Ukubuyisela Izinto ZikaKesare KuKesare
“Nika bonke oko kubafaneleyo.”—ROMA 13:7.
1, 2. (a) Ngokutsho kukaYesu, amaKristu afanele azilungelelanise njani izinto ezifunwa nguThixo nanguKesare kuwo? (b) Yintoni ngokuyintloko ayixhalabeleyo amaNgqina kaYehova?
NGOKUTSHO kukaYesu, kukho izinto esifanele sizibuyisele kuThixo nezinto esifanele sizibuyisele kuKesare, okanye uRhulumente. UYesu wathi: “Buyiselani izinto zikaKesare kuKesare, kodwa izinto zikaThixo kuThixo.” Ngala mazwi ambalwa, wazixakanisa iintshaba zakhe waza wasishwankathela kakuhle isimo sengqondo esilungeleleneyo solwalamano lwethu noThixo neenkqubano zethu noRhulumente. Akumangalisi ngoko ukuba abaphulaphuli bakhe “baqalisa ukumangaliswa nguye”!—Marko 12:17.
2 Kakade ke, abakhonzi bakaYehova ngokuyintloko baxhalabele ukubuyisela izinto zikaThixo kuThixo. (INdumiso 116:12-14) Noko ke, xa besenjenjalo, abalibali ukuba uYesu wathi bamele banikele izinto ezithile kuKesare. Isazela sabo esiqeqeshwe ngeBhayibhile sifuna bawucingisise ngomthandazo umlinganiselo abanokuzibuyisela ngawo izinto ezifunwa nguKesare. (Roma 13:7) Kule mihla, abagwebi abaninzi bayaqonda ukuba igunya likarhulumente linemida kwanokuba abantu noorhulumente balawulwa ngumthetho wemvelo.
3, 4. Ngawaphi amagqabaza abangel’ umdla aye athethwa ngomthetho wemvelo, umthetho otyhiliweyo nomthetho womntu?
3 Umpostile uPawulos wabhekisela kulo mthetho wemvelo xa wabhala wathi ngabantu behlabathi: “Oko kunokwaziwa ngoThixo kuyabonakala phakathi kwabo, kuba uThixo ukwenze kwabonakala kubo. Kuba iimpawu zakhe ezingabonakaliyo zibonwa ngokucacileyo ukususela ekudalweni kwehlabathi kuse phambili, ngenxa yokuba ziqondeka ngezinto ezenziweyo, kwanamandla angunaphakade nobuThixo bakhe, khon’ ukuze bangabi nakungxengxezeleka.” Ukuba bebenokusabela kuwo, umthetho wemvelo ubunokude uzichukumise izazela zabo bangakholwayo. Ngoko, uPawulos wongezelela ngelithi: “Xa sukuba abantu beentlanga abangenawo umthetho besenza ngemvelo izinto zomthetho, aba bantu, nangona bengenawo umthetho, bangumthetho kubo ngokwabo. Ngabo kanye ababonakalisa umbandela womthetho ubhalwe ezintliziyweni zabo, ngoxa isazela sabo singqinelana nabo.”—Roma 1:19, 20; 2:14, 15.
4 Ngenkulungwane ye-18, umgwebi odumileyo oliNgesi uWilliam Blackstone wabhala: “Lo mthetho wemvelo, owabakho ukususela ekudalweni komntu [uyalingana ngeminyaka naye] nowayilwa nguThixo, ugqwesa nawuphi na omnye ngegunya. Ulawula ihlabathi liphela, kuwo onke amazwe, yaye maxa onke: imithetho yomntu ayinagunya, xa ithelekiswa nawo.” UBlackstone wahlabela mgama ethetha ‘ngomthetho otyhiliweyo,’ ofumaneka eBhayibhileni, yaye wagqabaza esithi: “Yonke imithetho yabantu, ixhomekeke kwiziseko ezimbini, umthetho wemvelo nomthetho otyhiliweyo; oko kukuthi, imithetho yomntu ayifanele iyekwe [ivunyelwe] ukuba iphikisane nale mibini.” Oku kuvisisana noko kwathethwa nguYesu ngoThixo noKesare, njengoko kubhaliwe kuMarko 12:17. Kubonakala ukuba kwimimandla ethile uThixo ukumisele imida oko uKesare anokukufuna kumKristu. ISanhedrin yadlulela kanye kummandla onjalo xa yayalela abapostile ukuba bayeke ukushumayela ngoYesu. Ngoko, abapostile basabela ngokufanelekileyo bathi: “Simele sithobele uThixo njengomphathi kunabantu.”—IZenzo 5:28, 29.
