Ngaba Uxelisa UThixo Wethu Ongakhethi Buso?

UKUNGAKHETHI BUSO—kunokufunyanwa phi? Kukho Mntu uthile ongakhethi buso konke konke, ongenakhethe, nalucalu-calulo. NguYehova uThixo, uMdali woluntu. Noko ke, ngokuphathelele abantu, umbhali oliNgesi wenkulungwane ye-19 uCharles Lamb ethetha phandle wabhala oku: “Ngamazwi acacileyo, ndinekhethe ngokugqithiseleyo—ndinezinto endizithandayo nendingazithandiyo.”

Xa kuthethwa ngokungakhethi buso, umntu usilela gqitha kuko. Kwiinkulungwane ezininzi ezadlulayo uKumkani uSolomon wakwaSirayeli waphawula ukuba ‘umntu ugunyazela umntu, kube kubi kuye.’ (INtshumayeli 8:9) Intiyo yobuhlanga, ungquzulwano lweentlanga nembambano ehlal’ ihleli yentsapho zanda okomlilo wedobo. Ngoko ke, ngaba kusengqiqweni ukukholelwa kwelokuba, abantu ngokwabo, banokuvelisa ibutho labantu elingakhethi buso?

Kufuneka umgudu onyanisekileyo ukulawula izimo zethu zengqondo nokuzihluba kuwo nawuphi na umkhethe omilileyo. (Efese 4:22-24) Singawuqondanga usenokulawula izimo zethu zengqondo ezabangelwa yimeko-bume yethu engokwentlalo nengokwemfundo yaye oko kwamila entsatsheni yethu, kuhlanga nakwimvelaphi yobuzwe. Olu tyekelo lubonakala lungenamsebenzi ngokufuthi luyazinza luze luphazamise izimo zengqondo ezikhokelela ekubeni nekhethe. Umqondisi-mthetho waseSkotlani nokwangumhleli uLord Francis Jeffrey uyakuvuma oku esithi: “Ayikho into onokuhlala nayo ixesha elide ungayiqondi njengokumila kwekhethe.”

ULenaa ngomnye wabantu abavumayo ukuba kufuneka umgudu onyanisekileyo ukulwa notyekelo lokukhetha ubuso. Ukuphelisa ikhethe elikuwe, uthi, “kungumsebenzi omkhulu ngenxa yokuba ukukhuliselwa kokuthile kunempembelelo enkulu.” ULena kwakhona uyavuma ukuba ukukhunjuzwa ngokuzingisileyo kuyafuneka.

Ingxelo KaYehova Yokungakhethi Buso

UYehova ngumzekelo ogqibeleleyo wokungakhethi buso. Ukususela kumaphepha okuqala eBhayibhile, sifunda ngendlela awabonakalisa ngayo ukungakhethi buso kwindlela awaqhubana ngayo nabantu. Singafunda lukhulu kule mizekelo ibalaseleyo nekhumbuzayo.

UYehova wabonakalisa ukungakhethi buso ngendlela awenza ngayo izinto khon’ ukuze umpostile uPetros ongumYuda avakalise iindaba ezilungileyo kuKorneli nakwabanye beeNtlanga ngowama-36 C.E. Ngelo xesha uPetros wathi: “Ngokuqinisekileyo ndiyaqonda ukuba uThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.”—IZenzo 10:34, 35.

Kuko konke ukuqhubana kwakhe nentsapho yabantu, uYehova ebesoloko ebonisa ukungakhethi buso. UKristu uYesu ethetha ngoYise wathi: “Elenza liphume ilanga lakhe kubantu abangendawo nabalungileyo esenza kune nemvula kubantu abangamalungisa nakwabangengomalungisa.” (Mateyu 5:45) Ngokubhekele phaya ephakamisa uYehova njengoThixo ongakhethi buso, uPetros wangqina esithi: “Unomonde kuni ngenxa yokuba akanqweneli ukuba kutshabalale nabani na kodwa unqwenela ukuba bonke bafikelele enguqukweni.”—2 Petros 3:9.

