UYehova—UThixo Otyhila Iimfihlelo

“Kodwa ke kukho uThixo emazulwini, ozityhilayo iimfihlakalo.”—DANIYELI 2:28.

1, 2. (a) Wahluke njani uYehova kuTshaba lwakhe olukhulu? (b) Abantu bawuxelisa njani lo mahluko?

UYEHOVA, uThixo ongumongami nonothando wendalo iphela, okuphela koMdali okhoyo, unguThixo wobulumko nokusesikweni. Akukho mfuneko yokuba azifihle ukuba ungubani, afihle imisebenzi okanye iinjongo zakhe. Ngexesha lakhe naxa ethandile, uyazityhila ukuba ungubani na. Ngale ndlela wahlukile kuTshaba lwakhe, uSathana uMtyholi, ozama ukuzifihla ukuba ungubani neenjongo zakhe.

² Njengoko uYehova noSathana bengafani, banjalo nabanquli babo. Abo balandela ukhokelo lukaSathana babonakala ngobuqhinga nenkohliso. Bazama ukuzenza bhetele, ngoxa besenza imisebenzi yobumnyama. AmaKristu aseKorinte axelelwa ukuba angamangaliswa yile nto. “Kuba abantu abanjalo ngabapostile bobuxoki, abasebenzi benkohliso, beziguqulela ekubeni ngabapostile bakaKristu. Yaye akumangalisi oko, kuba noSathana ngokwakhe uhlala eziguqulela ekubeni yingelosi yokukhanya.” (2 Korinte 11:13, 14) Kwelinye icala, amaKristu akhangela kuKristu njengeNkokeli yawo. Ngoxa wayesemhlabeni wabubonakalisa ngokugqibeleleyo ubuntu bukaYise, uYehova uThixo. (Hebhere 1:1-3) Ngaloo ndlela, ngokulandela uKristu, amaKristu axelisa uYehova, uThixo wenyaniso, otyhila izinto nowokukhanya. Nakuwo akukho mfuneko yakuzifihla ukuba angoobani, afihle imisebenzi yawo okanye iinjongo zawo.—Efese 4:17-19; 5:1, 2.

3. Sinokuliphendula njani ibango lokuba abantu ababa ngamaNgqina kaYehova bayanyanzelwa ukuba bangene “kwihlelo eliyimfihlelo”?

³ Ngexesha elifanelekileyo, uYehova udandalazisa iinkcukacha ngeenjongo zakhe nangekamva ebelingaziwa ngabantu ngaphambili. Ngale ngqiqo unguThixo otyhila iimfihlelo. Ngenxa yoko, abantu abafuna ukumkhonza bayamenywa—ewe bayabongozwa—ukuba bafunde loo nkcazelo ayityhilileyo. Uhlolisiso lowe-1994 olwenziwa kumaNgqina ali-145 000 kwelinye lamazwe aseYurophu lwatyhila ukuba, ngokomlinganiselo, ngamnye wawo wenza uphando lobuqu ngeemfundiso zamaNgqina kaYehova kangangeminyaka emithathu ngaphambi kokwenza isigqibo sokuba liNgqina. Enza ukhetho ngokuzithandela kungekho ngokunyanzelwa. Ibe ayaqhubeka enenkululeko yokuzikhethela nokwenza ngokuzithandela. Ngokomzekelo, ngenxa yokuba iqaqobana elithile lingazange livumelane nemilinganiselo ephakamileyo yokuziphatha yamaKristu, kamva lagqiba kwelokuba liyeke ukuba ngamaNgqina. Noko ke, ibangel’ umdla into yokuba ebudeni beminyaka emihlanu edluleyo, uninzi lwabo babesakuba ngamaNgqina ngokuthe ngcembe luye lwathabatha amanyathelo okubuyela kulwalamano nakumsebenzi walo njengamaNgqina.

