IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w96 3/1 iphe. 23-27
  • Ukumanyana Enkonzweni KaThixo Ngamaxesha Alungileyo Namabi

No video available for this selection.

Sorry, there was an error loading the video.

  • Ukumanyana Enkonzweni KaThixo Ngamaxesha Alungileyo Namabi
  • IMboniselo Evakalisa UBukumkani BukaYehova—1996
  • Imixholwana
  • Amanqaku Afanayo
  • Ukukhonza Apho Abashumayeli Babefuneka Khona
  • Ukukhonza KuMzantsi Pasifiki
  • Abazalwana Bethu Baxabisekile
  • Ukusuka KwiSiqithi Ukuya Kwesinye
  • EAfrika Ekugqibeleni!
  • Ukulwa Nomhlaza
  • Ukubuyela EBenin
  • Bazinikela Ngokuvumayo—ENtshona Afrika
    IMboniselo Evakalisa UBukumkani BukaYehova 2014
  • Sasikelelwa Ngenxa Yokubeka UThixo Kuqala
    Vukani!—2009
  • Icandelo 4—Amangqina Ukusa Ekupheleni Komhlaba
    AmaNgqina KaYehova—Abavakalisi Bobukumkani BukaThixo
  • Ukuqala Kweecawa ETahiti
    Vukani!—2008
Khangela Okunye
IMboniselo Evakalisa UBukumkani BukaYehova—1996
w96 3/1 iphe. 23-27

Ukumanyana Enkonzweni KaThixo Ngamaxesha Alungileyo Namabi

Ngokubaliswa nguMichel noBabette Muller

“NDINIPHATHELE iindaba ezimbi,” watsho njalo ugqirha. “Nifanele nilibale ngobomi benu bobuvangeli basemazweni eAfrika.” Ejonga kumfazi wam, uBabette, wathi, “Unomhlaza wamabele.”

Sasikhwankqisiwe. Kwathi qatha izinto ezininzi ezingqondweni zethu. Sasicinga ukuba olo tyelelo lwethu kugqirha lwaluya kuba lolokuxilongwa okokugqibela. Amatikiti ethu okuya nokubuya eBenin, eNtshona Afrika, ayesele ethengiwe. Sasinethemba lokubuyela apho kwisithuba nje seveki. Kwiminyaka yethu engama-23 sitshatile, siye satyhubela amaxesha alungileyo namabi. Sididekile yaye sisoyika, ngoku sazixhobisela ukulwa nomhlaza.

Makhe siqale ekuqaleni. UMichel wazalwa ngoSeptemba 1947, uBabette ngoAgasti 1945. Sakhulela eFransi saza satshata ngowe-1967. Sasihlala eParis. Ngenye intsasa ebutsheni bowe-1968, uBabette wayesele eshiyiwe lixesha lokuya emsebenzini. Kwankqonkqoza elinye inenekazi laza lamnika incwadana enemifanekiso yonqulo; wayamkela. Landula ke eli nenekazi lathi: “Ngaba ndingabuya nomyeni wam ukuze sithethe nawe nomyeni wakho?”

UBabette wayecinga ngomsebenzi wakhe. Wayefuna eli bhinqa lihambe, ngoko wathi, “Kulungile, kulungile.”

UMichel uyabalisa: “Ndandingenamdla kunqulo, kodwa le ncwadana inemifanekiso yaba nomtsalane kum, yaye ndayifunda. Kwiintsuku ezimbalwa kamva, eli nenekazi, uJoceline Lemoine, wabuya nomyeni wakhe, uClaude. Wayenobuchule kakhulu ekusebenziseni iBhayibhile. Wayiphendula yonke imibuzo endandinayo. Ndandichukumisekile.

“UBabette wayengumKatolika onenzondelelo kodwa wayengenayo iBhayibhile, nto leyo eyayiqhelekile ngamaKatolika. Wayekuvuyela gqitha ukubona aze afunde iLizwi likaThixo. Kwisifundo sethu safunda ukuba uninzi lweembono zonqulo esasisoloko sizifundiswa zazibubuxoki. Saqalisa ukuthetha nezalamane nabahlobo bethu ngezinto esasizifunda. NgoJanuwari 1969 saba ngamaNgqina kaYehova abhaptiziweyo. Abasithoba kwizalamane nabahlobo bethu babhaptizwa kungekudala emva koko.”

