Ubuqaqawuli Obungakumbi Bendlu KaYehova
“Ndiyizalise le ndlu ngobuqaqawuli; utsho uYehova wemikhosi.”—HAGAYI 2:7.
1. Umoya oyingcwele unxibelelene njani nokholo nemisebenzi?
XA WAYESHUMAYELA kwindlu ngendlu, omnye wamaNgqina kaYehova wadibana nebhinqa elingumPentekoste elagqabaza lathi, ‘Thina sinomoya oyingcwele, kodwa umsebenzi wenziwa nini.’ Ngobuchule, lacaciselwa ukuba umntu onomoya oyingcwele uya kuthi, ngokuzenzekelayo, ashukunyiselwe ukuba enze umsebenzi kaThixo. UYakobi 2:17 uthi: “Ukholo, ukuba alunayo imisebenzi, lufile ngokwalo.” Ngoncedo lomoya kaYehova, amaNgqina akhe aye ahlakulela ukholo olomeleleyo, ibe uye ‘wayizalisa indlu yakhe ngobuqaqawuli’ ngokuwenzisa imisebenzi yobulungisa—ngokukodwa ‘ukushumayela ezi ndaba zilungileyo zoBukumkani kuwo wonke umhlaba omiweyo kube bubungqina kuzo zonke iintlanga.’ Xa uYehova anelisekile kukwenziwa kwalo msebenzi, kuya ‘kwandula ke kufike ukuphela.’—Mateyu 24:14.
2. (a) Ukuzibhokoxa kwethu emsebenzini kaYehova kuya kuzisa ziphi iintsikelelo? (b) Kutheni sifanele sikuvuyele nakuphi na ‘ukuzilazila’ okubonakalayo?
2 Ngokutsho kwala mazwi kaYesu, sifumanisa ukuba umsebenzi wethu namhlanje umele ujoliswe ekushumayeleni kwabanye ‘iindaba ezilungileyo ezizukileyo zoThixo onoyolo,’ esiphathiswe zona. (1 Timoti 1:11) Okukhona sizibhokoxa ngovuyo enkonzweni kaYehova, kokukhona isiphelo siya kubonakala sisiza ngokukhawuleza. KuHabhakuki 2:2, 3, sifunda amazwi kaYehova athi: “Bhala umbono, uwukrole kakuhle emacwecweni, ukuze abaleke owulesayo. Kuba umbono usaya kuba ngowexesha elimisiweyo, ukhawulezela ekupheleni, angathethi wona amanga; ukuba uthe wazilazila, wulinde, kuba uya kuza, awuyi kubuya umva.” Ewe, “umbono” uya kuzaliseka ‘nokuba uthe wazilazila.’ Ngokuphathelele oku ekubeni sikunyaka wama-83 wolawulo loBukumkani bukaYesu, bambi basenokuvakalelwa kukuba ngoku sikwixesha lokuzilazila. Noko ke, ngaba asifanele sivuye kuba isiphelo singekafiki? Ebudeni bale minyaka yee-1990, kuye kwashenxiswa imiqathango yokushumayela iindaba ezilungileyo, ngendlela ebonakala ingummangaliso, eMpuma Yurophu, kwiindawo ezithile zaseAfrika nakwamanye amazwe. ‘Ukuzilazila’ okubonakalayo kunika “izimvu” ezininzi ngakumbi ithuba lokuba zihlanganiswe kule mihlaba isandul’ ukuvulwa.—Yohane 10:16.
3. Kutheni imbono yethu ehlaziyiweyo ngokuphathelele “esi sizukulwana” ifanele isishukumisele ekwenzeni umsebenzi kaThixo ngongxamiseko?
