Yintoni UThixo Ayifunayo Kuthi?
“Oku koko uthando lukaThixo luthetha kona, ukuba sigcine imiyalelo yakhe; ukanti imiyalelo yakhe asiloxanduva.”—1 YOHANE 5:3.
1, 2. Kutheni kungamangalisi nje ukuba uThixo abe nakufunayo kwabo bafuna ukumnqula ngendlela eyamkelekileyo?
“NDANELISEKILE lunqulo lwam!” Ngaba abadli ngokutsho abantu? Noko ke, eneneni bebefanele bazibuze ukuba, “Ngaba unqulo lwam luyamkholisa uThixo?” Ewe, uThixo unakufunayo kwabo bafuna ukumnqula ngendlela eyamkelekileyo. Ngaba oko kufanele kusimangalise? Akunjalo. Masithi unendlu entle, osandul’ ukuyilungisa ngeendleko ezinkulu. Ngaba ubungavumela nabani na ukuba ahlale kuyo? Akunjalo! Nabani oza kuhlala kuyo bekuya kufuneka ahlangabezane nezinto ozifunayo.
2 Ngokufanayo, uYehova uThixo uye walungiselela eli khaya lingumhlaba elenzela intsapho engabantu. Phantsi kolawulo loBukumkani bakhe, umhlaba uza “kulungiswa” kungekudala—uguqulelwe ekubeni yiparadesi entle. UYehova uya kukuphumeza oku. Wanikela ngokuphela koNyana amzeleyo ukuze oko kwenzeke nto leyo eyayiziindleko ezinkulu kuye. Ngokuqinisekileyo, uThixo umele abe nako oko akufunayo kwabo baza kuphila apho!—INdumiso 115:16; Mateyu 6:9, 10; Yohane 3:16.
3. USolomon wakushwankathela njani oko uThixo akulindeleyo kuthi?
3 Sinokukwazi njani oko kufunwa nguThixo? UYehova waphefumlela uKumkani uSolomon owayesisilumko ukuba ashwankathele oko akulindeleyo kuthi. Emva kokucinga ngako konke oko wayekusukele—kuquka ubuncwane, ukwakha izakhiwo, umdla emculweni nothando oluphakathi kwabesini esahlukileyo—uSolomon waphawula oku: “Ukuhlanganiswa kwentetho, yakuba ivakele into yonke, nanku: Yoyika uThixo, ugcine imithetho yakhe; ngokuba indawo leyo yimfanelo yoluntu lonke.” (Akekeliswe sithi.)—INtshumayeli 12:13.
“Imiyalelo Yakhe Asiloxanduva”
4-6. (a) Yintoni intsingiselo yokoqobo yegama lesiGrike eliguqulelwe ngokuthi “uxanduva”? (b) Kutheni sinokuthi imiyalelo kaThixo asiloxanduva?
4 “Ugcine imiyalelo yakhe.” Ngokuyintloko, oku koko uThixo akulindeleyo kuthi. Ngaba inkulu gqitha le nto ayifunayo? Akunjalo konke konke. Umpostile uYohane usixelela into ethile esiqinisekisa ngakumbi ngemiyalelo, okanye ngoko akufunayo uThixo. Wabhala: “Oku koko uthando lukaThixo luthetha kona, ukuba sigcine imiyalelo yakhe; ukanti imiyalelo yakhe asiloxanduva.”—1 Yohane 5:3.
5 Igama lesiGrike eliguqulelwe ngokuthi “uxanduva” ngokoqobo lithetha “ubunzima.” Linokubhekisela kwinto ekunzima ukuyifikelela okanye ekunzima ukuyizalisekisa. KuMateyu 23:4, lisetyenziswa ukuchaza “imithwalo enzima,” imithetho namasiko awenziwe ngabantu, awayebekwe ngababhali nabaFarisi ebantwini. Ngaba uyayifumana intsingiselo yoko kuthethwa ngumpostile uYohane owalupheleyo? Imiyalelo kaThixo asimthwalo unzima, kungenzima nokuba siyigcine. (Thelekisa iDuteronomi 30:11.) Kunoko, xa simthanda uThixo, ukwenza oko akufunayo kusenza sonwabe. Kusinika ithuba elixabisekileyo lokubonakalisa uthando lwethu ngoYehova.
