Imibuzo Evela Kubafundi
Maxa wambi siye sive abazalwana bethetha okanye bethandazela ukuba uBukumkani bukaThixo bufike emhlabeni. Ngaba leyo yindlela echanileyo yokuthetha?
Xa sithetha inyaniso, leyo asiyondlela engokweZibhalo yokuthetha. UBukumkani bukaThixo bobasezulwini. Ngaloo ndlela, umpostile uPawulos wabhala wenjenje: “INkosi iya kundihlangula kuwo wonke umsebenzi ongendawo yaye iya kundisindisela ubukumkani bayo basezulwini. Kuyo makubekho uzuko ngonaphakade kanaphakade. Amen.”—2 Timoti 4:18; Mateyu 13:44; 1 Korinte 15:50.
UBukumkani bamiselwa ezulwini ngowe-1914, yaye abunakuziswa kwiParadisi ebuyiselweyo esemhlabeni okanye kwenye indawo. UYesu Kristu unguKumkani wobo Bukumkani. NjengoKumkani, uYesu unegunya elingaphezulu kwelezithunywa zezulu. Ngenxa yoko, indawo yakhe efanelekileyo yokulawula ikwisandla sokunene sikaThixo emazulwini. AmaKristu athanjisiweyo ayamthelela njengookumkani nababingeleli ezulwini.—Efese 1:19-21; ISityhilelo 5:9, 10; 20:6.
Ngoko ke, ngaba oku kuthetha ukuba asifanele sivakalise kuThixo amazwi afumaneka kuMthandazo weNkosi athi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini”? (Mateyu 6:10) Ngokwahlukileyo koko, lo mthandazo ufanelekile yaye usenentsingiselo ezeleyo.
UBukumkani bukaThixo buya kuwulawula ngokungqalileyo lo mhlaba, ibe sicinga ngaloo nto xa sithandaza size sisebenzise amazwi afana nalawo akuMthandazo weNkosi. Ngokomzekelo, uDaniyeli 2:44 uxela kwangaphambili ukuba uBukumkani buya ‘kufika’ ukuze butshabalalise zonke iintlanga buze bulawule kulo mhlaba. ISityhilelo 21:2 sithetha ngeYerusalem Entsha ehla ivela ezulwini. IYerusalem Entsha iyilwa li-144 000 lamaKristu athanjisiweyo aya kuba ngumtshakazi kaKristu. Akwaziindlalifa kunye noYesu eBukumkanini. Ngoko ISityhilelo 21:2 sithetha ngokunikela kwawo ingqalelo emhlabeni, esizisa iintsikelelo ezininzi kuluntu oluthembekileyo.—ISityhilelo 21:3, 4.
Kuya kuqhubeka kufanelekile ukuthandaza kuYehova uThixo ngokuvisisana nala mazwi kaYesu, athi: “Mabufike ubukumkani bakho,” de ezi nezinye iziprofeto ezingummangaliso zizaliseke. Kodwa sifale sikhumbule ukuba uBukumkani abuyi kuza ngokoqobo kwesi sijikelezi-langa singuMhlaba. Urhulumente woBukumkani usezulwini, kungekhona emhlabeni.
[Inkcazelo Ngomfanekiso okwiphepha 31]
Earth: Based on NASA photo