Ngemihla kaNowa, xa ‘ububi babantu babandile ehlabathini, konke ukuyila kweengcinga zentliziyo yabo kubububi bodwa imihla yonke,’ uYehova walitshabalalisa elo hlabathi loluntu. (Genesis 6:5-7, 11, 12) Noko ke, ngokomyalelo kaThixo yaye bemjongile abantu besizukulwana sakhe, uNowa wakha umkhombe. Ngoxa yena noonyana bakhe babesakha umkhombe, uNowa ‘wayekwangumshumayeli wobulungisa.’ (2 Petros 2:5) Phezu kwako nje ukuba iintliziyo zabantu beso sizukulwana zazityekele kubungendawo, uYehova ngokungakhethi buso wathumela isigidimi esicacileyo. Washukumisa iingqondo neentliziyo zabo ngokuthi kuNowa makakhe aze ashumayele. Babenalo ithuba lokuthabatha inyathelo, kodwa kunoko “abazange banikele ngqalelo de wafika umkhukula waza wabatshayela bonke.”—Mateyu 24:39.

Onjani ukubalasela umzekelo kaYehova wokungakhethi buso! Kule mihla yokugqibela yamanqam, oku kushukumisa abakhonzi bakaThixo ukuba ngokufanayo bavakalise iindaba ezilungileyo zoBukumkani bengakhethi buso. Ngaphezu koko, abahlehli ekuwuvakaliseni umhla kaYehova wempindezelo. Phambi kwabantu bonke, bengakhethi buso bavakalisa isigidimi sikaYehova ukuze siviwe ngabantu bonke.—Isaya 61:1, 2.

Amadinga kaYehova koosolusapho uAbraham, uIsake noYakobi akwenza kwacaca ukuba unguThixo ongakhethi buso. Kumnombo wentsapho yabo kwakuya kuza Lowo unyuliweyo ‘ezaziya kusikelelwa ngaye nangembewu yakhe zonke izizwe zehlabathi.’ (Genesis 22:18; 26:4; 28:14) UKristu Yesu wangqineka enguLowo unyuliweyo. Ngokufa nangokuvuka kukaYesu, uYehova walungiselela indlela yosindiso kulo lonke uluntu oluthobelayo. Ewe, iingenelo zedini lentlawulelo likaKristu zifumaneka zingakhethe bani.

Ngemihla kaMoses, ukungakhethi buso kukaYehova kwabonakala ngendlela ebangel’ umdla ngokuphathelele iintombi zikaTselofehadi. Loo mabhinqa mahlanu ayejamelene nengxaki ngokuphathelele ilifa likayise kwiLizwe Ledinga. Oku kwabangelwa kukuba ngokwesiko lakwaSirayeli ilifa lalizuzwa ngoonyana bendoda. Noko ke, uTselofehadi wafa engashiyanga nyana ukuzuza elo lifa. Ngoko ke, iintombi ezintlanu zikaTselofehadi zazisa isicelo sazo ukuba samkelwe ngokungenamkhethe zema phambi kukaMoses, zaza zathi: “Yini na ukuba igama likabawo licinywe phakathi kwemizalwane yakhe, kuba engenanyana? Sinike ilifa phakathi kwabazalwana bakabawo.” UYehova waziphulaphula izicelo zazo waza wayalela uMoses esithi: “Xa ithe yafa indoda, ingenanyana, nolihambisela ilifa layo kwintombi yayo.”—Numeri 27:1-11.

Onjani umzekelo wothando olungenamkhethe! Ukuqinisekisa ukuba ilifa lesinye isizwe lalingadluliselwa kwesinye xa iintombi zendile, kwakufuneka kuphela “zendele emzalwaneni wesizwe sikayise.”—Numeri 36:5-12.

