Hlala “Emzini Wokusabela” Uze Uphile!

‘Ahlale emzini wokusabela kwakhe, de kufe umbingeleli omkhulu.’—NUMERI 35:28.

1. Ngubani uMphindezeli wegazi, yaye liliphi inyathelo aza kulithabatha kungekudala?

UMPHINDEZELI wegazi kaYehova, uYesu Kristu, sele eza kuhlasela. Ekunye nemikhosi yakhe yezithunywa zezulu, lo Mphindezeli kungekudala uza kuthabatha inyathelo nxamnye nabo bonke abanetyala legazi abangaguqukiyo. Ewe, uYesu uza kukhonza njengoMgwebi kaThixo ebudeni ‘bembandezelo enkulu’ esondela ngokukhawuleza. (Mateyu 24:21, 22; Isaya 26:21) Ngoko uluntu luya kube lujamelene nemiphumo yokuba netyala legazi.

2. Yiyiphi ekuphela kwendawo yokukhuseleka yokwenene, yaye yiyiphi imibuzo ekufuneka iphendulwe?

² Indlela yokuzisindisa kukungena endleleni esinga kumzi wokusabela owafanekiselwayo uze usindise ubomi bakho! Xa engenile kuloo mzi, lowo usabayo kuya kufuneka ahlale apho, kuba nguwo kuphela indawo yokukhuseleka yokwenene. Kodwa usenokuzibuza, ‘Ekubeni inkoliso yethu ingazange ibulale mntu, ngaba ngokwenene sinetyala legazi? Kutheni uYesu enguMphindezeli wegazi? Uyintoni umzi wokusabela wanamhlanje? Ngaba ukho umntu onokuze aphume kuwo aze akhuseleke?’

Ngaba Sinetyala Legazi Ngokwenene?

3. Yiyiphi inkalo yoMthetho kaMoses eya kusinceda sibone ukuba amawaka ezigidi zabantu abasemhlabeni anetyala legazi?

³ Enye inkalo yoMthetho kaMoses iya kusinceda sibone ukuba amawaka ezigidi zabantu abaphila emhlabeni anetyala legazi. UThixo wathi onke amaSirayeli ayenetyala ngegazi elaliphalazwa. Ukuba kwakufunyenwe umntu obuleweyo yaye kungaziwa ukuba ubulewe ngubani, abagwebi babemele babale umgama wokusuka apho ukuya kwimizi ekufutshane ukuze babone owona mzi usondeleyo. Ukuze kususwe ityala, amadoda amakhulu aloo mzi kubonakala ukuba unetyala legazi kwakufuneka aphule intamo yenkomo entsha engekasetyenziswa emfuleni onamanzi ongalinywanga. Oku kwakusenziwa phambi kwababingeleli abangabaLevi ‘kuba unyule bona uYehova ukuba balungiselele ukubambana konke nokubethana konke.’ Amadoda amakhulu omzi ayehlamba izandla zawo phezu kwenkomo aze athi: “Izandla zethu aziliphalazanga eli gazi, namehlo ethu akabonanga; camagu, Yehova, kubantu bakho amaSirayeli owawakhululayo; musa ukubeka igazi elingenatyala phakathi kwabantu bakho amaSirayeli.” (Duteronomi 21:1-9) UYehova uThixo wayengafuni ukuba ilizwe lakwaSirayeli lingcoliswe ligazi okanye abantu balo bonke babe netyala legazi.

4. IBhabhiloni Enkulu inaliphi ityala legazi?

⁴ Ewe, ikho into yokuba nonke nibe netyala legazi, okanye njengebutho labantu. Khawucinge ngetyala legazi elikhulu enalo iBhabhiloni Enkulu, ubukhosi behlabathi bonqulo lobuxoki. Kaloku, inxilile ligazi labakhonzi bakaYehova! (ISityhilelo 17:5, 6; 18:24) Iinkonzo zeNgqobhoko zizibanga zilandela uMthetheli Woxolo, kodwa iimfazwe, ukuncinwa kwamakholwa, neemfazwe zomnqamlezo ekwabulawa abantu abaninzi kuzo zizenze zanetyala legazi phambi koThixo. (Isaya 9:6; Yeremiya 2:34) Eneneni, imele ibe yeyona inetyala ngokubulawa kwezigidi zabantu kwiimfazwe zehlabathi ezimbini zale nkulungwane. Ngoko ke, abo babambelele kunqulo lobuxoki kwanabo bazixhasayo nababandakanyekayo kwiimfazwe zabantu banetyala legazi phambi koThixo.

