Unokubufumana Ubuhlobo Obuhlala Buhleli
KUKHO imiqobo ekufumaneni abahlobo. Eneneni, iBhayibhile yaxela kwangaphambili ukuba kule “mihla yokugqibela” kwakuya kuphela uthando, umsa wemvelo nokunyaniseka. (2 Timoti 3:1-5; Mateyu 24:12) Ezi meko ziye zabangela ubulolo obungathethekiyo. Omnye umntu wathi: “Apha elumelwaneni kunjengakumkhombe kaNowa. Ukuba akunaqabane, akunakungena.” Ityala alinakubekwa lonke kumntu ngamnye olilolo. Kwamanye amazwe, ucelomngeni lobuhlobo obuhlala buhleli luquka ukufuduka ngokufuthi kwabantu, ukuqhekeka kweentsapho, izixeko ezinabantu abangenabuhlobo nezinobungozi nokunqongophala kwexesha abangenzi nto ngalo.
Ummi wesixeko sale mihla ngeveki usenokudibana nabantu abaninzi kunabo ummi wedolophana yenkulungwane ye-18 wayenokubabona ngonyaka okanye kubo bonke ubomi bakhe! Sekunjalo, ulwalamano lwale mihla ngokufuthi alubi lolusondeleyo. Abaninzi bazibandakanya ngokupheleleyo kwiimbutho zokuzonwabisa nasekuzihlaziyeni. Noko ke, simele sivume ukuba ukuzonwabisa okungenantsingiselo nezinxulumani ezingafanelekanga kunjengokubasa umlilo ngeentsasa. INtshumayeli 7:5, 6, ithi: “Kulungile ukuva ukukhalimela kwesilumko, kunokuba umntu eve ingoma yezidenge. Ngokuba njengokuqhuqhumba kwevaba [kweentsasa] ngaphantsi kwembiza, kunjalo ukuhleka kwesidenge; naloo nto ingamampunge.” Iintsasa zikhawuleza zenze umlilo oqaqambileyo noqhuqhumbayo, kodwa azikwazi ukusigcina sifudumele. Ngokufanayo, amaqabane angxolayo, atsho ngesiqhazolo sentsini asenokutsala ingqalelo yethu okwexeshana, kodwa akayi kubuphelisa bonke ubulolo aze asanelise ekufuneni abahlobo bokwenene.
Ukuba wedwa akufani nobulolo. Ukuba wedwa kuyimfuneko ukuze sizihlaziye size ngaloo ndlela sibe nokuninzi esinokukwenzela abahlobo. Xa benesithukuthezi, abaninzi ngokukhawuleza babhenela ekuzonwabiseni ngezinto ze-elektroniki. Kolunye uhlolisiso kwafunyaniswa ukuba enye yezona ndlela ziqhelekileyo zokuphelisa ubulolo kukubukela umabonwakude. Ukanti, abaphengululi bafikelela kwisigqibo sokuba ukubukela umabonwakude kakhulu yenye yezona zinto zingalunganga esinokuzenza xa sinesithukuthezi. Kubangela ubuvila, ukukruquka nokuba neengcinga ezingekho ngqiqweni, kuthabathel’ indawo ulwalamano lobuqu nabanye abantu.
Eneneni, ukuba wedwa kunokuba nexabiso gqitha ukuba silisebenzisa ngendlela eyakhayo ixesha esisodwa ngalo. Sinokukwenza oku ngokufunda, ukubhala iileta, ukwenza izinto nokuphumla. Ukusebenzisa ixesha lokuba wedwa ngendlela eyakhayo kuquka ukuthandaza kuThixo, ukufundisisa iBhayibhile nokucamngca ngayo. (INdumiso 63:6) Ezi ziindlela zokusondela kuYehova uThixo, onokuba ngoyena Mhlobo wethu mkhulu.