4. Yintoni engafanele iwathandabuzise amaKristu athembekileyo, yaye ngoba?

⁴ Kakade ke, ababuyi bonke abo babesakuba ngamaNgqina, ibe phakathi kwabo kukho abanye ababekwizikhundla zembopheleleko kwibandla lamaKristu. Oku akufanele kusimangalise, kuba kwanomnye wabona balandeli bakaYesu basondeleyo, umpostile uYudas, wakreqa. (Mateyu 26:14-16, 20-25) Kodwa ngaba esi sisizathu sokuba sithandabuze kwaubuKristu obo? Ngaba oku kuyenza ibe lilize impumelelo yamaNgqina kaYehova ekwenzeni umsebenzi wawo wokufundisa? Nakanye, kanye njengokuba isenzo sokungcatsha sikaYudas Skariyoti singazange sithintele iinjongo zikaThixo.

Unamandla Kodwa Unothando

5. Sazi njani ukuba uYehova noYesu bayabathanda abantu, yaye baye balubonakalisa njani olo thando?

⁵ UYehova nguThixo wothando. Uyabakhathalela abantu. (1 Yohane 4:7-11) Nangona ekwisikhundla esiphakamileyo, uyakuvuyela ukwakha ubuhlobo nabantu. Ngokuphathelele omnye wabakhonzi bakhe bamandulo, sifunda oku: “‘UAbraham wakholwa kuYehova, kwaza kwabalelwa kuye njengobulungisa,’ ibe wabizwa ngokuthi ‘umhlobo kaYehova.’” (Yakobi 2:23; 2 Kronike 20:7; Isaya 41:8) Njengoko abahlobo abangabantu bencokola ngemibandela yobuqu, okanye iimfihlelo, wenjenjalo noYehova kubahlobo bakhe. Ngokuphathelele lo mba uYesu waxelisa uYise, kuba wazakhela ubuhlobo nabafundi bakhe waza wabaxelela iimfihlelo. Wabaxelela oku: “Andisanibizi ngokuthi ningamakhoboka, ngenxa yokuba ikhoboka alikwazi oko inkosi yalo ikwenzayo. Kodwa ndinibize ngokuthi ningabahlobo, ngenxa yokuba zonke izinto endizive kuBawo ndizazisile kuni.” (Yohane 15:15) Inkcazelo eyimfihlo, okanye “iimfihlelo,” ezigcinwe nguYehova, nguNyana wakhe kunye nabahlobo babo zibamanyanisa kwiqhina elomeleleyo lothando nozinikelo.—Kolose 3:14.

6. Kutheni kungeyomfuneko ukuba uYehova afihle iinjongo zakhe?

⁶ Intsingiselo yegama elithi Yehova, elithetha “Obangela Kubekho,” ibonisa amandla akhe okuba yiyo nayiphi na into afuna ukuba yiyo ukuze azalisekise injongo yakhe. Ngokungafaniyo nabantu, akuyomfuneko ukuba uYehova afihle iinjongo zakhe enoloyiko lokuba abanye basenokukwazi ukumthintela ekuzizalisekiseni. Akanakuze nje asilele, ngoko inkoliso yeenjongo zakhe uyityhila elubala kwiLizwi lakhe, iBhayibhile. Uyathembisa: “Ilizwi lam . . . aliyi kubuyela kum lilambatha, lingakwenzanga endikuthandayo, lingakuphumelelisanga oko ndilithumela kuko.”—Isaya 55:11.

7. (a) Yintoni eyaxelwa kwangaphambili nguYehova e-Eden, yaye uSathana wamngqina njani enyanisile uThixo? (b) Usoloko uzaliseka njani umgaqo okweyesi-2 kwabaseKorinte 13:8?

