Ukuncama Izinto Ezininzi Ukuze Ndizuze Lukhulu
NGOKUBALISWA NGUJULIUS OWO BELLO
Kangangeminyaka engama-32 ndandiyiAladura.* Ndandikholelwa kwelokuba ukuphilisa ngokuthandazela kunye nemithandazo zaziya kuzicombulula zonke iingxaki zam zize zinyange zonke izigulo. Andizange ndithenge zipilisi, nditsho kwanezithomalalisi-ntlungu. Ebudeni baloo minyaka, akukho namnye owakha walaliswa esibhedlele entsatsheni yam. Nanini na kukho ogulayo kubantwana bam, ndandibathandazela imini nobusuku de bachache. Ndandikholelwa kwelokuba uThixo wayeyiphendula imithandazo yam aze andisikelele.
NDANDILILUNGU le-Egbe Jolly, owona mbutho wasekuhlaleni uphambili eAkure, idolophu ekwintshona yeNigeria. Abahlobo bam babengabona bantu bafumileyo nabanempembelelo kwibutho labantu bakuthi. IDeji, ukumkani waseAkure, yayityelela ngokufuthi ekhayeni lam.
Kwakhona ndandinesithembu, ndinabafazi abathandathu namashweshwe amaninzi. Ishishini lam lalinenkqubela. Zonke izinto zazindihambela kakuhle. Kodwa, njengomrhwebi ohambahambayo okumzekeliso kaYesu weeperile, ndafumana into ethile eyayixabiseke kangangokuba ndahlukana nabafazi bam abahlanu, amashweshwe am, icawa, umbutho wasekuhlaleni nesikhundla sokuba phambili kwizinto zehlabathi ngenxa yayo.—Mateyu 13:45, 46.
Indlela Endaba YiAladura Ngayo
Ukuqala kwam ukuva kuthethwa ngeeAladura kwakungowe-1936, xa ndandineminyaka eli-13 ubudala. Umhlobo wam ogama linguGabriel wandixelela oku: “Ukuba utyelela iChrist Apostolic Church, uya kumva uThixo ethetha.”
Ndambuza: “Uthetha njani uThixo?”
Wathi: “Yiza, uza kubona.”
Ndandinomdla wokuphulaphula uThixo. Ngoko ngobo busuku, ndahamba noGabriel ukuya ecaweni. Eso sakhiwo sincinane sasizele ngabantu ababeze kunqula. Ibandla laqalisa ukukhwaza lisithi: “Yizani, bantu! UYesu ulapha!”
Ebudeni baloo mikhwazo, umntu othile wadanduluka esithi: “Yihla, moya oyingcwele!” Omnye umntu wabetha intsimbi, ibe ibandla lonke lathi cwaka. Emva koko, ibhinqa elithile laqalisa ukuthetha ulwimi olungaqhelekanga likhawulezisa linemincili. Ngequbuliso ladanduluka lisithi: “Phulaphulani isigidimi sikaThixo, nina bantu! Utsho uThixo ukuthi: ‘Thandazelani abazingeli ukuze bangabulali bantu!’” Wonke umntu wayesemoyeni.
Ndakholelwa ukuba uThixo wayethethe ngaye, ngoko kunyaka olandelayo ndabhaptizwa njengelungu leChrist Apostolic Church.
Ukuqala Kwam Ukudibana NamaNgqina KaYehova
Ngowe-1951, ndamkela umbhalo wephephancwadi IMboniselo kwiNgqina elinguAdedeji Boboye. Eli phephancwadi lalibangel’ umdla, ngoko ndenza umrhumo ndaza ndalifunda ngokuthe rhoqo. Ngowe-1952, ndaya kwindibano yesithili yamaNgqina kaYehova yeentsuku ezine eyayiseAdo Ekiti.
Into endayibona kuloo ndibano yandichukumisa. Ndacingisisa nzulu ngokuba liNgqina likaYehova kodwa ndayikhupha engqondweni yam loo ngcamango. Ingxaki yam yayikukuba ndandinabafazi abathathu neshweshwe elinye ngelo xesha. Ndandicinga ukuba ndandingenako ukuphila ndinomfazi omnye kuphela.
Ekubuyeleni kwam eAkure, ndamxelela uAdedeji ukuba ayeke ukundityelela, ndaza andawuvuselela umrhumo wam weMboniselo. Ndakhuthala ngakumbi ecaweni yam. Ndandiqiqa ngelithi, ngapha koko uThixo wayendisikelele okoko ndathi ndangena kwiChrist Apostolic Church. Ndanditshate abafazi abathathu ndaza ndazala abantwana abaninzi. Ndandizakhele indlu yam. Ndandingazange ndilaliswe esibhedlele. Ekubeni uThixo wayebonakala eyiphendula imithandazo yam, yintoni eyayinokundenza nditshintshe unqulo lwam?