“Izinto ZikaThixo”
5, 6. (a) Ngenxa yokuzalwa koBukumkani ngowe-1914, yintoni afanele ahlale eyikhumbula amaKristu? (b) UmKristu unokukungqina njani ukuba ungumlungiseleli?
5 Ngokukodwa ukususela ngowe-1914, xa uYehova uThixo, uSomandla, waqalisa ukulawula njengokumkani esebenzisa uBukumkani bukaKristu uMesiya, amaKristu kwafuneka aqiniseke ukuba akanikeli izinto zikaThixo kuKesare. (ISityhilelo 11:15, 17) Kunanini na ngaphambili, umthetho kaThixo ngoku ufuna ukuba amaKristu ‘angabi yonxalenye yehlabathi.’ (Yohane 17:16) Ekubeni ezahlulela kuThixo, uMniki-Bomi wawo, amele akubonakalise ngokucacileyo ukuba akasaphileli iziqu zawo. (INdumiso 100:2, 3) Njengoko uPawulos wabhalayo, “singabakaYehova.” (Roma 14:8) Ukongezelela, xa umKristu ebhaptizwa, umiselwa njengomlungiseleli kaThixo, ukuze njengoPawulos akwazi ukuthi: “UThixo . . . eneneni wasenza sakufanelekela ngokwaneleyo ukuba ngabalungiseleli.”—2 Korinte 3:5, 6.
6 Kwakhona umpostile uPawulos wabhala: “Ndiyabuzukisa ubulungiseleli bam.” (Roma 11:13) Ngokuqinisekileyo nathi sifanele senze okufanayo. Enoba sinenxalenye kubulungiseleli bexesha elizeleyo okanye akunjalo, siyazi ukuba ubulungiseleli bethu sibabelwe nguYehova. (2 Korinte 2:17) Ekubeni abathile besenokukuthandabuza ukuma kwethu, wonke umKristu ozahluleleyo waza wabhaptizwa, umele akulungele ukunikela ubungqina obucacileyo nobeyisayo bokuba ungumlungiseleli weendaba ezilungileyo ngenene. (1 Petros 3:15) Ubulungiseleli bakhe bufanele bungqinelwe nayihambo yakhe. Njengomlungiseleli kaThixo, umKristu ufanele akhuthaze aze aphile ngemilinganiselo ecocekileyo, aqinise umanyano lwentsapho yakhe, anyaniseke yaye awuhlonele umthetho nocwangco. (Roma 12:17, 18; 1 Tesalonika 5:15) Ulwalamano lomKristu noThixo nobulungiseleli bakhe ababelwe nguye zezona zinto zibalulekileyo ebomini bakhe. Akanakuziyeka ezi zinto ngokuyalelwa nguKesare. Kucacile ukuba, zimele zibalelwe phakathi ‘kwezinto zikaThixo.’