Ukukhonza Apho Abashumayeli Babefuneka Khona

Kungekudala emva kokuba sibhaptiziwe, sacinga: ‘Asinabantwana. Kutheni singathabathi ubulungiseleli bexesha elizeleyo?’ Ngoko ngowe-1970 sayishiya imisebenzi yethu, sabhalisa njengoovulindlela abathe ngxi, yaye safudukela kwidolophana yaseMagny-Lormes, kufuphi naseNevers, kumbindi weFransi.

Esi yayisisabelo esinzima. Kwakunzima ukufumana abantu ababefuna ukufundisisa iBhayibhile. Sasingakwazi ukufumana umsebenzi wempangelo, ngoko sasinemali encinane. Maxa wambi ekuphela kwento yokutya esasiba nayo ziitapile. Ebusika amaqondo obushushu ayeba ngaphantsi kuhle kweqondo lokukhenkca elingama-22 ngokukaCelsius. Ixesha esalichithela apho sasilibiza ngokuba lixesha lamathokazi anqinileyo.—Genesis 41:3.

Kodwa uYehova wasizimasa. Ngenye imini xa sasiseza kuphelelwa kukutya, unoposi wasizisela ibhokisi enkulu enesonka samasi eyayivela kudadeboBabette. Ngenye imini xa sasibuyela ekhaya emva kokushumayela safika kukho abazalwana ababehambe iikhilomitha ezingama-500 ukuza kusibona. Ekubeni babesele bevile indlela ekwakunzima ngayo, aba bazalwana babezalise iinqwelo-mafutha zabo ezimbini ngokutya ababesiphathele kona.

Emva konyaka onesiqingatha, uMbutho wasimisela njengoovulindlela abakhethekileyo. Ukutyhubela iminyaka emine eyalandelayo, sakhonza eNevers, saza sakhonza eTroyes, yaye ekugqibeleni sakhonza eMontigny-lès-Metz. Ngowe-1976, uMichel wamiselwa ukuba akhonze njengomveleli wesiphaluka kumzantsi-ntshona weFransi.

Kwiminyaka emibini kamva, ebudeni besikolo sabaveleli besiphaluka, safumana ileta evela kwiWatch Tower Society eyayisimemela ukuba siye kwamanye amazwe njengabavangeli basemazweni; le leta yathi sinokukhetha phakathi kweChad neBurkina Faso (eyayiyiUpper Volta ngelo xesha). Sakhetha iChad. Kungekudala safumana enye ileta, eyayisinika isabelo sokuya kusebenza phantsi kwesebe laseTahiti. Sasicele ukuya eAfrika, ilizwekazi elikhulu, kodwa kungekudala sazifumana sele sikwisiqithi esincinane!

Ukukhonza KuMzantsi Pasifiki

ITahiti isisiqithi esihle esichumileyo kuMzantsi Pasifiki. Xa sasifika, kwakukho malunga nekhulu labazalwana ababeze kusikhawulela kwisikhululo seenqwelo-moya. Basamkela ngeembasa zeentyatyambo, yaye nangona sasidiniwe emva kohambo lwethu olude ukusuka eFransi, sasivuya gqitha.

Kwiinyanga ezine emva kokuba sifikile eTahiti, sakhwela iphenyane elincinane elizele ntli ngumthwalo weekhokhonathi ezomisiweyo. Kwiintsuku ezintlanu kamva safika kwisabelo sethu esitsha—isiqithi saseNuku Hiva esikwiZiqithi zaseMarquesas. Babemalunga ne-1 500 abantu ababehlala kweso siqithi, kodwa kwakungekho bazalwana. Yayisithi kuphela.

Ngelo xesha kwakusadliwa ngendebe endala. Sasihlala kwindlwana eyenziwe ngekonkile noqalo. Wawungekho umbane. Sasinempompo yamanzi eyayisebenza maxa wambi, kodwa amanzi ayenodaka. Ixesha elininzi sasisebenzisa amanzi emvula awayezalise iqula. Kwakungekho zindlela zilungisiweyo, kwakukho nje iindlelana zomhlaba.

Ukuze sifikelele iindawo ezithe qelele zesi siqithi, kwafuneka siqeshe amahashe. Iisali zazenziwe ngomthi—kwakungayolisi ukuhlala kuzo, ingakumbi kuBabette, owayengazange akhwele ihashe ngaphambili. Sasiphatha isabile ukuze sisike uqalo olwaluwele endleleni. Ubomi balapho babahluke gqitha kobaseFransi.

Sasiqhuba iintlanganiso zangeCawa, nangona yayisithi sobabini kuphela ababesiza. Ekuqaleni sasingenazo ezinye iintlanganiso ekubeni sasisobabini kuphela. Kunoko sasiyifunda kunye imibandela yeentlanganiso.

