Abaveleli Abahambahambayo—Izipho Ezikuhlobo Lwabantu
“Xa wenyukela phezulu wathabatha abathinjwa; wanikela izipho [ezikuhlobo] lwabantu.”—EFESE 4:8.
1. Nguwuphi umsebenzi omtsha owaziswa kulo lindixesha ngowe-1894?
NGAPHEZU kwenkulungwane eyadlulayo, iWatch Tower yakhupha isaziso ngento ethile entsha. Yachazwa ngokuthi “Lelinye Isebe Lomsebenzi.” Wawubandakanya ntoni lo msebenzi mtsha? Yayikukumiselwa kwale mihla komsebenzi wabaveleli abahambahambayo. Inkupho kaSeptemba 1, 1894, yalo lindixesha yachaza ukuba ukususela ngelo xesha ukusa phambili abazalwana abafanelekayo babeya kutyelela amaqela aBafundi beBhayibhile ‘ngenjongo yokubakha enyanisweni.’
2. Ziziphi iimbopheleleko abanazo abaveleli besiphaluka nabesithili?
2 Ngenkulungwane yokuqala yeXesha lethu Eliqhelekileyo, amabandla amaKristu ayetyelelwa ngabaveleli abanjalo abanjengoPawulos noBharnabhas. Injongo yala madoda athembekileyo ‘yayikukwakha’ amabandla. (2 Korinte 10:8) Namhlanje, sinandipha intsikelelo yokuba namadoda amaninzi awenza lo msebenzi ngendlela elungeleleneyo. IQumrhu Elilawulayo lamaNgqina kaYehova liye lawamisela njengabaveleli besiphaluka nabesithili. Umveleli wesiphaluka ukhonza amabandla anokuba ngama-20 kabini ngonyaka, ahlale iveki enye kwibandla ngalinye, uhlola iingxelo, unikela iintetho aze abe nenxaxheba kubulungiseleli basentsimini nabavakalisi boBukumkani belo bandla. Umveleli wesithili uba ngusihlalo kwindibano nganye yesiphaluka ebakho kanye ngonyaka kwiziphaluka eziliqela, uthabath’ inxaxheba kubulungiseleli basentsimini nebandla afikele kulo, yaye unikela ukhuthazo ngeentetho ezisekelwe eBhayibhileni.
Umoya Wabo Wokuzincama
3. Kutheni kufuneka abaveleli abahambahambayo babe nomoya wokuzincama?
3 Abaveleli abahambahambayo basoloko besendleleni. Loo nto iyodwa ifuna umoya wokuzincama. Ukusuka kwelinye ibandla ukuya kwelinye ngokufuthi kunokuba nzima, kodwa la madoda nabafazi bawo bakwenza oko bevuya. Omnye umveleli wesiphaluka wathi: “Umfazi wam undixhasa gqitha kwaye akakhalazi . . . ufanelwe kukunconywa gqitha ngenxa yomoya wakhe wokuzincama.” Abanye abaveleli besiphaluka bahamba iikhilomitha ezingaphezu kwe-1 000 ukusuka kwelinye ibandla ukuya kwelinye. Abaninzi bahamba ngeenqwelo-mafutha, kodwa abanye bahamba ngezithuthi zikawonke-wonke, bakhwele ibhayisekile, amahashe okanye bahambe ngeenyawo ukusuka kwenye indawo ukuya kwenye. Omnye umveleli wesiphaluka waseAfrika ude anyanzeleke ukuba awele umlambo etyathe umfazi wakhe ukuze afikelele kwelinye ibandla. Kuhambo lwakhe lobuvangeli, umpostile uPawulos kwakufuneka ajamelane nobushushu nengqele, ukulamba nokunxanwa, ukungalali ebusuku, iingozi ezahlukeneyo nentshutshiso enogonyamelo. Naye ‘wayenexhala ngenxa yawo onke amabandla’—abanalo abaveleli abahambahambayo namhlanje.—2 Korinte 11:23-29.
