Funda ILizwi LikaThixo Uze Umnqule Ngenyaniso
“Ndiyalele, Yehova, indlela yakho, ndihambe ngenyaniso yakho.”—INDUMISO 86:11.
1. Ngokusisiseko, yathini inkupho yokuqala yeli phephancwadi ngenyaniso?
UYEHOVA ngumthombo wokukhanya nenyaniso. (INdumiso 43:3) Kwakhona usinike ubuchule bokufunda iLizwi lakhe, iBhayibhile, size sifunde inyaniso. Inkupho yokuqala yalo lindixesha—Julayi 1879—yathi: “Inyaniso, ifana nentyatyambo encinane ekwithafa elikhulu, engqongwe yaye ephantse iminxwe lukhula oluninzi lobuxoki. Ukuze uyifumane umele uhlale uphaphile. Ukuze ububone ubuhle bayo umele uluncothule ukhula lobuxoki nameva alikratshi. Ukuba uyayifuna ufanele wenze umgudu. Musa ukwanela kukufumana intyatyambo enye yenyaniso. Ukuba bekwanele ukufumana enye ngezingekho ezinye. Hlala uziqokelela, funa ezingakumbi.” Ukufunda nokufundisisa iLizwi likaThixo kusenza sifumane ulwazi oluchanileyo size sihambe enyanisweni yakhe.—INdumiso 86:11.
2. Waba yintoni umphumo xa uEzra nabanye bawufunda uMthetho kaThixo kwiYerusalem yamandulo phambi kwamaYuda?
2 Emva kokuba ziphinde zakhiwa iindonga zaseYerusalem ngowama-455 B.C.E., umbingeleli uEzra nabanye bawufunda uMthetho kaThixo phambi kwamaYuda. Oku kwalandelwa nguMthendeleko wemiNquba owawusisihlandlo sovuyo, ukuvunywa kwezono, kwaza kwaqukunjelwa ‘ngomnqophiso wenene.’ (Nehemiya 8:1–9:38) Sifunda oku: “Balesa encwadini, emyalelweni kaThixo, ngokucacileyo, beqononondisa; bakuqonda ke ukulesa oku.” (Nehemiya 8:8) Bambi bathi amaYuda ayengasiqondi kakuhle isiHebhere kwanokuba kwakushwankathelwa ngesiAramiki. Kodwa esi sibhalo asibalaselisi ukuchazwa kwamabinzana angaqondakaliyo olwimi kuphela. UEzra nabanye bawucacisa uMthetho ukuze abantu bayiqonde imigaqo yawo baze bayisebenzise. Iimpapasho neentlanganiso zamaKristu zikwaluncedo ‘ekuqononondiseni’ iLizwi likaThixo. Kukwanjalo nangabadala abamiselweyo, ‘abakufanelekelayo ukufundisa.’—1 Timoti 3:1, 2; 2 Timoti 2:24.
Iingenelo Ezihlala Zihleli
3. Ziziphi ezinye zeengenelo zokufunda iBhayibhile?
3 Xa iintsapho zamaKristu ziyifunda kunye iBhayibhile, zinokufumana iingenelo ezihlala zihleli. Ziye ziyazi imithetho kaThixo zize zifunde inyaniso ngeemfundiso, iziprofeto neminye imibandela. Emva kokufundwa kwenxalenye ethile yeBhayibhile, intloko-ntsapho isenokubuza: Kufanele kusichaphazele njani oku? Oku kuhlobene njani nezinye iimfundiso zeBhayibhile? Sinokuzisebenzisa njani ezi ngongoma xa sishumayela iindaba ezilungileyo? Intsapho ifumana ulwazi olungakumbi ukuba yenza uphando isebenzisa iWatch Tower Publications Index okanye ezinye ii-index xa ifunda iBhayibhile. Kunokuba yingenelo nokusebenzisa imiqulu emibini yeInsight on the Scriptures.
