Ulutsha Olumkhumbulayo UMdali Walo

“Uze umkhumbule ke uMdali wakho ngemihla yobutsha bakho.”—INTSHUMAYELI 12:1.

1. Ngawaphi amazwi enkwenkwana eneminyaka eli-11 ubudala abonisa ukuba uMdali ungumntu wokwenene kuyo?

HAYI indlela ekukuhle ngayo xa abaselula bethetha yaye besenza izinto ngendlela ebonisa ukuba uYehova uThixo bamgqala njengomntu wokwenene abamthandayo nabafuna ukumkholisa! Enye inkwenkwana eneminyaka eli-11 ubudala yathi: “Xa ndindodwa ndize ndilunguze ngefestile, ndiye ndibone indlela emangalisa ngayo indalo kaYehova. Emva koko ndiye ndibe nombono wendlela eya kuba ntle ngayo iParadesi ezayo nendlela endiya kukwazi ngayo ukudlala nezilwanyana.” (Isaya 11:6-9) Yongezelela yathi: “Xa ndindodwa, ndiye ndithandaze kuYehova. Ndiyazi ukuba akasayi kukruquka kuba ndisoloko ndithetha naye ngalo lonke ixesha. Ndiyazi ukuba usoloko endijongile.” Ngaba uMdali wethu ungumntu wokwenene kuwe kanye njengokuba kunjalo kule nkwenkwana?

Ngaba UThixo Umgqala Njengomntu Wokwenene?

2. (a) UMdali wakho unokuba nguye njani umntu wokwenene kuwe? (b) Yiyiphi indima enokuphunyezwa ngabazali ukunceda abantwana babo baqonde ukuba uThixo ungumntu wokwenene?

² Ukuze uYehova namadinga akhe abe zizinto zokwenene kuwe, kuqala umele ufunde ngaye nangekamva elimangalisayo akugcinele lona kwihlabathi elitsha lobulungisa elichazwe eBhayibhileni. (ISityhilelo 21:3, 4) Ukuba abazali bakho bakufundisile ngezi zinto, ufanele ube nombulelo kuba oku kukwenza ukwazi ukuthobela lo myalelo uphefumlelweyo: “Uze umkhumbule ke uMdali wakho.” (INtshumayeli 12:1, akekeliswe sithi.) Ngokuphathelele ingqeqesho yabazali eyayifumana iselula, enye intwazana yathi: “Yonke into ekhoyo ebomini isikhumbuza ngoYehova. Esi yayisisikhokelo sokuba ndihlale ndimkhumbula uMdali wam.” Elinye ibhinqa eliselula lathi: “Ndiya kuhlala ndinombulelo kubazali bam ngokundifundisa ukuba uYehova ungumntu wokwenene. Bandifundisa indlela yokumthanda baza bandixelela ngovuyo lokumkhonza ixesha elizeleyo.”

3, 4. Yintoni enokukunceda ucinge ngoYehova njengomntu wokwenene?

³ Sekunjalo, abaninzi bakufumanisa kunzima ukucinga ngoThixo njengomntu wokwenene onomdla kubo. Ngaba unjalo nawe? Omnye umfana wakwazi ukucinga ngoThixo njengomntu wokwenene ngoncedo lwamazwi eMboniselo awayesithi: “Asiyazi indlela omkhulu ngayo umzimba kaYehova uThixo.” Kakade ke, ubungangamsha bukaThixo abuxhomekekanga kubukhulu okanye kwinkangeleko yakhe, njengoko isivakalisi esilandelayo saloo Mboniselo sathi: “Ubukhulu bakhe bokwenene buxhomekeke kubuThixo bakhe,” ngenene, unguThixo othembekileyo, onemfesane, onothando noxolelayo.a (Eksodus 34:6; Duteronomi 32:4; INdumiso 86:5; Yakobi 5:11) Ngaba umgqala njengomntu onjalo uYehova, umhlobo onokumthemba nonokuba nolwalamano olusenyongweni naye?—Isaya 41:8; Yakobi 2:23.