“Izinto ZikaKesare”
7. AmaNgqina kaYehova adume njani ngokuphathelele ukuhlawula iirhafu?
7 AmaNgqina kaYehova ayazi ukuba afanele “athobele amagunya awongamileyo,” abalawuli abangoorhulumente. (Roma 13:1) Ngoko, xa uKesare, uRhulumente, efuna into ethile efanelekileyo, izazela zawo eziqeqeshwe ngeBhayibhile ziyawavumela ukuba akwenze oko kufunwayo. Ngokomzekelo, amaKristu okwenyaniso aphakathi kwabona bantu bayimizekelo ekuhlawuleni irhafu emhlabeni. Iphephandaba laseJamani iMünchner Merkur lathi ngamaNgqina kaYehova: “Angabona bahlawuli berhafu banyanisekileyo nabayihlawula ngexesha kule Federal Republic.” Iphephandaba laseItali iLa Stampa lathi: “[AmaNgqina kaYehova] angabona bemi banyanisekileyo nabani na anokubanqwenela: akakuphephi ukuhlawula iirhafu okanye azame ukuphepha imithetho enzima ukuze alungelwe.” Abakhonzi bakaYehova benjenjalo ‘ngenxa yezazela zabo.’—Roma 13:5, 6.
8. Ngaba yirhafu kuphela esifanele siyibuyisele kuKesare?
8 Ngaba “izinto zikaKesare” kukuhlawulwa kwerhafu kuphela? Akunjalo. UPawulos wadwelisa nezinye izinto, ezinjengoloyiko nembeko. Kwincwadi yakhe ethi Critical and Exegetical Hand-Book to the Gospel of Matthew, umphengululi ongumJamani uHeinrich Meyer wabhala: “Xa kuthethwa [ngezinto zikaKesare] . . . asifanele sicinge ngerhafu kuphela, kodwa nangazo zonke izinto zikaKesare ngokuvisisana nolawulo lwakhe olufanelekileyo.” Umbhali-mbali uE. W. Barnes, kwincwadi yakhe ethi The Rise of Christianity, wathi umKristu uyazihlawula iirhafu zakhe aze “ngokufanayo azamkele nezinye izinto alindele ukuba azenze uRhulumente, lo gama nje engamyaleli ukuba anikele izinto zikaThixo kuKesare.”
9, 10. Ngawaphi amathandabuzo asenokuba nawo umKristu ngokubuyisela izinto kuKesare, kodwa ziziphi izibakala ezifanele zikhunjulwe?
9 Ziintoni ezinokufunwa nguRhulumente ezingazichaphazeliyo izinto zikaThixo? Bambi baye banemvo yokuba kufanelekile ukuba bamnike imali uKesare ngokuhlawula iirhafu kodwa kuphelele apho. Ngokuqinisekileyo abayi kuziva bekhululekile ukunika uKesare nantoni na esenokuthabatha ixesha ebelinokusetyenziswa kwizinto zobuthixo. Noko ke, nakuba liyinene elokuba sifanele ‘simthande uYehova uThixo wethu ngentliziyo, ngomphefumlo, ngengqondo nangamandla ethu ephela,’ uYehova ulindele ukuba sichithe ixesha kwizinto ezingeyonxalenye yenkonzo yethu engcwele. (Marko 12:30; Filipi 3:3) Ngokomzekelo, umKristu otshatileyo ululekwa ukuba achithe ixesha ekholisa iqabane lakhe lomtshato. Izinto ezinjalo aziphosakelanga, kodwa umpostile uPawulos uthi ‘zizinto zehlabathi’ kungekhona “izinto zeNkosi.”—1 Korinte 7:32-34; thelekisa eyoku-1 kuTimoti 5:8.
