Funa Uxolo Lokwenyaniso Uze Ulusukele!
“Lowo ubeya kuthanda ubomi nokubona imihla elungileyo, . . . makakhwebuke koko kubi aze enze oko kulungileyo; makafune uxolo aze alusukele.”—1 PETROS 3:10, 11.
1. Ngawaphi amazwi kaIsaya adumileyo aza kuzaliseka ngokuqinisekileyo?
“ZIWAKHANDE amakrele azo abe ngamakhuba, nezikhali zazo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.” (Isaya 2:4) Nangona la mazwi adumileyo ebhalwe kufuphi nekomkhulu lehlabathi leZizwe Ezimanyeneyo kwisiXeko iNew York, lo mbutho wehlabathi awukhange ubonakale ngathi ungazama ukuwazalisekisa. Noko ke, njengenxalenye yelizwi likaYehova uThixo elingenakusilela, loo mazwi aya kuzaliseka.—Isaya 55:10, 11.
2. Yintoni emele ‘yenzeke ekupheleni kwemihla,’ ngokutsho kukaIsaya 2:2, 3?
2 Amazwi afumaneka kuIsaya 2:4 enyanisweni ayinxalenye yesiprofeto esimangalisayo, isiprofeto esingoxolo lokwenyaniso—yaye azaliseka ngoku kwixesha lethu. Ngaphambi kokuvakalisa eli themba lichulumancisayo lokungabikho kweemfazwe nezixhobo zemfazwe, esi siprofeto sithi: “Ke kaloku kuya kuthi ekupheleni kwemihla, intaba yendlu kaYehova ivelele ezincotsheni zazo iintaba, izongamele iinduli, zibe ngumsinga ukuya kuyo zonke iintlanga. Kuya kuhamba izizwe ezininzi, zithi, Yizani, sinyuke siye entabeni kaYehova, endlwini kaThixo kaYakobi; asiyalele iindlela zakhe, sihambe ngomendo wakhe. Kuba kuya kuphuma umyalelo eZiyon, nelizwi likaYehova eYerusalem.”—Isaya 2:2, 3.
Abantu Banokuba Noxolo
3. Umntu unokuguquka njani esusela ekubeni nguphuma silwe aze abe ngumntu woxolo?
3 Phawula ukuba ngaphambi kokuba abantu bakwazi ukusukela uxolo, bamele bafundiswe ngeendlela zikaYehova. Ukuyithobela imfundiso kaYehova kunokuyiguqula indlela ubani acinga nazenza ngayo izinto, ukuze umntu obenguphuma silwe abe ngumntu woxolo. Yenzeka njani le nguqulelo? EyabaseRoma 12:2 ithi: “Yekani ukumilisa okwale nkqubo yezinto, kodwa guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.” Sitshintsha ingqondo yethu, okanye siyishukumisela ukwenza izinto ezahlukileyo, ngokuyizalisa ngemigaqo neengcamango ezivela eLizwini likaThixo. Ukufundisisa rhoqo iBhayibhile kuyasinceda sikwazi ukwenza olu tshintsho ukuze sikungqine oko kukukuthanda kukaYehova ngathi, ngoko sikwazi ukuyibona kakuhle indlela esifanele sihambe ngayo.—INdumiso 119:105.
4. Ubani ubambatha njani ubuntu obutsha obunoxolo?
4 Inyaniso yeBhayibhile ayiguquli kuphela nje indlela esicinga ngayo kodwa iguqula nendlela esizenza ngayo izinto nobuntu bethu. Isinceda senze oko umpostile uPawulos wakukhuthazayo esithi: “Nibulahle ubuntu obudala obuvisisana nekhondo lenu lehambo yangaphambili nobuthi bonakaliswe yiminqweno yabo ekhohlisayo; kodwa nifanele nenziwe batsha kumandla aqhuba ingqondo yenu, yaye nifanele nambathe ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.” (Efese 4:22-24) Amandla aqhuba ingqondo angaphakathi. Ayaguquka aze abe nefuthe ngakumbi njengoko uthando lwethu ngoYehova nemithetho yakhe lukhula, yaye asenza sibe ngabantu abaziphapheleyo izinto zokomoya nabanoxolo.