4. UYoshuwa wayefanele awusebenzise njani umyalelo obhalwe kuYoshuwa 1:8?
4 Imigaqo esiyifumana eZibhalweni inokusikhokelela ebomini. Ngaphezu koko, ukufunda nokufundisisa ‘imibhalo engcwele kunokusenza sibe nobulumko obusa elusindisweni.’ (2 Timoti 3:15) Ukuba siyalwamkela ukhokelo lweLizwi likaThixo, siya kuhlala sihamba enyanisweni yakhe yaye iminqweno yethu yobulungisa iya kuzaliseka. (INdumiso 26:3; 119:130) Noko ke, kufuneka sifune ukuqonda, njengoko wenzayo uYoshuwa, ilandela likaMoses. ‘Incwadi yomyalelo’ yayingafanele isuke emlonyeni wakhe, yaye wayefanele ayifunde imini nobusuku. (Yoshuwa 1:8) Ukungayivumeli isuke emlonyeni wakhe ‘incwadi yomyalelo’ kwakuthetha ukuba uYoshuwa wayengafanele ayeke ukuxelela abanye ngokhanyo elunikelayo. Ukuwufunda imini nobusuku loo Mthetho kwakuthetha ukuba uYoshuwa wayefanele acamngce ngawo, awufundisise. Ngokufanayo umpostile uPawulos wabongoza uTimoti ukuba ‘ayiphonononge’—acamngce—ngehambo yakhe, ubulungiseleli nemfundiso yakhe. Njengomdala ongumKristu, uTimoti wayefanele akuphaphele ngokukhethekileyo ukuba ubomi bakhe bube ngumzekelo kwanokuba afundise inyaniso yeZibhalo.—1 Timoti 4:15.
5. Yintoni efunekayo ukuze sifumane inyaniso engoThixo?
5 Inyaniso kaThixo bubutyebi obungathethekiyo. Ukuze uyifumane kufuneka umbe, uqhubeke uziphengulula iZibhalo. Kanye njengabafundi abaselula boMyaleli Ozukileyo sifumana ubulumko yaye siyaluqonda uloyiko oluqhutywa yintlonelo ngoYehova. (IMizekeliso 1:7; Isaya 30:20, 21) Kakade ke, izinto sifanele sizingqine ngokusuka eZibhalweni. (1 Petros 2:1, 2) AmaYuda aseBhereya ‘ayechubeke ngakumbi kunabo baseTesalonika, kuba alamkela ilizwi ngeyona ntumekelelo inkulu yengqondo, ezincina ngenyameko iZibhalo mihla le mayela nokuba zazinjalo kusini na izinto [ezazithethwa nguPawulos].’ Wawancoma amaBhereya ngokwenjenjalo kunokuba awagxeke.—IZenzo 17:10, 11.
6. Kwakutheni ukuze uYesu abonise ukuba kwakuyinkcitha-xesha ngamanye amaYuda ukuphengulula iZibhalo?
6 UYesu wawaxelela oku amanye amaYuda: “Niyaziphengulula iZibhalo, ngenxa yokuba nicinga ukuba ngazo niya kuba nobomi obungunaphakade; yaye zona zizo kanye ezinikela ubungqina ngam. Ukanti anifuni kuza kum ukuze nibe nobomi.” (Yohane 5:39, 40) Ayenenjongo efanelekileyo yokuziphengulula iZibhalo—ukuze ziwakhokelele ebomini. Eneneni, iZibhalo ziqulethe iziprofeto ezingoMesiya ezalatha kuYesu njengendlela yobomi. Kodwa amaYuda amchasa. Ngoko ke ukuphengulula kwawo iZibhalo akuzange kuwancede.
7. Yintoni efunekayo ukuze siyazi ngakumbi iBhayibhile, yaye ngoba?
7 Ukuze siyiqonde ngakumbi iBhayibhile, kufuneka sikhokelwe ngumoya kaThixo, okanye amandla akhe asebenzayo. “Umoya uphengulula ezintweni zonke, kwanezinto ezinkulu zikaThixo” ukuze uyichaze intsingiselo yazo. (1 Korinte 2:10) AmaKristu aseTesalonika ayefanele ‘aqiniseke ngezinto zonke’ eziphathelele iziprofeto azivileyo. (1 Tesalonika 5:20, 21) Xa uPawulos wayebhalela amaKristu aseTesalonika (malunga nowama-50 C.E.), yincwadi yeVangeli kaMateyu kuphela eyayisele ibhaliwe kwiZibhalo zesiGrike. Ngoko amaKristu aseTesalonika nawaseBhereya ayenokuqiniseka ngezinto zonke, mhlawumbi ngokuhlola inguqulelo yesiGrike yeSeptuagint yeZibhalo zesiHebhere. Ayefanele azifunde yaye azifundisise iZibhalo, nathi sifanele senjenjalo.