10 Ngaphezu koko, uKristu wayalela abafundi bakhe ukuba ‘babuyisele’ iirhafu, yaye ngokuqinisekileyo oku kuquka ukusebenzisa ixesha elinikelwe kuYehova—ekubeni ubomi bethu buphela sibahlulele kuye. Ukuba irhafu yelizwe elithile imalunga nama-33 ekhulwini yengeniso kabani (ingaphezulu kwamanye amazwe), oku kuthetha ukuba nyaka ngamnye umsebenzi oqhelekileyo uhlawula imivuzo yeenyanga ezine kwiNgxowa-mali kaRhulumente. Ngamanye amazwi, xa eyeka ukusebenza, uya kube echitha iminyaka eli-15 esebenzela imali yerhafu efunwa ‘nguKesare.’ Kwakhona, cinga ngombandela wemfundo. Kumazwe amaninzi umthetho uthi abazali bafanele bafundise abantwana babo kangangeminyaka ethile. Iminyaka yokuhamb’ isikolo iyahlukahlukana ngokwamazwe ngamazwe. Kwiindawo ezininzi iba lixesha elide kakhulu. Liyinene elokuba, ukuhamba isikolo ngokufuthi kuyingenelo, kodwa nguKesare ogqibayo enoba imele ibe ngakanani inxalenye yobomi bomntwana echithwa ngale ndlela, yaye abazali abangamaKristu bayasebenzisana nesigqibo sikaKesare.
Inkonzo Yasemkhosini Esisinyanzelo
11, 12. (a) Yintoni aye ayifune uKesare kumazwe amaninzi? (b) AmaKristu okuqala ayeyigqala njani inkonzo yasemkhosini?
11 Kwamanye amazwe uKesare uye afune ukunyanzelisa inkonzo yasemkhosini. Kule nkulungwane yama-20, oku bekuqheliselwa yinkoliso yamazwe ngamaxesha emfazwe yaye kwamanye nangamaxesha oxolo. Kangangeminyaka emininzi le nkonzo ibibizwa ngokuba yirhafu yegazi eFransi, okuthetha ukuba bonke abafana bebefanele bakulungele ukuncama ubomi babo ngenxa kaRhulumente. Ngaba abo bazahlulele kuYehova bafanele bakwenze oku? AmaKristu enkulungwane yokuqala ayewugqala njani lo mbandela?
12 Ngoxa amaKristu okuqala ayezabalazela ukuba ngabemi abalungileyo, ukholo lwawo lwaluwathintela ekubulaleni okanye ekubuncameleni uRhulumente ubomi bawo. IThe Encyclopedia of Religion ithi: “Abaseki becawa bokuqala, kuquka uTertullian no-Origen, bavuma ukuba amaKristu akafanele ambulale omnye umntu, mgaqo lowo owawathintelayo ekubeni athelele umkhosi wamaRoma.” Kwincwadi yakhe ethi The Early Church and the World, uNjingalwazi C. J. Cadoux ubhala oku: “Ubuncinane ukuza kuthi ga kulawulo lukaMarcus Aurelius [161-180 C.E.], akukho mKristu owayeba lijoni emva kokuba ebhaptiziwe naphantsi kwaziphi na iimeko.”
13. Kutheni inkoliso yamalungu eNgqobhoko ingayigqali njengamaKristu okuqala inkonzo yasemkhosini?
13 Kutheni amalungu eecawa zeNgqobhoko engazijongi ngolu hlobo izinto namhlanje? Kungenxa yotshintsho olukhulu olwenzeka kwinkulungwane yesine. Incwadi yamaKatolika ethi A History of the Christian Councils iyachaza: “AmaKristu amaninzi, . . . awayengaphantsi kwabalawuli abangabahedeni, ayenemigaqo yonqulo ephathelele inkonzo yasemkhosini, yaye ayesala ngokupheleleyo ukuthabatha izixhobo, okanye kungenjalo ayesuka aqhweshe. Xa iBhunga [laseArles, lama-314 C.E.], lalihlolisisa iinguqulelo ezazifike noConstantine, lamisela umthetho wokuba amaKristu amele aye emfazweni, . . . ngenxa yokuba iCawa iseluxolweni (in pace) ngaphantsi kwenkosana eye yabamkela ubuKristu.” Ngenxa yoku kulahlwa kweemfundiso zikaYesu, ukususela ngelo xesha ukuza kuthi ga ngoku, abefundisi beNgqobhoko bebekhuthaza imihlambi yabo ukuba isebenze emkhosini, nangona bambi baye bakuchasa ngokupheleleyo oko.
