Ngaba Unokumthanda Ngokwenene UThixo?
UTHIXO uthi: “Akukho mntu undibona aphile.” (Eksodus 33:20) Ukongezelela koko, ukususela kumaxesha okubhalwa kweBhayibhile akakho umntu owakha wanxibelelana ngokungqalileyo naye. Ngaba akubonakali kunzima—mhlawumbi kungenakwenzeka—ukuhlakulela uthando olunzulu ngomntu ongazange wambona okanye wathetha nawe ngokungqalileyo? Ngaba ngokwenene unokuba nalo ulwalamano lothando noMdali wendalo iphela?
Ngokungathandabuzekiyo kunokwenzeka ukuba sihlakulele ubuhlobo obufudumeleyo bobuqu noThixo. KwiDuteronomi 6:5, sifunda ukuba uhlanga lwakwaSirayeli lwayalelwa oku: “Uze umthande uYehova uThixo wakho ngentliziyo yakho yonke, nangomphefumlo wakho wonke, nangamandla akho onke.” Kamva uYesu Kristu wawubethelela lo mthetho kubalandeli bakhe waza wongezelela esithi: “Lo ngowona myalelo mkhulu nowokuqala.” (Mateyu 22:37, 38) Ngaba iBhayibhile ibingasibongoza ukuba simthande uThixo ukuba ulwalamano olunjalo belungafumaneki?
Kodwa ngaba uYehova ulindele ukuba simthande kuba nje esiyalele ukuba senjenjalo? Akunjalo. UThixo wadala isibini sokuqala esingabantu saba namandla okumthanda. UAdam noEva abazange banyanzelwe ukuba babe nolwalamano lothando noMdali wabo. Kunoko, uThixo wababeka kwimo elungileyo ababenokuhlakulela kuyo uthando olunzulu ngaye. Babemele bazikhethele—basondele kuThixo okanye bacezele kude kuye.
UAdam noEva bakhetha ukuvukela. (Genesis 2:16, 17; 3:6, 7) Noko ke, inzala yabo yayiza kukwazi ukuhlakulela ulwalamano lothando noMdali.
Ukuhamba NoThixo Wenyaniso
Ngokomzekelo, eBhayibhileni, uAbraham kuthiwa ‘ngumhlobo’ kaThixo. (Yakobi 2:23) Ukanti uAbraham yayingenguye yedwa owayenandipha ulwalamano olusondeleyo noThixo. IBhayibhile ithetha ngabanye abantu abaninzi abangafezekanga ababonakalisa uthando lokwenene ngoYehova baza ‘bahamba noThixo.’—Genesis 5:24; 6:9; Yobhi 29:4; INdumiso 25:14; IMizekeliso 3:32.
Abakhonzi bakaThixo bamandulo babengazalwa bemthanda yaye benomsa ngoThixo. Babemele bawuhlakulele. Njani? Ngokwazi igama lakhe, uYehova. (Eksodus 3:13-15; 6:2, 3) Ngokwazi ukuba ukho yaye unguThixo. (Hebhere 11:6) Ngokucamngca rhoqo ngezenzo zakhe zothando. (INdumiso 63:6) Ngokuvakalisa iingcamango ezisezintliziyweni zabo kuThixo ngomthandazo. (INdumiso 39:12) Ngokufunda ngokulunga kwakhe. (Zekariya 9:17) Ngokuhlakulela uloyiko olufanelekileyo lokumcaphukisa.—IMizekeliso 16:6.
Ngaba unokuba ngumhlobo kaThixo uze uhambe naye? Kuyinyaniso ukuba awunakumbona uThixo okanye uve ilizwi lakhe. Sekunjalo, uYehova uyakumema ukuba ube ‘ngumphambukeli ententeni yakhe,’ ube ngumhlobo wakhe. (INdumiso 15:1-5) Ngaloo ndlela, unako ukumthanda uThixo. Kodwa unokuluhlakulela njani ulwalamano olusondeleyo lothando naye?