Kubalulekile Kubo Bonke
8. Kutheni abadala abamiselweyo befanele babe nolwazi olubalaseleyo ngeBhayibhile?
8 Abadala abamiselweyo bafanele babe nolwazi olubalaseleyo lweBhayibhile. Bamele ‘bakufanelekele ukufundisa’ yaye bamele ‘babambelele ngokuqinileyo kwilizwi elithembekileyo.’ Umveleli uTimoti wayefanele ‘aliphathe ngokufanelekileyo ilizwi lenyaniso.’ (1 Timoti 3:2; Tito 1:9; 2 Timoti 2:15) Unina, uYunike noninakhulu uLoyisi bamfundisa imibhalo engcwele kwasebusaneni, bemilisela ‘ukholo olungenaluhanahaniso’ kuye, nangona uyise wayengakholwa. (2 Timoti 1:5; 3:15) Oobawo abakholwayo bamele bakhulise abantwana babo “kwingqeqesho nasekweyiselweni kwengqondo kuYehova,” yaye ngokukodwa abadala abangoobawo ‘babantwana abakholwayo abangengabo abangalawulekiyo okanye abamangalelwa ngoburheletyo.’ (Efese 6:4; Tito 1:6) Ngoko, enoba iimeko zethu zinjani, sifanele siyithabathe nzulu imfuneko yokufunda, ukufundisisa nokusebenzisa iLizwi likaThixo.
9. Kutheni sifanele siyifunde namanye amaKristu iBhayibhile?
9 Kwakhona sifanele sifundisise iBhayibhile namanye amakholwa. UPawulos wayefuna amaKristu aseTesalonika asixubushe kunye isiluleko sakhe. (1 Tesalonika 4:18) Ukuze silole ulwazi lwethu ngenyaniso, ayikho into engaphezu kokuba kunye nabanye abafundi abanenzondelelo ekuhlolisiseni iZibhalo. Uchanile umzekeliso othi: “Isinyithi silola isinyithi, indoda ilola ubuso bowayo.” (IMizekeliso 27:17) Isixhobo esenziwe ngesinyithi sinokuba nomhlwa ukuba sihlala singasebenzi yaye singalolwa. Ngokufanayo, kufuneka sihlanganisane rhoqo size silolane ngokwabelana ngolwazi esilufumene xa besifunda, sifundisisa yaye sicamngca ngeLizwi likaThixo eliyinyaniso. (Hebhere 10:24, 25) Ngaphezu koko, le yenye yeendlela zokuqinisekisa ukuba siyangenelwa kwimitha yokukhanya kokomoya.—INdumiso 97:11; IMizekeliso 4:18.
10. Kuthetha ukuthini ukuhamba enyanisweni?
10 Xa sifundisisa iZibhalo, ngokufanelekileyo sinokuthandaza kuThixo njengoko wenzayo umdumisi: “Thuma ukukhanya kwakho nenyaniso yakho, zindikhaphe.” (INdumiso 43:3) Ukuba sinqwenela ukwamkeleka kuThixo, simele sihambe enyanisweni yakhe. (3 Yohane 3, 4) Oku kuquka ukwenza izinto azifunayo nokumkhonza ngokuthembeka nokunyaniseka. (INdumiso 25:4, 5; Yohane 4:23, 24) Simele simkhonze uYehova ngenyaniso, etyhiliweyo kwiLizwi lakhe necacisiweyo kwiimpapasho ‘zekhoboka elithembekileyo neliyingqondi.’ (Mateyu 24:45-47) Oku kufuna ulwazi oluchanileyo lweZibhalo. Ngoko, sifanele silifunde yaye silifundisise njani iLizwi likaThixo? Ngaba sifanele silifunde ukususela kwiGenesis isahluko 1, indinyana 1, de sizigqibe zonke iincwadi ezingama-66? Ewe, onke amaKristu anayo iBhayibhile ngolwimi lwawo afanele ayifunde ukususela kwiGenesis ukusa kwiSityhilelo. Yaye injongo yethu yokufunda iBhayibhile neempapasho zamaKristu ifanele ibe kukwandisa ulwazi lwethu ngenyaniso eninzi yeZibhalo asilungiselele yona uThixo ‘ngekhoboka elithembekileyo.’