6 Ukuze sibonakalise uthando lwethu ngoThixo, kufuneka sikwazi kakuhle oko akulindeleyo kuthi. Ngoku makhe sixubushe ngezinto ezintlanu uThixo azifunayo. Njengoko sizixubusha, khumbula oko uYohane wakubhalayo: ‘Imiyalelo kaThixo asiloxanduva.’
Ngenisa Ulwazi NgoThixo
7. Luxhomekeke entwenini usindiso lwethu?
7 Into yokuqala efunekayo kukungenisa ulwazi ngoThixo. Khawucinge ngamazwi kaYesu abhalwe kuYohane isahluko 17. Oku kwakusenzeka ngobusuku bokugqibela bukaYesu njengomntu. UYesu wayechithe elona xesha lininzi ngale ngokuhlwa esenza abapostile bakhe bakulungele ukuhamba kwakhe. Wayelixhalabele ikamva labo, ikamva labo elingunaphakade. Ephakamisele amehlo akhe ezulwini, wabathandazela. Kwindinyana 3, sifunda oku: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumeleyo, uYesu Kristu.” Ewe, usindiso lwabo lwaluxhomekeke ‘ekungeniseni kwabo ulwazi’ ngoThixo nangoKristu. Kunjalo nakuthi. Ukuze sisindiswe, simele singenise olo lwazi.
8. Kuthetha ukuthini ‘ukungenisa ulwazi’ ngoThixo?
8 Kuthetha ukuthini ‘ukungenisa ulwazi’ ngoThixo? Igama lesiGrike eliguqulelwe ngokuthi ‘ukungenisa ulwazi’ lithetha “ukwazi, ukuqonda” okanye “ukuqonda ngokupheleleyo.” Kwakhona, phawula ukuba inguqulelo ethi ‘ukungenisa ulwazi’ ibonisa ukuba oku kuyinto eqhubekayo. Ngaloo ndlela ukungenisa ulwazi ngoThixo kuthetha ukumazi kungekhona nje ngegama kodwa ukumazi ngokusondele gqitha, usakha ubuhlobo bokuqondana naye. Ukuba nolwalamano oluqhubekayo noThixo kwenza ulwazi lwethu ngaye luhlale lukhula. Le nkqubo inokuqhubeka ngonaphakade, kuba asinakuze siyifunde yonke into esimele siyazi ngoYehova.—Roma 11:33.
9. Yintoni esinokuyifunda ngoYehova kwindalo?
9 Silungenisa njani ulwazi ngoThixo? Zimbini izinto ezingasinceda. Enye yazo yindalo. Izinto ezidalwe nguYehova—eziphilayo nezingaphiliyo—zisibonisa uhlobo lomntu alulo. (Roma 1:20) Khawucinge ngeminye imizekelo. Umgqumo weengxangxasi ezinkulu, ukuntsileka kwamaza olwandle ebudeni besaqhwithi, ukubona iinkwenkwezi ngobusuku obuzolileyo—ngaba ezi zinto azisifundisi ukuba uYehova unguThixo ‘okhaliphileyo ngamandla’? (Isaya 40:26) Umntwana ogigithekayo njengoko ebukele injana ezama ukunqakula umsila wayo okanye intshontsho lekati lidlala ngebhola yoboya—ngaba oko akubonisi ukuba uYehova, ‘uThixo onoyolo,’ unoburharha? (1 Timoti 1:11) Incasa yesidlo esimnandi, ivumba elimyoli leentyatyambo ezisethafeni, imibala eqaqambileyo yebhabhathane elihle, isandi seentaka zintyiloza entwasahlobo, ukwangiwa ngokufudumeleyo ngumntu omthandayo—ngaba asiqondi ngokusuka kwezi zinto ukuba uMdali wethu unguThixo onothando, ofuna sinandiphe ubomi?—1 Yohane 4:8.