Imizekelo YeBhayibhile Yobuhlobo
Nangona kulungile ukuhlobana nabantu abaninzi, iBhayibhile isikhumbuza ukuba “kukho umhlobo ogqithisele umzalwana ngokunamathela.” (IMizekeliso 18:24, Appleyard’s Version) Sonke siyakufuna ukuba neqaqobana labahlobo abasenyongweni abasikhathalela ngokwenene, abasenza sivuye, somelele yaye sibe seluxolweni. Ngoxa ubuhlobo bokwenene obunjalo busenokunqaba namhlanje, eminye imizekelo yamandulo iphawulwe ngokukhethekileyo eBhayibhileni. Ngokomzekelo, kwakukho ubuhlobo obubalaseleyo phakathi koDavide noYonatan. Yintoni esinokuyifunda kubo? Kwakutheni ukuze ubuhlobo babo buhlale buhleli?
Phakathi kwezinye izinto, uDavide noYonatan babenomdla ofanayo kwizinto ezibalulekileyo. Okona kubalulekileyo kukuba bobabini babezinikele ngokunzulu kuYehova uThixo. Akubona ukholo lukaDavide kuThixo nezenzo zakhe zokukhusela abantu bakaYehova, “umphefumlo kaYonatan wabophana nomphefumlo kaDavide; uYonatan wamthanda njengomphefumlo wakhe.” (1 Samuweli 18:1) Ngoko, ukuthanda uThixo kuyabamanyanisa abahlobo.
UYonatan noDavide babengabantu abomeleleyo ababephila ngemigaqo yobuthixo. Ngoko ke babenokuhlonelana. (1 Samuweli 19:1-7; 20:9-14; 24:6) Ngokwenene sinoyolo ukuba sinabahlobo abahlonel’ uThixo abalawulwa yimigaqo yeZibhalo.
Kukho abanye oothunywashe abafak’ isandla kubuhlobo bukaDavide noYonatan. Ulwalamano lwabo lwalunyanisekile yaye lungqalile, kwaye babenentembelo omnye komnye. Ngokunyaniseka uYonatan wayebeka izilangazelelo zikaDavide kuqala kunezakhe. Wayengenamona kuba uDavide wayethenjiswe ukuba ngukumkani; kunoko, uYonatan wamxhasa ngokweemvakalelo nangokomoya. Ibe uDavide walwamkela uncedo lwakhe. (1 Samuweli 23:16-18) Ngeendlela ezifanelekileyo ngokweZibhalo, uDavide noYonatan bazivakalisa iimvakalelo ababenazo omnye ngomnye. Ubuhlobo babo bobuthixo babusekelwe kuxabiso nothando lokwenene. (1 Samuweli 20:41; 2 Samuweli 1:26) Babungenakuphela kuba omabini la madoda ahlala ethembekile kuThixo. Ukuyisebenzisa loo migaqo kunokusinceda sakhe size sibugcine ubuhlobo bokwenene.
Indlela Yokuhlakulela Ubuhlobo
Ngaba ufuna abahlobo bokwenene? Kusenokungabi yimfuneko ukuba ubafune kude. Abanye babo unxulumana nabo ngokufuthi banokuba ngabahlobo bakho, yaye basenokuba bayabufuna ubuhlobo bakho. Ngokukodwa ngokuphathelele amaKristu okhonza nawo, kububulumko ukusebenzisa icebiso lompostile uPawulos elithi “phangalalani.” (2 Korinte 6:11-13) Noko ke, musa ukukhathazeka ukuba yonke imigudu yakho yokuzenzela umhlobo ayiphumeli kwiqhina elinzulu. Kudla ngokuthabatha ixesha ukwakha ubuhlobo, yaye aluyi kuba nzulu ngokufanayo lonke ulwalamano. (INtshumayeli 11:1, 2, 6) Kakade ke, ukuze sifumane ubuhlobo bokwenene, asifanele sizingce, yaye kufuneka sithobele isiluleko sikaYesu: “Zonke izinto, ke ngoko, enifuna abantu bazenze kuni, nani nimele nenze ngokunjalo kubo.”—Mateyu 7:12.