Emva kweenyanga ezimbalwa, sagqiba kwelokuba sasingafanele senze ngolo hlobo. UMichel uyabalisa: “Ndathi kuBabette, ‘Simele sinxibe kakuhle. Siza kuhlala phantsi sobabini. Ndiza kuqala ngomthandazo, size emva koko sibe neSikolo Sobulungiseleli Sobuthixo neNtlanganiso Yenkonzo. Ndiza kubuza imibuzo, uze wena uphendule, nokuba nguwe wedwa kuphela osegumbini.’ Kwakusinceda ukwenza oko kuba kulula ukuyekelela umxakatho ngokomoya xa lingekho ibandla.”

Kwathabatha ixesha ukuba sikwazi ukuzisa abantu kwiintlanganiso zethu zamaKristu. Sasisobabini kuphela kwiinyanga ezisibhozo zokuqala. Kamva, sathelelwa ngomnye, ngababini, okanye maxa wambi ngabanye abathathu. Ngomnye unyaka, saqalisa isikhumbuzo saminyaka le seSidlo SeNkosi Sangokuhlwa sisobabini kuphela. Emva kwemizuzu elishumi, kwafika abanye abantu, ngoko ndanqumama ndaza ndaqalisa ukuthetha kwakhona.

Namhlanje, kukho abavakalisi abangama-42 namabandla amathathu kwiZiqithi zaseMarquesas. Nangona eyona nxalenye inkulu yomsebenzi yenziwa ngabo bafike emva kokuba simkile, abanye abantu ekwakudityenwe nabo ngelo xesha ngoku babhaptiziwe.

Abazalwana Bethu Baxabisekile

Safunda ukuba nomonde eNuku Hiva. Kwakufuneka silinde yonke into ngaphandle kwezona mfuneko zisisiseko. Ngokomzekelo, ukuba wawufuna incwadi, kwakufuneka ubhale, uze ulinde kangangeenyanga ezimbini okanye ezintathu ngaphambi kokuba ifike.

Esinye isifundo esasifundayo yayisesokuba abazalwana bethu baxabisekile. Xa satyelela iTahiti saya entlanganisweni saza seva abazalwana becula, sachukumiseka kangangokuba sacuntsula kule nto yabantwana. Kusenokuba yinyaniso ukuba abanye abazalwana kunzima ukuqhubana nabo, kodwa xa uwedwa, uyakuqonda indlela ekulunge ngayo ukuba kunye nabazalwana. Ngowe-1980 uMbutho wagqiba kwelokuba simele sibuyele eTahiti size sikhonze kumsebenzi wesiphaluka. Apho sakhuthazwa gqitha ngumoya ofudumeleyo wabazalwana wokubuk’ iindwendwe nokuthanda kwabo umsebenzi wokushumayela. Sachitha iminyaka emithathu kumsebenzi wesiphaluka eTahiti.

Ukusuka KwiSiqithi Ukuya Kwesinye

Emva koko sabelwa kwikhaya labavangeli basemazweni eRaïatéa, esinye isiqithi sePasifiki, yaye sahlala apho kangangeminyaka emibini. Emva kokuba seRaïatéa, sabelwa kumsebenzi wesiphaluka kwiqela leziqithi zaseTuamotu. Satyelela iziqithi ezingama-25 kwezingama-80 ngephenyane. Oku kwakunzima kuBabette. Ngalo lonke ixesha ehamba ngephenyane, wayegula.

UBabette uthi: “Kwakunzima! Ndandigula lonke ixesha esalichithela kwiphenyane. Ukuba sasiselwandle iintsuku ezintlanu, ndandigula iintsuku ezintlanu. Amayeza akazange andincede. Kodwa phezu kwako nje ukugula kwam, ndalubona ulwandle luluhle kakhulu. Lwalungumbono omangalisayo. Amahlengesi ayedla ngokukhuphisana nephenyane. Ngokufuthi ayedla ngokutsibela ngaphandle kwamanzi xa uqhwaba izandla!”

Emva kweminyaka emihlanu sikumsebenzi wesiphaluka, sabelwa kwakhona eTahiti kangangeminyaka emibini yaye kwakhona saba nexesha elimnandi kumsebenzi wokushumayela. Ibandla lethu laphindeka kabini lisuka kubavakalisi abangama-35 ukusa kwabangama-70 kunyaka onesiqingatha. Abali-12 kwabo sasifundisisa nabo iBhayibhile babhaptizwa ngaphambi nje kokuba sihambe. Bambi babo ngoku bangabadala kwelo bandla.