10, 11. (a) Ziziphi izinto eziphathelele uYehova neenjongo zakhe esingenakuzifunda kwindalo? (b) Ziimpendulo zayiphi imibuzo ezifumaneka eBhayibhileni?
10 Noko ke, oko sinokukufunda ngoYehova kwindalo kulinganiselwe. Ngokomzekelo: Ngubani igama likaThixo? Kwakutheni ukuze adale umhlaba aze abeke abantu kuwo? Kutheni uThixo evumela ubungendawo? Lisiphathele ntoni ikamva? Ukuze sifumane iimpendulo kwimibuzo enjengale, sifanele siye kwincwadi enikela ulwazi ngoThixo—iBhayibhile. Kuyo, uYehova utyhila izinto ngaye, kuquka igama lakhe, ubuntu bakhe neenjongo zakhe—inkcazelo esingenakuyifumana kuwo nawuphi na omnye umthombo.—Eksodus 34:6, 7; INdumiso 83:18; Amosi 3:7.
11 KwiZibhalo, uYehova ukwanikela ulwazi olubalulekileyo ngokuphathelele abanye abantu ekufuneka sazi ngabo. Ngokomzekelo, ngubani uYesu Kristu, yaye yiyiphi indima anayo ekuzalisekeni kweenjongo zikaYehova? (IZenzo 4:12) Ngubani uSathana uMtyholi? Ubalahlekisa njani abantu? Sinokukuphepha njani ukulahlekiswa nguye? (1 Petros 5:8) Iimpendulo ezisindisa ubomi kule mibuzo zifumaneka eBhayibhileni kuphela.
12. Unokusichaza njani isizathu sokuba kungeloxanduva ukungenisa ulwazi ngoThixo nangeenjongo zakhe?
12 Ngaba kuluxanduva ukungenisa ulwazi olunjalo ngoThixo nangeenjongo zakhe? Nakanye! Ngaba usayikhumbula indlela owawuvakalelwa ngayo xa wawuqala ukuva ukuba igama likaThixo nguYehova, ukuba uBukumkani bakhe buza kubuyisela iParadesi kulo mhlaba, ukuba wanikela ngoNyana wakhe oyintanda njengentlawulelo yezono zethu, kunye nezinye iinyaniso ezixabisekileyo? Ngaba kwakungafani nokususa isigqubuthelo sokuswela ulwazi nokuqala ukubona izinto ngokucacileyo? Ukungenisa ulwazi ngoThixo akuloxanduva. Kuzisa uvuyo!—INdumiso 1:1-3; 119:97.
Ukufikelela Imilinganiselo KaThixo
13, 14. (a) Njengoko singenisa ulwazi ngoThixo, ziziphi iinguqulelo ekufuneka sizenze ebomini bethu? (b) UThixo ufuna sizikhwebule kuluphi uqheliselo olungacocekanga?
13 Njengoko singenisa ulwazi ngoThixo, siphawula ukuba kufuneka senze iinguqulelo ebomini bethu. Oku kusizisa kwinto yesibini efunekayo. Simele sifikelele imilinganiselo kaThixo yehambo elungileyo size samkele inyaniso yakhe. Yintoni inyaniso? Ngaba ngokwenene kubalulekile kuThixo oko sikukholelwayo noko sikwenzayo? Kubonakala ngathi abantu abaninzi bacinga ukuba akunjalo. Ingxelo eyapapashwa kwiCawa yaseTshetshi ngowe-1995 yabonisa ukuba ukuhlalisana ngaphandle kokutshata akufanele kujongwe njengesono. Omnye ubhishopu wecawa wathi: “Ibinzana elithi ‘ukuphila esonweni’ likukuhlaba amadlala yaye alakhi.”