⁷ Kamsinya emva kwemvukelo yase-Eden, uYehova washwankathela umphumo wembambano eyayiphakathi kwakhe noTshaba lwakhe, uSathana. IMbewu eyayithenjiswe nguThixo yayiza kulunywa kabuhlungu, kodwa ingafi, ngoxa uSathana ekugqibeleni wayeza kutyunyuzwa afe. (Genesis 3:15) Ngowama-33 C.E., ngokwenene uMtyholi wayiluma iMbewu, uKristu uYesu, ngokumbulala. Ngokwenjenjalo, uSathana wazalisekisa iSibhalo yaye kwangaxeshanye engqina uYehova enguThixo wenyaniso, nangona oko kwakungeyonjongo kaSathana. Ukuthiya kwakhe inyaniso nobulungisa, kwakunye nesimo sakhe sengqondo sokuba nekratshi nokungaguquki, zabangela ukuba enze kanye oko uThixo wayekuxele kwangaphambili ukuba wayeya kukwenza. Ewe, kubo bonke abachasi benyaniso, kwanakuSathana ngokwakhe, lo mgaqo ulandelayo uyinyaniso: “Asinakwenza nto nxamnye nenyaniso, kodwa kuphela sinokwenzela inyaniso.”—2 Korinte 13:8.

8, 9. (a) Yintoni eyaziwa nguSathana, kodwa ngaba olo lwazi lukubeka engozini ukuzalisekiswa kweenjongo zikaYehova? (b) Sisiphi isilumkiso esicacileyo esityeshelwa ngabachasi bakaYehova, yaye ngoba?

⁸ Ekubeni uBukumkani bukaThixo basekwa ngokungabonakaliyo ngowe-1914, ISityhilelo 12:12 siye sasebenza: “Ngenxa yoku chulumancani, nina mazulu nani nihlala kuwo! Yeha kuwo umhlaba nakulo ulwandle, ngenxa yokuba uMtyholi uhlile weza kuni, enomsindo omkhulu, esazi ukuba unesihlandlo esifutshane sexesha.” Noko ke, ngaba ukwazi ukuba ixesha lakhe lifutshane kubangela uSathana aguqule ikhondo lakhe? Oko bekuya kuthetha ukuba uSathana uyavuma ukuba uYehova unguThixo wenyaniso nokuba unguMlawuli Ophakamileyo, nguye yedwa ofanele anqulwe. Noko ke, uMtyholi akazimiselanga kuvuma ukuba woyisiwe, nangona eyazi yonke loo nto.

⁹ UYehova ukutyhila elubala okuya kwenzeka xa uKristu eya kugweba inkqubo yehlabathi likaSathana. (Mateyu 24:29-31; 25:31-46) ILizwi lakhe livakalisa oku: “Xa sukuba besithi: ‘Uxolo nonqabiseko!’ iza kwandula ke intshabalalo yequbuliso ibafikele ngephanyazo kanye njengenimba yenkxwaleko kumfazi omithiyo.” (1 Tesalonika 5:3) Abalandeli bakaSathana bayasityeshela esi silumkiso sicacileyo. Bamfamekiswa ziintliziyo zabo ezingendawo, yaye oku kuyabathintela ekuguqukeni kwikhondo labo elingendawo nasekuguquleni amacebo namaqhinga abo okuzama ukoyisa iinjongo zikaYehova.

10. (a) Isenokuba izaliseke ukusa kuwuphi umkhamo eyoku-1 yabaseTesalonika 5:3, kodwa bafanele basabele njani abantu bakaYehova? (b) Kutheni abantu abangenalukholo besenokuba nenkalipho ngakumbi kwixesha elizayo ekuchaseni abantu bakaThixo?

¹⁰ Ngokukodwa ukususela ngowe-1986, xa iZizwe Ezimanyeneyo zavakalisa uNyaka Woxolo Wezizwe Ngezizwe, uxolo nonqabiseko luye lwaba ngundaba-mlonyeni ehlabathini. Kuye kwathatyathwa amanyathelo acacileyo okuzama ukugcina uxolo ehlabathini, ibe aye abonakala enempumelelo ukusa kumlinganiselo othile. Ngaba leyo yinzaliseko epheleleyo yeso siprofeto, okanye ngaba sinokulindela olunye uhlobo lwezibhengezo ezothusayo kwixesha elizayo? UYehova uza kuwucacisa lo mba ngexesha lakhe elifanelekileyo. Okwangoku, masihlale sivukile ngokomoya, ‘sibulindele yaye sibugcine ngokusondeleyo engqondweni ubukho bemini kaYehova.’ (2 Petros 3:12) Njengoko ixesha lihamba yaye uxolo nonqabiseko lusengumbandela osematheni, bambi abanolwazi ngesi silumkiso, kodwa abakhetha ukusityeshela, basenokuqinisa iintamo becinga ukuba uYehova akayi, okanye akanako, ukulizalisekisa ilizwi lakhe. (Thelekisa INtshumayeli 8:11-13; 2 Petros 3:3, 4.) Kodwa amaKristu okwenyaniso ayazi ukuba uYehova uya kuyizalisekisa injongo yakhe!

