Ukuphila Ngomthetho KaKristu

“Qhubekani nithwala uxanduva lomnye nomnye, nize ngaloo ndlela nizalisekise umthetho kaKristu.”—GALATI 6:2.

1. Kutheni kunokuthiwa umthetho kaKristu wenza abantu benze ubulungisa ngokungathethekiyo namhlanje?

ERWANDA, amaNgqina kaYehova angamaHutu namaTutsi abeka ubomi bawo esichengeni ekhuselana kwidabi lobuzwe ebelikwelo lizwe kutshanje. AmaNgqina kaYehova awafelwa ngamalungu eentsapho zawo kwinyikima yomhlaba eyoyikekayo eKobe, eJapan, axheleka ngaphakathi ngenxa yaloo lahleko. Sekunjalo, akhawuleza aya kunceda abanye ababengamaxhoba. Ewe, imizekelo echukumisayo esuka ehlabathini lonke ibonisa ukuba umthetho kaKristu uyasebenza namhlanje. Ubangela abantu benze ubulungisa ngokungathethekiyo.

2. INgqobhoko iye ayawuqonda njani umthetho kaKristu, yaye thina siwuzalisekisa njani loo mthetho?

² Kwangaxeshanye, isiprofeto seBhayibhile esiphathelele le “mihla yokugqibela” yamanqam siyazaliseka. Abaninzi ‘banohlobo lozinikelo lobuthixo kodwa bayawakhanyela amandla alo.’ (2 Timoti 3:1, 5) Ngokukodwa kwiNgqobhoko, ngokufuthi unqulo ngumbandela wokucel’ injezu, kungekhona owokuqhutywa yintliziyo. Ngaba oko kubangelwa kukuba kunzima gqitha ukuphila ngomthetho kaKristu? Akunjalo. UYesu ngewayengazange asinike umthetho ekunzima ukuwulandela. Ingxaki yeNgqobhoko kukuba ingawuqondi loo mthetho. Iye yasilela ukuthobela la mazwi aphefumlelweyo: “Qhubekani nithwala uxanduva lomnye nomnye, nize ngaloo ndlela nizalisekise umthetho kaKristu.” (Galati 6:2) ‘Umthetho kaKristu siwuzalisekisa’ ngokuthwalisana uxanduva, kungekhona ngokuxelisa abaFarisi size ngokungekho sikweni sibathwalise uxanduva olungakumbi abazalwana bethu.

3. (a) Yiyiphi eminye imiyalelo equkiweyo kumthetho kaKristu? (b) Kutheni bekuya kuba kokuphosakeleyo ukugqiba kwelokuba ibandla lamaKristu lifanele lingabi namithetho ngaphandle kwaleyo yanikelwa nguKristu ngokungqalileyo?

³ Umthetho kaKristu uquka yonke imiyalelo kaKristu Yesu—enoba kukushumayela nokufundisa, ukugcina iliso linyulu yaye lingenakumbi, ukuzama ukugcina uxolo nabamelwane bethu, okanye ukushenxisa ukungcola ebandleni. (Mateyu 5:27-30; 18:15-17; 28:19, 20; ISityhilelo 2:14-16) Ngenene, amaKristu amele ayithobele yonke imiyalelo eseBhayibhileni eyayibhalelwe abalandeli bakaKristu. Yaye akuphelelanga apho. Intlangano kaYehova, namabandla ahlukahlukeneyo, afanele amisele imithetho nemigaqo eyimfuneko ukuze kuhlale kukho ulungelelwano. (1 Korinte 14:33, 40) Kaloku, amaKristu ngengakwazi ukuhlanganisana kunye ukuba ebengenayo imithetho ephathelele ixesha, indawo, nendlela yokuqhuba ezo ntlanganiso! (Hebhere 10:24, 25) Ukusebenzisana nokhokelo lobulumko esilufumana kwabo banikwe igunya entlanganweni kukwayinxalenye yokuzalisekisa umthetho kaKristu.—Hebhere 13:17.