⁴ UYesu wabanceda abalandeli bakhe bokuqala ukuba babe nolwalamano olusondeleyo noThixo. Ngaloo ndlela, xa umpostile uYohane wabhala ngovuko lobomi basezulwini awayeza kulufumana, uYohane wathi: “Siya kuba [njengoThixo], ngenxa yokuba siya kumbona kanye njengoko anjalo.” (1 Yohane 3:2; 1 Korinte 15:44) Nolutsha lwanamhlanje lunokuncedwa ukuba lumgqale uThixo njengomntu wokwenene, umntu olunokumazi kakuhle nangona lungenakumbona ngokoqobo. Omnye umfana wathi: “Abazali bam bandenza ndamkhumbula uYehova ngokundibuza imibuzo emininzi, enjengale, ‘Ebeya kuthini uYehova? Ungakuchaza njani oku ngamazwi akho? Kuthetha ukuthini oko.’” Ngaba imibuzo enjalo ayisenzi sicinge ngolwalamano lwethu lobuqu noThixo?

Oko Kuthethwa Kukumkhumbula

5. Yiyiphi imizekelo eseBhayibhileni ebonisa ukuba ukukhumbula umntu othile kubandakanya okungakumbi kunokukhumbula igama lakhe?

⁵ Ukuthobela umyalelo othi, “Uze umkhumbule ke uMdali wakho,” kuthetha okungakumbi kunokucinga nje ngoYehova. Kubandakanya isenzo, ukwenza oko kumkholisayo. Xa isaphuli-mthetho sabongoza uYesu sisithi, “Uze undikhumbule xa uthe wangena ebukumkanini bakho,” sasifuna uYesu enze okungakumbi kunokukhumbula nje igama laso. Sasifuna uYesu asenzele okuthile, asivuse. (Luka 23:42) Ngokufanayo, uYosefu owayesentolongweni wayelindele ukuba enzelwe okuthile xa wacela umngcamli wewayini kaFaro ukuba amkhumbule kuFaro. Yaye xa uYobhi wabongoza uThixo esithi, “Undikhumbule,” uYobhi wayecela ukuba uThixo amvuse kwixesha elizayo.—Yobhi 14:13, akekeliswe sithi; Genesis 40:14, 23.

6. Igama lesiHebhere elithetha “ukukhumbula” liyidlulisela njani ingcamango yothando ngento okanye umntu okhunjulwayo?

⁶ Enye incwadi ithi igama lesiHebhere eliguqulelwe ngokuthi “ukukhumbula” ngokufuthi lithetha “uthando olusengqondweni nesenzo esihamba nokukhumbula.” Ukubandakanyeka ‘kothando’ kwigama elithi “ukukhumbula” kunokubonwa kumazwi ‘endibandiba’ eyayisentlango: “Sikhumbula iintlanzi esibe sizidla eYiputa.” Kanye njengokuba uYobhi wabongoza uThixo ukuba amkhumbule, ngoko noHezekiya, uNehemiya, uDavide nomdumisi ongachazwanga ngagama bacela ukuba bakhunjulwe ngokunothando nguYehova ngenxa yokuthembeka kwabo.—Numeri 11:4, 5, akekeliswe sithi; 2 Kumkani 20:3; Nehemiya 5:19; 13:31; INdumiso 25:7; 106:4.

7. Ukuba simkhumbula ngothando uThixo, oku kuya kuyichaphazela njani ihambo yethu?

⁷ Ngoko sisenokubuza, ‘Ngaba simkhumbula ngokunothando uMdali wethu size sikuphephe ukwenza nantoni na enokumkhathaza okanye imenze buhlungu?’ Enye intwazana yathi: “Umama wandenza ndaqonda ukuba uYehova unazo iimvakalelo, yaye kwasebuntwaneni, ndandiqonda ukuba izenzo zam ziyamchaphazela.” (INdumiso 78:40-42) Omnye wachaza: “Ndandisazi ukuba izenzo zam zaziya kwenza uYehova akwazi okanye angakwazi ukukuphendula ukungcikiva kukaSathana. Ndandifuna ukuyivuyisa intliziyo kaYehova, ngoko oko kwandinceda yaye kusaqhubeka kundinceda nanamhlanje.”—IMizekeliso 27:11.

