala elinye, baziinxalenye ezibalulekileyo zesiqu esinye.” Ezi ziingcamango ezimangalisayo, kodwa ithini iBhayibhile?

IBhayibhile ikwenza kucace ukuba uSathana ‘akayonxalenye kaThixo’ kodwa lutshaba lukaThixo. (Luka 10:18, 19; Roma 16:20) Uyaludelela ulongamo lukaYehova, yaye akanazinjongo “ziqhutywa luthando” kwaphela ngabantu. Ngokungenalusizi ukhuphela ingqumbo yakhe kubakhonzi bakaThixo basemhlabeni. Ubamangalela kuThixo imini nobusuku!a (ISityhilelo 12:10, 12, 15-17) USathana uzimisele ukubalahlekisa nokuba sekumnyam’ entla. Ukuyitshutshisa kwakhe ngokungenanceba indoda elilungisa uYobhi kwabhenca isimo sakhe sengqondo senkohlakalo ngokubandezeleka kwabantu.—Yobhi 1:13-19; 2:7, 8.

Kunokuba babe “kwicala elinye,” uSathana noYesu bachasene ngokupheleleyo. Ngokungathandabuzekiyo nguSathana owabangela ukuba uHerode awise umthetho wokubulawa kweentsana ezininzi—ezama ukubulala umntwana omncinane uYesu! (Mateyu 2:16-18) Yaye iintlaselo zikaSathana ezingayekeleliyo zaqhubeka kwada kwasekufeni kukaYesu. (Luka 4:1-13; Yohane 13:27) Ngaloo ndlela, kunokuba babe “ziinxalenye ezibalulekileyo zesiqu esinye,” uYesu noSathana bahlukene ngokupheleleyo. Isiprofeto seBhayibhile sibonisa ukuba bamele babe ziintshaba. (Genesis 3:15) Ngokufanelekileyo, nguYesu ovusiweyo oya kutshabalalisa uSathana ngexesha likaThixo elifanelekileyo.—ISityhilelo 1:18; 20:1, 10.

Sifanele Sithandaze Kubani?

Abanye abaxhasa oku kubhedeshwa kwezithunywa zezulu bakhuthaza ukucamngca nokwenziwa kwezinto ezithile ukuze kunxityelelwane nezithunywa zezulu. Enye incwadi ithi: “Isicelo esisuka entliziyweni sokunxibelelana nalo naliphi na ilungu lentsapho yasezulwini asisayi kubethwa ngoyaba. Cela yaye uya kuphendulwa.” Le ncwadi ithi ezinye zezithunywa zezulu ekunokuqhagamshelwana nazo nguMikayeli, uGabriyeli, u-Uriel noRaphael.b

Noko ke, uYesu wafundisa abalandeli bakhe ukuba bathandaze kuThixo, kungekhona kwizithunywa zezulu. (Mateyu 6:9, 10) Ngokufanayo, uPawulos wabhala: “Mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo.” (Filipi 4:6, akekeliswe sithi.) Ngoko ke, xa ethandaza, amaKristu akabhekisi komnye umntu ngaphandle koYehova, yaye enjenjalo egameni likaYesu Kristu.c—Yohane 14:6, 13, 14.

Ngaba Izithunywa Zezulu Ngamalungu Onqulo Oluthile?

Ngokutsho kukaEileen Elias Freeman, ongumongameli weZiko losasazo iAngelWatch, “umgangatho wezithunywa zezulu uyazodlula zonke iinkonzo, iintanda-bulumko nazo zonke izinto ezikholelwa ngabantu. Eneneni, izithunywa zezulu azingomalungu onqulo oluthile njengathi.”

Noko ke, iBhayibhile ikwenza kucace ukuba izithunywa zezulu ezithembekileyo zinalo unqulo; zinqula uThixo oyinyaniso, uYehova, ongakunyamezeliyo ukusukuzana nabanye oothixo. (Duteronomi 5:6, 7; ISityhilelo 7:11) Ngaloo ndlela, esinye isithunywa sezulu sathi kumpostile uYohane ‘singumkhonzi’ kunye nabo bathobela imithetho kaThixo. (ISityhilelo 19:10) EBhayibhileni asiyifumani indawo ethi izithunywa zezulu ezithembekileyo zakha zaphakamisa olunye uhlobo lonqulo. Zizinikele ngokupheleleyo kuYehova.—Eksodus 20:4, 5.