4. Yintoni eshukumisela abantu kunqulo olunyulu?

⁴ Noko ke, amaKristu okwenyaniso akaluvumeli unqulo lwawo ukuba luzaliswe yimithetho engeyomfuneko. UYehova akamkhonzi kuba eyalelwa ngumntu okanye yintlangano ethile. Kunoko, unqulo lwawo luqhutywa luthando. UPawulos wabhala: “Uthando analo uKristu luyasinyanzela.” (2 Korinte 5:14, bona umbhalo osemazantsi weNW.) UYesu wayalela abalandeli bakhe ukuba bathandane. (Yohane 15:12, 13) Uthando lokuzincama sisiseko somthetho kaKristu, yaye lunyanzela okanye lushukumisa onke amaKristu okwenyaniso, entsatsheni nasebandleni. Makhe sibone indlela okwenzeka ngayo oko.

Entsatsheni

5. (a) Abazali banokuwuzalisekisa njani umthetho kaKristu ekhaya? (b) Yintoni abayifunayo abantwana kubazali babo, yaye yiyiphi imiqobo abamele bayoyise abazali ukuze babanelise?

⁵ Umpostile uPawulos wabhala: “Madoda, qhubekani nibathanda abafazi benu, kanye njengokuba noKristu walithandayo ibandla waza wazinikela ngenxa yalo.” (Efese 5:25) Xa indoda ixelisa uKristu yaye ibonakalisa uthando nolwazelelelo emfazini wayo, izalisekisa inxalenye ebalulekileyo yomthetho kaKristu. Ngaphezu koko, uYesu wawubonakalisa ngokuphandle umsa ngabantwana abaselula, ebawola ngeengalo zakhe, ebeka izandla zakhe phezu kwabo, yaye ebasikelela. (Marko 10:16) Kwakhona abazali abawuzalisekisayo umthetho kaKristu babonakalisa umsa kubantwana babo. Liyinyaniso elokuba kukho abazali abakufumanisa kulucelomngeni ukuxelisa umzekelo kaYesu kule nkalo. Bambi abakwazi ngokwemvelo ukuzibonakalisa iimvakalelo zabo. Bazali, musani ukuvumela imiqobo enjalo inithintele ekubonakaliseni uthando kubantwana benu! Akwanele ukuba nina nazi ukuba niyabathanda abantwana benu. Nabo bamele bakwazi oko. Yaye abanakukwazi oko ngaphandle kokuba niyalubonakalisa uthando lwenu ngeendlela ezithile.—Thelekisa uMarko 1:11.

6. (a) Ngaba abantwana kufuneka bamiselwe imithetho ngabazali, yaye kutheni uphendula ngolo hlobo? (b) Sisiphi isizathu esiyintloko semithetho yasekhaya ekufuneka basiqonde abantwana? (c) Ziziphi iingozi eziphetshwayo xa umthetho kaKristu ulawula ekhayeni?

⁶ Kwangaxeshanye, abantwana kufuneka bamiselwe imida, nto leyo ethetha ukuba abazali babo bamele bababekele imithetho yaye maxa wambi bayinyanzelise le mithetho ngokubaqeqesha. (Hebhere 12:7, 9, 11) Nakuba kunjalo, abantwana bamele benziwe bahlale besiqonda esona sizathu sale mithetho: ukuba abazali babo bayabathanda. Yaye bamele bafundiswe ukuba uthando yeyona nto ifanele ibashukumisele ekubeni babathobele abazali babo. (Efese 6:1; Kolose 3:20; 1 Yohane 5:3) Usukelo lomzali onobulumko kukufundisa abantwana bakhe basebenzise ‘amandla abo engqiqo’ ukuze xa bebadala bakwazi ukuzenzela izigqibo eziphilileyo. (Roma 12:1; thelekisa eyoku-1 kwabaseKorinte 13:11.) Kwelinye icala, imithetho ayifanele ibe mininzi okanye ibe ngqongqo gqitha. UPawulos uthi: “Nina boyise, musani ukubacaphukisa abantwana benu, khon’ ukuze bangafi iintliziyo.” (Kolose 3:21; Efese 6:4) Xa umthetho kaKristu ulawula ekhayeni, uqeqesho aluyi ludluliselwe ngomsindo ogqithisileyo okanye ngamazwi arhabaxa. Kwikhaya elinjalo, abantwana baziva bekhuselekile yaye bayakheka, abaziva bethwel’ uxanduva okanye bengaxatyiswa.—Thelekisa INdumiso 36:7.

