Bafumana Uxolo Kwihlabathi Elinombhodamo

NGAPHANDLE kweli phephancwadi kukho umfanekiso wedabi elivuthayo othatyathwe eBosnia naseHerzegovina. Ngaba uxolo lunokubakho kwiindawo ezinjalo? Okumangalisayo kukuba, impendulo nguewe. Ngoxa amaRoma Katolika, amaOthodoki aseMpuma namaSilamsi kwelo lizwe lizele intlekele esilwela umhlaba, abantu abaninzi balangazelela uxolo, yaye bambi balufumene.

AbakwaDjorem babehlala eSarajevo, yaye babengamaNgqina kaYehova. Phezu kwawo nje umbhodamo okweso sixeko, babetyelela abamelwane babo rhoqo ukuze babelane nabo ngeendaba ezilungileyo zoBukumkani bukaThixo. (Mateyu 24:14) Kwakutheni? Kwakungenxa yokuba intsapho yakwaDjorem yayisazi ukuba obu Bukumkani buyinto yokwenene, sele bumiselwe emazulwini, kwanokuba bukuphela kwelona themba libambekayo lokuzisa uxolo kuluntu. AmaNgqina kaYehova anentembelo epheleleyo koko umpostile uPawulos wakubiza ngokuba ‘ziindaba ezilungileyo zoxolo.’ (Efese 2:17) Ngenxa yabantu abafana noBozo noHena Djorem, abaninzi bafumana uxolo eBosnia naseHerzegovina.

Kuza Kubakho Uxolo Lokwenene

Singathetha kutshone ilanga ngabakwaDjorem. Noko ke, okokuqala makhe sithethe ngesinye isibini esazuza intembelo kuBukumkani bukaThixo. Amagama aso nguArtur noArina. Sasihlala kwiriphabliki ekwindawo eyayisakuba yiSoviet Union kunye noonyana baso abaselula. Xa kwaqhambuka imfazwe yamakhaya, uArtur walwela elinye lamacala awayesilwa. Noko ke, kungadlulanga xesha lide, wazibuza, ‘Kutheni ndisilwa nabantu abebekade bengabamelwane bam?’ Walishiya elo lizwe yaye, emva kobunzima obukhulu, wafika e-Estonia ekunye nosatshana lwakhe.

Ebudeni botyelelo lwakhe eSt. Petersburg, uArtur wadibana namaNgqina kaYehova yaye wachukumiseka koko wakuvayo ngoBukumkani bukaThixo. Ukuthanda kukaYehova kukuba kungekudala uluntu lulawulwe buBukumkani bukaThixo kuphela. (Daniyeli 2:44) Ngelo xesha umhlaba uya kuba yindawo enoxolo, engenazimfazwe zamakhaya okanye iimfazwe zamazwe ngamazwe. UIsaya waprofeta ngelo xesha wathi: “[Abayi] kwenza bubi, [abayi] konakalisa ezintabeni zam zonke ezingcwele; ngokuba ilizwe liya kuzala kukwazi uYehova, njengamanzi egubungele ulwandle.”—Isaya 11:9.

Ebona umfanekiso omhle waloo mhlaba unoxolo wexa elizayo kwimpapasho yokufundisisa iBhayibhile awayeyiboniswa lelo Ngqina, uArtur wathi wayefudula ehlala kwindawo efanayo naleyo. Noko ke, yayidlakazwa yimfazwe yamakhaya ngoku. Ekubuyeleni kwakhe e-Estonia, uArtur nentsapho yakhe bafunda okungakumbi ngoBukumkani bukaThixo ngokufundisisa iBhayibhile namaNgqina kaYehova.

Uxolo Nakuba Kukho Umbhodamo

INdumiso 37:37 ithi: “Gcina [ongenabala, NW], ukhangele othe tye; ngokuba izivela-mva zezomntu woxolo.” Eneneni, umntu ongenabala nothe tye emehlweni kaThixo akayi kulufumana kwikamva kuphela uxolo. Ulunandipha kanye ngoku. Kwenzeka njani oko? Khawuqwalasele amava endoda egama linguPaul.

UPaul uhlala kwinkampu yeembacu ekwanti emzantsi ntshona Ethiopia, nangona eneneni esuka kwilizwe eliselumelwaneni. Ngoxa wayesekwilizwe lakhe lokuzalwa, wadibana nomnye wamaNgqina kaYehova owayesebenzela inkampani yeoli, yaye le ndoda yamnika incwadi yokufundisisa iBhayibhile ethi, INyaniso eKhokelela kuBomi obungunaPhakade.a UPaul akazange aphinde adibane nelo Ngqina, kodwa wayifundisisa ngenyameko loo ncwadi. Ngenxa yemfazwe yamakhaya wabalekela kwinkampu yeembacu e-Ethiopia, yaye apho wancokola nabanye ngoko wayekufundile. Kwabakho iqaqobana elakwamkela njengenyaniso oku. Ngokusekelwe koko babekufundile, baqalisa ukushumayela kwabanye kuloo nkampu.