4. Iingxaki zempilo zinokubuchaphazela njani ubomi babaveleli abahambahambayo nabafazi babo?
4 Njengeqabane likaPawulos uTimoti, abaveleli abahambahambayo nabafazi babo maxa wambi baba neengxaki zempilo. (1 Timoti 5:23) Oku kuzisa ingcinezelo eyongezelelekileyo kubo. Omnye umfazi womveleli wesiphaluka uyachaza: “Ukusoloko unabazalwana kuyacinezela xa ndingaziva mnandi. Ekubeni ndiqalisile ukungayi exesheni, ndiye ndakufumanisa kunzima ngakumbi oku. Ukunyanzeleka ukuba siqokelele izinto zethu veki nganye size sifudukele kwenye indawo kulucelomngeni lokwenene. Ngokufuthi, kuye kufuneke ndiyeke yonke into ndize ndithandaze kuYehova ukuba andomeleze ukuze ndiqhubeke.”
5. Phezu kwazo nje iimvavanyo, nguwuphi umoya oye wabonakaliswa ngabaveleli abahambahambayo nabafazi babo?
5 Phezu kwazo nje iingxaki zempilo nezinye iimvavanyo, abaveleli abahambahambayo nabafazi babo bayayivuyela inkonzo yabo yaye babonakalisa uthando lokuzincama. Bambi baye babeka ubomi babo engozini ukuze banikele uncedo lokomoya ngamaxesha entshutshiso okanye emfazwe. Xa betyelela amabandla, baye babonakalisa umoya ofana nokaPawulos, owaxelela amaKristu aseTesalonika oku: “Saba ngabathantamisayo phakathi kwenu, njengaxa umama oncancisayo ebaphatha ngononophelo abakhe abantwana. Ngokunjalo, sinomsa wofefe ngani, sakholiswa kakuhle ukunikela kuni, kungekuphela nje iindaba ezilungileyo zikaThixo, kodwa kwanemiphefumlo yethu, ngenxa yokuba naba ziintanda kuthi.”—1 Tesalonika 2:7, 8.
6, 7. Yiyiphi impembelelo eyakhayo abanokuba nayo abaveleli abahambahambayo abakhutheleyo?
6 Njengabanye abadala ebandleni lamaKristu, abaveleli abahambahambayo ‘basebenza nzima ekuthetheni nasekufundiseni.’ Bonke abo badala ‘mababalelwe ekuthini bafanelwe yimbeko ephindiweyo.’ (1 Timoti 5:17) Umzekelo wabo unokungqineka uyingenelo ukuba, emva ‘kokondela indlela ephumelela ngayo ihambo yabo, sixelisa ukholo lwabo.’—Hebhere 13:7.
7 Abadala abathile abahambahambayo baye babaphembelela njani abanye? Elinye iNgqina likaYehova labhala: “Enjani ukuba ntle impembelelo uMzalwan’ uP—— aye waba nayo ebomini bam! Wayengumveleli ohambahambayo eMexico ukususela ngonyaka we-1960 ukusa phambili. Xa ndandisengumntwana, ndandilulindela ngolangazelelo nangovuyo utyelelo lwakhe. Xa ndandineminyaka elishumi ubudala, wandixelela oku, ‘Nawe uza kuba ngumveleli wesiphaluka.’ Ebudeni beminyaka enzima yeshumi elivisayo, ndandidla ngokumfuna kuba wayesoloko enamazwi obulumko awayendixelela wona. Wayephilela ukwalusa umhlambi! Ngoku ekubeni ndingumveleli wesiphaluka, ndisoloko ndizama ukuchitha ixesha ndinabaselula nokubabekela usukelo lokomoya njengoko wenzayo kum. Kwanakwiminyaka yokugqibela yobomi bakhe, phezu kwazo nje iingxaki zesifo sentliziyo, uMzalwan’ uP—— wayesoloko efuna ukunikela amazwi alukhuthazo. Ngosuku nje olungaphambi kokufa kwakhe ngoFebruwari 1995, wandipheleka ukuya kwindibano yosuku olukhethekileyo waza wabekela umzalwana othile ongumenzi weeplani zezakhiwo usukelo oluhle. Loo mzalwana ngokukhawuleza wafaka isicelo sokuya kukhonza eBheteli.”