7. Amakhaya aseBheteli anokuba ngumzekelo ngaziphi iindlela xa kufikelelwa kwimithetho yekhaya?

⁷ Bambi abaye batyelela kumakhaya aseBheteli asehlabathini lonke bathi ayimizekelo emihle yolungelelwano kumbandela wemithetho yentsapho. Nangona zinabantu abakhulu kuphela, ezo ndawo zisebenza njengamakhaya.a Zininzi izinto ezenziwayo eBheteli yaye zifuna imithetho eliqela—ngokuqinisekileyo emininzi ngakumbi kuneyekhaya eliqhelekileyo. Sekunjalo, abadala abakhokelayo kumakhaya, kwiiofisi nakwimizi-mveliso yaseBheteli bazabalazela ukusebenzisa umthetho kaKristu. Banemvo yokuba isabelo sabo ayikokulungelelanisa umsebenzi kuphela kodwa kukukhuthaza nenkqubela yokomoya ‘novuyo lukaYehova’ phakathi kwabo basebenza nabo. (Nehemiya 8:10) Ngoko ke, bazabalazela ukwenza izinto ngendlela eyakhayo nekhuthazayo yaye bahlala bezama ukubonakalisa ulwazelelelo. (Efese 4:31, 32) Akumangalisi ngoko ukuba amakhaya aseBheteli esaziwa ngokuba nomoya wovuyo!

Ebandleni

8. (a) Yintoni efanele ihlale ilusukelo lwethu ebandleni? (b) Ziziphi iimeko abaye benza okanye bazama ukwenza imithetho kuzo abanye?

⁸ Nasebandleni sinosukelo lokwakhana ngomoya wothando. (1 Tesalonika 5:11) Ngoko onke amaKristu afanele akulumkele ukuthwalisa abanye uxanduva ngokudlulisela iingcamango zawo kwimibandela yobuqu. Maxa wambi, bambi baye babhalele iWatch Tower Society becela ulwalathiso ngembono abafanele babe nayo ngeefilimu, iincwadi kwanezinto zokudlala ezithile. Ukanti, uMbutho awunagunya lakuphicotha izinto ezinjalo uze umisele imithetho ethile. Kwiimeko ezininzi, le yimibandela umntu okanye intloko-ntsapho nganye efanele izigqibele ngayo, ngokusekelwe kuthando lwayo ngemigaqo yeBhayibhile. Abanye banotyekelo lokuguqula amacebiso nokhokelo loMbutho balwenze imithetho. Ngokomzekelo, kwinkupho yeMboniselo kaMatshi 15, 1996, kwakukho inqaku elihle elikhuthaza abadala ukuba bawenze rhoqo amatyelelo okwalusa kumalungu ebandla. Ngaba injongo yelo nqaku yayikukumisa imithetho? Akunjalo. Nangona abo bakwaziyo ukuwalandela amacebiso elo nqaku befumana iingenelo ezininzi, abanye abadala abakwazi kuwalandela. Ngokufanayo, inqaku elithi “Imibuzo Evela Kubafundi” kwinkupho yeMboniselo ka-Aprili 1, 1995, lalumkisa nxamnye nokuthoba isidima sesihlandlo sobhaptizo ngokuzibaxa izinto, njengokwenza amatheko amakhulu okanye imingcelele yoloyiso. Bambi baye basibaxa esi siluleko siphilileyo, bade benza umthetho othi ukuthumela ikhadi elikhuthazayo ngokuphathelele eso sihlandlo kuphosakele!