14 Ngoko ke, ngaba “ukuphila esonweni” akusosono? UYehova usixelela ngokucace gca indlela avakalelwa ngayo ngehambo enjalo. ILizwi Lakhe, iBhayibhile, lithi: “Umtshato mawubekeke phakathi kwenu nonke, nesilili somtshato masingadyojwa, kuba uThixo uya kubagweba abahenyuzi nabakrexezi.” (Hebhere 13:4) Ngokwembono yabefundisi namarhamente angoofunz’ eweni ukuba neentlobano zesini ngaphambi komtshato kusenokungabi sisono, kodwa sisono esinzulu emehlweni kaThixo! Ibe kunjalo nangokukrexeza, umbulo nobufanasini. (Levitikus 18:6; 1 Korinte 6:9, 10) UThixo ufuna sizikhwebule kuqheliselo olunjalo, alugqala njengolungacocekanga.
15. Izinto ezifunwa nguThixo ziyibandakanya njani indlela esibaphatha ngayo abanye noko sikukholelwayo?
15 Noko ke, akwanelanga ukuzikhwebula kuqheliselo uThixo alugqala njengesono. Oko kufunwa nguThixo kubandakanya indlela esibaphatha ngayo abanye. Entsatsheni, ulindele ukuba indoda nomfazi bathandane yaye bahlonelane. UThixo ufuna abazali banyamekele iintswelo zokwenyama, zokomoya nezeemvakalelo zabantwana babo. Uxelela abantwana ukuba bathobele abazali babo. (IMizekeliso 22:6; Kolose 3:18-21) Yaye kuthekani ngeenkolelo zethu? UYehova uThixo ufuna siphephe iinkolelo nezithethe ezivela kunqulo lobuxoki okanye ezingqubana nenyaniso engangxengwanga efundiswa yiBhayibhile.—Duteronomi 18:9-13; 2 Korinte 6:14-17.
16. Chaza isizathu sokuba kungeloxanduva ukufikelela imilinganiselo kaThixo yehambo elungileyo nokwamkela inyaniso yakhe.
16 Ngaba kuluxanduva kuthi ukufikelela imilinganiselo kaThixo yehambo elungileyo nokwamkela inyaniso yakhe? Akunjalo xa sicinga ngeengenelo—imitshato enamadoda nabafazi abathandanayo nabathembanayo kunemitshato eqhekezwa kukunganyaniseki kweqabane; amakhaya anabantwana abaziva bethandwa yaye befunwa ngabazali babo kuneentsapho ezinabantwana abaziva bengathandwa, betyeshelwe yaye bengafunwa; isazela esicocekileyo nempilo entle kunokuziva unetyala nomzimba odlakazwe nguGawulayo okanye esinye isifo esidluliselwa ngeentlobano zesini. Ngokuqinisekileyo, oko uYehova akufunayo akusibandezi nantoni na esiyifunayo ukuze sinandiphe ubomi!—Duteronomi 10:12, 13.
Hlonela Ubomi Negazi
17. UYehova ubujonga njani ubomi negazi?
17 Njengoko uvisisanisa ubomi bakho nemilinganiselo kaThixo, uyayiqonda indlela obuxabiseke ngokwenene ngayo ubomi. Ngoku makhe sixubushe ngento yesithathu efunwa nguThixo. Simele sihlonele ubomi negazi. Ubomi bungcwele kuYehova. Bufanele bube njalo, ekubeni enguMthombo wobomi. (INdumiso 36:9) Ewe, kwanobomi bemveku engekazalwa engaphakathi kunina buxabisekile kuYehova! (Eksodus 21:22, 23) Igazi limela ubomi. Ngenxa yoko, kwanegazi lingcwele emehlweni kaThixo. (Levitikus 17:14) Ngoko ke, asifanele simangaliswe kukuba uThixo afune ukuba sijonge ubomi negazi ngendlela abujonga ngayo.