3 Lo mprofeti uthi “awuyi kubuya umva.” UYesu wathi esi sizukulwana singendawo sikhoyo asiyi kudlula de “zonke ezi zinto zenzeke.” (Mateyu 24:34) Ngaba imbono yethu ehlaziyiweyo yamazwi akhe ithetha ukuba umsebenzi wethu wokushumayela awungxamisekanga kangako?a Izibakala zibonisa okuchaseneyo noko! Isizukulwana sethu simbonzeleka kwimeko yobungendawo nokonakala engazange ibekho kuyo yonke imbali yangaphambili. (Thelekisa IZenzo 2:40.) Sifanele sisebenze ngongxamiseko. (2 Timoti 4:2) Zonke iziprofeto eziphathelele ixesha lokufika kwembandezelo enkulu zibonisa ukuba iza kufika ngequbuliso, ngokukhawuleza, ngokungalindelekanga—njengesela. (1 Tesalonika 5:1-4; ISityhilelo 3:3; 16:15) “Ngenxa yoku nani zingqineni nilungile, ngenxa yokuba uNyana womntu uza ngelixa eningacinganga ukuba lilo.” (Mateyu 24:44) Njengoko esi sizukulwana soluntu olungahloneli Thixo sisondela entshabalalweni, ngokuqinisekileyo asifanele sifune ukulahla ithemba lethu elixabisekileyo lobomi obungenasiphelo ngokubuyela ‘ekuziqika-qikeni eludakeni’ lweziphazamiso zehlabathi!—2 Petros 2:22; 3:10; Luka 21:32-36.
4. Yiyiphi imeko eye yafuna kwandiswe ‘ukutya ngexesha elifanelekileyo,’ ibe le ntswelo iye yahlangatyezwa njani?
4 Kuzaliseka isiprofeto sikaYesu, ngowe-1914 ‘kwaqalisa inimba yenkxwaleko’ njengoko uluntu lwalungena ‘ekuqoshelisweni kwenkqubo yezinto.’ Usizi, iintlekele, nokuchas’ umthetho ziye zanda ukuza kuthi ga namhlanje. (Mateyu 24:3-8, 12) Kwangaxeshanye, uYehova uye wathuma udidi lwekhoboka elithembekileyo neliyingqondi ukuba linike indlu yeNkosi yalo, uKristu, ‘ukutya kokomoya ngexesha elifanelekileyo.’ (Mateyu 24:45-47) Ekwitrone yakhe esemazulwini, lo Kumkani unguMesiya ngoku unikela ulwalathiso kwinkqubo yokondla ngokomoya emhlabeni wonke.
Intabalala ‘Yokutya’
5. Okona “kutya” kusisiseko kukufumana yiphi ingqalelo?
5 Khawucinge ngokulungiselelwa ‘kokutya.’ (Luka 12:42) Eyona nto ibalulekileyo kuludwe lwezinto ezityiwa ngamaKristu liLizwi likaThixo, iBhayibhile. Ukuze ufundise iBhayibhile ngokunomphumo, kuqala kufuneka inguqulelo efundeka lula, nechanileyo. Ukutyhubela iminyaka le ntswelo iye yafezwa ngokuthe ngcembe, ngokukodwa ukususela ngowe-1950 xa kwakhutshwa INguqulelo Yehlabathi Elitsha YeZibhalo ZamaKristu ZesiGrike ngesiNgesi. Ngowe-1961 iNew World Translation eyiBhayibhile epheleleyo yenziwa yafumaneka, yaye kungekudala le nguqulelo yabakho nangezinye iilwimi eziphambili. Imiqulu emi-3 eyakhutshwa ebudeni bonyaka wenkonzo wowe-1996 yenza isimbuku siye kufika kuma-27, yaye eli-14 kuyo yiBhayibhile epheleleyo. Ukuze kusetyenzwe le Bhayibhile, kunye nezinye iincwadi zokunceda ukufunda iBhayibhile, kukho amaKristu azahluleleyo amalunga ne-1174 ngoku asebenza ixesha elizeleyo kumazwe angama-77.
6. UMbutho uye wahlangabezana njani nemfuneko yeempapasho zeBhayibhile?
6 Exhasa lo msebenzi wenziwa ngulo mkhosi wabaguquleli, amasebe ashicilelayo eWatch Tower Society angama-24 avelisa iimpapasho ezininzi kunanini na ngaphambili. Ngenxa yoko, kusaqhutyekwa kufakelwa oomatshini bokushicilela abakhawuleza kakhulu kumasebe amakhulu. Aye anda amaphephancwadi IMboniselo noVukani! aveliswayo inyanga nenyanga, efikelela kwisimbuku semibhalo ezizi-943 892 500, ulwando lwama-13,4 ekhulwini kulo nyaka. Isimbuku seeBhayibhile neencwadi ezinoqweqwe eziveliswa eUnited States, eBrazil, eFinland, eItali, eJamani, eJapan, eKorea naseMexico kuphela siye sanda ngama-40 ekhulwini ukususela ngowe-1995 ukusa kwimibhalo ezizi-76 760 098 ngowe-1996. Namanye amasebe aye afak’ isandla ngendlela ephawulekayo kwisimbuku solwando loncwadi oluvelisiweyo.