9. Kutheni kubalulekile ukuba sikuphephe ukuthanda ukugxekana okanye ukugwebana?

⁹ Kwakhona, khumbula ukuba, ukuba “umthetho ogqibeleleyo wenkululeko” uza kulawula phakathi kwethu, simele siqonde ukuba izazela zamaKristu azifani. (Yakobi 1:25) Ngaba sifanele sikhubeke xa abantu besenza ukhetho lobuqu olungaphuli mgaqo weZibhalo? Akunjalo. Ngokwenjenjalo besiya kuba siphelisa umanyano. (1 Korinte 1:10) Elumkisa nxamnye nokugweba amanye amaKristu, uPawulos wathi: “Ukuma okanye ukuwa kwaso kusenkosini yaso. Eneneni, siya kwenziwa sime, kuba uYehova unako ukusenza sime.” (Roma 14:4) Sizibeka engozini yokungamkholisi uThixo ukuba siphikisana ngemibandela efanele ishiyelwe isazela somntu ngamnye.—Yakobi 4:10-12.

10. Ngoobani ababelwe ukunyamekela ibandla, yaye sifanele sibaxhase njani?

¹⁰ Kwakhona, masikhumbule ukuba abadala babelwe ukuba banyamekele umhlambi kaThixo. (IZenzo 20:28) Bakho ukuze basincede. Sifanele sizive sikhululekile ukufuna amacebiso kubo, kuba bangabafundi beBhayibhile yaye bayazazi izinto eziye zaxutyushwa kuncwadi lweWatch Tower Society. Xa abadala bephawula ihambo enokukhokelela ekwaphulweni komgaqo weZibhalo, ngenkalipho baye badlulisele isiluleko esifanelekileyo. (Galati 6:1) Amalungu ebandla alandela umthetho kaKristu ngokusebenzisana naba balusi bathandekayo, abawakhokelayo.—Hebhere 13:7.

Abadala Basebenzisa Umthetho KaKristu

11. Abadala bawusebenzisa njani umthetho kaKristu ebandleni?

¹¹ Abadala bazabalazela ukuzalisekisa umthetho kaKristu ebandleni. Bayakhokela ekushumayeleni iindaba ezilungileyo, bafundisa ngeBhayibhile ukuze bafikelele iintliziyo yaye, bathetha njengabalusi abanothando nabathantamisayo ‘kwimiphefumlo edandathekileyo.’ (1 Tesalonika 5:14) Bayasiphepha isimo sengqondo esingesiso esobuKristu esikhoyo kwiinkonzo ezininzi zeNgqobhoko. Liyinyaniso elokuba eli hlabathi liwohloka ngesantya esiphezulu, yaye njengoPawulos, abadala basenokuwuxhalabela umhlambi; kodwa amaxhala anjalo bawasingatha ngokulungeleleneyo.—2 Korinte 11:28.

12. Xa umKristu ecela uncedo kumdala, usenokusabela njani loo mdala?

¹² Ngokomzekelo, umKristu usenokufuna ukuthetha nomdala ngombandela obalulekileyo ongakhankanywa ngokuthe ngqo eZibhalweni okanye umbandela ofuna kulungelelaniswe imigaqo yobuKristu eyahlukahlukeneyo. Mhlawumbi usenokuba uthenjiswe ngesikhundla esiphezulwana nesinomvuzo oncumisayo kodwa esifuna azinikele ngakumbi emsebenzini. Okanye ubawo ongakholwayo womKristu oselula usenokuba ufuna unyana wakhe enze izinto ezisenokuchaphazela ubulungiseleli bakhe. Kwiimeko ezinjalo umdala uyakuphepha ukudlulisela iingcamango zakhe. Kunoko, unokuvula iBhayibhile aze ancede loo mntu aqiqe ngemigaqo ebandakanyekileyo. Usenokusebenzisa iWatch Tower Publications Index, ukuba ikho, ukuze afumane oko “ikhoboka elithembekileyo neliyingqondi” eliye lakuthetha ngaloo mbandela kwiphephancwadi IMboniselo nakwezinye iimpapasho. (Mateyu 24:45) Kuthekani ukuba emva koko loo mKristu wenza isigqibo esibonakala singesosabulumko kulo mdala? Ukuba eso sigqibo asiphikisani ngokuthe ngqo nemigaqo okanye imithetho yeBhayibhile, umKristu uya kufumanisa ukuba lo mdala uyaliqonda ilungelo lomntu lokuzenzela isigqibo esinjalo, esazi ukuba “ngamnye [uya] kuthwala umthwalo wakhe.” Noko ke, loo mKristu ufanele akhumbule ukuba “nantoni na umntu ayihlwayelayo, uya kuvuna kwayona.”—Galati 6:5, 7.