Bayaxatyiswa
8. Ngoobani “izipho [ezikuhlobo] lwabantu” ezichazwe kwayabase-Efese isahluko 4, ibe ziyingenelo njani ebandleni?
8 Abaveleli abahambahambayo nabanye abadala abathiwe jize ngezabelo zenkonzo ngenxa yobubele obungasifanelanga bukaThixo babizwa ngokuba ‘zizipho ezikuhlobo lwabantu.’ Njengommeli kaYehova neNtloko yebandla, uYesu wenza ilungiselelo lala madoda okomoya ukuze sakhiwe njengabantu ngabanye yaye siqole. (Efese 4:8-15) Nasiphi na isipho sifanele sixatyiswe. Oku kuyinyaniso ngokukodwa ngesipho esisomelezayo ukuze siqhubeke sikhonza uYehova. Ngoko ke, singabonisa njani ukuba siyawuxabisa umsebenzi wabaveleli abahambahambayo? Ziziphi iindlela esinokubonisa ngazo ukuba ‘sihlala sibaphatha ngembeko abantu abalolo hlobo’?—Filipi 2:29.
9. Ziziphi iindlela esingabonakalisa ngazo uxabiso kubaveleli abahambahambayo?
9 Xa kukhutshwa isaziso sotyelelo lomveleli wesiphaluka, sinokuqalisa ukwenza amalungiselelo okuba nesabelo esizeleyo kwimisebenzi yebandla kuloo veki. Mhlawumbi sinokubekela bucala ixesha elongezelelekileyo ukuze sixhase ilungiselelo lenkonzo yasentsimini ebudeni botyelelo. Sisenokukwazi ukukhonza njengoovulindlela abangabancedani ebudeni baloo nyanga. Ngokuqinisekileyo siya kufuna ukuwasebenzisa amacebiso omveleli wesiphaluka ukuze siphucule kubulungiseleli bethu. Ukuwamkela ngolo hlobo amacebiso akhe kuya kuba yingenelo kuthi yaye kuya kumqinisekisa ukuba utyelelo lwakhe luluncedo. Ewe, abaveleli abahambahambayo batyelela amabandla ukuze basakhe, kodwa nabo bayakufuna ukwakhiwa ngokomoya. Kwakubakho amaxesha uPawulos awayefuna ngawo ukhuthazo, ibe ngokufuthi wayecela amaKristu akhonza nawo ukuba amthandazele. (IZenzo 28:15; Roma 15:30-32; 2 Korinte 1:11; Kolose 4:2, 3; 1 Tesalonika 5:25) Abaveleli abahambahambayo bale mihla ngokufanayo bafuna sibathandazele yaye sibakhuthaze.
10. Sinokunceda njani ukuze senze umsebenzi womveleli ohambahambayo ube ngovuyisayo?
10 Ngaba sikhe samxelela umveleli wesiphaluka nomfazi wakhe indlela esiluxabisa ngayo utyelelo lwabo? Ngaba siyambulela ngesiluleko esiluncedo asinika sona? Ngaba siyamazisa xa amacebiso akhe enkonzo yasentsimini esandisa uvuyo lwethu kubulungiseleli? Ukuba senjenjalo, oko kuya kumenza awuvuyele umsebenzi wakhe. (Hebhere 13:17) Omnye umveleli wesiphaluka eSpeyin wagqabaza ngokukhethekileyo ngendlela yena nomfazi wakhe abawaxabisa ngayo amazwi ombulelo abaye bawabhalelwa emva kokutyelela amabandla. Uthi: “Siyawagcina la makhadi size siwafunde xa siziva sidimazekile. Alukhuthazo lokwenene.”
