Benza Ukuthanda KukaYehova
Ukuthobela Amazwi KaYesu Okugqibela
NGENGOKUHLWA kaNisan 14, 33 C.E., uYesu Kristu nabapostile bakhe abathembekileyo abali-11 babehleli etafileni egumbini eliphezulu eYerusalem. Eqonda ukuba ukufa kwakhe kwakusemnyango, wabaxelela oku: “Ndisenani kancinane.” (Yohane 13:33) Eneneni, uYuda Sikariyoti wayesele esendleleni esiya kwenza iyelenqe nabantu abangendawo ababefuna ukubulala uYesu.
Akukho bani kwelo gumbi liphezulu owayebuqonda ubunzulu beemeko ngaphezu kukaYesu. Wayesazi kakuhle ukuba wayeza kubandezeleka kungekudala. Kwakhona uYesu wayesazi ukuba abapostile bakhe babeza kumshiya ngobo busuku. (Mateyu 26:31; Zekariya 13:7) Ekubeni eli yayilithuba lokugqibela ukuba uYesu athethe nabapostile bakhe ngaphambi kokuba afe, sinokuqiniseka ukuba amazwi akhe okugqibela ayephathelele imibandela ebaluleke gqitha.
“Hlalani Nisenza Oku Nindikhumbula”
Ekunye nabapostile bakhe abathembekileyo, uYesu wasungula isikhumbuzo esitsha esasiza kuthabathel’ indawo iPasika yamaYuda. Umpostile uPawulos wasibiza ngokuthi “isidlo sangokuhlwa seNkosi.” (1 Korinte 11:20) Emva kokuthabatha isonka esingenagwele, uYesu wathandaza. Emva koko wasiqhekeza eso sonka waza wasinika abapostile bakhe. Wathi: “Thabathani, nidle. Oku kuthetha umzimba wam.” Emva koko wathabatha indebe yewayini, wenza umthandazo wokubulela waza wayinika abapostile bakhe, esithi: “Selani kuyo, nonke; kuba oku kuthetha ‘igazi lam lomnqophiso,’ eliza kuphalala ngenxa yabaninzi ukuze kuxolelwe izono.”—Mateyu 26:26-28.
Sasinayiphi intsingiselo esi siganeko? Njengoko uYesu wabonisayo, isonka sasimela umzimba wakhe ongenasono. (Hebhere 7:26; 1 Petros 2:22, 24) Iwayini yayifuzisela igazi likaYesu elaphalalayo, elaliza kwenza kuxolelwe izono. Kwakhona igazi ledini lakhe laliza kuwenza usebenze umnqophiso omtsha phakathi koYehova uThixo nabantu abali-144 000, ababeza kulawula noYesu ezulwini. (Hebhere 9:14; 12:22-24; ISityhilelo 14:1) Ngokumemela abapostile bakhe kwesi sidlo, uYesu wabonisa ukuba babeya kulawula kunye naye eBukumkanini bamazulu.
Ethetha ngesi sidlo sesikhumbuzo, uYesu wabayalela oku: “Hlalani nisenza oku nindikhumbula.” (Luka 22:19) Ewe, iSidlo Sangokuhlwa SeNkosi sasiza kuba sisiganeko saminyaka le, kanye njengokuba kwakunjalo ngePasika. Ngoxa iPasika yayisisikhumbuzo sokukhululwa kwamaSirayeli kubukhoboka baseYiputa, iSidlo Sangokuhlwa SeNkosi sasiphathelele inkululeko enkulu ngakumbi—leyo yokukhululwa koluntu kubukhoboka besono nokufa. (1 Korinte 5:7; Efese 1:7) Ngaphezu koko, abo batyayo kwimifuziselo yesonka newayini babeza kuhlala bekhumbula amalungelo abo exa elizayo njengookumkani nababingeleli kuBukumkani bukaThixo basezulwini.—ISityhilelo 20:6.