5. “Umyalelo omtsha” uYesu awunika abafundi bakhe unayiphi indima kuxolo oluphakathi kwabo?
5 Imfuneko yale nguqulelo ibonwa kumyalelo kaYesu kubafundi bakhe ebudeni bemizuzu yokugqibela ekunye nabo xa wathi: “Ndininika umyalelo omtsha, wokuba nithandane; kanye njengoko ndinithandileyo mna, ukuba kwanani nithandane. Ngako oku bonke baya kwazi ukuba ningabafundi bam, ukuba ninothando phakathi kwenu.” (Yohane 13:34, 35) Olu thando lunjengolukaKristu nolokungazingci lubopha abafundi kumanyano olugqibeleleyo. (Kolose 3:14) Kuphela ngabo bakulungeleyo ukwamkela nokuphila ngalo “myalelo mtsha” abaya kufumana uxolo uThixo aluthembisayo. Ngaba bakho abakwenzayo oku namhlanje?
6. Kutheni amaNgqina kaYehova enoxolo, ngoxa kungenjalo ngabantu behlabathi?
6 AmaNgqina kaYehova azabalazela ukubonisa uthando kubuzalwana bawo behlabathi lonke. Nangona ephuma kwiintlanga zonke zehlabathi, akabandakanyeki kwiimbambano zehlabathi, naxa enyanzelwa ngabezobupolitika nabonqulo. Njengabantu abamanyeneyo, afundiswa nguYehova, yaye anoxolo. (Isaya 54:13) Angoondilele kwiingxwabangxwaba zobupolitika, yaye akananxaxheba kwiimfazwe. Wambi ngaphambili ayenogonyamelo ayiyekile loo ndlela yokuphila. Aye angamaKristu athanda uxolo, exelisa umzekelo kaKristu Yesu. Yaye ngentliziyo iphela alandela icebiso likaPetros elithi: “Lowo ubeya kuthanda ubomi nokubona imihla elungileyo, makathintele ulwimi lwakhe koko kubi nemilebe yakhe ekuthetheni inkohliso, kodwa makakhwebuke koko kubi aze enze oko kulungileyo; makafune uxolo aze alusukele.”—1 Petros 3:10, 11; Efese 4:3.
Abo Basukela Uxolo
7, 8. Nikela imizekelo yabantu abayiyekayo imfazwe baza bazabalazela ukufumana uxolo lokwenyaniso. (Balisa nangabanye osenokuba uqhelene nabo.)
7 Ngokomzekelo, khawucinge ngoRami Oved, owayesakuba ngumphathi kumkhosi okhethekileyo owawusilwa nabanqolobi. Wayeqeqeshelwe ukubulala iintshaba zakhe. Wayebuthanda ngokungazenzisiyo ubuzwe bakhe njengomSirayeli de kwathi ngaminazana ithile wafumanisa ukuba oorabhi babengafuni ukuba atshate nebhinqa awayelithanda kuba lalingummi waseAsia, oweeNtlanga. Waqalisa ukufuna inyaniso eBhayibhileni. Wandula ke waqhagamshelana namaNgqina kaYehova. Ukufundisisa kwakhe iBhayibhile namaNgqina kwamenza weyiseka kwelokuba wayengasenakuba ngumthandi welizwe ophambili. Uthando lobuKristu lwamenza wayifulathela imfazwe nezixhobo waza wafunda ukubathanda abantu bezizwe zonke. Hayi indlela awamangaliswa ngayo xa wafumana ileta eyayinala mazwi entshayelelo, “Rami Mzalwana Wam”! Wayesothuswa yintoni kuloo nto? Lowo wayebhale le leta wayeliNgqina lasePalestina. URami uthi: “Ndandingakukholelwa oko, ekubeni sasiyinyoka nesele nabantu basePalestina, ibe nanku omnye wabo endibiza ngokuthi ‘Mzalwana Wam.’ ” Sithetha nje uRami nomfazi wakhe basukela uxolo lokwenyaniso ngendlela kaThixo.