UPaul wabhalela ikomkhulu leWatch Tower Society ecela uncedo. Umlungiseleli owathunyelwa apho evela eAddis Ababa wakhwankqiswa kukufumana abantu abangama-35 bemlindile, belungele ukufunda okungakumbi ngoBukumkani bukaThixo. Kwenziwa amalungiselelo okuba bahlale belufumana uncedo.

Kunokutshiwo njani ukuba abantu abanjengoPaul baseluxolweni? Ubomi babo abukho lula, kodwa banokholo kuThixo. Xa bechatshazelwa ngumbhodamo weli hlabathi, basebenzisa isiluleko seBhayibhile esithi: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo.” Ngenxa yoko, banolwaneliseko olunqabileyo namhlanje. Amazwi ompostile uPawulos kwibandla laseFilipi ayasebenza kubo: “Uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.” Ngenene, baziva benolwalamano olusondeleyo noYehova, “uThixo woxolo.”—Filipi 4:6, 7, 9.

Uxolo Olukhoyo Namhlanje

UKumkani woBukumkani bukaThixo obekwe etroneni nguYesu Kristu, iBhayibhile ethi “nguMthetheli woxolo.” (Isaya 9:6) Umprofeti wamandulo wathi ngaye: “Athethe uxolo kwiintlanga; ulawulo lwakhe luthabathele elwandle luse elwandle, luthabathele kuwo uMlambo luse eziphelweni zehlabathi.” (Zekariya 9:10) Amazwi aphefumlelweyo afana nala abuchaphazela ngokunzulu ubomi bendoda egama linguJosé.

Ngaxa lithile uJosé wayesentolongweni. Wayengumgrogrisi yaye wabanjwa ngoxa wayelungiselela ukuqhushumbisa isakhiwo esihlala amapolisa. Wayecinga ukuba lugonyamelo kuphela olwaluya kunyanzelisa urhulumente ukuba aphucule iimeko kwilizwe lakhe. Ngoxa wayesentolongweni, amaNgqina kaYehova aqalisa ukufundisisa iBhayibhile nenkosikazi yakhe.

Emva kokuba ekhululwe uJosé, naye wafundisisa iBhayibhile, yaye kungadlulanga xesha lide amazwi eNdumiso 85:8 aqalisa ukusebenza kuye: “Mandive oko aya kukuthetha uThixo, uYehova; hayi, uthetha uxolo kubantu bakhe nakwabakhe benceba.” Noko ke, loo ndinyana iqukumbela ngesilumkiso esithi: “Mabangabuyeli ke [kukuzithemba, NW] kwabo.” Ngoko, ofuna uxolo lukaYehova akasayi kubuyela ekwenzeni unothanda okanye ngokuchasene nokuthanda Kwakhe.

Namhlanje, uJosé nenkosikazi yakhe ngabalungiseleli abangamaKristu. Balathisela abanye kuBukumkani bukaYehova njengesicombululo kwiingxaki uJosé awayekade ezama ukuzicombulula ngoozenzele beebhombu. Bakulungele ukukholosa ngeBhayibhile, ethi: “UYehova uya kusinika okulungileyo.” (INdumiso 85:12) Eneneni, kutshanje uJosé uye watyelela kwisakhiwo esihlala amapolisa awayeceba ukusitshabalalisa. Ngoba? Ukuze athethe nezo ntsapho ngoBukumkani bukaThixo.

Abantu Abanoxolo

KwiNdumiso 37:10, 11, iBhayibhile ithi: “Kusaya kuba mzuzwana, angabikho ongendawo; uthi wakuyikhangela indawo yakhe, angabikho. Ke bona abalulamileyo baya kulidla ilifa ilizwe, baziyolise ngobuninzi boxolo.” Elinjani lona ukuzuka ithemba!

Noko ke, phawula ukuba uxolo lukaYehova lufunyanwa ‘ngabalulamileyo’ kuphela. Abo bafuna uxolo kusenokufuneka bafunde ukuba noxolo. Yaba njalo imeko kaKeith, ohlala eNew Zealand. UKeith wayesaziwa ‘njengomntu owakhekileyo ngomzimba, onguphuma silwe nothanda ingxabano.’ Wayelilungu leqela leenjubaqa yaye wayehlala kwindlu eyayifana nenqaba, eyayikhuselwe zizinja ezintathu ukuze kungangeni mntu ungalindelwanga. Inkosikazi yakhe, unina wabantwana bakhe abathandathu, yayiwuqhawule umtshato wabo.