Ukufa kukaYesu Kristu kwakusesona siganeko sibalulekileyo kwimbali yoluntu ngenene. Abo banoxabiso ngoko kwenziwa nguYesu bayawuthobela umyalelo wakhe ophathelele iSidlo Sangokuhlwa SeNkosi: “Hlalani nisenza oku nindikhumbula.” AmaNgqina kaYehova ayasenza isikhumbuzo sokufa kukaYesu nyaka ngamnye ngosuku olungqamana noNisan 14. Ngowe-1996 olu suku luza kuba ngoAprili 2, emva kokutshona kwelanga. Umenywa ngokufudumeleyo ukuba ubekho kwiHolo yoBukumkani ekummandla ohlala kuwo.
“Ndininika Umyalelo Omtsha”
Ngaphandle kokusungula iSidlo Sangokuhlwa SeNkosi, uYesu wabanika isiluleko sokugqibela abapostile bakhe. Nangona ayeqeqeshwe kakuhle, la madoda kwakusafuneka efunde izinto ezininzi. Ayengayiqondi ngokupheleleyo injongo kaThixo ngoYesu, ngawo, okanye ngekamva. Kodwa uYesu akazange azame ukuyicacisa ngexesha elinye yonke le mibandela. (Yohane 14:26; 16:12, 13) Kunoko, wathetha ngento ebaluleke kakhulu. Wathi: “Ndininika umyalelo omtsha, wokuba nithandane; kanye njengoko ndinithandileyo mna, ukuba kwanani nithandane.” Wongezelela ke uYesu wathi: “Ngako oku bonke baya kwazi ukuba ningabafundi bam, ukuba ninothando phakathi kwenu.”—Yohane 13:34, 35.
Oku ‘kwakungumyalelo omtsha’ ngayiphi indlela? Kaloku, uMthetho kaMoses wawusithi: “Uze umthande ummelwane wakho ngoko uzithanda ngako.” (Levitikus 19:18) Noko ke, uYesu wathi abafundi bakhe bafanele babonakalise uthando lokuzincama olwaluza kufikelela kwinqanaba lokuba ubani ancame ubomi bakhe ngenxa yomnye umKristu. Kakade ke, ‘umthetho wothando’ wawuza kusebenza nakwiimeko ezingekho nzulu kangako. Kuzo zonke iimeko umlandeli kaYesu Kristu uya kuthabatha inyathelo lokuqala ukubonakalisa uthando ngokunceda abanye ngokomoya nangezinye iindlela.—Galati 6:10.
Ngobu busuku bokugqibela bobomi bukaYesu emhlabeni, uthando lwashukumisela uYesu ukuba athandazele abafundi bakhe kuYehova uThixo. Ngokuyinxenye, wathandaza esithi: “Bona basehlabathini yaye mna ndiza kuwe. Bawo Ongcwele, balinde ngenxa yegama lakho ondinike lona, ukuze babe banye kanye njengoko sinjalo thina.” (Yohane 17:11) Kubalulekile ukuphawula ukuba xa wayethandaza kuYise, uYesu wathandazela ukuba abafundi bakhe bamanyane ngothando. (Yohane 17:20-23) Babefanele ‘bathandane kanye njengoko uYesu wayebathandile.’—Yohane 15:12.
Abapostile abathembekileyo bawathobela amazwi kaYesu okugqibela. Nathi sifanele siwuthobele umyalelo wakhe. Kule “mihla yokugqibela” yamanqam, uthando nomanyano phakathi kwabanquli bokwenyaniso lubaluleke gqitha kunangaphambili. (2 Timoti 3:1) Ngenene, amaKristu okwenyaniso ayayithobela imiyalelo kaYesu yaye abonakalisa uthando lobuzalwana. Oku kuquka ukuthobela umyalelo wakhe wokukhumbula iSidlo Sangokuhlwa SeNkosi.