8 Omnye umzekelo ngokaGeorg Reuter, owayesemkhosini waseJamani ekuhlaseleni kwayo iRashiya ebudeni beMfazwe Yehlabathi II. Kungekudala amabhongo kaHitler okufuna ukulawula ihlabathi lonke amvula amehlo. Ekubuyeni kwakhe emfazweni, waqalisa ukufundisisa iBhayibhile namaNgqina kaYehova. Wabhala wathi: “Ekugqibeleni, izinto zazisiya zisithi qwenge kum. Ndatsho ndaqonda ukuba asingoThixo omele abekw’ ityala ngokuphalazwa kwezantyalantyala zegazi . . . Ndafunda ukuba injongo yakhe yayikukwenza iparadesi yomhlaba wonke neentsikelelo zikanaphakade kuluntu oluthobelayo. . . . UHitler wayezingomb’ isifuba ‘ngoLawulo lwakhe Lweminyaka Eliwaka’ kodwa walawula [iminyaka] eli-12 kuphela—yaye isikhuni sabuya nomkhwezeli! NguKristu kungekhona uHitler . . . oya kulawula iminyaka eliwaka phezu komhlaba.” Kangangeminyaka enokuba ngama-50 ngoku, uGeorg ebekhonza njengomthunywa woxolo kubulungiseleli bexesha elizeleyo.
9. Amava amaNgqina kaYehova eJamani yamaNazi angqina njani ukuba anenkalipho nangona enoxolo?
9 Ingqibelelo nobundilele bamaNgqina kaYehova eJamani ngethuba lolawulo lwamaNazi isaqhubeka inikela ubungqina bokuthanda kwawo uThixo noxolo kude kube ngulo mzuzu, nangona sekudlule iminyaka engaphezu kwengama-50. Incwadana epapashwe yiUnited States Holocaust Memorial Museum eWashington, D.C., ithi: “AmaNgqina kaYehova anyamezela intshutshiso eqatha ebudeni bolawulo lwamaNazi. . . . Inkalipho eyaboniswa yinkoliso yawo ngokungavumi [ukulahla unqulo lwawo], nangona ayethuthunjiswa, ephethwe gadalala kwiinkampu zoxinaniso, yaye maxa wambi ade abulawe, yawenza othulelw’ umnqwazi ngabantu belo xesha.” Yandula ke ihlabela mgama isithi: “Ekukhululweni kwawo ezinkampini, amaNgqina kaYehova aqala apho ebeyeke khona nomsebenzi wawo, ehambahamba phakathi kwabo babesindile, eguqula abantu.”
Inguqulelo Enkulu Ngakumbi
10. (a) Yiyiphi inguqulelo enkulu efunekayo ukuze kubekho uxolo lokwenyaniso? (b) Oku kwafanekiselwa njani kwincwadi kaDaniyeli?