8. (a) Luluphi usukelo oluya kubonisa ukuba simkhumbula ngothando uYehova? (b) Yiyiphi imibuzo ekuya kuba bubulumko ukuba ulutsha luzibuze yona?

⁸ Liyinyaniso elokuba kweli hlabathi lingendawo, akusoloko kulula ukumkhumbula uYehova ngokuba nesabelo ngokupheleleyo kwizinto ezimkholisayo. Sekunjalo, hayi indlela ebekunokuba kuhle ngayo ukuba ubunokuxelisa uTimoti oselula owayephila ngenkulungwane yokuqala—singasathethi ngamawaka olutsha lwanamhlanje oloyik’ uThixo—ngokungenela inkonzo yamaKristu yexesha elizeleyo njengomlungiseleli onguvulindlela! (IZenzo 16:1-3; 1 Tesalonika 3:2) Noko ke, kusenokuphakama umbuzo othi, Ngaba ungakwazi ukuzixhasa kubulungiseleli bobuvulindlela? Yaye ukuba kamva uyatshata, ngaba uya kukwazi ukuyilungiselela intsapho yakho? (1 Timoti 5:8) Le yimibuzo ebalulekileyo, yaye kubalulekile nokuba uyicingisise nzulu.

Ukufunda Ngenjongo

9. Ziziphi izigqibo olufanele luzenze ulutsha mayela nemfundo yehlabathi?

⁹ Njengoko kusiya kuba nzima kwibutho loluntu, kusenokufuneka imfundo ethe chatha ukuze ukwazi ukufumana umsebenzi wokuzixhasa kwinkonzo yobuvulindlela. Usenokuba uphawulile ukuba nabantu abanemfundo yaseyunivesithi kufuneka babuyele esikolweni ukuze bafumane ubuchule obufunwa ngabaqeshi banamhlanje. Ngoko nina baselula abafuna ukukholisa uThixo niza kufuna imfundo engakanani? Isigqibo esihle sifanele senziwe kucingwa ngomyalelo ophefumlelweyo othi: “Uze umkhumbule ke uMdali wakho.”

10. Yiyiphi eyona mfundo isemagqabini esinokuyifumana?

¹⁰ Kakade ke, uya kufuna oko nabantu abaninzi behlabathi abakugqala njengemfundo esemagqabini—leyo ifumaneka ngokuhlolisisa iLizwi likaThixo ngenyameko. Umbhali ongumJamani uJohann Wolfgang von Goethe wathi: “Okukhona [uluntu] luhambela phambili ngenkcubeko, liya kuvuleka ngakumbi ithuba lokuba kusetyenziswe iBhayibhile njengesiseko nesixhobo semfundo.” Ewe, ukufundisisa iBhayibhile kuya kukwenza ubuxhobele kakuhle ngakumbi ubomi kunayo nayiphi na enye imfundo!—IMizekeliso 2:6-17; 2 Timoti 3:14-17.

11. (a) Nguwuphi owona msebenzi ubalulekileyo esinokuwenza? (b) Kwakutheni ukuze enye intwazana ikhethe ukufuna umlinganiselo othile wemfundo?

¹¹ Ekubeni ulwazi ngoThixo lunik’ ubomi, owona msebenzi ubalulekileyo onokuwenza namhlanje kukwabelana nabanye ngolo lwazi. (IMizekeliso 3:13-18; Yohane 4:34; 17:3) Noko ke, ukuze ukwazi ukwenjenjalo, kufuneka ube nayo imfundo esisiseko. Kufuneka ukwazi ukucinga kakuhle, uthethe into evakalayo, yaye ukwazi ukufunda nokubhala kakuhle—ezo zizinto ezifundiswa esikolweni. Ngoko zimisele ezifundweni zakho, njengoko wenzayo uTracy, intwazana yaseFlorida, eUnited States eyaphumelela emagqabini kwisikolo samabanga aphakamileyo. Ithetha ngosukelo lwayo yathi: “Bendisoloko ndinosukelo lokumkhonza ixesha elizeleyo uThixo wam uYehova, yaye ndithemba ukuba imfundo yam iya kundinceda ekufezeni olu sukelo.”