11. Kutheni sifanele sibaxelele abafazi babaveleli besiphaluka nabesithili ukuba siyabathanda yaye siyabaxabisa?
11 Ngokuqinisekileyo umfazi womveleli ohambahambayo uyangenelwa kumazwi okuncoma. Uye wazincama gqitha ukuze axhase umyeni wakhe kule nkonzo. Aba dade banokholo bayawuncama umnqweno wemvelo wokuba nekhaya elilelabo yaye, ngamaxesha amaninzi, nalowo wokuba nabantwana. Intombi kaYifeta yayingomnye wabakhonzi bakaYehova owayekulungele ukuncama ithuba lakhe lokuba nomyeni nokuba nentsapho ngenxa yesifungo esenziwa nguyise. (ABagwebi 11:30-39) Kwajongwa njani ukuzincama kwakhe? Incwadi yaBagwebi 11:40 ithi: “Imihla kamihla, iintombi zakwaSirayeli ziye ziyibonge intombi kaYifeta umGiliyadi, imihla emine ngomnyaka.” Hayi indlela ekuba kuhle ngayo xa sisenza umgudu wokubaxelela abafazi babaveleli besiphaluka nabesithili ukuba siyabathanda yaye siyabaxabisa!
“Musani Ukulibala Ukubuk’ Iindwendwe”
12, 13. (a) Sisiphi isiseko esingokweZibhalo sokubonakalisa ukubuk’ iindwendwe kubaveleli abahambahambayo nabafazi babo? (b) Zekelisa indlela ukubuk’ iindwendwe okunjalo okunokuba yingenelo ngayo macala.
12 Ukubuk’ iindwendwe yenye indlela yokubonakalisa uthando noxabiso ngabo benza umsebenzi wamaKristu wokuhambahamba. (Hebhere 13:2) Umpostile uYohane wamncoma uGayo ngenxa yokubonakalisa ukubuk’ iindwendwe kubavangeli abahambahambayo ababetyelela ibandla. UYohane wabhala: “Ntanda, wenza umsebenzi wokuthembeka kuko nakuphi na okwenzela abazalwana, abasemzini nokwenza, abaye banikela ubungqina ngothando lwakho phambi kwebandla. Aba uya kuba uyakholisa ukubandulula ngohlobo olufanele uThixo. Kuba kwakungenxa yegama lakhe abathi baphuma, bengathabathanga nantoni na kubantu beentlanga. Thina, ke ngoko, sibophelelekile ukubamkela abantu abanjalo ngomoya wokubuk’ iindwendwe, ukuze sibe ngabasebenzi abangamadlelane kuyo inyaniso.” (3 Yohane 5-8) Namhlanje, sinokuwuhambisela phambili umsebenzi wokushumayela ngoBukumkani ngokubonakalisa ukubuk’ iindwendwe okufanayo kubaveleli abahambahambayo nabafazi babo. Kakade ke, abadala bebandla bafanele baqiniseke ukuba indawo abafikela kuyo iyanelisa, kodwa omnye umveleli wesithili wathi: “Ukusebenza kwethu nabazalwana akuxhomekekanga ekuthini ngubani osenzela into ethile. Asifuni nokuba bayicinge abantu into enjalo. Simele sikulungele ukwamkela ukubuk’ iindwendwe kwakhe nawuphi na kubazalwana bethu, enoba usisityebi okanye ulihlwempu.”
13 Ukubuk’ iindwendwe kunokuba yingenelo macala. UJorge, owayengumveleli wesiphaluka ngoku okhonza eBheteli uthi: “Ekhaya, sasidla ngokumema abaveleli abahambahambayo ukuba basityelele. Ndivakalelwa kukuba ezo zihlandlo zandinceda ngaphezu kokuba ndandicinga ngoko. Xa ndandikwishumi elivisayo, ndandineengxaki zokomoya. Le nto yamxhalabisa umama kodwa wayengazi ukuba angenza ntoni na ukuze andincede ibe wacela umveleli wesiphaluka ukuba athethe nam. Ekuqaleni ndandimbaleka, ekubeni ndandisoyika ukugxekwa. Kodwa ukuba nobuhlobo kwakhe kwandenza ndakhululeka. Wandimema ukuba ndiye kutya isidlo naye ngomnye uMvulo, ibe ndazityand’ igila kuye kuba ndaziva ndiqinisekile ukuba wayendiqonda. Waphulaphula ngenyameko. Amacebiso akhe aluncedo asebenza, ibe ndaqalisa ukwenza inkqubela ngokomoya.”