14, 15. (a) Kwezinye iindawo amaKristu anokukucela ngokwasiphi isizinzi ukukhululwa kwinkonzo yasemkhosini? (b) Kwiindawo angakhululwayo kuzo kuloo nkonzo, yiyiphi imigaqo yeZibhalo eya kunceda umKristu enze isigqibo esifanelekileyo kumbandela wenkonzo yasemkhosini?
14 Ngaba amaKristu anamhlanje anyanzelekile ukuba alandele isininzi kulo mbandela? Akunjalo. Ukuba umKristu ozahluleleyo waza wabhaptizwa uhlala kwilizwe abakhululwayo kwinkonzo yasemkhosini abalungiseleli bonqulo, usenokulixhakamfula eli lungiselelo, kuba eneneni ungumlungiseleli. (2 Timoti 4:5) Amazwe aliqela, kuquka iUnited States neOstreliya, ayabakhulula abalungiseleli kwanangexesha lemfazwe. Ebudeni bexesha loxolo, kumazwe amaninzi ayinyanzelisayo inkonzo yasemkhosini, amaNgqina kaYehova, njengabalungiseleli bonqulo, ayakhululwa kuloo nkonzo. Ngoko anokuqhubeka enceda abantu ngenkonzo yawo kawonke wonke.
15 Noko ke, kuthekani ukuba umKristu uphila kwilizwe abangakhululwayo kwinkonzo yasemkhosini abalungiseleli bonqulo? Ngoko kuya kufuneka enze isigqibo sobuqu ngokuvisisana nesazela sakhe esiqeqeshwe ngeBhayibhile. (Galati 6:5) Ngoxa ecinga nangegunya likaKesare, uya kucinga nzulu ngoko afanele akunikele kuYehova. (INdumiso 36:9; 116:12-14; IZenzo 17:28) Loo mKristu uya kukhumbula ukuba uphawu lomKristu wokwenyaniso kukuba nothando ngawo onke amanye amakholwa, kwanalawo aphila kwamanye amazwe okanye lawo ezinye izizwe. (Yohane 13:34, 35; 1 Petros 2:17) Ngokubhekele phaya, akasayi kuyilibala imigaqo yeZibhalo efumaneka kwizibhalo ezinjengoIsaya 2:2-4; uMateyu 26:52; amaRoma 12:18; 14:19; 2 Korinte 10:4; namaHebhere 12:14.
Inkonzo Yakwarhulumente
16. Kwamanye amazwe, ziziphi iinkonzo ezingezizo ezomkhosi azifunayo uKesare kwabangayamkeliyo inkonzo yasemkhosini?
16 Noko ke, kukho amazwe apho uRhulumente, ngoxa engabakhululi abalungiseleli bonqulo, sekunjalo akwamkele ukuba bambi abantu basenokungayifuni inkonzo yasemkhosini. Inkoliso yala mazwe yenza ilungiselelo lokuba abantu abanemigaqo enjalo banganyanzeliswa ngenkonzo yasemkhosini. Kwezinye iindawo inkonzo yakwarhulumente, enjengomsebenzi oluncedo ekuhlaleni, igqalwa njengenkonzo yesizwe engenanto yakwenza nezomkhosi. Ngaba umKristu ozahluleleyo angayamkela inkonzo enjalo? Nalapha, kuya kufuneka ukuba umKristu ozahluleleyo waza wabhaptizwa enze isigqibo sobuqu ngokusekelwe kwisazela sakhe esiqeqeshwe ngeBhayibhile.
