Ngaba Uyoyika Ukuthemba Abanye?

‘AKUKHO mntu ndinokuthetha naye. Abantu abayi kuqonda. Baxakeke gqitha ziingxaki zabo. Abanalo ixesha lengxaki yam.’ Abaninzi bavakalelwa ngaloo ndlela, ngoko izinto bazivalela ezifubeni zabo. Xa abanye bebabuza indlela abaqhuba ngayo, ngokufuthi bafuna ukubaxelela, kodwa abenjinjalo. Abakwazi ukuzityand’ igila.

Kuyinyaniso ukuba, bakho abo bangafuni kuncedwa ngabanye. Kodwa, abaninzi balufuna gqitha uncedo kodwa bayoyika ukutyhila iingcamango, iimvakalelo nezinto abajamelana nazo ezinzulu. Ngaba ungomnye wabo? Ngaba ngokwenene akakho umntu onokumthemba?

Ukuqonda Olo Loyiko

Kwihlabathi lanamhlanje kukho umoya wokungathembani. Abantu abaselula abancokoli nabazali babo. Abazali abancokolisani. Bambalwa abakulungeleyo ukuncokola nabasemagunyeni. Bengakwazi ukuba nentembelo kwabanye, bambi baguqukela kwiziselo ezinxilisayo, kwiziyobisi okanye kwindlela yokuphila engalawulekiyo ukuze baphephe iingxaki zabo.—IMizekeliso 23:29-35; Isaya 56:12.

Ukuba nentembelo kwabasemagunyeni, abanjengabefundisi, oogqirha, iingcali zonyango, nabafundisi-ntsapho, kuye kwagungqiswa kukwesamela kokunganyaniseki nokuziphatha okubi. Ngokomzekelo, olunye uqikelelo luthi abefundisi abangaphezu kwe-10 ekhulwini babandakanyeke ekuziphatheni okubi ngokwesini. Omnye umbhali uthi aba “baphelisi bokuthembana bemba imiwonyo, iimfanta neentanda kulwalamano lwabantu.” Oku kuwachaphazela njani amabandla abo? Kuyakutshabalalisa ukuthembana.

Ukuwohloka okunwenwa okomlilo wedobo kwemilinganiselo yokuziphatha nako kuye kwakhokelela kwiingxaki entsatsheni, ukusa kumlinganiselo wokuba ukungevani ezintsatsheni kube yinto eqhelekileyo, kungekhona into ebakho manqaphanqapha. Ikhaya lalikhe laba yindawo yokukhulisa abantwana. Ngokufuthi namhlanje liyindawo nje yokuzalisa isisu ngamaxesha okutya kuphela. Xa umntwana ekhulela kwintsapho engenawo “umsa wemvelo,” umphumo oqhelekileyo uba kukungakwazi ukuthemba abanye xa sele emdala.—2 Timoti 3:3.

Ngaphezu koko, njengoko iimeko zehlabathi ziya zisiba mbi, sichanabeka nangakumbi kwizinto ezinokuba ziintlekele. Kwimeko enjalo, umprofeti uMika wabhala: “Ningakholosi ngekholwane.” (Mika 7:5) Unokuvakalelwa ngaloo ndlela emva kokuphoxeka nje kancinane, xa uphoxwe ngumntu obumthembile, okanye isiganeko esiphantse sasuba ubomi. Ukufumanisa kunzima ukuthemba abanye ibe iimvakalelo zakho ziya ziphela, suku ngalunye uphile ngaphaya komqobo weemvakalelo. (Thelekisa INdumiso 102:1-7.) Kuyinyaniso ukuba, isimo sengqondo esinjalo sisenokufeza indima ethile, kodwa ‘intliziyo ebulalekayo’ ikuhlutha uvuyo lokwenene ebomini. (IMizekeliso 15:13) Inyaniso kukuba, ukuze uphile ngokomoya, ngokweemvakalelo, ngokwasengqondweni nangokwasemzimbeni, loo mqobo umele ushenxe yaye kufuneka ufunde ukubathemba abantu. Ngaba kunokwenzeka oko? Ewe.

Kutheni Umele Ushenxe Lo Msantsa?

Ukuthemba abanye kuzisa isiqabu kwintliziyo ekhathazekileyo. Kwenzeka okufanayo kuHana. Umtshato wakhe wawuphumelela, ikhaya lakhe linqabisekile, kodwa wayenxunguphele ngokunzulu. Nangona “wawukrakra umphefumlo” wakhe, ngobulumko “wathandaza kuYehova” kangangokuba imilebe yakhe yayide ishukume. Ewe, wayethembele ngoYehova. Wandula ke wazityand’ igila kummeli kaThixo uEli. Waba yintoni umphumo? “[UHana] wahamba indlela yakhe, wadla, ababa samatsha ubuso bakhe.”—1 Samuweli 1:1-18.