7. UIsaya 54:2 ungxamiseke kangakanani namhlanje?
7 Kuye kwakho ulwando olukhulu ebudeni beminyaka yee-1990 ngenxa yokushenxiswa kwemiqathango kumaNgqina kaYehova eMpuma Yurophu naseAfrika. Abantu bakulambele kakhulu ukutya kokomoya kwezi ndawo. Ngoko olu bizo luvakala lungxamiseke nangaphezulu: “Yenze banzi indawo yentente yakho, uwatwabulule amalengalenga eminquba yakho, ungathinteli; zolule izintya zakho, uziqinisele izikhonkwane zakho.”—Isaya 54:2.
8. Yiyiphi intsabelo ebonakalisa ukuba nesisa enceda ekunikeleni inkxaso ngemali?
8 Ngenxa yoko, kuye kwafuneka zandiswe izakhiwo kuninzi lwamasebe oMbutho ali-104. Ngenxa yeemeko ezingentle zoqoqosho kwinkoliso yemihlaba esandul’ ukuvulwa, inxalenye enkulu yeendleko zolu lwando ihlangatyezwa ngeminikelo yomsebenzi owenziwa ehlabathini lonke evela kumazwe afumileyo. Okuvuyisayo kukuba amabandla kunye nabantu ngabanye baye basabela ngeentliziyo ezipheleleyo, benesimo sengqondo esikwiEksodus 35:21: “Beza bonke abantu abantliziyo yabavuselelayo, abo bonke bamoya wabaqhubayo, bawuzisa umrhumo kaYehova emsebenzini.” Sisebenzisa eli thuba ukubulela bonke abaye baba nesabelo ekupheni ngesisa.—2 Korinte 9:11.
9. Izaliseka njani eyamaRoma 10:13, 18 namhlanje?
9 Ebudeni bowe-1996 iimpapasho zeWatch Tower Society ziye zalizukisa ngokwenene igama likaYehova neenjongo zakhe ukusa eziphelweni zomhlaba. Kunjengoko umpostile uPawulos waxela kwangaphambili. Ecaphula isiprofeto sikaYoweli neNdumiso ye-19, wabhala: “‘Wonk’ ubani obiza egameni likaYehova uya kusindiswa.’ Noko ke ndiyabuza, Abazange basilele ukuva, andibi kunjalo? Kaloku, enyanisweni, ‘intlokoma yabo yaphuma yaya kuwo wonke umhlaba, namazwi abo aya kwiziphelo zomhlaba omiweyo.’” (Roma 10:13, 18) Ngaloo ndlela ngokuphakamisa igama elixabisekileyo elithi Yehova, abantu bakhe baye banendima ebalulekileyo ekuzaliseni indlu yakhe yonqulo ngobuqaqawuli. Noko ke, oku kuye kwanenkqubela engakanani ebudeni bowe-1996? Nceda uhlole uludwe olulandelayo olukwiphepha 18 ukusa kwelama-21.
Ukuvuna Ehlabathini Lonke
10. Ziziphi iinkalo ezibalaseleyo oziphawulayo kumsebenzi wabantu bakaYehova, njengoko zishwankathelwe kwisicangca esikwiphepha 18 ukusa kwelama-21?
10 Amazwi kaYesu afumaneka kuLuka 10:2 awazange abe namandla kangaka ngaphambili: “Isivuno, eneneni, sikhulu, kodwa abasebenzi bambalwa. Ngoko ke yibongozeni iNkosi yesivuno ukuba ikhuphe abasebenzi baye esivunweni sayo.” Ngaba uyasabela kolo bizo? Izigidi emhlabeni wonke zenjenjalo. Oku kuboniswa yincopho entsha yabavakalisi boBukumkani abazizi-5413 769 abaye banikela ingxelo ebudeni bowe-1996. Ngaphezu koko, kuye kwabhaptizwa abazalwana noodade abatsha abangama-366 579. Hayi indlela esizixabisa ngayo ezi “zinto ezinqwenelekayo zeentlanga zonke,” ngoku ezinesabelo ‘ekuzaliseni indlu kaYehova yonqulo ngobuqaqawuli’!—Hagayi 2:7.