Lifunde Ngokuvakalayo ILizwi LikaThixo
11, 12. Kutheni kuyingenelo ukuyifunda ngokuvakalayo iBhayibhile ezintlanganisweni?
11 Sisenokufundela ngaphakathi xa sisodwa. Noko ke, mandulo, ufundisiso lobuqu lwalusenziwa ngokuvakalayo. Njengoko ithenwa elingumTiyopiya lalikhwele kwinqwelo yalo, umvangeli uFilipu waliva lifunda isiprofeto sikaIsaya. (IZenzo 8:27-30) Igama lesiHebhere eliguqulelwe ngokuthi “ukufunda” ngokuyintloko lithetha “ukubiza.” Ngoko abo bebekade bengakwazi ukufunda ngokuzolileyo baze bakuqonde oko bakufundayo abafanele babe neentloni ngokulifunda ngokuvakalayo igama ngalinye. Into ebalulekileyo kukufumana inyaniso ngokufunda iLizwi likaThixo elibhaliweyo.
12 Kuyingenelo xa iBhayibhile ifundwa ngokuvakalayo kwiintlanganiso zamaKristu. Umpostile uPawulos wabongoza uTimoti owayesebenza naye: “Qhubeka uzibhokoxa kufundo lwasesidlangalaleni, ekubongozeni, ekufundiseni.” (1 Timoti 4:13) UPawulos wabaxelela oku abaseKolose: “Yakuba le leta ifundiwe phakathi kwenu, lungiselelani ukuba ifundwe nakwibandla laseLawodike nize kanjalo nani niyifunde leyo ivela eLawodike.” (Kolose 4:16) Yaye ISityhilelo 1:3 sithi: “Unoyolo lowo uwafunda ngokuvakalayo nabo bawevayo amazwi esi siprofeto, nabazigcinayo izinto ezibhaliweyo kuso; kuba ixesha elimisiweyo likufuphi.” Ngoko ke, isithethi sentetho yesidlangalala sifanele sizifunde izibhalo zeBhayibhile ukuze sixhase oko sikuxelela ibandla.
Indlela Yokufundisisa Ngokwemibandela
13. Yiyiphi eyona ndlela inenkqubela yokufunda iinyaniso zeBhayibhile, yaye yintoni enokusinceda sazi apho zifumaneka khona izibhalo?
13 Ukufundisisa ngokwemibandela kuyeyona ndlela inenkqubela yokufunda iinyaniso zeZibhalo. Izalathi-magama (concordances), ezinoluhlu lwamagama eBhayibhile alandelelana ngokuvisisana nomongo wencwadi, isahluko nendinyana nganye, kwenza kube lula ukufumana izibhalo ezinokuthanani nombandela othile. Yaye ezo zibhalo zinokunxityelelaniswa kuba uMbhali weBhayibhile akaziphikisi. Ngomoya oyingcwele, waphefumlela amadoda angama-40 ukuba abhale iBhayibhile kwithuba leenkulungwane ezili-16, yaye ukuyifundisisa ngokulandelelana kwemibandela yenye yeendlela ezinconyelwayo zokufunda inyaniso.
14. Kutheni sifanele sizifundisise iZibhalo zesiHebhere ndawonye nezamaKristu zesiGrike?
14 Uxabiso lwethu ngenyaniso yeBhayibhile lufanele lusishukumisele ekubeni sizifunde yaye sizifundisise iZibhalo zamaKristu zesiGrike ndawonye neZibhalo zesiHebhere. Oku kuya kubonisa indlela ezinxibelelene ngayo iZibhalo zesiGrike nenjongo kaThixo yaye kuya kukhanyisa iziprofeto ezikwiZibhalo zesiHebhere. (Roma 16:25-27; Efese 3:4-6; Kolose 1:26) INew World Translation of the Holy Scriptures iluncedo kakhulu kule nkalo. Yalungiselelwa ngabakhonzi bakaThixo abazahluleleyo, abasebenzisa ulwazi oluninzi olukhoyo lwemibhalo yantlandlolo yeBhayibhile namabinzana ayo azizafobe nanemfundiso. Zibalulekile neempapasho zokufundisisa iBhayibhile uYehova azilungiselela ngokusebenzisa “ikhoboka elithembekileyo neliyingqondi.”