5. Bambi abantu baye bafana njani nomntu obulele ngengozi wakwaSirayeli?

⁵ Bambi abantu baye babangela ukufa kwabanye ngabom okanye ngokungakhathali. Abanye baye banenxaxheba ekubulaleni okwenziwa liqela, mhlawumbi bephenjelelwa ziinkokeli zonqulo zisithi oko kukuthanda kukaThixo. Ukanti abanye baye batshutshisa baza babulala abakhonzi bakaThixo. Noko ke, kwanokuba asizenzanga izinto ezinjalo, sinetyala njengebutho labantu ngokulahleka kobomi babantu ngenxa yokuba besingawazi umthetho kaThixo nokuthanda kwakhe. Sifana nomntu obulele ngengozi “othe wambulala ummelwane wakhe ngengozi, ebengamthiyile ngaphambili.” (Duteronomi 19:4) Abantu abanjalo bamele bacele inceba kaThixo baze babalekele kumzi wokusabela owafuziselwayo. Kungenjalo baya kubulawa nguMphindezeli wegazi akudibana nabo.

Iindima ZikaYesu Ezibalulekileyo

6. Kutheni kunokuthiwa uYesu sesona sizalwana sisondeleyo soluntu?

⁶ KwaSirayeli umphindezeli wegazi wayesesona sizalwana sisondeleyo salowo ubuleweyo. Ukuze aphindezele bonke abo babulewe emhlabeni yaye ngokukodwa abakhonzi bakaYehova, bekuya kufuneka ukuba uMphindezeli wegazi wanamhlanje abe sisizalwana soluntu lonke. Loo ndima izaliswa nguYesu Kristu. Wazalwa engumntu ofezekileyo. UYesu wancama ubomi bakhe obungenasono ekufeni njengedini lentlawulelo, yaye emva kokuvuselwa kwakhe ezulwini, wanikela ngexabiso lalo kuThixo ngenxa yenzala ka-Adam enesono nefayo. Ngaloo ndlela uKristu waba nguMhlanguli woluntu, esona sizalwana sethu sisondeleyo—uMphindezeli wegazi ofanelekileyo. (Roma 5:12; 6:23; Hebhere 10:12) UYesu uchazwa njengomzalwana wabalandeli bakhe abathanjisiweyo. (Mateyu 25:40, 45; Hebhere 2:11-17) NjengoKumkani wasezulwini uba ‘nguBawo Ongunaphakade’ wabo baya kungenelwa kwidini lakhe njengabalawulwa bakhe basemhlabeni. Aba baya kuphila ngonaphakade. (Isaya 9:6, 7, NW) Ngoko ngokufanelekileyo uYehova umisele esi Sizalwana soluntu njengoMphindezeli wegazi.

7. NjengoMbingeleli Omkhulu, uYesu ubenzela ntoni abantu?

⁷ UYesu ukwanguMbingeleli Omkhulu ongenasono, owalingwayo nonovelwano. (Hebhere 4:15) Njengombingeleli omkhulu usebenzisa ixabiso ledini lakhe elixolelanisa izono kuluntu. Imizi yokusabela yayenzelwe ‘oonyana bakaSirayeli, nomphambukeli, nondwendwe oluphakathi kwabo.’ (Numeri 35:15) Ngoko uMbingeleli Omkhulu waqala ukulisebenzisa ixabiso ledini lakhe kubalandeli bakhe abathanjisiweyo, “oonyana bakaSirayeli.” Ngoku lisetyenziswa ‘kubaphambukeli nakwiindwendwe’ ezikumzi wokusabela owafuziselwayo. Ezi ‘zimvu zizezinye’ zeNkosi uYesu Kristu zinethemba lokuphila ngonaphakade emhlabeni.—Yohane 10:16; INdumiso 37:29, 34.