17. Ngaba zazikho iinkonzo zakwarhulumente ezingezizo ezomkhosi kumaxesha okubhalwa kweBhayibhile?
17 Kubonakala ukuba inkonzo esisinyanzelo yayikho nangamaxesha okubhalwa kweBhayibhile. Enye incwadi yembali ithi: “Ukongezelela kwiirhafu nemali eyayifunwa kubemi bakwaYuda, kwakukho i-corvée [umsebenzi wabasemagunyeni ongahlawulelwayo]. Oku kwakusisithethe samandulo eMpuma, esaqhubekayo nangexesha lolawulo lwamaGrike namaRoma. . . . Kwakhona, iTestamente Entsha, icaphula imizekelo ye-corvée kwaYuda, nto leyo ebonisa indlela eyayixhaphake ngayo. Ngokuvisisana nesi sithethe, amajoni anyanzela uSimon waseKirene ukuba athwale umnqamlezo [isibonda sentuthumbo] kaYesu (Mateyu 5:41; 27:32; Marko 15:21; Luka 23:26).”
18. Ziziphi iinkonzo eziluncedo ekuhlaleni ezingenanto yakwenza nomkhosi nonqulo ngokufuthi azenzayo amaNgqina kaYehova?
18 Ngokufanayo namhlanje, kwamanye amazwe uRhulumente okanye amagunya asekuhlaleni aye afune ukuba abemi benze iinkonzo zasekuhlaleni ezahlukahlukeneyo. Maxa wambi oku kwenziwa xa kukho umsebenzi okhethekileyo, njengokumba amadama okanye ukwakha iindlela; maxa wambi kube yinto eyenziwa rhoqo, njengokucoca iindlela, izikolo okanye izibhedlele iiveki ngeeveki. Xa ezo nkonzo zakwarhulumente ziluncedo ekuhlaleni yaye zingenanto yakwenza nonqulo lobuxoki okanye zingaphikisani nangayiphi na indlela nezazela zamaNgqina kaYehova, ngokufuthi ayavuma ukuziphumeza. (1 Petros 2:13-15) Ngokufuthi oku kuye kwakhokelela ekunikelweni kobungqina obuphumelelayo yaye maxa wambi kuye kwabaval’ imilomo abo batyhola amaNgqina ngokuba nxamnye norhulumente.—Thelekisa uMateyu 10:18.
19. UmKristu ufanele enze ntoni xa uKesare esithi makaphumeze inkonzo yesizwe engenanto yakwenza nomkhosi kangangexesha elithile?
19 Noko ke, kuthekani ukuba uRhulumente ufuna ukuba umKristu achithe ixesha elithile kwinkonzo yakwarhulumente eyinxalenye yenkonzo yesizwe engalawulwa ngabezomkhosi? Nalapha amaKristu amele azenzele izigqibo ngokusekelwe kwizazela zawo eziqeqeshiweyo. “Sonke siya kuma phambi kwesihlalo sokugweba sikaThixo.” (Roma 14:10) AmaKristu afanele awuhlolisise loo mbandela ngomthandazo aze acamngce ngezinto uKesare azifunayo kuwo.a Kwakhona kusenokuba bubulumko ukuthetha ngezinto ezinjalo namaKristu akhulileyo ebandleni. Emva koko umele azenzele isigqibo sobuqu.—IMizekeliso 2:1-5; Filipi 4:5.
20. Yiyiphi imibuzo nemigaqo yeZibhalo enokunceda umKristu aqiqe ngombandela wenkonzo yesizwe yakwarhulumente engenanto yakwenza nezomkhosi?
20 Ngoxa esenza olo phando, amaKristu aya kucinga ngemigaqo yeBhayibhile eliqela. UPawulos wathi simele ‘sithobele oorhulumente namagunya njengabaphathi, silungele wonke umsebenzi olungileyo, sibe ngabanengqiqo, sibonise ubulali bonke kubantu bonke.’ (Tito 3:1, 2) Kwangaxeshanye, amaKristu ebeya kwenza kakuhle ukuwuhlolisisa umsebenzi wakwarhulumente ekuthiwa makawenze. Ukuba ayawamkela, ngaba aya kukwazi ukuhlala engoondilele njengamaKristu? (Mika 4:3, 5; Yohane 17:16) Ngaba uya kuwabandakanya nonqulo lobuxoki oluthile? (ISityhilelo 18:4, 20, 21) Ngaba ukuwenza kuya kuwathintela okanye kuwenze angabi naxesha laneleyo lokunyamekela iimbopheleleko zawo njengamaKristu? (Mateyu 24:14; Hebrews 10:24, 25) Kwelinye icala, ngaba aya kukwazi ukuqhubeka esenza inkqubela ngokomoya, mhlawumbi ade abe nenxaxheba kubulungiseleli bexesha elizeleyo ngoxa ephumeza loo nkonzo ifunwayo?—Hebhere 6:11, 12.