Xa iyonke sachitha iminyaka eli-12 kuMzantsi Pasifiki. Emva koko safumana ileta evela kuMbutho isithi kwakungasekho mfuneko yabavangeli basemazweni kwezi ziqithi ekubeni ngoku amabandla ayesele omelele. Kwakukho abavakalisi abangama-450 ekufikeni kwethu eTahiti, yaye ukunduluka kwethu babengaphezu kwe-1 000.

EAfrika Ekugqibeleni!

Sabuyela eFransi, yaye emva kwenyanga enesiqingatha, uMbutho wasinika isabelo esitsha—eBenin, eNtshona Afrika. Sasikufuna ukuya eAfrika kwiminyaka eli-13 ngaphambili, ngoko sasivuya gqitha.

Safika eBenin ngoNovemba 3, 1990, yaye sasiphakathi kwabavangeli basemazweni bokuqala ukufika emva kokurhoxiswa kokuvalwa komsebenzi wokushumayela ngoBukumkani okwathabatha iminyaka eli-14. Kwakuvuyisa gqitha. Sasingenangxaki ekuhlaleni apho kuba ubomi buyafana nobo bakwiziqithi zePasifiki. Abantu banobuhlobo yaye banomoya wokubuk’ iindwendwe. Ungema uthethe nabani na esitratweni.

Kwiiveki nje ezimbalwa emva kokuba sifikile eBenin, uBabette waphawula iqhuma ebeleni lakhe. Ngoko saya kwikliniki encinane kufuphi neofisi yesebe eyayisandul’ ukumiselwa. Ugqirha wamxilonga waza wamxelela ukuba kwakufuneka enziwe utyando kungekudala. Ngosuku olulandelayo saya kwenye ikliniki apho sadibana nogqirha omhlophe, ugqirha ongumbelekisi osuka eFransi. Naye wathi kwakufuneka siye eFransi ngokukhawuleza ukuze uBabette enziwe utyando. Kwiintsuku ezimbini kamva sasikwinqwelo-moya eya eFransi.

Sasibuhlungu ukushiya iBenin. Benenkululeko ehlaziyiweyo engokonqulo kwelo lizwe, yayingahlangani imilomo yabazalwana luvuyo lokuba nabavangeli basemazweni abatsha yaye nathi sasikuvuyela ukuba lapho. Ngoko saba buhlungu xa kwafuneka sihambe emva kokuba kwelo lizwe iiveki nje ezimbalwa.

Ukufika kwethu eFransi, ugqirha wotyando wamxilonga uBabette waza waqinisekisa ukuba kwakufuneka etyandiwe. Oogqirha basebenza ngokukhawuleza, baza benza utyando olungephi yaye bamkhulula uBabette esibhedlele ngosuku olulandelayo. Sasicinga ukuba kugqityiwe.

Kwiintsuku ezisibhozo kamva, saya kugqirha wotyando. Wasixelela ngelo xesha ke ukuba uBabette unomhlaza wamabele.

Ecinga ngendlela awayevakalelwa ngayo ngelo xesha, uBabette uthi: “Ekuqaleni, ndandingaphazamisekanga njengokuba uMichel wayenjalo. Kodwa ngosuku olusemva kokuba ndifumene ezi ndaba zimbi ndandingazi ukuba mandithini. Ndandingakwazi ukulila. Ndandingakwazi ukuncuma. Ndandicinga ukuba ndiza kufa. Kum, umhlaza wawufana nokufa. Isimo sengqondo sam sasikukuba, Simele senze nantoni na eyimfuneko.”

Ukulwa Nomhlaza

Safumana iindaba ezimbi ngoLwesihlanu, kwaza kwalungiselelwa ukuba uBabette afumane utyando lwesibini ngoLwesibini. Sasihlala nodadeboBabette, kodwa naye wayegula kakhulu, ngoko sasingenakuhlala kwigumbi lakhe elincinane.

Sasingazi apho sasinokuya khona. Sandula ke sakhumbula uYves noBrigitte Merda, isibini esasihlala naso ngaphambili. Esi sibini sasibonakalise umoya wokubuk’ iindwendwe kuthi. Satsalel’ umnxeba uYves saza samxelela ukuba kwakufuneka uBabette enziwe utyando yaye sasingazi apho sasinokuhlala khona. Kwakhona samxelela ukuba uMichel wayefuna umsebenzi.

UYves waqesha uMichel ukwenza imisetyenzana kwalapha ekhaya. Abazalwana basixhasa baza basikhuthaza ngezenzo ezininzi zobubele. Kwakhona basinceda ngokwemali. UMbutho wahlawula iindleko zokunyangwa kukaBabette.

