Ngaba Unguvulindlela Olungeleleneyo?

AMEHLO katata azaliswe luvuyo njengoko olule iingalo zakhe elinde ukuba intombazana yakhe encinane iqalise ukufunda ukuhamba. Xa ngokukhawuleza isiwa, uyayikhuthaza ukuba izame kwakhona. Uyazi ukuba kungekudala iza kuqingqa de yomelele.

Ngendlela efanayo, umlungiseleli osandul’ ukuba nguvulindlela usenokufuna ixesha nokhuthazo ngaphambi kokuba afumane ulungelelwano oluyimfuneko ukuze aphumelele njengomvakalisi woBukumkani wexesha elizeleyo. Oovulindlela abaninzi bayaqhubeka bekhonza benovuyo kangangamashumi eminyaka. Abambalwa bawiswa ziinguqu ezingalindelekanga kwiimeko zabo. Bambi bade baphulukane novuyo lwabo. Kwelinye ilizwe, abangama-20 ekhulwini kwabo baqalisa ubuvulindlela bayayeka kwiminyaka yabo emibini yokuqala yenkonzo yexesha elizeleyo. Yintoni enokwenza uvulindlela ayishiye le nkonzo ivuyisa kunene? Ngaba ikho into enokwenziwa ukuphepha ezi ziphazamiso?

Nangona impilo enkenenkene, ukuswela imali, neembopheleleko zentsapho zisenokwenza abanye babushiye ubulungiseleli bexesha elizeleyo, umqobo omkhulu kwabanye ibikukungakwazi ukulungelelanisa iimbopheleleko zamaKristu ezahlukeneyo. Ukulungelelana kuthetha “imeko yokuba kungabikho mpembelelo eba namandla ukugqitha enye okanye ibe nomlinganiselo ongaphezulu kunezinye.”

UYesu Kristu wabonisa abafundi bakhe indlela owawumele wenziwe ngayo umsebenzi wokushumayela nokwenza abafundi. Kubulungiseleli bakhe, wabonisa nendlela yokugcina ulungelelwano. UYesu wabonisa ukuba iinkokeli zonqulo zamaYuda zazingalungelelananga, ezixelela oku: “Ninikela isinye kwishumi letyeleba nedile nekumin, kodwa niye nayigatya imibandela enzima ngakumbi yoMthetho, eyile, okusesikweni nenceba nokuthembeka. Ezi zinto kwakubophelelekile ukuzenza, kanti kungamele kugatywe ezinye izinto.”—Mateyu 23:23.

Lo mgaqo usasebenza nanamhlanje, ngokukodwa kubulungiseleli bobuvulindlela. Beqhutywa lihlombe neenjongo ezintle, bambi baye bangenela ubuvulindlela ngaphandle kokuzilungiselela ngokupheleleyo okanye ukucingisisa ngoko kubandakanyekileyo kuko. (Luka 14:27, 28) Abanye baye bazixakekisa gqitha kubulungiseleli basentsimini kangangokuba bazibetha ngoyaba ezinye iinkalo ezibalulekileyo zobuKristu. Bangalufumana baze balugcine njani ulungelelwano?

Hlala Womelele Ngokomoya!

UYesu akazange abutyeshele ubumoya bakhe. Nangona izihlwele ezazimphulaphula nawayeziphilisa zazithabatha ixesha lakhe elininzi gqitha, wazibekela ixesha lokucamngca ngomthandazo. (Marko 1:35; Luka 6:12) Ukuba nguvulindlela olungeleleneyo namhlanje kukwafuna ukuba ubani awasebenzise ngokuzeleyo onke amalungiselelo okumenza ahlale omelele ngokomoya. UPawulos waqiqa ngale ndlela: “Ngaba, noko ke, wena ufundisa uthile ongomnye, akuzifundisi na wena ngokwakho?” (Roma 2:21) Ngokuqinisekileyo ibiya kuba yimpazamo ukusebenzisa lonke ixesha likabani eshumayeza abanye ngoxa ekutyeshela ukuzipha ixesha elaneleyo lofundisiso lobuqu nokuthandaza rhoqo.