Ukuba Nentlonelo Efanelekileyo Ngabameli Abasetyenziswa NguYehova

11. Yintoni eyafundwa nguDaniyeli noYosefu ngoYehova?

¹¹ Xa uKumkani uNebhukadenetsare, umlawuli woBukhosi beBhabhiloni Entsha, waphupha iphupha elintsonkothileyo awayengasalikhumbuli, wacela uncedo. Ababingeleli, abakhwitsi, nabakhafuli bakhe babengakwazi ukumxelela iphupha lakhe yaye bengakwazi nokumxelela intsingiselo yalo. Noko ke, umkhonzi kaThixo uDaniyeli wakwazi ukukwenza oko, nangona wavuma ngokulula ukuba elo phupha nentsingiselo yalo wayengalityhilanga ngobulumko bakhe. UDaniyeli wathi: “Kukho uThixo emazulwini, ozityhilayo iimfihlakalo, onokumazisa ukumkani uNebhukadenetsare okuya kubakho ekupheleni kwemihla.” (Daniyeli 2:1-30) Kwiinkulungwane eziliqela ngaphambi koko, uYosefu, omnye umprofeti kaThixo, wayebonise ngendlela efanayo ukuba uYehova unguMtyhili weemfihlelo.—Genesis 40:8-22; Amosi 3:7, 8.

12, 13. (a) Ngubani obengumprofeti kaThixo obalaseleyo, yaye kutheni uphendula ngaloo ndlela nje? (b) Ngoobani namhlanje abakhonza ‘njengamagosa eemfihlelo ezingcwele zikaThixo,’ yaye sifanele sibajonge njani?

¹² Oyena mprofeti kaYehova mkhulu kwabakhe bakhonza emhlabeni nguYesu. (IZenzo 3:19-24) UPawulos wachaza: “UThixo, owathetha kwakudala kangangezihlandlo ezininzi nangeendlela ezininzi kookhokho bethu ngabaprofeti, uye ekupheleni kwale mihla wathetha nathi ngoNyana, aye wammisela njengendlalifa yezinto zonke, nathe ngaye wenza iinkqubo zezinto.”—Hebhere 1:1, 2.

¹³ UYehova wathetha namaKristu okuqala esebenzisa uNyana wakhe, uYesu, owawachazela iimfihlelo zikaThixo. UYesu wawaxelela oku: “Nina nikunikiwe ukuziqonda iimfihlelo ezingcwele zobukumkani bukaThixo.” (Luka 8:10) Kamva uPawulos wathetha ngamaKristu athanjisiweyo “njengabangaphantsi kuKristu namagosa eemfihlelo ezingcwele zikaThixo.” (1 Korinte 4:1) Namhlanje, amaKristu athanjisiweyo ayaqhubeka enikela loo nkonzo, eyila udidi lwekhoboka elithembekileyo neliyingqondi elithi lilungiselele ukutya kokomoya ngexesha elifanelekileyo lisebenzisa iQumrhu lalo Elilawulayo. (Mateyu 24:45-47) Ukuba sibahlonela ngokunzulu abaprofeti ababephefumlelwe nguThixo bamandulo, yaye ngokukodwa uNyana kaThixo, ngaba asifanele simhlonele namphi na ummeli ongumntu osetyenziswa nguYehova namhlanje ukutyhila inkcazelo yeBhayibhile ebaluleke gqitha kubantu bakhe kula maxesha amanqam?—2 Timoti 3:1-5, 13.

Ngaba Ifanele Ivakaliswe Okanye Ifihlwe?