13. Kunokunikela iimpendulo ezingqalileyo okanye iingcamango zabo xa kuvela ingxaki, kutheni abadala bebanceda abanye baqiqe ngezibhalo?

¹³ Kutheni esenjenjalo umdala onamava? Ngokuyinxenye kungenxa yezizathu ezimbini. Okokuqala, uPawulos waxelela elinye ibandla ukuba ‘wayengeyonkosi phezu kokholo lwalo.’ (2 Korinte 1:24) Lo mdala, ngokunceda umzalwana wakhe aqiqe ngeZibhalo aze azenzele isigqibo ngolwazi aluzuzileyo, uxelisa isimo sengqondo sikaPawulos. Uyaqonda ukuba igunya lakhe linemida, kanye njengokuba uYesu wayeqonda ukuba igunya lakhe lalinemida. (Luka 12:13, 14; Yude 9) Kwangaxeshanye, abadala basinikela ngokukhawuleza isiluleko esiluncedo nesingqalileyo esisekelwe eZibhalweni xa sifuneka. Okwesibini, uyamqeqesha lo mKristu akhonza naye. Umpostile uPawulos wathi: “Ukutya okuqinileyo kokwabantu abaqolileyo, abo bathe ngokuwasebenzisa amandla abo okuqonda bawaqeqeshela ukubalula kokubini okulungileyo nokubi.” (Hebhere 5:14) Ngoko, ukuze sikhule ngokupheleleyo, kufuneka sisebenzise amandla ethu engqiqo, singasoloko sixhomekeke komnye umntu ukuze asenzele izigqibo. Ngokubonisa umKristu akhonza naye indlela yokuqiqa ngeZibhalo, lo mdala uyamnceda ukuba enze inkqubela.

14. Abaqolileyo banokukubonakalisa njani ukuba bakholose ngoYehova?

¹⁴ Sinokuba nokholo ukuba uYehova uThixo ngomoya wakhe oyingcwele uya kuzikhokela iintliziyo zabanquli bokwenyaniso. Ngaloo ndlela, amaKristu aqolileyo anomdla kwiintliziyo zabazalwana bawo, ebabongoza njengoko umpostile uPawulos wenzayo. (2 Korinte 8:8; 10:1; Filemon 8, 9) UPawulos wayesazi ukuba ngokuyintloko ngabangemalungisa, kungekhona amalungisa, abafuna imithetho eneenkcukacha ukuze bahlale endleleni. (1 Timoti 1:9) Wabonakalisa ukuba nokholo kubazalwana bakhe, wayengabarhaneli okanye angabathembi. Elinye ibandla walibhalela oku: “Sinentembelo eNkosini ngokubhekisele kuni.” (2 Tesalonika 3:4) Ngokuqinisekileyo ukholo nentembelo awayenayo uPawulos yawakhuthaza kakhulu loo maKristu. Nanamhlanje abadala nabaveleli abahambahambayo banosukelo olufanayo. Hayi indlela alukhuthazo ngayo la madoda athembekileyo, njengoko esalusa umhlambi kaThixo ngothando!—Isaya 32:1, 2; 1 Petros 5:1-3.

Ukuphila Ngomthetho KaKristu

15. Yiyiphi eminye imibuzo esinokuzibuza yona ukuze sibone enoba siyawusebenzisa kusini na umthetho kaKristu kulwalamano lwethu nabazalwana bethu?