11. Kutheni sonke sinesizathu sokuvuya kakhulu?
11 Iingxelo zolwando kwimihlaba esandul’ ukuvulwa zibalasele. Ngaba siyabamonela abo banandipha olo lwando? Kunoko, sivuyisana nabo. Onke amazwe aqala kancinane. Umprofeti owayephila ngexesha likaHagayi, uZekariya, wabhala: “Ngubani na owoyidela imini yezinto ezincinane?” (Zekariya 4:10) Sivuya kakhulu kuba kumazwe apho umsebenzi wokunikela ubungqina uhambele phambili khona, ngoku kukho izigidi zabavakalisi boBukumkani, kwaye intsimi igutyungelwa ngokufuthi, kuninzi lwezixeko ezikhulu ide igutyungelwe veki nganye. Ngaba sinaso isizathu sokuyekelela ngoxa uYehova ngoku enikela ithuba lokusinda kwimimandla eyayikade iphantsi kweemeko ezingentle? Unotshe! UYesu wathi: “Intsimi lihlabathi.” (Mateyu 13:38) Kumele kuqhutyekwe kunikelwa ubungqina obucokisekileyo, kanye njengokuba abafundi bokuqala banikela ubungqina ekuqoshelisweni kwenkqubo yezinto yamaYuda.—IZenzo 2:40; 10:42; 20:24; 28:23.
Ukuqhubela Phambili Ngokuzingisileyo
12. Yiyiphi into esishukumisela ukuba siye “phambili”? (Bona nebhokisi ethi, “Ukuvuna ‘Eziphelweni Zehlabathi.’”)
12 Ewe, simele siqhubeke sihamba, sisiya “phambili” nenqwelo yokulwa yeengelosi zikaYehova. (Hezekile 1:12, NW) Sicinga ngamazwi kaPetros athi: “UYehova akacothi ngokuphathelele isithembiso sakhe, njengoko bambi abantu bekugqala ikukucotha, kodwa unomonde kuni ngenxa yokuba akanqweneli ukuba kutshabalale nabani na kodwa unqwenela ukuba bonke bafikelele enguqukweni.” (2 Petros 3:9) Inzondelelo yabazalwana bethu abakumazwe akumgangatho ophantsi ngokoqoqosho imele isivuselele. Nakuphi na ukubambezeleka okubonakalayo kokufika kweArmagedon kuvulela amakhulu amawaka ithuba lokuba ahlanganiswe kula mazwe nakumazwe amaninzi anentsimi esetyenzwe kakhulu. Ungaphazami: “Isondele imini enkulu kaYehova, ikhawulezile kakhulu.” (Zefaniya 1:14) Nathi sifanele sikhawulezise ukunikela ubungqina bokugqibela obucokisekileyo!
13, 14. (a) Kunokuthethwa ntoni ngokusasazwa kweempapasho ebudeni bowe-1996? (b) Ngawaphi amalungiselelo akhethekileyo anokwenziwa ngamabandla unyaka nonyaka, yaye uzilungiselela njani ukuze ube nesabelo?
13 Nangona iinkcukacha zingaveli kuludwe lwenkonzo, kuye kwakho ulwando oluphawulekayo ekusasazweni kweeBhayibhile, iincwadi namaphephancwadi ebudeni bonyaka wenkonzo odluleyo. Ngokomzekelo, ukuhanjiswa kwamaphephancwadi ehlabathini lonke kuye kwabonisa ulwando lwe-19-ekhulwini, isimbuku semibhalo ezizi-543 667 923 eye yahanjiswa. Amaphephancwadi ethu kulula ukuwahambisa kwiindlela ezahlukahlukeneyo zokushumayela—ezitratweni, ezipakini, kwiindawo zokulinda ooduladula nakwiindawo zamashishini. Iingxelo zibonisa ukuba kweminye imihlaba esiqhelekileyo isigidimi soBukumkani kuyo, izifundiswa ziye zachukumiseka ngumgangatho wamaphephancwadi ethu ibe ziyazamkela izifundo zeBhayibhile.