‘Uyise Wamaxoki’

Oko kuthiwa kukudibana nezithunywa zezulu ngokufuthi kubandakanya ukunxibelelana nabafi. Emva kokufumana oko lalikugqala njengomqondiso, elinye ibhinqa ekuthiwa nguElise lithi: “Ndandivakalelwa kukuba umalume wayeyifumene indlela yokunxibelelana nam waza wandazisa ukuba wayede walufumana ulonwabo.” Ngokufanayo uTerri ukhumbula umhlobo wakhe awayemthanda owafayo. Uthi: “Emva kweveki engcwatyiwe, weza kum ngephupha. Wandixelela ukuba ndingabi buhlungu ngokufa kwakhe, kuba wayonwabile yaye eseluxolweni.”

Kodwa iBhayibhile ithi abafi “abazi lutho.” (INtshumayeli 9:5) Kwakhona ithi xa umntu esifa, “ngaloo mini ayatshitsha amabhongo akhe.” (INdumiso 146:4, akekeliswe sithi.) Noko ke, uSathana ‘nguyise wamaxoki.’ (Yohane 8:44) Nguye oweza nobuxoki bokuba umphefumlo womntu awufi. (Thelekisa uHezekile 18:4.) Namhlanje abantu abaninzi bayakukholelwa oku, nto leyo efezekisa injongo kaSathana, kuba kuphelisa imfuneko yokuba nokholo kuvuko—imfundiso yobuKristu esisiseko. (Yohane 5:28, 29) Ngoko, ukubuzisa kwabafileyo okanye ukufumana imiyalezo ebonakala ivela kubo yenye indlela yokubhedeshwa kwezithunywa zezulu okungamkholisiyo uThixo.

Ngaba Kukunxibelelana Nezithunywa Zezulu Okanye Needemon?

Inkoliso yokubhedeshwa kwezithunywa zezulu namhlanje ibandakanya ubugqi. Khawucinge ngamava kaMarcia. Uthi: “Ukususela kuSeptemba ukusa kuDisemba wowe-1986, ndaqalisa ukufumana izigidimi ezivela ‘kwelemimoya.’ Ndandibona imibono yaye ndiphupha amaphupha angaqhelekanga ‘obomi bam bangaphambili.’ Ndandiqhagamshelana nabahlobo ababefile yaye engqondweni yam kwakusenzeka izinto ezininzi ezazindenza ndazi izinto ezithile ngabantu endandisandul’ ukubabona. Kwakhona ndasikelelwa ngesiphiwo sokubhala izinto ndingekho zingqondweni yaye ndandifumana yaye ndidlulisa izigidimi ezivela kwelemimoya. Bambi, endandingazange ndibabone ngoxa babesaphila apha emhlabeni, babendisebenzisa ukudlulisela izigidimi kwabanye abantu.”

“Ukunxibelelana” nezithunywa zezulu ngokuvumisa akunto ingaqhelekanga. Enye incwadi ibakhuthaza ngokuphandle abo bayifundayo ukuba basebenzise amatye omlingo, amakhadi okuxel’ ithamsanqa, iingqekembe ze-I Ching, ukuchaza ikamva lomntu ngokujonga imigca esesandleni nokuvumisa ngeenkwenkwezi. Ababhali bayo bathi: “Yivumele intliziyo yakho ikukhokelele koyena siyazi ulungileyo, uze uthembe ukuba isithunywa sezulu siya kudibana nawe apho.”

Noko ke, ngokutsho kweBhayibhile, nantoni na eya “kudibana nawe apho” ayisiso esinye sezithunywa zikaThixo konke konke. Ngoba? Ngenxa yokuba uThixo ukuchase ngokupheleleyo ukuvumisa, yaye abanquli bokwenyaniso—abasezulwini nabasemhlabeni—abazibandakanyi kwaphela kuko. Kaloku, kwaSirayeli ukuvumisa kwakusisono esikhulu! UMthetho wawusithi: “Balisikizi kuYehova bonke abenza ezo zinto.”—Duteronomi 13:1-5; 18:10-12.