10 Ngaba oku kuthetha ukuba amaNgqina kaYehova akholelwa kwelokuba anokuzisa uxolo ehlabathini lonke ngokuguqula inginginya yabantu ikholelwe kubundilele bamaKristu? Nakanye! Ukuze kubuyiselwe uxolo kulo mhlaba, kufuneka kubekho inguqulelo enkulu ngakumbi. Yiyiphi leyo? Ulawulo lomntu olubangela iyantlukwano, ingcinezelo nogonyamelo lumele ludedele ulawulo loBukumkani bukaThixo, uYesu awafundisa abafundi bakhe ukuba babuthandazele. (Mateyu 6:9, 10) Kodwa kuya kwenzeka njani oko? Kwiphupha elaphefumlelwa nguThixo, umprofeti uDaniyeli wabona ukuba kwimihla yokugqibela, uBukumkani bukaThixo, njengelitye elikhulu ‘elazithwebula kungengazandla zomntu’ laliza kuhlekeza umfanekiso omkhulu oqingqiweyo owawumela ulawulo lwabantu lwezobupolitika emhlabeni. Wandula ke wavakalisa esithi: “Ngemihla yabo kumkani, uThixo wamazulu uya kumisa ubukumkani obungayi konakala naphakade. Obo bukumkani abuyi kusala nabantu bambi; buya kuzicola buzigqibe zonke ezo zikumkani, bona bume ngonaphakade.”—Daniyeli 2:31-44.
11. UYehova uya kusebenzisa ntoni ukuzisa inguqulelo efunekayo ukuze kubekho uxolo?
11 Kutheni kuya kubakho le nguqulelo ingaka ehlabathini? Kungenxa yokuba uYehova uye wathembisa ukuba uya kuwucoca wonke lo mhlaba kubo bonke abo bawungcolisayo nabawonakalisayo. (ISityhilelo 11:18) Le nguqulelo iya kwenzeka ngemfazwe kaYehova yobulungisa nxamnye noSathana nehlabathi lakhe elingendawo. KwiSityhilelo 16:14, 16 sifunda oku: “Enyanisweni, [amazwi aphefumlelweyo angahlambulukanga] angamazwi aphefumlelwe ziidemon nawenza imiqondiso, ibe aya kookumkani [abalawuli bezobupolitika] bomhlaba omiweyo uphela, ukubahlanganisela ndawonye kwimfazwe yemini enkulu kaThixo uSomandla. Yaye abahlanganisela ndawonye kwindawo ebizwa ngesiHebhere ngokuba yiHar–Magedon.”
12. Iya kuba njani iArmagedon?
12 Iya kuba njani iArmagedon? Ayisayi kuba yimbubhiso yenyukliya, okanye intlekele ebangelwe ngabantu. Kunoko, yimfazwe kaThixo eya kuphelisa zonke iimfazwe zabantu ize itshayele kuthi tu bonke abo baphembelela iimfazwe ezinjalo. Le yimfazwe kaThixo eya kuzisa uxolo lokwenyaniso kwabo bathanda uxolo. Ewe, iArmagedon iyeza njengoko iyinjongo kaYehova leyo. Ayisayi kulibazisa. Umprofeti wakhe uHabhakuki waphefumlelwa ukuba abhale esithi: “Umbono ngowexesha elimisiweyo, ukhawulezela ekupheleni, angathethi wona amanga; ukuba uthe wazilazila, wulinde, kuba uya kuza, awuyi kubuya umva.” (Habhakuki 2:3) Sisenokuvakalelwa ngathi ayide ifike, kodwa uYehova ubambelele kucwangciso lwakhe. IArmagedon iyakuqhambuka ngexesha uYehova aye walimisela kusengaphambili.
13. UThixo uya kuqhubana njani nalo moni wokwenene, uSathana uMtyholi?
13 Eli nyathelo liqinisekileyo liya kuhlahl’ indlela yoxolo lokwenyaniso! Kodwa ukuze uxolo lokwenyaniso lumiselwe ngokuqinileyo, ikho enye into emele yenziwe—ukushenxiswa kwalowo ungunobangela weyantlukwano, intiyo nengcinezelo. Yaye koko kanye iziprofeto zeBhayibhile ezithi kuya kwenzeka ngokulandelayo—ukuphoswa kukaSathana enzonzobileni, umphembeleli wemfazwe noyise wobuxoki. Umpostile uYohane wasibona esi siganeko kumbono wesiprofeto, njengoko uchazwe kwiSityhilelo 20:1-3: “Ndabona ingelosi isihla iphuma ezulwini inesitshixo senzonzobila nomxokelelwane omkhulu esandleni sayo. Kwaye yayixhakamfula inamba, loo nyoka yantlandlolo, enguMtyholi noSathana, yaza yayibopha kangangeminyaka eliwaka. Yaye yayiphosa enzonzobileni ibe yayivala yaza yayitywina phezu kwayo, ukuze ingabi nakuzilahlekisa iintlanga kwakhona de kwaphela iminyaka eliwaka.”