14. Kuxa kutheni xa amaKristu esenza umsebenzi wawo emfihlekweni, ibe ngaloo ndlela alandela umzekelo kabani?

¹⁴ Ngaba ukutyhila izinto elubala kukaYehova kuthetha ukuba amaKristu afanele ngalo lonke ixesha naphantsi kwazo zonke iimeko ayityhile yonke into ayaziyo? Kaloku, amaKristu alandela icebiso likaYesu kubapostile bakhe lokuba ‘alumke njengeenyoka ukanti abe msulwa njengamahobe.’ (Mateyu 10:16) Xa exelelwa ukuba akanakumnqula uThixo kangangoko izazela zawo ziwavumela, amaKristu ayaqhubeka ‘ethobela uThixo,’ kuba eqonda ukuba akakho ummeli ongumntu onelungelo lokubekela unqulo lukaYehova imiqathango. (IZenzo 5:29) UYesu wakubonisa ukufaneleka kwale nto. Sifunda oku: “Ngoku emva kwezi zinto uYesu waqhubeka ehamba-hamba eGalili, kuba wayengafuni kuhamba-hamba kwelakwaYuda, ngenxa yokuba amaYuda ayefuna ukumbulala. Noko ke, umthendeleko wamaYuda, umthendeleko weetabanekile, wawukufuphi. Ngoko ke uYesu wathi kubo [abazalwana bakhe bokwenyama ababengengomakholwa]: . . . ‘Nyukani niye emthendelekweni; mna andikazi kunyuka ndiye kulo mthendeleko, ngenxa yokuba ixesha lam elililo alikafiki ngokuzeleyo.’ Ngoko emva kokubaxelela ezi zinto, wahlala eGalili. Kodwa xa abantakwabo babenyukile ukuya emthendelekweni, wandula ke naye wazinyukela, kungekhona ekuhleni kodwa ngokungathi kusemfihlekweni.”—Yohane 7:1, 2, 6, 8-10.

Ngaba Sifanele Siyivakalise Okanye Singayithethi?

15. UYosefu wabonisa njani ukuba ukugcina imfihlo maxa wambi yinto ebonakalisa uthando?

¹⁵ Kwezinye iimeko, ukugcina into ingumbandela oyimfihlo akubobulumko nje kuphela kodwa ikwakukubonakalisa uthando. Ngokomzekelo, wasabela njani uYosefu, uyise ongumondli kaYesu, xa wafumanisa ukuba lowo wayethembisene ngomtshato naye, uMariya, wayekhulelwe? Sifunda oku: “Noko ke, uYosefu indoda yakhe, ngenxa yokuba wayelilungisa kwaye engafuni ukumenza umboniso wasesidlangalaleni, wazimisela ukuqhawula umtshato ngokufihlakeleyo.” (Mateyu 1:18, 19) Hayi indlela ekwakuya kubonakalisa ukungabi nabubele ngayo ukumhlazisa esidlangalaleni!

16. Yiyiphi imbopheleleko abanayo abadala, kunye nawo onke amanye amalungu ebandla, ngokuphathelele imibandela eyimfihlo?

¹⁶ Izinto eziyimfihlo ezinokubangela ukuphoxeka okanye ubuhlungu azifanele zityhilwe kubantu abangafanelekanga. Abadala abangamaKristu bayakukhumbula oku xa bemele banikele isiluleko sobuqu okanye bathuthuzele amanye amaKristu okanye ngokunokwenzeka bawohlwaye ngenxa yokona ngokunzulu kuYehova. Kuyimfuneko ukuyisingatha ngendlela engokweZibhalo le mibandela; ukutyhila iinkcukacha zobuqu kwabo bangabandakanyekanga akuyomfuneko yaye kukuswela uthando. Ngokuqinisekileyo, amalungu ebandla lamaKristu akayi kuzama ukuphanda inkcazelo yobuqu kubadala kodwa aya kuyihlonela imbopheleleko yabadala yokugcina izinto zabantu eziyimfihlo. IMizekeliso 25:9 ithi: “Ubambene nommelwane wakho, bambana naye; ke ucweyo lomnye musa ukuluhlakaza.”