14. Kutheni sifanele sibe noxabiso kunokuba sibagxeke abadala abahambahambayo?
14 Umveleli ohambahambayo uzama ukuba luncedo ngokomoya kwabancinane nakwabakhulu ngokufanayo. Ngoko, ngokuqinisekileyo sifanele sibonakalise uxabiso ngemigudu yakhe. Noko ke, kuthekani ukuba besinokumgxeka ngenxa yobuthathaka bakhe okanye simbek’ amabala simthelekisa nabanye abaye batyelela ibandla? Ngokunokwenzeka, oku bekuya kumtyhafisa gqitha. Kwakungamkhuthazi uPawulos ukuva umsebenzi wakhe ugxekwa. Kubonakala ngathi, amanye amaKristu aseKorinte ayemnyelisa ngenxa yenkangeleko yakhe nobuchule bakhe bokuthetha. Wacaphula abo bagxeki besithi: “Iileta zakhe zinzima yaye zinamandla, kodwa ubukho bakhe ngobuqu bubuthathaka yaye intetho yakhe idelekile.” (2 Korinte 10:10) Noko ke, okuvuyisayo kukuba ngokuqhelekileyo abaveleli abahambahambayo beva amazwi oxabiso olunothando.
15, 16. Uthando nenzondelelo ebonakaliswa ngabakhonza kunye nabo ibachaphazela njani abaveleli abahambahambayo nabafazi babo?
15 Omnye umveleli wesiphaluka waseMzantsi Merika uhamba usuku lonke kwiindlela ezinodaka ukuze atyelele abazalwana noodade bakhe bokomoya kummandla olawulwa ngabagrogrisi. Ubhala oku: “Kuyachukumisa ukubona indlela abazalwana ababonakalisa ukuluxabisa ngayo utyelelo. Nangona kufuneka umgudu omkhulu ukuze ndifike apho, ndijamelane neengozi neenzima ezininzi, yonke loo nto ibuyekezwa ngothando nenzondelelo ebonakaliswa ngabazalwana.”
16 Umveleli wesiphaluka waseAfrika ubhala oku: “Ngenxa yothando olwabonakaliswa ngabazalwana kuthi, sayithanda gqitha intsimi yaseTanzania! Abazalwana babekulungele ukufunda kuthi, ibe babekuvuyela ukuba nathi emakhayeni abo.” Kwakukho ulwalamano olunothando nolonwabisayo phakathi kukampostile uPawulos nesibini esitshatileyo esingamaKristu senkulungwane yokuqala uAkwila noPriska. Enyanisweni, uPawulos wathi ngaso: “Dluliselani imibuliso yam kuPriska noAkwila abasebenzi abangamadlelane kunye nam kuKristu Yesu, ababeke esichengeni iintamo zabo ngenxa yomphefumlo wam, ingendim kuphela owenza imibulelo kubo kodwa kwanawo onke amabandla eentlanga.” (Roma 16:3, 4) Abaveleli abahambahambayo nabafazi babo banombulelo ngokuba nabahlobo abangooAkwila nooPriska bale mihla abazibhokoxayo ekubukeni iindwendwe nabadlelana nabo.