14. Sinokuchazwa njani isenzo sikaYehova soloyiso ngokunxamnye noSathana?
14 Eli asilophupha nje; lidinga likaThixo—yaye iBhayibhile ithi: ‘Akunakwenzeka ukuba uThixo axoke.’ (Hebhere 6:18) Ngenxa yoku uYehova wayenokuthi ngomprofeti wakhe uYeremiya: “NdinguYehova owenza inceba, nesiko, nobulungisa, ehlabathini; ngokuba ndinanze ezo zinto; utsho uYehova.” (Yeremiya 9:24) UYehova wenza ngokusesikweni nangobulungisa, yaye uyavuyiswa luxolo aza kuluzisa emhlabeni.
Ulawulo LoMthetheli Woxolo
15, 16. (a) Ngubani otyunjwe nguYehova ukuze alawule njengoKumkani? (b) Luchazwa njani olo lawulo, yaye ngoobani abaya kuba nesabelo kulo?
15 Ukuqinisekisa ukuba bonke abo baphila kwilungiselelo lakhe loBukumkani baya kuba noxolo lokwenyaniso, uYehova uye wanikela ulawulo kuMthetheli Woxolo wokwenene, uYesu Kristu, njengoko kwaxelwa kwangaphambili kuIsaya 9:6, 7 apho sifunda oku: “Ngokuba sizalelwe umntwana, sinikwe unyana; ukuthethela kusesixhantini sakhe; igama lakhe kuthiwa nguMmangaliso, nguMcebisi, nguThixo oligorha, nguSonini-nanini, nguMthetheli woxolo, ukuba kwande ukuthethela oko, kubekho uxolo olungenakuphela . . . Ikhwele likaYehova wemikhosi liya kukwenza oko.” Kwakhona umdumisi wabhala eprofeta ngolawulo loxolo lukaMesiya esithi: “Malityatyambe ngemihla yakhe ilungisa, nobuninzi boxolo, ide ingabi sabakho inyanga.”—INdumiso 72:7.
16 Ukongezelela, i-144 000 labazalwana bakaKristu abathanjiswe ngomoya baya kulawula kunye naye emazulwini. Ezi ziindlalifa ezimanyene noKristu uPawulos awabhala ngazo esithi: “Ngokukokwakhe, uThixo onika uxolo uya kumtyumza uSathana kamsinya phantsi kweenyawo zenu. Ngamana ububele obungasifanelanga beNkosi yethu uYesu bungaba nani.” (Roma 16:20) Ewe, besemazulwini aba baya kuba nesabelo ekoyiseni kukaKristu umphembeleli wemfazwe, uSathana uMtyholi!
17. Yintoni esifanele siyenze ukuze silufumane njengelifa uxolo lokwenyaniso?
17 Ngoko ke umbuzo ngulo, Yintoni omele uyenze ukuze ufumane uxolo lokwenyaniso njengelifa? Uxolo lokwenyaniso luya kuza ngendlela kaThixo kuphela, yaye ukuze ulufumane umele uthabathe inyathelo eliqinisekileyo. Umele umamkele uMthetheli Woxolo uze usondele kuye. Oku kuthetha ukuba umele umamkele uKristu njengoMkhululi noMhlawuleli woluntu olunesono. UYesu wathetha la mazwi adumileyo: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani oqhelisela ukholo kuye angatshabalali kodwa abe nobomi obungunaphakade.” (Yohane 3:16) Ngaba ukulungele ukuba nokholo kuKristu Yesu njengeGosa likaThixo lokuzisa uxolo lokwenyaniso nosindiso? Alikho elinye igama phantsi kwezulu elinokuzisa uxolo lize liluqinisekise. (Filipi 2:8-11) Ngoba? Ngenxa yokuba uYesu unguLowo uTyunjwe nguThixo. Ungoyena mthunywa woxolo ubalaseleyo wakha wakho kulo mhlaba. Ngaba uya kumphulaphula uYesu uze ulandele umzekelo wakhe?