Umzi Wokusabela Wanamhlanje

8. Uyintoni umzi wokusabela owafuziselwayo?

⁸ Uyintoni umzi wokusabela owafanekiselwayo? Awungommandla othile welizwe njengeHebron, omnye wemizi yokusabela emithandathu yabaLevi owawulikhaya lombingeleli omkhulu wakwaSirayeli. Umzi wokusabela wanamhlanje lilungiselelo likaThixo lokusikhusela ekufeni ngenxa yokwaphula umthetho wakhe wobungcwele begazi. (Genesis 9:6) Enokuba kungabom okanye kungengozi, bonke abaphula loo mthetho bamele bafune ukuxolelwa nguThixo nokucinywa kwesono sabo ngokholo kwigazi loMbingeleli Omkhulu, uYesu Kristu. AmaKristu athanjisiweyo anamathemba asezulwini nabo ‘besihlwele esikhulu’ abanamathemba asemhlabeni baxhamla iingenelo zedini likaYesu elisusa izono yaye bakumzi wokusabela owafanekiselwayo.—ISityhilelo 7:9, 14; 1 Yohane 1:7; 2:1, 2.

9. USawule waseTarso wawaphula njani umthetho kaThixo ngegazi, kodwa wasibonisa njani isimo sengqondo esiguqukileyo?

⁹ Ngaphambi kokuba abe ngumKristu, umpostile uPawulos wayewaphule umthetho ongegazi. NjengoSawule waseTarso, wayetshutshisa abalandeli bakaYesu yaye evumela nokubulawa kwabo. UPawulos wathi: “Ndesuka ndenzelwa inceba, ngokuba ndakwenza oko ndingazi, ndisekungakholweni.” (1 Timoti 1:13; IZenzo 9:1-19) USawule wayenesimo sengqondo senguquko, kamva esangqinwa yimisebenzi emininzi yokholo. Kodwa kufuneka okungakumbi kunokholo kwintlawulelo ukuze singene kumzi wokusabela owafuziselwayo.

10. Umntu unokusifumana njani isazela esilungileyo, yaye kumelwe kwenziwe ntoni ukusilondoloza?

¹⁰ Umntu owayebulele ngengozi wayenokuhlala komnye wemizi yokusabela yakwaSirayeli kuphela ukuba wayenokungqina ukuba isazela sakhe sasicocekile kuThixo ngokuphathelele ukuphalazwa kwegazi. Ukuze sibe nesazela esilungileyo, simele sibe nokholo kwidini likaYesu, siguquke kwizono zethu, size siguqule ikhondo lethu. Kufuneka sicele isazela esilungileyo ngokuzahlulela emthandazweni kuThixo ngoKristu, size sifuzisele oku ngokubhaptizwa emanzini. (1 Petros 3:20, 21) Esi sazela silungileyo sisivumela ukuba sibe nolwalamano olucocekileyo noYehova. Ekuphela kwendlela yokulondoloza isazela esilungileyo kukwenza ngokuvisisana noko kufunwa nguThixo size senze imisebenzi esiyabelweyo kumzi wokusabela owafanekiselwayo, kwananjengoko abo babebalekela kwimizi yokusabela mandulo babemele bathobele uMthetho baze baphumeze izabelo zabo zomsebenzi. Umsebenzi oyintloko wabantu bakaYehova namhlanje ngulowo wokuvakalisa isigidimi soBukumkani. (Mateyu 24:14; 28:19, 20) Ukwenza loo msebenzi kuya kusinceda sibe ngabemi abaluncedo bomzi wokusabela wanamhlanje.

