Bakwenza Ukuthanda KukaYehova
UMoses Kunye NoAron—Abavakalisi Abanenkalipho BeLizwi LikaThixo
KHAWUBE nomfanekiso-ngqondweni woko kwakusenzeka: UMoses ominyaka ingama-80 nomnakwabo, uAron, bami phambi kweyona ndoda inamandla emhlabeni—uFaro waseYiputa. KumaYiputa lo mfo akangommeli nje woothixo. Akholelwa ekubeni unguthixo ngokwakhe. Amjonga njengoHorus ophilayo, uthixo onentloko kakhetshe. UHorus kunye noIsis no-Osiris, babebumba ubathathu emnye omkhulu phakathi koothixo noothixokazi baseYiputa.
Nabani na oya kuFaro wayengenakungayiboni intloko yesikhotsholo eyoyikekayo ivele kwisithsaba sakhe. Kwakukho inkolo yokuba le nyoka yayinokutshica umlilo nentshabalalo kuzo naziphi na iintshaba zikaFaro. Ngoku nanko uMoses noAron besiza kulo kumkani ukwanguthixo beze kucela eyona nto inkulu—ukuba andulule amaSirayeli angamakhoboka ayokwenza umthendeleko kuThixo wawo, uYehova.—Eksodus 5:1.
UYehova wayesele exele kwangaphambili ukuba intliziyo kaFaro yayiza kuba lukhuni. Ngoko ke, uMoses noAron ayizange ibothuse impendulo yakhe yendelelo: “Ngubani na uYehova, ukuba ndiliphulaphule izwi lakhe, lokuba ndindulule uSirayeli? Andimazi uYehova, kananjalo andiyi kumndulula uSirayeli.” (Eksodus 4:21; 5:2) Ngaloo ndlela, la yayingamaqalela okujongana ngezikhondo zamehlo. Xa bebuya kwakhona, uMoses noAron beza kuFaro bephethe ubungqina obunamandla bokuba babengabameli boThixo oyinyaniso nonamandla.
Kwenzeka Ummangaliso
Njengoko wayeyalelwe nguYehova, uAron wenza ummangaliso owabonisa ukuba uYehova mkhulu kunoothixo baseYiputa. Waphosa phantsi intonga yakhe phambi koFaro, ibe ngoko nangoko yaba ngumphompothela wenyoka! Exakene nalo mmangaliso, uFaro naye wayalela ababingeleli bakhe abenza imilingo ukuba benze okufanayo.a Encedwa ngamandla eedemon, la madoda enza into efanayo ngeentonga zawo.
Ukuba uFaro nababingeleli bakhe babesenesikrokro, makube saphela ngephanyazo. Khawuthelekelele ubuso babo xa inyoka ka-Aron yaginya ezabo iinyoka, loo nto ke iziginya nganye nganye! Bonke ababelapho babenokuzibonela ukuba oothixo baseYiputa babengalingani tu noThixo oyinyaniso, uYehova.—Eksodus 7:8-13.
Noko ke, kwanasemva kwala matiletile, intliziyo kaFaro yayiselukhuni. Kuphela kwaba semva kokuba uThixo ezise izibetho ezilishumi ezitshabalalisayo kwiYiputa, awathi uFaro waxelela uMoses noAron oku ekugqibeleni: “Sukani niphume phakathi kwabantu bam, nina aba noonyana bakaSirayeli, nihambe niye kumkhonza uYehova, njengokutsho kwenu.”—Eksodus 12:31.
Esikufundayo Koku
Yintoni eyenza uMoses noAron baye kuFaro onamandla waseYiputa? Ekuqaleni, uMoses wabonakalisa ukungabi nantembelo kumandla akhe, esithi ‘uthetha nzima, nolwimi lwakhe lukwanzima.’ Kwanasemva kokuba uYehova emqinisekise ngokumxhasa, wathi: “Khawuthume ngesandla salowo womthuma.” Ngamany’ amazwi, uMoses wayecela uThixo ukuba athume omnye umntu. (Eksodus 4:10, 13) Noko ke, uYehova wasebenzisa uMoses othobekileyo, emnika ubulumko namandla awayewafuna ukuze aphumeze isabelo sakhe.—Numeri 12:3.
Namhlanje, abakhonzi bakaYehova uThixo noYesu Kristu baphumeza umyalelo ‘wokwenza abafundi zonke iintlanga.’ (Mateyu 28:19, 20) Ukuze sifeze esethu isabelo ekuphumezeni olu thumo, sifanele silusebenzise kakuhle ulwazi lweZibhalo nabo bonke ubuchule esisenokuba sinabo. (1 Timoti 4:13-16) Kunokuba sicinge ngokungafaneleki kwethu, masisamkele ngokholo nasiphi na isabelo uThixo asinike sona. Unokusenza sifaneleke aze asomeleze ukuze senze ukuthanda kwakhe.—2 Korinte 3:5, 6; Filipi 4:13.
Ekubeni uMoses wayejongene nokuchaswa ngabantu naziidemon, ngokuqinisekileyo wayelufuna uncedo olungaphezu kolomntu. Ekugqibeleni, uYehova wamqinisekisa esithi: “Khangela, ndikwenze uthixo kuFaro.” (Eksodus 7:1) Ewe, uMoses wayexhaswa yaye enikwe igunya nguThixo. Ekubeni umoya kaYehova wawunaye, uMoses wayengenasizathu sakumoyika uFaro okanye amahlakani alo mlawuli unekratshi.
Nathi simele sikholose ngomoya oyingcwele kaYehova, okanye amandla asebenzayo, ukuze sibufeze ubulungiseleli bethu. (Yohane 14:26; 15:26, 27) Ekubeni sixhaswa nguThixo nathi sinokuwaphinda amazwi kaDavide, owacula wathi: “Ndikholose ngoThixo, ndingoyiki; unokundenza ntoni na umntu?”—INdumiso 56:11.
Ekubeni uYehova enemfesane akazange amshiye yedwa uMoses ukuba azibonele kwisabelo sakhe. Kunoko, uThixo wathi: “UAron umkhuluwa wakho woba ngumprofeti wakho. Wena wothetha zonke izinto endikuwisele umthetho ngazo; ke uAron umkhuluwa wakho wothetha kuFaro.” (Eksodus 7:1, 2) Hayi indlela anothando ngayo uYehova ngokwenza izinto ngokuvisisana namandla kaMoses!
UThixo usilungiselele unxulumano lwamanye amaKristu alwamkelayo ucelomngeni lokuba ngamaNgqina kaYehova, Osenyangweni. (1 Petros 5:9) Ngoko ke, phezu kwayo nje imiqobo esisenokugaxeleka kuyo, masixelise uMoses noAron—abavakalisi abanenkalipho belizwi likaThixo.
[Umbhalo osemazantsi]
a Igama lesiHebhere eliguqulelwe ngokuthi “ababingeleli abenza imilingo” libhekisela kwiqela labakhafuli ababesithi bona banamandla angaphezu kwawemvelo nangaphezulu lee kwaweedemon. Kwakukholelwa ekubeni la madoda ayenokuzenza iidemon ziwathobele ibe zona iidemon zazingenagunya kwaba bakhafuli.
[Umfanekiso okwiphepha 25]
UMoses NoAron bammela ngenkalipho uYehova phambi koFaro