Ukubaluleka Kunye Nokuphazamiseka
Ndaqalisa ukunikela ngemali eninzi ecaweni. Kungekudala bandenza umdala ecaweni, isikhundla esandenza ndakwazi ukubona kakuhle indlela izinto ezazisenziwa ngayo ecaweni. Into endayibonayo yandiphazamisa. Umfundisi “nabaprofeti” babeyithanda imali; babebawa ngendlela elizothe.
Ngokomzekelo, ngoMatshi 1967 abafazi bam abathathu bafumana abantwana. Kwakusisithethe secawa ukuba kubekho umsitho wokuthiya umntwana igama. Ngoko ndathumela izipho—intlanzi, ilemonade neziselo ezihlwahlwazayo—kumfundisi ndilungiselela loo msitho.
Ngosuku lwenkonzo yecawa, umfundisi wathetha phambi kwalo lonke ibandla esithi: “Izityebi zale cawa zindimangalisile. Zifuna ukwenza umsitho wokuthiya umntwana igama, ibe ziza neziselo ezihlwahlwazayo nentlanzi kuphela. Akukho nyama! Akukho bhokhwe! Khawufan’ ucinge! UKayin wanikela kuThixo idini leebhatata ezinkulu, kodwa uThixo akazange alamkele elo dini ekubeni kwakungekho gazi kulo. UThixo ufuna izinto ezinegazi. UAbheli weza nesilwanyana, ibe idini lakhe lamkelwa.”
Wathi akutsho, ndaphakama ndaphuma ndigqwashula. Noko ke, ndaqhubeka ndisiya ecaweni. Ndaya ndichitha ixesha elingakumbi ezimbuthweni yaye ndisiya ezintlanganisweni zombutho wam. Maxa wambi ndandisiya ezintlanganisweni kwiHolo yoBukumkani, ibe ndawuvuselela umrhumo wam weMboniselo. Noko ke, ndandingekakulungeli ukuba liNgqina likaYehova.
Isigqibo Sokukhonza UYehova
Izinto zatshintsha kum ngowe-1968. Ngenye imini ndaqalisa ukufunda inqaku elithile kwiMboniselo elalichaza intshutshiso emanyumnyezi yamaNgqina kaYehova eMalawi. Lalibalisa ngentwazana eneminyaka eli-15 ubudala eyabotshelelwa emthini yaza yadlwengulwa izihlandlo ezithandathu kuba ingazange ivume ukulalanisa kunqulo lwayo. Ndothukile, ndayeka ukulifunda elo phephancwadi, kodwa ndaqhubeka ndicinga ngoko ndandikufundile. Ndaqonda ukuba ayikho intwazana ecaweni yam eyayinokubonakalisa ukholo olunjalo. Kamva ngaloo ngokuhlwa, ndalithabatha elo phephancwadi ndaza ndafunda elo phepha kwakhona.
Ndaqalisa ukuzimisela ekufundisiseni iBhayibhile. Njengoko ndandisiba nolwazi ngakumbi, ndaqalisa ukubona indlela icawa eyayisilahlekise ngayo. Njengoko kwakunjalo kwimihla yamandulo, abefundisi bethu ‘babesenza amanyala.’ (Hoseya 6:9) Abantu abanjalo babephakathi kwabaprofeti bobuxoki awalumkisa ngabo uYesu! (Mateyu 24:24) Andizange ndiphinde ndiyikholelwe imibono yabo nemisebenzi yabo yamandla. Ndagqiba kwelokuba ndizikhwebule kunqulo lobuxoki ndize ndincede abanye benze okufanayo.
Imigudu Yokundigcina Ecaweni
Xa abadala beecawa baqonda ukuba ndandizimisele ukuyishiya icawa, bathumela igqiza elithile ukuba lize kundicenga. Babengafuni ukulahlekelwa ngumthombo obalulekileyo wengeniso. Bandithembisa ngokundenza iBaba Egbe, umphathi wenye yeeChrist Apostolic Church zaseAkure.
Andizange ndivume ndaza ndabaxelela isizathu. Ndathi: “Icawa isixokisile. Ithi bonke abantu abalungileyo baza kuya ezulwini. Kodwa ndiye ndayifunda iBhayibhile, ibe ndeyisekile kwelokuba ngabali-144 000 kuphela abaza kuya ezulwini. Amanye amalungisa aza kuphila kumhlaba oyiparadesi.”—Mateyu 5:5; ISityhilelo 14:1, 3.
