Imibuzo Evela Kubafundi

Wayethetha ukuthini umpostile uPawulos xa wayesithi ‘uyazilibala izinto ezingasemva aze olulele phambili kwizinto ezingaphambili’? (Filipi 3:13) Ngaba umntu unokuyilibala ngabom into ethile?

Akunjalo, kumaxesha amaninzi asinakuyikhupha ngabom inkumbulo esezingqondweni zethu. Eneneni ezona zinto sizilibalayo zizinto ebesingathanda ukuzikhumbula size sikhumbule izinto ezininzi ezingeyomfuneko. Ngoko wayesingisele entwenini uPawulos xa wayebhala la mazwi akweyabaseFilipi 3:13? Umongo uyasinceda ukuze siqonde.

KwabaseFilipi isahluko 3, uPawulos uchaza ‘izizathu zakhe zokuba nentembelo enyameni.’ Uthetha ngemvelaphi yakhe yokwenene yobuYuda nenzondelelo yakhe ngoMthetho—zinto ezo ezazinokumenza azuze iingenelo ezininzi kuhlanga lwakwaSirayeli. (Filipi 3:4-6; IZenzo 22:3-5) Sekunjalo, wazifulathela ezo ngenelo, ngokungathi kunjalo, ezigqala njengelahleko. Kwakutheni? Ngenxa yokuba wafumana into elunge ngakumbi—‘ixabiso eligqwesileyo lolwazi olungoKristu Yesu.’—Filipi 3:7, 8.

Usukelo oluphambili lukaPawulos yayikukufumana, kungekhona isikhundla esithile kweli hlabathi, kodwa “uvuko lwakuqala lwabafileyo.” (Filipi 3:11, 12) Ngaloo ndlela, wabhala: “Ndiyazilibala izinto ezingasemva ndize ndolulele phambili kwizinto ezingaphambili, ndisukela ibhaso lobizo lwaphezulu lukaThixo ngoKristu Yesu.” (Filipi 3:13, 14) Xa uPawulos wayesithi ‘uyazilibala izinto ezingasemva,’ wayengathethi kuthi ngandlel’ ithile wayezikhupha engqondweni yakhe “izinto ezingasemva.” Ngokuqinisekileyo wayesazikhumbula, ekubeni wayesandul’ ukuzichaza. Ukongezelela koko, kwisiGrike samandulo, usebenzisa uhlobo lwesenzi olubonisa into eqhubekayo, engekagqitywa. Uthi ‘uyazilibala,’ akathi “uzilibele.”

Igama lesiGrike eliguqulelwe ngokuthi “libala” (e·pi·lan·thaʹno·mai) lineentsingiselo ezingafaniyo, enye yazo “kukungaxhalabeli,” okanye “ukutyeshela.” Ngokutsho kweExegetical Dictionary of the New Testament (ebhalwe nguHorst Balz noGerhard Schneider), oku koko kuthethwa libinzana elithi “ndiyazilibala” elikwabaseFilipi 3:13. UPawulos wayengasoloko ecinga ngezinto awayezilahlile. Wayefunde ukuzijonga njengezinto ezingenamsebenzi. ‘Zazifana nenkunkuma eninzi’ xa zithelekiswa nethemba lokuya ezulwini.—Filipi 3:8.

Amazwi kaPawulos anokusebenza njani namhlanje? Kaloku, njengoPawulos, omnye umKristu, usenokuba uye wancama izinto ezithile ukuze akhonze uThixo. Usenokuba uye wancama umsebenzi onengeniso ukuze angenele inkonzo yexesha elizeleyo. Okanye usenokuba uphuma kwintsapho yezityebi eye yayeka ukumxhasa ngemali ngenxa yokuchasa inyaniso. Ukuzincama okunjalo kuyancomeka, kodwa akuyonto esinokusoloko sicinga ngayo. UmKristu ‘uyalibala,’ ayeke ukuzikhathaza, ‘ngezinto ezingasemva’ ngenxa yekamva elizukileyo elingaphambili.—Luka 9:62.

Umgaqo asekelwe kuwo amazwi kaPawulos mhlawumbi unokusetyenziswa ngenye indlela. Kuthekani ngomKristu oye wabandakanyeka kwihambo ephosakeleyo ngaphambi kokufunda ngoThixo? (Kolose 3:5-7) Okanye masithi emva kokuba ngumKristu, uye wenza isono esinzulu waza wohlwaywa libandla. (2 Korinte 7:8-13; Yakobi 5:15-20) Kaloku, ukuba uguquke ngokwenene waza watshintsha iindlela zakhe, ‘uhlanjiwe wahlambuluka.’ (1 Korinte 6:9-11) Okwenzekileyo kudlule. Usenokungayilibali ncam into awayenzayo—kakade ke, bekuya kuba bubulumko ukufunda kumava ukuze angasenzi eso sono kwakhona. Sekunjalo, ‘uyalibala’ ngengqiqo yokungasoloko ezigweba. (Thelekisa uIsaya 65:17.) Akuba exolelwe ngesizinzi sedini likaYesu, uzabalazela ukungasoloko ezixhalabisa ngokwenzeke kwixesha elidluleyo.

KwabaseFilipi 3:13, 14, uPawulos uzichaza njengembaleki ebaleka ugqatso, ‘eyolulela phambili’ ukuze afikelele usukelo lwakhe. Imbaleki ikhangela phambili, kungekhona ngasemva. Ngokufanayo, umKristu ufanele akhangele phambili kwiintsikelelo ezizayo, angakhangeli kwizinto ezisemva. Kwakhona uPawulos uthi: “Ukuba ngokwengqondo nityekele ngenye indlela nakuyiphi na inkalo, uThixo uya kunityhilela esi simo sengqondo singasentla.” (Filipi 3:15) Ngenxa yoko, thandaza kuThixo ukuba akuncede uhlakulele le mbono. Zalisa ingqondo yakho ngeengcamango zikaThixo ezifumaneka eBhayibhileni. (Filipi 4:6-9) Camngca ngothando uYehova alubonakalise kuwe nangeentsikelelo ozinandiphayo ngenxa yalo. (1 Yohane 4:9, 10, 17-19) Esebenzisa umoya wakhe oyingcwele, uYehova uya kwandula akuncede ukuze ungaxhalatyiswa zizinto ozishiye ngasemva. Kunoko, njengoPawulos, uya kukhangela kwikamva elizukileyo elingaphambili.—Filipi 3:17.