18. Yintoni ekufuneka siyenze ngenxa yembono kaYehova ngobomi negazi?
18 Kufuneka sibe senza ntoni ukuze sibe siyabuhlonela ubomi negazi? NjengamaKristu, asibubeki engozini ngokungeyomfuneko ubomi bethu ngenxa nje yolonwabo. Sikuphaphele ukukhuseleka yaye ngenxa yoko siyaqiniseka ukuba iinqwelo-mafutha zethu namakhaya ethu akhuselekile. (Duteronomi 22:8) Asilisebenzisi icuba, asihlafuni ibetel nut okanye sisebenzise iziyobisi ezikhobokisa okanye zenzakalise ingqondo ukuze sifumane uyolo. (2 Korinte 7:1) Ngenxa yokuba siphulaphula uThixo xa esithi ‘masikhwebuke kwigazi,’ asivumi ukutofelwa igazi emizimbeni yethu. (IZenzo 15:28, 29) Nangona sibuthanda ubomi, asinakuzama ukusindisa obu bomi sibuphilayo ngokwaphula umthetho kaThixo size ngaloo ndlela sibeke engozini ithemba lethu lobomi obungenasiphelo!—Mateyu 16:25.
19. Chaza indlela esingenelwa ngayo ngokuhlonela ubomi negazi.
19 Ngaba kuluxanduva kuthi ukuphatha ubomi negazi njengezinto ezingcwele? Nakanye! Khawucinge ngako oku. Ngaba kuluxanduva ukungabi nomhlaza wemiphunga obangelwa kukutshaya icuba? Ngaba kuluxanduva ukuphepha ukukhotyokiswa ngokwasengqondweni nangokwasemzimbeni ziziyobisi ezenzakalisayo? Ngaba kuluxanduva ukuphepha ukusulelwa nguGawulayo, ihepatitis okanye ezinye izifo ezifumaneka ngokutofelwa igazi? Kuyacaca ukuba ukuphepha kwethu imikhwa noqheliselo olwenzakalisayo kuyingenelo kuthi.—Isaya 48:17.
20. Yangenelwa njani enye intsapho ngokuba nembono kaThixo ngobomi?
20 Khawuqwalasele la mava. Kwiminyaka ethile edluleyo, umfazi othile oliNgqina owayemalunga neenyanga ezintathu ezinesiqingatha ekhulelwe waqalisa ukopha ngenye ingokuhlwa waza wabalekiselwa esibhedlele. Emva kokuxilongwa ngugqirha, wamva exelela omnye wabongikazi ukuba kwakuza kufuneka bamqhomfise. Esazi indlela uYehova abugqala ngayo ubomi bosana olungekazalwa, wakukhaba ngaw’ omane ukuqhomfa, emxelela oku ugqirha: “Ukuba luyaphila, musani ukuluchukumisa!” Waqhubeka esopha ngamaxesha athile, kodwa emva kweenyanga eziliqela wabeleka ngaphambi kwexesha inkwenkwe engumqabaqaba ngoku eneminyaka eli-17 ubudala. Lachaza: “Unyana wethu wayibaliselwa yonke le nto, ibe wathi wayeyivuyela into yokuba engazange aphoswe emgqomeni wenkunkuma. Uyazi ukuba ukukhonza kwethu uYehova kukuphela kwesizathu sokuba abe usaphila.” Ngokuqinisekileyo, ukuba nembono kaThixo ngobomi kwakungeloxanduva kule ntsapho!
Ukukhonza Kunye Nabantu BakaYehova Abalungelelanisiweyo
21, 22. (a) UYehova ulindele ukuba simkhonze nabani? (b) Banokufaniswa njani abantu abalungelelanisiweyo bakaThixo?
21 Ayisithi sodwa abenza iinguqulelo eziyimfuneko ukuze sivisisanise ubomi bethu nemilinganiselo kaThixo. UYehova unabantu bakhe kulo mhlaba, yaye ulindele ukuba simkhonze kunye nabo. Oku kusizisa kwinto yesine efunekayo. Simele sikhonze uYehova nentlangano yakhe eyalathiswa ngumoya.