21. Enoba ugqibe entwenini, ibandla lifanele limgqale njani umzalwana obesingatha umbandela wenkonzo yesizwe yakwarhulumente engenanto yakwenza nezomkhosi?
21 Kuthekani ukuba iimpendulo azifune ngokunyanisekileyo umKristu kule mibuzo zimfikisa kwisigqibo sokuba inkonzo yesizwe yakwarhulumente ‘ngumsebenzi olungileyo’ anokuwenza ethobela amagunya? Eso sisigqibo asenzileyo phambi koYehova. Abadala abamiselweyo nabanye bafanele basihlonele ngokupheleleyo isazela saloo mzalwana yaye baqhubeke bemgqala njengomKristu onokuma okuhle. Noko ke, ukuba umKristu uvakalelwa kukuba akanakuyenza loo nkonzo yakwarhulumente, ukuma kwakhe nako kufanele kuhlonelwe. Naye uya kuhlala enokuma okuhle yaye ufanele axhaswe ngokunothando.—1 Korinte 10:29; 2 Korinte 1:24; 1 Petros 3:16.
22. Enoba sijamelene nayiphi na imeko, yintoni esiya kuqhubeka siyenza?
22 NjengamaKristu asisayi kuyeka ukunikela ‘kulowo kufuneka imbeko kuye, imbeko leyo.’ (Roma 13:7) Siya kuluhlonela ucwangco oluhle yaye sifune ukuba ngabemi abanoxolo nabathobel’ umthetho. (INdumiso 34:14) Sisenokude sithandaze “ngokuphathelele ookumkani nabo bonke abo bakwizikhundla eziphakamileyo” xa kufuneka loo madoda enze izigqibo ezichaphazela ubomi nomsebenzi wethu njengamaKristu. Ngenxa yokubuyisela kwethu izinto zikaKesare kuKesare, sithemba ukuba ‘soqhubeka siphila ubomi bokuzola noboxolo ngozinikelo lobuthixo nokundileka okuzeleyo.’ (1 Timoti 2:1, 2) Ngaphezu kwako konke oko, siya kuqhubeka sizishumayela iindaba ezilungileyo zoBukumkani njengobukuphela kwethemba loluntu, sibuyisele izinto zikaThixo kuThixo ngokunyanisekileyo.
[Umbhalo osemazantsi]
a Bona IThe Watchtower kaMeyi 15, 1964, iphepha 308, isiqendu 21.
Ngaba Ungacacisa?
◻ Xa elungelelanisa ulwalamano lwakhe noKesare noYehova, yintoni ngokuyintloko ayixhalabeleyo umKristu?
◻ Yintoni esifanele siyibuyisele kuYehova nesingenakuze siyinike uKesare?
◻ Ziintoni ekufanelekileyo ukuba sizibuyisele kuKesare?
◻ Ziziphi izibhalo ezisincedayo senze isigqibo esifanelekileyo kumbandela wenkonzo yasemkhosini esisinyanzelo?
◻ Ziintoni esifanele sizikhumbule ukuba sibizelwa inkonzo yesizwe yakwarhulumente engenanto yakwenza nezomkhosi?
◻ Ngokuphathelele uYehova noKesare, yintoni esiqhubeka siyenza?
[Umfanekiso okwiphepha 16, 17]
Abapostile bayixelela oku iSanhedrin: “Simele sithobele uThixo njengomphathi kunabantu”