15. Unokukungqina njani ukuba kufanelekile ukucaphula kwiindawo ezahlukahlukeneyo eBhayibhileni?
15 Bambi basenokuthi, ‘Iimpapasho zenu zicaphula izihlandlo ezininzi eBhayibhileni, kodwa kutheni zicaphula kwiindawo ezahlukahlukeneyo?’ Ngokucaphula kwiindawo ezahlukahlukeneyo kwiincwadi zeBhayibhile ezingama-66, ezi mpapasho zisebenzisa ubungqina obahlukahlukeneyo ukuze zingqine ukuchana kwemfundiso ethile. NoYesu wasebenzisa le ndlela yokufundisa. KwiNtshumayelo yakhe yaseNtabeni, wacaphula izihlandlo ezingama-21 kwiZibhalo zesiHebhere. Kuloo ntshumayelo kucatshulwe izihlandlo ezintathu kwiEksodus, ezimbini kwiLevitikus, esinye kwiNumeri, ezintandathu kwiDuteronomi, esinye kweyesiBini yooKumkani, ezine kwiiNdumiso, ezintathu kuIsaya nesinye kuYeremiya. Ngokwenza oku, ngaba uYesu ‘wayezama ukufumana ubungqina nje’? Akunjalo, kuba ‘wayefundisa njengomntu onegunya, kungekhona njengababhali.’ UYesu wenjenjalo kuba imfundiso yakhe wayeyixhasa ngeLizwi likaThixo elibhaliweyo nelinegunya. (Mateyu 7:29) Nompostile uPawulos wenjenjalo.
16. Ziziphi iindinyana zeZibhalo ezacatshulwa nguPawulos kumaRoma 15:7-13?
16 Kwinxalenye yezibhalo efumaneka kumaRoma 15:7-13, uPawulos wacaphula kwiinxalenye ezintathu zeZibhalo zesiHebhere—uMthetho, iziProfeto neeNdumiso. Wabonisa ukuba amaYuda nabeeNtlanga babeya kuzukisa uThixo, yaye ngoko amaKristu ayefanele abamkele abantu beentlanga zonke. UPawulos wathi: “Yamkelanani, kanye njengokuba noKristu wasamkelayo kwanathi, ngokubhekisele kuzuko lukaThixo. Kuba ndithi uKristu okunene waba ngumlungiseleli wabo balukileyo ngenxa yokuba nenyaniso kukaThixo, khon’ ukuze aqinisekise izithembiso awazenza kookhokho babo, nokuze iintlanga zimzukise uThixo ngenxa yenceba yakhe. Kunjengokuba kanye kubhaliwe [kwiNdumiso 18:49] kwathiwa: ‘Kungenxa yoko le nto ndiya kukuvuma ekuhleni phakathi kweentlanga yaye ndiya kuliculela uncuthu lwengoma igama lakho.’ Yaye kwakhona [kwiDuteronomi 32:43] uthi: ‘Chulumancani, nina zintlanga, kunye nabantu bakhe.’ Yaye kwakhona [kwiNdumiso 117:1 uthi]: ‘Dumisani uYehova, nonke nina zintlanga, yaye onke amaqela abantu makamdumise.’ Yaye kwakhona uIsaya [11:1, 10] uthi: ‘Kuya kubakho ingcambu kaYese, yaye kuya kuvela lowo uya kuphatha iintlanga; iintlanga ziya kubeka ithemba lazo kuye.’ Ngamana uThixo onika ithemba anganizalisa ngalo lonke uvuyo noxolo ngokukholwa kwenu, ukuze nibe nokuphuphuma elukholweni ninamandla omoya oyingcwele.” Ngaphantsi kwalo mbandela, uPawulos wabonisa indlela yokucaphula izibhalo ukuze axhase inyaniso yeBhayibhile.
