Uyakhumbula Na?
Ngaba uye wawafumanisa eluncedo gqitha amanqaku akutshanje eMboniselo? Ngoko kutheni ungavavanyi inkumbulo yakho ngale mibuzo ilandelayo:
◻ Sinokufunda ntoni ngokuwohloka kwama-Amon? (Zefaniya 2:9, 10)
UYehova akakugqali njengento engabalulekanga ukubuyekeza ububele bakhe ngentiyo, yaye ngexesha lakhe elifanelekileyo, uya kuthabatha inyathelo kwakhona, kanye njengokuba wenzayo kumaxesha amandulo. (Thelekisa INdumiso 2:6-12.)—12/15, iphepha 10.
◻ Ziziphi iindlela athi amaKristu afumane ngazo uxolo?
Okokuqala, ‘anoxolo kuThixo ngayo iNkosi yawo uYesu Kristu.’ (Roma 5:1) Okwesibini, anoxolo phakathi kwawo ngokuhlakulela “ubulumko baphezulu,” bona “ukuqala bunyulu, buze bube boboxolo.” (Yakobi 3:17)—1/1, iphepha 11.
◻ Ziziphi ezinye zezinto elifaniswa nazo iLizwi likaThixo, yaye oku kungasinceda njani?
ILizwi likaThixo lifaniswa nobisi olondlayo, ukudla okuqinileyo, amanzi ahlaziyayo nacocayo, isipili kunye nekrele elibukhali. Ukukuqonda oko kuthethwa ngala mabinzana kuyamnceda umlungiseleli ukuba ayisebenzise ngobuchule iBhayibhile.—1/1, iphepha 29.
◻ Imfundo yehlabathi elungeleleneyo ifanele isincede ekwenzeni ntoni?
Ifanele isincede silese kakuhle, sibhale ngokucacileyo, sikhule ngokwengqondo nangokokuziphatha, yaye sizuze uqeqesho olusebenzisekayo kubomi bemihla ngemihla nakwinkonzo engcwele.—2/1, iphepha 10.
◻ Sisiphi isifundo esibalulekileyo esinokusifunda kuYesu ngokuphathelele imfundo?
Imfundo ifanele isetyenziselwe, kungekhona ukuzizukisa, kodwa ukudumisa uMfundisi omkhulu, uYehova uThixo. (Yohane 7:18)—2/1, iphepha 10.
◻ Buyintoni uBukumkani bukaThixo?
UBukumkani bungurhulumente wasezulwini osekwe nguThixo oya kwenza ukuthanda kukaThixo ukuze aphelise imiphumo yesono nokufa aze abuyisele iimeko ezilungileyo emhlabeni. (Daniyeli 2:44; ISityhilelo 11:15; 12:10)—2/1, iphepha 16.
◻ IBhayibhile iyinikela njani imfundo efunekayo ukuze kupheliswe ugonyamelo ngokusisigxina?
NgeLizwi lakhe, iBhayibhile, uYehova ufundisa abantu ukuba bathande uxolo yaye babe ngamalungisa. (Isaya 48:17, 18) ILizwi likaThixo linamandla okufikelela lize lichukumise intliziyo yomntu, liguqula indlela acinga nenza ngayo. (Hebhere 4:12)—2/15, iphepha 6.
◻ Kunokutshiwo njani ukuba isiprofeto esikuIsaya isahluko 35 sineenzaliseko ezintathu?
Isiprofeto sikaIsaya sazaliseka okokuqala xa amaYuda abuya ekuthinjweni eBhabhiloni ngowama-537 B.C.E. Sinenzaliseko eqhubekayo yokomoya namhlanje esusela ekukhululweni koSirayeli wokomoya ekuthinjweni yiBhabhiloni Enkulu. Yaye siya kuba nenzaliseko yesithathu ngokunxibelelene nesiqinisekiso seBhayibhile sokubuyiselwa kweparadisi yokoqobo emhlabeni. (INdumiso 37:10, 11; ISityhilelo 21:4, 5)—2/15, iphepha 17.
◻ Wabonakaliswa njani umdla kaThixo ebantwini kwimimangaliso eyenziwa nguNyana wakhe, uYesu?
Ekubeni uYesu ‘engenakwenza nto ngokwakhe, engathanga abone uYise eyenza,’ imfesane awayenayo ibonisa inkxalabo kaYehova enothando ngomkhonzi wakhe ngamnye. (Yohane 5:19)—3/1, iphepha 5.
◻ Lithetha ntoni ibinzana elithi ‘amangcwaba enkumbulo’ elasetyenziswa nguYesu kuYohane 5:28, 29?
Igama lesiGrike elithi mne·mei’on (ingcwaba lenkumbulo) elisetyenziswe apha libonisa ukuba uYehova uyazikhumbula iinkcukacha zaloo mntu ufileyo, kuquka utyekelo aluzuz’ ilifa nenkumbulo epheleleyo. Oku kusinika ubungqina obuqinisekileyo bokuba uThixo umkhathalele umntu ngamnye!—3/1, iphepha 6.
◻ Sisiphi isigidimi sesilumkiso esikwisiprofeto sikaZefaniya esiluncedo kuthi?
Eli asiloxesha lokuvumela amathandabuzo amile ezintliziyweni zethu nokuyikhupha ezingqondweni zethu imini kaYehova ezayo. Kwakhona, sifanele siyilumkele imiphumo edimazayo yokungakhathali. (Zefaniya 1:12, 13; 3:8)—3/1, iphepha 17.
◻ Kutheni ukunyaniseka kuThixo kulucelomngeni?
Kungenxa yokuba ukunyaniseka kuchasene notyekelo lokuzingca esiluzuz’ ilifa kubazali bethu. (Genesis 8:21; Roma 7:19) Okubaluleke nangaphezulu kukuba uSathana needemon zakhe bazimisele ukusenza singanyaniseki kuThixo. (Efese 6:12; 1 Petros 5:8)—3/15, iphepha 10.
◻ Ziziphi iinkalo ezine esimele sihlangabezane nocelomngeni lokunyaniseka kuzo, yaye yintoni eya kusinceda senjenjalo?
Iinkalo ezine kukunyaniseka kuYehova, kwintlangano yakhe, kwibandla nakumaqabane ethu omtshato. Enye into enokusinceda ukuze sihlangabezane nolu celomngeni kukuqonda ukuba ucelomngeni lokunyaniseka lunento yokwenza nokuthethelelwa kolongamo lukaYehova.—3/15, iphepha 20.
◻ Yintoni esinokuyifunda kumava kaDavide okuzama ukubuyisela ityeya yomnqophiso eYerusalem? (2 Samuweli 6:2-7)
UDavide wayityeshela imiyalelo awayeyinikwe nguYehova ngokuphathelele ukuthwalwa kweTyeya, ibe oko kwezisa intlekele. Oku kusifundisa ukuba asifanele sibeke ityala kuYehova ngeengxaki ezibakho xa sityeshela imiyalelo yakhe ecacileyo. (IMizekeliso 19:3)—4/1, iphepha 28, 29.