Ngoobani Abathunywa Boxolo Bokwenene?
NGOMEYI 31, 1996, amaziko eendaba avakalisa oko kwakubonakala kusisigidimi soxolo. Kusuku olungaphambi kolo, kwakhutshwa ingxelo engokwasemthethweni eqinisekisa ukuba uBenjamin Netanyahu, owayesele eza kuba yinkulumbuso yakwaSirayeli, “wayebandakanyeke ngokunzulu kwinkqubo yokuzisa uxolo, uxolo olunonqabiseko, phakathi kwelizwe lakwaSirayeli nawo onke amazwe aselumelwaneni, kuquka nabemi basePalestina.”
Ukunyulwa okwakungundaba-mlonyeni kukaNetanyahu kwabangela abaninzi bazibuza enoba uxolo lwaluza kubakho ngokwenene kusini na kuMbindi Mpuma. Ukuba lwaluza kubakho, ngaba nezinye iintlanga zazingenza okufanayo, ziziphose kwelokulibala iingxabano zazo?
Kakade ke, kulula ukuthembisa uxolo kunokulwenza lubekho. Bakuqonda oko, abaninzi baba namathandabuzo. Njengoko intatheli uHemi Shalev isitsho, “ngoku isiqingatha sabantu bakwaSirayeli sivakalelwa kukuba sele kumbovu ukuba sihlangulwe, kwaye esinye sivakalelwa kukuba sivaleleke kwisihogo esisemhlabeni.” Eshwankathela, wathi: “Abanye bayavuya; abanye bayalila.”
Kuba njalo ke xa umntu ezama ukuzisa uxolo. Ukuphumelela kwenkokeli ethile nabalandeli bayo kuthetha ukoyiswa kwelinye iqela elichasene nelo. Ukunganeliseki kukhokelela kunxunguphalo, yaye unxunguphalo, ngokufuthi lukhokelela kwimvukelo. Enoba kukuMbindi Mpuma, kuMzantsi noMbindi Merika, eMpuma Yurophu okanye naphi na—imigudu yoluntu yokufumana uxolo isoloko ililize.
Uxolo Lokwenyaniso Lusemnyango!
Ngexesha uxolo olwalungumbandela ekuthethwa ngawo rhoqo kuMbindi Mpuma, kwavakala esinye isigidimi soxolo. Esi sasingeyontetho engundaba-mlonyeni yezobupolitika; singesiso nesivumelwano soxolo esiphakathi kweentlanga. Kunoko, esi sigidimi sasivakalisa uxolo olwaluza kubakho kuphela ngoBukumkani bukaThixo. Sasivakala phi esi sigidimi? KwiiNdibano zeSithili “Zabathunywa Boxolo Lobuthixo” ezinokuba ngaphezu kwe-1900 ezaziqhutywa ngamaNgqina kaYehova ehlabathini lonke ebudeni bowe-1996 ukusa kowe-1997.
Kwezi ndibano yenziwa yacaca into yokuba akakho urhulumente wabantu onokuzisa uxolo nonqabiseko lokwenyaniso. Ngoba? Kuba oko kuya kufuna kupheliswe izinto ezisihlutha uxolo imihla ngemihla. Uxolo lokwenyaniso luthetha ukuvuka ntsasa nganye kungekho sisongelo semfazwe okanye ugonyamelo. Luthetha ukuba akusayi kuphinda kubekho lwaphulo-mthetho, akuyi kubakho maqhaga okutshixa iingcango zethu, asiyi koyika ukuhamba ezitratweni, akuyi kubakho zintsapho zahlukeneyo. Nguwuphi urhulumente emhlabeni onokwenza zonke ezi zinto? Eneneni, nguwuphi urhulumente emhlabeni onokuba nobuganga bokuthembisa ukwenza ezi zinto?
Noko ke, uBukumkani bukaThixo bunako yaye buya kuzenza ezi zinto. IBhayibhile isithembisa oku: “Khangela! Intente kaThixo iseluntwini, yaye uya kuhlala nalo, ibe lona luya kuba ngamaqela abantu bakhe. NoThixo ngokwakhe uya kuba nalo. Kwaye uya kuzisula zonke iinyembezi emehlweni alo, yaye ukufa akusayi kubakho, kungayi kubakho nakukhedama nasikhalo nantlungu kwakhona. Izinto zangaphambili zidlule.” (ISityhilelo 21:3, 4) Esinjani isiqabu esiya kuziswa koko kuluntu olubandezelekayo!
Isithembiso sikaYehova uThixo asilolize. IBhayibhile iyasiqinisekisa: “UThixo akamntu ukuba athethe amanga, akanyana waluntu ukuba azohlwaye. Etshilo nje yena, akayi kwenza na? Ethethile nje, akayi kufeza na?” (Numeri 23:19) Ewe, oko uThixo akuthembisileyo kuya kuzaliseka—uya kubasikelela bonke abo bakwicala lakhe.
Abathunywa Boxolo BakaThixo
AmaNgqina kaYehova aziwa ngokushumayela kwawo ngenzondelelo ngoBukumkani bukaThixo. Nyaka ngamnye, achitha iiyure ezingaphezu kwewaka lesigidi esabelana nabanye ngesigidimi seBhayibhile esilukhuthazo. Oku kuzalisekisa amazwi kaYesu athi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:14) Ngokwenene isigidimi esiza namaNgqina ‘siziindaba ezilungileyo,’ kuba sivakalisa uBukumkani bukaThixo basezulwini njengobukuphela kwethemba loluntu. Elinjani ukuqiniseka ithemba ngekamva!
Kwanangoku uBukumkani bukaThixo buyila iqhina lokwenene loxolo nothando lobuzalwana kubalawulwa babo. UYesu wathi: “Ngako oku bonke baya kwazi ukuba ningabafundi bam, ukuba ninothando phakathi kwenu.” (Yohane 13:35) AmaNgqina kaYehova azabalazela ukuphila ngokuvisisana nezi mfuneko zisisiseko zobuKristu bokwenyaniso. Ngenxa yoko, ubuzalwana babo buyamangalisa kuba bumanyanisa amaYuda nama-Arabhu, abemi baseCroatia nabaseSerbia, amaHutu namaTutsi. Olu xolo inkoliso yabantu ephupha ngalo lukho kwizigidi zamaNgqina kaYehova ehlabathini lonke.
Ukhuthazo lokuqhubeka siphila ngemigaqo yeBhayibhile nokuqhubeka sishumayela iindaba ezilungileyo zoBukumkani bukaThixo lwabalaseliswa kucwangciso lweNdibano yeSithili “Yabathunywa Boxolo Lobuthixo.” Siyakucela ukuba ufunde le ngxelo ilandelayo yendibano ehlab’ umxhelo yeentsuku ezintathu eye yananditshwa zizigidi zabantu.