‘Isithunywa Sokukhanya’

Akufanele kusimangalise ukuba uMtyholi enokwenza ukuvumisa kubonakale kuyingenelo, kude kube ngathi kuvela kwizithunywa zezulu. IBhayibhile ithi uSathana “uzimilisa okwesithunywa sokukhanya.” (2 Korinte 11:14) Unokude enze imihlola aze ayenze izaliseke, njalo ekhohlisa abo babukeleyo ukuba bacinge ukuba loo mihlola ivela kuThixo. (Thelekisa uMateyu 7:21-23; 2 Tesalonika 2:9-12.) Kodwa yonke imisebenzi kaSathana—enoba isenokubonakala ilungile okanye imibi kangakanani na—iphumeza enye yezi njongo zimbini: ukwenza abantu bavukele uYehova okanye ukumfamekisa iingqondo zabo ukuze “singabengezeli kubo isikhanyiso seendaba ezilungileyo zobuqaqawuli bukaKristu.” (2 Korinte 4:3, 4) Ngokufuthi le ndlela yesibini ayisebenzisayo ukukhohlisa abantu yeyona isebenzayo.

Khawucinge ngengxelo yeBhayibhile yesicakazana esithile ngenkulungwane yokuqala. Ukuvumisa kwaso kwakuzizuzisa kakhulu iinkosi zaso. Kangangeentsuku ezininzi sasibalandela abafundi, sisithi: “Aba bantu bangabakhonzi bakaThixo Osenyangweni, bona basazisayo indlela yosindiso.” Sasithetha inyaniso. Sekunjalo, ingxelo isixelela ukuba sasisetyenziswa kungekhona sisithunywa sezulu, kodwa ‘yidemon yokuvumisa.’ (NW) Ekugqibeleni, uPawulos “wathi guququ, wathi kuwo umoya, Ndiyakuthethela egameni likaYesu Kristu ukuba uphume kuso. Waphuma ke kwangelo lixa.”—IZenzo 16:16-18.

Kwakutheni ukuze uPawulos awukhuphe lo moya? Ngapha koko, wawuzenza zifumane imali eninzi iinkosi zale ntombazana yayineedemon. Ngamandla angaphezu kwawemvelo, esi sicakazana sisenokuba sasixelela amafama ixesha amakalime ngalo, ixesha amakatshate ngalo amantombazana neendawo abanokuyifumana kuzo igolide abembi bayo. Lo moya wada washukumisela le ntombazana ukuba ithethe amazwi ayinyaniso, idumisa abafundi ekuhleni!

Sekunjalo, ‘wawuyidemon yokuvumisa.’ Ngoko, wawungenalo ilungelo lokuvakalisa ngoYehova nangelungiselelo lakhe losindiso. Amazwi awo okuncoma, mhlawumbi wawathetha ukuze abantu bakholelwe ekuvumiseni kwesi sicakazana, enza ababukeleyo abanikela ngqalelo kubalandeli bakaKristu bokwenyaniso. Ngokufanelekileyo ngoko, uPawulos walumkisa amaKristu aseKorinte esithi: “Aninako ukwabelana ngesithebe seNkosi nesithebe seedemon.” (1 Korinte 10:21) Akumangalisi ngoko ukuba, amaKristu enkulungwane yokuqala azitshabalalisa zonke iincwadi zawo ezazinxulumene nokuvumisa.—IZenzo 19:19.

‘Isithunywa Sezulu Esiphaphazela Esazulwini Samazulu’

Njengoko sibonile, iBhayibhile ithi ubukhulu becala ukubhedesha izithunywa zezulu kunxulumene noTshaba lukaThixo, uSathana uMtyholi. Ngaba oku kuthetha ukuba izithunywa zezulu ezingcwele azibandakanyekanga kwimicimbi yabantu? Ngokwahlukileyo koko, ngoku zenza umsebenzi omkhulu emhlabeni. Nguwuphi loo msebenzi? Ukuze sifumane impendulo, simele sikhangele kwincwadi yeBhayibhile yeSityhilelo. Kule ncwadi izithunywa zezulu zikhankanywa izihlandlo ezininzi ukudlula nayiphi na enye incwadi yeBhayibhile.

KwiSityhilelo 14:6, 7, sifunda ingxelo yompostile uYohane engombono wesiprofeto awawufumanayo: “Ndabona esinye isithunywa sezulu, siphaphazela esazulwini samazulu, sineendaba ezilungileyo ezingunaphakade, ukuba sizishumayele kwabo bemiyo phezu komhlaba, nakwiintlanga zonke, nezizwe, neelwimi, nabantu; sisithi ngezwi elikhulu, Moyikeni uThixo, nimzukise; ngokuba lifikile ixa lokugweba kwakhe; nimnqule lowo wenza izulu, nomhlaba, nolwandle, nemithombo yamanzi.”