11. Yintoni emele iphetshwe ukuba siza kuhlala sikhuselekile ngaphakathi kumzi wokusabela wanamhlanje?

¹¹ Ukuwushiya umzi wokusabela wanamhlanje kukuzichanaba kwintshabalaliso, kuba kungekudala uMphindezeli wegazi uza kuthabatha inyathelo nxamnye nabo bonke abo banetyala legazi. Eli asiloxesha lokuba sifunyanwe singaphandle komzi okhuselekileyo okanye sikummandla oyingozi kufutshane nomda ongaphandle wamadlelo awo. Siya kuzifumana singaphandle komzi wokusabela owafanekiselwayo ukuba siphelelwa lukholo kwidini loMbingeleli Omkhulu elixolelanisa izono. (Hebhere 2:1; 6:4-6) Kwakhona asiyi kukhuseleka ukuba sixelisa iindlela zehlabathi, simi emdeni wentlangano kaYehova, okanye siyashenxa kwimilinganiselo yoBawo wethu wasezulwini yobulungisa.—1 Korinte 4:4.

Ukukhululwa Kumzi Wokusabela

12. Abo bebefudula benetyala legazi bamele bahlale ixesha elide kangakanani kumzi wokusabela owafanekiselwayo?

¹² Umntu owayebulele ngengozi kwaSirayeli wayemele ahlale kumzi wokusabela ‘de kufe umbingeleli omkhulu.’ (Numeri 35:28) Ngoko abo bebefudula benetyala legazi bamele bahlale ithuba elide kangakanani kumzi wokusabela owafanekiselwayo? De zingabi yomfuneko kubo iinkonzo ezinikelwa nguMbingeleli Omkhulu, uYesu Kristu. UPawulos wathi: “Unako nokubasindisa kanye abo bezayo ngaye kuThixo.” (Hebhere 7:25) Logama nje kusekho ityala lesono nelegazi, iinkonzo ezinikelwa nguMbingeleli Omkhulu ziyimfuneko ukuze abantu abangafezekanga babe nokuma okulungileyo kuThixo.

13. Ngoobani “oonyana bakaSirayeli” banamhlanje, yaye bamele bahlale ixesha elide kangakanani ‘kumzi wokusabela’?

¹³ Khumbula ukuba imizi yokusabela yamandulo yayenzelwe “oonyana bakaSirayeli,” abaphambukeli, neendwendwe. “Oonyana bakaSirayeli” ngamaSirayeli okomoya. (Galati 6:16) Bamele bahlale kumzi wokusabela owafanekiselwayo ngalo lonke ixesha besaphila emhlabeni. Ngoba? Ngenxa yokuba basesenyameni engafezekanga yaye ngoko ke bafuna ixabiso elixolelanisayo loMbingeleli wabo Omkhulu wasezulwini. Kodwa xa la maKristu athanjisiweyo esifa aze avuselwe kubomi bomoya ezulwini, azisafuneki kuwo iinkonzo ezixolelanisayo ezinikelwa nguMbingeleli Omkhulu; ngenxa yokuba aya kuba eyishiye ngonaphakade inyama netyala layo legazi. Kwabo bathanjiswa bavusiweyo, uMbingeleli Omkhulu uya kuba efile kwindima yokuxolelanisa, nokukhusela.

14. Sesiphi esinye isizathu sokuba abo banamathemba asezulwini bemele bahlale kumzi wokusabela wanamhlanje?

¹⁴ Ngenxa yokuba bephila njengabantu, abo baya kuba ‘ziindlalifa kunye noKristu’ ezulwini bamele bahlale kumzi wokusabela owafanekiselwayo de baligqibe ngokuthembeka ikhondo labo lasemhlabeni ekufeni. Xa besifa, baya kukuncama ngonaphakade ukuphila njengabantu. (Roma 8:17; ISityhilelo 2:10) Idini likaYesu lisebenza kuphela kwabo baphila njengabantu. Ngenxa yoko, uMbingeleli Omkhulu uyafa kwabo boSirayeli wokomoya xa bevuswa njengezidalwa zomoya eziya kuhlala ezulwini ngonaphakade ‘njengamadlelane ngemvelo yobuThixo.’—2 Petros 1:4.