22 Noko ke, banokufaniswa njani abantu bakaThixo abalungelelanisiweyo? Ngokutsho kwemilinganiselo ebekwe kwiZibhalo, banothando lokwenene phakathi kwabo, bayihlonela ngokunzulu iBhayibhile, baliphatha ngembeko igama likaThixo, bashumayela ngoBukumkani bakhe yaye abayonxalenye yeli hlabathi lingendawo. (Mateyu 6:9; 24:14; Yohane 13:34, 35; 17:16, 17) Inye kuphela kulo mhlaba intlangano yonqulo enazo zonke ezi mpawu zobuKristu bokwenyaniso—amaNgqina kaYehova!
23, 24. Sinokubonisa njani ukuba akuloxanduva ukukhonza uYehova nabantu bakhe abalungelelanisiweyo?
23 Ngaba kuluxanduva ukukhonza uYehova kunye nabantu bakhe abalungelelanisiweyo? Eneneni akunjalo! Kunoko, kulilungelo elixabisekileyo ukufumana uthando nenkxaso yentsapho esehlabathini lonke yabazalwana noodade abangamaKristu. (1 Petros 2:17) Khawube nombono usinda kwinqanawa ezikayo uze uzifumane usemanzini, uzabalazela ukudada ngaphezulu emanzini. Xa uvakalelwa kukuba awusenako ukuqhubeka, ubanjwa sisandla somntu okwiphenyane lokuhlangula abantu. Ewe, bakho nabanye abasindileyo! Kwiphenyane lokuhlangula, wena nabanye niyatshintshisana niliqhubela elunxwemeni, nihamba nihlangula abanye abasindileyo endleleni.
24 Ngaba asiphili kwimeko efanayo? Siye sakhutshwa “kumanzi” anobungozi eli hlabathi lingendawo sasiwa “kwiphenyane lokuhlangula” eliyintlangano kaYehova yasemhlabeni. Ngaphakathi kwayo, sikhonza ngaxhatha linye njengoko sisiya “kunxweme” lwehlabathi elitsha elinobulungisa. Ukuba iingcinezelo zobomi zinokusenza sidinwe endleleni, hayi indlela esinombulelo ngayo ngoncedo nentuthuzelo yamaqabane angamaKristu okwenyaniso!—IMizekeliso 17:17.
25. (a) Yiyiphi imbopheleleko esinayo ngabo basephakathi “emanzini” eli hlabathi lingendawo? (b) Yiyiphi into efunwa nguThixo eza kuxutyushwa kwinqaku elilandelayo?
25 Kuthekani ngabanye—abantu abantliziyo zinyanisekileyo abasengaphakathi “emanzini”? Sinembopheleleko yokubanceda bangene kwintlangano kaYehova, akunjalo na? (1 Timoti 2:3, 4) Bafuna ukuncedwa ukuze baqonde oko uThixo akufunayo. Oku kusizisa kwinto yesihlanu efunwa nguThixo. Simele sibe ngabavakalisi abanyanisekileyo boBukumkani bukaThixo. Inqaku elilandelayo liza kuxubusha ngokubandakanyekileyo koku.
Usakhumbula Na?
◻ Kutheni imiyalelo kaThixo ingeloxanduva?
◻ Silungenisa njani ulwazi ngoThixo?
◻ Kutheni kungeloxanduva ukufikelela imilinganiselo kaThixo yehambo elungileyo nokwamkela inyaniso yakhe?
◻ Yintoni ekufuneka siyenze ngenxa yembono kaThixo ngobomi negazi?
◻ UThixo ulindele ukuba simkhonze noobani, yaye banokufaniswa njani?
[Pictures On Page 18]
Sifunda ngoYehova kwindalo naseBhayibhileni
[Inkcazelo]
Crocodile: By courtesy of Australian International Public Relations; bear: Safari-Zoo of Ramat-Gan, Tel Aviv