¹⁵ Sonke sifanele sizihlole rhoqo ukuze sibone enoba siphila yaye siyawuhlakulela kusini na umthetho kaKristu. (2 Korinte 13:5) Ewe, sonke sinokungenelwa ngokuzibuza oku: ‘Ngaba ndilukhuthazo okanye ndithand’ ukuhlab’ amadlala? Ngaba ndilungelelene okanye ndiyazibaxa izinto? Ngaba ndibonakalisa ulwazelelelo kwabanye okanye ngaba ndifuna kuviwe ngam?’ UmKristu akafanele axelele umzalwana wakhe ngamanyathelo afanele nangafanele awathabathe kwimibandela engakhankanywa ngokuthe ngqo eBhayibhileni.—Roma 12:1; 1 Korinte 4:6.

16. Sinokubanceda njani abo baneembono ezingakhiyo ngeziqu zabo, ngaloo ndlela sizalisekisa inxalenye ebalulekileyo yomthetho kaKristu?

¹⁶ Kula maxesha amanqam, kubalulekile ukuba sifune iindlela zokukhuthazana. (Hebhere 10:24, 25; thelekisa uMateyu 7:1-5.) Xa sibona abazalwana noodade wethu, ngaba sinikela ingqalelo kwiimpawu zabo ezintle okanye kubuthathaka babo? Ngamnye kuthi uxabisekile kuYehova. Okulusizi kukuba, asingabo bonke abavakalelwa ngaloo ndlela, kwanangeziqu zabo. Abaninzi banotyekelo lokubona iziphako nokungafezeki kuphela kwiziqu zabo. Ukuze sikhuthaze abanjalo, ngaba sinokuzama ukuthetha nomntu omnye okanye ababini kwintlanganiso nganye, sibachazele isizathu sokuba sibuxabisa ubukho babo nenxaxheba yabo ebalulekileyo ebandleni? Hayi indlela ekuvuyisa ngayo ukubothula umthwalo ngokwenjenjalo size ngaloo ndlela sizalisekise umthetho kaKristu!—Galati 6:2.

Umthetho KaKristu Uyasebenza!

17. Kungaziphi iindlela ezahlukahlukeneyo owubona usebenza ngazo umthetho kaKristu ebandleni?

¹⁷ Umthetho kaKristu uyasebenza kwibandla lamaKristu. Oku sikubona mihla le—xa amanye amaNgqina eshumayela iindaba ezilungileyo ngenzondelelo, xa ethuthuzelana yaye ekhuthazana, xa ezabalazela ukukhonza uYehova phezu kwazo nje iingxaki zawo ezinzima, xa abazali bezabalazela ukukhulisa abantwana babo ukuze bathande uYehova ngeentliziyo ezivuyayo, xa abaveleli befundisa iLizwi likaThixo ngothando nangokufudumeleyo, bekhuthaza umhlambi ukuba ube nenzondelelo yokukhonza uYehova ngonaphakade. (Mateyu 28:19, 20; 1 Tesalonika 5:11, 14) Xa sisebenzisa umthetho kaKristu ebomini bethu, hayi indlela evuya ngayo intliziyo kaYehova! (IMizekeliso 23:15) Ufuna baphile ngonaphakade bonke abawuthandayo umthetho wakhe ogqibeleleyo. KwiParadisi ezayo, siya kuphila kwixesha loluntu olufezekileyo, ixesha elingenazo izaphuli-mthetho, nakwixesha laxa lonke utyekelo lweentliziyo zethu luya kube lulawuleka. Hayi indlela ozuke ngayo umvuzo wokuphila ngokuvisisana nomthetho kaKristu!

[Umbhalo osemazantsi]

Ucinga Ntoni?

◻ Yintoni eyenze iNgqobhoko ayawuqonda umthetho kaKristu?

◻ Sinokuwusebenzisa njani umthetho kaKristu entsatsheni?

◻ Ukuze sisebenzise umthetho kaKristu ebandleni, yintoni esimele siyiphephe yaye yintoni esimele siyenze?

◻ Abadala basenokuwuthobela njani umthetho kaKristu kwiinkqubano zabo nebandla?

[Umfanekiso okwiphepha 23]

Umntwana wakho ukufuna ngokwenene ukuthandwa

[Umfanekiso okwiphepha 24]

Hayi indlela abalukhuthazo ngayo abalusi bethu abanothando!