Kwiindawo ezininzi ziyaziwa iingenelo zokuncokolisana ngezinto ezinzulu. Ngokomzekelo, ukwabelana ngeengcamango namava nabo baye bakwiimeko ezifanayo kunokuba yingenelo. Abaphengululi bagqiba ngelithi: “Ukuba yinkomo edla yodwa ngokweemvakalelo kunokubangela ingulo—kufuneka sizithethe izinto ukuze sihlale siphilile.” Inani elandayo labaphandi bezenzululwazi liqinisekisa ubunyaniso besaci esiphefumlelweyo esithi: “Ozahlulayo ufuna umnqweno wakhe; into yonke ezimasayo uyayivungamela.”—IMizekeliso 18:1.

Ukuba akuzityandi gila kwabanye, banokukunceda njani? Ngoxa uYehova uThixo ezifunda iintliziyo, iingcamango neemvakalelo ezingaphakathi kuwe zinjengencwadi evaliweyo kwintsapho nakubahlobo—ngaphandle kokuba uzityand’ igila. (1 Kronike 28:9) Xa ingxaki ibandakanya ukwaphulwa komthetho kaThixo, ukuphepha ukuyixela loo nto kuzenza zibe nzima nangakumbi iimeko.—IMizekeliso 28:13.

Ngokuqinisekileyo, iingenelo zokuzityand’ igila kwabanye ngezinto ezisinxunguphalisayo zingaphezulu kweengozi zokuviswa ubuhlungu. Kakade ke, oko akuthethi kuthi sifanele sisasaze iimfihlo zethu ngokungakhathaliyo. (Thelekisa ABagwebi 16:18; Yeremiya 9:4; Luka 21:16.) IMizekeliso 18:24 ilumkisa ngelithi: “Indoda enezihlobo iyachithwa;” kodwa yandule ukongezelela isithi: “Kodwa kukho umhlobo ogqithisele umzalwana ngokunamathela.” (Thelekisa iAppleyard’s Version.) Unokumfumana phi umhlobo onjalo?

Themba Intsapho Yakho

Ukuba unengxaki, ngaba ukhe wazama ukuyixubusha neqabane lakho lomtshato okanye nabazali bakho? Omnye umluleki ongumakad’ enetha uyavuma esithi: “Xa uneengxaki ezininzi, into efunekayo nje kukuthetha ngazo.” (IMizekeliso 27:9) Abayeni abangamaKristu ‘abathanda abafazi babo njengoko besenjenjalo kubo,’ abafazi ‘abathobela amadoda abo,’ nabazali abayithabatha nzulu imbopheleleko abayinikwe nguThixo ‘yokukhulisela abantwana babo kwingqeqesho nasekweyiselweni kwengqondo kuYehova’ baya kuzibhokoxa ukuze babe ngabaphulaphuli abanovelwano yaye banikele isiluleko esiluncedo. (Efese 5:22, 33; 6:4) Nangona engazange abe namfazi okanye abantwana ngengqiqo yokwenyama, onjani ukubalasela umzekelo owamiselwa nguYesu kulo mba!—Marko 10:13-16; Efese 5:25-27.

Kuthekani ukuba loo ngxaki ingaphaya kwamandla entsapho? Kwibandla lamaKristu, akufuneki sibe ngamalolo. Umpostile uPawulos wathi: “Ngubani na obuthathaka, ndize mna ndingabi buthathaka?” (2 Korinte 11:29) Wabongoza esithi: “Qhubekani nithwala uxanduva lomnye nomnye.” (Galati 6:2; Roma 15:1) Phakathi kwabazalwana noodade bethu bokomoya, ngokuqinisekileyo sinokufumana iqela ‘labazalwana abazalelwe imbandezelo.’—IMizekeliso 17:17.

Ukuthembana Ebandleni

Kumabandla amaNgqina kaYehova angaphezu kwama-80 000 emhlabeni wonke, kukho amadoda athobekileyo akhonza ‘njengabasebenzi abangamadlelane ukuze sibe novuyo.’ (2 Korinte 1:24) Loo madoda ngabadala. UIsaya uthi: “Umntu abe njengendawo yokuzimela umoya, neyokusithela esiphangweni; abe njengemijelo yamanzi emqwebedwini, njengomthunzi wengxondorha enkulu ezweni elibharhileyo.” Abadala bazabalazela ukuba njalo.—Isaya 32:2; 50:4; 1 Tesalonika 5:14.

Abadala bahlangabezana neemfuneko ezingokweZibhalo ngaphambi kokuba ‘bamiselwe ngomoya oyingcwele.’ Ukwazi oku kuya kuyomeleza intembelo yakho kubo. (IZenzo 20:28; 1 Timoti 3:2-7; Tito 1:5-9) Oko ukuxubusha nomdala kuya kuhlala kuyimfihlo ngokungqongqo. Ukuba ngumntu onokuthenjwa lolunye lweemfaneleko zakhe.—Thelekisa iEksodus 18:21; Nehemiya 7:2.

Abadala ebandleni “bahlala beyilindile imiphefumlo yenu njengabo baya kunikela ingxelo.” (Hebhere 13:17) Ngaba oku akukushukumiseli ukuba uwathembe la madoda? Ngokwemvelo, abadala ababalaseli bonke ngeempawu ezifanayo. Bambi basenokubonakala bengeneka lula, babe nobubele, okanye baqonde kunabanye. (2 Korinte 12:15; 1 Tesalonika 2:7, 8, 11) Kutheni ungathembeli ngomdala othile oziva ukhululekile ukuthetha naye?