UKumiko ebenguvulindlela kangangeminyaka engamashumi amabini. Nangona enabantwana abathathu nomyeni ongakholwayo, ngokusuka kumava uye wafumanisa ukuba elona xesha limlungeleyo lokulesa nokufundisisa iBhayibhile lelangaphambi kokuba aye kulala ebusuku. Njengoko efundisisa, uphawula ngokukhethekileyo iingongoma anokuzisebenzisa kubulungiseleli basentsimini ukuze abugcine busexesheni yaye bubangel’ umdla ubulungiseleli bakhe bemihla ngemihla. Abanye oovulindlela abanempumelelo bavuka ngaphambi kokuba intsapho yonke ivuke ukuze banandiphe ukuhlaziyeka ngokomoya ebudeni beeyure ezizolilelyo zakusasa. Usenokuba nawo amanye amaxesha afanelekileyo owabekele ukulungiselela iintlanganiso nokufunda iimpapasho zakutshanje zamaKristu. Ukuba unqwenela ukuhlala unovuyo kubulungiseleli, ufundisiso lobuqu akunakulwenza uphela sonwabe okanye ulutyeshele.

Ukulungelelanisa Iimbopheleleko Zentsapho

Abazali abangoovulindlela bakwafanele bahlale bekhumbula ukuba inxalenye enkulu ‘yokwenza ukuthanda kukaYehova’ kukuba babandakanyeke ekunyamekeleni iintswelo zokwenyama, zokweemvakalelo nezokomoya zentsapho yabo. (Efese 5:17; 6:1-4; 1 Timoti 5:8) Maxa wambi kwaneqabane elikholwayo namalungu entsapho aba noloyiko lokuba akayi kufumana ncedo nankxaso kumfazi nakumama xa eqalisa ukuba nguvulindlela. Iimvakalelo ezinjalo zinokubangela ukuba bangabi namdla kumnqweno wakhe wokuba nguvulindlela. Noko ke, xa kucetywa kakuhle kuze kucingisiswe kusengaphambili, lunokugcinwa ulungelelwano.

Oovulindlela abaninzi bazabalazela ukwenza wonke umsebenzi wokushumayela xa amalungu entsapho engekho ekhaya. UKumiko, okhankanywe ngaphambilana, uba kunye nentsapho yakhe xa kutyiwa isidlo sakusasa, athi ndlela ntle kumyeni wakhe nabantwana kusasa, yaye uba sele ebuyile ekhaya ngaphambi kokuba babuye. Usebenzisa iMivulo ukuze apheke izidlo ezininzi kusengaphambili ukuze akwazi ukuhlala phantsi aze atye kunye nentsapho yakhe kunokuba azixakekise kwigumbi lokuphekela. Ukwenza imisebenzi emininzi ngexesha elinye, njengokwenza umsebenzi wasendlwini ngoxa ulungiselela isidlo, nako kuyanceda. Ngaloo ndlela uKumiko ude afumane nethuba lokumema abahlobo babantwana bakhe aze abalungiselele izidlo ezikhethekileyo.

Njengoko abantwana befikelela kwiminyaka yabo yeshumi elivisayo, ngokufuthi bafuna ingqalelo eyongezelelekileyo yabazali ukuze bahlangabezane neemvakalelo ezintsha, iminqweno, amathandabuzo noloyiko olubongamelayo. Oku kufuna ubulumko nohlengahlengiso kucwangciso lomzali onguvulindlela. Ngokomzekelo uHisako, umama wabantwana abathathu onguvulindlela. Wenza ntoni xa intombi yakhe enkulu yabonisa ukungazinandiphi nokungabi namdla kwiintlanganiso zamaKristu nakwinkonzo yasentsimini ngenxa yempembelelo yabahlobo behlabathi basesikolweni? Eyona nto yayifuneka yayikukuba intombi yakhe iyenze eyayo inyaniso ize yeyiseke ngokupheleleyo ukuba ukwahluka ehlabathini kwakulelona khondo lilungileyo.—Yakobi 4:4.

UHisako uthi: “Ndagqiba kwelokuba ndiphinde ndifundisise nayo iimfundiso ezisisiseko ezikwincwadi ethi Unokuphila Ngonaphakade imihla ngemihla. Ekuqaleni sasifundisisa kangangemizuzu embalwa, ngokufuthi intombi yam ikhala ngesisu nentloko ebuhlungu xa kufika ixesha lokuba sifundisise. Kodwa ndandisiqhuba rhoqo esi sifundo. Emva kweenyanga ezimbalwa, isimo sayo sengqondo saphucuka gqitha, siyenza izahlulele yaye ibhaptizwe ngexeshana nje elingephi.” Namhlanje uHisako unandipha ubulungiseleli bexesha elizeleyo kunye nentombi yakhe.