Ngubani ofuna ubuhlobo bakho? Ngaphandle koontanga bakho, kuthekani ngabo bangaphantsi kuwe okanye abantu abadala? Ubuhlobo bukaDavide noYonatan, uRute noNahomi nobukaPawulos noTimoti babubandakanya abantu abangalinganiyo ngeminyaka. (Rute 1:16, 17; 1 Korinte 4:17) Ngaba ubuhlobo bakho unokubunabisela kubahlolokazi nakwabanye abantu abangatshatanga? Kwakhona, cinga ngabo basandul’ ukufika elumelwaneni. Basenokuba baphulukene nonxulumano lwenkoliso okanye lwabo bonke abahlobo babo ngokufuduka okanye ngokuguqula indlela yabo yokuphila. Musa ukulindela ukuba beze kuwe. Ukuba ungumKristu, zakhele ubuhlobo obuhlala buhleli ngokusebenzisa isiluleko sikaPawulos esithi: “Kuthando lobuzalwana yibani nomsa wofefe omnye komnye. Ekuboniseni imbeko omnye komnye khokelani.”—Roma 12:10.
Sinokucinga ngobuhlobo njengohlobo lokupha. UYesu wathi ukuba siyapha, abantu baya kusipha nathi. Kwakhona wabonisa ukuba kukho uyolo olungakumbi ekupheni kunokuba lukho ekwamkeleni. (Luka 6:38; IZenzo 20:35) Ngaba ukhe wadibana nabantu abaneemvelaphi ezingafaniyo? Iindibano zezizwe ngezizwe zamaNgqina kaYehova ziye zangqina ukuba abantu beentlanga ezahlukeneyo banokwakha ubuhlobo bokwenene nobuhlala buhleli xa benqula uThixo bonke.
Ukugcina Ubuhlobo Buphilile
Okubuhlungu kukuba maxa wambi abo bagqalwa njengabahlobo bayakhubekisana. Ukuhleba okwenzakalisayo, ukudiza amahlebo omnye, ukungabi naxabiso—ezi zezinye zezinto ezibuhlungu gqitha xa zisenziwa ngumntu omgqala njengomhlobo wokwenene. Yintoni enokwenziwa kwiimeko ezinjalo?
Misela umzekelo omhle. Yenza konke okusemandleni akho ukuze uphephe ukukhubekisa ngokungeyomfuneko. Kwezinye iindawo kuyinto eqhelekileyo ukuba abahlobo bahlekise ngeentsilelo zomnye. Kodwa ukuphathana gadalala okanye ukuqhathana akunakubamanyanisa abahlobo, kwanokuba mhlawumbi ‘bayadlala.’—IMizekeliso 26:18, 19.
Zabalazela ukubulondoloza ubuhlobo. Maxa wambi kubakho ukungaqondani kakuhle xa abahlobo belindele lukhulu omnye komnye. Umhlobo ogulayo okanye oxakekileyo ngenxa yengxaki enzulu ngokuqinisekileyo akayi kubonakalisa ukufudumala njengesiqhelo. Ngoko ke, ngamaxesha anjalo zama ukuba ngoqondayo yaye umxhase.
Zicombulule ngokukhawuleza nangobubele iingxaki. Kwenze ngasese oko ukuba kunokwenzeka. (Mateyu 5:23, 24; 18:15) Qiniseka ukuba umhlobo wakho uyazi ukuba ufuna ukulugcina luluhle ulwalamano lwenu. Abahlobo abanyanisekileyo bayaxolelana. (Kolose 3:13) Ngaba uya kuba ngumhlobo onjalo—onamathela ngaphezu komzalwana?
Ukufunda nokucinga ngobuhlobo kusisiqalo nje. Ukuba sinesithukuthezi, masithabathe inyathelo elifanelekileyo, yaye asiyi kuba nesithukuthezi ixesha elide. Ukuba siyazibhokoxa, sinokuzenzela abahlobo bokwenene. Kwabanye babo, siya kwakha amaqhina akhethekileyo. Kodwa akakho umntu onokuthabatha indawo kaThixo, oyena Mhlobo mkhulu. NguYehova kuphela onokusazi, asiqonde aze asixhase ngokupheleleyo. (INdumiso 139:1-4, 23, 24) Ukongezelela koko, iLizwi lakhe lisinika ithemba elimangalisayo ngekamva—ihlabathi elitsha apho kuya kwenzeka ukuba nabahlobo bokwenene ngonaphakade.—2 Petros 3:13.
[Imifanekiso ekwiphepha 5]
UDavide noYonatan banandipha ubuhlobo bokwenene, ibe nathi sinokwenjenjalo