La madoda akangobasebenzi abahlawulwayo. Kunoko, ‘azizipho ezikuhlobo lwabantu,’ ezilungiselelwe nguYehova ukuze akuncede. (Efese 4:8, 11-13; Galati 6:1) Njani? Esebenzisa iBhayibhile ngobuchule, aya kusebenzisa amandla ayo okuphilisa kwimeko yakho yobuqu. (INdumiso 107:20; IMizekeliso 12:18; Hebhere 4:12, 13) Aya kuthandaza kunye nawe yaye akuthandazele. (Filipi 1:9; Yakobi 5:13-18) Uncedo oluvela kubaluleki abanjalo lunokuphumeza lukhulu ekunyangeni umoya okhathazekileyo nokubuyisela uxolo lwengqondo.

Indlela Yokwakha Ulwalamano Lokuthembana

Ukucela uncedo, icebiso okanye ukufuna ukuphulaphulwa akulophawu lokuba buthathaka okanye ukusilela. Kuphela nje kukuvuma ngokwenene ukuba asifezekanga yaye akukho mntu wazi yonke into. Ngokuqinisekileyo, oyena mluleki ubalaseleyo nesinokuthembela kuye nguBawo wethu osezulwini, uYehova uThixo. Sivumelana nomdumisi owabhala esithi: “NguYehova amandla nengweletshetshe yam. Yakholosa ngaye intliziyo yam, ndancedeka.” (INdumiso 28:7) ‘Sinokuyiphalazela kuye intliziyo yethu’ ngomthandazo ngalo naliphi na ixesha sifuna, sinentembelo yokuba uyasiva yaye usikhathalele.—INdumiso 62:7, 8; 1 Petros 5:7.

Kodwa unokufunda njani ukuthemba abadala nabanye ebandleni? Kuqala, khawuzihlole. Ngaba uloyiko lwakho lunezizathu ezibambekayo? Ngaba uyazirhanela iintshukumisa zabanye? (1 Korinte 13:4, 7) Ngaba ikho indlela yokunciphisa ingozi yokuviswa ubuhlungu? Ewe. Yiyiphi? Zama ukuqhelana nabanye kwizinto zokomoya. Ncokola nabo ezintlanganisweni zebandla. Yiya nabo kumsebenzi wendlu nendlu. Ukuthenjwa, njengentlonelo, kumele kuzuzwe. Ngoko yiba nomonde. Njengoko usiya umqhela lo malusi wokomoya, uza kuya umthemba ngakumbi. Tyhila amaxhala akho ngokuthe ngcembe. Ukuba usabela ngendlela efanelekileyo, ngovelwano nangokuqondayo, usenokuzama ukumtyhilela nangakumbi.

Abo sinqula kunye nabo uYehova, ngokukodwa abadala abangamaKristu, bayazibhokoxa ekuxeliseni iimpawu ezintle zikaThixo kulwalamano lwabo nabanye. (Mateyu 5:48) Oku kuphumela kwimo yokuthembana ebandleni. Omnye umdala oligqala uthi: “Abazalwana bamele bazi into enye: Kungakhathaliseki oko umntu akwenzayo, umdala akaphulukani nothando lobuKristu ngaye. Usenokungakuthandi akwenzileyo, kodwa usamthanda umzalwana wakhe ibe ufuna ukumnceda.”

Ngoko akukho mfuneko yakuziva uwedwa xa unengxaki. Thetha nomntu ‘oneemfaneleko zokomoya’ onokukunceda uthwale umthwalo wakho. (Galati 6:1) Khumbula ukuba “isithukuthezi esisentliziyweni yendoda siyenza igobe,” kodwa “linqatha lobusi amazwi amnandi, ayincasa emphefumlweni, ayimpiliso emathanjeni.”—IMizekeliso 12:25; 16:24.

[Box On Page 26]

Nawuphi na umKristu kusenokufuneka ancede isalamane, umhlobo okanye umzalwana wokomoya onengxaki yobuqu. Ngaba uyayazi indlela yokumnceda?

UMLULEKI OLUNCEDO

uyangeneka: Mateyu 11:28, 29; 1 Petros 1:22; 5:2, 3

ukhetha Ixesha Elifanelekileyo: Marko 9:33-37

uzama Ukuqonda Ingxaki: Luka 8:18; Yakobi 1:19

akasabeli Ngokugabadeleyo: Kolose 3:12-14

uyanceda Ukuthomalalisa Iimvakalelo Ezibuhlungu: 1 Tesalonika 5:14; 1 Petros 3:8

uyakwazi Ukulinganiselwa Kwakhe: Galati 6:3; 1 Petros 5:5

unikela Isiluleko Esikhethekileyo: INdumiso 19:7-9; IMizekeliso 24:26

uyazigcina Iimfihlo: IMizekeliso 10:19; 25:9