Ukomeleza Amabandla
17. Kutheni kunokutshiwo ukuba ilungiselelo labaveleli abahambahambayo lelobulumko, yaye bayifumana phi imiyalelo?
17 UYesu wathi: “Ubulumko bungqineka bububulungisa ngemisebenzi yabo.” (Mateyu 11:19) Ubulumko belungiselelo labaveleli abahambahambayo bubonakala ngokuba linceda ukomeleza amabandla abantu bakaThixo. Ebudeni bohambo lwesibini lukaPawulos lobuvangeli, yena noSilas ‘bayityhutyha iSiriya neKilikiya, besomeleza amabandla’ ngempumelelo. Incwadi yeZenzo isixelela ukuba: “Njengoko babehamba betyhutyha izixeko babeye banikele kwabo balapho imimiselo ukuba bayigcine leyo kwakugqitywe kuyo ngabapostile namadoda amakhulu awayeseYerusalem. Ngoko ke, eneneni, amabandla aqhubeka eqiniswa elukholweni yaye esanda ngenani imihla ngemihla.” (IZenzo 15:40, 41; 16:4, 5) Abaveleli abahambahambayo bale mihla bafumana imiyalelo kwiZibhalo nakwiimpapasho ‘zekhoboka elithembekileyo neliyingqondi,’ njengamanye amaKristu.—Mateyu 24:45.
18. Abaveleli abahambahambayo bawomeleza njani amabandla?
18 Ewe, abadala abahambahambayo bamele baqhubeke bezondla kwitafile yokomoya kaYehova. Bamele baqhelane kakuhle neendlela nolwalathiso olulandelwa yintlangano kaThixo. Anokwandula ke amadoda anjalo abe yintsikelelo yokwenene kwabanye. Ngokumisela umzekelo omhle wenzondelelo kwinkonzo yasentsimini, anokunceda abo anqula kunye nabo baphucule kubulungiseleli bamaKristu. Iintetho ezisekelwe eBhayibhileni ezinikelwa ngaba badala batyelelayo ziyabakha ngokomoya abaphulaphuli. Ngokunceda abanye basebenzise isiluleko seLizwi likaThixo, bakhonze ngemvisiswano nabantu bakaYehova emhlabeni wonke, baze basebenzise amalungiselelo okomoya awenziwa nguThixo ‘ngekhoboka elithembekileyo,’ abaveleli abahambahambayo bomeleza amabandla abanelungelo lokuwatyelela.
19. Yiyiphi imibuzo emele iqwalaselwe?
19 Xa intlangano kaYehova yamisela umsebenzi wabaveleli abahambahambayo kuBafundi beBhayibhile kwiminyaka emalunga nekhulu eyadlulayo, lo lindixesha wathi: “Siza kukhangela iziphumo nolwalathiso olubhekele phaya lweNkosi.” Ukhokelo lukaYehova luye lwabonakala ngokucacileyo. Ngenxa yentsikelelo yakhe phantsi kolwalathiso lweQumrhu Elilawulayo, lo msebenzi uye wanda waza waphuculwa kwiminyaka edluleyo. Ngenxa yoko, amabandla amaNgqina kaYehova emhlabeni wonke ayomelezwa elukholweni yaye ayanda ngenani suku ngalunye. Kuyabonakala ukuba uYehova uyawusikelela umoya wokuzincama wezi zipho ezikuhlobo lwabantu. Kodwa abaveleli abahambahambayo banokuwenza njani ngempumelelo umsebenzi wabo? Yintoni injongo yabo? Banokuba yingenelo njani?
Ubuya Kuphendula Njani?
◻ Ziziphi ezinye zeembopheleleko zabaveleli besiphaluka nabesithili?
◻ Kutheni kufuneka abaveleli abahambahambayo babe nomoya wokuzincama?
◻ Lunokubonakaliswa njani uxabiso ngomsebenzi wabadala abahambahambayo nabafazi babo?
◻ Banokwenza ntoni abaveleli abahambahambayo ukuze benze amabandla aqine elukholweni?
[Umfanekiso okwiphepha 10]
Ukusoloko besendleleni kufuna umoya wokuzincama
[Umfanekiso okwiphepha 13]
Ngaba ukhe wabonakalisa ukubuk’ iindwendwe kubaveleli abahambahambayo nabafazi babo?