Xa uKeith wadibana namaNgqina kaYehova, iindaba ezilungileyo zamchaphazela ngokunzulu. Kungadlulanga xesha lide wayesiya kwiintlanganiso zamaNgqina ekunye nabantwana bakhe. Wazicheba iinwele zakhe ezazifika esinqeni waza waqalisa ukuxelela izinxulumani zakhe zangaphambili ngoBukumkani bukaThixo. Ezinye zazo zaqalisa ukufundisisa iBhayibhile.

Njengezigidi zabantliziyo zilungileyo ehlabathini lonke, uKeith wayeqalisile ukusebenzisa amazwi ompostile uPetros athi: “Lowo unga angathanda ubomi, ayibone imihla elungileyo, . . . makaphambuke ebubini, enze okulungileyo; makafune uxolo, aluphuthume.” (1 Petros 3:10, 11) Lowo wayesakuba yinkosikazi kaKeith wavuma ukuphinda batshate, yaye ngoku ufunda indlela ‘yokufuna uxolo nokuluphuthuma.’

Uxolo lukaYehova luye lwabasindisa ekufeni abaninzi, kuquka omnye owayesakuba yimbaleki owazalelwa kwindawo eyayisakuba yiSoviet Union. Le ndoda yafumana iimbasa kukhuphiswano lweOlimpiki, kodwa yaphelelwa ngumdla kwezo zinto yaza yabhenela kwiziyobisi notywala. Emva kweminyaka eli-19 eneziganeko eziquka ukuchitha iminyaka emithathu kwinkampu yokusebenza nzima eSiberia, ukuzimela kwinqanawa eyayisinge eKhanada, nokuphantsa ife izihlandlo ezibini ngenxa yokusebenzisa iziyobisi kakubi, yathandaza kuThixo icela uncedo ukuze ifumane injongo yokwenene yobomi. Ukufundisisa iBhayibhile namaNgqina kaYehova athetha isiRashiya kwayinceda yafumana iimpendulo kwimibuzo yayo. Namhlanje le ndoda, njengezinye izigidi, ilufumene uxolo noThixo kwanasebomini bayo.

Ithemba Lovuko

Ekuqukumbeleni, masibuyele kuBozo noHena Djorem baseSarajevo. Esi sibini sasinentombazana eneminyaka emihlanu ubudala, uMagdalena. KuJulayi odlulileyo, bobathathu babulawa sisiqhushumbisi xa babesuka ekhayeni labo bephindela kumsebenzi wokushumayela. Kuthekani ngoxolo ababelushumayeza abanye? Ngaba isiqhushumbisi esababulalayo sangqina ukuba olo xolo lwalungunomgogwana woxolo?

Akunjalo konke konke! Kule nkqubo yezinto, iintlekele ziyenzeka. Abantu babulawa ziibhombu okanye ziziqhushumbisi. Abanye babulawa kukugula okanye ziingozi. Abaninzi bafa ngenxa yokwaluphala. Ezo zinto ziyenzeka nakwabo banandipha uxolo lukaThixo, kodwa iziganeko ezinjalo azibashiyi bengenathemba.

UYesu wamthembisa oku umhlobo wakhe uMarta: “Ndim uvuko, ndim ubomi; lowo ukholwayo kum, nokuba ubethe wafa, wodla ubomi.” (Yohane 11:25) AbakwaDjorem babekukholelwa oku, njengoko onke amaNgqina kaYehova ekukholelwa. Yaye abakwaDjorem babekholelwa ukuba xa kwakunokwenzeka bafe, babeya kuvuselwa kumhlaba oya kube ngoko uyindawo enoxolo ngokwenene. UYehova uThixo ‘uya kuzisula zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.’—ISityhilelo 21:4.

Ngaphambi nje kokufa kwakhe, uYesu wathi kubalandeli bakhe: “Ndininika uxolo lwam; . . . Mayingakhathazeki intliziyo yenu.” (Yohane 14:27) Sivuya kunye nabo abakwaDjorem ababenolo xolo nesiqinisekileyo ukuba baya kulunandipha ngokuzele ngakumbi eluvukweni. Sivuya kunye nabo bonke abanqula uYehova, uThixo woxolo. Abanjalo banoxolo lwengqondo. Banandipha ukuba seluxolweni noThixo. Bahlakulela ukuhlala ngoxolo nabanye. Yaye banentembelo yokuba kwikamva luya kubakho uxolo. Ewe, balufumene uxolo, nangona bephila kwihlabathi elinombhodamo. Ngenene, bonke abanqula uThixo ngomoya nangenyaniso banandipha uxolo. Ngamana nawe ungalufumana uxolo olunjalo.

[Umbhalo osemazantsi]

[Imifanekiso ekwiphepha 7]

Balufumene uxolo nakuba bephila kwihlabathi elinombhodamo