12. Ukuba ubani ukhetha ukufuna imfundo yehlabathi eyongezelelekileyo, isenokuba luncedo ekuphumezeni yiphi injongo?

¹² Ngaba ukhe wazibuza ngesizathu sokuba uhambe isikolo? Ngaba ngokuyintloko injongo kukuzixhobisa ukuze ube ngumlungiseleli kaYehova onempumelelo? Ukuba kunjalo, kufuneka ucinge nzulu ngendlela imfundo yakho eya kukunceda ngayo ufezekise loo njongo. Emva kokuthethana nabazali bakho, nisenokugqiba ukuba ufanele ufumane imfundo engakumbi kunaleyo ifunwa ngabasemagunyeni. Loo mfundo yongezelelekileyo isenokukunceda ufumane umsebenzi wokuzixhasa uze ukushiye unexesha namandla okuba nesabelo ngokuzeleyo kumsebenzi woBukumkani.—Mateyu 6:33.

13. AmaKristu amabini aseRashiya awakhetha imfundo eyongezelelekileyo ayibonakalise njani injongo yawo ebomini?

¹³ Bambi abafuna imfundo eyongezelelekileyo baye babe nenxaxheba kubulungiseleli bexesha elizeleyo ngoxa beqhubeka nezifundo zabo. Cinga ngoNadia noMarina, amantombazana amabini akwishumi elivisayo aseMoscow, eRashiya. Omabini abhaptizwa ngoAprili 1994 aza aqalisa ukukhonza njengoovulindlela abangabancedani. Emva nje koko aphumelela kwisikolo samabanga aphakamileyo aza abhalisela izifundo zokubala (accounting) ezithabatha iminyaka emibini. NgoMeyi 1995 aqalisa ukukhonza njengoovulindlela abathe ngxi, sekunjalo ahlala efumana amanqaku aphambili kwizifundo zawo zokubala. Ukongezelela, xa edibene, ayeqhuba izifundo zeBhayibhile ezili-14 veki nganye ngoxa ayeqhubeka nezifundo zawo. La mantombazana athemba ukuba imfundo yawo yezifundo zokubala iya kuwenza akwazi ukufumana imisebenzi emihle, ukuze akwazi ukuzixhasa kubulungiseleli bexesha elizeleyo.

14. Enoba sikhetha imfundo yehlabathi engakanani na, yintoni efanele ibe yeyona nto ibalulekileyo ebomini bethu?

¹⁴ Ukuba ufuna imfundo yehlabathi engakumbi kunaleyo ifunwa ngabasemagunyeni, sihlolisise ngobulumko isizathu sokwenjenjalo. Ngaba injongo kukuzenzela igama nokuze ufumane ubutyebi obuphathekayo? (Yeremiya 45:5; 1 Timoti 6:17) Okanye ngaba usukelo lwakho kukusebenzisa imfundo eyongezelelekileyo ukuze ube nesabelo ngokuzeleyo enkonzweni kaYehova? ULydia, intwazana eyakhetha ukufuna imfundo eyongezelelekileyo, yachaza imbono entle ngezinto zokomoya, isithi: “Abanye bafuna imfundo engakumbi baze bavumele izinto eziphathekayo zibe ngumqobo phambi kwabo, yaye baye bamtyeshela uThixo. Eyona nto ibalulekileyo kum lulwalamano lwam noThixo.” Hayi indlela esingumzekelo ngayo eso simo sengqondo kuthi sonke!

15. Ayefunde kangakanani amaKristu athile enkulungwane yokuqala?

¹⁵ Okubangel’ umdla kukuba, amaKristu enku-lungwane yokuqala ayenemfundo eyahlukahlukeneyo. Ngokomzekelo, umpostile uPetros noYohane, babegqalwa njengabantu “abangenamfundo nabaqhelekileyo” kuba babengaqeqeshwanga kwizikolo zoorabhi. (IZenzo 4:13) Noko ke, umpostile uPawulos wayenemfundo ekumgangatho waleyo ifumaneka kwiiyunivesithi zanamhlanje. Sekunjalo, uPawulos akazange asebenzise loo mfundo ukuze afumane uzuko; kunoko, yayimnceda xa eshumayela kubantu abakwimigangatho eyahlukahlukeneyo. (IZenzo 22:3; 1 Korinte 9:19-23; Filipi 1:7) Ngokufanayo, uManayen, “owafundiswa noHerode umphathi wesithili,” wayephakathi kwabo babekhokela kwibandla lakwa-Antiyokwe.—IZenzo 13:1.