14 Nyaka ngamnye ebudeni benyanga ka-Aprili, amabandla adla ngokulungiselela umsebenzi okhethekileyo wokuhambisa amaphephancwadi, wephulo elithabatha usuku lonke kwindlu ngendlu nakwiindawo zikawonke-wonke. Ngaba ibandla lakho liya kuba nesabelo koku ebudeni buka-Aprili 1997? Ulungiselelwe iinkupho ezibalaseleyo zenyanga ka-Aprili zeMboniselo noVukani!, ibe ukuhanjiswa kwazo ngexesha elinye ehlabathini lonke kuya kuba yinto ephawulekayo! Kwisiqithi saseCyprus, amabandla, esebenzisa amazwi athi “fikelela wonk’ ubani ofikelelekayo ngesigidimi soBukumkani” njengentetho yawo eqhelekileyo, ade awenza nyanga nganye umsebenzi ocwangcisiweyo wamaphephancwadi, efikelela incopho entsha yangama-275 359 ahanjiswe kulo nyaka, ulwando lwama-54 ekhulwini.
Izigidimi Zokugqibela ZikaHagayi
15. (a) Kwakutheni ukuze uYehova athumele izigidimi ezingakumbi ngoHagayi? (b) Sisiphi isifundo esifanele sidluliselwe sisigidimi sikaHagayi sesithathu kuthi?
15 Emva kweentsuku ezingama-63 edlulise isigidimi sakhe sesibini, uYehova wathuma uHagayi enesigidimi sesithathu esifanele sicinge nzulu ngaso sonke namhlanje. UHagayi wathetha ngathi ngelo xesha amaYuda ayesakha isiseko setempile, awayesakhe kwiminyaka eli-17 engaphambili. Kwakhona uYehova wabona kufanelekile ukuba aqalise ukuyihlambulula. Ababingeleli nabantu babeyekelele ibe ngoko babeziinqambi emehlweni kaYehova. Ngaba nanamhlanje bambi kubantu bakaYehova baye bayekelela, ukusa kwinqanaba lokuba bazibandakanye kwiindlela ezivumela yonk’ into nezokuthanda izinto eziphathekayo? Sonke sifanele sigqale ngokukhawuleza ‘sithabathele kule mini, sise phambili’ ekuzukiseni igama likaYehova, sinentembelo kwisithembiso sakhe: “Ndithabathele kule mini, ndiya kusikelela.”—Hagayi 2:10-19; Hebhere 6:11, 12.
16. Kukuphi ‘ukunyikimiswa’ okusele kusemnyango, ibe uya kuba yintoni umphumo?
16 Kwangolo suku, ilizwi ‘likaYehova wemikhosi’ lafika kuHagayi okwesine nokokugqibela. Wachaza oko kwakubandakanyekile ‘ekunyikimiseni Kwakhe izulu nehlabathi,’ esithi: “Ndiyibhukuqe itrone yezikumkani, ndikutshabalalise ukomelela kwezikumkani zeentlanga; ndizibhukuqe iinqwelo zokulwa nabakhweli bazo, kuwe amahashe nabakhweli bawo; elowo awiswe likrele lowabo.” (Hagayi 2:6, 21, 22) Ngaloo ndlela ‘ukunyikimisa’ kuya kufikelela incopho yako xa uYehova ewuhlambulula ngokupheleleyo umhlaba eArmagedon. Ngelo xesha “izinto ezinqwenelekayo zeentlanga zonke” ziya kuba sezifikile, ukuze ziyile ibutho labantu kwihlabathi elitsha. Ezinjani zona izizathu zokuvuya nokudumisa uYehova!—Hagayi 2:7; ISityhilelo 19:6, 7; 21:1-4.
17. UYesu uye wenziwa ‘umsesane wokutywina’ njani?
17 Equkumbela isiprofeto sakhe, uHagayi uyabhala: “Ngaloo mini, utsho uYehova wemikhosi, ndiya kukuthabatha, Zerubhabheli . . . , ndikumise ngokomsesane wokutywina; kuba ndikunyule; utsho uYehova wemikhosi.” (Hagayi 2:23) Ngoku uKristu Yesu unguKumkani wokomfuziselo kaYehova onguMesiya noMbingeleli Omkhulu, yaye esemazulwini udibanisa imisebenzi eyahlukeneyo eyayisenziwa liBamba uZerubhabheli noMbingeleli Omkhulu uYoshuwa kwiYerusalem eyayisemhlabeni. Njengomsesane osemthethweni wokutywina okwisandla sokunene sikaYehova, uYesu uye waba “nguEwe” njengesixhobo sikaYehova sokuzalisekisa uninzi ‘lwezithembiso zikaThixo.’ (2 Korinte 1:20; Efese 3:10, 11; ISityhilelo 19:10) Sonke isigidimi sesiprofeto seBhayibhile sinikel’ ingqalelo kwilungiselelo likaYehova lokuzisa uKristu njengoKumkani noMhlawuleli ongumbingeleli.—Yohane 18:37; 1 Petros 1:18, 19.