Esi sibhalo sibalaselisa umsebenzi ophambili wezithunywa zezulu namhlanje. Zibandakanyeke kwisabelo esibaluleke kakhulu—sokuvakalisa iindaba ezilungileyo zoBukumkani bukaThixo. Wayethetha ngalo msebenzi uYesu xa wathembisa abalandeli bakhe esithi: “Mna ndinani yonke imihla, kude kube sekuphelisweni kwephakade eli.” (Mateyu 28:18-20) UYesu ukunye njani nabalandeli bakhe? Enye indlela kukulungiselela ukuba izithunywa zezulu zibancede ukuze kuphunyezwe lo msebenzi mkhulu.

AmaNgqina kaYehova achitha iiyure ezingaphezu kwewaka lesigidi ngonyaka eshumayela iindaba ezilungileyo zoBukumkani bukaThixo. Ngoxa esenza lo msebenzi, ayabubona ubungqina bokuba akhokelwa zizithunywa zezulu. Kubulungiseleli bawo bendlu ngendlu, ngokufuthi kuye kwenzeke adibane nabantu abebethandazela umntu onokubanceda baqonde iinjongo zikaThixo. Ukhokelo lwezithunywa zezulu, kwakunye nokukhuthala kwamaNgqina, kuye kwaphumela ekubeni nyaka ngamnye amakhulu amawaka afikelele ekumazini uYehova!

Ngaba uyasiphulaphula isithunywa sezulu esiphaphazela esazulwini samazulu? Xa amaNgqina kaYehova ekutyelela, kutheni ungaxubushi nawo ngokuzele ngakumbi ngesi sigidimi siza nezithunywa zezulu?

[Imibhalo esemazantsi]

[Ibhokisi ekwiphepha 8]

NGOOBANI IZITHUNYWA ZEZULU?

NGOKWAHLUKILEYO koko bakukholelwayo abaninzi, izithunywa zezulu aziyomiphefumlo ephume kubantu abafileyo. IBhayibhile itsho ngokuphandle ukuba abafi “abazi lutho.” (INtshumayeli 9:5) Ngoko, zavela phi izithunywa zezulu? IBhayibhile ibonisa ukuba zadalwa nguThixo ngaphambi kokusekwa komhlaba. (Yobhi 38:4-7) Intsapho kaThixo yasezulwini isenokuba ngamakhulu ezigidi, mhlawumbi amawaka ezigidi okanye nangaphezulu! Ezinye izithunywa zezulu zathelela uSathana kwimvukelo yakhe.—Daniyeli 7:10; ISityhilelo 5:11; 12:7-9.

Ekubeni uYehova enguThixo wolungelelwano, akumangalisi ukuba intsapho yakhe enkulu yezithunywa zezulu ilungelelene.—1 Korinte 14:33.

• Isithunywa sezulu esiphambili, ngamandla nangegunya, sisiphatha-zithunywa, uYesu Kristu, okwabizwa ngokuba nguMikayeli. (1 Tesalonika 4:16; Yuda 9) Ulawula iiserafi, iikerubhi nezithunywa zezulu.

• Iiserafi zikhonza kwitrone kaThixo. Kubonakala ukuba isabelo sazo siquka ukuvakalisa ubungcwele bukaThixo nokugcina abantu bakhe becocekile.—Isaya 6:1-3, 6, 7.

• Iikerubhi nazo zihlala noYehova. Njengezo zithwala okanye ziphahla itrone kaThixo, ziphakamisa ubungangamsha bukaYehova.—INdumiso 80:1; 99:1; Hezekile 10:1, 2.

• Izithunywa zezulu (okuthetha “abathunywa”) ngabathunywa bakaYehova. Ziphumeza ukuthanda kukaThixo, enoba kuquka ukuhlangulwa kwabantu bakaThixo okanye ukutshatyalaliswa kwabangendawo.—Genesis 19:1-26.

[Imifanekiso ekwiphepha 7]

Ngaba uyasiphulaphula isithunywa sezulu esiphaphazela esazulwini samazulu?