Kutheni Ufanele Uyiphathe Kakuhle Imali?

16. (a) Kutheni kusenokuba nzinyana ukumkhumbula uMdali wethu ukuba sinamatyala? (b) Omnye wemizekeliso kaYesu ukubonisa njani ukubaluleka kokucinga ngaphambi kokusebenzisa imali?

¹⁶ Ukuba akukwazi kuyiphatha kakuhle imali, kusenokuba nzinyana ukukhumbula uMdali wakho ngokwenza oko kumkholisayo. Kuba ukuba ungena ematyaleni, kunokuthiwa unenye inkosi. IBhayibhile iyachaza: “Obolekayo ngumkhonzi endodeni embolekayo.” (IMizekeliso 22:7) Omnye wemizekeliso kaYesu ubalaselisa ukubaluleka kokucinga ngaphambi kokusebenzisa imali. UYesu wathi: “Ngubani na kuni othi efuna ukwakha inqaba angahlali phantsi kuqala aze abale indleko, ukuze abone ukuba unokwaneleyo kusini na kokuyigqiba? Kungenjalo, usenokusibeka isiseko sayo kodwa angakwazi ukuyigqiba, yaye bonke ababoneli basenokuqala ukumgculela.”—Luka 14:28, 29.

17. Kutheni kusoloko kunzima ukulawula indlela ubani ayisebenzisa ngayo imali?

¹⁷ Ngoko ke, kuya kuba bubulumko ukuzama ukuphila ngokuvisisana nomgaqo weZibhalo ‘wokungabi natyala lanto nakubani na, ngaphandle kwelokuthandana.’ (Roma 13:8) Kodwa kunzima ukukwenza oko, ngokukodwa xa ubona izinto ezininzi ezintsha abathi abathengisi ufanele ube nazo. Omnye umzali, obezama ukufundisa abantwana bakhe ukusebenzisa ubulumko, wathi: “Sichithe ixesha elininzi sithetha ngezinto eziyimfuneko nezinto esizifunayo.” Ngokuqhelekileyo izikolo ziye zasilela ukufundisa izinto ezinjalo, zidlulisela uqeqesho oluncinane gqitha ngendlela yokuphatha imali kakuhle. Omnye unontlalontle wathi: “Siye siphumelele kwisikolo samabanga aphakamileyo sisazi okungakumbi ngonxantathu onamacala amabini alinganayo kunokuba sisazi ngokonga imali.” Ngoko, yintoni enokukunceda uyisebenzise ngobulumko imali?

18. Siyintoni isikhokelo sokuyiphatha kakuhle imali, yaye ngoba?

¹⁸ Ukuthobela esi siluleko, “Uze umkhumbule ke uMdali wakho,” sisikhokelo sokuyiphatha ngobulumko imali. Oku kungenxa yokuba xa uthobela loo myalelo, eyona nto iphambili kuwe kukukholisa uYehova, yaye indlela omthanda ngayo iyayiphembelela indlela oyisebenzisa ngayo imali yakho. Ngokuvisisana noko, uya kuzama ukuba ungazivumeli izinto zobuqu ziphazamisane nokunika uThixo inkonzo yomphefumlo uphela. (Mateyu 16:24-26) Uya kuzabalazela ukugcina iliso lakho ‘lingenakumbi,’ okanye, litsoliswe kuBukumkani bukaThixo nasekwenzeni ukuthanda kwakhe. (Mateyu 6:22-24) Ngaloo ndlela isiluleko sobuthixo esithi “mzukise uYehova ngobuncwane bakho” uya kusigqala njengelungelo elivuyisayo.—IMizekeliso 3:9.