15. Ngoobani ‘abaphambukeli neendwendwe’ zanamhlanje, yaye uya kubenzela ntoni uMbingeleli Omkhulu?

¹⁵ Uya ‘kufa’ nini uMbingeleli Omkhulu ngokuphathelele ‘abaphambukeli neendwendwe’ zanamhlanje, ukuze bavumeleke bawushiye umzi wokusabela? La malungu esihlwele esikhulu akanakuphuma ngokukhawuleza kulo mzi wokusabela emva kwembandezelo enkulu. Kutheni? Ngenxa yokuba aya kuba esekwinyama yawo engekafezeki enesono yaye kuya kufuneka aqhubeke ekhuselwe nguMbingeleli Omkhulu. Ngokusebenzisa iinkonzo azinikelayo ezixolelanisayo ebudeni bokuba ngukumkani nombingeleli kwakhe iminyaka eliwaka, aya kuthi ngokuqhubekayo afikelele ekubeni ngabantu abafezekileyo. Uya kwandula ke uYesu awanikele kuThixo ukuze ivavanywe okokugqibela ingqibelelo yawo ngokukhululwa kukaSathana needemon zakhe okwethutyana. Ngenxa yokuba eya kuluphumelela olu vavanyo enenkoliseko kaThixo, uYehova uya kuwavakalisa engamalungisa. Ngaloo ndlela aya kufikelela ekubeni ngabantu abafezekileyo ngokupheleleyo.—1 Korinte 15:28; ISityhilelo 20:7-10.a

16. Abo basinde kwimbandezelo enkulu abasayi kuzifuna nini iinkonzo ezixolelanisayo ezanikelwa nguMbingeleli Omkhulu?

¹⁶ Ngoko ke, kuya kufuneka ukuba abasindi kwimbandezelo enkulu balondoloze isazela esilungileyo ngokuhlala kumzi wokusabela owafanekiselwayo de kube sekupheleni koLawulo lukaKristu Lweminyaka Eliwaka. Njengabantu abafezekisiweyo, abasayi kuzifuna iinkonzo ezixolelanisayo ezinikelwa nguMbingeleli Omkhulu yaye baya kuphuma kwinkuselo yakhe. Ngoko uYesu uya kufa kubo njengoMbingeleli Omkhulu, kuba akusayi kufuneka abancede ngegazi elihlambululayo ledini lakhe. Ngelo xesha baya kuwushiya umzi wokusabela owafanekiselwayo.

17. Kutheni kungayi kuba yimfuneko ukuba abo bavusiweyo ebudeni boLawulo lukaKristu Lwewaka Leminyaka bangene kumzi wokusabela owafanekiselwayo baze bahlale apho?

¹⁷ Ngaba abo bavuswa ebudeni boLawulo lukaYesu Lwewaka Leminyaka bamele bangene kumzi wokusabela owafanekiselwayo de afe umbingeleli omkhulu? Hayi, kuba ngokufa balihlawula ityala lezono zabo. (Roma 6:7; Hebhere 9:27) Sekunjalo, uMbingeleli Omkhulu uya kubanceda bafikelele emfezekweni. Ukuba bayaphumelela kuvavanyo lokugqibela emva kweWaka Leminyaka, kwakhona uThixo uya kubavakalisa bengamalungisa benesiqinisekiso sobomi obungunaphakade emhlabeni. Kakade ke, ukusilela ukuvumelana noko kufunwa nguThixo kuya kuzisa umgwebo nentshabalalo kubo bonke abantu abangaluphumeleliyo uvavanyo lokugqibela njengabagcini bengqibelelo.

18. Ngokuphathelele ukuba ngukumkani nombingeleli kukaYesu, yintoni eya kuhlala ibonakala kuluntu ngonaphakade?

¹⁸ Ekugqibeleni babesifa ababingeleli abakhulu bakwaSirayeli. Kodwa uYesu “ngokohlobo lukaMelkitsedeke, waba ngumbingeleli omkhulu osa ephakadeni.” (Hebhere 6:19, 20, akekeliswe sithi; Heb 7:3.) Ngoko ukuyeka kukaYesu ukuba nguMbingeleli Omkhulu ongumlamleli woluntu akuthethi ukuphela kobomi bakhe. Imiphumo elungileyo yokukhonza kwakhe njengoKumkani noMbingeleli Omkhulu iya kuhlala ibonakala kuluntu ngonaphakade, yaye abantu baya kuba nombulelo kuye ngonaphakade ngenxa yokuba eye wakhonza kwezo zikhundla. Ngaphezu koko, ukusa emaphakadeni uYesu uya kukhokela kunqulo olunyulu lukaYehova.—Filipi 2:5-11.