Ootata abangoovulindlela kukwafuneka balumke bangaxakeki gqitha ekunyamekeleni abantu abanomdla entsimini nakwimisebenzi yebandla kangangokuba basilele ukunika abantwana babo abasakhulayo inkxaso engokweemvakalelo nolwalathiso olubafaneleyo. Oku indoda ayinakukushiyela umfazi ukuba akwenze. Omnye umdala ongumKristu oxakekileyo nobenguvulindlela ixesha elide noqhuba ishishini elincinane uzenzela ixesha lokufundisisa nomntwana ngamnye kubantwana bakhe abane. (Efese 6:4) Ukongezelela, uzilungiselela iintlanganiso zeeveki ngeeveki nentsapho yakhe. Oovulindlela abalungeleleneyo abazityesheli iimfuno zeentsapho zabo zezinto eziphathekayo okanye zokomoya.

Ukulungelelana Kwezoqoqosho

Ukuba nembono efanelekileyo ngeentswelo zemihla ngemihla yenye inkalo oovulindlela abafanele bazabalazele ukugcina ulungelelwano kuyo. Nalapha, sinokufunda lukhulu kumzekelo nakwisiluleko sikaYesu esihle. Walumkisa ngokuxhalela izinto eziphathekayo ngokugqithisileyo. Kunoko, wakhuthaza abafundi bakhe ukuba babeke uBukumkani kuqala, ethembisa ukuba uThixo wayeya kubanyamekela njengoko eyinyamekela yonke indalo. (Mateyu 6:25-34) Ngokulandela esi siluleko sihle, oovulindlela abaninzi baye bakwazi ukuhlala enkonzweni yexesha elizeleyo kangangeminyaka, kwaye uYehova uye wayisikelela imigudu yabo yokufumana ‘isonka semini nganye.’—Mateyu 6:11.

Umpostile uPawulos waluleka amanye amaKristu esithi ‘ukuba nengqiqo kwawo makwazeke kubantu bonke.’ (Filipi 4:5) Ngaphandle kwamathandabuzo, ukuba nengqiqo bekuya kufuna ukuba siyinyamekele ngokufanelekileyo impilo yethu. Oovulindlela abalungeleleneyo bazama ngandlela zonke ukuba babonakalise ukuba nengqiqo kwindlela yabo yokuphila nakwisimo sabo sengqondo ngezinto eziphathekayo, besazi ukuba abanye bayayondela ihambo yabo.—Thelekisa eyoku-1 kwabaseKorinte 4:9.

Ulutsha olungenela inkonzo yobuvulindlela lufanele luyeke ukukuxhaphaza ukuba nesisa kwabazali balo. Ukuba luhlala emakhayeni alo, kuya kuba kukubonakalisa ukulungelelana noxabiso ukuba lube nesabelo kwimisebenzi yasekhaya nokuba lube nomsebenzi wesingxungxo oya kulwenza lufak’ isandla ekulondolozeni ikhaya.—2 Tesalonika 3:10.

Oovulindlela Abalungeleleneyo Bayintsikelelo Yokwenene

Usenokuba unguvulindlela ozabalazela ukugcina ulungelelwano olufanelekileyo. Zithembe. Kanye njengokuba umntwana omncinane efuna ixesha ukuze afunde ukuqingqa nokuhamba, oovulindlela abaninzi abaqolileyo bathi kwabathabatha ixesha ukufumana ulungelelwano ekunyamekeleni yonke imisebenzi yabo.

Ukwenza ufundisiso lobuqu, ukunyamekela amalungu entsapho nokuxhasa iintswelo zabo zezinto eziphathekayo zezinye zeenkalo oovulindlela abafanele bazabalazele ukulungelelana kuzo. Iingxelo zibonisa ukuba oovulindlela abaninzi baziphumeza kakuhle kakhulu iimbopheleleko zabo. Ngokwenene bayintsikelelo phakathi koluntu yaye bazukisa uYehova nentlangano yakhe.