18. Aya kuba nenzaliseko ehlaziyayo njani ‘amazwi okuqukumbela kaYehova wemikhosi’?
18 Ngokwenene namhlanje, obona buqaqawuli bukhulu bufumaneka kwitempile kaYehova yokomoya ebengezelayo! Yaye kungekudala, emva kokuba uYehova eyitshayele yonke inkqubo kaSathana, uHagayi 2:9 uya kuqhubeka esiba nenzaliseko evuyisayo: “Kuyo ke le ndawo ndiya kunika uxolo; utsho uYehova wemikhosi.” Ekugqibeleni uxolo!—uxolo oluhlala luhleli, lomhlaba wonke, oluqinisekiswe ‘ngomsesane wokutywina’ kaYehova, uKristu Yesu, “uMthetheli woxolo,” ekubhalwe ngaye kwathiwa: “Ukuba kwande ukuthethela oko, kubekho uxolo olungenakuphela . . . Ikhwele likaYehova wemikhosi liya kukwenza oko.” (Isaya 9:6, 7) Uzuko lwendlu kaYehova yonqulo luya kubonakala kuwo wonke ummandla woxolo wolongamo lwakhe lwendalo iphela kude kuse emaphakadeni. Ngamana singahlala singaphakathi kwaloo ndlu!—INdumiso 27:4; 65:4; 84:10.
[Imibhalo esemazantsi]
a Bona inqaku elithi “Ukusindiswa ‘Kwisizukulwana Esingendawo’” nelithi “Ixesha Lokuhlala Siphaphile” kwinkupho yeMboniselo kaNovemba 1, 1995.
Ngaba Ungachaza?
◻ Namhlanje, indlu kaYehova ‘izaliswa njani ngobuqaqawuli’?
◻ Kutheni kungxamiseke ngaphezulu kunanini na ngaphambili ukushumayela iindaba ezilungileyo?
◻ Yiyiphi intshukumisa yokushumayela enikelwa yiNgxelo Yonyaka Wenkonzo We-1996?
◻ UKristu ‘ungumsesane wokutywina’ kaYehova njani?
[Ibhokisi ekwiphepha 15]
Ukuvuna “Eziphelweni Zehlabathi”
KUISAYA 43:6, sifunda umyalelo kaYehova othi: “Musa ukuthintela; nizise oonyana bam bevela kude, neentombi zam zivela eziphelweni zehlabathi.” Esi sibhalo sizaliseka ngokukhethekileyo eMpuma Yurophu namhlanje. Ngokomzekelo, khawuqwalasele ilizwe elalisakuba lelobuKomanisi laseMoldova. Kukho iidolophana eziphantse zibe nesiqingatha sabemi abangamaNgqina. Kufuneka ahambe imigama emide ukuze afumane intsimi aze ashumayele, kodwa ayawenza loo mgudu! Uninzi lwabavakalisi abakula mabandla yinzala yabantu abathunyelwa elubhacweni eSiberia ekuqaleni kweminyaka yee-1950. Ngoku iintsapho zabo ziyakhokela kumsebenzi wokuvuna. Kubavakalisi abangama-12 565, bangama-1917 ababhaptizwe kulo nyaka udluleyo. Kumabandla angama-43 ngalinye linabavakalisi abamalunga ne-150, kwaye iziphaluka ziza kwanda ukusuka kwezine ukusa kwezisibhozo kulo nyaka mtsha wenkonzo.