Izinto Ezixabisekileyo Esizifundayo

19. Sisiphi isifundo esingentiyo nothando esinokufundwa kwilungiselelo lemizi yokusabela?

¹⁹ Sinokufumana izifundo eziliqela kwilungiselelo lemizi yokusabela. Ngokomzekelo, akukho mbulali unentiyo ngalowo wayembulele wayevunyelwa ahlale kumzi wokusabela. (Numeri 35:20, 21) Ngoko ngaba ukho onokuthi ngoxa ekumzi wokusabela owafuziselwayo avumele ukuba kukhule intiyo entliziyweni yakhe ngomzalwana wakhe? Umpostile uYohane wabhala: “Lowo umthiyileyo umzalwana wakhe usisibulala-mntu; niyazi ukuba akukho sibulala-mntu sinobomi bungunaphakade buhleliyo kuso.” Ngoko ke “masithandane; ngokuba uthando lwaphuma kuThixo.”—1 Yohane 3:15; 4:7.

20. Ukuze bakhuseleke kuMphindezeli wegazi, bamele benze ntoni abo bakumzi wokusabela owafanekiselwayo?

²⁰ Ukuze bakhuseleke kumphindezeli wegazi, abo babebulele ngengozi kwakufuneka bahlale kumzi wokusabela yaye bangaphumeli ngaphandle kwamadlelo awo. Kuthekani ngabo bakumzi wokusabela owafanekiselwayo? Ukuze bakhuseleke kuMphindezeli wegazi omkhulu, bamele bangawushiyi lo mzi. Eneneni, kufuneka bawulumkele umnqweno wokuya ekupheleni kwedlelo, ngokungathi kunjalo. Bamele balumke ukuze bangavumeli uthando ngehlabathi likaSathana lukhule ezintliziyweni zabo. Oku kusenokufuna umthandazo nomgudu, kodwa ubomi babo buxhomekeke kuko.—1 Yohane 2:15-17; 5:19.

21. Nguwuphi umsebenzi onomvuzo owenziwa ngabo bakumzi wokusabela wanamhlanje?

²¹ Abo babebulele ngengozi ababekwimizi yokusabela mandulo babemele babe ngabasebenzi abanemveliso. Ngokufanayo, “oonyana bakaSirayeli” abathanjisiweyo bamisele umzekelo omhle njengabavuni nabavakalisi boBukumkani. (Mateyu 9:37, 38; Marko 13:10) ‘Njengabaphambukeli neendwendwe’ kumzi wokusabela wanamhlanje, amaKristu anamathemba okuphila emhlabeni anelungelo lokwenza lo msebenzi wokusindisa ubomi kunye nabathanjiswa abasesemhlabeni. Yaye hayi indlela onomvuzo ngayo lo msebenzi! Abo basebenza ngokuthembeka kumzi wokusabela owafanekiselwayo baya kusinda ekufeni ngonaphakade bebulawa nguMphindezeli wegazi. Kunoko, baya kufumana iingenelo ezingunaphakade kwinkonzo ayinikelayo njengoMbingeleli Omkhulu kaThixo. Ngaba uya kuhlala kumzi wokusabela uze uphile ngonaphakade?

[Umbhalo osemazantsi]

Ubuya Kuphendula Uthini?

◻ Kutheni kunokuthiwa amawaka ezigidi ezisemhlabeni anetyala legazi?

◻ Ziziphi iindima uYesu Kristu anazo ngokuphathelele uluntu?

◻ Uyintoni umzi wokusabela owafanekiselwayo, yaye ubani ungena njani kuwo?

◻ Abantu baya kukhululwa nini kumzi wokusabela owafanekiselwayo?

◻ Ziziphi izifundo ezibalulekileyo esinokuzifumana kwilungiselelo lemizi yokusabela?

[Imifanekiso ekwiphepha 16]

Ngaba uyazazi iindima ezibalulekileyo uYesu Kristu anazo?