Imbonakaliso engakumbi yokungakhethi buso kukaYehova ibonakala ngemihla yomgwebi nomprofeti uSamuweli. UYehova wamyalela ukuba athambise ukumkani omtsha wohlanga lakwaYuda kwintsapho kaYese ummi weseBhetelehem. Kodwa uYese wayenoonyana abasibhozo. Yayingubani owayeza kuthanjiswa njengokumkani? USamuweli wathabatheka yimbonakalo kaEliyabhi. Noko ke, uYehova akakhohliswa yimbonakalo yangaphandle. Wamxelela oku uSamuweli: “Musa ukukhangela imbonakalo yakhe nokuphakama kwesithomo sakhe . . . Andikhangeli njengokukhangela komntu; ngokuba umntu ukhangela ngaphandle, uYehova ukhangela intliziyo.” Konyulwa uDavide, oyena nyana mncinane kaYese.—1 Samuweli 16:1, 6-13.

Ukufunda Kwindlela kaYehova Yokungakhethi Buso

Abadala abangamaKristu benza kakuhle ukuxelisa uYehova ngokukhangela iimpawu zokomoya zalowo bakholwa naye. Kulula ukugweba ubani ngokwemilinganiselo yethu, sivumele iimvakalelo zethu zimfamekise indlela esigweba ngayo. Kunjengokuba omnye umdala wathi, “Ndizama ukuqhubana nabanye ngendlela ekholisa uYehova, kungekhona ngokusekelwe kwiingcamango namava endinawo.” Hayi indlela ekuyingenelo ngayo xa bonke abakhonzi bakaYehova besebenzisa iLizwi lakhe njengomlinganiselo wabo!

Imizekelo yangaphambili yeBhayibhile isinceda sixhathise iimvakalelo ezingapheliyo zobuhlanga nomkhethe wobuzwe. Ngokuxelisa ukungakhethi buso kukaYehova, sikhusela ibandla lobuKristu kwikhethe, ucalu-calulo nokukhetha ubuso.

Umpostile uPetros wafunda ukuba “uThixo akakhethi buso.” (IZenzo 10:34) Ukukhetha ubuso kuchasene nokungabi namkhethe yaye kwaphula imigaqo yothando nomanyano. UYesu wayenomdla kumahlwempu, ababuthathaka nabathobekileyo yaye wawenza khaphukhaphu umthwalo wabo. (Mateyu 11:28-30) Wayehluke mpela kwiinkokeli zonqulo, zamaYuda ezazibagagamela abantu, zibathwalisa umthwalo onzima wemithetho. (Luka 11:45, 46) Ukwenza oku ngokukhetha ubuso kwizinhanha nabo babalulekileyo ngokuqinisekileyo kwakungavisisani neemfundiso zikaKristu.—Yakobi 2:1-4, 9.

Namhlanje, abadala abangamaKristu bazithoba phantsi kobuntloko bukaKristu yaye babonisa ukungakhethi buso kubo bonke abantu bakaYehova abazahluleleyo. Njengokuba ‘besalusa umhlambi kaThixo abawunyamekelayo,’ bayakuphepha ukubonisa ukukhetha ubuso ngenxa yemeko yezoqoqosho, ubuntu obahlukeneyo, okanye yamaqhina entsapho. (1 Petros 5:2) Ngokuxelisa uThixo ongakhethi buso nangokuthobela isilumkiso sakhe nxamnye nezenzo zokukhetha ubuso, abadala abangamaKristu bakhuthaza umoya wokungakhethi buso ebandleni.

Ibandla lobuKristu lamaNgqina kaYehova libubuzalwana bezizwe ngezizwe. Libubungqina obucacileyo bokuba ibutho labantu elingenamkhethe, lingakho ngokwenene kulawulo lukaYesu Kristu. AmaNgqina ‘ambathe ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.’ (Efese 4:24) Ewe, afunda kumzekelo ogqibeleleyo kaThixo ongakhethi buso, uYehova, yaye anethemba lobomi obungunaphakade kwihlabathi elitsha elingakhethi buso.—2 Petros 3:13.

[Umbhalo osemazantsi]

[Umfanekiso okwiphepha 26]

Umpostile uPetros wafunda ukuba uThixo akakhethi buso