18. Yintoni esifanele siyenze ngokuvisisana namazwi kaYesu abhalwe kuYohane 17:3?
18 UYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumeleyo, uYesu Kristu.” (Yohane 17:3) Ngoku lixesha lokungenisa ulwazi oluchanileyo ngokuya rhoqo ezintlanganisweni zamaNgqina kaYehova kwiHolo yoBukumkani. Ezi ntlanganiso zifundisayo ziya kunishukumisela ukuba nabelane nabanye ngolwazi nangethemba eninalo. Nawe unako ukuba ngumthunywa woxolo lukaThixo. Unako ukulufumana uxolo ngokukholosa ngoYehova uThixo, njengoko kuchazwe kuIsaya 26:3 ngokweNew International Version ethi: “Uya kufaka uxolo olugqibeleleyo kongqondo izinzileyo, ngenxa yokuba ekholose ngawe.” Ufanele ukholose ngabani? “Kholosa ngoYehova ngonaphakade; kuba uYa, uYehova, uliliwa elingunaphakade.”—Isaya 26:4.
19, 20. Yintoni eya kufunyanwa ngabo namhlanje bafuna uxolo baze balusukele?
19 Zabalazela ngoku ukufumana ubomi obungunaphakade kwihlabathi elitsha likaThixo loxolo. KwiSityhilelo 21:3, 4, iLizwi likaThixo lisiqinisekisa lisithi: “Khangela! Intente kaThixo iseluntwini, yaye uya kuhlala nalo, ibe lona luya kuba ngamaqela abantu bakhe. NoThixo ngokwakhe uya kuba nalo. Kwaye uya kuzisula zonke iinyembezi emehlweni alo, yaye ukufa akusayi kubakho, kungayi kubakho nakukhedama nasikhalo nantlungu kwakhona. Izinto zangaphambili zidlule.” Ngaba elo asilokamva loxolo olilangazelelayo?
20 Ngoko khumbula idinga likaThixo. “Abalulamileyo baya kulidla ilifa ilizwe, baziyolise ngobuninzi boxolo. Gcina ogqibeleleyo, ukhangele othe tye; ngokuba izivela-mva zezomntu woxolo.” (INdumiso 37:11, 37) Xa lufika olo suku luvuyisayo, ngamana sinombulelo singathi, “Side salufumana uxolo lokwenyaniso ekugqibeleni! Siyambulela uYehova uThixo, umthombo woxolo lokwenyaniso!”
Ngaba Unokucacisa?
◻ Yintoni enokunceda ubani ukuze enze iinguqulelo kwindlela acinga nazenza ngayo izinto?
◻ AmaNgqina kaYehova, njengomntu ngamnye nanjengeqela, alubonakalise njani uthando analo ngoxolo lokwenyaniso?
◻ UYehova uya kuqhubana njani nabo bakhuthaza intiyo nemfazwe?
◻ Ulawulo loMthetheli Woxolo luya kulwenzela ntoni uluntu?
[Umfanekiso okwiphepha 14]
Amazwi kaIsaya akazalisekiswa ziZizwe Ezimanyeneyo, kodwa ngabo bathobela imfundiso kaYehova
[Umfanekiso okwiphepha 15]
La madoda mabini enza iinguqulelo ukuze asukele uxolo
URami Oved
UGeorg Reuter
[Umfanekiso okwiphepha 16]
Kuya kubakho uxolo kulawulo loMthetheli Woxolo