Kwakhona, kuphawuleka ulwando eAlbania. Kukho amaNgqina amaninzi anyanisekileyo anyamezele olona lawulo lobuzwilakhe lukhohlakeleyo ukutyhubela iminyaka emalunga nama-50. Uninzi lwawo lwabulawa. Oku kusikhumbuza isithembiso sikaYesu esithi: “Musa ukuzoyika izinto osele uza kubandezeleka ngazo. Khangela! UMtyholi uya kuhlala ephosa bambi benu entolongweni ukuze nibekwe eluvavanyweni ngokupheleleyo . . . Zingqine uthembekile kude kuse ekufeni, yaye ndiza kukunika isithsaba sobomi.” (ISityhilelo 2:10; bona noYohane 5:28, 29; 11:24, 25.) Yintoni ngoku esiyibonayo eAlbania? Enyanisweni sibona ukuzaliseka okumangalisayo kwesithembiso sikaYehova esifumaneka kuIsaya 60:22 esithi: “Omncinanana uya kuba liwaka”! Ngowe-1990 wayemnye kuphela umvakalisi owanikela ingxelo yenkonzo eAlbania. Noko ke, “abasebenzi” abangakumbi abavela eItali nakwamanye amazwe basabela kubizo lukaYesu oluthi: “Hambani ke ngoko nize nenze abafundi abantu . . . , nibabhaptiza.” (Mateyu 28:19; Luka 10:2) Ngexesha leSikhumbuzo sokufa kukaYesu ngowe-1996, bangama-773 abavakalisi ababesebenza entsimini, ibe bahlanganisa abantu abangama-6523 ukuba baye eSikhumbuzweni sabo, nani elo eliliphindaphinda izihlandlo ezingaphezu kwezisibhozo inani labavakalisi! Kwanikelwa ingxelo yenani elimangalisayo labantu ababesuka kwindawo ekwanti. Nangona kwakungekho bavakalisi basekuhlaleni, kwisixeko saseKukës nesaseDivjakë kweza abantu abali-192 nabangama-230 ngokwahlukeneyo. EKrujë, ekwakukho umvakalisi omnye kuphela khona, babengama-212 ababezile. Abavakalisi abangama-30 baseKorçë baqesha isakhiwo esasiza kwanela abantu abangaphezu kwama-300. Emva kokuba elo nani lingenile kuloo holo, abanye abangama-200 kwafuneka bajikiswe ekubeni kwakungasekho ndawo. Ngokwenene yintsimi elungele ukuvunwa!
Le ngxelo ivela eRomania: “Ngoxa sasikumsebenzi wendlu ngendlu, sadibana nomntu othile owathi uliNgqina likaYehova ibe wayehlala kwidolophu encinane, ngokolwazi lwethu, eyayingenamaNgqina. Wasixelela ukuba ngaphandle kwakhe kwakukho abanye abantu abali-15 abebeqhuba iintlanganiso ngooLwezine nangeeCawa kangangeminyaka emininzi yaye babeqalisile ukushumayela kwindlu ngendlu. Ngosuku olulandelayo saya kuloo dolophu. Kumagumbi amabini sasilindwe li-15 lamadoda, amabhinqa nabantwana elamkela iincwadi ezingama-20 namaphephancwadi awayesandul’ ukukhutshwa angama-20. Salibonisa indlela yokuqhuba izifundo zeBhayibhile. Sacula kunye saza saphendula imibuzo yalo engxamisekileyo. Othabatha ukhokelo kwelo qela wavuma esithi: ‘Kwiintsuku ezimbalwa ezidluleyo, ndiye ndathandaza kuYehova ndineenyembezi ukuba asithumelele umalusi, ibe umthandazo wam uye waphendulwa.’ Savuya kakhulu, ibe ekuhambeni kwethu, njengenkedama ethe ekugqibeleni yamfumana uyise, wathi: ‘Nincede ningasilibali. Nibuye nize kusibona kwakhona!’ Sakwenza oko, ibe ngoku kuqhutywa izifundo zeBhayibhile ezisixhenxe kuloo dolophu. Kwimihlaba emininzi engazange isetyenzwe, lo msebenzi uqalisa ngendlela engummangaliso ngoncwadi lweBhayibhile, oluxatyiswa kakhulu, ibe oku kubonisa ukuba umthombo walo msebenzi nguThixo.”
[Isicangca esikwiphepha 18-21]
INGXELO YONYAKA WENKONZO WE-1996 YAMANGQINA KAYEHOVA EMHLABENI WONKE
(Bona imiqulu)
[Imifanekiso ekwiphepha 16, 17]
“Izinto ezinqwenelekayo zazo zonke iintlanga” ziyahlanganiswa kwiziQithi Zolwandle (1), kuMzantsi Merika (2), eAfrika (3), eAsia (4), kuMntla Merika (5), naseYurophu (6)