Olo tyando lwalulukhulu. Oogqirha kwafuneka basuse iilymph nodes nebele. Ngokukhawuleza baqalisa unyango olubizwa ngokuba yichemotherapy. Emva kweveki, uBabette wayelungele ukuphuma esibhedlele, kodwa kwakufuneka abuyele rhoqo emva kweeveki ezintathu ukuze aqhubeke enyangwa.

Ngeli xesha uBabette wayefumana unyango, abazalwana ebandleni babeluncedo gqitha. Omnye udade owayekhe naye wanomhlaza wamabele wayemkhuthaza gqitha. Waxelela uBabette ngoko wayemele akulindele waza wamthuthuzela gqitha.

Noko ke, sasixhalabele ikamva lethu. Bekuqonda oku, uMichel noJeanette Cellerier basikhupha basisa kwivenkile yokutyela ukuze sifumane isidlo.

Sabaxelela ukuba kufuneka siyishiye inkonzo yobuvangeli basemazweni yaye asinakuze siphinde siye eAfrika. Noko ke, uMzalwana uCellerier wabuza: “Uthini? Ngubani othe nimele niyishiye? Ngaba liQumrhu Elilawulayo? Ngabazalwana baseFransi? Ngubani onixelele oko?”

“Akukho mntu usixelele oko,” ndaphendula, “Ndim otshoyo.”

“Unotshe, unotshe!” watsho uMzalwana uCellerier. “Niza kubuyela!”

Ichemotherapy yalandelwa lunyango lwemitha, olwagqitywa ngasekupheleni kuka-Agasti 1991. Oogqirha bathi ababoni ngxaki ekubuyeleni kwethu eAfrika, ukuba nje uBabette wayeza kubuyela eFransi ukuze axilongwe rhoqo.

Ukubuyela EBenin

Ngoko sabhalela kwikomkhulu eBrooklyn sicela imvume yokubuyela kwinkonzo yobuvangeli basemazweni. Sasingxamele ukuva impendulo yabo. Iintsuku zabonakala ngathi ziyacotha. Ekugqibeleni, uMichel wayengasenakulinda, ngoko watsalel’ umnxeba eBrooklyn waza wabuza enoba babezifumene iileta zethu kusini na. Bathi baye baziqwalasela—sasinokubuyela eBenin! Hayi indlela esasinombulelo ngayo kuYehova!

Intsapho yakwaMerda yalungiselela itheko ukuze sibhiyozele ezi ndaba. NgoNovemba 1991, sabuyela eBenin, yaye abazalwana basamkela ngokusenzela isidlo!

UBabette ukhangeleka ephilile ngoku. Ngamaxesha athile siye sabuyela eFransi ukuze axilongwe ngokupheleleyo, yaye oogqirha abafumananga nomkhondo womhlaza. Siyakuvuyela ukubuyela kwisabelo sethu sokuba ngabavangeli basemazweni. Siziva sifunwa eBenin, yaye uYehova uye wawusikelela umsebenzi wethu. Ukususela ekubuyeleni kwethu siye sanceda abantu abali-14 ukuba babhaptizwe. Abahlanu kubo ngoku bangoovulindlela abathe ngxi ibe omnye uye wamiselwa njengesicaka solungiselelo. Kwakhona siye sabona ibandla lethu elincinane likhula laza lahlulwa laba ngamabandla amabini.

Ukutyhubela iminyaka, siye sakhonza uYehova njengendoda nomfazi yaye siye sanandipha iintsikelelo ezininzi saza safikelela ekwazini abantu abaninzi abathandekayo. Kodwa kwakhona siye saqeqeshwa saza somelezwa nguYehova ukuze sinyamezele ubunzima ngokuphumelelayo. NjengoYobhi, asizange sisiqonde ngamaxesha onke isizathu sokuba izinto zenzeke ngohlobo ezenzeka ngalo, kodwa sasisazi ukuba uYehova wayesoloko ekho ukuze asincede. Kunjengokuba iLizwi likaThixo lisithi: “Yabonani, isandla sikaYehova asisifutshane, ukuba singasindisi; nendlebe yakhe ayinzima, ukuba ingevi.”—Isaya 59:1.

[Umfanekiso okwiphepha 23]

UMichel noBabette Muller benxibe isinxibo somthonyama eBenin

[Umfanekiso okwiphepha 25]

Umsebenzi wobuvangeli basemazweni phakathi kwabantu basePolynesia kwiTahiti ekweleenjiko

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share