Umfundisi wecawa wazama ukwenza abafazi bam bandichase. Wabaxelela ukuba bathintele amaNgqina kaYehova angezi ekhayeni lethu. Omnye wabafazi bam wafaka ityhefu ekutyeni kwam. Ababini bandilumkisa ngombono othile ababewubone ecaweni. Loo mbono wawubonisa ukuba ndandiza kufa ukuba ndandiyishiya icawa. Phezu kwako nje oko, ndaqhubeka ndinikela ubungqina kubafazi bam, ndibamema ukuba beze ezintlanganisweni nam. Ndathi: “Niza kufumana amanye amadoda phaya.” Noko ke, akukho namnye owabonakalisa umdla, ibe baqhubeka bezama ukundityhafisa.
Ekugqibeleni, ngoFebruwari 2, 1970, xa ndandigoduka ndivela kwenye idolophu ekufutshane, ndafumanisa ukuba indlu yayikhal’ ibhungane. Bonke abafazi bam babemke nabantwana.
Ukunamathela Emfazini Omnye
Ndizicingela ndathi: ‘Ndiza kutsho ndikwazi ukulungisa imeko yam yomtshato.’ Ndabiza umfazi wam omkhulu, uJanet, ukuba abuyele ekhaya. Wavuma. Noko ke, intsapho yakowabo yayikhaba ngaw’ omane loo nto. Xa abanye abafazi bam bafumanisa ukuba ndandicele uJanet ukuba abuye, baya kowabo baza bazama ukumbetha. Emva koko intsapho yakowabo yandibizela intlanganiso.
Kwakukho abantu abamalunga nama-80 kuloo ntlanganiso. Ubawokazi kaJanet, owayeyintloko yentsapho, wathi: “Ukuba ufuna ukuphinda utshate intombi yethu, kuza kufuneka uye kuphuthuma nabanye abafazi abaya. Kodwa ukuba ufuna ukuqhubeka nonqulo lwakho olutsha uze uhlale unomfazi omnye, kuza kufuneka uzifunele omnye umfazi. Ukuba uyamthabatha kwakhona uJanet, abanye abafazi bakho baza kumbulala, ibe asifuni intombi yethu ife.”
Emva kokuxoxa kakhulu, le ntsapho yaqonda ukuba ndandizimisele ukutshata umfazi omnye kuphela. Ekugqibeleni yanikezela. Ubawokazi wathi: “Asinakukuhlutha umfazi wakho. Unokumthabatha uhambe naye.”
NgoMeyi 21, 1970, mna noJanet satshata ngokusemthethweni. Kwiintsuku ezisithoba emva koko ndabhaptizwa njengomnye wamaNgqina kaYehova. NgoDisemba kwangaloo nyaka, noJanet wabhaptizwa.
Ukunandipha Iintsikelelo ZikaYehova
Amalungu ecawa yethu yangaphambili ayeprofete ukuba ukuba sasibe ngamaNgqina, sasiya kufa. Oko ayekuprofete malunga neminyaka engama-30 eyadlulayo. Kwanokuba ndingafa ngoku, ngaba oko kuya kubangelwa kukuba ndiye ndaba ngomnye wamaNgqina kaYehova? Ukuba umfazi wam angafa ngoku, ngaba ukho umntu onokuthi oko kubangelwa kukuba eye waba liNgqina likaYehova?
Ndiye ndatsala nzima ndibonisa abantwana bam abali-17 indlela yenyaniso. Nangona abaninzi babo babesele bebadala ngexesha endaba liNgqina ngalo, ndabakhuthaza ukuba bafundisise iBhayibhile yaye ndandihamba nabo xa ndisiya kwiintlanganiso nakwiindibano. Iyandivuyisa into yokuba abahlanu babo bekhonza uYehova kunye nam. Omnye ukhonza nam njengomdala ebandleni. Omnye usisicaka solungiselelo kwibandla elikufutshane. Ababini kubantwana bam bangoovulindlela abathe ngxi.
Xa ndikhangela emva, ndivuyiswa gqitha bububele obungandifanele bukaYehova andenzele bona ngokundinceda ndibe ngumkhonzi wakhe. Hayi indlela ayinyaniso ngayo amazwi kaYesu athi: “Akukho mntu unako ukuza kum ngaphandle kokuba uBawo, owandithumayo, amtsale”!—Yohane 6:44.
[Umbhalo osemazantsi]
* Lithatyathwe kwigama lesiYoruba elithetha “umntu othandazayo.” Libhekisela kwilungu lecawa ethile yaseAfrika ephilisa ngokuthandazela.