Ulutsha Olungumzekelo Wokuxeliswa

19. Ulutsha lwexesha elidluleyo luye lwamkhumbula njani uMdali walo?

¹⁹ Okuvuyisayo kukuba ulutsha oluninzi, olwamandulo nolwanamhlanje, luye lwamkhumbula uMdali walo. USamuweli oselula wahlala ethembekile kwinkonzo yasemnqubeni nangona abo wayekhonza nabo babeziphethe kakubi. (1 Samuweli 2:12-26) Ibhinqa elalisisilingo, umfazi kaPotifare, akazange aphumelele ekuhendeni uYosefu oselula ukuba ahenyuze naye. (Genesis 39:1-12) Nangona ‘wayengumntwana,’ uYeremiya washumayela ngenkalipho nangona wayejamelene nenkcaso ekrakra. (Yeremiya 1:6-8) Intombazanana yomSirayeli ngenkalipho yakhuthaza umphathi-mkhosi wama-Aram ukuya kufuna uncedo kwaSirayeli, apho wathi wafunda ngoYehova. (2 Kumkani 5:1-4) UDaniyeli oselula namaqabane akhe balulondoloza ukholo lwabo kuvavanyo lokutya izinto ezalelweyo ngumthetho kaThixo. Yaye abafana abangooShadraki, uMeshaki noAbhede-nego bakhetha ukuphoswa kwiziko lomlilo kunokuba banganyaniseki kuThixo ngokuqubuda phambi kwesithixo.—Daniyeli 1:8, 17; 3:16-18; Eksodus 20:5.

20. Ulutsha oluninzi luye lwamkhumbula njani uMdali walo namhlanje?

²⁰ Namhlanje ulutsha olungaphezu kwama-2 000 oluneminyaka ephakathi kwe-19 nama-25 ubudala lukhonza kwikomkhulu lehlabathi lamaNgqina kaYehova kwisiXeko saseNew York, eUnited States. Olu lutsha luligcuntswana lamashumi amawaka abaselula abakhumbula uMdali wabo ehlabathini lonke. Ngokufanayo noYosefu wamandulo, abafuni ukudyobheka ngokokuziphatha. Abaninzi baye bathobela uThixo kunabantu xa banyanzelwa ukuba bakhethe lowo baya kumkhonza. (IZenzo 5:29) Ngowe-1946 ePoland, uHenryka Zur oneminyaka eli-15 ubudala wangcungcuthekiswa xa engazange avume ukwenza isenzo sokunqula isithixo. Omnye wabo babemngcungcuthekisa wathi kuye: “Enoba ucinga ntoni na entliziyweni yakho, sifuna wenze uphawu lwamaKatolika lomnqamlezo kuphela.” Ngenxa yokuba wayengavumi, warhuqelwa ehlathini waza wadutyulwa, ebambelele kwithemba lobomi obungunaphakade!b

21. Sisiphi isimemo ekunokuba bubulumko ukusamkela, yaye uya kuba yintoni umphumo woko?

²¹ Hayi indlela amele ukuba uvuya ngayo uYehova ngenxa yabaselula abaye bamkhumbula ukutyhubela iinkulungwane! Ngaba uya kusabela kwisimemo sakhe esithi, “Uze umkhumbule ke uMdali wakho”? Ngenene ukufanele ukuba umkhumbule! Imihla ngemihla cinga ngako konke akwenzele kona naseza kukwenzela kona, uze usamkele isimemo sakhe esithi: “Yiba nobulumko, nyana wam, uyivuyise intliziyo yam; ukuze ndimphendule ngezwi ondingcikivayo.”—IMizekeliso 27:11.

[Imibhalo esemazantsi]

Uyakhumbula Na?

◻ Lunokuncedwa njani ulutsha ukuba lumgqale njengomntu wokwenene uThixo?

◻ Kuthetha ukuthini ukumkhumbula uMdali wakho?

◻ Imfundo yethu ifanele iphumeze yiphi injongo?

◻ Kutheni kubalulekile ukuyiphatha kakuhle imali?

◻ Luluphi ulutsha ofanele uxelise umzekelo walo?

[Umfanekiso okwiphepha 17]

Ngaba ukhe wacinga ngesizathu sokuba uhamba isikolo?

[Umfanekiso okwiphepha 18]

Ngaba ufunda indlela yokuyiphatha kakuhle imali?