17. Kutheni amaKristu ngokuqhelekileyo eyigcina imibandela eyimfihlo, kodwa kutheni enokungenjinjalo ngalo lonke ixesha?

¹⁷ Lo mgaqo ukwasebenza nakwisangqa sentsapho okanye phakathi kwabahlobo abasenyongweni. Ukugcina imibandela ethile iyimfihlelo kubalulekile ukuze kuphetshwe ukungaqondani nolwalamano olungeluhle. “Umoya ovela ngasentla uvelisa isiphango; ulwimi oluhlebayo luvelisa ubuso obujalileyo.” (IMizekeliso 25:23) Kakade ke, ukunyaniseka kuYehova nakwimigaqo yakhe yobulungisa, kunye nothando ngabo bonayo, maxa wambi kusenokufuna kuxelelwe abazali, abadala abangamaKristu, okanye abo basemagunyeni kwanezinto zobuqu.a Kodwa kwiimeko ezininzi, umKristu uyazigcina iimfihlelo zobuqu zabanye, ezikhusela njengoko nabanye besenjenjalo kwezakhe.

18. Ziziphi iimpawu ezintathu zamaKristu ezinokusinceda senze isigqibo ngoko sifanele sikuthethe noko singafanele kukuthetha?

¹⁸ Ngamafutshane, umKristu uxelisa uYehova ngokugcina eminye imibandela iyimfihlo xa kuyimfuneko, aze ayityhile kuphela xa kufanelekile. Xa esenza isigqibo ngoko amele akuthethe nangamele akuthethe, ukhokelwa kukuthobeka, ukholo nothando. Ukuthobeka kuyamthintela ukuba azenze obaluleke ngokubaxiweyo, ezama ukucel’ injezu kwabanye ngokubaxelela konke akwaziyo okanye ngokuvuselela umdla wabo ngeemfihlelo angenakubaxelela zona. Ukuba nokholo kwiLizwi likaYehova nakwibandla lamaKristu kumshukumisela ukuba ashumayele inkcazelo yeBhayibhile elungiselelwe nguThixo ngoxa elumkele ukuthetha izinto ezinokubacaphukisa abanye. Ewe, uthando lumshukumisela ukuba athethe ngokungafihlisi ngezinto ezizukisa uThixo nekufuneka bezazile abantu ukuze bafumane ubomi. Kwelinye icala, uyayikhusela imibandela eyimfihlo eqonda ukuba ngokuqhelekileyo ukuyityhila bekuya kuthetha ukuswela uthando.

19. Liliphi ikhondo elinceda ekufaniseni amaKristu okwenyaniso, ibe liphumela entwenini?

¹⁹ Le mbono ilungeleleneyo inceda ekufaniseni amaKristu okwenyaniso. Akamfihli uThixo ngokungambizi ngegama okanye ngemfihlelo engachazekiyo yemfundiso kaBathathu Emnye. Oothixo abangaziwayo bafumaneka kunqulo lobuxoki, kungekhona koluyinyaniso. (Bona IZenzo 17:22, 23.) AmaNgqina kaYehova athanjisiweyo alixabisa ngokwenene ilungelo lokuba ‘ngamagosa eemfihlelo ezingcwele zikaThixo.’ Ngokuzityhila elubala ezi mfihlelo kwabanye, anceda abantliziyo zinyanisekileyo ukuba bafune ubuhlobo noYehova.—1 Korinte 4:1; 14:22-25; Zekariya 8:23; Malaki 3:18.

[Imibhalo esemazantsi]

Ubuya Kuphendula Uthini?

◻ Kutheni kungeyomfuneko ukuba uYehova afihle iinjongo zakhe?

◻ UYehova uzityhila koobani iimfihlelo zakhe?

◻ Yiyiphi imbopheleleko anayo amaKristu ngokuphathelele imibandela eyimfihlo?

◻ Ziziphi iimpawu ezintathu eziya kunceda amaKristu azi oko amele akuthethe noko angamele akuthethe?

[Umfanekiso okwiphepha 8]

UYehova utyhila iimfihlelo ngeLizwi lakhe