17. AmaKristu alandela wuphi umzekelo xa ecaphula kwiindawo ezahlukahlukeneyo kuyo yonke iBhayibhile?
17 Kwileta yakhe yokuqala ephefumlelweyo umpostile uPetros ucaphula izihlandlo ezingama-34 kwiincwadi ezilishumi zoMthetho, kubaProfeti nakwiiNdumiso. Kwileta yakhe yesibini, uPetros ucaphula izihlandlo ezintandathu kwiincwadi ezintathu. Kwincwadi yeVangeli kaMateyu kucatshulwe izihlandlo ezili-122 ukususela kwiGenesis ukusa kuMalaki. Kwiincwadi ezingama-27 zeZibhalo zesiGrike, kucatshulwe ngokuthe ngqo izihlandlo ezingama-320 ukususela kwiGenesis ukusa kuMalaki yaye kukho nezinye iimbekiselo ezininzi zeZibhalo zesiHebhere. Ngokuvisisana nomzekelo owamiselwa nguYesu waza walandelwa ngabapostile bakhe, xa amaKristu anamhlanje efundisisa ngombandela othile weZibhalo, acaphula kwiindawo ezahlukahlukeneyo kuyo yonke iBhayibhile. Oku kufaneleke ngokukodwa kule “mihla yokugqibela,” xa inkoliso yeZibhalo zesiHebhere nezesiGrike zizaliseka. (2 Timoti 3:1) “Ikhoboka elithembekileyo” liyisebenzisa ngolo hlobo iBhayibhile kwiimpapasho zalo, kodwa alize longezelele kwiLizwi likaThixo okanye lishenxise okuthile kulo.—IMizekeliso 30:5, 6; ISityhilelo 22:18, 19.
Hlala Uhamba Enyanisweni
18. Kutheni sifanele ‘sihambe enyanisweni’?
18 Asimele sishenxise nanye into eBhayibhileni, kuba zonke iimfundiso zamaKristu ezikwiLizwi likaThixo ‘yinyaniso’ okanye ‘yinyaniso yeendaba ezilungileyo.’ Ukunamathela kule nyaniso—‘ukuhamba’ ngayo—kubalulekile ukuze ubani asinde. (Galati 2:5; 2 Yohane 4; 1 Timoti 2:3, 4) Ekubeni ubuKristu ‘buyindlela yenyaniso,’ ngokunceda abanye bahambisele phambili izilangazelelo zabo, siba “ngabasebenzi abangamadlelane kuyo inyaniso.”—2 Petros 2:2; 3 Yohane 8.
19. Sinokuqhubeka njani ‘sihamba enyanisweni’?
19 Ukuba siza ‘kuqhubeka sihamba enyanisweni,’ simele siyifunde iBhayibhile yaye silusebenzise uncedo lokomoya uThixo asilungiselela ‘ngekhoboka elithembekileyo.’ (3 Yohane 4) Ngamana singenjenjalo ukuze kulungelwe thina nokuze sikufanelekele ukufundisa abanye ngoYehova uThixo, uYesu Kristu, nenjongo kaThixo. Yaye masibe nombulelo kuba umoya kaYehova usinceda siliqonde iLizwi lakhe size siphumelele ekumkhonzeni ngenyaniso.
Zithini Iimpendulo Zakho?
◻ Ziziphi ezinye zeengenelo ezihlala zihleli zokufunda iBhayibhile?
◻ Kutheni sifanele siyifundisise namanye amakholwa iBhayibhile?
◻ Kutheni kufanelekile ukucaphula kwiindawo ezahlukahlukeneyo kuyo yonke iBhayibhile?
◻ Kuthetha ukuthini ‘ukuhamba enyanisweni,’ yaye sinokukwenza njani oko?
[Umfanekiso okwiphepha 17]
Bazali, fundisani abantwana benu iZibhalo
[Umfanekiso okwiphepha 18]
KwiNtshumayelo yakhe yaseNtabeni, uYesu wacaphula kwiindawo ezahlukahlukeneyo kwiZibhalo zesiHebhere